2018 ᐃᖃᓗᖕᓂ ᖃᓄᐃᕈᓘᔭᕐᓇᓚᐅᕐᐳᖅ

ᐃᖃᓗᐃᑦ ᖃᓄᐃᓕᐅᕈᓘᔭᕐᕕᐅᓚᐅᕆᕗᖅ 2018-ᒥᑦ. ᐅᑯᓂᖓ, ᐊᖏᓂᖅᐹᖅ ᓂᐅᕕᕐᕕᒃ ᐊᖓᔪᖄᖃᕐᕕᒃᒥᑦ ᐃᑭᑲᓴᒃᖢᓂ, ᐊᓄᕌᕐᔪᐊᖅᖢᓂ ᐃᒡᓗᐃᑦ ᖁᓕᖏᑦ ᑎᒃᑕᐅᑲᑕᒃᖢᑎᒃ ᐃᓚᖏᓐᓂᒃ, ᐊᒻᒪᓗ ᑎᒍᔭᐅᓯᒪᕝᕕᒃᒥ ᓱᕋᒃᑎᕆᓂᕐᒧᑦ ᐊᒥᓱᓂᒃ ᓅᑎᑦᑎᔭᕆᐊᖃᓕᓚᐅᖅᖢᑎᒃ ᓂᒋᕐᒥ ᑎᒍᔭᐅᓯᒪᕝᕕᖕᓄᑦ.

ᐅᕝᕙᐅᑯᐊ ᐃᖃᓗᖕᓂ ᐅᓂᒃᑳᓂᒃ ᑐᓴᕐᓇᓛᖑᖃᑦᑕᓚᐅᕐᑐᑦ ᑕᖅᑭᑦ 12-ᓂ ᐊᑐᓵᖅᑐᓂᒃ.

ᔭᓄᐊᕆ

• ᓄᑖᖅ ᐊᕐᕌᒍ ᐱᒋᐊᓚᐅᕐᐳᖅ ᐃᖃᓗᖕᓂ ᐃᒡᓗᒥ ᐃᑭᑦᑐᖃᖅᖢᓂ, ᔭᓄᐊᕆ 1-ᒥᑦ, ᑖᓐᓇ ᑕᓪᓕᒪᐅᓕᖓᔪᖅ ᐃᒡᓗ ᓄᖑᖢᓂ, ᐃᑭᒍᑎᐅᓪᓗᓂ ᐅᖅᑰᓴᐅᑎ ᐊᐅᒃᑎᑦᑎᒍᑎᐅᓇᓱᒃᑐᖅ ᓱᓪᓗᓕᖕᒥᑦ ᑲᒪᒋᔭᐅᙱᓐᓂᖓᓄᑦ.
• ᐅᓪᓗᐃᑦ ᐊᒥᓲᙱᑦᑐᑦ ᐊᓂᒍᕐᑎᓪᓗᒋᑦ ᔭᓄᐊᕆ 6-ᒥ, ᐱᕐᓯᖅᑐᐊᓘᑎᓪᓗᒍ ᐃᖃᓗᖕᓂ, ᓄᓇᓯᐅᑎ ᑐᓗᕐᓯᓚᐅᕐᑐᖅ ᐊᕐᓇᒥᑦ ᑖᓐᓇᓗ ᐃᓅᔪᓐᓃᖅᖢᓂ.
• ᐃᖃᓗᖕᓂ ᓄᓇᓕᐸᐅᔭᓄᑦ ᑲᑎᒪᔩᑦ ᐅᖃᐅᓯᖃᑲᑕᓚᐅᕐᐳᑦ ᑭᒃᑯᓕᒫᓂᒃ ᐱᕐᕈᓗᐊᕿᑎᑦᑎᑦᑕᐃᓕᓂᕐᒥᒃ ᐅᕝᕙᓘᓐᓃ ᐃᓄᐃᑦ ᐊᖑᓇᓱᖕᓂᕐᒧᑦ ᐱᔪᓐᓇᐅᑎᖏᑦ ᓂᕈᐊᕐᓂᕐᒥᒃ ᕿᒻᒥᒥ ᐋᓐᓂᕐᑐᖃᓚᐅᕐᑎᓪᓗᒍ ᑎᕆᒐᓂᐊᕐᔪᒃᒧᑦ ᒥᑭᖏᐊᒥ ᐃᖃᓗᐃᑦ ᐅᐊᖕᓇᕐᐸᓯᐊᓂᒃ.
• ᑕᖅᑭᐅᑉ ᐃᓚᖓᓂᒃ, ᐳᐃᔾᔪᕋᕐᕕᒃᒧᙵᐅᖃᑦᑕᖅᑐᑦ ᓈᒻᒪᒃᓴᕈᓐᓃᕐᔪᐊ­ᓕᓚᐅᕐᐳᑦ ᑎᒡᓕᕕᐅᖃᑦᑕᖕᓂᖏᓐᓂᒃ ᐊᓐᓄᕌᒃᑯᕕᖕᓂᒃ.
• ᓇᐃᓴᐃᔨᒃᑯᑦ ᑲᓇᑕᒥ ᐅᓂᒃᑲᐅᓯᖃᓚᐅᕐᑐᑦ ᐃᖃᓗᐃᑦ ᑲᓇᑕᒥ ᐊᐃᑉᐸᕆᔭᐅᓂᖓᓂᒃ, ᐊᑐᖅᑕᐅᓂᕐᓴᐅᕙᒃᑐᑦ ᑕᐅᑐᒃᖢᒋᑦ, ᐸᓖᓯᒃᑯᑎᒍᓐᓄᑦ ᐅᓂᒃᑲᐅᓯᖏᑦᑎᒍᑦ ᐊᕐᓇᓂᒃ ᐊᓐᓂᕐᓯᕆᖃᑦᑕᕐᓂᕐᒥᒃ 2008-ᓗ ᐊᒻᒪ 2015 ᐊᑯᓐᓂᖓᓂᒃ.

ᕕᕝᕗᐊᕆ

• ᕿᒻᒦᑦ ᐃᖃᓗᖕᓃᑦᑐᑦ ᐊᑭᖃᙱᑦᑐᒥᒃ ᓂᕐᔪᑎᓄᑦ ᓘᒃᑖᓂᒃ ᖃᐅᔨᓴᖅᑕᐅᓚᐅᕐᑐᑦ ᑖᒃᑯᐊ ᓘᒃᑖᑦ ᑎᑭᑎᑕᐅᓪᓗᑎᒃ ᐃᖃᓗᖕᓂᑦ ᓂᕐᔪᑎᓂᒃ ᓴᐳᓐᓂᐊᖅᑏᑦ ᑲᑐᔾᔨᖃᑎᒌᓂᒃ.
• ᕕᕝᕗᐊᕆ 6-ᒥ, ᐸᓖᓯᑯ ᑎᒍᓯᓚᐅᕐᑐᑦ ᐊᒻᒪ ᐸᓯᔭᒃᓴᙳᖅᑎᑦᑎᓪᓗᑎᒡᓗ ᐊᖑᑎᒥ ᐊᖓᔮᖅᖢᓂ ᐅᓚᒪᐅᓯᔭᖅᑐᒥᑦ ᓄᓇᓕᖕᓂ ᐅᓗᕆᐊᕐᓵᕆᔪᒥᑦ ᒫᓂ ᐃᒡᓗᓂᑦ 300-ᖏᓐᓃᒃᑐᓂᑦ.
• ᐃᖃᓗᖕᓂ ᐃᖃᓗᒐᓱᖕᓂᐊᕐᓂᕐᒥᒃ ᐃᓕᓐᓂᐊᕐᕕᒃ ᐃᑲᔫᑎᒃᓴᖅᑖᓚᐅᕐᐳᑦ ᐅᑯᓇᙵᑦ ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᓄᑖᒥ ᐃᒪᒃᑯᑦ ᐃᓕᓐᓂᐊᕈᑎᒃᓴᓄᑦ ᐊᒻᒪᓗ ᐆᒧᖓ ᓱᒃᑲᔪᒥᒃ ᐅᒥᐊᕐᒥᒃ ᓄᓇᕗᒥᐅᑕᓂᒃ ᐊᑐᖅᑕᐅᖃᑦᑕᕐᓂᐊᖅᑐᒥᒃ ᐃᓕᓐᓂᐊᖅᑎᑕᐅᑎᓪᓗᒋᑦ ᐃᒪᒃᑰᖓᔪᓂᒃ ᐃᖅᑲᓇᐃᔮᖑᔪᓐᓇᖅᑐᓂᒃ.
• ᐃᖃᓗᐃᑦ ᓄᓇᓕᐸᐅᔭᖓ ᓂᕈᐊᓚᐅᕐᐳᑦ ᓄᑖᙳᕆᐊᖅᑎᑦᑎᔪᒪᙱᖢᑎᒃ ᑳᓐᑐᕌᖓᓂᒃ ᐊᐅᓚᑦᑎᔨᒧᑦ ᒧᕼᐋᒪᑦ ᕼᐊᓵᓐ ᐊᒻᒪᓗ ᓂᕈᐊᙶᖅᖢᑎᒃ ᐱᙳᐊᖅᑐᓕᕆᓂᕐᒧᑦ ᑐᑭᒧᐊᖅᑎᑦᑎᔨ ᐊᐃᒥ ᐃᐊᒍᔅᒪᒥᒃ ᐃᓇᖏᕐᓯᓯᒪᓂᐊᕐᓂᕐᒧᑦ.
• ᐃᖃᓗᐃᑦ ᐸᓖᓯᖏ ᑕᓪᓕᒪᖅᖢᑎᒃ ᑎᒍᓯᓚᐅᕐᐳᑦ ᓱᐴᖅᑐᒐᓕᕆᓂᕐᒧᑦ ᖃᐅᔨᓴᖅᑎᓪᓗᒋ ᐱᓯᒪᔪᓂᒃ ᐊᒻᒪ ᓂᐅᕕᐊᒃᓴᖃᖃᑦᑕᖅᑐᓂᒃ ᓄᓇᓖᑦ ᓂᐅᕕᕐᕕᖏᑦᑕ ᓯᓚᑖᓂᒃ.
• ᓂᕆᐅᖕᓂᖃᓕᓚᐅᕐᑑᒐᓗᐊᑦ ᐃᖃᓗᖕᓂ ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᒃ ᐊᖏᒡᓕᒋᐊᖅᑕᐅᓂᐊᕐᓂᖓᓂᒃ ᓱᓕ ᑕᐃᒪᐃᓚᐅᙱᑦᑐᖅ.

ᐃᖅᑲᓇᐃᔭᖅᑎᐅᔪᑦ ᐃᖃᓗᖕᓂᑦ ᓄᑖᖅ ᑳᕕᑐᕆᐊᕐᑐᕐᕕᒃᓴᒥᑦ ᖁᕕᐊᓱᒻᒪᕆᓚᐅᕐᐳᑦ ᒪᑐᐃᕐᓯᑎᓪᓗᒋᑦ Black Heart Café-ᒥᑦ ᐄᐳᕉᑎᓪᓗᒍ. (ᐊᔾᔨᓕᐅᕆᔨ ᐱᐊᑦ ᐳᕋᐅᓐ)

ᒫᑦᓯ

• ᐃᖃᓗᖕᓂ ᐱᔨᑦᑎᕋᐅᑎᓕᕆᔨᒃᑯᑦ ᓇᓗᓇᐃᕐᓯᓪᓚᕆᓚᐅᕐᐳᑦ ᐃᓱᖃᖅᑰᔨᙱᑦᑐ ᓈᒻᒪᒃᓴᙱᓐᓂᕐᒥ ᒐᕙᒪᑐᖃᒃᑯᑦ ᑮᓇᐅᔭᒃᓴᓕᐅᕈᑎᒋᓕᖅᑕᖓᓂᒃ Phoenix-ᖑᓂᕋᖅᑕᐅᔪᒥᒃ.
• ᕙᐃᔅᐳᒃᑯᑦ ᓂᐅᕕᐊᒃᓴᖃᕋᓱᒃᑐᖃᓚᐅᕐᑐᖅ ᐃᒥᐊᓗᖕᒥ ᓱᐴᕐᑐᒐᕐᓂᒡᓗ ᐅᕘᓇ ᐃᖃᓗᐃᑦ ᓂᐅᕕᐊᒃᓴᖃᕐᕕᖓᒍᑦ.
• ᐃᖃᓗᐃᑦ ᐊᕐᓴᕐᓃᑦ ᐃᓕᓐᓂᐊᕐᕕᖓ ᐃᑭᑎᑕᐅᒋᐊᓚᐅᕐᓯᒪᒐᓗᐊᕐᒪᑦ ᐱᖓᓱᓄᑦ ᐃᓄᖕᓄᑦ ᐊᖑᔭᐅᔪᓄᑦ ᒫᑦᓯ 19-ᖑᑎᓪᓗᒍ. “ᑕᑯᔪᕕᓂᖅ ᑖᔅᓱᒥᖓ ᐃᑭᓕᖅᑐᒥᒃ ᖃᒥᑎᑦᑎᔪᓐᓇᓚᐅᕐᑐᖅ ᒥᑭᑦᑐᕈᓗᖕᒥ ᐱᐅᔪᓐᓃᕈᑎᖃᑐᐃᓐᓇᓕᖅᖢᓂ. ᐃᖃᓗᐃᑦ ᖃᑦᑎᕆᔨᖏᑦ ᐊᑐᖅᑕᐅᔭᕆᐊᖃᓚᐅᙱᑦᑐᑦ,” ᐸᓖᓯᒃᑯᑦ ᐅᖃᖅᑐᑦ.
• ᐃᖃᓗᐃᑦ ᓄᓇᓕᐸᐅᔭᖓ ᐊᑭᓖᒋᐊᖃᓚᐅᕐᑐᑦ $69,000-ᓂᒃ ᐱᕐᕈᓗᐊᕿᑎᑦᑎᑦᑕᐃᓕᓂᕐᒥᒃ ᓱᕋᐃᓂᖏᓐᓄᑦ ᐊᖑᑎᒥᒃ ᐊᒃᑕᐅᑎᒧᑦ ᓄᓇᓯᐅᑎᒧᑦ ᖄᖓᒎᖅᑐᖃᓚᐅᕐᑎᓪᓗᒍ. ᐱᖓᓱᑦ ᓄᓇᓕᐸᐅᔭᓄᑦ ᐃᖅᑲᓇᐃᔭᖅᐅᔪᑦ ᐊᑭᓖᒋᐊᖃᓚᐅᕆᕗᑦ ᑖᔅᓱᒧᖓ ᐱᕐᕈᓗᐊᕿᔾᔪᑎᒧᑦ.

ᐃᓚᔫ ᐊᕐᓇᖁᖅ ᑐᐊᕕᕐᐳᖅ ᓇᑦᑎᕐᒥᒃ ᐱᓚᒃᓯᓗᓂ ᐊᒻᒪ ᐊᕕᒃᑐᕐᑎᐊᕆᐊᖃᖅᖢᓂᐅᒃ ᓇᑦᑎᖅ ᐃᓗᐃᑦᑐᖅ ᐃᖃᓗᐃᑦ ᑐᓂᒃ ᑕᐃᒻ 2018-ᒥᑦ. (ᐊᔾᔨᓕᐅᕆᔨ ᐱᐊᑦ ᐳᕋᐅᓐ)

ᐄᐳᕈᓪ

• ᑮᓇᐅᔭᓕᕆᔾᔪᑎᐅᔪᑦ ᐃᖃᓗᐃᑦ ᓄᓇᓕᐸᐅᔭᖏᓐᓂᒃ ᐃᓱᒪᒍᑎᐅᓕᕐᑐᑦ ᐊᒥᒐᕐᓯᓗᐊᔾᔮᙱᓐᓂᕐᒥᒃ, ᑭᓯᐊᓂᓕ ᐊᑭᓕᒃᓴᖅᑕᖃᕐᓂᐊᖅᖢᓂ 2018 ᐃᓱᐊᓂᑦ.
• ᒫᓐᓇᓕᓴᕐᒥᒃ ᑳᕕᑐᕆᐊᕐᕕᖕᒥᑦ ᒪᑐᐃᖅᑐᖃᖅᐳᖅ ᐃᖃᓗᖕᓂᑦ, ᐸᓛᒃ ᕼᐋᑦ ᑲᕕᐃ. ᖁᕐᓱᑦᑎᐊᖅᖢᓂ ᐃᒡᓗ ᑳᕕᑐᕆᐊᕐᕕᒃᓴᖅ ᐊᒻᒪᓗ ᐅᖃᐅᓯᐅᑲᑕᒃᖢᓂ ᑕᐃᒪᐃᑦᑐᒥᑦ ᐱᑕᖃᕆᐊᖃᓪᓚᕆᖕᓂᖓᓂᒃ ᑭᒃᑯᑐᐃᓐᓇᕐᓄᑦ ᐅᐸᖃᑦᑕᕐᕕᐅᔪᓐᓇᖅᑐᒥᑦ.
• ᑐᖁᙵᔪᓕᕆᔨᓄᑦ ᒪᓕᒐᓕᕆᓂᕐᒧᑦ ᐃᖅᑲᖅᑐᐃᔨᐅᔪᑦ ᐅᖃᖅᑐᑦ ᓄᓇᕗᑦ ᒐᕙᒪᒃᑯᑦ ᐃᓄᒃᑐᑦ ᐅᖃᕈᓐᓇᖅᑐᓂᒃ ᐃᓄᓕᕆᔨᑕᖃᒃᑲᓐᓂᕆᐊᖃᕐᓂᖏᓐᓂᒃ ᑖᓐᓇᓗ ᓴᕿᑕᐅᓚᐅᖅᖢᓂ ᐄᐳᕈᓪ 29-ᒥᑦ, ᖃᐅᔨᓴᕐᓂᖅᑕᖄᓪᓚᓚᐅᖅᑎᓪᓗᒍ 2015-ᒥᑦ ᐃᓅᔪᓐᓃᖅᑐᕕᓂᕐᒥᒃ ᐃᖃᓗᖕᒥᐅᑕᒥᒃ ᓄᑕᕋᓛᒥᑦ ᑲᒪᒋᔭᐅᔪᒥ ᐃᓄᓕᕆᔨᒃᑯᓐᓄᑦ.
• ᑐᒃᓯᕋᐅᑎᐅᓯᒪᔪᖅ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᐱᒡ ᐅᕌᒃᔅ ᐹ ᐊᒻᒪ ᒍᕆᐅᓪ (Big Racks Bar and Grill) ᓄᖃᖓᑎᑕᐅᓕᓚᐅᕐᐳᖅ ᒪᓕᒐᕋᓛᒥᑦ ᐋᕿᒋᐊᕆᐊᖃᕐᓯᒪᒻᒪᕆᒃᑐᒥᑦ ᐊᓯᐅᔨᔭᐅᑐᐃᓐᓇᕐᓂᑯᓂᒃ ᓄᓇᓕᐸᐅᔭᐃᑦ ᐸᕐᓇᐅᓯᐅᖅᑎᖏᓐᓄᑦ ᕿᒥᕐᕈᐊᖅᑕᐅᒃᑲᓐᓂᕆᐊᖃᓕᕐᓂᖓᓄᑦ ᐊᐃᑉᐸᕆ­ᓂᑦᑕᖓᓂᒃ.

ᒪᐃ

• ᕿᑭᖅᑖᓗᒃ ᑯᐊᐳᕇᓴᓐᑯᑦ ᐸᕐᓇᒃᓯᒪᓕᓚᐅᕐᐳᑦ ᓴᓇᓂᐊᕐᓗᑎᒃ ᑐᔪᕐᒥᕕᒃᓴᒥᒃ ᐊᒻᒪ ᑲᑎᒪᕕᒃᓴᒥᑦ ᕙᑐᕈᓪ ᐊᑐᕆᐊᕐᒥ. ᑐᔪᕐᒥᕕᒃ ᐋᕿᒃᑕᐅᓯᒪᔪᖅ 94-ᓂ ᐃᒡᓗᕈᓯᖃᕐᓗᑎᒃ ᐊᒻᒪ 600-ᓂ ᐃᓄᖃᕈᓐᓇᖅᑐᒥᒃ ᑲᑎᒪᕕᒃᓴᒥᑦ ᐃᓚᖃᕐᓗᓂ ᐃᒥᕆᐊᕐᕕᒃᓴᒥᑦ ᐊᒻᒪ ᓴᐃᓕᕕᒃᓴᒥᑦ.
• ᐃᖃᓗᐃᑦ ᐸᓖᓯᖏᑦ ᖃᐅᔨᓴᓚᐅᕐᑐᑦ ᒪᐃ 6-ᒥᑦ ᐃᓅᔪᓐᓃᖅᑐᕕᓂᕐᒥᒃ ᐊᕐᓇᒥ, ᐅᑭᐅᓕᒃ 22, ᑕᒻᒫᑎᕝᕕᒃ ᑐᔪᕐᒥᕕᒃᒥᑦ, ᐸᓖᓯᒃᑯᑦ ᑭᖑᓂᑦᑎᐊᖓᒍᑦ ᐅᖃᓕᓚᐅᕐᑐᑦ ᑖᓐᓇ ᑲᖏᖅᑐᒑᐱᖕᒥᐅᑕᐅᑉ ᐊᕐᓇᐅᑉ ᐃᓅᔪᓐᓃᕐᓂᖓ ᐃᒪᐃᓐᓂᕋᖅᑕᐅᓪᓗᓂ ᐃᓄᐊᕐᓯᓂᕐᒧᑦ-ᐃᒻᒥᓃᕐᓂᕐᒨᕐᓂᕋᖅᑕᐅᓪᓗᓂ, ᑖᔅᓱᒪ ᐊᐃᑉᐸᖓ ᓇᓂᔭᐅᑎᓪᓗᒍ ᐃᓅᔪᓐᓃᕐᓯᒪᔪᖅ ᐊᒻᒪᓗ ᐸᓯᔭᒃᓴᓂᒃ ᕿᓂᕈᓐᓃᓚᐅᕐᖢᑎᒃ.
• ᐊᐅᔭᒃᑯᑦ ᓯᐊᕐᕆᔮᕐᕕᒃ ᐃᖃᓗᐃᑦ ᑰᓕᕝᕕᐊᓂᒃ ᒪᑐᔭᐅᓚᐅᕐᑐᖅ ᐃᓂᒃᓴᓕᐅᕋᓱᒃᖢᑎᒃ ᐊᓯᒃᑲᓐᓂᖓᓂᒃ ᐱᙳᐊᕐᓂᕐᒨᖓᔪᒥᒃ. ᐃᓚᒌᖑᖅᑳ­ᑎᒋᔪᑦ ᑕᒪᑐᒧᖓ ᓈᒻᒪᒃᓴᙱᔾᔪᑎᒥᒃ ᐊᑎᓕᐅᕐᑎᑦᑎᓚᐅᕐᐳᑦ ᒪᑐᐃᖓᖁᔨᓪᓗᑎᒃ ᓯᐊᕐᕆᔮᕐᕕᒃᒥᑦ ᐊᒻᒪᓗ ᓄᓇᓕᐸᐅᔭᐃᑦ ᐋᕿᒃᓯᖃᑎᖃᕈᓐᓇᕐᓯᓚᐅᕐᑐᑦ ᓄᓇᖃᖅᑐᓂᒃ.
• ᑕᐅᕙ ᐋᑎᒃ ᓕᒥᑎᑦ ᑳᓐᑐᕌᒃᑖᓚᐅᕐᑐᑦ $89 ᒥᓕᐊᓐ ᑖᓚᑐᖅᑐᒥᒃ ᓄᓇᕗᑦ ᒐᕙᒪᒃᑯᓐᓂ ᓴᓇᓕᕆᐊᕐᓂᕐᒧ ᐃᒡᓗᒥᒃ ᒥᑭᑦᑐᓄᑦ ᐅᒥᐊᓄᒃ ᑐᓚᒃᑕᒃᕕᒃᓴᒥᑦ ᐊᒻᒪ ᐃᑎᔪᒦᑦᑐᒥᒃ ᑐᓚᒃᑕᕐᕕᒃᓴᒥ ᐃᖃᓗᖕᓂᑦ. ᐅᓇ ᓴᓇᓂᖅ ᐱᒋᐊᖅᑕᐅᓚᐅᕐᑐᖅ ᐊᐅᔭᐅᓚᐅᕐᑐᖅ.

ᔫᓂ

• ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎ ᐋᑕᒻ ᐋᕆᐊᒃ ᓚᐃᑦᓯᑑᓐ ᐅᖃᓪᓚᓚᐅᕐᐳᖅ ᓄᓇᕗᑦ ᒪᓕᒐᓕᕆᕕᒡᔪᐊᖓᓂᒃ ᓈᒻᒪᒃᓴᙱᓐᓂᕋᖅᖢᓂ ᐋᓐᓂᕐᓯᕆᕙᖕᓂᕐᒥᒃ, ᓇᔭᖓᑕ ᐃᓅᔪᓐᓃᓚᐅᕐᓂᖓ ᓇᓪᓕᕐᑎᓪᓗᒍ.
• ᐃᓱᒪᖃᑦᑎᐊᖅᑐᐊᓗᖕᒥᑦ ᐳᓛᖅᑐᒥ ᓇᒃᓴᖅᑐᖃᓚᐅᕐᑐᖅ ᑎᓴᒪᓂᒃ ᕼᐋᑭᖅᑐᕐᓯᐅᑎᓄᑦ ᐴᕐᓂᒃ ᐃᓗᓕᖃᖅᖢᑎᒃ ᐊᕐᓇᕐᓯᐅᑎᓂᒃ ᐃᖃᓗᐃᑦ ᐃᓕᓐᓂᐊᕐᕕᖏᓐᓄᐊᕐᓂᐊᖅᑐᓂᒃ.
• ᐅᓐᓄᐊᒃᑯᑦ ᓱᕋᒃᑎᕆᓂᐅᔪᖅ 26-ᓄᑦ ᑎᒍᔭᐅᓯᒪᔪᓄᑦ ᕿᑭᖅᑖᓗᖕᒥᑦ ᐃᑲᔪᖅᑕᐅᕝᕕᒃᒥ ᐃᓚᖓᓂᒃ ᐃᓄᖃᕈᓐᓇᐃᓪᓕᒍᑎᐅᕗᖅ. ᐃᑲᔪᖅᑕ­ᐅᕝᕕᓕᕆᔨᒃᑯᑦ 40-ᓂᒃ ᑎᒍᔭᐅᓯᒪᔪᓂᒃ ᐊᐅᓪᓚᖅᑎᑦᑎᔭᕆᐊᖃᓚᐅᕐᑐᑦ ᖃᓪᓗᓈᑦ ᓄᓇᖓᓃᑦᑐᓄᑦ ᐊᐅᔭᐅᓂᖓᓂᒃ ᑖᓐᓇ ᐋᕿᒃᓱᖅᑕᐅᓂᖓᓂᒃ.

ᑕᓯᖅ ᔨᐅᕈᑏᓐ ᐊᔾᔨᖃᖅᑐᖅ ᐅᕙᓂ ᔪᓚᐃ ᐱᒋᐊᓕᓵᕐᓯᒪᑎᓪᓗᒍ. ᒪᖁᑲᑕᑦᑎᐊᙱᓐᓂᕐᒧᑦ ᐊᒻᒪᓗ ᐃᓄᖕᓂᑦ ᐱᔭᐅᔪᒪᓂᕐᓴᐅᓂᕐᒧᑦ ᑖᔅᓱᒥᖓ ᑕᓯᕐᒥ ᐃᒪᖃᕈᓐᓃᖅᐹᓪᓕᕈᑎᐅᕗᖅ ᐃᒥᕐᑕᕐᕕᐊᖃᑦᑕᖅᑐᒥᒃ, ᑖᓐᓇᓗ ᐃᓱᒫᓘᑎᒋᔭᐅᓕᖅᖢᓂ ᓄᓇᓕᐸᐅᔭᓄᑦ ᐃᒥᒐᒃᓴᖃᙱ­ᓗᐊᑐᐃᓐᓇᕆᐊᖃᕐᓂᕐᒥᒃ ᐅᑭᐅᖑᔪᖅ. (ᐊᔾᔨᙳᐊᖁᑎᒋᔭᐅᔪᖅ)

ᔪᓚᐃ

• ᐃᒻᒥᓃᖅᑐᖃᑲᑕᓚᐅᕐᑎᓪᓗᒍ ᔫᓂᒥᑦ, ᐃᖃᓗᖕᓂᑦ ᐸᓖᓯᒃᑯᑦ ᐱᒋᐊᖅᑎᑦᑎᓚᐅᕐᑐᑦ ᔪᓚᐃ 16-ᒥᑦ ᐱᓱᑲᑕᒃᑐᓂᒃ ᐸᓕᓯᑕᖃᐅᕐᓂᐊᕐᓗᓂ ᐊᐅᔭᐅᓂᖓᓂ, ᑕᒪᓐᓇ ᐱᐅᓯᕚᓪᓕᕈᑎᐅᓇᓱᖕᓂᐊᕐᓗᓂ ᐸᓖᓯᒃᑯᑦ ᐊᒻᒪ ᓄᓇᖃᖅᑐᑦ ᐃᓅᖃᑎᒌᖕᓂᕐᓴᐅᔪᓐᓇᖁᓪᓗᒋᑦ ᑖᒃᑯᐊ ᓄᓇᖃᖅᑐᑦ ᐸᓖᓯᓂᒃ ᑐᐊᕕᕐᓇᖅᑐᓕᕆᓂᕐᒧᑦ ᐱᓕᕆᐊᖃᕈᓐᓇᕐᓂᖏᑦᑎᒍᑦ.
• ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔨ ᐅᖃᖅᑎᓪᓗᒍ ᓄᓇᓕᐸᐅᔭᐃᑦ ᑭᓱᓕᕆᙱᓗᐊᕐᓂᖏᓐᓂᒃ ᐃᒪᑭᒃᓴᓕᒑᓂᕐᒥᒃ ᓄᓇᓕᖕᓂᑦ, ᑲᑎᒪᔩᑦ ᐱᓕᕆᑎᑦᑎᓕᓚᐅᕐᑐᑦ ᑕᒪᑐᒥᖓ ᐱᓕᕆᐊᖃᕐᓂᐊᖅᑐᓂᒃ.
• ᐃᖃᓗᐃᑦ ᓄᓇᓕᐸᖓᔭᖓ ᑐᓂᔭᐅᓚᐅᕐᑐᑦ $26.2 ᒥᓕᐊᓐ ᑖᓚᓂᒃ ᒐᕙᒪᑐᖃᒃᑯᓐᓂᒃ ᓴᓇᓂᐊᕐᒪᑕ ᓄᑖᒥᒃ ᐊᒃᑕᕐᕕᒃᓴᒥᑦ ᒫᓐᓇ ᐊᒃᑕᕐᕕᐅᔪᒥ ᐊᓯᐊᒎᕐᑐᒃᓴᒥᑦ, ᑖᓐᓇ ᐊᒃᑕᕐᕕᒋᔭᐅᔪᖅ ᑭᓱᖃᐅᓗᐊᓕᕐᒪᑦ ᐊᒻᒪᓗ ᐃᑭᓕᓚᐅᕐᐸᒃᖢᓂ.
• SpaceX’s Falcon 9 ᖁᒻᒧᒃᑎᑕᐅᓚᐅᕐᑐᖅ ᑲᐃᑉ ᑲᓈᕗᕈ ᐅᓇᑕᖅᑐᒃᓴᓕᕆᕝᕕᒃᒥᑦ ᕗᓘᕆᑕᒥᑦ, ᓇᒃᓴᖅᖢᓂ ᓄᑖᒥᒃ ᑕᓕᓵᒃᑯᑦ ᖁᒻᒧᒃᑎᑕᐅᔪᖁᑎᒃᓴᖓᓂᒃ, ᑖᒃᑯᐊᓗ ᐅᖃᕐᓯᒪᒻᒪᕆᒃᖢᑎᒃ ᓱᒃᑲᓂᕐᓴᒥᒃ ᖃᕋᓴᐅᔭᒃᑯᑦ ᐊᑦᑕᑕᐅᑎᖃᖅᑎᑦᑎᒍᑎᐅᓂᐊᕐᓂᖓᓂᒃ ᓄᓇᓕᓕᒫᓂᒃ ᓄᓇᕗᒥᑦ 2019 ᐃᓱᓕᐊᒍᑦ.

ᐋᒐᓯ

• ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᐊᖏᖃᑎᒌᓚᐅᕐᑐᑦ ᐃᒥᕐᑕᕐᓂᕐᓴᐅᓂᐊᕈᒪᓪᓗᑎᒃ ᐊᒥᓲᖏᑦᑐᓂᒃ ᓇᖕᒥᓂᖅ ᐊᐅᓚᑕᐅᔪᓂᒃ ᓄᓇᓕᖕᓂᑦ, ᑕᐃᒪᓐᓇᓗᑦ ᐱᔪᓐᓇᖅᑎᑦᑎᓕᓚᐅᕐᑐᑦ ᓄᓇᕗᒥᑦ ᐃᒥᐊᓗᓕᐅᕐᕕᒃ ᑲᒻᐸᓂᒥᒃ ᒪᑐᐃᕈᓐᓇᓕᕈᑎᐅᓪᓗᓂ ᐱᓕᕆᐊᖏᓐᓂᒃ ᐋᒐᓯ 24-ᒥᑦ.
• ᐋᒐᓯᐅᑉ ᓄᙳᐊᓂᒃ, ᓇᑉᐸᖏᑦ ᐃᖃᓗᖕᒥᐅᑕ ᐃᒪᕐᒧᑦ ᓈᒻᒪᙱᓕᐅᕈᑎᖃᓚᐅᕐᐳᑦ ᐊᒻᒪ ᖃᓛᖅᑎᑦᑎᔭᕆᐊᖃᑲᑕᒃᖢᑎᒃ ᐱᓇᓱᐊᕈᓯᕐᒥᒃ, ᓄᓇᓕᐸᐅᔭᐃᑦ ᐋᕿᒃᓱᐃᓚᐅᕐᓂᖏᓐᓄᑦ ᓄᑕᐅᔪᓐᓃᕐᓯᒪᔪᓂᒃ ᑯᑐᑲᑕᐃᓐᓇᓕᕐᑐᓂᒃ ᓱᓪᓗᓕᖕᓂᒃ ᐊᒻᒪᓗ ᔪᐊᒥ ᑯᐊᑦ ᓴᓇᔭᐅᓂᖓᓄᑦ.
• ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔩᑦ ᓂᕈᐊᓚᐅᕐᐳᑦ ᐋᒐᓯ 28-ᒥᑦ ᐱᑖᕈᒪᓂᕐᒥᒃ ᐃᒪᕐᒧᑦ ᐱᐅᓯᒋᐊᕈᑎᒃᓴᒥᒃ ᓇᖏᒥᓂᕆᔭᐅᓂᑯᒥᑦ ᓄᓇᕗᑦ ᒐᕙᒪᒃᑯᓐᓂᒃ ᐊᒻᒪ ᐊᑐᖅᑕᐅᓚᐅᕐᓯᒪᓪᓗᓂ ᐊᑕᐅᓰᖅᑕᐅᓪᓗᓂ ᐊᕐᕕᐊᓂᒃ ᐃᒪᑭᒃᓴᓗᐊᓕᕐᑎᓪᓗᒋᑦ. ᐅᓇ ᐋᕿᒃᑕᐅᓕᓚᐅᕐᑐᖅ ᐸᕐᓇᒃᑕᐅᓯᒪᓂᕐᒨᖓᓗᓂ, ᐅᓇ ᑕᓯᖅ ᔨᐅᕈᑏᓐ ᐃᒥᒐᒃᓴᒥᒃ ᐃᒪᖃᕈᓐᓃᑳᓪᓚᒃᑯᓂ—ᐊᐅᓪᓚᖅᑎᑕᐅᓂᖓ ᐊᒻᒪ ᐋᕿᒃᓱᖅᑕᐅᓂᖓ ᐊᑭᖃᖅᑎᑕᐅᓚᐅᕐᑐᖅ ᒫᓂ $846,000.

ᐅᑯᐊ ᐃᓚᒌ ᑎᓴᒪᑦ ᑐᑉᐸᒃᓴᓚᐅᕐᑐᑦ ᐃᖃᓗᖕᓂᑦ ᒪᓕᒐᓕᕆᕕᒡᔪᐊᑉ ᓯᓚᑎᑦᑎᐊᖓᓂ ᓇᒡᒐᔾᔭᐅᒥᑦ, ᓯᑎᐱᕆ 24. ᐅᖃᕐᓯᒪᓪᓗᑎᒃ ᐃᒃᓯᕙᐅᑖᓗᒋᔭᐅᔪᓂᒃ ᓯᓂᒡᕕᒃᓴᖃᑦᑎᐊᕈᓐᓃᕐᓂᖏᓐᓂᒃ ᐅᑭᐅᖑᓂ­ᐊᕐᑐᖅ, ᐊᒻᒪᓗ ᑕᕝᕙᓂ ᑐᐱᕐᒥ ᓯᓂᑲᑕᖕᓂᐊᖅᖢᑎᒃ ᑭᓯᐊᓂ ᐃᒡᓗᑖᖅᑎᑕᐅᒍᑎᒃ. (ᐊᔾᔨᓕᐅᕆᔨ ᑯᐊᑦᓂ ᐃᐊᒍ)

ᓯᑎᐱᕆ

• ᓯᑎᐱᕆ 10-ᒥᑦ ᓯᑎᐱᕆ 13-ᒧᑦ, ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᖃᐅᔨᒐᓱᖕᓂᕐᒧᑦ (MMIWG) ᐱᓕᕆᐊᖃᖅᑐᑦ ᕗᕉᐱᓱ ᑐᔪᕐᒥᕕᖕᒥ ᑐᓴᑲᑕᓚᐅᕐᐳᑦ ᐊᒃᑐᐃᒍᑎᓂᒃ ᐃᓄᒋᐊᓕᕐᓂᕐᒧᑦ ᐱᑦᑎᐊᙱᓗᐊᕈᑎᐊᓗᖕᓂᒃ. ᐅᖃᐅᓯᐅᑲᑕᓚᐅᕐᑐᑦ ᒪᑯᐊ ᐃᒡᓗᓕᕆᓂᖅ, ᐸᓖᓯᓕᕆᓂᖅ, ᐅᖃᐅᓯᖅ, ᐃᓕᖁᓯᖅ, ᐅᔭᕋᖕᓂᐊᕐᓂᖅ, ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᖅ ᐊᒻᒪᓗ ᐃᓄᓕᕆᓂᖅ.
• ᑕᓯᖅ ᔨᐅᕈᑏᓐ ᐃᒪᖃᑦᑎᐊᓕᓚᐅᕐᑐᖅ ᐊᓯᐊᓂᒃ ᐃᒻᒥᕐᓱᖅᑕᐅᕙᓪᓕᐊᓪᓗᓂ ᐅᕙᙵᑦ ᓂᐊᖁᙴᑉ ᑰᖓᓂᒃ. ᑕᐃᒪᓐᓇ ᐃᒻᒥᕐᓱᐃᓂᖅ ᐱᒋᐊᖅᑎᑕᐅᓚᐅᕐᑐᖅ ᓄᓇᓕᐸᐅᔭᐃᑦ ᐃᒥᖅᑕᒐᒃᓴᓕᕆᓂᕐᒧᑦ ᐱᓕᕆᔨᖏᓐᓄᑦ, ᐋᕿᒃᑕᐅᓪᓗᓂ ᔪᓚᐃᒥ ᓄᓇᓖᑦ ᐃᒥᒐᒃᓴᒥᑦ ᐃᒪᖃᕈᓐᓃᖅᑎᑦᑕᐃᓕᑎᑕᐅᓪᓗᓂ.
• ᓯᑎᐱᕆ 26-ᒥᑦ, ᐳᕋᐃᐊᓐ ᑕᕐᕋᓕᒃ ᐃᓚᖏᓪᓗ ᑐᑉᐸᒃᓴᓚᐅᕐᐳᑦ ᒪᓕᒐᓕᕆᕕᒡᔪᐊᑉ ᓄᓇᕗᒧᑦ ᓯᓚᑎᑦᑎᐊᖓᓂᒃ ᐊᖏᕐᕋᖃᙱᓐᓂᕐᒥᒃ ᐅᔾᔨᕈᓱᓕᖅᑎᑦᑎᓇᓱᒃᖢᑎᒃ. ᑖᒃᑯᐊ ᐃᓚᒌᑦ ᑐᐱᕐᒦᓐᓂᖓ ᐃᒡᓗᑖᕋᓱᖕᓂᒃᑯᑦ ᖁᕝᕙᐹᓕᕈᑎᒋᓗᒍ ᐅᑕᕿᓯᒪᓕᕋᒥᒃ ᐊᕐᕌᒍᓂᒃ ᑎᓴᒪᓂᒃ. ᓄᕕᐱᕆᒥ, ᑕᕐᕋᓕᒃ ᑐᓴᖅᑎᑦᑎᓕᓚᐅᕐᑐᖅ ᐱᖃᓐᓈᖓ ᐃᖅᑲᓇᐃᔮᖅᑖᖅᑎᑕᐅᓚᐅᕐᓂᖓᓂᒃ ᒐᕙᒪᑐᖃᒃᑯᓐᓂᒃ ᐃᒡᓗᖃᖅᑎᑕᐅᓐᓇᖅᑐᒥᒃ.
• ᕘᔅᑦ ᐃᐅ ᐊᒻᒪ ᑲᓃᑎᐊᓐ ᓄᐊᑦ ᑐᓴᖅᑎᑦᑎᕗᑦ ᑲᑎᓐᓂᕐᒧᑦ ᐊᖏᕈᑎᒥᒃ ᓯᑎᐱᕆ 28-ᖑᑎᓪᓗᒍ, ᐅᑯᓇᙵᑦ ᓄᓇᕕᒃᒥᑦ ᒪᑭᕕᒃᑯᓐᓂᑦ ᓴᕿᑎᑦᑎᓂᕐᒥᒃ ᑕᐃᔭᐅᔪᖅ “ᐱᒻᒪᕆᐅᓛᖅ ᐅᑭᐅᕐᑕᖅᑐᕐᒥᒃ ᖃᖓᑕᓲᓕᕆᔩ”.

ᓴᕕᕋᔭᐃᑦ ᐃᒡᓗᐃᑦ ᖄᖏᑦ ᒪᕐᕉᖕᓂᑦ ᐃᒡᓗᓂᙶᕐᓯᒪᔪᑦ ᑲᑎᓯᒪᕗᑦ ᓄᓇᓕᐸᐅᔭᐃᑦ ᐃᓄᖃᕐᕕᒋᓛᕆᕙᒃᑕᖓᓂᒃ ᐅᒃᑑᐱᕆᒥᑦ ᐊᓄᕌᕐᔪᐊᕌᓗᒃᑎᓪᓗᒍ. (ᐊᔾᔨᓕᐅᕆᔨ ᐱᐊᑦ ᐳᕋᐅᓐ)

ᐅᒃᑑᐱᕆ

• ᐃᖃᓗᐃᑦ ᓯᓚᓐᓂᐊᖅᑎᓄᑦ ᑕᐃᔭᐅᔪᖅ “ᓯᓚᐅᑉ ᖄᖅᑕᔫᖓᓂᒃ,” ᐊᓄᕌᕐᔪᐊᖅᑐᐊᓘᑎᓪᓗᒍ ᖃᐅᒻᒪᖁᑎᑦ ᐊᔪᓕᖅᖢᑎᒃ ᐊᒻᒪᓗ ᓴᕕᕋᔭᐃᑦ ᐃᒡᓗᐃᑦ ᖁᓕᖏᑦ ᑎᒃᑕᐅᑲᑕᒃᖢᑎᒃ.
• ᐃᖃᓗᐃᑦ ᓄᓇᓕᐸᐃᔭᐃᑦ ᑲᑎᒪᔨᖏᑦ ᐸᕐᓇᒃᓯᒪᒐᓱᓚᐅᕐᑐᑦ ᓱᐴᖅᑐᒐᖅ ᐊᑐᐃᓐᓇᐅᓕᕐᓂᐊᕐᓂᖓ ᑲᓇᑕᒥ, ᐋᕿᒃᓱᐃᑲᐅᕐᑐᖅᖢᑎᒃ ᒪᓕᒐᕋᓛᓂᒃ ᓱᐴᖅᑐᕐᓯᒪᓗᓂ ᐊᖁᖃᑦᑕᕐᓂᕐᒧᑦ ᐱᓇᓱᐊᕈᓰ ᓯᕗᓂᑲᓪᓚᖏᓐᓂᒃ ᐊᑐᐃᓐᓇᐅᓕᕐᓂᐊᕐᓂᖓᓂᒃ.

ᓄᕕᐱᕆ

• ᑎᓴᒻᒥᐅᑉ ᐅᓪᓛᖓᓂ, ᓄᕕᐱᕆ 8, ᑕᓪᓕᒪᓂᒃ ᐃᑭᑦᑐᖃᓚᐅᕐᑐᖅ ᐃᖃᓗᐃᑦ ᓄᓇᓕᐸᐅᔭᖓᓂᒃ ᐊᒻᒪ ᐱᔮᕆᔭᐅᓯᒪᓇᓱᒋᔭᐅᓪᓕᑎᒃ. ᐃᓚᖓ ᐃᑭᑦᑐᖅ ᖁᐊᕐᓵᕐᓇᓚᐅᕐᑐᖅ ᓄᓇᓕᐸᐅᔭᐃᑦ ᐊᖏᓛᖅ ᓂᐅᕕᕐᕕᖓ ᐃᑭᑲᓴᒃᑎᓪᓗᒍ, ᓄᐊᑦᒫᑦ, ᑭᓯᐊᓂᓕ ᑖᔅᓱᒪ ᐱᖁᑎᖃᕐᕕᖓ ᓄᖑᖢᓂ ᐊᒻᒪᓗ ᓄᐊᑦᒫᑦ ᐃᓚᖓᒍᑦ ᐃᑭᓯᒪᓂᖓᓄᑦ ᓂᐅᕕᕐᕕᒃ ᒪᑐᓯᒪᓚᐅᕐᑐᖅ ᐱᓇᓱᐊᕈᓯᕐᒥᒃ. ᐊᑕᐅᓯᖅ ᐃᓅᓱᒃᑐᖅ ᐸᓯᔭᒃᓴᙳᖅᑎᑕᐅᓚᐅᕐᑐᖅ ᐃᑭᑎᑦᑎᑲᑕᖕᓂᕐᒧᑦ ᐊᒻᒪ ᑎᒍᔭᐅᓯᒪᓪᓗᓂ, ᑖᒃᑯᐊᓕ ᐸᓖᓯᒃᑯᑦ ᑕᒪᑐᒥᖓ ᖃᐅᔨᓴᑲᑕᒃᑐᑦ.
• ᐃᖃᓗᖕᓂ ᓂᐅᕕᕐᐸᒃᑐᑦ ᓂᐅᕕᕐᓂᕐᓴᑲᑕᓕᕐᑐᑦ ᐃᒥᐊᓗᖕᒥᑦ ᓄᓇᖓᓂ ᐃᒥᐊᓗᒃᑖᕐᕕᒃᒥᑦ ᐊᒻᒪ ᐅᐊᐃᓂᑖᕐᕕᒃᒥᑦ, ᓄᓇᕗᒥᑦ ᐃᒥᐊᓗᓕᕆᔨᒃᑯᑦ ᑲᒥᓴᖓ 2017/18-ᒥᑦ ᐅᓂᒃᑳᖏᑦ ᖃᐅᔨᓯᒪᓚᐅᕐᑐᑦ ᓄᕕᐱᕆ ᐱᒋᐊᓕᓵᕐᓯᒪᑎᓪᓗᒍ. ᓖᑕᑎᒍᑦ ᓂᐅᕕᖃᑦᑕᕐᓂᒃᑯᑦ ᐃᒥᐊᓗᒃᒥᑦ ᑲᒥᓴᓐᑯᓐᓂᑦ ᓂᐅᕕᖅᑕᐅᔪᓂᒃ ᒫᓃᓚᐅᕐᓯᒪᔪᖅ 570,000 ᓖᑕᔅ 2016/17-ᒥᑦ ᒪᐅᖓ ᐅᖓᑖᓄᑦ 1 ᒥᓕᐊᓐ ᓖᑕᔅᓄᑦ 2017/18-ᒥ, ᐱᔾᔪᑎᖃᓗᐊᖅᖢᓂ ᐃᖃᓗᐃᑦ ᐱᐊᓂᒃ ᐊᒻᒪ ᐅᐊᐃᓂᓂᒃ ᓂᐅᕕᕐᕕᒃ ᒪᑐᐃᓚᐅᕐᑎᓪᓗᒍ ᓯᑎᐱᕆ 2017-ᒥᑦ.
• ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᐊᖏᕐᑐᑦ 2019-ᒧᑦ ᐊᐅᓚᔾᔪᑎᒃᓴᖏᓐᓂᒃ ᐊᒻᒪ ᑮᓇᐅᔭᖅᑐᔪᓂᒃ ᐊᑐᕈᑎᒃᓴᓂᒃ ᓄᕕᐱᕆ 27-ᐅᑎᓪᓗᒍ, ᓯᕗᓪᓕᐅᔾᔨᓯᒪᓪᓗᑎᒃ ᓴᓗᒪᑎᑦᑎᒐᓱᖕᓂᖅ ᐊᒻᒪ ᓇᐅᑦᑎᐅᒃᑰᒫᑦ ᑐᓐᓂᖁᓯᐊᕕᓃᑦ. ᓄᓇᖃᖅᑐᑦ ᐊᑭᓕᕐᓱᐃᕙᒃᑐᑦ ᐃᒡᓗᖃᕐᕕᒋᔭᖏᓐᓄᑦ ᑕᑯᓂᐊᕐᑐᑦ ᑖᒃᓰᔭᕈᑎᓂᒃ 5 ᐳᓴᓐᑎᒥᒃ ᐊᑭᑦᑐᖅᐹᓪᓕᕐᓂᕐᒥᒃ, ᑖᒃᑯᓄᖓ ᓄᓇᓕᐸᐅᔭᐃᑦ ᑮᓇᐅᔭᖅᑖᕈᑎᖃᓛᙳᖃᑦᑕᕐᒪᑕ.

ᐃᖃᓗᐃᑦ ᖃᑦᑎᕆᔨᖏᑦ ᖃᑦᑎᕆᔪᑦ ᓄᐊᑦᒫᑦ ᐃᒡᓗᖁᑎᐊᓂᒃ ᐅᓪᓛᒃᑯᑦ ᑎᓴᒻᒥᕐᒥᒃ, ᓄᕕᐱᕆ 8. (ᐊᔾᔨᓕᐅᕆᔨ ᓴᐃᕋ ᕌᔾᔪᔅ)

ᑎᓯᐱᕆ

• ᓴᓇᓂᖅ ᐱᒋᐊᖅᐳᖅ ᓇᕕᒐᐃᑐ ᐃᓐᒥᒃ ᐃᓚᒋᐊᕈᑎᒃᓴᖅ. ᑖᓐᓇ ᓄᑖᖅ ᐃᒥᕐᕕᒃᓴᖅ, ᓴᓂᑦᑎᐊᖓᓃᑦᑐᖅ ᐱᐊᓄᑦ ᐊᒻᒪ ᐅᐊᐃᓂᓄᑦ ᓂᐅᕕᕐᕕᐅᑉ, ᐊᑎᖃᖅᑎᑕᐅᙱᓐᓇᕐᓂᐊᕐᑐᖅ ᓵᑦᕉᒻᒥᑦ (Chartroom) ᐊᒻᒪᓗ ᐊᖏᓂᕐᓴᐅᓂᐊᖅᖢᓂ ᓄᑕᐅᙱᓐᓂᕐᓴᐅᓚᐅᕐᑐᒥᒃ, 77-ᓂᒃ ᐃᒃᓯᕙᐅᑕᖃᕐᓗᓂ, ᑕᓪᓕᒪᓂᒃ ᑕᓚᕖᓴᖃᕐᓗᓂ ᐊᒻᒪ ᐱᐊᖃᕐᓗᑎᒃ ᑯᕕᔭᕆᐊᓕᖕᒥᑦ ᐃᒪᐃᑦᑐᒥᒃ Nu Brew beer.