ᐊᖏᔪᕈᓗᐃᑦ ᐊᓯᔾᔨᕈᑎᐅᔪᑦ ᑎᑎᖃᓕᕆᓂᕐᒧᑦ ᐃᖃᓗᖕᓂ ᓴᐳᓐᓂᐊᕐᓂᕐᒧᑦ ᐃᓱᒫᓘᑎᒋᔭᐅᓕᕐᑐᑦ

For an English version of this story, please see Mass changes to mail system in Iqaluit draw security concerns.

ᓄᓇᕗᒥᑦ ᑐᓴᒐᒃᓴᓄᑦ ᐊᒻᒪ ᑕᒪᐅᖓᒥᐊᕆᐊᖃᙱᑦᑐᓄᑦ ᑲᒥᓯᓇ ᐊᐱᖅᑯᑎᖃᓯᔪᖅ ᑎᑎᖃᐃᑦ ᓴᐳᓐᓂᐊᖅᑕᐅᓯᒪᔭᕆᐊᖃᕐᒪᖔᑕ ᐊᓯᔾᔩᑲᑕᓚᐅᖅᖢᑎᒃ ᑎᑎᖃᓕᕆᓂᕐᒥᒃ ᐃᖃᓗᖕᓂ.

ᑲᓇᑕᒥ ᑎᑎᖃᒃᑯᕕᒃ ᒪᑐᐃᕐᓯᓚᐅᕐᒪᑦ ᐊᐃᑉᐸᖓᓂ ᑎᑎᖃᒃᑯᕕᒃᒥ ᓄᓇᓕᐸᐅᔭᓂ ᐅᒃᑑᐱᕆᐅᓚᐅᕐᑐᒥᓐ. ᐅᓇ ᐊᓯᔾᔨᕐᓂᖅ ᓄᓇᖃᕐᑐᓂᒃ ᐊᓯᔾᔩᕈᑎᐅᔭᕆᐊᖃᓕᓚᐅᕐᑐᖅ ᑐᕌᕈᑎᖏᓐᓂᒃ ᒪᑯᓇᙵᑦ ᑎᑎᖃᖃᕐᕕᐅᑉ ᓇᐃᓴᐅᑎᖏᓐᓂᒃ ᐃᒡᓗᖏᑦᑕ ᑐᕌᕈᑎᖏᓐᓄᑦ. ᐅᑯᐊ ᓄᑖᑦ ᐃᒡᓗᖏᑦᑕ ᑐᕌᕈᑎᖏᑦ ᐊᒃᑐᐊᓂᖃᕐᓂᐊᖅᑐᑦ ᑎᑎᖃᒃᑯᕕᒋᓂᐊᖅᑕᖏᑦᑕ ᓇᐃᓴᐅᑎᖏᓐᓄᑦ.

ᖃᖓᑦᑎᐊᓕᓵᖅ ᑎᑎᕋᖅᓯᒪᔭᖏᓐᓂᒃ ᐅᓇ ᒍᕌᒻ ᓯᑎᐅᓪ ᐊᐱᕆᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐱᖓᓱᑦ ᐱᓕᕆᕝᕕᖏᓐᓄᑦ ᐊᖓᔪᖅᑳᓄᑦ ᐅᑯᓇᓂ —ᑮᓇᐅᔭᓕᕆᔨᒃᑯᑦ, ᐃᓄᓕᕆᔨᒃᑯᓐᓄᑦ ᐊᒻᒪᓗ ᐃᖅᑲᓇᐃᔮᒃᓴᓕᕆᔨᓄᑦ — ᖃᐅᔨᓴᖁᓪᓗᓂᒋᑦ ᑕᒪᐅᖓᒥᐊᕆᐊᖃᙱᑦᑐᑦ ᐅᓗᕆᐊᓇᖅᑐᒦᑦᑕᕆᐊᒃᓴᖏᓐᓂᒃ ᐊᓯᔾᔨᕈᑎᐅᔪᒧᑦ.

“ᑭᓯᐊᓂᓕ ᑕᒪᐃᑎᒍᑦ ᒪᐅᓇ ᑐᓴᐅᒪᔾᔪᑎᓕᕆᓂᒃᑯᑦ ᐊᒻᒪ ᐃᓱᒪᒋᔭᐅᔪᑎᒍᑦ ᐅᓇ ᐊᓯᔾᔨᖅᐸᓪᓕᐊᓂᖅ ᐊᓂᒍᐃᑦᑎᐊᕈᑎᐅᓗᐊᙱᒻᒪᑦ,” ᓯᑎᐅᓪ ᐅᖃᓚᐅᕐᑐᖅ ᑎᑎᕋᖅᑕᖏᓐᓂᒃ. “ᑐᑭᓯᓯᒫᓂᑦᑎᐊᖂᙱᒻᒪᑕ ᐊᒻᒪ ᑭᖑᕙᓯᒃᖢᓂ ᐊᒻᒪᓗ ᐅᓄᕐᓂᕐᓴᐅᖂᔨᓪᓗᑎᒃ ᑎᑎᖃᑦ ᐱᔭᐅᓯᒪᙱᑦᑐᑦ ᐊᓯᐊᓄᐊᖅᑕᐅᓯᒪᔪᓪᓘᓐᓃᑦ.”

ᒪᑯᐊ ᐊᑭᓕᖅᑕᐅᔾᔪᑏᑦ ᓇᓕᖃᙱᓪᓗ ᐊᒻᒪ ᑖᒃᓰᔭᕈᑏᑦ ᑲᒪᒋᔭᐅᔪᓂᒃ ᑮᓇᐅᔭᓕᕆᔨᒃᑯᓐᓄᑦ ᐊᓯᖏᑦ, ᓯᑎᐅᓪ ᐅᖃᓚᐅᕐᑐᖅ ᐃᓱᒫᓘᑎᖃᕐᓂᖓᓂᒃ ᑕᒪᐅᖓᒥᐊᖅ ᑐᓴᐅᒪᔭᐅᔭᕆᐊᖃᙱᑦᑐᓂᒃ ᑎᑎᖃᓂᒃ ᐅᑯᓄᖓ ᐱᓕᕆᐊᖑᕙᒃᑐᓂᒃ ᐃᓄᓕᕆᔨᒃᑯᓐᓄᑦ ᐊᒻᒪ ᐃᖅᑲᓇᐃᔮᒃᓴᓕᕆᔨᓄᑦ.

ᐅᓇ ᓄᑖᖅ ᑎᑎᖃᒃᑯᕕᐅᓕᕐᑐᖅ ᖃᖃᔮᕐᒥ ᓈᒻᒪᒋᔭᐅᓯᒪᑲᑕᙱᑦᑐᖅ ᓄᓇᖃᖅᑐᓂᒃ ᑕᐃᒪᙵ ᐊᑐᖅᑕᐅᓕᓚᐅᕐᒪᑦ. ᐃᓱᒫᓘᑎᒋᔭᐅᔪᑦ ᒪᑯᐊ ᓇᓗᓇᕐᓂᖓ ᓄᑖᖅ ᑎᑎᖃᓕᕆᔾᔪᑎ ᒪᓕᒃᖢᑎᒃ ᐊᖅᑯᑎᒃᑯᑦ ᓇᐃᓴᐅᑎᐅᕙᒃᑐᑦ ᒪᐅᖓ ᐅᓄᕈᓘᔭᖅᑐᓂᒃ ᑐᑭᓕᕇᒃᑐᓂᒃ ᑎᑎᖃᒃᑯᕕᓕᐊᖅᑐᓂᒃ ᐊᒻᒪᓗ ᑎᑎᖃᑦ ᐊᒻᒪ ᓇᒡᓯᐅᔾᔪᓯᐊᑦ ᑭᖑᕙᖃᑦᑕᖅᑐᓂᒃ ᑲᒪᒋᔭᐅᑦᑎᐊᙱᑦᑐᓂᓪᓘᓐᓃᑦ.

“ᑕᑯᓯᒪᓕᕋᒪ ᐊᒻᒪ ᑐᓴᖅᐸᒃᖢᖓ ᐅᓗᕆᐊᓇᖅᑐᒦᓐᓂᖏᓐᓂᒃ ᑎᑎᖃᑦ ᑕᒪᐅᖓᒥᐊᕆᐊᖃᙱᑦᑐᑦ ᐊᒻᒪ ᑎᑎᕋᕐᕕᐅᓯᒪᔪᓄᑦ ᑎᑭᑉᐸᙱᑦᑐᑦ, ᐅᕝᕙᓘᓐᓃᑦ ᑎᑎᕋᕐᕕᐅᓯᒪᙱᑦᑐᓄᐊᖅᑕᐅᑐᐃᓐᓇᕆᐊᖃᖅᖢᑎᒃ,” ᓯᑎᐅᓪ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ.

“ᑐᑭᓯᔪᒪᒐᒪ ᑖᒃᑯᐊ ᐱᓕᕆᕝᕕᐅᔪᑦ ᖃᓄᐃᓕᐅᕐᒪᖔᑕ ᖃᐅᔨᓴᕐᓂᕐᒥᒃ ᐅᓗᕆᐊᓇᖅᑐᓃᑦᑐᓂᒃ ᑎᑎᖃᓂᒃ ᐊᓯᖏᓐᓄᐊᖅᑕᐅᑐᐃᓐᓇᕆᐊᓕᖕᓂ ᐅᕝᕙᓘᓐᓃᑦ ᓇᒡᓯᐅᔾᔨᕕᐅᓯᒪᙱᑦᑐᓄᐊᖅᑕᐅᔪᓂᒃ. ᐊᒻᒪᓗ ᐅᒃᐱᕈᓱᖕᒪᖔᑕ ᑕᒪᒃᑯᐊ ᐅᓗᕆᐊᓇᖅᑐᒦᑦᑕᕆᐊᒃᓴᖏᓐᓂᒃ ᖃᓄᐃᓕᐅᕈᑕᐅᒪᖔᑕ ᐊᒻᒪ ᐅᓇ ᐊᓯᐊᓂᒃ ᑐᕌᕈᑎᖃᓕᕐᓂᖅ ᐊᒃᑐᐃᓯᒪᓪᓚᕆᖕᒪᑦ ᐃᖃᓗᖕᓃᑦᑐᓕᒫᓂᒃ.”

ᓯᑎᐅᓪ ᐃᓱᒪᔪᖅ ᒫᓂ 3,000-ᖏᓐᓃᑦᑕᕆᐊᒃᓴᖏᓐᓂᒃ ᓄᓇᕗᒥᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑐᑦ ᐃᖃᓗᖕᓂᑦ.

ᓄᓇᕗᒥᑦ ᒐᕙᒪᓕᕆᔨᒃᑯᑦ ᐱᓕᕆᖃᑎᖃᕐᒪᑕ ᐊᓯᖏᓐᓂᒃ ᓄᓇᕗᒥᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ ᑐᑭᒧᐊᖅᑎᑦᑎᓇᓱᒃᖢᑎᒃ ᖃᓄᖅ ᑭᐅᓂᐊᕆᐊᒃᓴᖅ ᓯᑎᐅᓪᒧᑦ, ᐅᖃᓚᐅᕐᑐᖅ ᐅᖃᖅᑎᒋᔭᐅᔪᖅ ᑮᓯ ᓕᓵᑦ ᖃᕋᓴᐅᔭᒃᑯᑦ ᑎᑎᕋᕐᕕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

ᓕᓵᑦ ᑎᑎᕋᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐊᑐᖃᑦᑕᓪᓚᕆᖕᓂᖏᓐᓂᒃ ᑲᓇᑕᒥ ᑎᑎᖃᒃᑯᕕᒃᒥ ᒪᑯᓄᖓ ᑮᓇᐅᔭᒃᓴᓕᐊᕆᔭᐅᕙᒃᑐᓄᑦ, ᐊᑭᓕᒃᓴᓄᑦ, ᐊᒻᒪ ᓇᓗᓇᐃᒃᑯᑎᓕᕆᓂᕐᒧᑦ ᐊᒻᒪ ᐃᓕᓴᕆᔭᐅᔾᔪᑎᓄᑦ ᐊᓯᖏᓐᓄᓪᓗ.

“ᑐᕌᒐᖃᓗᐊᕋᑦᑕ ᑕᒪᒃᑯᐊ ᒐᕙᒪᒃᑯᑦ ᐱᔨᑦᑎᕋᐅᑎᖏᑦ ᐊᑐᐃᓐᓇᐅᖏᓐᓇᐅᔭᕐᓗᑎᒃ ᐊᒻᒪ ᓈᒻᒪᓈᕐᓯᒪᕙᒡᓗᑎᒃ ᑕᒪᓐᓇ ᐊᓯᙳᖅᑕᐅᕙᓪᓕᐊᓂᖓᓂᒃ,” ᐅᖃᕐᑐᖅ.

“ᑕᒪᕐᒥ ᐱᓕᕆᕝᕕᐅᔪᑦ ᖃᐅᔨᓇᓱᖕᒪᑕ ᖃᓄᖅ ᑕᒪᓐᓇ ᑎᑎᕋᖃᑦᑕᖅᑕᖏᓐᓂᒃ ᓄᓇᕗᒻᒥᐅᓄᑦ ᐊᒃᑐᐃᓯᒪᖕᒪᖔᑕ ᐊᒻᒪᓗ ᐋᖅᑭᒋᐊᒃᑲᓐᓂᕆᐊᖃᖅᐸᑕ ᐋᖅᑭᒋᐊᒃᑲᓐᓂᕈᑎᒋᓂᐊᕐᓗᒍ ᐱᔨᑦᑎᕋᐅᑎᖏᑦ ᓄᖃᖓᖁᙱᓐᓂᕐᒧᑦ.”

ᓕᓵᑦ ᑎᑎᕋᓚᐅᕐᒥᔪᖅ ᐃᑲᔫᑎᐅᔪᓐᓇᖅᑐᓂᒃ ᐅᑯᓄᖓ ᓄᓇᕗᒥᑦ ᒐᕙᒪᒃᑯᓐᓂᒃ ᐃᓄᖕᓄᑦ ᒫᓐᓇᐅᓂᖓᓂᒃ ᐃᓚᖃᕐᓗᓂ ᑎᑎᖃᒃᑯᕕᒃᒥ ᑐᕌᕈᑎᖏᓐᓂᒃ ᐋᖅᑭᒃᓯᓯᒪᖁᔨᓪᓗᓂ;

ᐃᓕᖕᓅᙱᑦᑐᓂᒃ ᑎᑎᖃᓂᒃ ᒪᑐᐃᕐᓯᕙᙱᓪᓗᓯ ᐊᒻᒪ ᐅᑎᖅᑎᑉᐸᒡᓗᒋᑦ ᑲᓇᑕᒥ ᑎᑎᖃᒃᑯᕕᒃᒧᑦ;

ᖃᐅᔨᒋᐊᕈᑎᖃᖅᑎᓪᓗᒍ ᑎᑎᖃᖅ; ᐊᒻᒪ,

ᑮᓇᐅᔭᒃᓴᖅᑖᖃᑦᑕᕈᕕᑦ ᑮᓇᐅᔭᒃᑯᕕᖕᓄᐊᖅᑕᐅᑎᖃᑦᑕᖔᕐᓗᒍ ᑕᐃᒪᐃᑎᑕᐅᔪᓐᓇᕈᕕᑦ.

ᓕᓵᑦ ᐃᓄᖕᓂ ᐅᔾᔨᕈᓱᒃᑎᑦᑎᖃᑦᑕᖁᔨᔪᖅ ᓄᓇᕗᒥᑦ ᒐᕙᒪᒃᑯᑦ ᑐᓴᒐᒃᓴᓄᑦ ᐊᒻᒪ ᑕᒪᐅᖓᒥᐊᕆᐊᖃᙱᑦᑐᓄᑦ ᑎᑎᕋᕐᕕᒃᒥᑦ ᐊᒻᒪᓗ ᐆᒥᖓ ᑲᓇᑕᒥ ᑎᑎᖃᒃᑯᕕᒃᒧᑦ ᖃᐅᔨᒪᔨᒋᔭᐅᔪᒥᒃ ᒪᑯᓂᖓ ᓱᕋᐃᔪᕕᓂᕐᓂᒃ ᑕᒪᐅᖓᒥᐊᕆᐊᖃᙱᑦᑐᓄᑦ ᐊᒻᒪᓗ ᖃᐅᔨᒪᓇᓱᒡᓗᑎᒃ ᑐᓴᐅᒪᔾᔪᑎᓕᕆᔨᒃᑯᑦ ᓄᑖᙳᕆᐊᖅᑕᐅᕙᓪᓕᐊᔪᓂᒃ.

ᑲᓇᑕᒥ ᑎᑎᖃᒃᑯᕕᒃᒧᑦ ᐅᖃᖅᑎᒋᔭᐅᔪᖅ ᕕᐅᓪ ᕌᔾᔪᔅ ᐅᖃᓚᐅᕐᑐᖅ ᐱᐅᓯᕚᓪᓕᖅᑎᑦᑎᕙᓪᓕᐊᓂᖏᓐᓂᒃ ᐊᒻᒪᓗ ᐅᓇ ᑲᓇᑕᒥ ᑎᑎᖃᒃᑯᕕᒃ ᐱᔨᑦᑎᕋᖅᑕᖏᓐᓂᒃ ᖁᔭᓕᓪᓗᓂ ᑐᑭᓯᓯᒪᓂᖏᓐᓂᒃ ᐊᓯᔾᔨᖅᑕᐅᓯᒪᔪᓂ ᐊᒃᓱᕈᓐᓇᕋᓗᐊᖅᑎᓪᓗᒍ.

ᕌᔾᔪᔅ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᑕᖓᒍᑦ ᐅᓇ ᑲᓇᑕᒥ ᑎᑎᖃᒃᑯᕕᒃ ᓄᑖᓂ ᐃᖅᑲᓇᐃᔭᖅᑎᑖᕐᓯᒪᓕᕐᓂᖏᓐᓂᒃ ᐊᐅᓚᑦᑎᓂᐊᖅᑐᓂᒃ ᑎᑎᖃᓂᒃ ᑎᑭᑉᐸᓪᓕᐊᕙᒃᑐᓂᒃ ᐊᒻᒪᓗ ᑭᖑᕙᓯᒃᑐᓂᒃ ᐱᓕᕆᐊᖃᕐᓂᐊᖅᑐᓂᒃ. ᐅᖃᒃᑲᓐᓂᓚᐅᕐᑐᖅ ᐅᓇ “ᑲᓇᑕᒥ ᑎᑎᖃᒃᑯᕕᒃ ᑲᒪᒋᔭᖃᕆᐊᖃᕐᓂᖏᓐᓂᒃ ᐅᑭᐅᕐᑕᖅᑐᕐᒥ ᓄᓇᓕᖕᓄᐊᖅᐸᓪᓕᐊᔪᓂᒃ ᐱᓕᕆᐊᖃᓪᓚᕆᒐᓱᖕᓂᖏᓐᓂᒃ.”

“ᑕᒪᒃᑯᓂᖓ ᐊᓯᔾᔩᕙᓪᓕᐊᑎᓪᓗᑕ ᖃᐅᔨᒪᖁᔨᖕᒥᔪᒍᑦ ᓄᓇᖃᖅᑐᓂᒃ ᐱᒻᒪᕆᐊᓗᒋᓂᑦᑎᓐᓂᒃ ᑕᒪᐅᖓᒥᐊᖅ ᑐᓴᐅᒪᔭᐅᔭᕆᐊᖃᖅᐸᙱᑦᑐᓂᒃ,” ᕌᔾᔪᔅ ᐅᖃᕐᑐᖅ.

ᕌᔾᔪᔅ ᐅᖃᓚᐅᕐᒥᔪᖅ ᐊᐱᕐᓱᖃᑦᑕᖁᔨᓪᓗᓂ ᐃᓄᖕᓂ ᐅᑯᓂᖓ ᑲᓇᑕᒥ ᑎᑎᖃᒃᑯᕕᒃᒧᑦ ᐱᔨᑦᑎᕋᐅᑎᓕᕆᔨᓄᑦ.

ᓯᑎᐅᓪ ᐅᖃᓚᐅᕐᑐᖅ ᐅᑯᓄᖓ ᐱᖓᓱᓄᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ ᑐᓴᕐᓂᐊᕈᒪᓪᓗᓂ ᔭᓄᐊᕆ 17 ᐊᓂᒍᓚᐅᖅᑎᓐᓇᒍ.