ᖁᒡᓗᖅᑑᕐᒥᐅᑕ ᓂᕈᐊᓕᒑᔪᑦ ᐃᒥᐊᓗᖕᒧᑦ ᐱᖁᔭᕆᔭᐅᔪᓄᑦ

For English version, see Kugluktuk to vote on local liquor regulations

ᖁᒡᓗᖅᑑᕐᒥᐅᑕᑦ ᓂᕈᐊᕆᐊᕐᑐᓛᓯᔪᑦ ᐱᓇᓱᐊᕈᓯᐅᓂᐊᕐᑐᒥᓐ ᐃᓱᒪᓕᐅᕆᓇᓱᒡᓗᑎᒃ ᓄᓇᓖᑦ ᖃᔅᓯᓂᒃ ᐃᒥᐊᓗᒃᑖᖃᑦᑕᕆᐊᖃᕐᓂᖏᓐᓂᒃ.

ᓄᓇᕗᒥᑦ ᓄᓇᓖᑦ ᓂᕈᐊᖃᑦᑕᕐᒪᑕ ᐃᒥᐊᓗᒃᑖᖃᑦᑕᕐᓂᖅ ᐃᓱᒪᕐᓲᑎᑐᐃᓐᓇᐅᓗᓂ, ᐃᓱᒪᕐᓲᑎᐅᙱᓪᓗᓂ ᐅᕝᕙᓘᓐᓃᑦ ᐱᑖᖃᑦᑕᙱᓪᓗᑎᒃ.

ᐃᒥᐊᓗᖕᒧᑦ ᖃᓄᐃᑦᑕᐃᓕᔾᔪᑎᖃᕐᑐᓂᒃ ᓄᓇᓕᖕᓂ, ᓄᓇᖃᖅᑐᑦ ᑎᑭᓴᐃᔪᓐᓇᖅᑎᑕᐅᔪᖅ ᐅᓄᕐᓂᖏᓐᓂ ᐃᓱᖃᖅᑐᓂᒃ ᐅᕝᕙᓘᓐᓃᑦ ᐃᒥᐊᓗᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᖏᕐᑕᐅᔭᕆᐊᖃᖅᐸᒃᖢᑎᒃ.

ᖁᒡᓗᖅᑑᖅ ᐃᓱᒪᕐᓱᖅᑎᑕᐅᓯᒪᔪᖅ 2018-ᒥ ᐱᒋᐊᖅᖢᑎᒃ ᑖᒃᑯᐊ ᓄᓇᖃᖅᑐᑦ ᓂᕈᐊᖅᑎᓪᓗᒋᑦ ᐃᒥᐊᓗᓕᕆᔨᓄᑦ ᑲᑎᒪᔨᖃᕈᒪᙱᖢᑎᒃ.

ᐊᕐᕌᒍᑦ ᐱᖓᓱᑦ ᓇᑉᐸᕐᓗ ᐊᓂᒍᕐᑎᓪᓗᒍ ᓄᓇᓖᑦ ᓂᕈᐊᖅᑎᑕᐅᓂᐊᕐᑐᖅ ᐃᒥᐊᓗᒃᑖᕋᓱᖕᓂ ᐊᐅᓚᑕᐅᓂᐊᕐᒪᖔᑦ ᖃᔅᓯᐅᔪᓐᓇᕐᓂᖏᓐᓂ 167-ᓂ ᓄᓇᖃᖅᑐᓂᒃ ᐊᑎᓕᐅᖅᑐᖄᓪᓚᓚᐅᖅᖢᓂ ᓂᕈᐊᖁᔨᓂᕐᒧᑦ, ᐅᖃᓚᐅᕐᑐᖅ ᔪᐋᓐ ᕚᒃᓄ, ᑐᑭᒧᐊᖅᑎᑦᑎᔨ ᐱᓕᕆᕝᕕᖕᓄᑦ ᐊᑐᐊᒐᓂᒃ ᓄᓇᕗᒥᑦ ᒐᕙᒪᒃᑯᑦ ᑮᓇᐅᔭᓕᕆᔨᖏᓐᓂ..

ᕚᒃᓄ ᖁᒡᓗᖅᑑᒧᐊᓚᐅᖅᑐᖅ ᑲᑎᒪᖃᑎᖃᕆᐊᖅᑐᖅᖢᓂ ᓄᓇᖃᖅᑐᓂᒃ ᓂᕈᐊᕐᓇᐅᓛᕐᓂᖓᓂᒃ ᒪᐃ 4-ᒥ.

“ᖃᐃᓯᒪᔪᒍᑦ ᐅᖃᖃᑎᖃᕈᒪᓪᓗᑎᒃ ᓄᓇᖃᖅᑐᓂᒃ, ᐃᓱᒪᒋᔭᖏᓐᓂᒃ ᐅᖃᓪᓚᒍᓐᓇᖁᓪᓗᑎᒍᑦ ᐊᒻᒪᓗ ᓂᕈᐊᕐᓇᐅᓕᕐᐸᑦ ᑐᑭᓯᓯᒪᓂᕐᓴᐅᓗᑎᒃ ᐃᓱᒪᓕᐅᕆᔪᓐᓇᕐᓂᐊᕐᒪᑕ,” ᐅᖃᕐᑐᖅ.

ᐊᓯᙳᖅᑎᑕᐅᔪᒪᔪᔾᔪᑎ ᓄᓇᖃᖅᑐᑦ ᑎᑭᓴᐃᔪᓐᓇᕐᓗᑎᒃ 1,775 ᓖᑕᓂ ᐃᒥᐊᓗᖕᓂ ᐱᓇᓱᐊᕈᓰᒃ ᒪᕐᕉᒃ ᐊᓂᒍᕌᖓᑦ.

ᓄᓇᖃᖅᑐᑦᑕᐅᖅ ᓂᐅᕕᕈᓐᓇᕋᔭᕐᑐᖅ 48 ᐃᐳᐃᑦᑐᓂᒃ ᐱᐊᓂᒃ ᐊᖏᓂᓕᖕᓂ 355 ᒥᓕᓖᑕᓂᒃ ᐊᒻᒪᓗ ᐃᒥᐊᓗᒃᑖᕈᓐᓇᕐᓗᑎ 8 ᐳᓴᓐᑎᒥ ᓴᙱᓂᓕᖕᓂ ᐊᖏᓂᖓᒍᑦ ᐅᕝᕙᓘᓐᓃᑦ 3.75 ᓖᑕᓂ ᕗᐊᐃᓐ ᐱᓇᓱᐊᕈᓰᒃ ᒪᕐᕉᒃ ᐊᓂᒍᕌᖓᑕ.

ᐊᓯᔾᔨᕈᑎᐅᖁᔭᐅᔪᓂᒃ ᐊᑐᓕᖅᑎᑦᑎᓂᐊᕐᓗᑎᒃ ᓂᕈᐊᖅᑐᓂᒃ 60 ᐳᓴᓐᑎᖏᑦ ᓂᕈᐊᕐᓯᒪᔭᕆᐊᖃᖅᑐᑦ “ᐄ”-ᓚᓗᑎᑦ.

ᓂᕈᐊᕐᑎᑕᐅᓛᕐᑐᑦ ᒪᐃ 16-ᒥ 9:00-ᒥ ᐅᓪᓛᒃᑯᑦ ᐱᒋᐊᕐᓗᓂ 7:00 ᑎᑭᓪᓗᒍ ᐱᙳᐊᕐᕕᒃᒥᑦ. ᓯᕗᓂᐊᒍᑦ ᓂᕈᐊᕈᓐᓇᕐᒥᔪᑦ ᒪᐃ 9-ᒥ 12:00 ᐅᓪᓗᒃᑯ ᐊᒻᒪ 7:00 ᐅᓐᓄᒃᑯᑦ ᐊᑯᓐᓂᖓᒍᑦ ᐳᓛᕐᕕᒃᒥᑦ.

ᖁᒡᓗᖅᑑᖅ ᐃᓚᒋᔭᐅᔪᖅ 7-ᓂ ᓄᓇᕗᒥᑦ ᓄᓇᓕᖕᓂ ᐃᒥᐊᓗᒃᑖᕈᓐᓇᖅᖢᑎᒃ ᖃᖓᑐᐃᓐᓇᒃᑯᑦ. ᐅᑯᐊᓕ ᐊᓯᖏᑦ 18 ᓄᓇᓖ ᐊᑐᖅᐸᒃᖢᑎᒃ ᑲᑎᒪᔨᓂᒃ ᐅᕝᕙᓘᓐᓃᑦ ᐃᓱᒪᕐᓱᓗᐊᕐᓇᙱᓐᓂᕐᓴᓂᒃ.

ᖃᒪᓂᑦᑐᐊᖅᑕᐅᖅ ᐃᓱᒪᓱᕐᕕᐅᖕᒪᑦ ᐊᒻᒪᓗ ᖃᖓᑦᑎᐊᓵᖅ ᓂᕈᐊᖅᑎᑦᑎᓚᐅᕐᓯᒪᓪᓗᑎᒃ ᓂᕈᐊᖅᑐᓪᓗ 60 ᐳᓴᓐᑎᒥ ᑐᖔᓃᓐᓂᕐᓴᐅᓚᐅᖅᖢᑎᒃ ᐊᓯᙳᖅᑦᑎᑦᑎᔪᒪᔪᑦ.

ᓄᓇᕗᒥᑦ ᓄᓇᓖᑦ ᓂᕈᐊᕈᓐᓇᕐᒪᑕ ᐃᒥᐊᓗᓕᕆᓂᕐᒧᑦ ᒪᓕᒐᕐᓂ ᐊᓯᙳᖅᑎᑦᑎᔪᒪᒍᑎ ᐊᕐᕌᒍᑦ ᐱᖓᓱᑦ ᐊᓂᒍᕌᖓ 20-ᓂ ᓄᓇᖃᖅᑐᓂᒃ ᐊᑎᓕᐅᖅᑐᖃᕐᐸᑦ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓄᑦ ᑐᓂᔭᐅᔪᒃᓴᓂᒃ, ᕚᒃᓄ ᐅᖃᕐᑐᖅ. ᑐᕿᖃᖅᑐᕐᓕ ᓄᓇᖃᖅᑐᑦ ᓂᕈᐊᕈᑎᕕᓂᕐᓂᒃ ᓈᒻᒪᒃᓴᙱᑉᐸᑕ ᐊᕐᕌᒍᓂ ᐱᖓᓱᓂᒃ ᐅᑕᖅᑭᔭᕆᐊᖃᖅᖢᑎᒃ ᓂᕈᐊᒃᑲᓐᓂᓚᐅᙱᓐᓂᖏᓐᓂᒃ.

“ᐅᓇ ᒐᕙᒪᒃᑯᓐᓄᑦ ᐃᓱᒪᓕᐅᕆᔭᐅᙱᑦᑐᖅ ᓂᕈᐊᕆᐊᖃᕐᓂᖅ,” ᐅᖃᕐᑐᖅ. “ᓂᕈᐊᕐᓂᖅ ᓄᓇᓕᖕᓂ ᐱᒋᐊᖅᑕᐅᓯᒪᔪᖅ ᐊᒻᒪᓗ ᐊᑎᓕᐅᖅᑎᑦᑎᑲᑕᖕᓂᕐᒥᙶᖅᖢᓂ.”

ᓇᐃᑏᓐ ᒪᒃᒪᓇᒥ, ᖁᒡᓗᖅᑑᕐᒥ ᒪᐃᔭᐅᑉ ᑐᒡᓕᖓ, ᐅᖃᓚᐅᕐᑐᖅ ᐅᓄᕐᑐᑦ ᓄᓇᓖᑦ ᓈᒻᒪᒃᓴᙱᓐᓂᕋᕐᓯᒪᖕᒪᑕ ᑲᑎᒪᔨᓄᑦ ᐃᒥᐊᓗᖅᑖᖃᑦᑕᕐᓂᖅ ᒪᓕᒐᖃᙱᓐᓂᖓᓄᑦ ᑕᐃᒪᙵ ᑕᐃᒪᐃᓕᓚᐅᕐᓯᒪᒐᒥ, ᐅᖃᐅᓯᖃᖅᖢᑎᒃ ᐃᓲᒫᓘᑎᓂᒃ ᒪᑯᓂᖓ ᐱᕋᔭᑲᑕᒃᑐᑦ ᐅᓄᕐᓂᕐᓴᐅᓕᕐᓂᖏᓐᓂᒃ ᐊᒻᒪᓗ ᐃᒻᒥᓃᑲᑕᒃᑐᑦ ᐃᒥᐊᓗᖕᒥ ᐊᑐᑦᑎᐊᖏᓐᓂᕐᒧᑦ.

ᑲᑎᒪᔨᒃᑯᑦ ᐱᔪᓐᓇᕐᓂᖃᙱᒻᒪᑕ ᐃᒥᐊᓗᓕᕆᓂᕐᒧᑦ ᒪᓕᒐᕐᓂ.

“ᐊᕐᕌᒎᓕᕐᑐᓂᒃ ᐱᖓᓱᓂᒃ, ᐅᓄᕈᓘᔭᕐᑐᓂᒃ ᐃᓄᖕᓂ ᐅᐸᒃᑕᐅᓯᒪᒐᒪ ᖁᕕᐊᓱᙱᑦᑐᓂᒃ ᐊᒻᒪᓗ ᐋᖅᑭᒃᑕᐅᑲᐅᑎᒋᔪᓐᓇᕆᐊᒃᓴᖅ ᖃᐅᔨᓇᓱᒃᖢᑎᒃ ᑭᓯᐊᓂᓕ ᑕᐃᒪᓐᓇ ᐊᔪᕐᓇᖅᖢᓂ,” ᒪᒃᒪᓇᒥ ᐅᖃᕐᑐᖅ.

“ᑕᐃᒪᓕ ᐅᓇ ᐱᕕᒋᔪᓐᓇᓛᕐᑕᓯ ᑕᒪᓐᓇ ᐋᖅᑭᒍᓐᓇᖁᓪᓗᒍ ᑕᐃᒪᐃᖁᒐᓗᐊᕈᕕᐅᒃ ᐋᒃᑲᓘᓐᓃᑦ, ᑕᐃᒪᓕ ᐅᐸᒍᑎᓛᕐᐳᓯ ᐊᒻᒪ ᓂᕈᐊᕈᓐᓇᕐᓂᕐᓯ ᐊᑐᕐᑎᓪᓗᒍ.”

ᒪᒃᒪᓇᒥ ᐅᖃᓚᐅᙱᑦᑐᖅ ᖃᓄᖅ ᓂᕈᐊᕐᓂᐊᕐᓂᕐᒥᓂᒃ, ᑭᓯᐊᓂᓕ ᐅᖃᓚᐅᕐᑐᖅ “ᓱᕙᓕᑭᐊᖅ” ᓂᕈᐊᕈᓐᓇᖅᑐᑦ ᐊᕐᕌᒍᖃᖅᑐᑦ 19-ᓂ ᐅᖓᑖᓄᑦ ᓂᕈᐊᕐᓇᐅᑎᓪᓗᒍ ᓱᖁᑎᒃᓴᙱᑦᑐᑦ ᖃᓄᑐᐃᓐᓇ ᑕᒪᑐᒥᖓ ᐃᓱᒪᖃᕋᓗᐊᖅᖢᑎᒃ.

“ᐊᓯᙳᖅᑎᑦᑎᔪᓐᓇᖅᑐᓯ ᐃᒥᐊᓗᖃᑦᑕᕈᓯᕐᒥ ᓄᓇᔅᓯᓐᓂ ᓂᕈᐊᕆᐊᖅᑐᕐᓗᓯ,” ᐅᖃᕐᑐᖅ.

“ᖃᓄᑐᐃᓐᓇ ᐃᓱᒪᓕᐅᕆᓯᒪᒐᓗᐊᕈᕕᑦ ᐊᑏ ᓂᕈᐊᕈᑎᒋᔭᐃᑦ ᐊᑐᒻᒪᕆᖕᓂᐊᕐᑐᖅ.”