ᖃᖅᑲᖅ ᒪᓕᒐᓕᐅᖅᑎᐅᔾᔮᔪᓐᓃᕐᓂᖓᓄᑦ ᑭᖑᓪᓕᖅᐹᒥ ᐅᖃᓪᓚᒃᑎᓪᓗᒍ ᐅᖃᐅᓯᖃᖅᐳᖅ ᐃᖅᑲᓇᐃᔭᖅᕕᒃᒥ ᐊᔾᔨᐅᙱᑎᑕᐅᕙᖕᓂᖅᒥᒃ

‘ᐃᖅᑲᐃᑎᑕᐅᖃᑦᑕᐃᓐᓇᐅᔭᕋᒪ ᑕᕝᕙᓃᓪᓗᐊᙱᓐᓂᓐᓂᒃ,’ ᐅᖃᖅᑐᖅ ᓄᓇᕗᒧᑦ ᒪᓕᒐᓕᐅᖅᑎ ᒪᓕᒐᓕᕆᕕᒡᔪᐊᒥᑦ

ᒪᒥᓛᖅ ᖃᖅᑲᖅ ᑭᖑᓪᓕᖅᐹᒥ ᕿᒪᐃᓂᐊᓕᕋᒥ ᐅᖃᓪᓚᓚᐅᖅᑐᖅ ᒪᓕᒐᓕᕆᕕᒡᔪᐊᖅᒥᑦ ᔫᓂ 15-ᖑᑎᓪᓗᒍ, ᐅᖃᐅᓯᖃᖅᖢᓂ ᐊᔾᔨᐅᙱᑎᑕᐅᓂᕐᒧᖅ ᖃᐅᔨᓴᖅᑕᐅᓯᒪᓂᖓᓂ ᓇᐅᑦᑎᖅᓱᖅᑎᓂᒃ ᐃᖅᑲᓇᐃᔭᕐᕕᒋᔭᖓᓂᒃ. (ᐊᔾᔨᓕᐅᕆᓯᒪᔪᖅ ᓴᖅᑭᔮᖅᑐᒥ ᖁᔭᓐᓇᒦᒃ ᒪᓕᒐᓕᕆᕕᒡᔪᐊᖅᒥᐅᑕᑦ/ParIVU)

By ᒥᓚᓂ ᐅᕆᑦᓵᑦ

For an English version of this story, see Qaqqaq talks workplace racism in farewell speech

ᒪᒥᓛᖅ ᖃᖅᑲᖅ ᐅᖃᓚᐅᖅᑐᖅ “ᖁᐊᕐᓵᕐᓇᖅᑐᒦᑰᔩᓐᓇᓚᐅᕐᓂᖓᓂᒃ” ᓄᓇᕗᒧᑦ ᒪᓕᒐᓕᐅᖅᑎᐅᓂᖓᓂᒃ ᐊᒻᒪᓗ ᒐᕙᒪᑐᖃᒃᑯᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐱᖃᖅᑎᑦᑕᐃᓕᓂᖏᓐᓂᒃ ᐅᖃᓪᓚᒃᑎᓪᓗᒍ ᔫᓂ 15-ᒥ ᒪᓕᒐᓕᕆᕕᒡᔪᐊᕐᒥᓐ.

ᐅᖃᓪᓚᒃᑎᓪᓗᒍ ᑭᖑᓪᓕᖅᐹᖑᓂᕋᖅᑕᖓᓂᒃ ᑕᕝᕙᓂ, ᓄᓇᕗᒧᑦ ᒪᓕᒐᓕᐅᖅᑎ ᐅᖃᓚᐅᖅᑐᖅ ᐊᔾᔨᐅᙱᓐᓂᖓᓄᑦ ᐱᓕᕆᐊᖑᓯᒪᓂᖓᓂᒃ ᐃᖅᑲᓇᐃᔭᖅᕕᒋᔭᖓᓂᒃ ᐊᒻᒪᓗ ᓇᐅᑦᑎᖅᓱᑎᐅᔪᓄᑦ ᒪᓕᒃᑕᐅᓪᓗᓂ “ᓄᑲᖅᑎᑕᐅᒋᐊᖅᓯᒪᓂᖓᓂᒃ”.

“ᐃᖅᑲᐃᑎᑕᐅᖃᑦᑕᐃᓐᓇᐅᔭᕋᒪ ᑕᕝᕙᓃᓪᓗᐊᙱᓐᓂᓐᓂᒃ,” ᐅᖃᓚᐅᖅᑐᖅ ᐱᓕᕆᖃᑎᒋᔭᖏᓐᓄᑦ.

ᖃᖅᑲᖅ ᑐᓴᖅᑎᑦᑎᓚᐅᕐᓯᒪᔪᖅ ᑕᖅᑭᐅᓚᐅᖅᑐᒥ ᓂᕈᐊᒐᒃᓴᐅᒃᑲᓐᓂᔾᔮᙱᓐᓂᕋᖅᖢᓂ, ᐅᖃᓚᐅᕐᓯᒪᒐᓗᐊᖅᖢᓂ ᓂᕈᐊᒐᒃᓴᐅᒃᑲᓐᓂᓛᕐᓂᖓᓂ ᒫᔅᓰᐅᓚᐅᕐᓯᒪᔪᒥᓐ.

ᐅᖃᓚᐅᕐᓯᒪᔪᖅ ᐃᓐᓇᐅᓗᐊᙱᑦᑐᑦ ᓇᓗᓇᐃᖅᑕᐅᓯᒪᔾᔪᑎᖃᖅᑎᑕᐅᔪᑦ ᑖᔅᓱᑐᓇᖅ ᒪᓕᒐᓕᕆᓂᖅᒧᑦ ᐱᓇᓱᓕᕌᖓᑕ ᐊᒃᓱᐊᓗᒃ ᑐᓗᖅᑕᕈᑎᖃᔭᓐᓂᖏᓐᓂᒃ, ᓲᕐᓗ ᑐᓴᑲᑕᒃᖢᑎᒃ ᐱᓕᕆᓕᒪᙱᓗᐊᕐᓂᖏᓐᓂᒃ ᐃᖅᑲᓇᐃᔮᒧᑦ ᐱᓕᕆᐊᕆᔭᖏᓐᓄᑦ.

“ᐊᕐᓇᐃᑦ ᐅᖃᐅᔾᔭᐅᖃᑦᑕᖅᓯᒪᔪᑦ ᐱᐅᓇᓱᑐᐃᓐᓇᕐᓗᑎᒃ ᐊᒻᒪ ᑐᓵᑐᐃᓐᓇᖃᑦᑕᕐᓗᑎᒃ,” ᐅᖃᖅᑐᖅ.

“ᐊᔪᕈᑎᖃᖅᑐᑦ ᐊᒻᒪ ᖃᐅᔨᒪᑎᑕᐅᓯᒪᖕᒪᑕ ᓱᕙᓕᑭᐊᕆᔭᐅᓪᓗᑎᒃ ᐅᖃᓪᓚᖃᑎᒋᔭᕆᐊᒃᓴᖏᓐᓂᒃ.”

ᐅᖃᓚᐅᕐᑐᖅ ᑕᒪᒃᑯᐊ ᑐᓗᖅᑕᕈᑏᑦ ᐱᑕᖃᕈᓐᓃᕐᓂᖅᓴᐅᔪᓐᓇᕐᓂᖏᓐᓂᒃ, ᑭᓯᐊᓂᓕ ᑕᐃᒪᐃᓕᐅᕈᒪᙱᓐᓂᖅᑕᖃᕐᒪ ᐊᒻᒪ ᑕᐃᒪᐃᓗᐅᖅᑐᖃᕈᒪᓇᓂ ᒪᓕᒐᓕᕆᕕᒡᔪᐊᖅᒥᑦ.

ᐅᖃᖃᑦᑕᖅᓯᒪᖕᒥᔭᖓ ᖃᖅᑲᐅᑉ ᐅᓇ ᒐᕙᒪᑐᖃᒃᑯᑦ ᑭᒃᑯᓕᒫᓄᑦ ᐱᔪᓐᓇᐅᑎᔪᑦ ᓱᓕ ᐃᓄᖕᓄᑦ ᐊᑐᖅᑎᑦᑎᑦᑕᐃᓕᒪᓂᖏᓐᓂᒃ.

“ᐱᔪᓐᓇᕐᓂᖃᓕᖅᓯᒪᔪᑦ ᓂᕈᐊᕈᓐᓇᕐᒪᑕ ᐊᓯᐊᒎᕈᑎᐅᔪᓐᓇᖅᑐᓂᒃ ᑭᓯᐊᓂᓕ ᓂᕈᐊᖃᑦᑕᐃᓐᓇᖅᖢᑎᒃ ᓈᒻᒪᙱᓕᐅᕈᑎᖃᐃᓐᓇᔭᓐᓂᕐᒥᒃ, ᓄᑕᕋᓛᓪᓗ ᐋᓐᓂᐊᖃᑦᑕᖅᑐᑦ ᐅᖁᐊᓗᖕᓂ ᐃᒡᓗᓂᒃ ᐊᒻᒪᓗ ᐊᖓᔪᖅᑳᕆᔭᐅᔪ ᕿᑐᕐᖓᖏᓐᓂᒃ ᐊᓯᐅᔨᓯᒪᔪᑦ ᓲᖃᐃᒻᒪ ᑕᒪᒃᑯᐊ ᐊᔪᙱᑦᑐᐊᓗᐃᑦ ᐊᓯᙳᖅᑎᑦᑎᓂᕐᒥ ᓱᕙᓕᑭᐊᕈᓱᖕᒪᑕ,” ᐅᖃᖅᑐᖅ.

ᖃᖅᑲᖅ ᐅᖃᐅᓯᖃᓚᐅᖅᑐᖅ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᐊᓯᐅᓯᒪᑐᐃᓐᓇᖅᑐᓂᒃ, ᓱᕈᓯᕐᓂᒃ ᐱᔭᐅᑐᐃᓐᓇᖅᐸᒃᑐᓂᒃ ᐸᖅᑭᔨᐅᕙᒃᑐᓄᑦ “ᐃᓱᒪᒋᔭᐅᙱᖢᑎᒃ ᖃᓄᐃᓐᓇᔭᙱᒃᑲᓗᐊᕐᒪᖔᑦ” ᐊᒻᒪᓗ ᐃᒻᒥᓃᖃᑦᑕᓗᐊᕐᓂᐊᓗᖕᒥᑦ ᓄᓇᕗᒥᑦ.

“ᐃᒻᒥᓃᖅᑐᓂᒃ ᐃᓄᐃᑦ ᐅᓄᓛᖑᓯᒪᔪᑦ ᑲᓇᑕᒥ,” ᐅᖃᖅᑐᖅ. “ᑖᒃᑯᐊᓗ ᐱᓕᕆᕝᕕᐅᔪᑦ ᓱᓕ ᑲᒪᒋᔭᖃᙱᑦᑐ.”

ᖃᖅᑲᖅ ᐅᖃᓚᐅᖅᑐᖅ ᐅᖃᐅᓯᐅᓯᒪᒐᓗᐊᖅᖢᓂ ᐊᔪᙱᑦᑐᐊᓘᓂᕋᖅᑕᐅᓪᓗᓂ, ᑲᑉᐱᐊᑦᑕᐅᙱᓐᓂᕋᖅᑕᐅᓪᓗᓂ ᐊᒻᒪ ᓴᙱᓂᕋᖅᑕᐅᓪᓗᓂ, ᐊᒻᒪᓗ ᑐᓴᖅᖢᓂ ᐅᖃᐅᓯᑦᑎᐊᕚᓗᖕᓂ ᒪᑯᑎᑐᓇᖅ, ᐋᖅᑭᒋᐊᖅᓯᒃᑲᓐᓂᖅᓂᖅ, ᐊᔾᔨᒌᙱᑦᑑᑎᐅᓂᖅ ᐊᒻᒪᓗ ᐃᓚᐅᑎᑦᑎᓂᐊᕐᓂᖅ ᐅᖃᐅᓯᐅᒐᓗᐊᖅᑎᓪᓗᒋ ᐊᒻᒪᓗ ᖃᓄᐃᓕᐅᕈᑎᒃᓴᖃᙱᓪᓗᑎᒃ ᑕᐃᒪᓕ ᐋᓐᓂᕈᑎᐅᑐᐃᓐᓇᕐᓇᖅᐳᖅ.

“ᐊᔪᕐᓇᑦᑎᐊᖅᑰᕐᒪᓐ ᒥᓂᔅᑕᓄᑦ ᑐᑭᓯᔭᐅᔭᕆᐊᒃᓴᖅ ᖃᐅᑕᒫᓐ ᐊᑐᖃᑦᑕᕆᐊᖃᖅᑕᑦᑎᓐᓂᒃ, ᑭᓯᐊᓂᓕ ᐅᖃᐅᑎᒻᒪᕆᒃᐸᒃᑲ ᐊᒻᒪᓗ ᑐᓵᖁᓪᓗᒋᑦ ᐅᕙᑦᑎᓐᓂ, ᐅᒃᐱᕈᓱᒡᓗᑎᒡᓗᖓ ᐊᒻᒪ ᐱᓕᕆᐊᕆᓗᓂᔾᔪᒃ,” ᐅᖃᖅᑐᖅ.

ᒪᓕᒐᓕᕆᕕᒡᔪᐊᕐᒦᓐᓂᖓᓂᒃ, ᖃᖅᑲᖅ ᐅᖃᓚᐅᖅᑐᖅ ᐃᒡᓗᓕᕆᓂᖅᒥᒃ ᐱᓕᕆᐊᖃᐃᓐᓇᕐᓂᐊᕐᓂᕋᖅᖢᓂ, ᑕᐃᒪᐃᓯᒪᐃᓐᓇᕋᓱᒃᖢᓂᓗ ᑕᐃᒪᙵᑦ ᓂᕈᐊᖅᑕᐅᓚᐅᖅᓯᒪᒐᒥ 2019-ᒥ.

ᑕᒪᓐᓇ ᐊᕐᕌᒍ ᐱᒋᐊᓕᓵᖅᑎᓪᓗᒍ ᑐᓴᖅᑎᑦᑎᓚᐅᖅᓯᒪᖕᒪᑦ ᐅᓂᒃᑳᑎᒍᑦ “ᐱᐅᙱᑦᑐᓪᓚᕆᐊᓘᓂᖏᓐᓂᒃ” ᐃᓄᐃᑦ ᐃᒡᓗᖏᑦ ᒫᓐᓇ ᐊᖏᕐᕋᕆᔭᖏ.

ᐅᓂᒃᑳᖑᔪᑦ ᐅᕙᙶᓚᐅᖅᓯᒪᔪᖅ ᐱᓇᓱᐊᕈᓯᕐᓂᒃ ᐱᖓᓱᓂᒃ ᐃᒡᓗᓂ ᕿᒥᕐᕈᐊᑲᑕᒃᑎᓪᓗᒋᑦ. ᕿᒥᕐᕈᐊᑲᑕᓚᐅᖅᑎᓪᓗᒋᑦ, ᖃᖅᑲᖅ ᐱᓇᓱᐊᕈᓰᖕᓂ ᒪᕐᕉᖕᓂ ᓄᖅᑲᖓᓚᐅᖅᓯᒪᔪᖅ ᒪᓕᒐᓕᐅᖅᑎᐅᓂᖓᓂᒃ, ᐅᖃᖅᖢᓂ ᑕᒪᓐᓇ ᐱᔾᔪᑎᖃᓗᐊᕐᓂᕐᒧᑦ ᐃᓱᒫᓗᓗᐊᕐᓂᖅᒧᑦ, ᓄᒫᓇᖅᑐᖅᓯᐅᕐᓂᖅᒧᑦ ᐊᒻᒪᓗ ᑕᖃᖓᓗᐊᕐᓂᖅᒧᑦ ᑕᑯᑲᑕᓵᖅᑕᖏᓐᓂᒃ. ᑭᖑᓂᐊᒍᑦ ᓄᖅᑲᖓᓚᐅᖅᓯᒪᖕᒥᔪᖅ ᐋᓐᓂᐊᕐᓂᖅᒧᑦ ᐱᓇᓱᐊᕈᓰᖕᓂ ᒪᕐᕉᖕᓂ ᐄᐳᕉᑎᓪᓗᒍ.

ᖃᖓᑦᑎᐊᓵᕐᓕ, ᖃᖅᑲᖅ ᐅᖃᐅᓯᖃᖃᑦᑕᓚᐅᕐᒪᑦ ᐊᓯᖏᓐᓂᒃ ᐃᓱᒫᓘᑎᒋᔭᐅᔪᓂᒃ ᒪᑯᑎᖓ ᒪᓕᒐᓕᕆᓂᒃᑯᑦ ᑲᒪᒋᔭᐅᔭᕆᐊᓕᖕᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᒃ ᐊᒻᒪᓗ ᐃᓄᖕᓄᑦ ᐊᑐᖁᔭᐅᔪᓂᒃ ᒪᓕᒋᐊᖃᕐᓂᖏᓐᓂᒃ ᐹᕙᓐᓛ ᓴᕕᕋᔭᒃᓴᒧᑦ ᐅᔭᕋᒃᓯᐅᖅᕕᒃ ᐊᖏᒡᓕᒋᐊᖅᑕᐅᓂᐊᕈᓂ, ᑖᓐᓇᓕ ᕿᑭᖅᑖᓘᕐ ᐅᐊᖕᓇᖅᐸᓯᐊᓃᑦᑐᖅ.

ᔫᓂ 14-ᒥ, ᐃᓚᒋᔭᐅᓂᕐᒥᓄᑦ ᒪᓕᒐᓕᕆᔨᕐᔪᐊᓄᑦ ᓴᖅᑭᑎᑦᑎᓚᐅᖅᓯᒪᔪᖅ ᓄᓇᖃᖅᑳᑦᑐᑦ ᐅᖃᐅᓯᖏᑦ ᐃᓚᐅᑎᑕᐅᖃᑦᑕᖁᓪᓗᓂᒋᑦ ᒐᕙᒪᑐᖃᒃᑯᑦ ᓂᕈᐊᒐᒃᓴᓕᕆᓕᖅᐸᑕ ᑭᖑᓪᓕᖅᒥᓐ.

ᒫᓐᓇᒧᓪᓕ, ᐊᓐᑏᐲᑯᑦ ᓄᓇᕗᒥᑦ ᓱᓕ ᓂᕈᐊᖅᖠᓚᐅᙱᑦᑐᑦ ᓂᕈᐊᒐᒃᓴᐅᓛᖅᑐᒥ ᓄᓇᕗᒧᑦ, ᐅᕘᓇᓕ ᓵᓚᑦ ᒪᑲᓚᐅᑦᑎᒍᑦ, ᐊᓐᑏᐲᑯᑦ ᑎᑎᕋᖅᑎᖓ ᑐᓴᒐᒃᓴᓕᕆᓂᕐᒧᑦ.

Share This Story

(0) Comments