ᖁᕝᕕᐅᕐᓂᐅᔪᒥ, ᐅᒡᒍᐊᕐᓂᐅᔪᒥ ᐃᖅᑲᖅᑐᐃᕕᖕᒥ ᐃᓄᐊᖅᓯᔨᐅᔪᖅ ᐃᓅᓱᒃᑐᒥ ᐊᕐᓇᒥᒃ ᐃᖅᑲᖅᑐᐃᔨᒧᑦ ᐃᖅᑲᖅᑐᖅᑕᐅᑎᓪᓗᒍ ᐃᓅᓯᓕᒫᖑᔪᒥ ᐊᓄᓪᓚᒃᓯᖅᑕᐅᓂᖓᓂ

For English version, see Tears, regret in Iqaluit courtroom as killer of teenage girl sentenced to life in prison

ᕿᐊᓱᙳᓇᖅᑐᒥ ᖃᓄᐃᑕᐅᓂᐊᕆᐊᒃᓴᖓᓄᑦ ᐃᖅᑲᖅᑐᖅᑕᐅᓂᖓᓂ ᐃᖃᓗᖕᓂ ᐋᒍᔅᑎ 25−ᒥ, ᐊᓈᓇᐅᔪᖅ 17-ᓂ-ᐅᑭᐅᓕᖕᒥ ᐃᓄᐊᖅᑕᐅᔪᒥ ᐱᕋᔭᒃᑕᐅᔪᒥ ᐅᖃᐅᓯᖃᓚᐅᖅᐳᖅ ᐅᒡᒍᐊᕐᓂᖓᓂ ᓴᐳᔾᔨᓯᒪᔪᓐᓇᓚᐅᙱᓐᓂᖓᓂ ᐸᓂᖕᒥᓂ ᐊᖑᒻᒥ ᐃᓄᐊᖅᓯᓚᐅᖅᑐᒥ.

ᔨᐊᕆ ᐅᓛᔪᕈᓗᒃ ᐊᓄᓪᓚᒃᓯᕐᓂᐊᖅᐳᖅ ᐃᓅᓯᓕᒫᖓᓐᓂ ᐸᓯᔭᐅᓂᖅᑖᕐᓂᖃᓚᐅᖅᑎᓪᓗᒍ ᐃᓄᐊᖅᓯᓂᐅᔪᒥ ᐸᕐᓇᒃᓯᒪᓪᓗᓂ ᑕᖅᑭᐅᓚᐅᖅᑐᒥ.

ᐃᖅᑲᖅᑐᐃᔨ ᑯᕆᔅᑎᐊᓪ ᓚᐃᔭᓐᔅ ᑐᓂᓯᓚᐅᖅᐳᖅ ᐃᓱᒪᓕᐊᕆᔭᖓᓂ, ᐊᖏᖃᑎᖃᖅᖢᓂ ᑲᑐᔾᔭᐅᔪᒥ ᑐᓂᓯᓂᐅᔪᒥ ᐃᖅᑲᖅᑐᐃᑎᑦᑎᔨᒥᑦ ᐅᖃᐅᔾᔪᐃᒋᐊᖅᑎᐊᔪᓂ ᐊᒻᒪ ᓴᐳᔾᔨᔨᐅᔪᓂ ᒪᓕᒐᕐᓂᐊᖅᑎᐅᔪᓂᑦ.

ᐅᓛᔪᕈᓗᒃ, 48, ᓯᕗᓪᓕᖅᐹᒥ ᐃᖅᑲᖅᑐᖅᑕᐅᔪᒃᓴᐅᓚᐅᖅᐳᖅ ᐃᓄᐊᖅᓯᓂᐅᔪᒥ 2018−ᒥ. ᑎᑎᕋᖅᑕᐅᔭᕆᐊᖃᕐᓂᓂᕐᒧᑦ ᓄᖅᑲᖅᑎᑕᐅᓯᒪᓂᐅᔪᒥ ᓄᖅᑲᖅᑎᑦᑎᕗᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐅᓂᒃᑳᕆᓂᖓᓂ ᑐᓴᒐᒃᓴᓂ ᓇᓗᓇᐃᖅᓯᔪᓐᓇᖅᑐᒥ ᐱᕋᔭᒃᑕᐅᓯᒪᔪᒥ.

ᐅᓪᓛᕐᔪᐊᒃᑯᑦ ᐅᒃᑐᐱᕆ 26, 2018−ᒥ, ᐅᓛᔪᕈᓗᒃ ᐋᓐᓂᖅᓯᕆᓚᐅᖅᐳᖅ ᐊᒻᒪ ᑲᐱᓯᓪᓗᓂ ᐃᓅᓱᒃᑐᒥ ᐃᒥᕐᓂᖃᓚᐅᖅᑎᓪᓗᒋᑦ ᐊᖏᕐᕋᖓᓂ ᓄᓇᓕᐅᔪᒥ ᐃᒡᓗᓕᖕᒥ. ᖃᐅᔨᒪᓚᐅᖅᐸᖓ ᑕᖅᑭᐸᓗᖕᓄᑦ ᒪᕐᕉᖕᓄᑦ, ᐃᖅᑲᖅᑐᐃᕕᒃᑯᑦ ᐅᖃᐅᔾᔭᐅᓚᐅᖅᐳᑦ.

ᐅᐸᒃᓯᒪᓂᐅᔪᑦ ᐃᒥᖅᑐᓂ ᐅᓂᒃᑳᕆᓚᐅᖅᐳᑦ ᐅᓛᔪᕈᓗᖕᒥ ᑕᐃᑲᓂ ᐅᓐᓄᖓᓂ ᐋᖓᔮᕐᓂᖓᓂ ᐊᒻᒪ ᐋᓐᓂᖅᓯᕆᔭᓐᓂᖓᓂ.

ᐊᖓᔪᖅᑳᓪᓚᕆᐅᔪᑦ ᐊᒻᒪ ᑎᒍᐊᖅᑎᖏᓐᓂ ᐊᓈᓇᐅᔪᑦ ᒪᒃᑯᒃᑐᒥ ᐱᕋᔭᒃᑕᐅᔪᒥ ᐅᐸᒃᓯᒪᓚᐅᖅᐳᑦ ᐃᖅᑲᖅᑐᐃᕕᖕᒥ ᐃᖅᑲᖅᑐᐃᔨᒧᑦ ᐃᖅᑲᖅᑐᖅᑕᐅᓂᖓᓂ. ᑕᒪᒃᑭᑦ ᑐᓂᓯᓚᐅᖅᐳᑦ ᐃᓄᒃᑎᑐᑦ ᑎᑎᕋᖅᓯᒪᔪᒥ ᐅᖃᐅᓯᒃᓴᓕᐅᕐᓂᕐᓂ ᐃᖅᑲᖅᑐᐃᑎᑦᑎᔨᑦ ᐅᖃᐅᔾᔪᐃᒋᐊᖅᑎᐊ ᐃᖅᑲᖅᑐᖅᑕᐅᑎᑦᑎᔨᒧᑦ ᔮᓐ ᒪᒃᕚᓚᐃᓐᒧᑦ, ᐅᖃᓕᒫᓚᐅᖅᑐᒥ ᖃᓪᓗᓈᑎᑐᑦ ᐃᖅᑲᖅᑐᐃᕕᖕᒥ.

ᐃᖅᑲᖅᑐᐃᕕᒃ ᑐᓴᓚᐅᖅᐳᑦ ᐱᕋᔭᒃᑕᐅᔪᖅ ᐃᓅᓚᐅᖅᓯᒪᓂᖓᓂ ᐃᖃᓗᖕᓂ, ᐱᕈᖅᓴᔭᐅᓪᓗᓂ ᓴᓂᕋᔭᖕᒥ, ᐊᒻᒪ ᐃᒡᓗᓕᖕᒦᓚᐅᖅᐳᖅ ᐱᔭᕇᕋᓱᐊᕐᓂᕐᒥ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ.

ᐊᓈᓇᓪᓚᕆᖓ ᐅᖃᓚᐅᖅᐳᖅ ᐅᖃᐅᓯᒃᓴᓕᐊᖓᓐᓂ ᑕᐃᑲᓂᒐᓚᒃ ᐃᓅᓱᒃᑐᖅ ᐃᓄᐊᖅᑕᐅᓚᐅᕐᓂᖓᓂ, ᓅᑎᑦᑎᓇᓱᐊᓚᐅᖅᐳᖅ ᐊᖏᕐᕋᖓᓄᑦ ᓴᓂᕋᔭᖕᒧᑦ.

“ᐃᑲᔪᕈᒪᓚᐅᖅᐸᕋ ᐊᖏᕐᕋᕐᓂᖓᓂ,” ᒪᒃᕚᓚᐃᓐ ᐅᖃᓕᒫᓚᐅᖅᐳᖅ.

“ᒪᒥᐊᑉᐳᖓ, ᑕᖃᐃᖅᓯᑦᑎᐊᕐᓂᐊᖅᐳᑎᑦ.”

ᐱᕋᔭᒃᑕᐅᔫᑉ ᑎᒍᐊᖅᑎᒋᔭᖓ ᐊᓈᓇᖓ ᑎᑎᕋᒪᐅᖅᐳᖅ ᐊᒃᓱᕈᓚᐅᕐᓂᖓᓂ ᐃᖅᑲᓇᐃᔮᖃᕋᓱᐊᕐᓂᕐᒥ ᐊᒻᒪ ᓂᕆᔭᒃᓴᖃᖅᑎᑦᑎᓂᕐᒥ ᐆᒪᔪᓂ ᐃᓚᖏᓐᓂ ᑕᐃᒪᙵᓂ ᐃᓄᐊᖅᑕᐅᓚᐅᖅᑎᓪᓗᒍ

ᑎᑎᕋᓚᐅᕆᕗᖅ ᑳᓐᓱᒥ ᓵᓚᖃᕋᓱᐊᕐᓂᖓᓂ, ᐊᒃᓱᕈᕐᓂᖃᖅᖢᓂ ᐱᓂᕐᒥ ᐃᓗᐃᓪᓕᕿᓂᕐᒧᑦ ᐃᓅᓯᓕᕆᓂᐅᔪᒥ, ᐊᒻᒪ ᑲᑉᐱᐊᓱᒃᖢᓂ ᐅᓛᔪᕈᓗᖕᒥ.

“ᐃᓅᓯᕗᑦ ᐊᖏᔪᐊᓗᖕᒥ ᐊᓯᔾᔨᖅᓯᒪᕗᖅ,” ᒪᒃᕚᓚᐃᓐ ᐅᖃᓕᒫᓚᐅᖅᐳᖅ ᑎᒍᐊᖅᑎᐅᔪᒥ ᐊᓈᓇᐅᔪᒥ ᐅᖃᐅᓯᒃᓴᓕᐊᖓᓐᓂ.

“ᐊᓂᑎᑕᐅᖁᙱᑦᑎᐊᖅᑕᕋ … ᓇᖕᒥᓂᖅ ᑲᑉᐱᐊᒋᔮᓗᒐ.”

ᒪᒃᕚᓚᐃᓐ ᑕᐃᓯᓚᐅᖅᐳᖅ ᐃᓄᐊᖅᓯᓂᐅᔪᒥ “ᐋᓐᓂᖅᓯᕆᕐᔪᐊᕐᓂᐅᔪᒥ ᐊᒻᒪ ᑕᐃᒪᐃᑦᑕᕆᐊᖃᓚᐅᙱᓐᓂᖓᓂ.”

ᓴᐳᔾᔨᔨᐅᔪᓂ ᒪᓕᒐᓐᓂᐊᖅᑎ ᑯᕋᐃᒡ ᕌᔾᔪᔅ ᐅᓂᒃᑳᕆᓚᐅᖅᐳᖅ ᐅᓛᔪᕈᓗᖕᒥ ᐊᑖᑕᐅᓂᖓᓂ ᐱᖓᓱᓂ ᐃᓅᓱᒃᑑᔪᓂ ᐅᖃᖃᑎᒋᒐᔪᙱᕕᒡᔪᐊᖅᖢᓂᒋᑦ ᑕᐃᒪᙵᓂ 2018−ᒥ ᑎᒍᔭᐅᓂᖓᓂ ᐊᒻᒪ ᐊᓄᓪᓚᒃᓯᓕᕐᓂᖓᓂ. ᐅᓂᒃᑳᕆᓚᐅᖅᐸᖓ ᐅᓛᔪᕈᓘᑉ ᐱᕈᖅᓴᔭᐅᓂᖓᓂ ᐱᓂᕐᓗᒡᔪᐊᕐᓂᐅᓂᖓᓂ ᐊᒻᒪ ᐋᓐᓂᖅᓯᖅᑕᐅᕙᖕᓂᖓᓂ.

ᒫᓐᓇ ᐃᓅᔪᓐᓃᖅᓯᒪᓕᖅᑐᑦ ᐊᖓᔪᖅᑳᖏᑦ ᐃᒥᖅᑎᕐᔪᐊᖑᓚᐅᖅᐳᑦ ᐋᓐᓂᖅᓯᕆᕙᓚᐅᖅᖢᑎᒃ ᓱᕈᓯᐅᑎᓪᓗᒍ. ᓇᔭᖓ ᐊᒻᒪ ᐱᖃᓐᓇᕆᓛᖓ ᑕᒪᒃᑭᑦ ᐃᓄᐊᖅᑕᐅᓚᐅᖅᓯᒪᕗᑦ.

ᐅᓛᔪᕈᓗᒃ ᑕᑭᔪᒥ ᐱᕋᔭᖕᓂᑯᒥ ᑎᑎᕋᖅᓯᒪᓂᖃᖅᐳᖅ ᐋᓐᓂᖅᓯᕆᓂᐅᔪᓂ ᑕᐅᕙᙶᖅᑐᒥ 1991−ᒥ. ᐊᕐᕌᒎᓚᐅᖅᑐᒥ ᓯᕗᓂᐊᓂ ᐃᓄᐊᖅᓯᓚᐅᙱᓐᓂᖓᓂ, ᐸᓯᔭᐅᓂᖅᑖᕐᓂᖃᓚᐅᖅᐳᖅ ᐋᓐᓂᖅᓯᕆᓂᐅᔪᒥ ᑕᐃᔅᓱᒪᓂᐅᔪᒥ−ᓄᓕᐊᕆᓚᐅᖅᑕᖓᓂ.

“ᓵᓚᒃᓴᕐᓂᖃᙱᓚᖅ ᐅᕙᓂ ᖃᓄᐃᓐᓂᐅᔪᒥ,” ᕌᔾᔪᔅ ᐅᖃᓚᐅᖅᐳᖅ at ᐃᖅᑲᖅᑐᐃᔨᒧᑦ ᐃᖅᑲᖅᑐᖅᑕᐅᓂᖓᓂ.

ᐊᕐᕌᒍᑲᓴᖕᓂ ᑕᓪᓕᒪᓂ ᑎᒍᔭᐅᓚᐅᕐᓂᖓᓂ, ᕌᔾᔪᔅ ᐅᔾᔨᕆᓚᐅᖅᐳᖅ ᐅᓛᔪᕈᓗᒃ ᒪᓕᑦᑎᐊᖃᑦᑕᕐᓂᖓᓂ ᐊᓄᓪᓚᒃᓰᕕᖕᒥ.

ᐱᓕᕆᓯᒪᕗᖅ ᖃᔅᓯᒐᓚᖕᓂ ᐃᓕᓐᓂᐊᕐᓂᐅᔪᓂ ᐃᓚᖃᖅᑐᒥ ᐋᖓᔮᕐᓇᖅᑐᓂ ᐊᑐᕐᓂᕐᒥ ᐃᓅᓯᖃᓕᖅᑎᑕᐅᑦᑎᐊᕋᓱᐊᕐᓂᕐᒧᑦ ᐱᓕᕆᐊᖑᔪᒥ, ᐋᓐᓂᖅᑐᓄᑦ ᓯᕗᓪᓕᐅᓪᓗᑎᒃ ᐅᐸᒃᐸᒃᑐᓄᑦ ᐱᓕᒻᒪᒃᓴᐃᓂᕐᒥ, ᐊᒻᒪ ᓇᑉᐸᖅᑎᕆᓂᕐᒥ ᐊᒻᒪ ᐋᖅᑭᐅᒪᑎᑦᑎᓂᕐᒥ ᐃᓕᓐᓂᐊᕐᓂᐅᔪᒥ.

ᐅᓛᔪᕈᓗᒃ ᐊᓄᓪᓚᒃᓰᕕᖕᒥ ᐊᓂᓚᐅᑲᒍᓐᓇᖅᑎᑕᐅᕗᖅ ᓇᐅᑦᑎᖅᓱᖅᑕᐅᓪᓗᓂ ᐱᓕᕆᓂᕐᒧᑦ ᐊᑭᓕᖅᓱᖅᑕᐅᓇᓂ ᐃᑲᔪᕐᓂᕐᒧᑦ ᐋᖅᑭᐅᒪᑎᑦᑎᓂᕐᒧᑦ ᐃᖅᑲᓇᐃᔮᖑᔪᓂ ᐊᒻᒪ ᓄᓇᒦᓐᓂᖓᓂ ᐃᓚᒋᔭᐅᓪᓗᓂ ᐃᓅᓯᖃᓕᖅᑎᑕᐅᑦᑎᐊᕋᓱᐊᕐᓂᖓᓄᑦ.

ᐱᕕᒃᓴᖃᖅᑎᑕᐅᑎᓪᓗᒍ ᐅᖃᓪᓚᒍᓐᓇᕐᓂᕐᒧᑦ ᐃᖅᑲᖅᑐᐃᔨ ᓚᐃᔭᓐᔅᒧᑦ, ᐅᓛᔪᕈᓗᒃ ᓵᓚᐅᖅᐳᖅ ᐱᕋᔭᒃᑕᒥᓄᑦ ᐃᓚᖏᓐᓄᑦ ᐃᖅᑲᖅᑐᐃᕕᖕᒥ ᐊᒻᒪ ᒪᒥᐊᓚᐅᖅᐳᖅ ᐃᓄᒃᑎᑐᑦ.

“ᑐᒃᓯᐅᑎᕙᒃᐸᔅᓯ,” ᐅᖃᓚᐅᖅᐳᖅ, ᐅᕘᓇ ᐃᖅᑲᖅᑐᐃᕕᖕᒥ ᑐᓵᔨᐅᔪᒃᑯᑦ. “ᓇᒡᓕᒋᔭᐃᓐᓇᕆᕙᔅᓯ ᐆᒻᒪᑎᓕᒫᓐᓂ.”

ᐅᓛᔪᕈᓘᑉ ᑎᒍᔭᐅᓯᒪᓂᖓ ᐱᒋᐊᓚᐅᖅᐳᖅ ᐅᓪᓗᖓᓂ ᑎᒍᔭᐅᓂᖓᓂ 2018−ᒥ, ᕿᒪᐃᔪᒥ ᐊᕐᕌᒍᐸᓗᖕᓂ 9-ᓂ ᑎᒍᔭᐅᓯᒪᓂᖓᓂ ᐱᔪᓐᓇᖅᓯᓂᐊᕐᓂᖓᓂ ᐊᓄᓪᓚᒃᓰᕕᖕᒥ ᐊᓂᓂᕐᒥ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ.

ᐊᓄᓪᓚᒃᓰᕕᖕᒥ ᐊᓂᓂᕐᒥ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ ᐊᑐᓕᕐᕕᖃᓪᓚᕆᙱᓚᖅ. ᑕᒪᓐᓇ ᐃᓱᒪᓕᐊᖑᓲᖑᕗᖅ ᐊᓄᓪᓚᒃᓰᕕᖕᒥ ᐊᓂᓂᕐᒥ ᐊᓄᓪᓚᒃᓯᕆᐊᖃᕐᓂᖓ ᐃᓱᓕᑎᓐᓇᒍ ᑲᑎᒪᔨᐅᔪᓂ ᑲᓇᑕᒥ.

ᓚᐃᔭᓐᖦ ᐅᓂᒃᑳᕆᓚᐅᖅᐳᖅ ᐃᓄᐊᖅᓯᓂᐅᔪᒥ “ᑐᑭᖃᙱᑦᑎᐊᕐᓂᖓᓂ” ᐃᓄᐊᖅᓯᓂᐅᔪᒥ ᐊᒃᑐᖅᑕᐅᓴᕋᐃᑦᑐᒥ ᓄᓇᖃᖅᑳᖅᓯᒪᔪᒥ ᐊᕐᓇᒥᒃ ᒪᓕᓚᐅᖅᑐᒥ “ᐊᑯᓂᐅᔪᒥ ᐊᒻᒪ ᐋᓐᓂᖅᓯᕆᕐᔪᐊᕐᓂᐅᔪᒥ.”

ᑭᓯᐊᓂ, ᓚᐃᔭᓐᔅ ᐅᖃᓚᐅᖅᐳᖅ ᐅᒃᐱᕈᓱᖕᓂᖓᓂ ᐅᓛᔪᕈᓘᑉ ᐅᒑᐊᕐᓂᖓ ᐱᓪᓚᕆᐅᓚᐅᕐᓂᖓᓂ.

“ᔨᐊᕆ ᐃᓅᔭᕆᐊᖃᕐᓂᐊᓕᖅᐳᖅ ᐊᒥᐊᒃᑯᖓᓂ ᐃᓅᓯᖓᓂ ᖃᐅᔨᒪᓗᓂ ᐃᓄᐊᖅᓯᓚᐅᖅᓯᒪᓂᖓᓂ ᒪᒃᑯᒃᑐᒥ ᐊᕐᓇᒥᒃ,” ᓚᐃᔭᓐᔅ ᐅᖃᓚᐅᖅᐳᖅ.

“ᐃᓅᓰᑦ ᐊᓂᒍᙱᑦᑐᖅ … ᓂᕆᐅᖕᓂᖃᖅᐳᖅ ᐃᓕᖕᓄᑦ ᐃᓅᓂᕐᒥ ᐱᐅᓂᖅᓴᐅᔪᒥ ᐃᓅᓯᐅᔪᒥ ᓯᕗᓂᒃᓴᒥ.”

ᑐᓵᑎᑕᐅᓂᐅᔪᖅ ᐃᓱᓕᓐᓇᒥ, ᐱᕋᔭᒃᑕᐅᔫᑉ ᐃᓚᖏᑦ ᕿᒪᐃᓚᐅᖅᐳᑦ ᐃᖅᑲᖅᑐᐃᕕᖕᒥ ᕿᐊᓪᓗᑎᒃ ᐊᒻᒪ ᑎᒍᒥᐊᖃᑦᑕᐅᑎᓚᐅᖅᐳᑦ ᐊᑯᓂᐅᔪᒥ ᐃᕿᒻᒥᐅᓂᐅᔪᒥ.

ᐅᓛᔪᕈᓗᒃ ᑕᐅᑐᓚᐅᖅᐳᖅ ᐊᓂᑎᓪᓗᒋᑦ ᐃᖅᑲᖅᑐᐃᕕᖕᒥ. ᐅᑎᓚᐅᖅᑳᕋᓂ ᐃᖅᑲᖅᑐᐃᕕᐅᑉ ᐊᓄᓪᓚᒃᓰᕕᖓᓄᑦ, ᐊᓪᓚᖅᑎᕆᓚᐅᕆᕗᖅ ᖁᕝᕕᐅᔪᓂ ᓇᖕᒥᓂᖅ ᐃᔨᖏᓐᓂ.