ᐹᕙᓐᓛᓐ ᐅᖃᓚᐅᕐᑐᑦ ᐱᓕᕆᐊᖃᕐᓂᕐᓴᐅᓂᐊᕐᓂᖏᓐᓂᒃ ᓄᓘᔮᑦ ᐅᔭᕋᒃᓯᐅᕐᕕᒃ ᒪᑐᐃᖓᑎᓐᓇᓱᒡᓗᒍ

ᐹᕙᓐᓛᓐ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᒃᑯᑦ ᐅᖃᕈᒪᙱᑦᑐᑦ ᒪᑐᓯᓂᐊᕆᐊᒃᓴᖏᓐᓂᒃ ᓄᓘᔮᑦ ᐅᔭᕋᒃᓯᐅᕐᕕᒃᒥ ᒐᕙᒪᑐᖃᒃᑯᑦ ᐊᖏᙱᐊᓪᓚᓚᐅᖅᑎᓪᓗᒋᑦ ᐊᖏᒡᓕᒋᐊᕈᑎᒋᔪᒪᔭᖓᓄᑦ ᐸᕐᓇᐅᑎᖏᓐᓂᒃ ᐱᓇᓱᐊᕈᓯᐅᓚᐅᕐᑐᒥᓐ.

ᐊᕐᕌᒍᓂ ᑎᓴᒪᓂᒃ ᐃᓄᓕᒫᓂᒃ ᑲᑎᒪᑎᑦᑎᑲᑕᓚᐅᖅᖢᑎᒃ ᐅᑯᐊ ᑲᒻᐸᓂᐅᔪᑦ ᐅᖃᓚᐅᕐᑐᑦ ᒪᑐᓯᓚᐅᑲᒋᐊᖃᕋᓱᒋᓪᓗᑎᒃ ᐅᓇ ᐊᖏᒡᓕᒋᐊᕈᑎᐅᔪᒪᔪᖅ ᐊᖏᖅᑕᐅᙱᑉᐸᑦ — ᐃᓚᖏᓐᓄᓪᓕ ᑖᓐᓇ ᐅᓗᕆᐊᓲᑎᐅᓇᓱᒋᔭᐅᔪᖅ.

ᓄᕕᐱᕆ 18-ᖑᑎᓪᓗᒍ, ᐹᕙᓛᓐᑯ ᐅᖃᓪᓚᒃᑎᖓ ᐲᑕ ᐋᒃᒪᓐ ᐅᖃᓚᐅᙱᑦᑐᖅ ᑖᒃᑯᐊ ᑲᒻᐸᓂᐅᔪᑦ ᒫᓐᓇ ᐸᕐᓇᐅᑎᖃᕐᒪᖔᑕ ᐊᒃᑐᐃᓇᔭᖅᑐᒥᒃ ᐱᓕᕆᓂᕐᒥᒃ ᐅᔭᕋᒃᓯᕐᕕᒃᒥᓐ.

ᐅᖃᓚᐅᕐᑐᖅ ᐃᓱᒪᓕᐊᕆᔭᐅᔪᖅ ᒪᓕᒐᔭᕐᓂᖓᓂᒃ ᖃᓰᓐᓇᕈᓗᖕᓂ ᖃᓄᐃᓕᐅᕈᑎᓂᒃ, ᓲᕐᓗ ᓴᕕᕋᔭᒃᓴᐅᑉ ᐊᑭᖏᑦ ᐊᖏᒡᓕᒋᐊᖅᐸᓪᓕᐊᒃᐸᑦ ᐅᕝᕙᓘᓐᓃᑦ ᒥᒃᖠᒋᐊᖅᐸᑕ ᐊᒻᒪᓗ ᐅᑯᐊ ᐹᕙᓐᓛᓐᑯᑦ ᐱᔪᓐᓇᕐᓂᐊᕐᒪᖔᑦ ᐊᐅᓪᓚᖅᑎᑦᑎᖃᑦᑕᕐᓂᖏᓐᓂᒃ 6 ᒥᓕᐊᓐ ᑕᓐᔅ ᐊᕐᕌᒍᒥ.

ᐊᖏᖅᑕᐅᓚᐅᙱᑎᓪᓗᒍ ᐊᖏᒡᓕᒋᐊᕈᒪᓂᕐᒧᑦ ᐸᕐᓇᐅᑎᖏᑦ ᓄᕕᐱᕆ 16-ᖑᑎᓪᓗᒍ ᒐᕙᒪᑐᖃᒃᑯᑦ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕ ᑖᓂᐅᓪ ᕚᓐᑐᒧᑦ, ᐹᕙᓐᓛᓐᑯᑦ ᐃᓱᒪᓕᐅᕆᓕᓚᐅᕐᑐᑦ ᑲᑎᒪᖃᑎᖃᕈᒪᓪᓗᑎᒃ ᕚᓐᑐᒥ ᐊᒻᒪᓗ ᑲᑎᒪᖃᑎᖃᑲᑕᒃᖢᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᒃ, ᐋᒃᒪᓐ ᐅᖃᓚᐅᕐᑐᖅ.

ᕚᓐᑐᓪ ᑲᒻᐸᓂᒃᑯᑦ ᐊᖏᒡᓕᒋᐊᕈᑎᒋᔪᒪᔭᖓᓂᒃ ᐊᖏᓚᐅᙱᑦᑐᖅ, ᑖᓐᓇ ᖃᐅᔨᒪᔭᐅᔪᖅ ᐱᓕᕆᓂᖅ 2-ᒥ, ᐊᖏᖃᑎᖃᖅᖢᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐋᖅᑭᒃᑕᖓᓂᒃ ᐅᓇ ᐊᖏᒡᓕᒋᐊᖅᑎᑦᑎᓂᖅ ᐅᓗᕆᐊᓇᕋᔭᕐᓂᖓᓂᒃ ᓄᓇᒥ, ᐊᒻᒪᓗ ᐋᖅᑭᒃᑲᓐᓂᕈᓐᓇᕆᐊᒃᓴᖓᓂᒃ ᖃᐅᔨᒪᙱᖢᑎᒃ.

ᐹᕙᓐᓛᓐᑯᑦ ᐸᕐᓇᐅᑎᖏᑦ ᐃᓚᖃᓚᐅᕐᑐᑦ ᐊᐅᓪᓚᖅᑎᑦᑎᖃᑦᑕᕐᓂᖓ ᐊᖏᒡᓕᕚᓪᓕᕈᒪᓪᓗᒍ 12 ᒥᓕᐊᓐ ᑕᓐᔅᖑᕐᓗᓂ ᐊᕐᕌᒍᒧᑦ 6 ᒥᓕᐊᓐ ᑕᓐᔅᓂ, ᐊᒻᒪᓗ ᓴᓇᓗᑎᒃ 110 ᑭᓛᒥᑕ ᑕᑭᓂᓕᖕᒥ ᓄᓇᓯᐅᑎᑯᑖᖕᒧᑦ ᐊᖅᑯᑎᒃᓴᒥᒃ ᐊᒻᒪᓗ ᑐᓚᒃᑕᕐᕕᒃᑲᓐᓂᒃᓴᒥ ᓄᓘᔮᑦ ᕿᙳᐊᓂᒃ ᐅᒥᐊᕐᔪᐊᓕᕆᕝᕕᒃᓴᒥᒃ.

ᒫᓐᓇᐅᔪᕐᓕ, ᐹᕙᓐᓛᓐᑯᑦ ᐱᓕᕆᐊᖃᕈᓐᓃᕐᑐᑦ ᐊᖏᒡᓕᒋᐊᖅᑎᑦᑎᓂᕐᒧᑦ ᐸᕐᓇᐅᑎᖏᓐᓂᒃ ᐊᒻᒪ ᐱᓕᕆᓂᕐᓴᐅᓕᕐᓗᑎᒃ ᓄᓘᔮᖕᓂ ᐅᔭᕋᒃᓯᐅᕐᕕᒃ ᒪᑐᐃᖓᑎᓐᓇᓱᒡᓗᒍ, ᐋᒃᒪᓐ ᐅᖃᕐᑐᖅ.

ᑲᒻᐸᓂᐅᔪᑦ ᐱᔪᓐᓇᐅᑎᖓ ᐊᐅᓪᓚᖅᑎᑦᑎᔪᓐᓇᕐᓂᕐᒥᒃ 6 ᒥᓕᐊᓐ ᓴᕕᕋᔭᒃᓴᓂᒃ ᐃᓱᓕᓐᓂᐊᖅᑐᖅ ᑕᒪᑐᒪᓂ ᐊᕐᕌᒍᒥ. ᐱᔪᓐᓇᐅᑎᑖᒃᑲᓐᓂᙱᑉᐸᑕ ᐹᕙᓐᓛᓐᑯ ᐊᐅᓪᓚᖅᑎᑦᑎᔪᓐᓇᕐᓂᐊᖅᑐᑦ 4.2 ᒥᓕᐊᓐ ᑕᓐᔅᓯ 2023-ᒥ.

ᑲᐃᐅᓪ ᐋᓚᓐ, ᕚᓐᑐᓪ ᐅᖃᓪᓚᒃᑎᖓ, ᓇᓗᓇᐃᕐᓯᓚᐅᕐᑐᖅ ᒥᓂᔅᑕᐅᑉ ᑎᑎᕋᕐᕕᖓ ᐱᓚᐅᕐᓂᖏᓐᓂᒃ ᐹᕙᓐᓛᓐᑯᑦ ᑐᒃᓯᕋᐅᑎᖓᓂᒃ ᐊᒻᒪᓗ ᑲᒻᐸᓂᒃᑯᓐᓂᒃ ᑲᑎᒪᖃᑎᖃᕐᓂᐊᖅᖢᓂ. ᐅᖃᓚᐅᙱᑦᑐᖅ ᖃᑯᒍ ᑲᑎᒪᓂᐊᕐᒪᖔᑕ.

ᐹᕙᓐᓛᓐᑯ ᓄᓇᕗᒥ ᐊᖏᓂᖅᐹᖅ ᐃᒻᒥᒃᑰᖓᔪᓂᒃ ᐃᖅᑲᓇᐃᔭᖅᑎᑦᑎᔨᐅᓪᓗᓂ ᐊᒻᒪᓗ ᐊᖏᓂᖅᐹᖑᓪᓗᓂ ᑮᓇᐅᔭᑎᒍᑦ ᐃᑲᔪᕐᓯᒪᓂᕐᒥᒃ.

ᑲᒻᐸᓂᐅᔪᑦ ᐃᓱᒪᔪᑦ ᐊᖏᒡᓕᒋᐊᕐᓂᖅ ᑮᓇᐅᔭᓕᐅᕈᑎᐅᓇᔭᕐᓂᖓᓂᒃ ᒫᓂ $4.7 ᐱᓕᐊᓐ ᑖᓚᓂ ᑖᒃᓯᓄᑦ ᑮᓇᐅᔭᓕᐅᕈᑎᐅᓗᓂ ᓄᓇᕗᒥᑦ, ᕿᑐᕐᖏᐅᕈᑎᓂᒃ ᐊᒻᒪᓗ ᑖᒃᓰᔭᕐᓂᕐᒧᑦ ᒐᕙᒪᑐᖃᒃᑯᓐᓂᑦ ᐊᒻᒪ ᑮᓇᐅᔭᖅᑖᕈᑎᐅᓗᓂ ᐃᓄᐃᑦ ᑲᑐᔾᔨᖃᑎᒌᓄᑦ, ᓄᓇᕗᑦ ᑐᙵᕕᒃᑯᓐᓄᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᑖᓐᓇ ᐅᔭᕋᒃᓯᐅᕐᕕ ᐊᖏᒡᓕᒋᐊᕐᓯᒪᓂᖓᓄᑦ.