ᖃᑯᖅᑕᖅ ᕿᓚᓗᒐᕋᓱᐊᕐᓂᖅ ᒪᑐᕗᖅ ᕿᑭᖅᑖᓗᒃ ᑯᐸᐃᓪᓗ ᑕᕐᕋᖓᑕ ᐃᑭᕋᓴᖓᓂ ᐊᕕᒃᑐᖅᓯᒪᓂᖓᓂ

For English version, see Beluga hunting closes in Hudson Strait zone

ᖃᑯᖅᑕᖅ ᕿᓚᓗᒐᕐᓂᐊᕐᓂᕐᒧᑦ ᓄᓇᕕᖕᒥ ᕿᑭᖅᑖᓗᒃ ᑯᐸᐃᓪᓗ ᑕᕐᕋᖓᑕ ᐃᑭᕋᓴᖓ ᐊᕕᒃᑐᖅᓯᒪᓂᐅᔪᒥ ᒪᑐᕗᖅ ᑕᐃᑯᖓ ᐅᒃᑐᐱᕆᐅᑉ ᓄᙳᐊᓄᑦ.

ᒐᕙᒪᑐᖃᒃᑯᑦ ᐃᒪᕐᒥᐅᑕᓕᕆᔨᒃᑯᑦ ᐅᖃᐅᓯᖃᓚᐅᖅᐳᑦ ᐊᕐᕌᒎᑉ ᐃᓚᖓᓐᓂ  ᒪᑐᔭᐅᓂᖓᓂ ᓯᑎᐱᕆ 1−ᒥ, ᑕᐃᑲᓂᑦᑕᐃᓐᓇᖅ ᐅᓪᓗᖓᓂ ᒪᑐᔭᐅᓂᖓ ᐊᑐᓕᖅᑎᑕᐅᓂᖓᓂ.

ᐊᒃᑐᖅᑕᐅᓯᒪᔪᖅ ᐊᕕᒃᑐᖅᓯᒪᓂᐅᔪᒥ ᑕᐅᕘᓇ ᕿᑭᖅᑖᓗᒃ ᑯᐸᐃᓪᓗ ᑕᕐᕋᖓᑕ ᐃᑭᕋᓴᖓ ᐊᐅᓚᓂᖃᖅᐳᖅ ᐃᕗᔾᔨᕕᖕᒥ ᖁᐊᖅᑕᕐᒧᑦ. ᒪᑐᔭᐅᓂᖓ ᐃᓕᓯᒪᐃᓐᓇᕐᓂᐊᖅᐳᖅ ᑕᐃᑯᖓ ᐅᒃᑐᐱᕆ 31−ᒧᑦ.

“ᐅᖃᐅᔾᔨᓗᒋᑦ ᓄᓇᓕᖕᓂ [ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᓪᓗ ᑲᑐᔾᔨᖃᑎᒌᖑᔪᓂ] ᐸᕐᓇᐅᑎᖕᓂᑦ ᐊᖑᓇᓱᖕᓂᐊᕐᓂᕐᒥ ᓄᕕᐱᕆᒥ ᐊᒻᒪᓗ ᑲᑎᖅᓱᐃᓂᕐᒥ ᐆᒃᑑᑎᒃᓴᓂ ᐊᖑᓇᓱᒃᑕᕐᓂ ᐱᔪᓐᓇᑐᐊᕌᖓᑦ,” ᐱᓕᕆᕝᕕᒃ ᐅᖃᐅᔾᔨᓚᐅᖅᐳᑦ ᐅᖃᐅᓯᒃᓴᓕᐊᖓᓐᓂ.

ᐃᓂᐅᔪᑦ ᒪᑐᐃᖓᐃᓐᓇᕐᓂᐊᖅᑐᓂ ᖃᑯᖅᑕᖅ ᕿᓚᓗᒐᕐᓂᐊᕐᓂᕐᒧᑦ ᐅᑯᐊᖑᕗᑦ ᐅᑲᓕᖅᑐᕐᓕᖅ ᐊᒻᒪ ᓯᕿᓂᕐᒥᐅᑦ, ᐅᐊᖕᓇᒥ ᑲᓇᖕᓇᕐᒥ ᑲᖏᖅᓱᐊᓘᑉ ᐃᓗᐊᓂ, ᐋᑐᕚ ᕿᑭᖅᑕᖏᓐᓂ ᐊᒻᒪ ᐅᖓᕙᒥ.

ᐃᓂᐅᔪᑦ ᒪᑐᓯᒪᔪᑦ ᖃᑯᖅᑕᖅ ᕿᓚᓗᒐᕋᓱᐊᕐᓂᕐᒧᑦ ᖃᖓᓕᒫᕐᒥ ᑲᓇᖕᓇᕐᒥ ᑲᖏᖅᓱᐊᓘᑉ ᐃᓗᐊᓂ ᐊᕕᒃᑐᖅᓯᒪᓂᐅᔪᒥ, ᓇᔅᑕᐴᑲ ᐊᑯᐊᖅ, Little Whale River ᐊᒻᒪ ᒧᑲᓕᒃ ᐊᑯᐊᖅ.