ᒥᑦᑎᒪᑕᓕᒃᒥᑦ ᒥᑭᑦᑐᑯᓗᒃ ᐃᒡᓗᒃᓴᖅ ᐃᓱᒪᒋᔭᐅᓕᕐᑐᖅ ᐃᒡᓗᖃᙱᓗᐊᕐᓂᕐᒧᑦ ᐃᑲᔪᕈᑎᐅᓇᔭᕆᐊᒃᓴᖓᓂᒃ

For English version, see Pond Inlet’s tiny home seen as chance to ease housing crisis

ᑕᑯᔭᒃᓴᐅᑎᑕᐅᔪᖅ ᕼᐋᒻᒪᓚᒃᑯᑦ ᑎᑎᕋᕐᕕᖓᑦᑕ ᓵᑦᑎᐊᖓᓂ ᒥᑭᑦᑐᑯᓗᒃ ᐃᒡᓗ ᓴᓇᓯᒪᔪᖅ ᐅᒥᐊᕐᔪᐊᒃᑰᕐᑐᓄᑦ ᐴᕆᔭᐅᕙᒃᑐᓂᒃ ᓴᕕᕋᔭᖕᒥ.

ᐱᓇᓱᐊᕈᓰᖕᓂ ᒪᕐᕉᖕᓂ ᓴᓇᔭᐅᓚᐅᕐᓯᒪᔪᖅ ᐊᒻᒪᓗ ᐊᖏᒡᓕᒋᐊᑐᐃᓐᓇᕆᐊᖃᖅᖢᓂ ᐊᒻᒪ ᐅᓄᕐᓯᒋᐊᕐᓗᒋᑦ, ᐊᒻᒪᓗ ᐊᑐᖅᑕᐅᔪᓐᓇᕆᓪᓗᓂ ᐃᒡᓗᒋᔭᐅᓚᐅᑲᒡᓗᓂ ᐃᒡᓗᒃᓴᖏᓐᓂᒃ ᐅᑕᖅᑭᔪᓄᑦ ᐊᒻᒪᓗ ᐃᓄᒋᐊᒃᑐᒦᙱᓚᐅᑲᒍᒪᓗᓂ ᐅᖃᓚᐅᕐᑐᖅ ᕼᐋᒻᒪᓚᒃᑯᑦ ᐊᐅᓚᑦᑎᔨᖓ ᑕᐃᕝ ᓯᑖᒃᓕ.

ᐊᑭᖓᓗ $20,000 ᐅᖓᑖᓃᙱᖢᓂ.

“[ᐅᓇ ᐊᖏᕐᕋᖅ] ᐃᑲᔪᕈᑎᐅᔪᓐᓇᖅᑎᐊᕐᑐᖅ ᐅᓄᕈᓘᔭᕐᑐᓂᒃ ᐃᓄᖕᓂ,” ᓯᑖᒃᓕ ᐅᖃᕐᑐᖅ. “ᐱᑖᕈᑦᑕ ᑕᐃᒪ ᐅᒥᐊᕐᔪᐊᒃᑰᖅᑐᓄᑦ ᐴᕆᔭᐅᕙᒃᑐᓂᒃ ᓴᕕᕋᔭᖕᓂᒃ.”

ᓄᓇᕗᒥᑦ ᒐᕙᒪᒃᑯ ᐃᓚᒌᓄᑦ ᐱᔨᑦᑎᕋᐅᑎᓕᕆᔨᖏᑦ ᑐᓂᓯᓚᐅᕐᓯᒪᖕᒪᑕ ᕼᐋᒻᒪᓚᒃᑯᓐᓂᒃ $40,000-ᓂ ᐄᐳᕈ ᐱᒋᐊᓕᓵᖅᑎᓪᓗᒍ ᑖᓐᓇ ᐱᓕᕆᐊᕆᔭᐅᓂᐊᕐᒪᓐ. ᐱᓕᕆᑎᑕᐅᔪᖅ ᑖᔅᓱᒥᖓ ᐃᒡᓗᒥ ᐱᐊᓂᒃᓯᓚᐅᕐᓯᒪᔪᖅ ᒪᐃ 20-ᒥ.

ᐃᓱᖓᓂ ᑭᐳᑕᖃᖅᖢᓂ ᓂᕆᕝᕕᒃᓯᐅᑎᒥᓐ. ᓴᓂᑦᑎᐊᖓᓂ ᐃᒐᖃᖅᖢᓂ ᕿᔪᖕᓄ ᐃᑯᒪᖃᑦᑕᖅᑐᒥ ᕿᑎᐊᓂ ᐃᒡᓘ, ᐊᒻᒪᓗ ᓂᕿᓕᐅᕐᕕᒃ ᒪᕐᕉᖕᓂ ᒪᒃᐱᖅᑕᖅᑐᖃᖅᖢᓂ ᐊᑭᓐᓇᒦᖢᑎᒃ.

ᐹᑕᖃᖅᖢᓂᖅ ᓂᕿᓕᐅᕐᕕᐅᑉ ᓴᓂᐊᓂ ᑖᓐᓇᓗ ᓯᓂᒡᕕᖕᒧᐊᕐᓇᖅᖢᓂ ᖁᓕᕇᓕᖕᓂ ᐃᒡᓕᖃᖅᖢᓂ ᒪᕐᕉᖕᓄ ᐃᓄᖕᓄ ᓈᒻᒪᒃᖢᓂ.

ᐃᒡᓘ ᐃᓗᖓ ᐊᒥᐊᖃᖅᖢᓂ ᐆᕆᓐᔾ ᐊᒻᒪ ᑐᖑᔪᕐᑐᒥ.

ᑖᒃᑯᐊ ᐃᒡᓗᐃᑦ ᐅᕿᓐᓂᖏᓐᓄᑦ ᑲᑭᐊᓕᖕᒧᑦ ᐊᓯᐊᓄᑦ ᓄᒃᑎᑦᑕᐅᔪᓐᓇᕐᒥᔪᑦ, ᑭᓯᐊᓂᓕ ᓱᕋᒃᓴᕋᐃᙱᑦᑐᖅ, ᐃᑭᐊᕐᒥᖃᑦᑎᐊᖅᖢᓂ, ᐹᑕᓖᒧᑦ ᐆᒻᒪᖅᑯᑎᖃᖅᖢᓂ ᐊᒻᒪᓗ ᑲᒪᒋᔭᒃᓴᐅᑦᑎᐊᖅᖢᓂ, ᓯᑖᒃᓕ ᐅᖃᕐᑐᖅ.

ᐊᓯᒃᑲᓐᓂᖏᓐᓂᒃ ᐴᕕᓂᕐᓂᒃ ᐃᓚᓯᔪᓐᓇᕐᑐᑦ ᐊᖏᒡᓕᒋᐊᖅᑎᓐᓇᓱᒡᓗᒍ, ᐅᖃᕐᑐᖅ, ᐊᒻᒪᓗ ᐅᐊᔭᓄᑦ ᐊᑦᑕᑕᕈᓐᓇᐅᑎᒥᒃ, ᖃᑦᑖᓗᖃᕐᓗᓂ ᐃᒪᕐᒧᑦ ᐊᒻᒪ ᑯᕕᖅᑕᕐᕕᓕᑕᐅᓗᓂ ᐊᒻᒪ ᐅᕕᓂᖕᓂᐊᕐᓇᖅᓗᓂ ᑯᕕᕙᓪᓕᐊᔪᒧᑦ. ᑕᒪᒃᑯᐊ ᐴᕕᓃᑦ ᐃᓚᒋᐊᕈᑎᐅᔪᑦ ᖄᖓᓅᖅᑕᐅᔪᓐᓇᖅᑐᑎᑦ, ᓴᓂᑦᑎᐊᖓᓄᓪᓘᓐᓃᑦ ᐊᒻᒪᓘᓐᓃᑦ ᑐᓄᐊᓄᓪᓘᓐᓃᑦ ᑖᔅᓱᒧᖓ.

ᓯᕗᓪᓕᖅᐹᖅ ᒥᑭᑦᑐᑯᓗᒃ ᐃᒡᓗ ᐊᖏᓂᓕᒃ 6 ᒦᑕᓂ ᑐᑭᒧᑦ ᐊᒻᒪ 2.4 ᒦᑕᐃ ᓴᓂᒧᑦ (20 ᕖᑦ ᑐᑭᒧᑦ ᐊᒻᒪ 8ᕖᑦ ᓴᓂᒧᑦ), ᑭᓯᐊᓂᓕ ᑖᒃᑯᐊ ᐊᔾᔨᒌᙱᑦᑐᓐᓇᖅᑐᑦ ᐃᓚᒋᐊᖅᑕᐅᓯᒪᓂᖏᓐᓂᒃ ᐊᓯᖏᓐᓂᒃ ᐴᕕᓂᕐᓂᒃ. ᕼᐋᒻᒪᓚᒃᑯᑦ ᑕᑯᔪᒪᔪᑦ ᖁᓕᓂᖅ ᐴᕕᓂᕐᓂᒃ ᐃᒡᓗᓕᐊᕆᔭᐅᔪᓂᒃ ᐊᒻᒪᓗ ᐊᖏᓂᖏ ᐊᔾᔨᒌᙱᓪᓗᑎᒃ ᒪᐅᖓ 12 ᒦᑕᓂ ᑐᑭᒧᑦ ᐊᒻᒪ 4.8 ᒦᑕᐃᑦ ᓴᓂᒧᑦ.

ᑕᐃᒪᓕ $50,000 ᐅᖓᑖᓃᙱᑦᑐᓄᑦ ᕼᐋᒻᒪᓚᒃᑯᑦ 1,500-ᓂ ᐃᓄᖃᖅᑐᑦ ᓴᓇᔪᓐᓇᕋᔭᕐᑐᑦ ᒪᕐᕉᖕᓂ ᐃᒡᓗᕈᓯᓖᖕᓂ ᐃᒡᓗᒋᔭᐅᓚᐅᑲᒍᓐᓇᖅᑐᓂᒃ, ᐅᖃᕐᑐᖅ.

“ᐊᔾᔨᒌᙱᕈᓘᔭᕐᑐᓂᒃ ᐋᖅᑭᒃᓱᖅᑕᐅᔪᓐᓇᕐᒪᑕ,” ᓯᑖᒃᓕ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᕼᐋᒻᒪᓚᒃᑯᑦ ᐋᖅᑭᒃᓯᔪᓐᓇᕋᔭᕐᓂᖏᓐᓂᒃ ᓯᕿᓂᕐᒧᑦ ᐆᒻᒪᖅᑯᑎᐅᓕᕈᓐᓇᖅᑐᓂᒃ ᑖᒃᑯᓄᖓ ᐃᒡᓗᓄᑦ.

“ᐱᐅᒋᓇᔭᒻᒪᕆᒃᑕᕋᓕ ᐃᒡᓗᓕᐅᕐᕕᖃᕐᓗᓂ ᑕᐃᒪᐃᑦᑐᓂᒃ ᓴᓇᓯᒪᔪᓂᒃ ᐃᒡᓗᒋᔭᐅᓚᐅᑲᒍᓐᓇᖅᑐᓂᒃ.”

ᓴᓇᑎᑕᐅᔪᖅ ᕼᐋᒻᒪᓚᒃᑯᓐᓂᒃ ᐃᓂᖃᓚᐅᕐᑐᖅ ᑰᓕᖕᕕᕕᓂᕐᒥᒃ ᑕᒪᒃᑯᐊ ᐅᒥᐊᕐᔪᐊᒃᑰᖅᑐᓄᑦ ᐴᕕᓂᕐᓂᒃ ᓴᕕᕋᔭᖕᓂ ᐃᒡᓗᓕᐅᖅᑎᑕᐅᓪᓗᓂ.

ᒥᑦᑎᒪᑕᓕᒃᒥ ᐊᑐᓚᐅᕐᑐᑦ $300,000-ᓂ ᑖᔅᓱᒥᖓ ᑰᓕᖕᕕᕕᓂᕐᒥᒃ ᓄᑖᙳᕆᐊᖅᑎᑦᑎᓂᕐᒧᑦ ᐱᖁᑎᖃᕐᕕᙳᖅᑎᑕᐅᓪᓗᓂ ᐊᒻᒪ ᓵᖓᓂᒃ ᓄᓇᓯᐅᑎᖃᕐᕕᖃᖅᖢᓂ — ᑖᓐᓇᓗ ᐱᓕᕆᔭᐅᕌᓂᓚᐅᕐᓯᒪᓪᓗᓂ ᑕᕿᑦ ᒫᕐᕉᒃ ᐱᖓᓱᓪᓘᓐᓃᑦ ᓯᕗᓂᐊᒍᑦ.

ᓯᑖᒃᓕ ᐅᖃᓚᐅᕐᑐᖅ ᐱᖓᓱᓂ ᐃᒡᓗᒃᓴᓂᒃ ᐊᑕᐅᑦᑎᒃᑯᑦ ᓴᓇᔪᖃᕈᓐᓇᕐᓂᕋᖅᖢᓂᐅᒃ ᑕᐃᒪᓐᓇᓗ 5-ᓂ 6-ᓄ ᐃᖅᑲᔮᒃᓴᓂ ᓴᖅᑭᑎᑦᑎᔪᓐᓇᖅᖢᓂ.

“ᑲᒪᓇᕋᔭᕐᑐᖅ ᖃᓄᐃᓕᖓᓇᔭᕐᓂᖓ ᑕᑯᓗᒍ,” ᐅᖃᕐᑐᖅ. “ᐃᖅᑲᓇᐃᔮᖃᖅᑎᑦᑎᔾᔪᑎᐅᓇᔭᕐᑐᖅ. ᐊᒻᒪᓗ ᓄᑖᖑᓗᓂ ᓄᓇᕗᒥ.”

ᒫᓐᓇᓕ ᐃᓱᒪᖕᓇᑐᐃᓐᓇᓕᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐃᑲᔫᑎᖃᖅᑎᑦᑎᓇᔭᕆᐊᒃᓴᖏᓐᓂᒃ ᒥᑦᑎᒪᑕᓕᖕᓂ ᓴᓇᒃᑲᓐᓂᕈᓐᓇᕐᓂᐊᕐᒪᑕ ᓄᓇᖁᑎᒋᔭᐅᔪᒥᓐ, ᓯᑖᒃᓕ ᐅᖃᕐᑐᖅ.

ᐃᓱᒪᔪᕐᓕ ᐃᓂᖃᖅᑎᑦᑎᔪᓐᓇᕐᓗᑎᒃ ᐃᒡᓗᓕᐅᕐᕕᐅᓂᐊᖅᑐᓂᒃ ᑖᒃᑯᓂᖓ ᒥᑭᑦᑐᑯᓗᖕᓂ.

ᑐᓄᓂᕐᒧᑦ ᒪᓕᒐᓕᐅᕐᑎ ᑭᐅᕋᓐ ᓄᑕᕋᖅ ᐅᖃᓚᐅᕐᑐᖅ ᑮᓇᐅᔭᕆᓂᖅ ᑖᒃᑯᓄᖓ ᒥᑭᑦᑐᑯᓗᖕᓄᑦ ᐃᒡᓗᓄᑦ ᐃᓱᒪᒋᔭᐅᑎᑦᑐᓐᓇᔭᕐᓂᖏᓐᓂ ᒐᕙᒪᒃᑯᑦ.

ᐅᖃᖅᖢᓂ ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯᑦ ᕿᓂᕐᓂᕋᖅᖢᓂᒋ ᐊᑭᑭᓐᓂᕐᓴᒃᑯᑦ ᐃᒡᓗᓕᐅᕈᑎᐅᔪᓐᓇᖅᑐᓂᒃ ᓄᓇᓕᖕᓂ ᐃᖃᓗᐃᑦ ᓯᓚᑖᓃᑦᑐᓂᒃ, ᐃᖃᓗᒃᑑᑦᑎᐊᑉ ᐊᒻᒪᓗ ᑲᖏᖅᖠᓂᐅᑉ.