ᐃᒡᓗᓕᒃᒥ ᒪᐃᔭᐅᓂᑯ ᒨᓕᓐ ᕋᓰᓄᔅ ᐸᓯᔭᒃᓴᐅᙱᑦᑐᖅ ᖁᓄᔪᕐᓂᐊᕐᓂᕐᒧᑦ

ᐃᖅᑲᖅᑐᐃᔨ ᑯᕆᔅᑎᐊᓐ ᓚᐃᐊᓐᔅ ᑕᐃᒪᓐᓇ ᐃᖅᑲᖅᑐᐃᓂᒃᑯᑦ ᐅᖃᓕᓚᐅᕐᑐᖅ ᓄᕕᐱᕆ 24-ᒥ ᐃᒡᓗᓕᒃᒥ.

ᐅᖃᒪᐅᕐᒥᔪᖅ ᐃᖅᑲᖅᑐᐃᔪᑦ ᓴᖅᑭᑎᑦᑎᔪᓐᓇᓚᐅᙱᓐᓂᖏᓐᓂᒃ ᑕᒪᑐᒥᖓ ᓴᖅᑭᑎᑦᑎᔾᔪᑎᐅᒻᒪᕆᒐᔭᖅᑐᓂᒃ ᖁᓄᔪᕐᓂᐊᕐᓂᕐᒧᑦ ᐸᓯᔭᒃᓴᙳᖅᑎᑦᑎᓂᖅ ᐊᑐᕐᑎᓪᓗᒍ.

“ᐃᖅᑲᖅᑐᐃᔨᑦ ᑕᒪᑐᒥᖓ ᐱᓕᕆᐊᒃᓴᖃᕐᒪᑕ ᐊᒻᒪᓗ ᕋᓰᓄᔅ ᑕᒪᑐᒧᖓ ᓴᖅᑭᑎᑦᑎᙱᑦᑐᓐᓇᖅᖢᓂ,” ᓚᐃᐊᓐᔅ ᐅᖃᕐᑐᖅ.

“ᑕᒪᑐᒧᖓ ᖃᓄᐃᓕᐅᕈᑎᕕᓂᐅᔪᑦ ᐊᖓᔮᖅᑐᕕᓂᕐᓂᙶᖅᓯᒪᔪᑦ ᐊᒻᒪᓗ ᐅᖃᐅᓯᐅᑲᑕᒃᖢᓂ ᑖᖅᑎᓯᒪᓂᐅᓂᖓᓂᒃ. ᐊᖓᔮᓗᐊᖅᑐᕕᓃᑦ ᐅᖃᐅᓯᖏᑦ ᐅᒃᐱᕐᓇᓗᐊᕈᓐᓃᔭᒻᒪᑕ ᑕᐃᒪᓐᓇ ᐋᖅᑭᒃᓯᔪᓐᓇᕈᑎᒋᔭᕋ.”

ᐊᕐᓇᖅ ᑕᐃᒪᐃᓐᓂᕋᐃᔪᖅ, ᑭᓇᐅᒪᙶᓪᓗ ᐅᖃᐅᓯᐅᔭᕆᐊᖃᙱᖢᓂ ᐃᖅᑲᖅᑐᐃᔨᓄᑦ ᑕᐃᒪᐃᖁᔭᐅᓂᖓᓄᑦ, ᐸᓯᔭᒃᓴᙳᖅᑎᑦᑎᓚᐅᕐᓯᒪᔪᖅ ᕋᓰᓄᔅᒥ ᖁᓄᔪᕐᓂᐊᖅᓯᓂᖓᓂ ᑖᔅᓱᒥᖓ ᐊᖑᑎᐅᑉ ᐊᖏᕐᕋᖓᓂ ᐃᒡᓗᓕᒃᒥ ᒫᑦᓯ 13, 2021 ᐅᓪᓛᖓᓂ, ᐅᓄᖓᓂ ᐃᒥᕈᓘᔭᓚᐅᖅᖢᑎᒃ.

ᓚᐃᐊᓐᔅ ᐅᖃᓚᐅᕐᑐᖅ ᑎᒥᐅᑉ ᖃᓄᐃᓕᖓᓂᖓᓄᑦ ᖃᐅᔨᓴᕈᑎ (DNA) ᓴᖅᑭᑎᑦᑎᓯᒪᓚᐅᕐᑐᖅ ᐱᖃᑎᒌᓚᐅᕐᓂᖏᓐᓂᒃ ᕋᓰᓄᔅ ᐊᒻᒪ ᐸᓯᔭᒃᓴᙳᖅᑎᑦᑎᓯᒪᔪᖅ.

ᑭᓯᐊᓂᓕ ᓚᐃᐊᓐᔅ ᐅᖃᓚᐅᕐᑐᖅ ᕋᓰᓄᔅ ᐊᒻᒪ ᐸᓯᔭᒃᓴᙳᖅᑎᑦᑎᓯᒪᔪᖅ ᑕᒪᑐᒥᖓ ᖃᐅᔨᔪᑐᐊᖑᓚᐅᕐᓂᖏᓐᓂᒃ.

“ᑕᐃᒪᐃᓕᐅᕐᓂᐊᕐᓗᑎᒃ ᖁᓄᔪᕐᓂᐊᓂᕋᐃᓂᖅ ᐃᖅᑲᖅᑐᐃᔨᑦ ᓴᖅᑭᑎᑦᑎᔭᕆᐊᖃᒻᒪᕆᓚᐅᕐᑐᑦ ᐅᓇ ᐸᓯᔭᒃᓴᐅᑎᑦᑎᔪᖅ ᐊᖏᓚᐅᙱᓐᓂᖓᓂᒃ ᐱᖃᑎᒌᖕᓂᕐᒧᑦ,” ᓚᐃᐊᓐᔅ ᐅᖃᕐᑐᖅ.

ᐃᖅᑲᖅᑐᖅᑕᐅᑎᓪᓗᒍ ᕋᓰᓄᔅ ᐱᖃᑎᖃᓚᐅᕐᓂᕐᒥᓂ ᐅᖃᓚᐅᕐᑐᖅ ᒪᓕᒃᖢᑎᒃ ᑎᒥᐅᑉ ᖃᓄᐃᓕᖓᓂᖓᓄᑦ ᖃᐅᔨᓴᕈᑎᓂᒃ. ᑭᓯᐊᓂᓕ ᐅᖃᓚᐅᕐᒥᔪᖅ “ᑕᖅᑎᓯᒪᑦᑎᐊᓚᐅᕐᓂᕋᖅᖢᓂ” ᐅᓐᓄᐊᖓᓂ ᐹᑎᖃᖅᑎᓪᓗᒋ ᐊᒻᒪᓗ ᐃᖅᑲᐅᒪᙱᓐᓂᕋᖅᖢᓂ ᑖᓐᓇ ᐊᕐᓇᖅ ᐊᖏᕐᕋᖓᓃᓚᐅᕐᓂᖓᓂᒃ.

ᐸᓯᔭᒃᓴᙳᖅᑎᑦᑎᓯᒪᔪᖅ ᐅᖃᓚᐅᕐᑐᖅ ᑕᖅᑎᓯᒪᓚᐅᕐᓂᕋᕆᓪᓗᓂ ᕋᓰᓄᔅ ᐃᒡᓗᖓᓂ ᐅᓐᓅᓚᐅᕐᑐᒥ ᐊᒻᒪᓗ ᐸᓯᔭᒃᓴᐅᔾᔪᑎᒋᔭᖓᓂᒃ.

ᓚᐃᐊᓐᔅ ᐅᖃᐅᓯᖃᓚᐅᕐᒥᔪᖅ ᐸᓯᔭᒃᓴᐅᓂᐊᕐᒪᖔᑦ ᐅᖃᖃᑎᒌᑲᑕᖕᓂᖅᒧᑦ ᑖᓐᓇ ᐸᓯᔭᒃᓴᐅᑎᑦᑎᔪᖅ ᐃᖅᑲᓇᐃᔭᖃᑐᒥᓄᑦ ᐅᖃᐅᓯᖃᓚᐅᕐᓯᒪᓂᖓᓂ ᑕᖅᑭᑦ 6 ᐊᓂᒍᕐᓯᒪᓕᖅᑎᓪᓗᒍ.

ᐅᕘᓇᓕ ᐸᓯᔭᒃᓴᒥᒃ ᓴᐳᓐᓂᐊᖅᑎᓄᑦ ᐸᓯᔭᒃᓴᐅᑎᑦᑎᔪᖅ ᐃᖅᑲᖅᓇᐃᔭᖃᑎᒥᓄᑦ ᐅᖃᓚᐅᕐᓂᖓᓂᒃ “ᑲᑉᐱᐊᓱᖕᓂᕋᖅᖢᓂ ᐊᒻᒪ ᖃᓄᐃᓕᐅᕐᓂᐊᕆᐊᒃᓴᖅ ᓇᓗᓕᕐᓯᒪᓂᕋᖅᖢᓂ” ᐊᒻᒪᓗ ᐱᖃᑎᖃᓚᐅᕆᐊᒃᓴᖓᓂ ᐊᖏᕐᓯᒪᓂᒃᑯᑦ ᐅᕝᕙᓘᓐᓃᑦ ᖁᓄᔪᕐᓂᐊᖅᑕᐅᓚᐅᕐᒪᖔᓪᓘᓐᓃᑦ ᖃᐅᔨᒪᓪᓚᕆᙱᖢᓂ.

“ᖃᐅᔨᔭᐅᔾᔪᑎᐅᔪᑦ ᐅᖃᐅᓯᐅᔪᓂᒃ ᓇᓗᓇᕈᑎᐅᕈᔪᖕᒪᑦ ᐅᖃᕈᑎᒋᔪᓐᓇᖅᖢᒍ ᐸᓯᔭᒃᓴᐅᑎᑦᑎᔫᑉ ᐅᖃᐅᓯᖏᓐᓂ ᖃᓄᐃᓕᐅᕈᑎᕕᓂᕐᓂᒃ ᒨᓕᓐᑰᓪᓗᑎᒃ,” ᓚᐃᐊᓐᔅ ᐅᖃᕐᑐᖅ.

ᓯᕗᓪᓕᖅᐹᒥ ᐃᖅᑲᖅᑐᐃᔨᓄᑦ ᐊᐱᕐᓱᖅᑕᐅᓕᖅᑎᓪᓗᒍ ᐃᖅᑲᖅᑐᐃᓂᖅ ᐱᒋᐊᖅᑎᓪᓗ ᓄᕕᐱᕆ 20-ᒥ, ᐊᕐᓇᖅ ᐅᖃᓚᐅᕐᓯᒪᔪᖅ ᐃᖅᑲᐅᒪᙱᓐᓂᕋᖅᖢᓂ ᐅᖃᓪᓚᖃᑎᖃᕐᓂᖓᓂᒃ ᐃᖅᑲᓇᐃᔭᖃᑎᒥᓂᒃ ᑭᓯᐊᓂᓕ ᑕᐃᒪᐃᓐᓂᕋᐃᓚᐅᕐᑐᖅᖅ.

“ᐃᓱᒪᒋᓪᓗᒍ ᑭᓯᐊᓂ ᐸᓯᔭᒃᓴᐅᑎᑦᑎᔪᖅ ᐅᖃᓚᐅᕐᓂᖓᓂᒃ ᐊᓯᒥᓄ ᖃᐅᔨᒪᙱᓐᓂᕋᖅᖢᓂ ᒨᓕᓐᒥ ᐱᖃᑎᖃᓚᐅᕐᒪᖔᑦᒪ ᑕᐃᒪᓕ ᐃᓱᒪᖕᓇᑐᐃᓐᓇᕐᒪᑦ ᐊᖏᓚᐅᕆᐊᒃᓴᖓᓂᒃ ᐱᖃᑎᖃᕐᓂᕐᒧᑦ,” ᐃᖅᑲᖅᑐᐃᔨ ᐅᖃᕐᑐᖅ.

ᓚᐃᐊᓐᔅ ᐅᖃᓚᐅᕐᑐᖅ ᕋᓰᓄᔅ ᐸᓯᔭᒃᓴᐅᖏᓐᓂᕋᖅᖢᓂᐅᒃ ᑕᐃᒪᓕ ᐅᖃᕈᓐᓇᓚᐅᙱᑦᑐᖅ ᐱᖃᑎᒌᓚᐅᕆᐊᒃᓴᖓᓂᒃ ᖁᓄᔪᕐᓂᐊᕐᓂᒃᑯᑦ ᐅᕝᕙᓘᓐᓃᑦ ᐸᓯᔭᒃᓴᐅᑎᑦᑎᔪᖅ ᓴᒡᓗᔭᕆᐊᒃᓴᖓᓂᒃ.

“ᑕᐃᒪᓐᓇ ᐅᖃᕐᓯᒪᙱᑦᑐᖓ,” ᐅᖃᓚᐅᕐᑐᖅ,” ᐅᖃᓚᐅᕐᑐᖅ, ᐅᖃᒃᑲᓐᓂᖅᖢᓂ ᕋᓰᓄᔅ ᑕᒪᑐᒧᖓ ᖁᓄᔪᕐᓂᐊᖅᓂᑰᒋᐊᒃᓴᖓᓂ ᐅᖃᕈᓐᓇᙱᖢᓂ.