FASD ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐱᔪᓐᓇᐅᑎᓄᑦ ᑲᒪᒋᔭᐅᔭᕆᐊᓕᒃ, ᑎᒍᒥᐊᖅᑎᑦ ᐅᖃᖅᑐᑦ
“ᓱᕈᓯᐅᑉ ᐱᔪᓐᓇᕐᓂᕆᖕᒪᒍ, ᐃᓐᓇᐅᓪᓗ ᐱᔪᓐᓇᕐᓂᕆᓪᓗᓂᐅᒃ ᑕᒪᑐᒧᖓ ᑭᐅᔭᐅᒋᐊᖃᕐᓂᕐᒥᒃ”
ᐅᓇ ᓇᓗᓇᐃᒃᑯᑎᓕᐊᖑᓯᒪᔪᖅ ᐋᕿᒃᑕᐅᓚᐅᕐᓯᒪᔪᖅ ᔫᓇᐃᑕᑦ ᓯᑕᐃᑦᔅᓂ ᐅᑯᓇᙵᑦ ᐋᓐᓂᐊᕆᔭᐅᔪᓂᒃ ᐊᐅᓚᑦᑎᕕᒃᒥᑦ 2015-ᖑᑎᓪᓗᒍ ᐅᔾᔨᕈᓱᓕᕈᑎᐅᓇᓱᒃᖢᓂ ᐃᓄᖕᓂᑦ ᐊᒻᒪ ᑮᓇᐅᔭᑎᒍᑦ ᐊᑐᖅᑕᐅᒍᑎᐅᔪᓂᒃ ᒪᑐᒧᖓ ᓇᔾᔨᐊᕆᔭᐅᔪᓄᑦ ᐃᒥᐊᓗᖕᒥ ᐊᑐᓗᐊᕐᓂᒧᑦ ᐋᓐᓂᐊᕆᔭᐅᔪᓄᑦ (FASD). ᑲᑎᖢᑎᒃ ᑮᓇᐅᔭᑎᒍ ᑲᓇᑕᒪᑦ ᒫᓃᓪᓗᐊᕐᑐᑦ 1.8 ᐱᓕᐊᓐ ᑖᓚᓂᒃ ᐊᕐᕋᒍᒧᑦ, ᐊᒻᒪᓗ ᑲᑎᖢᑎᒃ ᑮᓇᐅᔭᑎᒍᑦ ᐊᑐᖅᑕᐅᕙᒃᑐᑦ ᐋᓐᓂᐊᖃᖅᑐᓄᑦ FASD-ᒥ ᒫᓃᑦᑐᖅ 1.12 ᒥᓕᐊᓐ ᑖᓚᓂᒃ ᐃᓅᓯᓕᒫᖏᓐᓂᒃ.
For this story in English, see FASD in Nunavut a health-care rights issue, stakeholders say
ᑭᓯᐊᓂᓕ ᖃᐅᔨᓴᖅᑕᐅᕙᙱᓗᐊᕐᓂᕐᒧᑦ ᐊᒻᒪ ᑕᐃᒪᐃᑦᑐᒥ ᐋᓐᓂᐊᖃᕐᓂᕐᒥ ᖃᐅᔨᔭᐅᔪᓐᓇᙱᓐᓂᕐᒧᑦ, ᑖᓐᓇ ᐱᔪᓐᓇᕐᓂᐅᔪᖅ ᐊᑐᖅᑕᐅᓯᒪᙱᑦᑐᒃᓴᐅᔪᖅ ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐊᒻᒪ ᐃᓕᓐᓂᐊᖅᑐᓕᕆᓂᒃᑯᑦ.
“ᐅᓇ ᐱᔾᔪᑎᖃᓗᐊᖅᑐᖅ ᐱᓕᕆᔾᔪᑎᓕᕆᓂᐅᔪᖅ ᐅᔾᔨᕈᓱᙱᓗᐊᕐᓂᖏᓐᓂᒃ ᓱᕈᓰᑦ ᐃᓐᓇᐃᓪᓘᓐᓃᑦ ᐱᔪᓐᓇᐅᑎᖏᓐᓂᒃ ᓱᕋᐃᓯᒪᓂᖏᓐᓂᒃ ᐃᓚᖏᓐᓂᒡᓗ,” ᐅᖃᖅᑐᖅ ᔭᓂᕗ ᓄᐊ, ᐊᐅᓚᑦᑐᔨ ᐱᕈᖃᑎᒌᑦᐃᑲᔪᕈᑎᖃᕐᕕᒃᒥᑦ ᐃᖃᓗᖕᓂᑦ.
ᐱᕈᖃᑎᒌᑦ ᓄᑖᖑᔪᖅ ᑮᓇᐅᔭᓕᐅᕋᓱᙱᖢᑎᒃ ᑲᑐᔾᔨᖃᑎᒌᑦ ᐃᖃᓗᖕᓂ ᐋᕿᒃᑕᐅᓯᒪᔪᖅ ᐃᑲᔪᖃᑦᑕᕐᓂᐊᕐᓗᑎᒃ ᐃᓄᖕᓂᒃ ᐋᓐᓂᐊᖃᖅᑐᓂᒃ FASD-ᒥ ᐃᓚᖏᓐᓂᒡᓗ.
ᖃᐅᔨᒪᔨᒻᒪᕇᑦ ᐅᖃᕐᓯᒪᔪᑦ ᐅᓇ FASD, ᓇᐃᓈᕐᓯᒪᔪᖅ ᐆᒧᖓ fetal alcohol spectrum disorder, ᓇᔾᔨᐊᕆᔭᐅᔪᓄᑦ ᐃᒥᐊᓗᖕᒥ ᐊᑐᓗᐊᕐᓂᑰᓂᖏᓐᓄᑦ ᐋᓐᓂᐊᕆᔭᐅᔪᖅ, ᐋᓐᓂᐊᕆᔭᐅᖏᓐᓇᓕᔭᑦᑐᖅ, ᑲᓇᑕᒥ ᓇᓂᕈᓘᔭᖅ ᐋᓐᓂᐊᕆᔭᐅᔪᖅ ᒪᑯᓇᙵᑦ ᐱᓂᕐᓴᐅᓪᓗᓂ ᐋᑎᓴᒻᒥᑦ (autism) ᐅᕝᕙᓘᓐᓃᑦ ᑕᐅᓐ ᓯᓐᑐᕋᒻᒥᑦ (Down syndrome), ᐃᓕᖁᓯᕐᓱᕈᑎᐅᓐᓇᙱᑦᑐᑦ ᐃᑲᔫᑎᑖᕈᑎᑖᕐᓂᕐᓴᐅᕙᒃᑐᑦ ᐊᒻᒪ ᖃᐅᔨᒪᔭᐅᓂᕐᓴᐅᓪᓗᑎᒃ.
ᑲᓇᑕᒥ, ᐊᕐᕌᒍᒧᑦ ᐊᑭᓕᐅᑎᐅᕙᒃᑐᑦ ᑮᓇᐅᔭᓕᐅᕐᓂᒃᑯᑦ ᐊᒃᑐᐊᔪᑦ FASD-ᒥ ᒫᓃᐸᓗᒃᑐᖅ 1.8 ᐱᓕᐊᓐ ᑖᓚᓂᒃ ᐊᒻᒪᓗ ᐃᓅᓯᓕᒫᖅ ᐊᑕᐅᓯᖅ ᐃᓄᒃ ᐋᓐᓂᐊᖃᖅᑐᖅ FASD-ᒥ ᐊᑭᖃᓪᓗᐊᖅᑐᖅ 1.12 ᒥᓕᐊᓐ ᑖᓚᓂᒃ, ᓘᒃᑖᖅ ᓯᕙᑦᓚᓇ ᐸᐳᕙ ᐅᕙᙶᖅᑐᖅ ᐊᑐᓗᐊᖅᑐᓂᒃ ᐊᒻᒪ ᐃᓱᒪᓕᕆᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ ᑎᑎᕋᐅᓯᖃᓚᐅᕐᓯᒪᔪᖅ ᖃᐅᔨᓴᕈᑎᓂᒃ ᓴᖅᑭᑕᐅᓂᑯᓂᒃ 2015-ᒥᑦ.
ᐅᓇ ᐅᖃᐅᓯᖅ “FASD” ᐊᔾᔨᒌᙱᕈᓘᔭᖅᑐᓂᒃ ᐅᖃᐅᓯᖃᕐᓂᐅᔪᖅ ᐃᓅᓯᓕᒫᒧᑦ ᐊᒃᑐᐃᓯᒪᒍᑎᓂᒃ ᐊᒻᒪ ᑎᒥᒧᑦ ᐃᓕᖅᑯᓯᖅᓱᕈᓐᓃᕈᑎᓂᒃ ᑕᐃᒪᐃᓕᖅᐸᒃᖢᑎᒡᓗ ᓇᔾᔨᐊᕆᔭᐅᔪᖅ ᐊᒃᑐᖅᑕᐅᓯᒪᓕᕈᓂ ᐃᒥᐊᓗᖕᒥᑦ ᐊᓈᓇᖓᑕ ᐃᒡᓕᐊᖓᓃᑎᓪᓗᒍ.
ᑕᒪᓐᓇ ᐃᓕᖁᓯᖅᓱᕐᓇᙱᓐᓂᖅ ᐅᒃᐱᕆᔭᐅᒐᓗᐊᖅᖢᓂ ᓇᓂᕈᓘᔭᕐᓂᖓᓂᒃ ᓄᓇᕗᒥᑦ, 2007/08-ᒥᑦ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᖃᐅᔨᓴᖅᑕᐅᓂᖅ, ᓄᓇᕗᒥᑦ, ᓄᓇᑦᓯᐊᕗᒥᑦ ᐊᒻᒪ ᐃᓄᕕᐊᓗᒃᒥᑦ, ᓴᕿᑎᑦᑎᒍᑎᐅᓚᐅᕐᑐᖅ ᑐᓴᖅᑎᑕᐅᓯᒪᙱᓐᓂᖏᓐᓂᒃ ᐃᒥᐊᓗᖃᑦᑕᖅᑐᓂᒃ ᓇᔾᔨᔪᓂᒃ ᐊᒻᒪᓗ ᑲᑎᕐᓱᒐᖅᑕᖃᙱᖢᓂ FASD ᐱᑕᖃᐃᓐᓇᐅᔭᕐᓂᖓᓂᒃ.
ᓄᓇᕗᑦ ᒥᓂᔅᑕᖓ ᐃᓕᓐᓂᐊᕐᓂᓕᕆᓂᕐᒧᑦ, ᑕᐃᕕᑦ ᔪᐊᓇᓯ, ᐅᖃᓚᐅᕐᓯᒪᔪᖅ ᒫᑦᓯᐅᓚᐅᕐᑐᒥᑦ ᖃᐅᔨᒪᒐᓗᐊᕐᓂᕋᖅᖢᓂ ᖃᔅᓯᒐᓴᖕᓂ ᓱᕈᓯᕐᓂᒃ ᐃᓕᓐᓂᐊᕆᐊᖅᐸᒃᑐᓂᑦ ᐋᓐᓂᐊᖃᖅᑐᓂᒃ FASD-ᒥᑦ ᓇᓗᓇᐃᖅᑕᐅᓯᒪᙱᑦᑐᓂᒃ, ᑭᓯᐊᓂᓕ ᑖᒃᑯᐊᓘᓐᓃᑦ ᐃᓕᓐᓂᐊᕐᓂᓕᕆᔨᒃᑯᑦ ᑭᒃᑯᓪᓚᕆᐅᓂᖏᓐᓂᒃ ᖃᐅᔨᒪᔪᓐᓇᙱᑦᑐᑦ.
2011-ᒥ, ᐊᓯᒃᑲᓐᓂᖓᒍᑦ ᖃᐅᔨᓴᕐᓂᕐᒥᒃ ᐅᓄᙱᓐᓂᕐᓴᐅᔪᓂᒃ ᓄᓇᕕᒃᒥᑦ ᐊᕐᓇᓂᒃ, ᖃᐅᔨᓕᓚᐅᕐᐳᑦ 61-ᐳᓴᓐᑎᐅᔪᑦ ᐃᒥᖃᑦᑕᕐᓂᕋᖅᖢᑎᒃ ᓇᔾᔨᓂᖏᓐᓂᒃ, ᐊᒻᒪᓗ 38-ᐳᓴᓐᑎᑦ ᓇᔾᔨᔪᓂᒃ ᐃᒥᐊᓗᒃᑕᖃᕐᓂᖓᓂᒃ ᐃᒥᐊᓗᐃᓐᓇᖃᑦᑕᕐᓂᖏᓐᓂᒃ.
ᐅᓇᓗ ᓯᕕᐊᑦᓚᓇ ᐸᐳᕙ, ᖃᐅᔨᓴᖅᑎ ᐅᕙᙶᖅᑐᖅ ᐊᑐᓗᐊᖅᑐᓂᒃ ᐊᒻᒪ ᐃᓱᒪᓕᕆᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᒪᑯᐊ ᑐᓴᐅᒪᙱᓗᐊᔭᑦᑐ ᐃᓅᖃᑎᒌᑦ, ᒪᑯᑎᑐᓇᖅ ᓄᓇᖃᖅᑳᖅᑐᑎᑐᑦ, ᐋᓐᓂᐊᖃᕐᒪᑕ ᐅᕙᙵᑦ FASD-ᒥᑦ ᖁᕝᕙᓯᖕᓂᕐᓴᐅᓂᖏᓐᓂ ᒫᓂ ᖁᓕᓂᑦ 40-ᓄᑦ ᐅᓄᕐᓂᕐᓴᓂᒃ ᐃᓄᒋᐊᕐᓂᕐᓴᐅᕙᒃᑐᓂᒃ.
ᒪᑯᐊᓕ ᐃᒪᐊᓗᐃᑦ, ᓱᐴᕐᑐᒐᐃᑦ ᐅᕝᕙᓘᓐᓃᑦ ᑕᕝᕚᑮᑦ ᖁᐊᕐᓵᕐᓇᕆᔭᐅᕙᖕᓂᖏᓐᓂᒃ ᐊᑐᖅᑕᐅᑎᓪᓗᒋᑦ ᓇᔾᔨᔪᓄᑦ, ᑕᐃᒪᓕ ᐅᓇ ᐃᓱᒪᓕᕐᓇᖅᐳᖅ ᐊᒥᓱᑦ ᐃᓄᐃᑦ ᓄᓇᕗᒥᑦ ᐋᓐᓂᐊᖃᖅᑐᑦ FASD-ᒥᑦ ᐃᔨᖅᑕᐅᓯᒪᓂᖏᓐᓂᒃ ᐅᕝᕙᓘᓐᓃᑦ ᖃᐅᔨᒪᙱᓐᓂᖏᓐᓂᒃ ᐊᓯᖏᓐᓄᓪᓘᓐᓃᑦ ᖃᐅᔨᒪᔭᐅᙱᓐᓂᖏᓐᓂᒃ.
ᓄᐊ, ᐊᑐᕐᓂᑯᖓᒍᑦ ᐊᑐᓗᐊᕐᓂᕐᒥᒃ ᐊᒻᒪ ᐃᓅᓯᓕᕆᓂᕐᒥ, ᐊᖏᖃᑎᖃᖅᑐ ᑕᐃᒪᓐᓇ ᐃᓱᒪᒋᔭᐅᓂᕐᒥᒃ.
“ᐅᖃᕈᓐᓇᖅᑐᖓ FASD ᐱᑕᖃᕐᓂᕐᓴᐅᒻᒪᕆᖕᓂᖓᓂᒃ ᐃᓱᒪᒋᓇᔭᖅᑕᑦᑎᓐᓂᒡᓕ, ᐃᖃᓗᖕᓂᑐᐊᙳᙱᑦᑐᖅ ᐊᒻᒪ ᓄᓇᕗᒥᑦ, ᑭᓯᐊᓂᓕ ᓇᓂᓕᒫᑦᑎᐊᖅ. FASD ᐋᓐᓂᐊᕆᔭᐅᓂᕐᓴᐅᖕᒪᑦ ᒪᑯᓇᙵᓪᓕ ᐋᑎᓴᒻ (autism) ᐊᒻᒪᓗ ᑕᐅᓐᔅ ᓯᓐᑐᕋᒻᒥᑦ (Down’s syndrome) ᑲᑎᖢᑎᒃ,” ᓄᐊ ᐅᖃᖅᑐᖅ.
“ᐅᖃᕋᓱᙱᑦᑐᒍᑦ ᑕᒪᓐᓇ ᐃᓄᖕᓄᑐᐊᖅ ᓈᒻᒪᙱᓕᐅᕈᑎᐅᓂᖓᓂᒃ. ᑕᒪᓐᓇ ᓇᓂᑐᐃᓐᓇᖅ ᐃᒥᐊᓗᖃᖅᑐᒥᑦ ᐋᓐᓂᐊᕆᔭᐅᔪᖅ. ᒫᓐᓇᓕ ᑕᒪᑐᒧᖓ ᐱᔨᑦᑎᕋᐅᑎᖃᕆᐊᖃᓕᕋᑦᑕ,” ᐅᖃᖅᑐᖅ.
ᖁᐊᕐᓵᕐᓇᕐᒪᑦ ᖃᓄᑐᐃᓐᓇᖅ ᐊᖏᓂᓕᖕᒥᑦ ᐃᒥᐊᓗᒡᓗᓂ ᓇᔾᔨᓗᓂ, ᖃᐅᔨᒪᓕᕐᓯᒪᔪᒻᒪᕇᑦ ᐅᖃᕐᓯᒪᔪᑦ. ᑭᓯᐊᓂᓕ 2004-ᒥ ᖃᓄᐃᑉᐱᑖ ᖃᐅᔨᓴᕐᓂᖅ ᓄᓇᕕᒃᒥᑦ, ᓄᓇ ᐃᓕᖁᓯᑐᖃᓕᒃ ᐊᒻᒪ ᖃᓄᐃᓕᐅᕈᑎᐅᕙᖕᓂᑯ ᓄᓇᕗᑦ ᐊᔾᔨᐸᓗᐊᓂᑦ, ᓴᕿᑎᑦᑎᒍᑎᐅᓚᐅᕐᑐᖅ 44.2 ᐳᓴᓐᑎᑦ ᐊᕐᓇᐃᑦ ᐊᐱᖅᓱᖅᑕᐅᔪᑦ ᓄᓇᕕᒃᒥᑦ ᐅᖃᕐᓯᒪᓚᐅᕐᑐᑦ ᐃᒥᐊᓗᖃᑦᑕᓚᐅᕐᓂᖏᓐᓂᒃ ᑭᖑᓕᖅᐹᒥᑦ ᓇᔾᔨᑎᓪᓗᒋᑦ. (ᐊᔾᔨᙳᐊᖅ ᓄᓇᕗᑦ ᒐᕙᒪᒃᑯᓐᓂᒃ)
ᐃᖅᑲᓇᐃᔭᓕᕐᓂᕐᒧᑦ ᑐᓗᖅᑕᕐᕖᑦ
FASD,ᖃᐅᔨᓴᕈᑎᐅᙱᑉᐸᑦ ᐅᕝᕙᓘᓐᓃᑦ ᐱᔾᔪᑎᐅᓂᖓᓂ ᖃᐅᔨᔭᐅᙱᒃᑯᓂ, ᑖᓐᓇ ᑐᓗᖅᑕᕈᑎᐅᓕᕈᓐᓇᕐᒪᑦ ᐃᖅᑲᓇᐃᔮᖅᑖᕋᓱᖕᓂᒃᑯᑦ ᐅᕝᕙᓘᓐᓃᑦ ᐊᔪᕈᓐᓃᕐᓴᓕᕈᓐᓇᕐᓂᕐᒥᒃ ᐃᖅᑲᓇᐃᔮᒃᓴᓄᑦ.
ᐱᔾᔪᑎᓕᒃ FASD ᓱᕋᐃᒍᓐᓇᕐᓂᖓᓂᒃ ᐃᖅᑲᐅᒪᒍᓐᓇᑦᑎᐊᕐᓂᕐᒥᒃ, ᐃᓕᑦᑎᕙᓪᓕᐊᒍᓐᓇᕐᓂᕐᒥᒃ ᐅᖃᐅᓯᖅ ᐊᑐᕐᓗᒍ, ᐊᒻᒪᓗ ᐃᓅᖃᑎᒌᖃᑎᖃᕈᓐᓇᑦᑎᐊᕐᓂᕐᒧᑦ ᐱᔭᐅᓯᒪᔭᕆᐊᓕᖕᓂᑦ ᐃᖅᑲᓇᐃᔭᖃᑕᐅᕙᒃᑐᓂᑦ.
ᑖᓐᓇ ᐱᔾᔪᑎᒋᓪᓗᒍ, ᐱᕈᖃᑎᒌᑦ ᐃᓕᓐᓂᐊᕈᑎᖃᓕᕈᒪᕗᑦ ᓇᓗᓇᐃᒃᑯᑎᑖᕐᓇᖅᑐᒥ ᐊᔪᕈᓐᓃᕐᓴᕈᑎᒃᓴᓂᒃ ᐱᔨᑦᑎᕋᐅᑎᓕᕆᕙᒃᑐᓂᒃ FASD-ᒥᑦ ᐋᓐᓂᐊᕈᑎᓕᖕᓂᒃ, ᓄᐊ ᐅᖃᖅᑐᖅ.
“ᐃᓕᓐᓂᐊᖅᑎᑦᑎᓇᓱᒃᑲᑦᑕ ᐱᓕᕆᐊᖃᖅᐸᒃᑐᓂᒃ ᐱᔨᑦᑎᕋᐅᑎᓂᒃ ᑐᓴᐅᒪᓕᕐᓂᐊᕐᒪᑕ ᒪᑯᓂᖓ FASD-ᒥᑦ ᐊᒻᒪ ᖃᓄᐃᕈᓘᔭᕈᑎᐅᔭᑦᑐᓂᒃ, ᐱᓕᕆᐊᖏᑦᑎᒍᑦ ᐅᔾᔨᕈᓱᒃᑲᓐᓂᕈᓐᓇᕐᓂᐊᕐᒪᑕ ᐋᓐᓂᐊᖃᖅᑐᓂᒃ ᖃᓄᖅ ᐃᑲᔪᖅᑕᐅᔭᕆᐊᖃᕐᓂᖏᑦᑎᒍᑦ ᐊᒻᒪᓗ ᑖᒃᑯᐊ ᖃᓄᐃᓕᐅᕈᓯᒋᕙᒃᑕᖏᓐᓂᒃ,” ᐅᖃᖅᑐᖅ.
ᕼᐊᓚᓐ ᕉᔅ, ᐊᐅᓚᑦᑎᔨ ᐃᓕᓐᓂᐊᐹᐊᔪᕈᓐᓃᕐᓴᕐᕕᒃᒥᑦ ᐃᖃᓗᖕᓂᑦ, ᐊᖏᕐᒥᔪᖅ ᑕᒪᒃᑯᐊ ᐃᓄᐃᑦ ᖃᐅᔨᓴᖅᑕᐅᓯᒪᙱᑦᑐᑦ ᐊᒻᒪᓗ ᐋᓐᓂᐊᖃᕐᓂᕐᒥᒃ FASD-ᒥ ᖃᐅᔨᔭᐅᓯᒪᙱᑦᑐᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐱᔪᓐᓇᐅᑎᖃᕐᓂᖏᓐᓂᒃ ᓄᓇᕗᑦ ᐃᓱᒫᒋᙱᓗᐊᖅᑕᖓᓂᒃ.
ᐱᔪᓐᓇᕐᓂᖃᕐᓂᖅ ᖃᐅᔨᒪᔭᕆᐊᖃᕐᓂᕐᒥᒃ ᓇᖕᒥᓂᖅ ᐋᓐᓂᐊᖃᖅᑕᐃᓕᓂᒃᑯᑦ
“ᐱᔪᓐᓇᕐᓂᕆᔭᐅᖕᒪᑦ ᑖᔅᓱᒧᖓ ᓱᕈᓯᕐᒧᑦ, ᐱᔪᓐᓇᕐᓂᕆᔭᐅᖕᒪᑦ ᐃᓐᓇᐃᑦ ᑕᒪᑐᒧᖓ ᑭᐅᔭᐅᔪᓐᓇᕆᐊᖃᕐᓂᖏᓐᓂᒃ,” ᕉᔅ ᐅᖃᖅᑐᖅ.
“ᐃᓄᐃᑦ ᐱᔪᓐᓇᕐᓂᖃᕐᒪᑕ ᑭᐅᔭᐅᔪᓐᓇᕆᐊᖃᕐᓂᕐᒥᒃ ᐊᐱᖁᑎᖏᓐᓂᒃ ᐋᓐᓂᐊᖃᖅᑕᐃᓕᓂᖏᓐᓄᑦ. ᐊᒻᒪᓗ ᖃᐅᔨᔪᒪᓐᓂᕈᑎᒃ ᖃᓄᐃᑉᐸᓪᓕᐊᒍᑎᖏᓐᓂᒃ ᐅᕝᕙᓘᓐᓃᑦ ᐱᕈᖅᐸᓪᓕᐊᓂᖏᓐᓂᒃ, ᐱᔪᓐᓇᕐᓂᖃᖅᑐᑦ ᖃᐅᔨᓴᖅᑕᐅᔪᓐᓇᕐᓂᕐᒥᑦ FASD-ᒧᑦ,” ᐅᖃᖅᑐᖅ.
ᕉᔅ ᐅᖃᕐᑐᖅ ᑕᒪᓐᓇ ᑐᑭᖃᕐᓂᖓᓂᒃ ᖃᐅᔨᒪᙱᓐᓂᖅ FASD-ᒥᑦ ᑐᓗᖅᑕᕈᑎᒻᒪᕆᐅᓂᖓᓂᒃ ᐃᖅᑲᓇᐃᔮᖃᕋᓱᖕᓂᒃᑯᑦ.
“ᐊᕐᕌᒍᓂ 7-ᓂ ᐃᖅᑲᓇᐃᔮᒃᓴᓂᒃ ᐊᔪᕈᓐᓃᕐᓴᖅᑎᑦᑎᓂᕐᒥᒃ ᐃᓄᖕᓂᒃ, ᐱᓗᐊᕐᑐᒥ ᐊᕐᕌᒍᓂ 6-ᓂ ᓴᓇᓪᓗᖓ, ᑕᒪᓐᓇ FASD ᐱᑕᖃᓪᓚᕆᖕᓂᖓᓂᒃ,” ᐅᖃᖅᑐᖅ.
“ᑐᓗᖅᑕᕈᑎᐅᓕᔭᒻᒪᑦ. ᖃᐅᔨᓴᖅᑕᐅᕙᙱᒻᒪᑕ ᐃᓕᓐᓂᐊᓕᖅᑎᓪᓗᒋᑦ ᐃᓕᓐᓂᐊᕐᕕᐊᓗᖕᒥᓪᓘᓐᓃᑦ.”
ᐱᔾᔪᑎᒋᔭᐅᔪᕐᓕ ᑕᒪᒃᑯᐊ FASD-ᖃᖅᑐᑦ ᐊᒃᓱᕈᕈᑎᖃᓕᔭᒻᒪᑕ ᐅᖃᓪᓚᖕᓂᒃᑯᑦ ᐊᒻᒪᓗ ᐃᖅᑲᐅᒪᒍᓐᓇᓗᐊᖅᐸᙱᖢᑎᒃ ᑕᐃᒪᓐᓇᓗ ᐊᔪᕈᑎᖃᓕᖅᐸᒃᖢᑎᒃ ᑐᑭᓯᑦᑎᐊᕆᐊᒃᓴᖅ ᒪᓕᖁᔭᐅᓯᒪᔪᓂᒃ ᐃᖅᑲᓇᐃᔭᕐᕕᒋᔭᐅᔪᓂᒃ.
ᑕᐃᒪᓐᓇᐅᓂᖓᓄᑦ, ᑕᐃᒪᐃᑦᑐᑦ ᐃᓄᐃᑦ ᐊᔪᕐᓴᕋᔭᕐᒪᑕ ᐊᔪᕈᓐᓃᕐᓴᖅᑎᑦᑕᕆᐊᒃᓴᖅ ᓄᓇᕗᒥᑦ ᐊᖏᓂᖅᐹᓂᒃ ᓴᓇᕝᕕᐅᔪᓂᒃ: ᐅᔭᕋᒃᓴᖅᓯᐅᕐᓂᖅ ᐊᒻᒪ ᒐᕙᒪᒃᑯᑦ.
“ᐅᔭᕋᒃᓴᖅᓯᐅᕐᓂᕐᒥᒡᓕ, ᒪᑯᐊ ᐋᓐᓂᐊᖃᖅᑕᐃᓕᓂᖅ ᐊᒻᒪ ᐱᕐᕈᓗᐊᕿᑦᑕᐃᓕᓂᖅ ᐊᒻᒪ ᖃᓄᐃᑦᑕᐃᓕᒪᓂᖅ ᐊᒻᒪᓗ ᐱᕐᕈᓗᐊᕿᑦᑕᐃᓕᓂᖅ ᓯᕗᓕᖅᐹᖑᓪᓗᓂ, ᑕᐃᒪᓕ ᐃᖅᑲᐅᒪᔪᓐᓇᙱᒃᑯᕕᑦ ᐅᔾᔨᓱᑦᑎᐊᕆᐊᖃᕐᓂᕐᒥᒃ, ᑕᐃᒪᓕ ᐃᖅᑲᓇᐃᔭᕈᓐᓇᕋᔭᙱᓚᑎᑦ ᑕᐃᒪᐃᑦᑐᓂᑦ. ᒐᕙᒪᒃᑯᓐᓂᓪᓕ ᐅᖃᓪᓚᖃᑦᑕᕈᓐᓇᑦᑎᐊᕆᐊᖃᕐᓇᖅᖢᓂ,” ᐅᖃᖅᑐᖅ.
ᑭᓯᐊᓂᓕ ᑕᒪᓐᓇ ᐅᖃᕈᑎᐅᙱᑦᑐᖅ ᑕᒪᒃᑯᐊ ᐃᓄᐃᑦ FASD-ᖃᖅᑐᑦ ᐃᖅᑲᓇᐃᔮᖃᕈᓐᓇᙱᑦᑎᐊᕐᓂᖏᓐᓂᒃ.
“ᐃᖅᑲᓇᐃᔮᖃᓕᕈᓐᓇᕐᑐᑦ, ᑭᓯᐊᓂᓕ ᐃᖅᑲᓇᐃᔮᖏᓐᓄᑦ ᑲᒪᒋᔭᐅᖃᑦᑕᕆᐊᖃᕋᔭᖅᖢᑎᒃ,” ᐅᖃᖅᑐᖅ.
ᐆᒧᖓᓕ ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎᒧᑦ ᐋᑕᒻ ᐋᕆᐊᒃ ᓚᐃᑦᓯᑑᓐᒧᑦ, ᐱᒻᒪᕆᐊᓘᕗᖅ ᐃᓕᓐᓂᐊᕐᓂᓕᕆᔨᒃᑯᑦ ᓇᓗᓇᐃᕐᓯᓯᒪᓗᑎᒃ ᓱᕈᓯᕐᓂᑦ ᐋᓐᓂᐊᓕᖕᓂᒃ FASD-ᒥᑦ ᐊᒻᒪᓗ ᐃᑲᔪᖅᑕᐅᑎᑕᐅᓗᑎ ᖃᓄᑦᑎᒃᑯᑦ.
“ᑲᒪᒋᔭᐅᑲᐅᖅᑐᕐᓂᖅ ᐱᒻᒪᕆᐅᕗᖅ ᑕᒪᒃᑯᓄᖓ FASD-ᒥ ᐋᓐᓂᐊᖃᖅᑐᓄᑦ, ᓲᖃᐃᒻᒪ ᐃᑲᔪᕆᐊᖃᕋᑦᑎᒍᑦ ᐋᓐᓂᐊᕆᔭᒥᓄᑦ ᖃᓄᐃᓕᐅᕈᑎᖃᕈᓐᓇᕐᓗᑎᒃ ᑭᖑᕙᓗᐊᙱᓐᓂᖏᓐᓂᒃ,” ᓚᐃᑦᓯᑑᓐ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
“ᐅᒃᐱᕈᓱᒃᐳᖓ ᐃᓕᓐᓂᐊᕐᓂᓕᕆᔨᒃᑯᑦ ᑕᒪᑐᒥᖓ ᐃᓱᒪᒋᔭᖃᖅᑳᕐᓯᒪᓗᑎᒃ ᐊᔪᕈᓐᓃᕐᓴᖅᑎᑦᑐᔪᓐᓇᕐᓂᕐᒥᒃ ᐃᓕᓐᓂᐊᕐᕕᑦᑎᓐᓂᒃ ᓇᓗᓇᐃᕐᓯᔪᓐᓇᕐᓂᕐᒥᒃ ᐃᓕᓐᓂᐊᖅᑎᓂᒃ ᑕᐃᒪᓐᓇ ᐋᓐᓂᐊᖃᕈᒥᒋᔭᐅᔪᓂᒃ,” ᐅᖃᖅᑐᖅ.
ᑭᓯᐊᓂᓕ ᒫᓐᓇ, ᐅᓄᙱᑦᑐᑯᓗᐃᑦ ᓄᓇᕗᒻᒥᐅᑦ FASD-ᒥ ᐋᓐᓂᐊᖃᖅᑐᑦ ᖃᐅᔨᓴᖅᑕᐅᕙᒃᐳᑦ ᐅᕝᕙᓘᓐᓃᑦ ᐋᓐᓂᐊᖃᕐᓂᖏᓐᓂᒃ ᖃᐅᔨᔭᐅᓯᒪᕗᑦ ᓄᓇᕗᒥᑦ, ᕉᔅ ᐅᖃᖅᑐᖅ, ᑭᓯᐊᓂ ᑕᒪᒃᑯᐊ ᓄᒃᑎᕐᓯᒪᓕᕐᑐᑦ ᖃᓪᓗᓈᓄᑦ.
“ᐃᑲᔪᖅᑕᐅᓚᐅᕐᓯᒪᙱᒻᒪᑕ ᖃᐅᔨᓴᖅᑕᐅᓂᒃᑯᑦ ᐅᕝᕙᓘᓐᓃᑦ ᐋᓐᓂᐊᖃᕐᓂᖏᓐᓂᒃ ᖃᐅᔨᔭᐅᓯᒪᙱᖢᑎᒃ ᑭᓯᐊᓂ ᖃᓪᓗᓈᓄᑦ ᓅᓐᓂᕈᑎᒃ, ᒪᓐᑐᕆᐊᒧᑦ ᐋᑐᕚᒧᓪᓘᓐᓃᑦ, ᐅᕝᕙᓘᓐᓃᑦ ᓂᕈᐊᕆᔭᐅᓯᒪᓂᕐᒧᑦ ᖃᐅᔨᓴᕐᓂᕐᒧᑦ ᐅᕘᓇ ᓯᑖᓐᑕᓐ ᐋᓐᓂᐊᕕᒃᑯᑦ ᔭᓗᓇᐃᒥᑦ,” ᕉᔅ ᐅᖃᖅᑐᖅ.
(0) Comments