2020 ᐊᕐᕌᒍ ᓄᓇᕗᒥᑦ ᓄᕙᒡᔪᐊᕐᓇᖅ-19 ᐱᓕᕆᔾᔪᑎᐅᓗᐊᕐᐳᖅ

ᓄᓇᕗᒻᒥᐅᑕᑦ ᓄᑖᓂ ᐅᖃᐅᓯᕐᓂ ᐊᔪᕈᓐᓃᓚᐅᕐᐳᑦ 2020-ᒥᑦ, ᓄᕙᒡᔪᐊᕐᓇᖅ-19 ᐅᖃᐅᓯᖓᓂᒃ, ᓴᖅᑭᑎᑦᑎᓯᒪᓪᓗᓂ ᑯᕈᓇᕙᐃᕋᔅᒥᓐ, ᐅᖓᓯᒌᒃᑑᑎᐅᒋᐊᖃᕐᓂᕐᒥᓐ, ᐃᓄᑑᓐᓇᖅᑐᓂᒃ ᐅᐸᒐᒃᓴᓂᒃ, ᔫᒻ ᐊᒻᒪ ᓲᑉ.

ᖁᔭᓐᓇᒦᒃ ᐃᓱᒪᓕᐊᕆᔭᐅᓂᑯᓂᒃ ᓄᓇᕗᒥᑦ ᒐᕙᒪᒃᑯᓐᓂᒃ ᐊᕐᕌᒍ ᓄᑖᖅ ᐱᒋᐊᓕᓵᕐᑎᓪᓗᒍ ᓄᓇᕗᒧᐊᕈᒪᔪᓂᒃ ᐋᖅᑭᒃᓯᓯᒪᓚᐅᕐᒪᑕ, ᐃᓄᑑᓇᖅᑐᓂᒃ ᐅᐸᒐᒃᓴᓂᒃ ᐋᖅᑭᒃᓱᐃᓪᓗᑎᒃ ᔭᓗᓇᐃᒥᓐ, ᐊᑦᒪᓐᑕᓐ, ᐅᐃᓂᐱᒡ ᐊᒻᒪ ᐋᑐᕚᒥ ᓄᓇᕗᒻᒥᐅᓄᑦ ᓄᓇᕗᒧᑦ ᐅᑎᖅᐸᓪᓕᐊᓇᓱᒃᑐᓄᑦ, ᐊᒻᒪᓗ ᐋᖅᑭᒃᓱᐃᓪᓗᑎᒃ ᐊᐅᓪᓚᖅᑎᑦᑎᔨᐅᕙᒃᑐᓂᒃ ᓄᓇᑦᓯᐊᕐᒥᓐ ᐊᒻᒪ ᑰᔾᔪᐊᖅ, ᒫᓂᑑᐸᒥ, ᑕᐃᒪᓐᓇ ᓄᓇᕗᒥᐅᑦ ᐋᓐᓂᐊᖅᑖᕐᓇᖅᑐᒥᑦ ᑎᑭᑎᑦᑎᓚᐅᙲᓐᓇᖅᖢᑎᒃ ᑭᓯᐊᓂ ᓄᕕᐱᕆ ᐱᒋᐊᓕᓵᖅᑎᓪᓗᒍ. ᑕᒪᓐᓇ ᐱᓕᕆᐊᖑᔪᖅ ᐊᑐᒻᒪᕆᓚᐅᕐᓯᒪᕗᖅ.

ᐋᓐᓂᐊᕆᔭᐅᑲᑕᒃᑐᖅ ᓄᕙᒡᔪᐊᕐᓇᖅ-19 ᖃᖓᑦᑎᐊᓵᖅ ᓴᖅᑭᑲᑕᓕᓚᐅᕐᐳᖅ ᐅᔭᕋᒃᓯᐅᕐᕕᐅᔪᓂᒃ, ᑕᒪᐅᙵᖅᑕᐅᓯᒪᓪᓗᓂ ᐃᖅᑲᓇᐃᔭᖅᑎᒋᔭᐅᔪᓂᒃ ᖃᓪᓗᓈᓂᙶᖅᑐᓂᒃ, ᑭᓯᐊᓂᓕ ᓄᓇᕗᒥᑦ ᓄᓇᖃᖅᑐᓂᒃ ᐊᐃᑦᑐᖅᑕᐅᔪᖃᓚᐅᙱᑦᑐᖅ. ᐅᓇ ᐱᔾᔪᑎᖃᓗᐊᓚᐅᕐᑐᖅ ᐅᔭᕋᒃᓯᐅᕐᕕᐅᔪᑦ ᓄᓇᕗᒥᐅᑕᓂᒃ ᐃᖅᑲᓇᐃᔭᖅᑎᖏᓐᓂᒃ ᐊᖏᕐᕋᐅᑎᑦᑎᓚᐅᕐᓯᒪᖕᒪᑕ ᒫᔅᓯᒥ ᐊᐃᑦᑐᐃᑲᑕᒍᒪᙱᓐᓂᕐᒧᑦ ᐋᓐᓂᐊᕐᓇᕆᔭᐅᔪᒥᓐ. ᓄᕙᒡᔪᐊᕐᓇᖅ-19 ᑐᓴᒐᒃᓴᑐᐊᖑᓚᐅᙱᒻᒥᔪᖅ ᓄᓇᕗᒥᑦ ᑕᒪᑐᒪᓂ ᐊᕐᕌᒍᒥ, ᑕᐃᒪᓐᓇᑐᐊᖅ ᑐᓴᕐᓇᖅᑰᔨᑎᓪᓗᒍ. ᐸᓖᓯᒃᑯᑦ ᐃᓱᒫᓘᑎᐅᓕᓚᐅᕐᓯᒪᖕᒥᔪᑦ ᐱᖓᓱᐃᖅᖢᑎᒃ ᖁᑭᖅᓴᖅᑐᓂᒃ ᐱᓕᕆᐊᖃᓚᐅᕐᑎᓪᓗᒋᑦ ᐸᓖᓯᒃᑯᑦ ᐃᓚᐅᓪᓗᑎᒃ ᑕᖅᑭᑦ ᑕᓪᓕᒪᑦ ᐃᓗᐊᒍᑦ ᐅᑭᐅᖅ, ᒪᕐᕉᖕᓂ ᐃᓅᔪᓐᓃᖅᑐᖃᖅᖢᓂ.

ᔫᓂ ᐱᒋᐊᓕᓵᕐᓯᒪᑎᓪᓗᒍ ᐸᓖᓯ ᑭᙵᓂᑦ ᓄᓇᓕᖕᓃᑎᑕᐅᓚᐅᕐᓯᒪᔪᖅ ᐊᒻᒪ “ᐊᐅᓚᑦᑎᓂᕐᒥᒃ ᐱᓕᕆᐅᐊᖃᓕᕐᖢᓂ,” ᐊᔾᔨᓕᐅᒐᕐᒥ ᐊᐅᓚᔪᒥ ᓴᖅᑭᑦᑐᖃᑲᑕᓚᐅᕐᑎᓪᓗᒍ ᖃᕋᓴᐅᔭᒃᑯᑦ ᑖᓐᓇ ᓴᖅᑭᑎᑦᑎᓯᒪᓪᓗᓂ ᐸᓖᓯ ᐅᕐᕈᑎᑦᑎᓂᖓᓂᒃ ᓄᓇᓯᐅᑎᐅᑉ ᐹᖓᓄᑦ ᒪᑐᐃᕐᑎᓪᓗᓂᐅᒃ. ᑖᓐᓇ ᐋᖓᔮᕐᑐᖅ ᑎᒍᔭᐅᓂᖓ ᒪᓕᒐᖅᑎᒎᖓᓂᕋᖅᑕᐅᓚᐅᕐᑐᖅ ᐋᑐᕚᒥ ᐸᓖᓯᓄᑦ ᐱᔨᑦᑎᕋᖅᑎᓄᑦ, ᑖᔅᓱᒥᖓ ᖃᐅᔨᓴᓚᐅᖅᑐᓄᑦ.

ᐱᖁᔨᔪᖃᓕᓚᐅᕐᒥᔪᖅ ᐸᓖᓯᒃᑯᑦ ᐅᔾᔨᕐᓱᖅᑕᐅᔭᕆᐊᖃᕐᓂᖏᓐᓂᒃ ᓄᓇᕗᒥᑦ. ᑕᐃᒪᐃᓂᖓᓄᓪᓗ, ᓄᓇᕗᑦ ᒐᕙᒪᒃᑯᑦ ᓂᕆᐅᓕᕐᑐᖅ ᐅᓇ ᐱᖁᔭᖅ 53, ᒪᓕᒐᖅ ᐋᖅᑭᒋᐊᖅᑎᑦᑎᒍᑎ ᐸᓖᓯᒃᑯᑦ (RCMP) ᒪᓕᒐᖓᓂᒃ, ᐊᓂᒍᖅᑎᑕᐅᓂᐊᕐᓂᖓᓂᒃ ᒪᓕᒐᓕᕆᕕᒡᔪᐊᒥᑦ ᐅᑭᐅᖅ ᑲᑎᒪᓕᕐᐸᑕ, ᑖᓐᓇᓕ ᐋᖅᑭᒃᑕᐅᓯᒪᔪᖅ ᑲᑎᒪᓂᖅ ᕕᕝᕗᐊᕆ 2021-ᒥᑦ.

ᓄᓇᕗᒻᒥᐅᑕᑦᑕᐅᖅ ᐊᒃᑐᖅᑕᐅᒻᒪᕆᓚᐅᕐᒥᔪᑦ ᐸᓖᓯᒃᑯᑦ ᐱᓗᐊᕐᓂᐊᓗᖏᓐᓂᒃ ᔫᓇᐃᑕᑦ ᓯᑕᐃᑦᔅᓂ, ᐃᓚᒋᓪᓗᒍ ᔪᐊᔾ ᕗᓗᐊᐃᑦ ᑐᖁᑕᐅᑎᓪᓗᒍ ᒥᓂᐊᐳᓕ ᒥᓂᓲᑕᒥ ᐊᐅᔭᐅᓚᐅᕐᑐᖅ. ᑖᓐᓇ ᐱᔾᔪᑎᒋᓪᓗᒍ, ᓄᓇᕗᒥ ᕿᕐᓂᖅᑕᐃᑦ ᑲᑐᔾᔨᖃᑎᒌᖏᑦ ᐋᖅᑭᒃᓱᐃᓪᓗᑎᒃ ᕿᓂᕐᑕᐃᑦ ᐃᓅᓯᖏᑦ ᐱᒻᒪᕆᐅᔪᑦ ᑲᑎᖃᑎᒌᖕᓂᕐᒥ ᐃᖃᓗᖕᓂ ᔫᓂᐅᑎᓪᓗᒍ, ᖃᐅᔨᑎᑦᑎᓇᓱᒃᖢᑎᒃ ᕿᕐᓂᕐᑕᓂ ᐱᓕᕆᖃᑎᖃᕐᓂᖏᓐᓂᒃ ᓄᓇᕗᒥᑦ.

ᐅᓇ ᐅᓂᒃᑳᖑᕙᒃᑐᖅ ᐹᕕᓐᓛᓐᑯᑦ ᓴᕕᕋᔭᒃᓴᒥᑦ ᐅᔭᕋᒃᓯᐅᕐᕕᒃ ᑯᐊᐳᕇᓴᓐᑯᑦ ᑐᒃᓯᕋᕐᓯᒪᔭᖓ ᐱᓕᕆᓂᖅ 2 ᐊᖏᒡᓕᒋᐊᖅᑎᑦᑎᓂᕐᒥᒃ ᓄᓘᔮᖕᓂ ᐅᔭᕋᒃᓯᐅᕐᕕᖕᒥᑦ ᓱᓕ ᑲᔪᓯᕗᖅ. ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᒃᓴᖅ ᒫᔅᓯᒥ ᓄᖅᑲᖅᑎᑕᐅᓚᐅᕐᓯᒪᔪᖅ ᐋᓐᓂᐊᕕᒡᔪᐊᕐᓇᒧᑦ, ᐊᒻᒪ ᑐᒃᓯᕋᖅᑕᐅᓯᒪᔪᖅ ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᒃᓴᖅ ᐅᖄᓚᐅᑎᑎᒍᑦ ᑲᔪᓯᔪᓐᓇᓚᐅᙱᒻᒥᔪᖅ ᐄᐳᕈᒥᓐ. ᔪᓚᐃᒥᑦ ᐅᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᐹᕕᓐᓛᓐᑯᑦ ᐊᑎᓕᐅᓚᐅᕐᓯᒪᔪᑦ ᒥᓕᐊᓐᑖᓚᖏᓐᓃᑦᑐᓂᒃ ᐃᑲᔫᑎᒃᓴᓄᑦ ᐊᖏᕈᑎᒥᓐ, ᑕᐃᔭᐅᓪᓗᓂ ᐃᓄᐃᑦ ᐱᓂᐊᓪᓚᕆᖕᓂᖏᓐᓄᑦ ᐊᖏᕈᑎᒥᓐ (Inuit Certainty Agreement), ᐊᒃᑐᐊᓪᓗᓂ ᓄᓘᔮᖕᓂ ᐅᔭᕋᒃᓯᐅᕐᕕᖕᒧᑦ, ᑭᓯᐊᓂᓕ ᕿᑭᖅᑖᓘᑉ ᐅᐊᖕᓇᖓᓃᑦᑐᑦ ᓄᓇᓖᑦ ᐊᖏᒡᓕᒋᐊᖅᑎᑦᑎᔪᒪᓂᖓᓂᒃ ᐱᒃᑯᒋᔭᖃᓗᐊᙱᓐᓂᕐᓴᐅᔪᑦ. ᐅᓇ ᑭᖑᕙᕆᐊᕐᓯᒪᒻᒪᕆᒃᑐᖅ ᑲᑎᒪᓂᒃᓴᖅ ᐊᑐᖅᑕᐅᓕᓚᐅᕐᓯᒪᔪᖅ ᓯᑎᐱᕆᒥᓐ, ᐊᒻᒪᓗ ᐅᐸᒍᑎᓯᒪᓗᑎᒃ ᑕᒪᑐᒧᖓ ᑐᓴᕋᓱᑲᑕᓕᕐᓂᐊᖅᖢᑎᒃ ᐱᒋᐊᕐᓂᐊᖅᖢᓂ ᑕᖅᑭᐅᓂᐊᕐᑐᒥᑦ ᒥᑦᑎᒪᑕᓕᖕᒥᑦ.

TMAC ᐊᑐᒃᑲᓐᓂᕈᓐᓇᖅᑐᓕᕆᔨᒃᑯᑦ, ᓇᖕᒥᓂᖃᖅᑎᐅᔪᑦ ᕼᐆᑉ ᐸᐃᒥ ᒎᓗᒥ ᐅᔭᕋᒃᓯᐃᕐᕕᖕᒥᑦ ᓄᓇᕗᑦ ᐱᖓᖕᓇᖅᐸᓯᐊᓂᒃ ᑐᓴᖅᑎᑦᑎᓕᓚᐅᕐᑐᑦ ᒪᐃᒥ ᓂᐅᕕᖅᑕᐅᑐᐃᓐᓇᕆᐊᖃᕐᓂᖏᓐᓂᒃ ᓴᐃᓃᓯᒃᑯᓐᓂᒃ ᒎᓗᒥ ᐅᔭᕋᒃᓯᐅᕐᕕᓕᕆᔨᒻᒪᕆᖕᓄᑦ, Shandong Gold Mining Co. Ltd., ᖃᐅᔨᒪᔭᐅᓂᕐᓴᐅᕙᒃᑐᖅ ᐃᒪᓐᓇ SD Gold Shareholders ᐊᖏᕈᑎᒋᔭᐅᔪᑎᒍᑦ, ᐅᑯᑎᑐᓇᕐᑕᐅᖅ ᐋᓐᑎᐅᕆᐅᒥ ᐃᖃᖅᑐᐃᕕᒡᔪᐊᒃ ᐱᖁᔭᓕᕆᓂᕐᒧᑦ, ᑭᓯᐊᓂᓕ ᑕᒪᓐᓇ ᕿᒥᕐᕈᐊᖅᑕᐅᔭᕆᐊᖃᖅᖢᓂ ᑲᓇᑕᒥ ᓇᐅᑦᑎᖅᓱᐃᒍᑎᑎᒍᑦ.

ᐅᑯᐊ ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᓂᒃᑳᓕᐊᕕᓂᖏᑦ ᐃᖅᑲᐅᒪᓇᕐᑐᑦ 2020-ᒥᑦ.

ᔭᓄᐊᕆ

• ᐃᓅᔪᓐᓃᕐᓂᑯ ᐃᐅᕋᓐ ᒍᕌᓐᑦ ᒋᐱᓐᔅ, 31, ᐊᕐᕕᐊᕐᒥᐅᑕᐅᓂᑯ ᐃᓕᓴᕐᓯᒍᑎᑖᖅᑎᑕᐅᓚᐅᕐᓯᒪᕗᖅ ᑲᓇᑕᒥ ᐃᒻᒥᓂ ᐃᓱᒪᒋᓇᓂ ᐃᑲᔪᓚᐅᕐᓯᒪᓂᖓᓄᑦ ᐆᒥᖓ Star of Courage ᖃᑭᖅᑯᐊᒥ ᔪᓚᐃ 2018-ᒥᑦ ᖃᓄᐃᓕᐅᕈᑎᒋᓚᐅᕐᓯᒪᔭᖏᓐᓄᑦ ᓴᐳᔾᔨᓇᓱᒃᖢᓂ ᐃᓚᒌᓂᒃ ᓇᓄᕐᒧᑦ ᐅᐹᔭᖅᑕᐅᔪᓂᒃ.
• ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ (NIRB) ᑐᓴᖅᑎᑦᑎᔪᑦ ᐅᓇ ᑭᖑᓪᓕᖅᐹᒥ ᑐᓴᕋᓱᖕᓂᕐᒧᑦ ᑲᑎᒪᓂᒃᓴᖓᑦ ᐅᑯᐊ ᐹᕕᓐᓛᓐᑯᑦ ᐱᓕᕆᓂᖅ 2 ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᑐᒃᓯᕋᐅᑎᖓᓄᑦ ᓄᓘᔮᖕᓂ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᖓᓂᒃ ᑲᔪᓯᑐᐃᓐᓇᕆᐊᖃᖅᑐᖅ ᑲᑎᒪᕕᒡᔪᐊᕐᓇᐅᑉ ᓯᕗᓂᐊᒍᑦ ᑲᑎᒪᓚᐅᕐᑎᓪᓗᒋᑦ ᐃᖃᓗᖕᓂᑦ ᒫᔅᓯᐅᓕᕐᐸᑦ.
• ᓄᓇᕗᑦ ᓄᑖᖅ ᑭᒃᑯᓕᒫᓂᒃ ᐋᓐᓂᐊᖅᑐᓕᕆᓂᕐᒧᑦ ᒪᓕᒐᖓ ᒪᓕᒐᙳᓪᓚᕆᓚᐅᕐᐳᖅ ᓄᓇᕗᒥᑦ ᔭᓄᐊᕆ 1-ᒥᑦ, ᐃᓇᖏᕐᓯᓪᓗᓂ ᒪᓕᒐᕐᒥ ᓄᓇᑦᓯᐊᕐᒧᑦ ᐊᑐᖅᑕᐅᖃᑦᑕᕐᓂᑯᒥᓐ.
• ᓄᓇᕗᒥᐅᑦ ᐊᓯᐅᔨᓚᐅᕐᐳᑦ ᐊᕐᕌᒍᒐᓴᒻᒪᕆᖕᓂ ᐃᖅᑲᐅᒪᔭᐅᓂᑯᓂᒃ ᐊᒻᒪ ᐊᑐᖅᑕᐅᓂᑯᓂᒃ ᐅᓇ ᔫᓐ ᐅᑲᓕᖅ ᑲᓚᖓᐴᒡ, 105, ᐃᓅᔪᓐᓃᕐᑎᓪᓗᒍ ᐅᖅᓱᖅᑑᒥ ᐃᓐᓇᒃᑯᕕᖕᒥᑦ ᔭᓄᐊᕆ 8-ᒥᑦ.
• ᓄᑖᖅ ᐅᓂᑳᖅ, Addressing Gendered Violence Against Inuit Women (ᐅᖃᐅᓯᖃᕐᓂᖅ ᐊᕐᓇᐃᑦ ᐱᑦᑎᐊᖅᑕᐅᕙᙱᓗᐊᕐᓂᖏᓐᓂᒃ), ᐅᑯᓇᙵᑦ ᐸᐅᒃᑑᑎᑦ ᐃᓄᐃᒃ ᐊᕐᓇᐃᑦ ᑲᑐᔾᔨᖃᑎᒌᖏᓐᓂᒃ ᑲᓇᑕᒥ ᐊᓯᙳᖅᑎᑦᑎᖁᔨᓪᓗᑎᒃ ᐊᑐᐊᒐᐃᑦ ᐱᓕᕆᐊᖑᔭᐅᕙᖕᓂᖏᓐᓂᒃ ᐃᓄᐃᑦ ᓄᓇᖓᓂᒃ.
• ᓄᓇᕗᒥᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃ ᑎᒥᖓ ᓄᑖᙳᕆᐊᖅᑎᑦᑎᓚᐅᕐᐳᑦ ᐊᖏᕈᑎᒥ ᓇᓗᓇᐃᔭᕐᓯᒪᔪᓂ ᖃᓄᖅ ᑖᒃᑯᐊᒃ ᒪᕐᕉᒃ ᑲᑐᔾᔨᖃᑎᒌᖑᔫᒃ ᐱᓕᕆᖃᑎᒌᖃᑦᑕᕐᓂᐊᕐᓂᖏᓐᓂᒃ. ᓄᓇᕗᑦ ᑐᙵᕕᒃ ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᒻᒪ ᓯᕗᓕᐅᕐᑎ ᔫ ᓴᕕᑲᑖᖅ ᐊᑎᓕᕐᐴᒃ ᐆᒥᖓ ᑲᑐᔾᔨᖃᑎᒌᖕᓄᑦ ᒪᓕᒍᑎᒃᓴᓂᒃ ᖁᕕᐊᓲᑎᖃᕐᓇᒥᒃ ᐃᖃᓗᖕᓂᑦ ᔭᓄᐊᕆ 21-ᖑᑎᓪᓗᒍ.
• ᓄᓇᖃᖅᑳᖅᑐᑦ ᑎᒍᔭᐅᓯᒪᔪᑦ ᑲᓇᑕᒥ ᑎᒍᔭᐅᓯᒪᕝᕕᓪᓚᕆᖕᓂ ᐅᓄᕐᓯᕙᓪᓕᐊᓗᐊᕐᓂᖏᓐᓄᑦ ᑕᒪᒃᑯᐊ ᓄᓇᖃᖅᑳᖅᑐᑦ ᐃᒪᓐᓇ ᓇᓗᓇᐃᕐᑕᐅᓯᒪᓕᕈᓐᓇᕐᑐᑦ ᐊᑕᐅᓯᕐᒥ ᓄᓇᖃᖅᑳᖅᑐᒥ ᑎᒍᔭᐅᓯᒪᔪᖃᕐᓗᓂ ᐱᖓᓱᓂᒃ ᑎᒍᔭᐅᓯᒪᕝᕕᖕᓂᑦ, ᐅᓇ ᐃᑲᔪᖅᑕᐅᕝᕕᓕᕆᕝᕕᖕᓂ ᖃᐅᔨᓴᖅᑎᒻᒪᕆᒃ ᑲᓇᑕᒧᑦ, ᓘᒃᑖᖅ ᐊᐃᕙᓐ ᔨᖑ, ᑐᓴᖅᑎᑦᑎᓚᐅᕐᑐᖅ ᔭᓄᐊᕆ 21-ᒥᑦ.
• ᑲᓇᑕᒥᐅᑕᑦ ᖁᕕᐊᓲᑎᖃᓚᐅᕐᑐᑦ ᖄᐱᒃ ᐊᑕᒍᑦᓯᐊᕐᒥᓐ, 99, ᐃᓚᐅᓚᐅᕐᓯᒪᓂᖓᓂᒃ ᓴᐅᓂᕕᓂᕐᓂᒃ ᐊᕝᕗᖅᑎᑕᐅᑲᑕᒃᑐᓂᒃ ᓄᓇᕐᔪᐊᒥ ᐊᐃᑉᐸᖓᓂ ᐅᓇᑕᕕᒡᔪᐊᖅᑎᓪᓗᒋ.

ᕕᕝᕗᐊᕆ

• ᓄᓇᖃᖅᑳᖅᑐᓄᑦ ᐃᑲᔫᑎᒃᓴᓕᕆᓂᖅ Indspire (ᐃᓐᑎᔅᐸᐃᔪ) ᓄᖅᑳᖅᑎᑦᑎᕗᑦ ᐸᕐᓇᐅᑎᖏᓐᓂᒃ ᐃᓕᓴᕐᓯᔪᒪᓂᕐᒥᒃ ᔮᓂ ᐄᓴᓗᒃᒥᓐ, ᑐᓴᐅᒪᔾᔪᑎᓕᕆᓂᒃᑯᑦ ᐅᖃᐅᓯᐅᑲᑕᓚᐅᕐᑎᓪᓗᒍ

ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐃᖅᑲᓇᐃᔭᖅᑎ ᑕᔅᐳᐊᐃᓇ ᑲᕘᓴᓇᑭ ᐊᓐᓄᕌᒧᑦ ᐊᑕᔪᕕᓂᕐᒥᒃ ᑕᑯᑎᑦᑎᕗᖅ ᓯᑖᓐᓕ ᐊᓇᑉᓚᒃᒧᑦ, ᐊᖓᔪᖅᑳᖅ ᐃᓄᐃᑦ ᑲᑐᔾᔨᖃᑎᒌᓄᑦ, ᓇᓂᔭᐅᓂᑯᒥ 2019-ᒥᑦ ᐅᓇ HMS ᐃᕆᐸᔅ ᐅᒥᐊᕐᔪᐊᕕᓂᖅ ᓄᓇᒧᐊᕐᑕᐅᑎᓪᓗᒍ, ᐊᒻᒪᓗ ᐹᒥᓚ ᒍᕉᔅ, ᐊᖓᔪᖅᑳᖅ ᐃᓄᐃᑦ ᐱᖁᑎᖏᓐᓂᒃ ᓇᐅᑦᑎᕐᓱᖅᑎᓄᑦ, ᐅᕙᓂ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᐊᓯᐅᑎᑦᑎᑦᑕᐃᓕᓂᕐᒧᑦ ᖃᐅᔨᓴᕐᕕᖓᓂᒃ ᐋᑐᕚᒥ ᕕᕝᕗᐊᕆ 20-ᐅᑎᓪᓗᒍ. (ᐊᔾᔨᓕᐅᕆᔨ ᐹᑐᕇᓯᐊ ᓚᐃᑦᕗᑦ)

• ᕕᕝᕗᐊᕆ 5-ᒥᑦ ᑖᓐᓇ ᐃᓄᒃ ᑕᕐᕆᔭᖓᕐᓄᑦ ᐱᙳᐊᕐᑎ, ᐱᙳᐊᒐᒃᓴᓂ ᐱᙳᐊᕐᑎ ᐊᒻᒪ ᐃᓕᖁᓯᓕᕆᓂᕐᒥᒃ ᐃᓕᓐᓂᐊᖅᑎᑦᑎᔨ ᐊᕐᓂᕆᓚᐅᕐᓯᒪᓂᖓᓂᒃ. ᐄᓴᓗᒃ ᑎᑎᕋᓕᓚᐅᕐᓯᒪᔪᖅ ᒪᒥᐊᓐᓂᕋᖅᓯᒪᓪᓗᓂ ᐊᕐᓂᕆᖃᑦᑕᖅᑕᕕᓂᖏᓐᓄᑦ ᑐᓴᐅᒪᔾᔪᑎᓕᕆᓂᒃᑯᑦ.
• ᒐᕙᒪᑐᖃᒃᑯᑦ ᑐᓴᕐᑎᑦᑎᕗᑦ ᐊᕐᕕᐊᕐᒥᐅᑕᑦ ᐃᓅᓱᒃᑐᓂᒃ ᐊᖑᓇᓱᒃᑐᓕᕆᓂᕐᒥᒃ ᐃᓕᓐᓂᐊᕈᑎᒋᔭᖓ ᑐᓂᔭᐅᓂᐊᕐᓂᖓᓂᒃ $1.23 ᒥᓕᐊᓐ ᑖᓚᓂ ᒐᕙᒪᒃᑯᖃᒃᑯᑦ ᑮᓇᐅᔭᖏᓐᓂᒃ 2020-ᓗ 2022-ᓗ ᐊᑯᓐᓂᖓᓂᒃ.
• ᐃᖃᓗᖕᓂ ᐊᖑᓇᓱᒃᑎ ᓇᓂᓯᔪᖅ ᐃᓄᕕᓂᕐᒥ ᐅᓇᐅᓇᓱᒋᔭᐅᓪᓗᓂ ᐋᒻᐸ ᐅᕈᐊᐃ, 18, ᑭᖑᓪᓕᖅᐹᒥ ᑕᑯᔭᐅᓚᐅᕐᓯᒪᔪᖅ ᒫᔅᓯ 13, 2019-ᒥᑦ, ᐃᖃᓗᐃᑦ ᐸᓖᓯᖏᑦ ᑐᓴᕐᑎᑦᑎᓚᐅᕐᑐᑦ ᕕᕝᕗᐊᕆ 16-ᒥᑦ.
• ᑮᓇᐅᔭᓕᕆᔨᒃᑯᓐᓄᑦ ᒥᓂᔅᑕ ᔪᐊᔾ ᕼᐃᒃᔅ ᓇᓗᓇᐃᕐᓯᓪᓚᕆᓚᐅᕐᑐᖅ ᒪᓕᒐᓕᕆᕕᒡᔪᐊᕐᒥ ᐅᓇ ᑲᖏᖅᖠᓂᖅ ᑭᖑᓪᓕᐅᓂᐊᕐᓂᖓᓂᒃ ᓄᓇᓕᐅᔪᓂᒃ ᓄᓇᕗᒥᑦ ᐃᒥᐊᓗᒃᑖᕐᕕᖃᕐᓂᐊᕐᓗᓂ.
• ᒥᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᑐᓴᖅᑎᑦᑎᕗᖅ 2019 ᐅᑭᐊᒃᓵᖓᓂᒃ ᓇᓂᓯᓚᐅᕐᓂᖏᓐᓂᒃ 350-ᓂᒃ ᐱᖁᑎᕕᓂᕐᓂᒃ ᐅᒥᐊᕐᔪᐊᕕᓂᕐᒥᙶᖅᑐᓂᒃ HMS ᐃᕆᐸᔅ, ᑖᓐᓇ ᑕᕆᐅᑉ ᐃᖅᑲᖓᓃᑦᑐᖅ ᐅᖅᓱᖅᑑᖅ ᓯᓚᑎᑦᑎᐊᖓᓂᒃ.
• ᓄᓇᕗᑦ ᓯᕗᓕᐅᕐᑎᖓ ᔫ ᓴᕕᑲᑖᖅ ᑐᓴᖅᑎᑦᑎᓚᐅᕐᐸᖅ ᓄᓇᕗᒥᑦ ᒐᕙᒪᒃᑯᑦ ᐃᑲᔪᖅᑐᐃᔾᔮᙱᓐᓂᖏᓐᓂᒃ ᓄᑖᓂ ᑕᕆᐅᕐᒥᐅᑕᓂᒃ ᓴᐳᔾᔨᓯᒪᕝᕕᐅᓇᓱᒃᑐᓂᒃ, ᐅᕝᕙᓘᓐᓃᑦ ᒐᕙᒪᑐᖃᒃᑯᓐᓂ ᓂᕐᔪᑎᓄᑦ ᓴᐳᑎᓯᒪᕝᕕᐅᓇᓱᒃᑐᓂᒃ ᓄᓇᕗᒥᑦ ᑭᓯᐊᓂ ᐊᕕᒃᓯᒪᓂᕐᒧᑦ ᐱᓕᕆᐊᒃᓴᐃᑦ ᐋᖅᑭᒃᓱᖅᑕᐅᕌᓂᒃᐸᑕ ᐅᑯᑎᒎᓇᖅ ᑲᓇᑕᐅᓪᓗ ᓄᓇᕗᓪᓗ ᒐᕙᒪᒃᑯᙱᓐᓂᒃ.
• ᐊᒡᒍᒧᑦ ᒪᓕᒐᓕᐅᕐᑎ ᐹᓪ ᖁᐊᓴ ᓂᕈᐊᕆᔭᐅᓚᐅᕐᑐᖅ ᒪᓕᒐᓕᐅᕐᑎᐅᖃᑎᖏᓐᓄᑦ ᐅᖃᕐᑎᐅᓂᐊᓕᕐᓗᓂ ᓂᕈᐊᕐᑎᓪᓗᒋᑦ ᐸᐃᑉᐹᒃᑯᑦ ᕕᕝᕗᐊᕆ 26-ᒥᑦ. ᐅᖃᕐᑎᐅᓚᐅᕐᑐᖅ ᓯᕗᓂᐊᒍᑦ, ᓯᒥᐅᓐ ᒥᑭᙳᐊᒃ, ᒪᓕᒐᓕᐅᕐᑎ ᖃᒪᓂᑦᑐᐊᕐᒧᓐ, ᑐᓴᖅᑎᑦᑎᓚᐅᕐᓯᒪᖕᒪᑦ ᕕᕝᕗᐊᕆ 24-ᒥ ᐃᒻᒥᓅᖓᔪᓄᑦ ᓄᖅᑲᕐᓂᐊᕐᓂᕋᓕᖅᖢᓂ ᐱᓕᕆᐊᖏᓐᓂᒃ.
• ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ ᒥᓂᔅᑕ, ᖁᐊᓴ ᑯᓱᒐᖅ, ᐅᖃᓚᐅᕐᓯᒪᔪᖅ ᒪᓕᒐᓕᕆᕕᒡᔪᐊᒥ ᕕᕝᕗᐊᕆ 27-ᒥᑦ ᐊᑎᓕᐅᓚᐅᕐᓂᕋᖅᖢᓂ ᐅᑯᐊ ᓄᓇᐃᑦ ᑲᐃᑉ ᑐᐊᓴᑦ ᐊᑎᖓ ᐊᓯᙳᕐᓂᖓᓂᒃ   ᑭᙵᐃᑦ-ᒧᑦ ᐊᒻᒪᓗ ᕼᐋ ᐲᑦᔅ ᐊᓯᙳᕐᓂᖓᓂᒃ ᓴᓂᕋᔭᒃ-ᒧᑦ.

ᒫᔅᓯ

• ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯ ᐅᖃᓚᐅᕐᑐᑦ ᓄᓇᕗᒥᑦ ᒐᕙᒪᒃᑯ, ᒫᓐᓇᒧᑦ, ᐊᑐᕐᓯᒪᓕᕐᓂᖏᓐᓂᒃ $5 ᒥᓕᐊᓐ ᑖᓚᐃᑦ ᐅᖓᑖᓄᑦ ᖃᕋᓴᐅᔭᖏᑦ ᐱᕋᔭᒃᑕᐅᓚᐅᕐᓯᒪᑎᓪᓗᒋᑦ ᐊᒻᒪ ᐊᔪᓕᖅᑎᑕᐅᑎᓪᓗᒋᑦ 2019 ᐃᓱᓕᓕᕐᑎᓪᓗᒍ.


ᕙᓐᓱᔅ ᐃᖃᓗᖕᓂ ᐋᖅᑭᒃᓯᓚᐅᕐᐳᑦ ᐊᐅᔭᑦᑐᓂ ᓴᐴᓕᑕᒃᓴᓂᒃ ᓂᐅᕕᕐᕕᖕᒥ ᓴᐳᑎᓯᒪᓇᓱᒃᖢᒋ ᐃᖅᑲᓇᐃᔭᖅᑎᐅᔪᑦ ᓄᕙᒡᔪᐊᕐᓇᖅ-19-ᒧᑦ. “ᓄᓇᑦᑎᓐᓂ ᖃᓄᐃᖁᓇᒋᑦ ᐊᒻᒪ ᐃᖅᑲᓇᐃᔭᖅᑎᕗᑦ ᑕᐃᒪᓕ ᑕᒪᑐᒧᖓ ᐱᓕᕆᐊᖃᕐᓂᕐᓴᐅᓕᕐᐳᒍ!” ᓂᐅᕕᕐᕕᖕᒥᐅᑕᑦ ᑎᑎᕋᕐᓯᒪᓚᐅᕐᑐᑦ ᑐᓴᐅᒪᔾᔪᑎᑎᒍᑦ. (ᐊᔾᔨᙳᐊᖅ ᐋᑎᒃ ᕙᓐᓱᔅᑯᓐᓂᑦ)

• ᐋᖅᑭᒃᓱᐃᔨᐅᔪᑎ 2020-ᒥᑦ ᐅᑭᐅᕐᑕᖅᑐᕐᒥᑦ ᐱᙳᐊᕕᒡᔪᐊᕐᓇᐅᓂᐊᕐᑐᖅ ᕗᐊᐃᑦᕼᐅᐊᔅᒥ ᑐᓴᖅᑎᑦᑎᓚᐅᕐᑐᑦ ᓄᖅᑲᖅᑎᑦᑎᓂᖏᓐᓂᒃ ᐱᒡᒍᓴᐅᑎᐅᓂᐊᕐᑐᓂᒃ ᒫᔅᓯ 7-ᒥᑦ ᐱᔾᔪᑎᒋᔭᐅᓪᓗᓂ ᓄᕙᒡᔪᐊᕐᓇᖅ-19 ᐊᐃᑦᑑᑎᐅᒐᔭᕆᐊᒃᓴᖓᓄᑦ. ᒫᔅᓯ 11-ᒥ, ᓄᓇᕐᔪᐊᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑐᔾᔨᖃᑎᒌᑦ ᐅᖃᓕᓚᐅᕐᓯᒪᔪᑦ ᑖᓐᓇ ᑯᕉᓇᕙᐃᕋᔅ ᓄᓇᕐᔪᐊᓕᒫᒥᑦ ᐋᓐᓂᐊᖑᓕᕐᓂᖓᓂᒃ, ᐅᓇ 2020 ᓄᓇᕗᒥᑦ ᐅᔭᕋᒃᓯᐅᕐᕕᖕᓄᑦ ᑲᑎᒪᕕᒡᔪᐊᕐᓇᖅ ᓄᖅᑲᖅᑎᑕᐅᓪᓗᓂ, ᐊᒻᒪ ᑭᖑᓂᑦᑎᐊᖓᒍᑦ ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᒃᓴᖅ ᐃᖃᓗᖕᓂᒃ ᐆᒧᖓ ᐹᕕᓐᓛᓐ ᓴᕕᕋᔭᒃᓴᒥ ᐅᕙᕋᒃᓯᐅᕐᕕᒃ ᑯᐊᐳᕇᓴᓐᑯ ᐸᕐᓇᐅᓯᐊᕆᓯᒪᔭᖏᓐᓂᒃ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᓄᓘᔮᖕᓂ ᐅᔭᕋᒃᓯᐅᕐᕕᒃᒥᑦ. ᑕᕿᖅ ᕿᑎᐊᓃᓕᕐᑎᓪᓗᒍ ᑕᒪᕐᒥᒃ ᓄᓇᕗᒥᑦ ᐅᔭᕋᒃᓯᐅᕐᕕᖕᓄᑦ ᐃᖅᑲᓇᐃᔭᖅᑎᒋᔭᐅᔪᑦ ᐊᖏᕐᕋᐅᑎᑕᐅᓚᐅᕐᓯᒪᔪᑦ ᐊᐃᑦᑐᕐᓯᑲᑕᖁᓇᑎᒃ ᓄᕙᒡᔪᐊᕐᓇᖅ-19ᒡᒥᑦ ᐅᔭᕋᒃᓯᐅᕐᕕᖕᓄᑦ ᓄᓇᓕᖕᓄᑦ.
• ᓄᓇᕗᒥᑦ ᒪᓕᒐᓕᕆᔨᒃᑯᓐᓄᑦ ᒥᓂᔅᑕ ᔩᓂ ᐃᕼᐊᓗᐊᒃ ᑐᓴᖅᑎᑦᑎᕗᖅ ᒫᔅᓯ 12-ᒥ ᓄᓇᕗᒥᑦ ᐃᖅᑲᓇᐃᔭᖅᑎᑦᑎᔨᐅᔪᑦ ᐊᑭᓕᕐᓱᐃᖃᑦᑕᓕᕐᓂᐊᕐᓂᖏᓐᓂᒃ ᒥᑭᓛᒃᑯᑦ ᐃᖅᑲᓇᐃᔭᖅᑐᓄᑦ ᐊᑭᓕᐅᑎᐅᔪᓐᓇᖅᑐᓂᒃ ᒪᓕᒡᓗᑎᒃ ᖁᑦᑎᓛᕆᔭᐅᔪᒥ ᒥᑭᓛᒃᑯᑦ ᐊᑭᓕᐅᑎᒃᓴᐅᕙᒃᑐᒥᑦ ᑲᓇᑕᒥᑦ — $16 ᐃᑲᕐᕋᒧᑦ — ᐱᒋᐊᕐᓗᑎᒃ ᐄᐳᕈᓪ 1-ᒥᑦ.
• ᓄᓇᕗᒥᑦ ᒐᕙᒪᒃᑯᑦ ᒫᔅᓯ 13-ᒥᑦ ᓄᓇᖃᖅᑐᓂᒃ ᐊᖏᕐᕋᕐᓯᒪᖁᔨᓕᓚᐅᕐᑐᑦ ᐊᒻᒪ ᓇᒧᙵᐅᑲᑕᖁᔭᐅᙱᖢᑎᒃ ᐊᐃᑦᑐᖅᓯᕐᕕᐅᑐᐃᓐᓇᕆᐊᓕᖕᓄᑦ ᓄᕙᒡᔪᐊᕐᓇᖅ-19-ᒧᑦ.
• ᒫᔅᓯ 16-ᒥᑦ ᐅᓇ ᓘᒃᑖᖅ ᒪᐃᑯ ᐹᑐᓴᓐ, ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧ, ᐃᓱᒪᓕᐅᕆᓚᐅᕐᓯᒪᔪᖅ ᒪᑐᓯᒪᓚᐅᑲᖁᔨᓪᓗᓂ ᐃᓕᓐᓂᐊᕐᕕᓕᒫᓂᒃ ᐊᒻᒪᓗ ᐸᐃᕆᕝᕕᖕᓕ ᓄᓇᕗᒥᑦ ᐊᐃᑦᑐᕐᓯᑲᑕᖕᓂᖅ ᐱᑕᖃᙱᓐᓂᕐᓴᐅᔪᓐᓇᖁᓪᓗᒍ ᐅᓇ ᓄᕙᒡᔪᐊᕐᓇᖅ-19.
• ᐅᓇ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕ ᔪᐊᔾ ᕼᐃᒃᔅ ᑭᒃᑯᓕᒫᓂ ᐋᓐᓂᐊᖃᕐᑕᐃᓕᑎᑦᑎᓂᕐᒧᑦ ᑐᐊᕕᕐᓇᖅᑐᓕᕆᓂᖅ ᐱᒻᒪᕆᐅᓂᖓᓂᒃ ᒫᔅᓯ 18-ᒥ, ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᓄᕙᒡᔪᐊᕐᓇᒧᑦ ᐅᓂᒃᑳᕆᖃᑦᑕᖅᑕᖏᑦᑎᒍᑦ ᖃᐅᑕᒫᑦ ᐃᖃᓗᖕᓂ.
• ᒫᔅᓯ 23-ᒥᑦ, ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧ, ᑐᓴᖅᑎᑦᑎᓚᐅᕐᑐᖅ ᐱᒋᐊᕐᓗᓂ 1 ᒥᓂᑦ ᑎᑭᙱᐊᕐᔪᓱᖓᕐᓂᖓᓂ 12:00 ᒫᔅᓯ 24-ᒥᑦ, ᓄᓇᕗᒥᐅᑕᑐᐊᑦ ᐊᒻᒪᓗ ᐃᖅᑲᓇᐃᔮᖃᖅᑐᑦ ᐱᒻᒪᕆᖕᓂᒃ ᓄᓇᕗᒧᑦ ᑎᑭᑦᑐᓐᓇᑐᑐᐊᖑᓕᕐᓂᖏᓐᓂᒃ. ᑕᒪᓐᓇᓕ ᑕᐃᒪᓐᓇ ᐊᑐᖁᔭᐅᓕᕐᓯᒪᔪᖅ ᑐᑭᖃᕐᐳᖅ ᓄᓇᕗᒧᙵᐅᔪᑦ ᐅᓪᓗᓂ 14-ᓂ ᐃᓄᑑᓐᓇᖅᑐᒦᑦᑕᕆᐊᖃᖅᖢᑎᒃ ᐋᑐᕚᒥ, ᐅᐃᓂᐱᒡ, ᐊᑦᒪᓐᑕᓐ ᐅᕝᕙᓘᓐᓃᑦ ᔭᓗᓇᐃᒥ. ᐋᓐᓂᐊᕐᕕᓕᐊᕆᐊᖃᖅᐸᒃᑐᑦ ᐃᓚᐅᑎᑕᐅᔪᑦ ᑖᔅᓱᒧᖓ.
• ᒦᓚ ᑲᒥᙳᐊᒃ, ᒪᓕᒐᓕᐅᕐᑎ ᖁᒡᓗᖅᑑᕐᒧᑦ, ᑐᓴᖅᑎᑦᑎᓚᐅᕐᑐᖅ ᒫᔅᓯ 31-ᒥ ᐃᒃᓯᕙᐅᑕᖓᓂ ᒪᓕᒐᓕᕆᕕᒡᔪᐊᒥᑦ ᓄᖅᑲᕐᓂᐊᕐᓂᖓᓂᒃ ᐄᐳᕈᓪ 3-ᒥᑦ.

ᐄᐳᕈᓪ

• ᖃᖓᑕᖃᑦᑕᕆᐊᒃᓴᖅ ᖁᕕᐊᓇᙱᓐᓂᕐᓴᐅᓕᓚᐅᕐᑐᖅ ᐄᐳᕈᓪ ᐱᒋᐊᓕᓵᕐᑎᓪᓗᒍ, ᑕᒪᒃᑯᐊ ᐅᑭᐅᕐᑕᖅᑐᒥᑦ ᖃᖓᑕᓲᑦ ᐱᔨᑦᑎᕋᐅᑎᒋᕙᒃᑕᖏᑦ ᖃᖓᑕᔪᓂᒃ ᐅᓄᕈᓐᓃᕐᐹᓕᖅᑎᑕᐅᑎᓪᓗᒋᑦ, ᐱᓗᐊᕐᑐᒥᑦ, ᐃᒪᖅ ᐊᓕᒎᔭᒦᑦᑐᑦ, ᐊᐃᑦᑐᖅᓯᑎᑦᑎᑦᑕᐃᓕᓂᕐᒥᒃ ᓄᕙᒡᔪᐊᕐᓇᖅ-19-ᒥ ᒪᐅᓇ ᐆᓇᕐᑐᓂᒃ ᓂᕆᔭᒃᓴᑎᒍᑦ, ᐃᒥᐊᓗᒃᑎᒍᑦ ᐊᒻᒪ ᐆᓇᔪᒃᑐᓂᒃ ᑯᑮᓯᑎᒍᑦ.
• ᐃᖅᑲᓇᐃᔮᓄᑦ ᐊᔪᕈᓐᓃᕐᓴᖅᑐᓕᕆᔨᒃ ᑲᓇᑕᒥ ᓄᓇᕗᒧᑦ ᐋᖅᑭᒃᓯᓚᐅᕐᑐᑦ ᐊᖏᕐᕋᒥᑦ ᐱᓕᕆᐊᕆᔭᒃᑯᑦ ᐱᒡᒍᓴᐅᑎᑦᑎᓂᕐᒥᒃ ᓱᕈᓯᕐᓄᑦ ᐃᓕᓐᓂᐊᕐᕖᑦ ᒪᑐᓯᒪᓂᖏᓐᓂᒃ. ᓯᕗᓪᓕᖅᐹᖑᓚᐅᕐᑐᕐᓕ ᑕᐃᔭᐅᓪᓗᓂ ᒍᕇᑦ ᑯᑭ ᐸᐃᒃ-ᐋᕝ (Great Cookie Bake-Off). ᐃᓕᓐᓂᐊᕐᑎᐅᔪᑦ ᓴᓇᖁᔭᐅᓪᓗᑎᒃ ᑯᑮᓯᓂᒃ ᒪᒪᕆᓛᖓᓂᒃ ᐊᒻᒪ ᐊᔾᔨᓕᐅᕐᓗᒍ ᑖᓐᓇ ᓴᓇᔭᖓ ᑐᓐᓂᖁᑎᒋᓗᒍᓗ.


ᑕᐃᕕᑦ ᑲᑯᒃᑎᓐᓂᖅ ᐅᑯᓂᖓ ᐅᒥᖕᒪᖕᓂ ᑕᑯᓚᐅᕐᓯᒪᔪᑦ — ᑲᖏᖅᖠᓂᐅᓪᓗ ᖃᒪᓂᑦᑐᐊᓪᓗ ᐊᑯᓐᓂᖓᓂᒃ ᐄᐳᕈ 28-ᒥᑦ. “ᐅᑯᐊ ᐆᒪᔪᑦ ᐱᐅᔪᐊᓗᐃᑦ.” ᑎᑎᕋᕐᑐᖅ. (ᐊᔾᔨᓕᐅᕆᔨ ᑕᐃᕕ ᑲᑯᒃᑎᓐᓂᖅ)

• ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔩᑦ ᐊᖏᓚᐅᕐᐳᑦ ᑐᓂᓯᔪᒪᓪᓗᑎᒃ ᐅᕙᙵᑦ $351,200-ᓂ ᒐᕙᒪᑐᖃᒃᑯᓐᓂ ᐃᑲᔫᑎᒃᓴᓂ ᐱᖓᓱᓄᑦ ᓄᓇᓕᖕᓂ ᑲᑐᔾᔨᖃᑎᒌᓄᑦ ᐃᑲᔪᖃᑦᑕᖅᑐᓂᒃ ᐊᖏᕐᕋᖃᙱᑦᑐᓕᕆᓂᕐᒥᒃ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅᑕᖃᖅᑎᓪᓗᒍ, ᐅᖂᖅᑕᖅ ᑲᑐᔾᔨᖃᑎᒌᑦ, YWCA ᐊᕝᕕᒃ ᐊᒻᒪᓗ ᖃᔪᖅᑐᕐᕕᒃ.
• ᐊᒡᓂᑯ ᐄᒍᓪ ᐅᔭᕋᒃᓯᐅᕐᕕᒃ ᓕᒥᑎᑦᑯ ᐃᖏᕐᕋᔪᓐᓇᕐᑐᒥᑦ ᖃᐅᔨᓴᕐᕕᖕᒥᑦ ᐋᖅᑭᒃᓯᓚᐅᕐᑐᑦ ᒥᓕᐊᑏᓐ ᐅᔭᕋᒃᓯᐅᕐᕕᖕᒥᑦ ᑲᖏᖅᖠᓂᐅᑉ ᖃᓂᒋᔭᖓᓂᒃ, ᑖᒃᑯᐊ ᐃᖅᑲᓇᐃᔭᖅᑎᐅᔪᑦ ᑕᕝᕙᓃᖏᓐᓇᕐᐸᒃᑐᑦ ᖃᐅᔨᓴᖅᑕᐅᔪᓐᓇᕐᓂᐊᕐᒪᑕ ᓄᕙᒡᔪᐊᕐᓇᖅ-19-ᒧᑦ.
• ᓄᓇᕗᒥᑦ ᒐᕙᒪᒃᑯᑦ ᓴᖅᑭᑎᑦᑎᓚᐅᕐᑐᑦ ᐊᑭᓖᖃᑦᑕᕐᓂᖏᓐᓂᒃ ᑳᒻ ᐃᐅᑯᓐᓂᒃ ᐊᒻᒪ ᑲᓃᑎᐊᓐ ᓄᐊᑦᑯᓐᓂ ᐃᒃᓯᕙᐅᑕᓂ ᐃᓄᖃᙱᑦᑐᓂᒃ ᑖᒃᑯᐊ ᖃᖓᑕᐃᓐᓇᕈᓐᓇᖁᓪᓗᒋᑦ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅᑕᖃᕐᓂᖓᓂᒃ. “ᐊᔪᕐᓇᖅᑐᒦᑎᑕᐅᓚᐅᕋᑦᑕᖃ ᐊᒻᒪᓗ ᐃᑲᔫᑎᒃᓴᓂᒃ ᕿᓂᕆᐊᖃᖅᖢᑕ ᖃᖓᑕᓲᑦ ᖃᖓᑕᖃᑦᑕᐃᓐᓇᕈᓐᓇᕐᓂᐊᕐᒪᑕ,” ᐅᖃᖅᑐᖅ ᓯᕗᓕᐅᕐᑎ ᔫ ᓴᕕᑲᑖᖅ ᐄᐳᕈᓪ 15-ᒥᑦ.
• ᐄᐳᕈᓪ 17-ᒥᑦ, ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᑕᐃᕕᑎ ᔪᐊᓇᓯ ᑐᓴᖅᑎᑦᑎᓚᐅᕐᑐᖅ ᐃᓕᓐᓂᐊᕐᕕᐅᔪᑦ ᓄᓇᕗᒥᑦ ᒪᑐᓯᒪᐃᓐᓇᕐᓂᐊᓕᕐᓂᖏᓐᓂᒃ ᐃᓕᓐᓂᐊᕐᓇᖅ ᐃᓱᓕᓐᓂᖓᓄᑦ.
• ᐊᐃᑉᐸᖓᓂ ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᒃᓴᖅ ᐆᒧᖓ ᐹᕕᓐᓛᓐᑯᑦ ᓴᕕᕋᔭᒃᓴᒥ ᐅᔭᕋᒃᓯᐅᕐᕕ ᐊᖏᒡᓕᒋᐊᖅᑕᐅᔪᒪᓂᖓᓄᑦ ᐸᕐᓇᐅᑎᓄᑦ, ᐅᖄᓚᐅᑎᑎᒎᖕᓂᐊᕐᖢᑎᒡᓗ, ᐅᖃᕈᓐᓇᕐᕕᖃᕈᒪᔪᓄᑦ ᓈᒻᒪᒋᔭᐅᓚᐅᕐᓯᒪᙱᒻᒪᑦ ᐃᓚᖏ ᓄᓇᓕᖕᓃᑦᑐᑦ ᒥᑭᑦᑐᓂᒃ ᐃᓚᐅᔪᓐᓇᕋᔭᙱᓐᓂᖏᓐᓄᑦ ᑲᑎᒪᖃᑕᐅᔭᕆᐊᒃᓴᖅ ᖃᕋᓴᐅᔭᒃᑰᖓᔪᓂᒃ.
• ᓄᓇᕗᒥᐅᑦ ᓯᕗᓪᓕᕐᐹᒥ ᓄᕙᒡᔪᐊᕐᓇᖅ-19-ᒥᑦ ᐱᑕᖃᕐᓂᕋᖅᑕᐅᓚᐅᕐᓯᒪᔪᑦ ᐅᕙᓂ ᒥᑦᑎᒪᑕᓕᖕᒥᑦ ᐄᐳᕈᓪ 30-ᒥᑦ, ᑭᓯᐊᓂᓕ ᒪᐃ 4-ᖑᕐᑎᓪᓗᒍ ᑖᓐᓇ ᑕᒻᒪᕐᓯᒪᓂᕋᖅᑕᐅᓕᓚᐅᕐᑐᖅ. ᓄᓇᕗᒥᑦ ᑯᕉᓇᕙᐃᕋᔅᒥᑦ ᐋᓐᓂᐊᖃᒋᓐᓂᕋᖅᑕᐅᔪᑦ.

ᒪᐃ

• ᐅᖃᕐᑎ ᐹᓪ ᖁᐊᓴ ᑐᓴᖅᑎᑦᑎᕗᖅ ᒪᐃ 1-ᒥᑦ ᐅᐱᕐᙶᒃᑯᑦ ᑲᑎᒪᓂᒃᓴᖅ ᓄᓇᕗᒥᑦ ᒪᓕᒐᓕᕆᕕᒡᔪᐊᕐᒥ ᓄᖅᑲᖅᑎᑕᐅᓚᐅᕐᓂᖓᓂᒃ ᐊᐃᑦᑐᕐᓯᕙᓪᓕᐊᓂᕐᒥ ᓄᕙᒡᔪᐊᕐᓇᖅ-19-ᒥᑦ ᓄᖅᑲᖓᑎᑦᑎᒐᓱᖕᓂᕐᒧᑦ. ᑲᑎᒪᓂᒃᐅᓂᐊᓚᐅᕐᑐᖅ ᐋᖅᑭᒃᑕᐅᓯᒪᓚᐅᕐᑐᖅ ᒪᐃ 26-ᒥᑦ ᔫᓂ 4-ᒧᑦ.
• ᓯᕗᓕᐅᕐᑎ ᔫ ᓴᕕᑲᑖᖅ ᑐᓴᖅᑎᑦᑎᕗᖅ ᓄᓇᕗᒥᐅᑕᓕᒫᑦ ᓄᓇᕗᒥᑦ ᐊᐅᓪᓚᕐᓯᒪᔪᑦ ᐅᑎᕐᓂᐊᕈᒪᒍᑎ ᐊᑭᓖᔭᕆᐊᖃᕐᓂᖏᓐᓂᒃ ᐅᓪᓗᓂ 14-ᓂᑦ ᐃᓄᑑᓐᓇᖅᑐᒦᕝᕕᒃᓴᓂᒃ ᐅᑯᓇᓂ ᔭᓗᓇᐃᒥᑦ, ᐊᑦᒪᓐᑕᓐ, ᐅᐃᓂᐱᒡ ᐊᒻᒪ ᐋᑐᕚᒥᑦ. ᐅᓇ ᐃᓱᒪᓕᐊᕆᔭᐅᔪᖅ, ᐊᒻᒪ ᓈᒻᒪᒋᔭᐅᓯᒪᙱᓪᓚᕆᒃᖢᓂ, ᐊᓯᙳᖅᑎᑕᐅᓕᓚᐅᕐᑐᖅ ᐅᓪᓗᑦ ᑕᓪᓕᒪᑦ ᐊᓂᒍᕐᑎᓪᓗᒋᑦ, ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐅᖃᕐᑎᓪᓗᒋᑦ ᑲᔪᓯᓂᐊᕐᓂᖏᓐᓂᒃ ᐊᑭᓖᖃᑦᑕᕐᓂᐊᕐᓗᑎᒃ ᐃᓄᑑᕝᕕᐅᕙᒃᑐᓂᒃ.
• ᐋᑐᕚᒥ ᐸᓖᓯᓄᑦ ᐱᔨᑦᑎᕋᖅᑎᑦ ᖃᐅᔨᓴᖅᑎᖏᑦ ᑲᖏᖅᑐᒑᐱᖕᒧᐊᖅᐳᑦ ᒪᐃ 6-ᒥ ᖃᐅᔨᓴᕆᐊᖅᖢᑎ ᐸᓖᓯᒃᑯᑦ ᖁᑭᕐᓴᕐᓂᖏᓐᓂᒃ ᐃᓅᔪᓐᓃᕐᑐᖃᕐᑎᓪᓗᒍ 31-ᓂ ᐊᕐᕌᒍᓕᖕᒥ ᐊᖑᑎᒥᓐ. ᐅᓇ ᐱᖓᔪᒋᔭᐅᔪᖅ ᐸᓖᓯᒃᑯᑦ ᖁᑭᖅᓴᖅᑐᓂᒃ ᐃᓚᐅᑎᓪᓗᒋᑦ ᓄᓇᕗᒥᑦ, ᓯᕗᓪᓕ ᑭᙵᓂᑦ ᐊᒻᒪ ᐄᐳᕉᒥᑦ ᓂᐊᖁᙶᒥᑦ.


ᐋᓐᑐᕉ ᑕᒑᖅ ᐆᒥᖓ ᐊᔾᔨᓕᐅᕐᓯᓚᐅᕐᑐᖅ ᖃᒧᑏᒃ ᓯᑯᒃᑰᕐᑐᖅ ᒥᑦᑎᒪᑕᓕᖕᒥᑦ, ᒪᐃ 31-ᒥᑦ 1:58 ᐅᓪᓛᒃᑯᑦ, ᓯᕿᓂᖅ ᓴᕿᓕᕐᑎᓪᓗᒍ ᐸᐃᓚᑦ ᕿᑭᕐᑕᒃᑯᑦ. (ᐊᔾᔨᓕᐅᕆᔨ ᐋ, ᑕᒑᖅ)

• TMAC ᐊᑐᒃᑲᓐᓂᕈᓐᓇᖅᑐᓕᕆᔨᒃᑯᑦ, ᑖᒃᑯᐊ ᓇᖕᒥᓂᖃᕐᑎᑦ ᕼᐆᑉ ᐸᐃᒥ ᒎᓗᒥ ᐅᔭᕋᒃᓯᐃᕐᕕᖕᒥᑦ ᓄᓇᕗᑦ ᐱᖓᖕᓇᖅᐸᓯᐊᓂᒃ, ᑐᓴᖅᑎᑦᑎᓕᓚᕐᑐᑦ ᐸᕐᓇᒃᓯᒪᓂᖏᓐᓂᒃ ᓂᐅᕕᖅᑕᐅᓂᐊᕐᓂᕐᒥᒃ ᓴᐃᓃᓯᒃᑯᓐᑦ ᒎᓗᒥ ᐅᔭᕋᒃᓯᐅᕐᕕᒡᔪᐊᓂᒃ SD Gold. ᑖᔅᓱᒧᖓ ᐊᖏᕈᑎᒃᓴᖅ ᐊᖏᖅᑕᐅᔭᕆᐊᖃᖅᖢᓂ ᓱᓕ ᑎᒍᒥᐊᖅᑎᓄᑦ ᐊᒻᒪᓗ ᐱᖁᔭᓕᕆᔨᒻᒪᕆᖕᓄᑦ.
• ᒪᕐᕉᒃ ᓄᓇᕗᒥᑦ ᓄᓇᓕᐅᔫᒃ, ᐊᐅᓱᐃᑦᑐᖅ ᐊᒻᒪ ᑭᙵᐃᑦ, ᐅᓪᓗᓂ 14-ᓂ ᐃᒥᐊᓗᖃᖅᑎᑦᑎᑦᑕᐃᓕᓪᓗᑎᒃ ᐃᓄᒌᐊᑲᑕᒋᐊᖃᕐᓇᙱᓐᓂᕐᒥᒃ ᐱᔾᔪᑎᖃᖅᖢᑎᒃ ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᐅᓂᖓᓂᒃ.. ᐃᖃᓗᒃᑑᑦᑎᐊᕐᒥᑦ ᑕᐃᒪᐃᓚᐅᕐᓯᒪᖕᒥᔪᑦ ᒫᔅᓯ ᐃᓱᓕᓕᕐᑎᓪᓗᒍ.
• ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔩᑦ ᓂᕈᐊᕐᐳᑦ ᐃᑲᔪᖅᑐᐃᓪᓗᑎᒃ ᓄᓇᓕᖕᓂ ᐱᐊᑖᕐᕕᒃ ᐊᒻᒪ ᐅᐊᓂᑖᕐᕕᒃ ᐊᐅᓚᑕᐅᖏᓐᓇᕐᓂᐊᕐᓗᓂ ᐅᖓᑖᓄᑦ ᐊᕐᕌᒍᑦ ᐱᖓᓱᑦ ᐱᓕᕆᐊᕆᔭᐅᓂᖓᓂ ᓯᑎᐱᕆᐅᑎᓪᓗᒍ. ᔫᓂ 22-ᒥᑦ ᓄᓇᕗᒥᑦ ᒐᕙᒪᒃᑯᑦ ᓇᓗᓇᐃᓕᓚᐅᕐᑐᑦ ᐃᒥᐊᓗᒃᑖᕐᕕᒃ ᒪᑐᐃᖓᐃᓐᓇᕐᓂᐊᕐᓂᖓᓂᒃ.
• ᓄᓇᕗᒥᑦ ᒐᕙᒪᒃᑯ ᓇᓗᓇᐃᕐᓯᒃᑲᓐᓂᕐᑐᑦ ᑭᒃᑯ ᐱᓇᓱᒍᓐᓇᕐᒪᖔ ᐆᒥᖓ ᑲᓇᑕᒥ ᑐᐊᕕᕐᓇᖅᑐᓄᑦ ᐃᑲᔫᑎᒃᓴᓂᒃ (CERB). ᓄᓇᕗᒻᒥᐅᑕ ᓂᖃᐃᓲᑎᓂᒃ ᑮᓇᐅᔭᖅᑖᕐᓯᒪᑐᐃᓐᓇᖅᐸᑕ ᐊᕐᕌᒎ ᐃᓗᐊᓂ ᐊᔪᖅᑎᑕᐅᔪᑦ ᑲᓇᑕᒥ ᑐᐊᕕᕐᓇᖅᑐᓄᑦ ᐃᑲᔫᑎᒃᓴᓂᒃ, ᐃᓄᓕᕆᔨᒃᑯᑦ ᑐᓴᖅᑎᑦᑎᓚᐅᕐᑐᑦ ᑭᒃᑯᓕᒫᓄᑦ ᑐᓴᒐᒃᓴᓕᕆᓂᒃᑯᑦ.
• ᐸᐃᕆᕝᕕᐅᔪᑦ ᒪᑐᐃᕈᓐᓇᕐᓂᐊᓕᕐᑎᓪᓗᒋᑦ ᓄᓇᕗᒥᑦ, ᐃᓚᒋᔭᐅᓚᐅᕐᒪᑦ ᓄᕙᒡᔪᐊᕐᓇᖅ-19-ᒧᑦ ᓄᖃᖓᑎᑕᐅᓯᒪᔪᓄᑦ, ᐅᓇ ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᑐᓴᖅᑎᑦᑎᓚᐅᕐᑐᖅ ᒪᐃ 28-ᒥᑦ ᐱᔾᔪᑎᒋᔭᐅᓪᓗᓂ ᐋᓐᓂᐊᕆᔭᐅᑲᑕᒃᑯᑦ ᐳᑐᓯᔅ (pertussis) ᓄᕙᑲᑕᓗᐊᕐᓂᖅ (whooping cough), ᐅᑯᐊ ᓴᓂᑭᓗᐊᕐᒥ ᐸᐃᕆᕝᕕᐅᔪᑦ “ᒫᓐᓇᐅᔪᖅ” ᒪᑐᓯᒪᓂᐊᕐᓂᖏᓐᓂᒃ. ᔫᓂ ᐱᒋᐊᓕᓵᕐᑎᓪᓗᒍ, ᑕᓪᓕᒪᓂ ᐋᓐᓂᐊᕕᒡᔪᐊᕐᓇᒥᒃ ᐋᓐᓂᐊᖅᑐᖃᓕᓚᐅᕐᑐᖅ, ᐊᒻᒪᓗ ᑕᒪᓐᓇ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓄᑦ ᐋᓐᓂᐊᕆᔭᐅᔪᖅ ᐊᓂᒍᕐᓂᕋᖅᑕᐅᓪᓗᓂ ᓯᑎᐱᕆ 1-ᒥᑦ.

ᔫᓂ

• ᔫᓂ 1-ᒥᑦ, ᓄᓇᕗᒥᑦ ᐊᑐᖁᔭᐅᙱᑦᑐ ᐃᓚᖏ ᒪᑐᐃᕐᑕᐅᒃᑲᓐᓂᓚᐅᕐᑐᑦ ᒪᑯᐊ ᓄᓇᕗᒥᑦ ᒥᕐᖑᐃᕐᓯᕖᑦ ᐊᒻᒪ ᓄᓇᓕᖕᓂ ᐱᙳᐊᕐᕕᐅᕙᒃᑐᑦ, ᐸᐃᕆᕝᕕᐅᔪᓪᓗ ᐊᐅᓚᑕᐅᒃᑲᓐᓂᕈᓐᓇᕐᓯᓪᓗᑎᒃ, ᐊᒻᒪᓗ ᐃᓄᒋᐊᒍᓐᓇᕐᓯᓪᓗᑎᒃ ᓯᓚᒥ ᑲᑎᕐᖓᔪᑦ 25-ᓄ ᑎᑭᓪᓗᑎᒃ.


ᖄᐱᒃ ᐊᑕᒍᑦᓯᐊᖅ ᑎᑎᖃᓂ ᑎᒍᒥᐊᕐᑐᖅ ᐅᕙᙶᖅᑐᒥᑦ ᑲᓇᑕᒧ ᐊᖓᔪᖅᑳᕐᔪᐊᒥ ᔭᔅᑎᓐ ᑐᕇᑑᒥ ᔫᓂ 27-ᒥᑦ, ᓇᓪᓕᐅᑎᑦᑎᐊᖁᔨᓪᓗᓂ ᐊᒻᒪ ᐊᕐᕌᒍᖃᑦᑎᐊᕐᓂᐊᖁᔨᓯᒪᓪᓗᓂ. ᐃᒃᐱᐊᕐᔪᒃᒥᑦ ᓄᓇᖃᕐᑐᖅ ᐊᒻᒪ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑐᓂᓯᓚᐅᕐᐸᒃᑐᖅ ᑭᓕᐅ ᑲᐃᓐᔅ ᑐᓂᓯᓚᐅᕐᑐᖅ ᑎᑎᖃᓂᒃ ᐊᑕᒍᑦᓯᐊᕐᒧᑦ, ᑖᓐᓇᓗ ᑕᕝᕗᙵᖅᖢᓂ ᐸᓚᐅᒑᓕᐅᕐᑎᓪᓗᒍ. (ᐊᔾᔨᓕᐅᕆᔨ ᓯ. ᑲᐃᓐᔅ)

• ᓄᓇᕗᒥ ᐋᓐᓂᐊᕆᔭᐅᕙᒃᑐᑦ ᐊᐃᑦᑐᐃᓂᒃᑯᑦ ᐱᑕᖃᙱᓐᓂᕐᓴᐅᔪᑦ “ᐅᔾᔨᕐᓇᓗᐊᕐᑐᒥᓐ” ᑕᐃᒪᙵᑦ ᓄᓇᕗᑦ ᓄᖃᖓᒋᐊᖃᓕᕐᑎᓪᓗᒍ ᐱᔾᔪᑎᐅᓪᓗᓂ ᓄᕙᒡᔪᐊᕐᓇᖅ-19. “ᓄᕙᖃᓗᐊᑲᑕᖕᓂᖅ ᐱᑕᖃᙱᑉᐹᓪᓕᕐᑐᖅ, ᐳᕙᒃᑯᑦ ᓄᕙᖃᓗᐊᕐᓂᖅ ᐱᑕᖃᙲᑉᐹᓪᓕᕐᑐᖅ, ᐊᒻᒪᓗ ᐆᓇᑲᑕᖕᓂᖅ ᑐᓴᑲᑕᖕᓇᙱᖢᓂ ᑕᒪᑐᒪᓂ ᐊᕐᕌᒍᒥᑦ,” ᐅᖃᖅᑐᖅ ᓘᒃᑖᖅ ᕗᕌᓐᓱᐊ ᑎ ᕗᐊᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᓄᑦ ᐊᖓᔪᖅᑳᕆᔭᐅᔪᖅ. ᐋᓐᓂᐊᕕᒡᔪᐊᕐᓇᒧᑦ ᐅᖓᓯᒌᑲᑕᒋᐊᖃᕐᓂᖅ ᑕᒪᒃᑯᓂᖓ ᐋᓐᓂᐊᕆᔭᐅᔭᑦᑐᓂᒃ ᓄᖅᑲᖅᐹᓪᓕᕈᑎᐅᖂᒡᔪᖅ.
• ᐸᓖᓯ ᐅᕙᓂ ᑭᙵᐃᑦ ᓄᓇᓕᖕᓃᒍᓐᓃᕐᑎᑕᐅᓚᐅᕐᑐᖅ ᐊᒻᒪ “ᐊᐅᓚᑦᑎᓂᕐᒥᒃ ᐱᓕᕆᐊᖃᓕᕐᖢᓂ,” ᑕᕐᕆᔭᒐᕐᒥ ᓴᖅᑭᔮᑐᖃᑲᑕᓚᐅᕐᑎᓪᓗᒍ ᐸᓖᓯ ᐅᕐᕈᑎᑦᑎᖅᑰᔨᓪᓗᓂ ᐊᖓᑎᒥ ᓄᓇᓯᐅᑎᖓᑕ ᐹᖓ ᒪᑐᐃᖅᑎᓪᓗᓂᐅᒃ.
• ᔫᓂ 3 ᓇᓪᓕᐅᑎᒍᑎᐅᓚᐅᕐᑐᖅ ᐊᕐᕌᒍᒥ ᐆᒧᖓ ᑭᖑᓪᓕᕐᐹᒥ ᐅᓂᒃᑳᓕᐊᕆᔭᐅᓂᑯᓂᒃ ᑲᓇᑕᒥ ᖃᐅᔨᒐᓱᖕᓂᕐᒥᒃ ᐊᓯᐅᓯᒪᔪᓂᒃ ᐊᒻᒪ ᐃᓄᐊᕐᑕᐅᓂᑯᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ, ᑖᓐᓇᓗ ᐱᖁᔨᒍᑎᐅᓯᒪᓪᓗᓂ 231-ᓂᒃ ᒪᓕᒐᓕᕆᓂᒃᑯᑦ ᐱᓕᕆᐊᒃᓴᓂᒃ. ᑲᓇᑕᒥ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎᑦ ᐋᖅᑭᒃᓱᖅᑕᐅᓂᑯ ᑖᒃᑯᓂᖓ ᐱᖁᔭᐅᔪᓂᒃ ᐊᑐᕋᓱᒃᖢᑎᒃ, ᐊᒻᒪᓗ ᑕᕝᕙᓂᑦᑕᐃᓐᓇᖅ ᐅᓪᓗᕐᒥ ᓴᖅᑭᑕᐅᓂᐊᖅᖢᓂ, ᑭᖑᕙᕆᐊᖅᑕᐅᓚᐅᕐᑐᖅ.
• 200 ᐅᖓᑖᓂᑦ ᐃᓄᐃᑦ ᐃᓚᐅᓚᐅᕐᐳᑦ ᐅᓇ ‘ᕿᕐᓂᖅᑕᐃᑦ ᐃᓅᓯᖏᑦ ᐱᒻᒪᕆᐅᔪᑦ’ ᑲᑎᖃᑎᒌᖕᓂᕐᒥᑦ ᐃᖃᓗᖕᓂ ᔫᓂ 5-ᖑᑎᓪᓗᒍ ᓴᖅᑭᑎᑦᑎᓇᓱᒃᖢᑎᒃ ᐃᑲᔪᖅᑐᐃᓯᒪᓂᕐᒥᒃ ᕿᕐᓂᕐᑕᓂᒃ ᓄᓇᕗᒦᑦᑐᓂᒃ. ᐅᓇ ᖃᓄᐃᓕᐅᕈᑎ ᐋᖅᑭᒃᓱᖅᑕᐅᓚᐅᕐᑐᖅ ᓄᓇᕗᒥᑦ ᕿᕐᓂᖅᑕᐃᑦ ᖃᓄᐃᓕᐅᕈᓯᕕᓂᖏᓐᓄᑦ ᑲᑐᔾᔨᖃᑎᒌᓄᑦ.
• ᐅᐊᓕᓂᕐᒥᑦ ᓄᓇᕗᒥᑦ ‘ᑳᐱᑦᑎᐊᖅ’ ᑳᕕᒥᑦ ᐱᓕᕆᐊᐊᖃᕐᓂᖅ, ᐊᐅᓚᑕᐅᔪᖅ Pitquhirnikkut Ilihautiniq (ᐱᖅᑯᕼᐃᕐᓂᒃᑯᑦ ᐃᓕᕼᐊᐅᑎᓂᖅ) ᕿᑎᕐᒥᐅᓂᑦ ᐃᑦᑕᕐᓂᓴᓕᕆᔨᒃᑯᓐᓄᑦ ᑲᑐᔾᔨᖃᑎᒌᑦ ᐃᖃᓗᒃᑑᑦᑎᐊᓂ, ᐱᒋᐊᖅᑎᑦᑎᓚᐅᕐᑐᑦ ᖃᕋᓴᐅᔭᒃᑯᑦ ᓂᐅᕕᐊᒃᓴᖏᓐᓂᒃ ᓴᖅᑭᔮᖅᑎᑦᑎᓕᕐᖢᑎᒃ ᓂᐅᕕᖅᑕᐅᒃᑲᓐᓂᕋᓱᒃᖢᑎᒃ ᑲᓇᑕᒥᐅᑕᓄᑦ ᐊᒻᒪ ᒥᐊᓕᒐᕐᒥᐅᑕᓄᑦ.


ᓯᐅᕋᓐ ᐊᑲᒻᒪᒃ, ᐊᓂᒍᐃᓯᒪᔪᖅ ᔮᓐ ᐊᕐᓇᓕᒃᔪᐊᖅ ᐃᓕᓐᓂᐊᕐᕕᐊᓗᖕᒥᑦ ᐊᕐᕕᐊᓂᒃ, ᖁᕕᐊᓲᑎᖃᕐᐳᖅ ᐸᐃᑉᐹᕐᑖᕐᓂᖓᓂᒃ ᔫᓂ 19-ᒥᑦ ᐅᖓᓯᒌᑲᑕᒋᐊᖃᖅᖢᑎᒃ ᖁᕕᓲᑎᖃᕐᑎᓪᓗᒋ ᓄᓇᓕᖕᓂ ᓄᓇᓯᐅᑎᒃᑯ ᐃᖏᕐᕋᔭᖕᓂᐊᖅᖢᑎᒃ, ᐱᖃᑎᖃᖅᖢᓂ ᐊᖅᑯᑎᒥᓂᒃ, ᐃᐅᕋᓐ ᐃᕗᓂᕐᔪᒃ. (ᐊᔾᔨᓕᐅᕆᔨ ᑖᓂᐅᓪ ᓂᐱᓵ)

• ᓄᐊᑦᕕᔅᑎᐅᑯᑦ ᑐᓴᖅᑎᑦᑎᓚᐅᕐᑐᑦ ᓄᓇᕗᒥᑦ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓄᑦ ᑲᑎᓯᒪᓪᓗᑎᒃ ᒪᓂᓴᐅᑎᖏᑦ ᐱᑖᒃᑲᓐᓂᕈᑎᒃᓴᑦ ᑕᐃᒪᓐᓇ ᐋᖅᑭᒃᓯᒪᐃᓐᓇᐅᔭᕐᓂᐊᓕᕐᓂᖓᓂᒃ, ᓈᒻᒪᒃᓴᖏᔾᔪᑎᒋᔭᐅᔪᑦ ᐱᔨᑦᑎᕋᐅᑎᒋᔭᐅᔪᒧᑦ ᑲᔪᓯᕙᓪᓕᐊᒐᓗᐊᕐᑎᓪᓗᒋᑦ.
• ᓇᓕ ᑯᓱᒐᖅ ᐱᐊᓂᒃᓯᓚᐅᕐᐳᖅ ᐊᕐᕋᒍᓂ ᑕᓪᓕᒪᓂ ᐃᓂᖃᕐᓂᖓ ᑲᒥᓯᓇᐅᓂᕐᒧᑦ ᓄᓇᕗᒥᑦ ᔫᓂᐅᑉ ᓄᙳᐊᓂᒃ. ᐃᓅᓱᒃᑐᓄᑦ ᑐᓴᒐᒃᓴᖃᓚᐅᕐᑐᖅ ᓄᓇᕗᒻᒥᐅᓄᑦ “ᐃᓕᔅᓯᓐᓂ ᐱᒃᑯᒋᓗᓯ ᑭᓲᓂᔅᓯᓐᓂ ᐊᒻᒪ ᓇᑭᙶᕐᓯᒪᓂᕐᓂ.”

ᔪᓚᐃ

• ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᐹᕕᓐᓛᓐᑯᑦ ᐊᑎᓕᐅᓚᐅᕐᑐᑦ ᑮᓇᐅᔭᑳᓪᓛᓗᖕᓂᒃ ᐃᑲᔫᑎᒃᓴᓄᑦ ᐊᖏᕈᑎᓂᒃ, ᑕᐃᔭᐅᓪᓗᓂ Inuit Certainty Agreement, ᐊᒃᑐᐊᓪᓗᓂ ᓄᓘᔮᖕᓂ ᐅᔭᕋᒃᓯᐅᕐᕕᖕᒧᑦ ᐊᐅᓚᑎᓂᕐᒥᒃ. ᓄᑖᑦ ᐃᑲᔫᑎᒃᓴᑦ ᐃᓚᖃᓚᐅᕐᑐᑦ ᐃᓄᐃᑦ ᐱᓕᕆᐊᒥᒃ ᖃᐅᔨᓴᖃᑦᑕᕐᓂᐊᕐᓂᕐᒥᒃ, ᐃᑲᔫᑎᒃᓴᓄᑦ ᐸᐃᕆᕝᕕᖕᓄᑦ ᑖᔅᓱᒧᖓ ᐊᒃᑐᖅᑕᐅᓯᒪᔪᓄᑦ, ᓄᑖᓂᒃ ᓱᕈᓯᕐᓄᑦ ᑮᓇᐅᔭᖅᑖᕈᑎᒃᓴᓂᒃ ᐃᓄᖕᓄᑦ ᐃᖅᑲᓇᐃᔭᖅᑐᓄᑦ ᐅᔭᕋᒃᓯᐅᕐᕕᒃᒥᑦ, ᐊᒻᒪᓗ ᐊᖏᒡᓕᒋᐊᖅᑎᑦᑎᓗᑎᒃ ᕿᑐᕐᖏᐅᕈᑎᓄᑦ ᐊᑭᓕᐅᑎᐅᕙᒃᑐᓂᒃ, ᐅᓇ ᐱᓕᕆᓂᖅ 2 ᐅᔭᕋᒃᓯᐅᕐᕕᒃᒥᑦ ᐊᖏᒡᓕᒋᐊᕈᑎᐅᔪᒪᔪᖅ ᑲᔪᓯᓂᐊᕈᓂ.
• ᓄᓇᕗᒥᑦ ᓱᕈᓯᕐᓂ ᐊᒻᒪ ᐃᓅᓱᒃᑐᓂᒃ ᑭᒡᒐᖅᑐᐃᔨᑦ ᑎᑎᕋᕐᕕᖓ ᐅᖃᓪᓚᐅᕐᑐᑦ ᐅᑯᐊ ᓄᓇᕗᑦ ᒐᕙᒪᒃᑯᑦ ᐱᓕᕆᐊᕆᔪᒪᔭᖓᑦ ᒪᑐᒧᖓ ᐃᓱᒪᓕᕆᓂᕐᒧᑦ ᐱᔭᐅᔭᕆᐊᓕᖕᓂᒃ ᓄᓇᕗᒻᒥᐅᑦ ᐃᓅᓱᒃᑐᖏᓐᓄᑦ “ᐊᒃᓱᐊᓗᒃ ᓈᒻᒪᙱᓗᐊᕐᒪᑦ.” ᑭᒡᒐᖅᑐᐃᔨᐅᔪᖅ ᔭᐃᓐ ᐸᐃᑦᔅ ᐅᖃᓚᐅᕐᑐᖅ, “ᐱᓕᕆᓂᐅᔪᒪᔪᖅ ᐱᔾᔪᑎᒻᒪᕆᖕᓂᕐᒥᑦ ᐱᑕᖃᓚᐅᙱᒻᒪᑦ, ᐱᓇᓱᒍᒪᓂᖃᓗᐊᕋᓂ, ᐱᓕᕆᖃᑎᒌᖕᓂᖃᑦᑎᐊᕋᓂᒃ ᐊᒻᒪᓗ ᐱᔭᕆᐊᖃᓪᓚᕆᒃᑐᓂᒃ ᐃᓅᓱᒃᑐᑦ ᓄᓇᕗᒻᒥᐅᑦ ᐱᔭᕆᐊᖃᓪᓚᕆᒃᑕᖏᓐᓄᑦ,” ᐅᒃᑑᐱᕆᒥ, ᒪᐃᑦᔅ ᓄᓇᕗᒥᑦ ᒐᕙᒪᒃᑯᓐᓄᑦ ᐅᖃᒻᒪᕆᓚᐅᕐᑐᖅ ᑖᒃᑯᐊ ᐃᓕᓴᕐᓯᑦᑕᐃᓕᒪᓂᖏᓐᓂᒃ ᐃᓚᖏᑦ ᓱᕈᓰᑦ ᐱᑦᑎᐊᖅᑕᐅᖃᑦᑕᙱᓗᐊᕐᓂᖏᓐᓂᒃ, ᑕᐃᒪᓕ ᐅᖃᐅᓯᖓᒍᑦ ᐃᒪᓐᓇ ᑐᑭᖃᖅᑰᔨᓪᓗᓂ “ᑕᒪᒃᑯᐊ ᐱᑦᑎᐊᙱᓐᓂᐅᕙᒃᑐᓂᒃ ᖃᓄᐃᒋᔭᐅᙱᑐᐃᓐᓇᕐᓂᕋᖅᖢᓂᒋᑦ.”
• ᓇᐃᓴᐃᔨᒃᑯᑦ ᑲᓇᑕᒥ (Statistics Canada) ᑎᑎᕋᑕᐅᕙᓪᓕᐊᓯᒪᔪᓂ ᓴᖅᑭᑎᑦᑎᓚᐅᕐᑐᑦ ᐃᒪᐃᓕᖓᔪᓂᒃ, ᐱᒋᐊᕐᖢᓂ ᔫᓂ 28, 8,800 ᓄᓇᕗᒥᑦᑕ ᐱᑖᕐᓯᒪᓂᖏᓐᓂᒃ ᑲᓇᑕᒥ ᑐᐊᕕᕐᓇᖅᑐᓄᑦ ᐃᑲᔫᑎᒃᓴᓂᒃ (CERB). ᒪᐃ 19-ᒥᑦ ᑐᓴᒐᒃᓴᓕᐅᕐᓇᒃᑯᑦ, ᓯᕗᓕᐅᕐᑎ ᔫ ᓴᕕᑲᑖᖅ ᓄᓇᕗᒥᐅᓂᒃ ᐅᔾᔨᕈᓱᖁᔨᓚᐅᕐᓯᒪᔪᖅ ᐅᓇ ᑲᓇᑕᒥ ᑐᐊᕕᕐᓇᖅᑐᓄᑦ ᐃᑲᔫᑎᒃᓴᖅ “ᐊᑭᖃᙱᖢᓂ ᑮᓇᐅᔭᐅᙱᒻᒪᑦ” ᐊᒻᒪᓗ ᐃᓱᒪᒋᔭᐅᓂᐊᖅᖢᓂ ᐃᖅᑲᓇᐃᔮᒧᑦ ᑮᓇᐅᔭᓕᐊᕆᔭᐅᓯᒪᓂᖓᓂᒃ. ᓄᓇᕗᑦ ᑐᙵᕕᒃᑯᑦ ᐱᖁᔨᕗᖔᕈᑎᒥ ᐊᓂᒍᖅᑎᑦᑎᓚᐅᕐᑐᑦ ᐅᒃᑑᐱᕆ 21-ᒥᑦ ᐊᕐᕌᒍᓕᒫᓄᑦ ᑲᑎᒪᕕᒡᔪᐊᕐᓇᒥ, ᒐᕙᒪᑐᖃᒃᑯᓐᓂᒃ ᐱᖁᔨᓪᓗᑎᒃ ᐊᑭᓕᒃᓴᖅᑖᕆᔭᐅᔪᑦ ᐃᓄᖕᓄᑦ ᐆᒧᖓ ᑲᓇᑕᒥ ᑐᐊᕕᕐᓇᖅᑐᓄᑦ ᐃᑲᔫᑎᒃᓴᓂᒃ (CERB) ᐊᑭᓖᒋᐊᖃᖅᑎᑕᐅᙱᓪᓗᑎᒃ ᐃᓄᐃᑦ ᐱᔭᕆᐊᖃᙱᑎᓪᓗᒋᑦ ᐱᑖᖅᑐᕕᓃᑦ.
• ᓘᒃᑖᖅ ᒪᐃᑯᓪ ᐹᑐᓴ, ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᑐᓴᖅᑎᑦᑎᓚᐅᕐᑐᖅ ᔪᓚᐃ 13-ᒥᑦ ᐃᓄᐃᑦ ᐊᐅᓪᓚᑲᑕᖃᑦᑕᕐᑐᑦ ᐋᓐᓂᐊᕐᕕᓕᐊᙱᓪᓗᑎᒃ ᑰᔾᔪᐊᕌᓗᒃ, ᒫᓂᑑᐸᐅᓪᓗ ᓄᓇᕗᓪᓗ ᐊᑯᓐᓂᖓᓂᒃ ᐱᓇᓱᐊᕈᓰᖕᓂ ᒪᕐᕉᖕᓂᒃ ᐃᓄᑑᓐᓇᖅᑐᒦᑦᑕᕆᐊᖃᕈᓐᓃᕐᓂᖏᓐᓂᒃ. ᑕᒪᓐᓇ ᐱᕕᖃᕈᑎᐅᓕᕐᓂᐊᕐᑐᖅ ᐃᓄᐃᑦ ᓄᓇᖃᕐᑐᖅ ᐊᕐᕕᐊᓂ ᐊᒻᒪ ᑎᑭᕋᕐᔪᐊᕐᒥ ᑰᒡᔪᐊᕌᓗᖕᒧᙵᐅᔪᓐᓇᕐᓂᐊᓕᕐᓗᑎᒃ ᐱᖁᑎᓂᒃ ᐊᐃᒃᖠᕐᓗᑎᒃ ᓄᓇᓯᐅᑎᑯᑖᒃᑯᑦ ᑕᐃᑯᙵᖅᑕᐅᔪᓂᒃ.
• ᑲᓇᑕᒥ ᕗᑦᐹᓪᒥ ᐱᙳᐊᖅᑏᑦ (CFL) ᐱᒻᒪᕆᐅᓕᕐᑎᑦᑎᕗᖅ: ᑕᖅᑭᒐᓴᖕᓂᒃ ᐅᖃᖃᑎᖃᑲᑕᓚᐅᖅᖢᑎᒃ ᐊᒻᒪᓗ ᐃᓄᖕᓄᑦ ᐱᓕᕆᐅᖑᓯᒪᓂᕐᒧᑦ, ᑖᒃᑯᐊ ᐱᙳᐊᖅᑎᐅᔪᑦ ᐅᖃᓕᓚᐅᕐᑐᑦ ᔪᓚᐃᑦ 21-ᒥᑦ ᐊᑎᕐᒥᖕᓂ ᐊᓯᙳᖅᑎᑦᑎᓂᐊᕐᓂᕋᓕᖅᖢᑎᒃ. ᓄᑖᒥ ᐊᑎᕐᑖᓪᓚᕆᓚᐅᕐᑎᓐᓇᒋᑦ ᑖᒃᑯᐊ ᐱᙳᐊᕐᑎᐅᔪᑦ ᐊᑐᕐᓂᐊᕐᓂᕋᖅᕈᓕᒃ ᐆᒥᖓ EE Football Team ᐊᒻᒪ Edmonton Football Team.
• ᐋᒐᓯᒥ ᓂᕈᐊᕐᓇᐅᑎᓐᓇᒍ ᓂᕈᐊᕐᓇᐅᔫᒃ ᒪᕐᕉᖕᓄ ᑭᒡᒐᖅᑐᐃᕝᕖᖕᓄᑦ ᓄᓇᓄ ᓵᓚᒃᓴᕈᑎᐅᓚᐅᕐᑐᑦ ᐊᖏᖃᑎᒌᖕᓂᒃᑯᑦ ᔪᓚᐃ 24-ᒥᑦ. ᒍᕆᒡ ᐊᑕᖓᓛᖅ ᓯᒪᐃᓚᒃ ᖃᒪᓂᑦᑐᐊᕐᒧᑦ ᒪᓕᒐᓕᕆᔨᕐᔪᐊᓄᑦ ᐃᓚᒋᔭᐅᓕᓚᐅᕐᓯᒪᕗᖅ ᐃᓇᖏᕐᓯᓪᓗᓂ ᒪᓕᒐᓕᐅᕐᑎ ᓯᒥᐅᕐ ᒥᑭᙳᐊᕐᒥᓐ, ᑖᓐᓇ ᓄᖅᑲᓚᐅᕐᓂᖓᓄ ᐃᓚᖏᓐᓂ ᐱᔾᔪᑎᖃᖅᖢᓂ ᐅᑭᐅᖅ ᐱᒋᐊᕐᓯᒪᓕᕐᑎᓪᓗᒍ. ᖁᒡᓗᕐᑐᕐᒥᓪᓕ, ᑳᕕᓐ ᐊ. ᐲᑐᓴᓐ ᐃᓂᒧᐊᖅᑕᐅᓚᐅᕐᓯᒪᔪᖅ ᓄᓇᓕᖕᓄᑦ ᒪᓕᒐᓕᐅᕐᑎᐅᓂᐊᕐᓗᓂ. ᐃᓇᖏᕐᓯᓚᐅᕐᑐᖅ ᒦᓚ ᑲᒥᙳᐊᒃ, ᑖᓐᓇ ᓄᖅᑲᓚᐅᕐᓯᒪᖕᒪᑦ ᒪᓕᒐᓕᐅᕐᑎᐅᓂᕐᒥᓂᒃ ᐅᐱᕐᖔᖅ.
• ᓄᓇᕗᑦ ᒐᕙᒪᒃᑯ ᒪᑐᐃᕐᓯᓚᐅᕐᑐᑦ ᓄᑖᒥ ᐃᓅᑑᕝᕕᒃᓴᒥᑦ ᐅᐃᓂᐱᒡᒥᑦ ᔪᓚᐃ 27-ᒥᑦ ᐋᓐᓂᐊᕐᕕᓕᐊᕆᐊᕐᓯᒪᔪᓄᑦ. ᓯᕗᓂᐊᒍᓪᓕ, ᐋᓐᓂᐊᕐᕕᓕᐊᕐᓯᒪᔪᑦ ᐃᓄᑑᕝᕕᒃᓴᒥ ᐅᑕᖅᑭᔪᑦ ᐅᑕᖅᑭᖃᑦᑕᓚᐅᕐᒪᑕ ᐱᓇᓱᐊᕈᓯᑦ ᐱᖓᓱᑦ ᑎᑭᖢᒍ.
• ᔪᓚᐃ 29-ᓗ 31-ᓗ ᐊᑯᓐᓂᖓᓂᒃ, ᐆᒪ ᐅᒥᖕᒪᐃᑦ ᓄᓇᖓᑕ (Ellesmere Island) ᐅᐊᖕᓇᖓᑕ ᓯᒡᔭᖓᓃᑦᑐᖅ ᓯᑯᑐᖄᓗᒃ ᑕᐃᔭᐅᔪᖅ Milne Ice Shelf ᐅᑭᐅᖃᕐᓂᕋᖅᑕᐅᓪᓗᓂ 4,000-ᓂ, ᓇᑉᐸᓪᓗᐊᑲᓴᖓ ᓱᕋᓚᐅᕐᓯᒪᖕᒪ. ᑖᓐᓇ ᓱᕋᖕᓂᐅᔪᖅ ᓯᑰᓪᓗᓂ ᕿᑭᖅᑕᙳᖅᖢᓂ ᐊᖏᓂᖃᕐᖢᓂ 50-ᐳᓴᓐᑎᒥ ᐊᖏᓂᕐᓴᐅᓪᓗᓂ ᒫᓐᕼᐋᑕᓂᒥᑦ (Manhattan).

ᐋᒐᓯ

• ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒧᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᑐᓴᖅᑎᑦᑎᕗᖅ ᐋᒐᓯ 4-ᒥᑦ ᓄᓇᕗᒥᑦ ᒪᓕᒐᓕᐅᕐᑎᐅᔪᑦ ᐃᓄᑑᓐᓇᖅᑐᒦᒋᐊᖃᕈᓐᓃᕐᓂᖏᓐᓂᒃ ᒪᓕᒋᖁᔭᐅᓯᒪᔪᖅ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐱᒋᐊᓚᐅᕐᓯᒪᑎᓪᓗᒍ. ᓄᓇᕗᒧᑦ ᒪᓕᒐᓕᕆᕕᒡᔪᐊᕐᒥ ᑲᓇᑕᒧᑦ ᐃᓚᒋᔭᐅᔪᖅ, ᒪᒥᓛᖅ ᖃᖅᑲᖅ ᐊᒻᒪ ᓴᓂᑐ ᑕᓂᔅ ᐹᑐᓴᓐ ᐃᓅᑑᒋᐊᖃᕐᓂᕐᒧᑦ ᐃᓚᐅᑎᑕᐅᓚᐅᕐᓯᒪᙱᑦᑐᑦ.


ᐃᓕᓴᐱ ᓇᐅᑦᓚᒃ ᐃᖃᓗᒻᒥᐅᑕᖅ ᐆᒥᖓ ᐊᔾᔨᓕᐅᕐᓯᓚᐅᕐᑐᖅ ᐃᖃᓘᑉ ᓴᕐᐱᐅᔭᖓᓂ ᒪᑦᑎᑦᑕᐅᓂᓄ ᐃᖃᓗᒐᓱᓚᐅᕐᖢᓂ ᓄᖓᕈᑦᒥ, ᐃᖃᓗᐃᑦ ᐊᑭᑦᑎᐊᖓᓂ ᐋᒐᓯ 23-ᖑᑎᓪᓗᒍ. “ᓯᓚᑦᑎᐊᕚᓗᒃ,” ᐅᖃᖅᑐᖅ. (ᐊᔾᔨᓕᐅᕆᔨ ᐃᓕᓴᐱ ᓇᐅᑦᓚᒃ)

• ᐃᕐᓂᓱᒃᓰᓂᕐᒧᑦ ᐱᔨᑦᑎᕋᐅᑏᑦ ᓇᔾᔨᔪᓄᑦ ᑭᕙᓪᓕᕐᒥ “ᓄᖅᑲᖓᑎᑕᐅᓚᐅᑲᒃᐳᖅ” ᐱᔾᔪᑎᒋᔭᐅᓪᓗᓂ ᐃᖅᑲᓇᐃᔭᖅᑎᑕᖃᑲᑕᙱᓐᓂᕐᒧᑦ, ᓄᓇᕗᒥᑦ ᒐᕙᒪᒃᑯᑦ ᐅᖃᓚᐅᕐᑐᑦ. ᓄᓇᕗᒥᑦ ᒐᕙᒪᒃᑯ ᐅᖃᓚᐅᕐᑐᑦ ᑎᓯᐱᕆ 1-ᒥᑦ ᓄᑖᓂᒃ ᐃᕐᓂᓱᒃᓰᔨᒃᓴᓂᒃ ᐃᖅᑲᓇᐃᔭᖅᑎᑖᕆᐊᖃᕐᒪᑕ ᐊᒻᒪᓗ ᑲᔪᓯᓪᓗᑎᒃ ᐊᐅᓪᓚᖅᑎᑦᑎᑲᑕᒃᖢᑎᒃ ᐅᐃᓂᐱᒡᒧᑦ ᐃᓂᔭᕐᑐᖅᑐᓂᒃ.
• ᒪᐃᔭᐅᔪᑦ ᐊᒻᒪ ᐊᖑᓇᓱᒃᑎᐅᔪᑦ ᓄᓇᓕᖕᓂ ᐊᒃᑐᖅᑕᐅᓯᒪᔪᓂᒃ ᐹᕕᓐᓛᓐ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᐅᑉ ᑐᒃᓯᕋᐅᑎᖓᓂᒃ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᓄᓘᔮᖕᓂ ᐅᔭᕋᒃᓯᐅᕐᕕᖕᒥ ᒪᓕᒐᓕᕆᓂᕐᒧᑦ ᑲᑎᒪᔾᔪᑎᒃᓴᓂ ᓈᒻᒪᒃᓴᙱᓐᓂᕋᐃᕗᑦ ᑭᓯᐊᓂ ᐅᐸᒍᑎᓯᒪᓂᒃᑯᑦ ᑲᑎᒪᑲᑕᓕᕐᐸᑕ. “ᒫᓐᓇ ᐃᒪᐃᓕᖓᒐᑦᑕ ᑲᑎᒪᓇᓱᒃᑯᑦᑕ ᐅᐸᖃᑎᒌᒃᓯᒪᓂᒃᑯᑦ ᑲᑎᒪᔪᓐᓇᙱᑎᓪᓗᑕ, ᑕᒪᓐᓇ ᐱᓕᕆᕙᓪᓕᐊᓂᕐᒥᒃ ᓈᒻᒪᙱᓕᐅᕈᑎᐅᓇᔭᕐᒪᑦ ᐃᓄᖕᓂ ᐊᔾᔨᒌᒃᑎᑦᑎᒐᓱᖕᓂᒃᑯᑦ ᐱᓕᕆᐊᖃᕋᓱᖕᓂᒧᑦ ᐃᓚᒋᔭᐅᔪᓄᑦ ᐊᒻᒪᓗ ᓄᓇᖃᖅᑐᓄᑦ,” ᑎᑎᕋᖅᖢᑎ ᑕᐃᒪᓐᓇ ᑐᓂᓯᓚᐅᕐᑐᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.
• ᓄᓇᕗᒥᐅᑕᖅ ᐃᓐᓇᑐᖃᖅ ᒪᐃᓇ ᐃᓄᒃᑖᓗᒃ, 89, ᖁᕕᐊᓲᑎᒋᔭᐅᓚᐅᕐᑐᖅ ᓴᓂᑭᓗᐊᕐᒥ ᐊᕐᕌᒍᓂᒃ 45-ᓂ ᑲᑎᒪᔨᐅᓂᑰᓂᖓᓄᑦ ᕼᐋᒻᒪᓚᒃᑯᓐᓄᑦ. ᑲᑎᒪᔨᐅᓂᕐᒥ ᓄᖅᑲᕐᓂᐊᕋᓗᐊᕐᑎᓪᓗᒍ, ᐃᓄᒃᑖᓗᒃ ᓱᓕ ᑲᑎᒪᔨᓄᑦ ᖃᐅᔨᒋᐊᕐᕕᐅᖃᑦᑕᕐᓂᐊᕐᑐᖅ ᐱᔭᕆᐊᖃᕌᖓᑕ.
• ᓄᓇᕗᑦ ᓯᓚᑦᑐᖅᓴᕐᕕᒃ ᓯᕗᓪᓕᕐᐹᒥ ᐊᕐᕌᒍᒥ ᐃᓕᓐᓂᐊᕐᑐᒃᓴᓂᒃ ᐱᑲᑕᙱᑦᑐᑦ ᐅᑭᐅᒃᓵᖅ ᐃᓕᓐᓂᐊᕋᔭᕐᑐᓂᒃ ᖃᓄᐃᓕᐅᕈᓘᔭᕆᐊᖃᓚᐅᕐᓯᒪᓂᖏᓐᓄᑦ ᐅᐱᕐᖔᖅ ᒪᑐᒋᐊᖃᕐᑎᓪᓗᒋᑦ.
• ᐅᓇ ᑲᖏᖅᖠᓂᕐᒥᐅᑕ ᒌᐳᕆᐊᓪ ᖃᕐᓕᒃ ᑕᕐᕆᔭᒐᒃᓴᓂ ᑕᑯᔪᒪᐃᓐᓇᐅᔭᕋᓗᐊᖅᖢᓂ, ᒪᑯᓄᖓ ᓄᓇᓯᐅᑎᒃᑯ ᐅᐸᒃᓯᒪᑐᐃᓐᓇᓕᐊᓕᖕᓂ ᑕᕐᕆᔭᕐᕕᒃᓴᓂ ᐅᐸᒍᑎᓚᐅᕐᓯᒪᙱᑦᑐᖅ ᑭᓯᐊᓂ ᓇᖕᒥᓂᖅ ᐋᖅᑭᒃᓱᐃᒐᒥ ᑕᐃᒪᐃᑦᑐᒥ ᐊᐅᔭᖅ. ᑕᕐᕆᔭᒐᒃᓴᐅᓚᐅᕐᓯᒪᔪᕐᓕ ᐋᒐᓯ 14-ᒥᑦ ᐅᓇ 1968-ᒥᑦ ᐋᖅᑭᒃᓱᖅᑕᐅᓂᑯᕕᓂᒃ ᑲᓇᑕᒥ ᑕᕐᕆᔭᒐᒃᓴᓕᐅᕐᑎᓄᑦ National Film Board of Canada, ᒪᕐᕈᐃᓕᖓᓪᓗᓂ ᐅᓂᒃᑳᖃᕐᑐᒥᓐ “Stalking Seal on the Spring Ice” (ᓇᑦᑎᕋᓱᖕᓂᖅ ᐅᐱᖕᖔᒃᑯᑦ ᓯᑯᒥ).
• ᓯᕗᓪᓕᖅᐹᑦᑎᐊᒥᓐ, ᐸᖕᓕᑐᓂ ᐊᐅᔭᒃᑯᑦ ᖃᓕᕋᓕᒃᓂᑦ ᐃᖃᓗᑲᑕᓚᐅᕐᓯᒪᔪᑦ, ᑕᐃᔭᐅᕙᒃᑐᑦ Greenland halibut. ᓯᕗᓂᐊᓂᓪᓕ, ᐸᖕᓂᕐᒥ ᐃᖃᓗᓕᕆᕝᕕᒃ ᑭᓯᐊᓂ ᐅᑭᐅᕐᑯᑦ ᐱᔭᐅᔪᓂᒃ ᓄᓇᖃᖅᑐᓂᒃ ᐊᑐᖅᖢᑎᒃ ᓇᓗᐊᕐᓂᒃ ᐊᒻᒪ ᑕᑭᔪᓂᒃ ᐊᒃᖢᓈᓂ ᓯᑰ ᐊᑖᒎᕐᑐᓄᑦ.
• ᐃᐅᕆ ᓛᓗ ᓂᕈᐊᖅᑕᐅᕗᖅ ᒪᐃᔭᐅᓂᐊᓕᕐᓗᓂ ᐸᖕᓂᕐᑑᒥ ᐋᒐᓯ 24-ᖑᑎᓪᓗᒍ, ᑕᒪᐅᓇᒥᐊᖅ ᓂᕈᐊᒐᒃᓴᖃᖅᑎᓪᓗᒋ ᐅᓇ ᒪᐃᔭᐅᓚᐅᕐᑐᖅ ᐃᓅᔪᓐᓃᕐᑎᓪᓗᒍ, ᐃᔭᑭᐊ ᐅᓱᒃᑖᐱᒃ, ᐄᐳᕈᒥᑦ.

ᓯᑎᐱᕆ

• ᓄᓇᕗᒥᑦ ᒐᕙᒪᒃᑯᑦ ᐱᖁᔨᓕᓚᐅᕐᑐᑦ ᕿᑎᕐᒥᐅᑦ ᐊᖑᓇᓱᖃᑦᑕᕐᓂᖏᓐᓂᒃ ᓄᖅᑲᖅᑎᑦᑎᕚᓪᓕᕈᒪᓪᓗᑎᒃ ᐅᑯᓂᖓ ᑖᓪᕕᓐ ᐊᒻᒪ ᔫᓂᐊᓐ ᑐᒃᑐᓂᒃ ᐃᒪᓐᓇ ᐊᑐᕐᑕᐅᓚᐅᑲᖕᓂᐊᕐᑐᒥᓐ ᑐᒃᑐᒍᓐᓇᖅᑎᑕᐅᓪᓗᑎᒃ 42-ᓂᒃ ᐱᔾᔪᑎᒋᔭᐅᓪᓗᓂ ᓄᓇᕗᒥᑦ ᒐᕙᒪᒃᑯᓐᓄᑦ ᑕᐃᔭᖓᓂ “ᖃᖓᑦᑎᐊᓵᖅ ᐅᓄᕈᓐᓃᕐᐹᓪᓕᓚᐅᕐᓂᖏᓐᓂᒃ ᑖᒃᑯᐊ ᑐᒃᑐᐃᑦ.”
• ᐊᕐᕌᒍᑦ 60 ᐅᖓᑖᓂ ᐊᓂᒍᖅᑎᓪᓗᒋᑦ ᐃᓚᖏᑦ ᑭᕙᓪᓕᕐᒥᐅᑕᑦ ᐃᓄᐃᑦ, ᐊᕼᐃᐊᕐᒥᐅᑦ, ᓅᑖᐅᓚᐅᕐᓯᒪᖕᒪᑕ ᑕᓯᐅᔭᕐᔪᐊᑉ ᐱᖓᖕᓇᖓᑕ ᓯᒡᔭᖓᓄᑦ, ᐃᓕᓴᕆᔭᐅᓯᒪᔾᔪᑎᓯ ᐃᓕᓯᔪᖃᓚᐅᕐᐳᖅ ᐅᓂᒃᑳᕆᓚᐅᕐᑕᖓᓄᑦ. ᐅᓇ ᐃᓕᓴᕆᔭᐅᔾᔪᑎ ᐋᖅᑭᒃᑕᐅᓯᒪᔪᖅ ᐊᕐᕕᐊᓂᑦ ᐸᓖᓯᒃᑯᑦ ᓴᓂᑦᑎᐊᖓᓂᒃ, ᓵᙵᓪᓗᓂ ᓯᒡᔭᒧᑦ ᑖᒃᑯᐊ ᐊᕼᐃᐊᕐᒥᐅᑦ ᓄᓇᒧᑦ ᑎᑭᕝᕕᒋᓚᐅᕐᓯᒪᔭᖓᓄᑦ ᕕᕝᕗᐊᕆ 1958-ᖑᑎᓪᓗᒍ.


ᓵᓕ ᐊᐅᓪᓚᑭᐊᒃ, ᓄᓇᕗᒥᑦ ᒪᓕᒐᓕᕆᕕᒡᔪᐊᒧᑦ ᐱᓕᕆᔨᐅᖃᑕᐅᔪᖅ (sergeant-at-arms), ᐊᒡᓗᔭᕐᓯᕗᖅ ᓄᓇᕗᒧᑦ ᓇᓗᓇᐃᒃᑯᑎᒥ ᑲᑎᒪᓂᖅ ᐱᒋᐊᕐᓂᐊᓕᕐᑎᓪᓗᒍ ᐊᑐᖃᑦᑕᐃᓐᓇᙱᑕᖓᒍ ᓯᑎᐱᕆ 21-ᒥᑦ. ᓯᕗᓪᓕᖅᐹᒥᑦ ᒪᓕᒐᓕᕆᔨᕐᔪᐊᑦ ᑲᑎᒪᖃᑎᒌᒃᑐᑦ ᑕᐃᒪᙵ ᒫᔅᓯ 12-ᒥᑦ ᐅᑭᐅᕐᒧᑦ ᑲᑎᒫᓂᒃᑎᓪᓗᒋᑦ. ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐅᐱᕐᖔᒥ ᑲᑎᒪᓂᒃᓴᒥ ᓄᖅᑲᕈᑎᐅᓕᓚᐅᕐᑐᖅ. ᐅᖓᓯᒌᑲᑕᒋᐊᖃᕐᓂᖅ ᒪᓕᒃᑕᐅᑎᓪᓗᒋ, ᐃᓚᖏᑦ ᑲᑎᒪᕕᒡᔪᐊᕐᓇᒥ ᐆᑐᓇᖅ ᐊᐅᓪᓚᑭᐊᕐᑎᑐᑦ, ᑮᓇᑉᐸᒃᓯᒪᓚᐅᕐᑐᑦ. (ᐊᔾᔨᓕᐅᕆᔨ ᑕᔅᑎᓐ ᐸᑖ)

• ᐃᖅᑲᓇᐃᔭᖅᑎᐅᔪᑦ ᓴᓂᑭᓗᐊᕐᒥ ᐃᖅᑲᓇᐃᔭᕐᕕᒋᓂᐊᖅᑕᖓᓂ ᕿᓂᕆᐊᖃᓕᓚᐅᕐᑐᑦ ᐊᓄᕌᕐᔪᐊᖅᑐᒧᑦ ᒫᓂ 98 ᑭᓛᒥᑕ/ᐃᑲᕐᕋᒥ ᐊᓄᕆᒧᑦ ᑎᑎᕋᕐᕕᖓ ᐃᒪᖃᓗᐊᓕᓚᐅᕐᓯᒪᖕᒪᑦ ᓯᑎᐱᕆ 1-ᖑᑎᓪᓗᒍ.
• ᐅᖅᓱᖅᑑᕐᒥᐅᑕ ᐃᐊᓕ ᑐᖏᓕᒃ ᓄᓇᕗᒥᑦ ᓯᕗᓪᓕᖅᐹᖑᓚᐅᕐᑐᖅ ᓵᓚᒃᓴᖅᖢᓂ ᐅᑯᐊ BMO ᑎᑎᕋᐅᔭᒐᕐᓂ ᐱᒡᒍᓴᐅᑎᑎᓪᓗᒋᑦ. ᑐᖏᓕᒃ, 27, ᓵᓚᒃᓴᐅᓯᐊᓚᐅᕐᑐᖅ ᖁᖓᓯᕈᕐᒥᐅᑕᓕᐊᖓᓄᑦ, ᑕᐃᔭᐅᔪᖅ “ᓂᕆᐅᖕᓂᕐᒥ ᓇᓂᓯᓂᖅ.” ᐱᒡᒍᓴᐅᑎᑦᑎᓂᖅ ᓴᖅᑭᑎᑦᑎᒍᑎᐅᓚᐅᕐᑐᖅ 12-ᓂᙶᖅᑐᓂᒃ ᓄᓇᓂ ᑲᓇᑕᒦᑦᑐᓂᒃ ᓵᓚᒃᓴᐅᓯᐊᖅᑖᖅᖢᑎᒃ ᑮᓇᐅᔭᓂᒃ ᒫᓂ $7,500, ᐊᒻᒪ ᐊᑕᐅᓯ $15,000 ᐱᓂᐊᖅᖢᓂ ᑲᓇᑕᓕᒫᒥᑦ ᓵᓚᒃᓴᖅᑐᖅ.
• ᓄᑕᐅᙱᑦᑐᖅ ᐅᔭᕋᖕᒥ ᓴᓇᓯᒪᔪᖅ ᑐᒃᓯᐊᕐᕕᕕᓂᖅ ᐅᕙᓂ ᑰᒑᕈᒃᒥ ᓱᕋᒃᑎᖅᑕᐅᓚᐅᕐᑐᖅ ᓯᑎᐱᕆ ᐱᒋᐊᓯᒪᓕᕐᑎᓪᓗᒍ, ᓲᖃᐃᒻᒪ ᓱᕋᒃᐸᓪᓕᐊᓕᓚᐅᕐᒪ ᐊᒻᒪ ᖁᐊᕐᓵᕐᓇᕐᓂᕋᖅᑕᐅᓪᓗᓂ. ᐱᓕᕆᔪᑦ ᐲᔭᐃᓚᐅᕐᑐᑦ ᓯᕙᓂᕈᑎᐊᓂᒃ ᐊᒻᒪ ᓴᓐᓂᖓᔪᖓᓂᒃ ᑐᒃᓯᐊᕐᕕᐅᑉ ᖄᖓᓃᑦᑐᓂᒃ, ᑖᓐᓇᓗ ᑐᒃᓯᐊᕐᕕᒃ ᓴᓇᔭᐅᓂᑰᓪᓗᓂ 1940-ᒥᑦ, ᑕᐃᒪᓕ ᑖᒃᑯᐊ ᐱᖁᑎᑦ, ᐃᓚᖃᖅᖢᑎᒃ ᐅᔭᕋᖕᓂ ᑐᒃᓯᐊᕐᕕᖕᒥ ᐊᑐᖅᑕᐅᔪᕕᓂᕐᓂᒃ ᐱᓯᒪᐃᓐᓇᓚᐅᕐᑐᑦ.
• ᐹᕕᓐᓛᓐ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᒃ ᑐᓴᖅᑎᑦᑎᕗᑦ ᓯᑎᐱᕆ 17-ᒥᑦ ᐃᖅᑲᓇᐃᔭᖅᑎᐅᔪᖅ ᓄᓘᔮᖕᓂ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᕋᓱᒋᔭᐅᓪᓗᓂ, ᖃᐅᔨᓴᖅᑕᐅᓚᐅᑎᓪᓗᒍ ᐅᔭᕋᒃᓯᐅᕐᕕᐅᑉ ᖃᐅᔨᓴᕐᕕᖓᓂ. ᑖᓐᓇ ᐋᓐᓂᐊᖃᕋᓱᒋᔭᐅᔪᖅ ᑕᐃᒪᐃᓐᓂᕋᖅᑕᐅᒻᒪᕆᓚᐅᕐᐳᖅ. ᓯᑎᐱᕆ 19-ᒥᑦ, ᓄᓇᕗᒥᐅᑕᑦ ᖃᐅᔨᓕᓚᐅᕐᒥᔪᑦ ᒪᕐᕉᖕᓂ ᐅᔭᕋᒃᓯᐅᕐᕕᖕᒥᑦ TMAC ᐊᑐᒃᑲᓐᓂᕈᓐᓇᖅᑐᓕᕆᔨᒃᑯᑦ ᕼᐆᑉ ᐸᐃᒥ ᐅᔭᕋᒃᓯᐅᕐᕕᖓᓂ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᕐᓂᕋᖅᑕᐅᓕᓚᐅᕆᕗᑦ. ᑭᖑᓪᓕᐅᔪᓪᓕ ᐋᓐᓂᐊᕐᓂᕋᖅᑕᐅᔪᑦ ᐅᔭᕋᒃᓯᐅᕐᕕᖕᒦᑦᑐᑦ, ᓴᓇᔨᓂᙶᕋᓱᒋᔭᐅᓪᓗᓂ ᖃᓪᓗᓈᓂᙶᖅᑐᓂᒃ ᓴᓇᔨᓂᒃ, ᑭᓯᐊᓂᓕ ᑕᒪᓐᓇ ᓄᓇᓕᖕᓄᑦ ᐊᐃᑦᑑᑎᐅᓚᐅᙱᑦᑐᖅ.
• ᔫ ᓴᕕᑲᑖᖅ, ᓄᓇᕗᒧᑦ ᓯᕗᓕᐅᕐᑎ ᐊᒻᒪ ᐊᕙᑎᓕᕆᓂᕐᒧᑦ ᒥᓂᔅᑕ, ᐅᖃᓚᐅᕐᑐᖅ ᒪᓕᒐᓕᕆᕕᒡᔪᐊᒥᑦ ᓯᑎᐱᕆ 23-ᒥᑦ “ᖁᕕᐊᓱᖕᓂᕋᖅᖢᓂ ᐅᑯᐊ ᐃᑦᓱᐊᖅᑐᖅᕕᒃ ᐊᒻᒪ ᖃᒡᒋᐊᔭᖅᒥ ᓇᓄᐃᑦ ᑕᐅᕗᙵᖅᐸᒃᑐ ᖃᓄᐃᙱᑦᑐᐊᕐᓂᕋᖅᖢᓂᒋᑦ.” ᐅᓇ ᒪᓕᒃᓯᒪᓪᓗᓂ ᖃᐅᔨᓴᕈᑎᕕᓂᕐᓂᒃ ᑭᖑᓪᓕᖅᐹᓂ ᑕᒫᓃᑦᑐᓂᒃ ᓇᓄᕐᓂ, ᐅᖃᖃᑎᖃᑲᑕᖕᓂᕐᓗ ᐊᖑᓇᓱᒃᑐᓕᕆᔨᓂᒃ ᐅᓄᕐᓯᕚᓪᓕᕈᑎᐅᑐᐃᓐᓇᕆᐊᓕᒃ ᓇᓐᓄᒃᑕᐅᔪᓐᓇᖅᑐᓂᒃ.
• ᐹᓪ ᖁᐊᓴ, ᐅᖃᖅᑎ ᒪᓕᒐᓕᕆᕕᒡᔪᐊᒥ, ᑐᓴᖅᑎᑦᑎᓚᐅᕐᑐᖅ ᑭᖑᓪᓕᖅ ᑐᓂᔭᐅᔪᖅ ᐆᒥᖓ Order of Nunavut ᐅᓇᐅᓂᐊᕐᓂᕋᖅᖢᓂᐅᒃ ᖃᒪᓂᑦᑐᐊᕐᒥ ᓇᖕᒥᓂᖅ ᐱᓕᕆᐊᖃᖅᑎ ᐲᑕ ᑕᐸᑕᐃ.

ᐅᒃᑑᐱᕆ

• ᐅᒃᑑᐱᕆ 1-ᒥᑦ ᐊᒡᓃᑯ ᐄᒍᓪ ᐅᔭᕋᒃᓯᐅᕐᕕᒃ ᓕᒥᑎᑦ ᐅᖃᓚᐅᕐᑐᑦ ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕆᔭᐅᓕᕐᓂᖓᓂᒃ ᒥᓕᐊᑏᓐ ᒎᓗᒧ ᐅᔭᕋᒃᓯᐅᕐᕕᒃᒥᓐ ᑲᖏᖅᖠᓂᐅᑉ ᖃᓂᒋᔭᖓᓂᒃ. ᐅᓇ ᓯᕗᓪᓕᕐᐹᖑᓚᐅᕐᑐᖅ ᑖᒃᑯᐊ ᑲᒻᐸᓂᐅᔪᑦ ᐅᔭᕋᒃᓯᐅᕐᕕᖓᓂᒃ ᓄᓇᕗᒦᑦᑐᒥ.
• ᓄᓇᕗᒻᒥᐅᑕᑦ ᑐᙵᓇᕐᑐᒥ ᑐᓴᓚᐅᕐᑐᑦ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᑭᒃᑯᓕᒫᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᐅᕈᑎᐅᑎᑕᐅᔪᑦ ᒪᑯᓄᖓ ᐊᒃᑐᐊᔪᑦ ᐱᙳᐊᕈᑎᓕᕆᓂᕐᒧᑦ, ᕿᑲᕐᕕᓕᕆᓂᕐᒧᑦ ᐊᒻᒪᓗ ᓄᓇᓖᑦ ᑲᑎᖃᑎᒌᒍᓐᓇᕐᓂᓴᐅᓕᕐᑎᓪᓗᒋᑦ ᐅᒃᑑᐱᕆ 5-ᒥᑦ. ᒫᔅᓯᐅᓚᐅᕐᓯᒪᔪᒥ ᓄᖅᑲᖅᑎᑕᐅᓚᐅᕐᑎᓪᓗᒋᑦ, ᓄᓇᕗᒥᐅᑕᑦ ᐅᐸᒍᑎᔪᓐᓇᕐᓯᔪᑦ ᐃᖃᐃᓕᓴᕐᕕᖕᓂᒃ, ᑐᒃᓯᐊᕐᕕᖕᓂᒃ ᐅᕝᕙᓘᓐᓃᑦ ᑲᑎᒪᓂᕐᓂᒃ.


ᐊᑎᕐᑕᓛᑦ ᐃᖕᒥᖕᓂ ᐅᓇᑕᑲᑕᒃᐳᑦ ᐊᓈᓇᖓ ᑕᖃᐃᕐᓯᕐᓂᖓᓂᒃ ᒥᑦᑕᕐᕕᒃᒥᑦ ᐊᕐᕕᐊᑦ ᒥᑦᑕᕐᕕᐊᓂᒃ ᐅᒃᑑᐱᕆ 29-ᒥᑦ. (ᐊᔾᔨᓕᐅᕆᔨ ᒍᐊᑎ ᑭᓪᓛᐱᒃ)

• ᓄᓇᕗᒧᑦ ᓯᕗᓕᐅᕐᑎ ᔫ ᓴᕕᑲᑖᖅ ᐊᐃᕕᓕᒃᒧᑦ ᒪᓕᒐᓕᐅᕐᑎ ᐸᑎᕐ ᓇᑦᓯᐅᑉ ᒪᓕᒐᓕᕆᔨᐅᓪᓗᓂ ᐱᓕᕆᐊᒃᓴᖏᓐᓂᒃ ᐱᖃᕈᓐᓃᖅᑎᑦᑎᓚᐅᕐᑐᖅ ᑖᓐᓇ ᓇᑦᓯ ᕙᐅᔅᐳᒃᑯᑦ “ᓈᒻᒪᙱᓗᐊᕐᑐᒥᑦ” ᑎᑎᕋᐅᓯᖃᖅᑎᓪᓗᒍ ᒪᑐᒥᖓ ᓇᔾᔨᐊᖑᔪᓂᒃ ᐲᕐᑕᐅᑎᑦᑎᕙᒃᑐᓂᒃ ᐊᒻᒪᓗ ᕿᕐᓂᖅᑕᐃᑦ ᐃᓅᓯᖏᑦ ᐱᒻᒪᕆᐅᔪᑦ ᖃᓄᐃᓕᐅᕈᑎᖏᓐᓂᒃ. ᑭᖑᓂᐊᒍᓪᓕ ᑲᑎᒪᓕᕐᑎᓪᓗᒋᑦ, ᐅᒃᑑᐱᕆ 23-ᒥ, ᒪᓕᒐᓕᐅᕐᑎᑦ ᓂᕈᐊᓕᓚᐅᕐᑐᑦ ᓇᑦᓯᕐ ᒥᓂᔅᑕᐅᓂᕐᒧᑦ ᐲᕐᑕᐅᖁᔭᐅᓪᓗᓂ.
• ᐊᖑᓇᓱᒃᑎᓂᒃ ᑎᓴᒪᓕᒃᑰᖅᑐᓂ ᓇᓂᓯᔪᖃᓚᐅᕐᑐᖅ ᑎᓴᒪᓂ ᑐᖁᖓᔪᓂᒃ ᐊᕐᕕᖕᓂᒃ ᓄᓈᕐᓯᒪᔪᓂᒃ ᒫᓂ 60 ᑭᓛᒥᑕᔅ ᑰᒑᕉᑉ ᐅᐊᖕᓇᖓᓂᒃ. ᒪᑯᓄᖓ ᐋᕐᓗᒃᓄᑦ ᑕᐃᒪᐃᑎᑕᐅᓇᓱᒋᔭᐅᔪᑦ, ᐅᑯᐊ ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔩᑦ ᑲᓇᑕᒥ ᖃᐅᔨᓴᖅᑎᖓ ᐊᒻᒪ ᐋᕐᖢᒃᓂᑦ ᖃᐅᔨᓴᖅᑎ ᓯᑏᕝ ᐴᒍᓴᓐ ᐃᓱᒪᓚᐅᕐᑐᖅ ᑕᐃᒪᓐᓇ.
• ᒪᓚᐃᔭ ᓘᑲᓯ ᓄᖅᑲᓕᓚᐅᕐᑐᖅ ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔨᐅᓂᕐᒥᒃ, ᑲᑎᒪᔨᐅᖃᑎᖏᑦ ᑲᑎᖢᑎᒃ ᓄᖅᑲᖁᔨᓚᐅᕐᑎᓪᓗᒋᑦ ᑲᑎᒪᔨᐅᓂᕐᒧᑦ ᒪᓕᒋᐊᓕᖕᓂᒃ ᓱᕋᐃᓂᖓᓄᑦ. ᓘᑲᓯ ᐃᑲᔪᖅᑐᐃᓯᒪᓚᐅᕐᒪᑦ ᐊᑖᑕᖓᑕ, ᐊᐃᕕᓕᒃᒧᑦ ᒪᓕᒐᓕᐅᕐᑎ ᐸᑎᖅ ᓇᑦᓯᕐ, ᐅᖃᐅᓯᕆᓚᐅᕐᑕᖏᓐᓂᒃ ᑐᓴᐅᒪᔾᔪᑎᓕᕆᓂᒃᑯᑦ ᓇᔾᔨᐊᕆᔭᐅᔪᑦ ᐲᖅᑕᐅᕙᒃᓂᖏᓐᓂᒃ ᐊᒻᒪ ᕿᕐᓂᖅᑕᐃᑦ ᐃᓅᓯᖏᑦ ᐱᒻᒪᕆᐅᓂᖏᓐᓄᑦ ᖃᓄᐃᓕᐅᕈᑎᓂᒃ.
• ᒐᕙᒪᑐᖃᒃᑯᑦ ᒪᓕᒐᓕᕆᔨᕐᔪᐊᖏᑦ ᐱᖁᔨᔪᑦ ᑲᓇᑕᒥ ᓇᐅᑦᑎᖅᓱᖅᑎᓄᑦ ᕿᒥᕐᕈᐊᖁᔨᓪᓗᑎᒃ ᑐᒃᓯᕋᐅᑎᒃᑯ ᓂᐅᕕᐊᒃᓴᕆᔭᐅᔪᒥᒃ ᐆᒥᖓ TMAC ᐊᑐᒃᑲᓐᓂᕈᓐᓇᖅᑐᓕᕆᔨᒃᑯᓐᓂᒃ, ᑖᒃᑯᐊ ᓇᖕᒥᓂᖃᖅᑎᐅᔪᑦ ᕼᐆᑉ ᐸᐃᒥ ᒎᓗᒧᑦ ᐅᔭᕋᒃᓯᐅᕐᕕᒃᒥᑦ ᓄᓇᕗᑦ ᐱᖓᖕᓇᖓᓂᒃ, ᐅᑯᓄᖓ ᓴᐃᓃᓯᓄᑦ ᓇᖕᒥᓂᕆᔭᐅᔪᒧᑦ Shandong Mining Co. Ltd.-ᑯᓐᓂᒃ.
• ᒪᒥᓛᖅ ᖃᖅᑲᖅ, ᓂᐅ ᑎᒧᑯᕌᑎᒃ ᐹᑎᓄᑦ ᒪᓕᒐᓕᐅᕐᑎ ᓄᓇᕗᒧᑦ, ᑐᓴᖅᑎᑦᑎᔪᖅ ᐅᒃᑑᐱᕆ 23-ᒥ ᕿᑲᕐᓂᐊᕐᓂᕋᖅᖢᓂ ᒫᓂ ᐱᓇᓱᐊᕈᓯᕐᓂᒃ 8-ᓂᒃ. ᐅᖃᓪᓚᒃᑎᓪᓗᒍ, ᖃᖅᑲᖅ ᐅᖃᓚᐅᕐᑐᖅ ᐊᒃᓱᕈᑲᑕᒃᓯᒪᓂᕐᒥᓂᒃ “ᐃᒻᒥᓅᖓᔪᓂᒃ ᐋᓐᓂᐊᕐᓂᒨᖓᔪᓂᒃ.”
• ᒫᒍᕆᑦ ᓇᑲᓱᒃ ᒪᓕᒐᓕᐅᕐᑎ ᐸᖕᓂᕐᑑᒧᑦ, ᓂᕈᐊᕆᔭᐅᓚᐅᕐᑐᖅ ᐃᓚᒋᔭᐅᓕᕐᓂᐊᕐᓗᓂ ᒥᓂᔅᑕᖃᕐᕕᖕᒧᑦ ᓯᕗᓕᐅᕐᑏᑦ ᑲᑎᒪᓂᖃᖅᑎᓪᓗᒋᑦ ᒪᓕᒐᓕᕆᕕᒡᔪᐊᒥᑦ ᐅᒃᑑᐱᕆ 30-ᒥᑦ, ᐅᓇ ᐲᕐᑕᐅᓚᐅᕐᑎᓪᓗᒍ ᐸᑎᖅ ᓇᔅᓯᕐ, ᒪᓕᒐᓕᐅᕐᑎ ᐊᐃᕕᓕᒃᒧᑦ. ᓇᑲᓱᒃ ᑎᒃᑯᐊᕐᑕᐅᓕᓚᐅᕐᑐᖅ ᐃᓕᖅᑯᓯᓕᕆᔨᒃᑯᓐᓄᑦ ᒥᓂᔅᑕᐅᓂᐊᕐᓗᓂ, ᐊᒻᒪᓗ ᒥᓂᔅᑕᐅᓂᒃᑯᑦ ᑲᒪᒋᔭᖃᕐᓗᓂ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓄᑦ.

ᓄᕕᐱᕆ

• ᐱᖁᔭᖅ 25, ᒪᓕᒐᖅ ᐋᖅᑭᒋᐊᖅᑎᑦᑎᒍᑎ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᕐᒥᒃ ᐊᒻᒪᓗ ᐃᓄᐃᑦ ᐅᖃᐅᓯᖏᓐᓂᒃ ᓴᐳᔾᔨᓯᒪᓂᕐᒧᑦ ᒪᓕᒐᕐᒥᒃ, ᐊᓂᒍᖅᑎᑕᐅᓚᐅᕐᑐᖅ ᑕᒪᐃᓐᓄᑦ ᐊᖏᖅᑕᐅᓂᒃᑯᑦ ᐱᖓᔪᖓᓂᒃ ᐅᖃᓕᒫᖅᑕᐅᓚᐅᖅᖢᓂ ᒪᓕᒐᓕᕆᕕᒡᔪᐊᒥᑦ ᓄᕕᐱᕆ 5-ᖑᑎᓪᓗᒍ. ᐋᖅᑭᒃᓯᓯᒪᔪᖅ ᖃᓄᐃᓕᐅᕈᑎᒃᓴᓂᒃ ᑎᑭᐅᑎᕙᓪᓕᐊᔪᓂᒃ ᐃᓄᒃᑐᑦ ᐊᑐᖅᑕᐅᔪᓐᓇᓕᕐᓂᐊᕐᓂᖓᓂᒃ ᐃᓕᓐᓂᐊᖅᑎᑦᑎᒍᑎᐅᓗᓂ ᑕᒪᐃᓐᓄᑦ ᒍᕇᓄᑦ ᐅᓇ 2039 ᑎᑭᑉᐸᑦ. ᐅᓪᓗᖅ ᓯᕗᓂᐊᓂ ᒪᓕᒐᓕᕆᔨᕐᔪᐊᑦ ᐊᓂᒍᐃᑎᑦᑎᓚᐅᙱᓐᓂᖏᓐᓂᒃ ᐱᖁᔭᖅ 25-ᒥᑦ, ᓄᓇᕗᑦ ᑐᙵᕕᒃᑯᑦ ᒪᓕᒐᓕᐅᕐᑎᓄᑦ ᐅᖃᖃᑎᖃᓚᐅᕐᑐᑦ ᑖᓐᓇ ᐱᖁᔭᖅ ᐊᓂᒍᖅᑎᑕᐅᖁᔭᐅᓇᓂ ᒪᓕᒐᓕᐅᕐᑎᓄᑦ.
• ᓄᓇᕗᒥᑦ ᓯᕗᓪᓕᕐᐹᒥᒃ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᕐᓂᕋᐃᓚᐅᕐᐳᑦ ᓄᕕᐱᕆ 6-ᖑᑎᓪᓗᒍ. ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᖃᓚᐅᕐᑐᖅ ᓴᓂᑭᓗᐊᕐᒥᐅᑕᓂᒃ ᐊᖏᕐᕋᖅᓯᒪᖁᔨᓪᓗᓂ ᐊᒻᒪᓗ ᐊᓯᖏᓐᓂᒃ ᐊᒃᑐᐃᑲᑕᖁᔨᙱᖢᓂ ᐃᒡᓗᖃᑎᒋᙱᑕᖏᓐᓂᒃ. ᐊᐃᑉᐸᖓᓂᒃ ᐋᓐᓂᐊᖃᕐᓂᕋᐃᓕᓚᐅᕐᒥᔪᖅ ᑕᕝᕙᓂᑦᑕᐃᓐᓇᖅ ᐃᒡᓗᖃᖃᑕᐅᔪᒥᑦ ᐅᓪᓘᒃ ᒪᕐᕉᒃ ᐊᓂᒍᕐᑎᓪᓗᒍ.
• ᑲᖏᖅᖠᓂᕐᒥᑦ ᑭᓱᓕᒫᑦ ᒪᑐᔭᐅᓯᒪᓕᓚᐅᕐᑐᑦ ᓄᕕᐱᕆ 11-ᒥᑦ ᓄᕙᒡᔪᐊᕐᓇᖅ-19-ᒥ ᐋᓐᓂᐊᖅᑖᖅᑐᖃᖅᑎᓪᓗᒍ ᑕᕝᕙᓂ ᓄᓇᓕᖕᓂᒃ — ᐱᖓᔪᒋᔭᐅᓪᓗᓂ ᓄᓇᕗᒥᑦ ᐱᓇᓱᐊᕈᓯᐅᙱᑦᑐᒥᓪᓘᓐᓃᑦ.
• ᓄᓇᕗᒥᑦ ᑎᓴᒪᒋᔭᐅᔪᖅ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᖅ ᓇᓗᓇᐃᕐᑕᐅᓚᐅᕐᐳᖅ ᐊᕐᕕᐊᓂᒃ ᓄᕕᐱᕆ 13-ᖑᑎᓪᓗᒍ ᑖᓐᓇᓗ ᒪᕐᕉᖕᓂ ᐱᓇᓱᐊᕈᓰᖕᓂ ᐃᓄᑑᓐᓇᖅᑐᒦᓚᐅᕐᖢᓂ ᐅᐃᓂᐱᒡᒥᑦ. ᐋᓐᓂᐊᖃᕐᓂᕋᖅᑕᐅᔪᑦ ᐅᓄᕐᓯᕙᓪᓕᐊᓕᓚᐅᕐᐳᑦ ᑎᓴᒪᓂᒃ ᓄᑖᓂ ᐅᖃᐅᓯᖃᕐᑎᓪᓗᒋᑦ ᖃᐅᒃᐸᙳᖅᑎᓪᓗᒍ ᐊᒻᒪᓗ ᑕᒪᓐᓇ ᓄᓇᓕᖕᓄᑦ ᐊᐃᑦᑑᑎᐅᓇᓱᒋᔭᐅᓪᓗᓂ.
• ᐃᓕᓴᕆᔭᐅᓯᒪᒻᒪᕆᒃᓯᒪᔪᖅ ᐅᕙᓂ ᓄᓇᖃᖅᑐᖅ ᑭᙵᐃᑦ, ᑎᑎᕋᐅᔭᒐᖅᑎ ᐱᑦᓯᐅᓛᒃ ᐊᓲᓇ, ᓴᖅᑭᔮᕐᑎᑕᐅᓚᐅᕐᑐᖅ ᐃᓚᒋᔭᐅᓂᖓᓂᒃ 8-ᓂ ᑲᓇᑕᒥ ᑎᑎᕋᐅᔭᒐᖅᑎᓂᒃ ᑎᑎᕋᐅᔭᖅᑕᖏᑦ $5-ᒥ ᐊᔾᔨᖃᕋᔭᕐᓂᕐᒧᑦ.
• 8-ᓂ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᓂᒃ ᓇᓗᓇᐃᕐᓯᕗᑦ ᑎᑭᕋᕐᔪᐊᖅᒥᑦ, ᑎᓴᒪᒋᔭᐅᔪᖅ ᓄᓇᕗᒥᑦ ᓄᓇᓕᖕᓂ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᓂᒃ. ᐃᓚᖓ ᐋᓐᓂᐊᓕᕐᓂᑯ ᐊᒃᑐᐃᓯᒪᓚᐅᕐᑐᖅ ᐊᕐᕕᐊᓂᒃ ᐋᓐᓂᐊᖅᑖᖅᑐᓂᒃ, ᑖᓐᓇᓗ 7-ᓂᒃ ᐃᓄᖕᓂ ᐋᓐᓂᐊᖅᑖᕆᔭᐅᓕᕐᖢᓂ.
• ᓄᓇᕗᑦ ᒪᕐᕉᖕᓂ ᐱᓇᓱᐊᕈᓰᖕᓂ ᓄᖅᑲᖅᑎᑕᐅᓚᐅᕐᐳᖅ ᓄᕙᒡᔪᐊᕐᓇᖅ-19-ᒧᑦ, ᐋᓐᓂᐊᖃᓕᕐᑐᑦ ᑎᑭᑎᓪᓗᒍ 70-ᓄᑦ, 54 ᐊᕐᕕᐊᓃᖢᑎᒃ. ᑐᐊᕕᕐᓇᖅᑐᓕᕆᓂᒃᑯᑦ ᓂᕿᓂᒃ ᓄᓇᓕᓄᑦ ᑎᑭᑎᑦᑎᓚᐅᕐᓯᒪᔪᑦ, ᑕᕝᕙᓂᓗ ᐊᒥᓱᕈᓗᐃᑦ ᓂᕿᑦᑎᐊᕙᖕᓂᒃ ᐱᑖᕈᓐᓇᙱᑉᐸᒃᖢᑎᒃ.
• ᒐᕙᒪᑐᖃᒃᑯᑦ ᐅᖃᓚᐅᕐᑐᑦ ᑐᓂᓯᓂᐊᕐᓂᕋᖅᖢᑎᒃ $19.36 ᒥᓕᐊᓐ ᑖᓚᓂᒃ ᐃᑲᔫᑎᒃᓴᓂᒃ ᓄᓇᕗᑦ ᒐᕙᒪᒃᑯᓐᓄᑦ, ᐃᓄᐃᑦ ᓄᓇᓕᖕᓐᓄᑦ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᓄᑦ ᐱᔾᔪᑎᒋᓪᓗᒐ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧᑦ. ᑕᐃᒪᐃᓕᑎᓪᓗᒋᑦ, 150-ᒧᑦ ᑎᑭᓯᒪᓚᐅᕐᑐᑦ ᐋᓐᓂᐊᖅᑖᕐᓯᒪᔪᑦ.

ᑎᓯᐱᕆ

• ᐋᑐᕚᒥᑦ ᐸᓖᓯᓄᑦ ᐱᔨᑦᑎᕋᖅᑎᑦ ᐱᐊᓂᓚᐅᕐᑐᑦ ᖃᐅᔨᓴᕈᑎᖏᓐᓂᒃ ᔫᓂ 1-ᒥᑦ ᑎᒍᓯᑎᓪᓗᒋ ᐊᖑᑎᒥ ᐅᑯᐊ ᑭᖓᐃᑦ ᐸᓖᓯᖏᑦ ᑎᒍᓯᓂᖓ ᓈᒻᒪᑐᐃᓐᓇᓚᐅᕐᓂᖓᓂᒃ. ᑖᓐᓇ ᖃᓄᐃᓕᐅᕈᑎ ᑲᓇᑕᒥ ᑕᑯᔭᐅᓚᐅᕐᓯᒪᖕᒪᑦ ᑕᕐᕆᔭᒐᓕᐊᖑᔪᖅ ᓴᖅᑭᔮᖅᑎᑎᓪᓗᒍ ᐃᓄᒃ ᐅᕐᕈᑎᑕᐅᓂᖓᓂᒃ ᐸᓖᓯᒃᑯᑦ ᓄᓇᓯᐅᑎᖓ ᒪᑐᐃᕐᑕᐅᑎᓪᓗᒍ.
• ᐃᖃᓗᒃᑑᑦᑎᐊᓂᒃ ᐃᑭᑦᑐᒧᑦ ᐃᓚᒌᓂᒃ ᐃᒡᓗᖃᕈᓐᓃᕐᑐᖃᖅᐳᖅ, ᑕᓪᓕᒪᑦ ᓱᓕ ᐃᓗᐊᓃᖢᑎᒃ ᖃᑎᕆᔨᒃᑯᑦ ᐅᖄᓚᕝᕕᐅᑎᓪᓗᒋᑦ 8-ᒥᑦ ᐅᓐᓄᒃᑯᑦ ᑎᓯᐱᕆ 1-ᖑᑎᓪᓗᒍ. ᐅᓇ ᐃᑭᑦᑐᕕᓂᕐᓂᒃ ᐊᖏᓛᖑᔪᖅ ᑕᕝᕙᓂ ᓴᓇᓯᒪᔪᓂᒃ ᐃᒡᓗᕐᔪᐊᓂᒃ ᖃᖓᑲᓪᓚᕈᓗᖕᓂ, ᐅᖃᖅᑐᖅ ᐃᖃᓗᒃᑑᑦᑎᐊᒥ ᖃᑦᑎᕆᔨᒃᑯᑦ ᐊᖓᔪᖅᑳᖓ ᑮᑦ ᒨᕆᓴᓐ — ᐊᒻᒪᓗ “ᓯᕗᓪᓕᖅᐹᖑᓪᓗᓂ ᓄᖑᑦᑎᐊᖅᖢᓂ ᐃᑭᑦᑐᖅ ᖃᖓᑲᓪᓛᓗᖕᓂᓐ,” ᐅᖃᖅᑐᖅ.
• ᑲᖏᖅᖠᓂᕐᒥᐅᑕᑦ ᖁᕕᐊᓲᑎᖃᕐᐳᑦ ᑐᓴᕋᒥᒃ ᑕᒪᕐᒥᒃ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᕕᓃᑦ ᖃᓄᐃᑦᑐᓐᓃᕐᓂᕋᖅᑕᐅᑎᓪᓗᒍ ᑎᓯᐱᕆ 3-ᒥᑦ. ᑭᓯᐊᓂᓕ ᓯᕗᓕᐅᕐᑎᒐᓚᐅᑦ ᓄᓇᓕᖕᓂ ᐃᓄᖕᓂ ᐅᔾᔨᕐᓱᖁᔨᑐᐃᓐᓇᖅᖢᑎᒃ. ᒪᐃᔭ ᕼᐃᐅᕆ ᑕᐅᑐᙱ ᐅᖃᓚᐅᕐᑐᖅ, “ᐅᔾᔨᕐᓱᕐᓂᕐᓴᐅᔭᕆᐊᖃᖅᑐᒍᑦ ᖁᕕᐊᓱᓗᐊᕐᓂᕐᒥᒡᓕ,” ᓱᓕ ᐃᓄᖕᓂ ᐃᓄᑑᓐᓇᖅᑐᒦᑐᖃᓚᐅᕐᒪᑦ ᐊᒃᑐᐃᓯᒪᑐᐃᓐᓇᕆᐊᖃᖅᑐᓂᒃ ᐋᓐᓂᐊᖃᓕᕐᓯᒪᔪᓂᒃ. ᓄᓇᓖᑦ ᐋᓐᓂᐊᖃᑐᖃᙲᓐᓇᕈᓂ ᔭᓄᐊᕆ ᐱᒋᐊᓕᕐᓂᖓ ᑎᑭᓪᓗᒍ, ᐱᓕᕆᔨᒻᒪᕆᐅᔪᑦ ᐅᖃᕈᓐᓇᕐᓯᓂᐊᕐᑐᑦ ᑲᖏᖅᖠᓂᕐᒥᒃ ᐋᓐᓂᐊᕐᓇᖅ ᐊᓂᒍᕐᓂᖓᓂᒃ, ᐅᓇ ᐅᖃᓚᐅᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᐊᖓᔪᖅᑳᖅ ᒪᐃᑯᓪ ᐹᑐᓴᓐ.
• ᑕᒪᕐᒥᒃ ᐊᕐᕕᐊᕐᒥᐅᑕᑦ ᖃᐅᔨᔭᐅᓯᒪᔪᑦ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᕐᓂᖏᓐᓂᒃ ᒫᓐᓇ ᖃᓄᐃᑦᑐᓐᓃᕐᑐᑦ, ᐅᖃᕐᓯᒪᓚᐅᕐᑐᖅ ᑐᓴᒐᒃᓴᓕᕆᓂᒃᑯ ᑐᓴᒐᒃᓴᕆᔭᐅᔪᖅ ᑎᓯᐱᕆ 8-ᒥᑦ. ᓴᓂᑭᓗᐊᕐᒥᓐ ᐊᒻᒪ ᑲᖏᖅᖠᓂᖅᒥᑦ ᐋᓐᓂᐊᖃᖅᑐᖃᙱᓐᓂᕋᐃᓚᐅᕐᑐᑦ ᐋᓐᓂᐊᕐᓂᑯᑦ ᖃᓄᐃᑦᑐᓐᓃᕐᓯᒪᓕᕐᑎᓪᓗᒋᑦ. ᑕᕝᕙᓂᓕ ᐅᓪᓗᕐᒥᑦ, 44-ᓂ ᐋᓐᓂᐊᕐᑐᖃᓚᐅᕐᑐᖅ ᐊᕐᕕᐊᓂᒃ, ᐊᒻᒪᓗ 176 ᖃᓄᐃᑦᑐᓐᓃᕐᓯᒪᓪᓗᑎᒃ.
• ᐅᑯᖃ Red Cross ᑐᓴᖅᑎᑦᑎᔪᑦ ᒪᓂᒻᒪᐃᓂᖏᓐᓂᒃ ᑐᐊᕕᕐᓇᖅᑐᓂᒃ ᖃᐅᔨᓴᑲᐅᕐᑐᖃᑦᑕᕈᓐᓇᕐᓂᕐᒥᒃ ᓄᕙᒡᔪᐊᕐᓇᖅ-19-ᒧᑦ ᐃᓄᑑᓐᓇᖅᑐᕕᖕᒦᑦᑐᓂᒃ ᐅᐃᓂᐱᒡᒥᑦ. ᐃᓄᐃᑦ ᓄᓇᕗᒧᑦ ᐅᑎᓕᒑᔪᑦ ᐅᐸᒃᓯᒪᔭᕆᐊᖃᖅᑕᖏᑦ ᓄᓇᕗᒧᐊᓚᐅᙱᓐᓂᖏᓐᓂᒃ. ᐃᓄᐃᑦ ᒪᓂᒻᒪᐃᕝᕕᐅᓯᒪᔪᑦ ᐱᖓᓱᐃᕐᓗᑎᒃ ᖃᐅᔨᓴᖅᑕᐅᖃᑦᑕᕈᓐᓇᕐᓂᖏᓐᓂᒃ – ᓯᕗᓪᓕᕐᐹᖅ ᐃᓄᑑᓐᓇᖅᑐᒧᑦ ᐃᓯᓕᕈᑎᒃ, ᑭᖑᓪᓕᖅ ᐅᓪᓗᓂ ᑕᓪᓕᒪᓂᒃ ᑕᐃᑲᓃᓯᒪᓕᕈᑎᒃ ᐊᒻᒪ ᐱᖓᔪᖓᓐᓂᒃ ᐅᓪᓗᕆᓕᕐᑕᖓᓂᒃ 12 ᐃᓄᑑᓐᓇᖅᑐᒥᑦ. ᖃᐅᔨᓴᕈᑎᐅᔪᑦ ᖃᐅᔨᒍᑎᐅᔪᓐᓇᕐᑐᑦ ᕿᓚᒥᕈᓗᒃ ᐃᒻᒪᖄᓪᓘᓐᓃᑦ 15-ᒥᓂᑦᒥ, ᐊᒻᒪᓗ ᐋᓐᓂᐊᖃᕐᓂᕋᖅᑕᐅᔪᑦ ᖃᐅᔨᓴᕈᑎᒃᑯᑦ ᑖᒃᑯᐊ ᖃᐅᔨᓴᖅᑕᐅᒍᑎᖏᑦ ᖃᐅᔨᓴᕐᕕᖕᒧᐊᖅᑕᐅᓇᔭᕐᓗᑎᒃ ᑕᐃᒪᐃᓪᓚᕆᒃᒪᖔᑦ ᖃᐅᔨᔭᐅᓇᔭᕐᓗᑎᒃ. ᑕᐃᒪᓐᓇ ᐋᓐᓂᐊᖃᕐᓂᕋᖅᑕᐅᒃᐸᑕ ᑖᓐᓇ ᑐᔪᕐᒥᔪᖅ ᐅᓪᓗᓂ ᖁᓕᓂᒃ ᖃᐅᔨᓴᖅᑕᐅᕝᕕᖓᓂᒃ ᐃᓄᑑᓐᓇᖅᑐᒦᒃᑲᓐᓂᕆᐊᖃᕋᔭᖅᖢᓂ. ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓ ᓘᒃᑖᖅ ᒪᐃᑯᓪ ᐹᑐᓴᓐ, ᐃᓄᖕᓂ ᖃᐅᔨᓴᖅᑕᐅᓂᕐᒥᒃ ᐃᓚᐅᖁᔨᒻᒪᕆᒃᑐᖅ, ᐅᖃᖅᖢᓂ ᓄᕙᒡᔪᐊᕐᓇᖅ-19-ᒥᑦ ᓄᓇᕗᑦ ᓄᓇᓕᖏᓐᓄᑦ ᑎᑭᐅᑎᑦᑎᙱᓐᓂᕐᓴᐅᓇᔭᕐᒪᑕ.
• ᐊᒻᒪ ᐃᒪᓐᓇᑳᓪᓚᐅᖅᑰᔨᔪᖅ, ᑖᕐᓂᐅᑉ ᐃᓱᖓ ᖃᐅᒻᒪᓂᖃᓕᖅᖢᓂ ᐆᒧᖓ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧᑦ. ᓄᓇᕗᑦ ᓯᕗᓕᐅᕐᑎᖓ, ᔫ ᓴᕕᑲᑖᖅ ᑐᓴᖅᑎᑦᑎᕗᖅ ᑎᓯᐱᕆ 11-ᒥᑦ ᓄᓇᕗᑦ ᐱᑖᕐᑎᑕᐅᓂᐊᕐᓂᖓᓂᒃ ᒪᑑᓇ ᑲᐱᔭᐅᔾᔪᑎᒃᓴᓂᒃ (Moderna vaccine) ᐊᑐᖅᑕᐅᔪᓐᓇᕐᓂᐊᕐᑐᓂᒃ 75-ᐳᓴᓐᑎᖏᓐᓂᒃ ᓄᓇᕗᒻᒥᐅᑕᑦ. ᓄᓇᕗᒥᑦ ᐃᓐᓇᐅᓛᖑᓂᖏᑦ ᐊᒻᒪ ᐅᓗᕆᐊᓇᕐᑐᒦᓴᕋᐃᑦᑐᑦ ᓯᕗᓪᓕᐅᑎᑕᐅᓂᐊᕐᑐᑦ ᑲᐱᔭᐅᓗᑎᒃ, ᐊᒻᒪ ᑭᖑᓂᐊᒍᑦ ᑭᓇᑐᐃᓐᓇ 18 ᐅᖓᑖᓂ ᐅᑭᐅᖃᖅᑐᑦ ᑲᐱᔭᐅᔪᓐᓇᕐᓂᐊᖅᖢᑎᒃ. ᑯᐸᐃᒃᒥᑦ ᑕᐃᒪᓐᓇᑦᑕᐅᖅ ᑐᓴᖅᑎᑦᑎᓚᐅᕆᕗᑦ ᓄᓇᖃᖅᑐᓂᒃ ᓄᓇᕕᒃᒥᑦ, ᑭᓯᐊᓂᓕ ᐅᖃᓚᐅᕆᓪᓗᓂ ᓱᓕ ᐃᓚᖏᑦ ᐃᓄᐃᑦ ᐅᓗᕆᐊᓱᖕᒪᑕ ᑖᔅᓱᒧᖓ ᑲᐱᔭᐅᔭᕆᐊᒃᓴᖅ, ᑭᓯᐊᓂᓕ ᑖᓐᓇ ᖃᐅᔨᓴᖅᑕᐅᑦᑎᐊᕌᓂᒃᐸᑦ ᐊᒻᒪᓗ ᐅᓗᕆᐊᓇᙱᓐᓂᖓ ᖃᐅᔨᔭᐅᒍᓂ.