ᐃᓅᓪᓗᑎᒃ ᓴᓇᔨᐅᔪᑦ ᓇᐃᑦᑐᒦᓕᖅᐳᑦ ᓵᓚᖃᑐᐃᓐᓇᕆᐊᖃᖅᖢᑎᒃ $20K ᐊᔾᔨᙳᐊᓕᖕᓂ ᐅᖃᓕᒫᒐᕐᒧᑦ ᓵᓚᖃᐅᓯᐊᖓᓐᓂ
ᑖᓐᔭ ᑕᒑᖅ ᐊᒻᒪ ᓰ ᐳᑐᒎᑉ ᐅᖃᓕᒫᒐᖓ ‘It Bears Repeating’ ᓇᐃᑦᑐᒦᓕᖅᐳᑦ ᓵᓚᖃᑐᐃᓐᓇᕆᐊᖃᖅᖢᑎᒃ ᐅᒃᑐᐱᕆ 27−ᒥ ᓵᓚᖃᐅᓯᐊᖑᔪᒧᑦ
It Bears Repeating, ᑎᑎᕋᖅᑕᐅᔪᒥ ᐃᓄᖕᒥ ᑲᑕᔾᔭᖅᑎᐅᔪᒥ ᑖᓐᔭ ᑕᒑᖅ ᐊᒻᒪ ᑎᑎᕋᐅᔭᖅᑕᐅᓪᓗᓂ ᑭᙵᕐᒥᐅᑕᒧᑦ ᖃᓪᓗᓈᖅᑕᒧᑦ ᐊᒥᓱᓕᐅᖅᑎ ᓰ ᐳᑐᒍᕐᒧᑦ, ᓇᐃᑦᑐᒦᓕᖅᐳᑦ ᓵᓚᖃᑐᐃᓐᓇᕆᐊᖃᖅᖢᑎᒃ $20,000−ᒥ ᒥᐊᕆᓕᓐ ᐸᐃᓕ ᐊᔾᔨᙳᐊᓕᖕᓂ ᐅᖃᓕᒫᒐᕐᒥ ᓵᓚᖃᐅᓯᐊᖑᔪᒥ. ᓵᓚᒃᓴᖅᑎᑦ ᐅᖃᐅᓯᐅᓂᐊᖅᐳᑦ ᐅᒃᑐᐱᕆ 27−ᒥ ᑐᕌᓐᑐᒥ. ᐅᓂᒃᑳᖅᑐᐊᖅ ᓴᖅᑭᑎᑦᑎᕗᖅ ᓱᕈᓯᕐᓄᑦ ᐅᑭᐅᓕᖕᓄᑦ 3−ᒥ 7−ᒧᑦ ᓈᓴᐅᑎᓄᑦ, ᐃᓄᒃᑎᑐᑦ ᐅᖃᐅᓯᖓᓐᓂ ᐃᓕᓐᓂᐊᖅᑎᑦᑎᓂᐅᔪᓂ, ᐊᒻᒪ ᓇᓄᐃᑦ ᐱᐅᓯᖏᓐᓂ. (ᐊᔾᔨᙳᐊᖅ Penguin Random House Canada−ᑯᓐᓂ)
For English version, see Inuit creators shortlisted for $20K Canadian picture book prize
ᓱᕈᓯᕐᓄᑦ ᐅᖃᓕᒫᒐᕐᒥ ᑎᑎᕋᖅᑕᐅᔪᒥ ᑲᑕᔾᔭᖅᑎᒥ ᑖᓐᔭ ᑕᒑᕐᒧᑦ ᐊᒻᒪ ᑎᑎᕋᐅᔭᖅᑕᐅᓪᓗᓂ ᑭᙵᕐᒥᐅᑕᒥ ᖃᓪᓗᓈᖅᑕᒧᑦ ᐊᒥᓱᓕᐅᖅᑎ ᓰ ᐳᑐᒍᖅ ᓇᐃᑦᑐᒦᓕᖅᐳᑦ ᓵᓚᖃᑐᐃᓐᓇᕆᐊᖃᖅᖢᓂ ᐊᑕᐅᓯᐅᔪᒥ ᑲᓇᑕᐅᑉ ᖁᑦᑎᓛᖑᔪᒥ ᓵᓚᖃᐅᓯᐊᖏᓐᓄᑦ ᓱᕈᓯᕐᓄᑦ ᐅᖃᓕᒫᒐᓕᐊᖑᔪᓄᑦ.
It Bears Repeating, ᐅᖃᓕᒫᒐᓕᐊᖑᔪᒥ Tundra ᐅᖃᓕᒫᒐᓄᑦ ᐋᒍᔅᑎ 2024−ᒥ, ᐊᑕᐅᓯᐅᓪᓗᓂ ᑕᓪᓕᒪᓂ ᑭᖑᓪᓕᖅᐹᖅᑎᐅᔪᓄᑦ $20,000 ᒥᐊᕆᓕᓐ ᐸᐃᓕ ᐊᔾᔨᙳᐊᓕᖕᓂ ᐅᖃᓕᒫᒐᕐᒥ ᓵᓚᖃᐅᓯᐊᖑᔪᒥ, ᑲᓇᑕᒥ ᓱᕈᓯᕐᓄᑦ ᐅᖃᓗᒫᒐᖃᕐᕕᖓ ᐅᖃᐅᓯᖃᓚᐅᖅᐳᖅ ᐋᒍᔅᑎ 27−ᒥ.
ᓂᕈᐊᖅᑎᐅᔪᑦ ᑕᐃᓚᐅᖅᐸᖓ “ᐱᐅᔪᒻᒪᕆᐊᓘᓪᓗᓂ ᓇᐃᓴᐃᓂᕐᒧᑦ ᐅᖃᓕᒫᒐᕐᒥ ᐃᓚᐅᑎᑦᑎᔪᒥ ᐅᖃᓕᒫᖅᑎᓂ ᖃᔅᓯᒐᓚᖕᓄᑦ ᑭᒡᓕᐅᔪᓄᑦ.”
ᐅᓂᒃᑳᖅᑐᐊᖅ ᓴᖅᑭᑎᑦᑎᕗᖅ ᐅᖃᓕᒫᖅᑎᓄᑦ ᐅᑭᐅᓕᖕᓄᑦ 3-ᒥ 7-ᒧᑦ ᓈᓴᐅᑎᓄᑦ ᓴᓂᓕᐊᓂ ᐃᓄᒃᑎᑐᑦ ᐅᖃᐅᓯᕐᒥ ᐃᓕᓐᓂᐊᖅᑎᑦᑎᓂᐅᔪᓂ ᐊᒻᒪ ᐱᐅᓯᖏᓐᓂ ᓇᓄᕐᓂᑦ, ᑐᓴᒐᒃᓴᓕᐊᖅ ᐅᖃᓚᐅᖅᐳᖅ.
ᑕᒪᑐᒪᓂ ᐊᕐᕌᒎᔪᒥ ᓂᕈᐊᖅᑎᐅᔪᑦ ᓵᓚᖃᐅᓯᐊᒧᑦ ᐃᓚᖃᖅᐳᖅ ᕚᓐᑰᕙᒥ ᐃᓕᓴᐃᔨᐅᔪᒥ-ᐅᖃᓕᒫᒐᖃᕐᕕᖕᒥ ᑲᒪᔨᐅᔪᒥ ᔭᐃᑦ ᓖ, ᓱᕈᓯᕐᓄᑦ ᓯᐊᒻᒪᖅᑎᑦᑎᓂᕐᒧᑦ ᐱᓕᕆᔨᒻᒪᕆᒃ ᔮᓂᔅ ᓈᔅᑦᐹᑭᓐ ᐊᒻᒪ ᓯᓚᑦᑐᖅᓴᕐᕕᒡᔪᐊᒥ ᐃᓕᓴᐃᔨ ᓕᐊᕆ ᓱᐊᑦᔅᒥ.
ᒥᐊᕆᓕᓐ ᐸᐃᓕ ᓵᓚᖃᐅᓯᐊᖅ, ᓴᖅᑭᑎᑕᐅᔪᒥ 2006−ᒥ, ᐅᐱᒋᔭᖃᖅᐳᖅ ᑲᓇᑕᐅᑉ ᒍᖁᑦᑎᓛᖑᔪᒥ ᐊᔾᔨᙳᐊᓕᖕᓂ ᐅᖃᓕᒫᒐᕐᓂ. ᓇᓗᓇᐃᖅᓯᔪᒥ 20−ᖓᓂ ᐊᕐᕌᒍᖓᓂ, ᑐᓂᓯᓯᒪᕗᖅ $350,000−ᓂ ᑲᓇᑕᒥ ᐅᖃᓕᒫᒐᓕᐅᖅᑎᓄᑦ ᐊᒻᒪ ᑎᑎᕋᐅᔭᖅᑎᓄᑦ.
ᐊᑕᐅᓯᐅᕗᖅ 7−ᖑᔪᓂ ᓵᓚᖃᐅᓯᐊᒃᓴᓂ ᑲᓇᑕᒥ ᓱᕈᓯᕐᓄᑦ ᐅᖃᓕᒫᒐᖃᕐᕕᖓᑕ ᑐᓂᓯᓂᐊᕐᓂᖓᓂ ᑕᒪᑐᒪᓂ ᐊᕐᕌᒎᔪᒥ, ᑲᑎᙵᓂᐅᔪᒥ ᐊᑭᓪᓗᐊᓕᖕᒥ $52,500−ᓂ. ᐊᕕᒃᑐᖅᓯᒪᓂᐅᔪᓂ ᐃᓚᖃᖅᐳᖅ ᑕᐃᔅᓱᒪᓂᑐᖃᖅ ᐱᓪᓚᕆᐅᙱᑦᑐᒥ, ᖃᐅᔨᓴᕐᓂᕐᒥ ᐱᓪᓚᕆᐅᙱᑦᑐᒥ ᐊᒻᒪ ᑐᐊᑐᙳᐊᖅᑕᐅᓂᐅᔪᒥ, ᐃᓅᓱᒃᑐᓄᑦ ᐱᓪᓚᕆᐅᙱᑦᑐᒥ, ᐱᓪᓚᕆᐅᔪᓄᑦ ᐊᒻᒪ ᓯᕗᓪᓕᖅᐹᒥ ᐅᖃᓕᒫᒐᓕᐊᖑᔪᓄᑦ.
ᓵᓚᒃᓴᖅᑐᑦ ᐅᖃᐅᓯᐅᓂᐊᖅᐳᑦ ᐅᒃᑐᐱᕆ 27−ᒥ ᑐᕌᓐᑐᒥ ᖁᕕᐊᓱᒍᑕᐅᔪᒥ, ᖃᕋᓴᐅᔭᑎᒍᑦ ᑕᑯᒃᓴᐅᑲᐅᑎᒋᓂᐊᕆᓪᓗᓂ.
ᑕᒑᖅ, ᐃᖃᓗᒃᑑᑦᑎᐊᕐᒥᐅᑕᓪᓚᕆᐅᕗᖅ, Polaris ᓂᔾᔮᑎᑦᑎᓂᕐᒧᑦ ᓵᓚᖃᕋᓱᐊᕐᓂᐅᔪᒥ-ᓵᓚᒃᓴᖅᑎᐅᕗᖅ ᑲᑕᔾᔭᖅᑎ ᐊᒻᒪ ᑲᓇᑕᒥ ᐃᑲᔪᕐᓂᕐᒧᑦ ᐃᓕᓴᕆᔭᐅᓯᒪᔪᓂ ᐃᓚᒋᔭᐅᖃᑕᐅᕗᖅ. ᓯᕗᓪᓕᖅᐸᐅᔪᒥ ᐅᖃᓕᒫᒐᓕᐊᖓᓂ ᐃᓐᓇᕐᓄᑦ, Split Tooth, ᓵᓚᖃᓚᐅᖅᓯᒪᕗᖅ ᓄᓇᖃᖅᑳᖅᓯᒪᔪᓄᑦ ᓂᐱᓄᑦ ᓵᓚᖃᐅᓯᐊᒥᒃ ᖃᓪᓗᓈᑎᑐᑦ ᑎᑎᕋᖅᓯᒪᔪᒥ 2019−ᒥ ᐊᒻᒪ ᐱᓚᐅᖅᐳᖅ ᖃᔅᓯᒐᓚᖕᓂ ᐅᐱᒋᔭᐅᓂᐅᔪᓂ.
ᖄᒃᑲᓐᓂᐊᒍᑦ It Bears Repeating, ᑕᒑᖅ ᑎᑎᕋᖅᑎᐅᒋᕗᖅ ᐊᓯᐊᓂ ᓱᕈᓯᕐᓄᑦ ᑎᑎᕋᐅᔭᓕᖕᒥ ᐅᖃᓕᒫᒐᕐᒥ, I Would Give You My Tail, ᐅᖃᓕᒫᒐᓕᐊᖑᔪᒥ ᐊᐃᑉᕆᓕᒥ.
ᐳᑐᒍᖅ ᖃᐅᔨᒪᔭᐅᕐᔪᐊᖅᑐᒥ ᓴᓇᒃᑳᓗᖕᓂ ᐃᓚᖃᖅᐳᖅ ᐃᓚᖃᖅᑐᒥᐊᓈᓇᑦᑎᐊᖓ, ᖃᐅᔨᒪᔭᐅᕐᔪᐊᖅᑐᖅ ᐃᓅᓪᓗᓂ ᓴᓇᐅᒐᓕᕆᔨ ᐱᑦᓯᐅᓛᖅ ᐊᓲᓇ; ᐊᒻᒪ ᐊᖓᔪᖅᑳᖏᑦ, ᑎᑎᕋᐅᔭᖅᑎᕐᔪᐊᖅ ᓇᐸᑦᓯ ᐳᑐᒍᖅ ᐊᒻᒪ ᖃᓪᓗᓈᖅᑕᒧᑦ ᐊᒥᓱᓕᐅᖅᑎ ᐃᔨᕙᓪᓗᖅ ᐳᑐᒍᖅ. ᓄᑲᕆᔭᐅᒋᕗᖅ ᓴᓇᐅᔭᓕᕆᔨᐅᓚᐅᖅᑐᒥ ᐋᓂ ᐳᑐᒍᕐᒧᑦ.
ᐱᒋᐊᓚᐅᖅᐳᖅ ᐃᖅᑲᓇᐃᔮᕆᓐᓇᕐᓂᐊᖅᑕᖓᓂ ᓴᓇᙳᐊᖅᑎᐅᓪᓗᓂ ᓴᖑᓚᐅᖅᑳᕋᓂ ᖃᓪᓗᓈᖅᑕᒧᑦ ᐊᒥᓱᓕᐅᕐᓂᕐᒧᑦ 2009−ᒥ. ᓰ ᐳᑐᒎᑉ ᐱᓕᕆᐊᖏᑦ ᓴᖅᑭᓯᒪᕗᑦ ᑭᙵᕐᓂ ᐊᕐᕌᒍᑕᒫᒥ ᖃᓪᓗᓈᖅᑕᒧᑦ ᐊᒥᓱᓕᐅᕐᓂᕐᒧᑦ ᑲᑎᙵᓂᐅᔪᒥ ᑕᐃᒪᙵᓂ 2012−ᒥ ᐊᒻᒪ ᑕᑯᒃᓴᐅᑎᑕᐅᓯᒪᕗᑦ ᑲᓇᑕᓕᒫᒥ, ᔫᓇᐃᑎᑦ ᔅᑕᐃᑦᔅᓂ ᐊᒻᒪ ᔫᒪᓂᒥ, ᐃᓄᐃᑦ ᓴᓇᐅᒐᓕᕆᔨᒃᑯᑦ ᑐᙵᕕᐅᔪᖅ ᑕᑯᒃᓴᐅᑎᑕᐅᓂᖓ ᐅᖃᓚᐅᖅᐳᖅ.
(0) Comments