ᖃᓄᐃᒻᒪ ᐅᒥᐊᕐᔪᐊᑦ ᑭᓴᕐᓯᒪᙱᓚᑦ ᓄᑖᒥ ᐃᖃᓗᐃ ᐃᑎᔪᒥᒃ ᑭᓴᕐᕕᖓᓂ?

For the English version of this story, see Why aren’t sealifts docked at Iqaluit’s new port?

ᐃᖃᓗᖕᓂ ᐃᑎᔪᒥ ᑐᓚᒃᑕᕐᕕᒃ ᒪᑐᐃᓚᐅᕐᓯᒪᖕᒪᓐ ᔪᓚᐃ 25ᒥ ᐃᓄᒋᐊᕈᓘᔭᖅᖢᑎᒃ ᑕᑯᔭᕐᑐᖅᑐᑦ, ᐊᒻᒪᓗ ᕿᓯᖕᒥ ᑭᐱᓯᓂᕐᒥ ᒪᑐᐃᕈᑎᖃᖅᖢᑎᒃ ᐊᒻᒪ ᒪᓕᒐᓕᕆᔨᕈᔪᐃᑦ ᐊᔾᔨᓕᐅᖅᑕᐅᑲᑕᒃᖢᑎᒃ ᐅᓇ ᐅᒥᐊᕐᔪᐊᖅ MV ᖃᒧᑎ ᖃᓂᑦᑐᒥ ᑭᓴᕐᓯᒪᓪᓗᓂ.

ᖁᙱᐊᖅᑕᐅᕌᓂᒃᑎᓪᓗᒋᑦ, ᐅᓇ ᖃᒧᑎ — NEAS ᐅᓯᖃᖅᑕᖅᑏᑦ ᐅᒥᐊᒃᔪᐊᖓ ᕗᕉᐱᓱ ᐸᐃᒦᓚᐅᕐᑐᑦ ᐱᖁᑎᓂᒃ ᐊᒡᔭᖅᓯᓪᓗᓂ — ᐊᐅᓪᓚᖅᐸᓪᓕᐊᓕᕐᑐᖅ ᓂᐱᖃᕋᓂ.

NEAS ᐅᒥᐊᕐᔪᐊᖅ ᐅᓯᑲᖅᑕᐅᑎ MV Qamutik (ᖃᒧᑎᒃ) ᑭᓴᖅᓯᒪᔪᖅ ᓄᑖᒥ ᐃᖃᓗᐃᑦ ᐃᒃᓴᕐᕕᖓᓂ ᔪᓚᐃ 25ᒥ. (ᐊᔾᔨᓕᐅᕆᔨ ᔨᐊᕝ ᐱᐊᑦᓯᐄ)

ᑭᖑᓂᐊᓂ ᐱᖁᑎᑦ ᓯᑲᐅᒃᑯᑦ ᐊᒡᔭᖅᓯᑲᑕᓚᐅᕐᑐᑦ ᐊᑐᙱᖢᑎᒃ ᓄᑖᒥ $84.9-ᒥᓕᐊᓐᑐᖅᑐᒥᒃ ᑐᓚᒃᑕᕐᕕᒃᒥ.

ᐅᒥᐊᕐᔪᐊᖅ ᑐᓚᒃᑕᕐᕕᒃᒦᓚᐅᕐᑐᖅ ᒪᑐᐃᖅᑕᐅᓕᕐᓂᖓ ᖁᕕᐊᓲᑎᐅᓕᕐᑎᓪᓗᒍ, ᑭᓯᐊᓂᓕ ᐊᖓᔪᖅᑳᑉ ᑐᒡᓕᖓ ᓂᐅᕐᕈᑎᒃᓴᓕᕆᓂᕐᒧᑦ ᐊᒻᒪ ᓂᐅᕕᐊᒃᓴᓕᕆᓂᕐᒧᑦ ᒫᒃ-ᐋᓐᑐᕇ ᐴᒋ ᐅᖃᓚᐅᕐᑐᖅ ᐱᓕᕆᔨᐅᔪᑦ ᐅᒥᐊᕐᔪᐊᕐᒥ ᐱᓕᕆᒡᓂ ᐱᓕᕆᖁᔨᙱᖢᑎᒃ ᑕᐃᑲᓂ.

ᖃᓄᐃᒻᒪ?

“ᐱᕐᕈᓗᐊᕿᖁᔨᙱᖢᑎᖃᐃ,” ᐴᒋ ᐅᖃᕐᑐᖅ.

ᓄᓇᕗᒥᑦ ᒐᕙᒪᒃᑯᑦ ᐊᒻᒪ ᐅᑯᐊ ᒪᕐᕉᒃ ᐅᒥᐊᕐᔪᐊᓕᕆᔨᐅᔪᒃ ᐊᑐᑲᑕᒃᑐᑦ ᑐᓚᒃᑕᕐᕕᒃᒥ ᐅᖃᓚᐅᕐᑐᑦ ᑖᓐᓇ ᐊᑐᖅᑕᐅᓂᖓᓂ ᐊᑐᖅᑕᐅᔾᔪᑎᒃᓴᕆᓚᐅᕐᑕᖓᓂ, ᐄᓕ ᒫᓐᓇᐅᔫᖅ.

ᐃᖃᓗᐃᑦ ᒪᐃᔭᖓᑕ ᑐᒡᓕᖓ ᑲᐃᐅᓪ ᓴᐳᑦ, ᐅᖃᓚᐅᕐᑐᖅ ᑐᑭᓯᑦᑎᐊᕐᓂᙱᒻᒪᑕᖃᐃ ᐃᓄᐃᑦ ᖃᓄᖅ ᐊᑐᖅᑕᐅᔾᔪᑎᒃᓴᖓᓂ ᑐᓚᒃᑕᕐᕕᐅᑉ ᒪᑐᐃᓚᐅᕐᑎᓐᓇᒍ.

“ᐃᓱᒪᒋᔭᕗᑦᑕᐅ ᑕᒻᒪᕐᓯᒪᓚᐅᕐᒪᑕ,” ᐅᖃᕐᑐᖅ.

“ᐊᐅᓚᑕᐅᓂᖓᓄᑦ ᓈᒻᒪᙱᓕᐅᕈᑎ ᖃᐅᔨᒋᐊᕐᓂᐊᖅᑕᒃᑲ.”

ᐴᒋ ᑕᒪᑐᒥᖓ ᑐᑭᓯᓯᒪᙱᓐᓂ ᐅᑯᓄᖔᕋᓱᒋᔭᖓ ᐃᓄᐃᑦ ᐃᓱᒪᒋᓚᐅᖅᑕᖏᑦᑎᒍᑦ ᐊᑐᖅᑕᐅᔾᔪᑎᒃᓴᖓᓂᒃ.

ᐊᓯᖏᓐᓄᓪᓕ ᐅᒥᐊᕐᔪᐊᓄ ᐊᑐᕐᑕᐅᔪᓐᓇᕐᓂᐊᖅᖢᓂ ᐊᒻᒪ ᑐᓚᒡᕕᐅᖃᑦᑕᕐᓗᓂ, ᑕᒪᒃᑯᐊᓕ ᐱᖁᑎᓂ ᐅᓯᑲᖅᑕᖅᑏᑦ ᐅᒥᐊᕐᔪᐊ ᐱᖃᕆᐊᖃᒻᒪᕆᖕᒪᑕ ᐅᒥᐊᕐᔪᐊᕐᒧᑦ ᐅᓯᓕᕐᓱᕐᕕᒃᓴᒥᒃ.

“ᐃᓱᒪᔪᖓᓕ ᐅᓇ ᑐᓚᒃᑕᕐᕕᒃ ᓴᓇᔭᐅᓚᐅᕐᓂᖓᓂᒃ ᐅᒥᐊᕐᔪᐊᓄᑦ ᐅᓯᑲᖅᑕᖅᐸᒃᑐᓄᑦ. ᑭᓯᐊᓂᓕ ᐊᔾᔨᒌᙱᑦᑐᓄᑦ ᐊᑐᖅᑕᐅᕙᒃᑐᖅ ᐊᒻᒪ ᖃᓄᐃᑦᑐᑐᐃᓐᓇᕐᓂ ᐱᓕᕆᐊᓕᖕᓄᑦ,” ᐴᒋ ᐅᖃᕐᑐᖅ.

“ᑕᐃᒪᓕ ᑕᐃᒪᓐᓇ ᐃᓱᒪᓂᑦᑎᓐᓄ ᐱᒋᐊᑐᐃᓐᓇᓕᓚᐅᕐᐳᒍᑦ. ᐃᓱᒪᒋᔭᖃᓗᐊᓚᐅᙱᓐᓇᑦᑕ ᑐᓚᒃᑕᕐᕕᐅᖃᑦᑕᕋᔭᕐᓂᖓᓂ ᐊᒻᒪᓗ ᐊᐅᓚᑕᐅᓂᖓᓂᒃ ᑐᓚᒃᑕᕐᕕᒃ.”

ᓄᑖᒥ ᐅᓯᑲᖅᑕᕐᕕᒃᓴᖃᕈᓂ ᑕᒪᒃᑯᐊ ᓯᑲᐅᑦ ᐱᖁᑎᓂ ᐅᒥᐊᕐᔪᐊᕐᒥᙶᕈᔾᔨᔪᓐᓇᕋᔭᕐᑐᑦ ᑐᓚᒃᑕᕐᕕᒃᒧᑦ ᖃᖓᓕᒫᖅ ᐅᓪᓗᒃᑯ ᐅᓐᓄᐊᒃᑯᓪᓘᓐᓃᑦ.

ᓯᕗᓂᐊᓂᓪᓕ ᐅᒥᐊᕐᔪᐊᑦ ᐱᖁᑎᓂ ᐅᓯᔪᑦ ᐱᓕᕆᔪᓐᓇᓚᐅᕐᓯᒪᖕᒪᑕ ᐃᑲᕐᕋᒥ ᒪᕐᕉᖕᓂᓪᓘᓐᓃᑦ ᐅᓕᓯᒪᓂᖓᓂ ᐃᑲᕐᕋᑦ 12 ᐊᓂᒍᕌᖓᑕ.

ᐃᖃᓗᐃᑦ ᑲᖏᖅᖢᖓ ᑎᓂᒃᑲᐅᓛᖑᖃᑕᐅᖕᒪᑦ ᓄᓇᕐᔪᐊᓕᒫᒥ. ᒪᓕᒃᖢᓂ ᓇᓂ ᐅᒥᐊᕐᔪᐊᖅ ᑭᓴᕐᓯᒪᓂᖓᓂᒃ ᐃᒪ 11 ᒦᑕᓂ ᑎᓂᑉᐹᓪᓕᕈᓐᓇᕐᕕᖃᕐᒪᑦ, ᐴᒋ ᐅᖃᕐᑐᖅ.

ᐃᓚᖏ ᑐᓚᒃᑕᕐᕖᑦ ᐆᑐᓇᖅ ᓴᐃᓐ ᓘᕋᓐᔅᒥ, ᑎᖏᑉᐸᖕᒪᑕ 1 ᒦᑕᒥ 2 ᒦᑕᒥᓪᓘᓐᓃᑦ.

ᒪᑯᓄᖓᓕ ᐅᕐᓴᒃᓴᐅᑎᓄᑦ ᐊᓯᖏᓐᓄᓪᓘᓐᓃᑦ ᐅᒥᐊᕐᔪᐊᓄᑦ, ᑖᓐᓇ ᑎᓂᒃᑲᐅᓂᖓ ᐃᖃᓗᖕᓂ ᖃᓄᐃᒋᔭᐅᓗᐊᙱᑦᑐᖅ, ᐅᖃᕐᑐᖅ ᐴᒋ, ᑭᓯᐊᓂᓕ ᖃᓄᐃᓕᐅᕈᓘᔭᕆᐊᖃᕐᓇᕐᒪᑦ ᐱᖁᑎᓂᒃ ᐅᓯᑲᖅᑕᖅᑎᓄᑦ.

ᓲᕐᓗ, ᐅᒥᐊᕐᔪᐊᕐᒥ ᑎᑭᑦᑐᖃᕐᐸᑦ ᑎᓂᓯᒪᑎᓪᓗᒍ 11 ᒦᑕᓂ ᑎᓂᑉᐹᓪᓕᖅᓯᒪᓗᓂ ᑐᓚᒃᑕᕐᕕᒃᒥ ᑖᓐᓇ ᐅᒥᐊᕐᔪᐊᕐᒥ ᑭᐱᒃᑕᐅᑎ ᑕᑯᔪᓐᓇᕋᔭᙱᒻᒪᑦ ᑐᓚᒃᑕᕐᕕᐅᑉ ᖄᖓᓂ.

ᑕᒪᒃᑯᓂᖓ ᓯᑲᐅᓂ ᐊᑐᕈᓐᓇᕐᓗᓂ ᐊᒻᒪᓗ ᐅᓯᑲᖅᑕᕐᕕ “ᐱᓕᕆᓂᕐᒧᑦ ᐊᓯᔾᔨᕈᑎᐅᓇᔭᕐᑐᖅ,” ᐅᖃᕐᑐᖅ ᐳᕋᐃᐊᓐ ᑕᑦᑐᐃᓂ, ᓇᖕᒥᓂᖅ ᐱᓕᕆᐊᓄᑦ ᐱᕙᓪᓕᐊᔪᓕᕆᓂᕐᒥᒃ ᐊᐅᓚᑦᑎᔨ ᓄᓇᕗᑦ ᐅᓯᑲᖅᑕᖅᑎᖏᓐᓄᑦ Nunavut Sealink and Supply Inc.

ᐱᖁᑎᓂᒃ ᓄᓇᒧᐊᕐᓯᑲᑕᖕᓂᖅ ᐱᓕᕆᐊᖑᓚᐅᕐᑐᖅ ᐅᓪᓘᓐᓃᑦ ᒪᕐᕉᖕᓂ ᓇᑉᐸᕐᒥᒡᓗ, ᐊᑐᖅᑕᐅᕙᓚᐅᕐᑐᕐᓕ ᐱᓇᓱᐊᕈᓯᖅ ᐃᓚᓪᓗᒍ ᐱᓕᕆᐊᖃᓐᓇᓚᐅᕐᓯᒪᓪᓗᓂ.

ᐊᒻᒪᓗ, ᐅᒥᐊᕐᔪᐊᓄᑦ ᐅᓯᖏᖅᐸᓪᓗᐊᔪᓄᑦ ᐊᑐᒐᒃᓴᑐᐃᓐᓇᐅᓂᖓ ᐊᑲᐅᓂᕐᓴᐅᓪᓗᓂ ᒪᑐᒪᙵᓪᓕ ᓯᒡᔭᒥ ᑭᒃᑯᑐᐃᓐᓇᕐᑐᖅ ᐊᑐᖅᑕᐅᕙᒃᑐᓂᒃ.

ᑕᑦᑐᐃᓂ ᐅᖃᓚᐅᕐᑐᖅ ᑐᓴᓚᐅᕐᓂᕋᖅᖢᓂ ᐃᓄᐃᑦ ᐃᓱᒪᒋᓂᑯᖏᓐᓂᒃ ᐅᓇ ᓄᑖ ᑐᓚᒃᑕᕐᕕᒃ ᐊᑐᖅᑕᐅᙱᓐᓂᖓᓂᒃ, “ᑭᓯᐊᓂᓕ ᑕᐃᒪᐃᙱᒻᒪᑦ,” ᐅᖃᕐᑐᖅ.

“ᐊᑐᖅᑕᐅᕙᒃᑐᖅ. ᐃᓄᐃᑦ ᐃᓱᒪᖕᒪᑕ ᐅᒥᐊᕐᔪᐊᖃᕆᐊᖃᕐᓂᖓᓂᒃ ᑕᐃᒪᙵᓕᒫᖅ ᐅᓯᔭᖏᓐᓂ ᐊᒡᔭᖅᓯᔪᓂ. ᑭᓯᐊᓂᓕ ᐱᓕᕆᐊᖃᕈᓘᔭᕐᓯᒫᓂᒃᑐᒍᑦ.”

ᐅᒥᐊᕐᔪᐊᓕᕆᔨᓄᑦ ᑭᒡᒐᖅᑐᐃᔪᑦ ᐊᒻᒪᓗ ᓄᓇᕗᒥᑦ ᒐᕙᒪᒃᑯᑦ ᐱᕙᓪᓕᐊᔪᓕᕆᔨᖏ ᐊᒻᒪ ᐃᖏᕐᕋᔾᔪᑎᓕᕆᔨᖏ ᐸᕐᓇᒃᓯᒪᔪᑦ ᕿᒥᕐᕈᐊᕐᓂᐊᕐᓗᒍ ᑕᒪᑐᒪᓂ ᐊᕐᕌᒍᒥ ᐅᒥᐊᕐᔪᐊᓕᕆᓂᖅ ᓇᐅᒃᑯᑦ ᐱᐅᓯᕚᓪᓕᕆᐊᖃᕐᒪᖔ ᐊᕐᕌᒍᒧᑦ.

“ᒪᓐᓇ ᐅᕙᑦᑎᓐᓄᑦ ᓄᑖᙱᖕᒥᖕᒪᑦ,” ᑕᑦᑐᐃᓂ ᐅᖃᕐᑐᖅ.

“ᑐᑭᓯᒋᐊᖃᕋᑦᑕ ᖃᓄᖅ ᑖᓐᓇ ᐊᓯᔾᔪᕈᑎᐅᔭᕆᐊᖃᕐᒪᖔᑦ ᐱᓕᕆᔾᔪᓯᕗᑦ ᐱᖁᑎᓂᒃ ᐅᓯᒌᔭᐃᕙᓪᓕᐊᓂᒃᑯᑦ.”