ᐊᑭᓖᓂᕐᒧᑦ ᑭᖑᕙᕆᐊᖅᑕᐅᓂᐅᔪᓂ ᐊᔭᐅᕆᕗᖅ ᐱᔭᕇᖅᑕᐅᓂᖓᓂ ᐃᓄᑐᖃᕐᓄᑦ ᐊᖏᕐᕋᒃᓴᖓᓐᓂ: ᒪᓕᒐᓕᐅᖅᑎ

For the English version of this story, see Payment delays pushed back completion of elders home: MLA.

ᐱᔾᔪᑎᖓ ᑭᖑᕙᕆᐊᕐᓂᐅᔪᓂ ᐱᔭᕇᖅᓯᓂᕐᒥ ᑲᖏᖅᖠᓂᐅᑉ ᐃᓂᑐᖃᕐᓄᑦ ᐊᖏᕐᕋᒃᓴᖓᓄᑦ ᓴᖅᑭᕐᔪᐊᓚᐅᖅᐳᖅ ᒪᓕᒐᓕᐅᕐᕕᖕᒥ ᐱᓇᓱᐊᕈᓯᐅᓚᐅᖅᑐᒥ.

ᐃᖃᓗᐃᑦ-ᑕᓯᓗᒃ ᒪᓕᒐᓕᐅᖅᑎᖓ ᔪᐊᔾ ᕼᐃᒃᔅ ᑐᓂᓯᓚᐅᖅᐳᖅ ᐃᓕᑦᑎᓚᐅᖅᑕᖓᓂ ᐊᐱᖅᓱᕐᓂᐅᔪᒥ−ᐊᒻᒪ−ᑭᐅᓂᐅᔪᒥ ᑲᑎᒪᓂᐅᔪᒥ ᕕᕗᐊᕆ 27−ᒥ ᑕᐃᕕᑦ ᔪᐊᓇᓯᒧᑦ, ᒥᓂᔅᑕ ᓄᓇᓕᖕᓂ ᒐᕙᒪᓕᕆᓂᕐᒧᓪᓗ ᐱᔨᑦᑎᕋᕐᓂᐅᔪᒥ.

ᕼᐃᒃᔅ ᐅᖃᓚᐅᖅᐳᖅ ᕿᒥᕐᕈᓚᐅᖅᐳᖅ ᑎᑎᖅᑲᖁᑕᐅᔪᓂ ᐃᑲᔪᖅᓱᐃᔪᒥ ᑎᑭᑉᐸᓪᓕᐊᔪᒥ ᐊᑭᓕᒐᒃᓴᒥ ᐅᓂᒃᑳᕆᔪᒥ “ᑭᖑᕙᕆᐊᖅᑕᐅᔪᒥ ᐊᑭᓖᓂᕐᒧᑦ ᑲᓐᑐᕌᒃᑎᒃᑲᓐᓂᐅᔪᓄᑦ ᑕᐃᑲᙵᑦ ᑳᓐᑐᕌᒃᑎᒻᒪᕆᐅᔪᒧᑦ, ᐱᑎᑦᑎᔪᒥ ᓱᒃᑲᐃᒡᓕᒋᐊᕐᓂᐅᔪᒥ ᐅᕝᕙᓘᓐᓃᑦ ᓄᖅᑲᖅᑎᑕᐅᓂᖓᓂ ᐱᓕᕆᓂᐅᔪᒥ” ᐱᓕᕆᐊᒃᓴᐅᔪᒥ.

ᐋᖅᑭᒃᓱᐃᓂᕐᒥ ᐊᐅᓚᑕᐅᓂᖓᓂ ᐅᑯᓇᓂ ᑳᓐᑐᕌᒃᑎᒻᒪᕆᐅᔪᒧᑦ ᐊᒻᒪ ᑲᓐᑐᕌᒃᑎᒃᑲᓐᓂᐅᔪᓄᑦ ᐱᑎᑦᑎᓚᐅᕆᕗᖅ ᑭᖑᕙᕆᐊᕐᓂᐅᔪᓂ, ᕼᐃᒃᔅ ᐅᖃᓚᐅᖅᐳᖅ.

ᔪᐊᓇᓯ, ᓯᕗᓪᓕᕐᒥ ᑭᐅᓪᓚᕆᓚᐅᙱᖦᖢᓂ ᕼᐃᒃᔅ ᐊᐱᖅᑯᑎᖓᓐᓂ ᑭᖑᕙᕆᐊᕐᓂᐅᔪᓂ, ᓇᓗᓇᐃᖅᓯᕗᖅ ‘ᐃᓚᖏᓐᓂ ᑮᓇᐅᔭᓕᕆᓂᕐᒧᑦ ᐊᑲᐅᙱᓕᐅᕈᑕᐅᔪᓂ” ᐃᓚᖃᖅᑐᒥ ᐱᔭᐅᙱᑦᑐᓂ ᐊᒻᒪ ᑭᖑᕙᕆᐊᖅᑕᐅᔪᓂ ᐊᑭᓕᐅᑎᐅᔪᓂ.

“ᑎᑎᕋᕐᕕᒐ ᐱᓚᐅᖅᐳᑦ ᑎᑎᕋᖅᑕᐅᓂᐅᔪᓂ ᐱᔾᔪᑎᖃᖅᑐᒥ ᑭᖑᕙᖅᑐᓂ ᐊᑭᓕᐅᑎᐅᔪᓂ,” ᔪᐊᓇᓯ ᐅᖃᓚᐅᖅᐳᖅ.

ᐃᓄᑐᖃᕐᓄᑦ-ᐸᖅᑭᕝᕕᐅᔪᒥ ᓯᕗᓪᓕᕐᒥ ᒪᑐᐃᖅᑐᒃᓴᐅᑕᐅᓚᐅᖅᐳᖅ 2023−ᒥ ᑭᓯᐊᓂ ᑕᐃᓐᓇ ᐅᓪᓗᖓ ᐊᔭᐅᕆᔭᐅᓚᐅᖅᐳᖅ ᑕᒪᑐᒪᓂ ᐊᕐᕌᒎᔪᒧᑦ. ᐊᐱᕆᔭᐅᒐᒥ, ᓄᓇᕗᒻᒥ ᒐᕙᒪᒃᑯᑦ ᐅᓂᒃᑳᕆᓚᐅᙱᓚᑦ ᐱᔾᔪᑕᐅᔪᓂ ᑖᒃᑯᓄᖓ ᑭᖑᕙᕆᐊᕐᓂᐅᔪᓄᑦ.

ᒪᓕᒐᓕᐅᕐᕕᖕᒥ, ᕼᐃᒃᔅ ᐊᐱᕆᓚᐅᖅᐳᖅ “ᑭᓱᓂᒃ ᓇᑭᙶᕐᓂᐅᔪᓂ ᐃᑲᔪᖅᑕᐅᓂᕐᓂ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐱᓯᒪᓂᖏᓐᓂ ᑭᐅᓂᕐᒧᑦ ᑭᖑᕙᕆᐊᖅᑎᑕᐅᓂᐅᔪᓂ ᐱᑎᑕᐅᔪᓂ ᑳᓐᑐᕌᒃᑎᐅᔪᓂᐊᑭᓕᐅᑎᓄᑦ ᐊᑲᐅᙱᓕᐅᕈᑕᐅᔪᓂ ᑭᖑᕙᕆᐊᖅᑎᑦᑎᓂᖃᖅᑎᓪᓗᒍ ᐊᖏᔪᓄᑦ ᒐᕙᒪᐅᔪᓂ ᐱᓕᕆᐊᒃᓴᐅᔪᓄᑦ, ᓲᕐᓗ ᑲᖏᖅᖠᓂᐅᑉ ᐃᓄᑐᖃᕐᓄᑦ ᐊᖏᕐᕋᒃᓴᖓᓐᓄᑦ?”

ᔪᐊᓇᓯ ᑭᐅᓚᐅᖅᐳᖅ ᑕᐃᒪᐃᑦᑐᓄᑦ ᐱᓕᕆᓂᐅᔪᓄᑦ, ᐱᓕᕆᕝᕕᖓ ᐅᖃᖃᑎᖃᓲᖑᕗᖅ ᐊᓯᖏᓐᓂ ᐱᓕᕆᕝᕕᐅᔪᓂᑦ ᐊᒻᒪ ᑲᑎᖅᓱᐃᓪᓗᑎᒃ ᒪᓕᒐᑎᒍᑦ ᐊᒻᒪ ᑮᓴᐅᔭᓕᕆᓂᕐᒧᑦ ᐅᖃᐅᔾᔨᓂᐅᔪᓂ.

ᕼᐃᒃᔅ ᓈᒻᒪᒃᓴᖅᑑᔮᓚᐅᙱᓚᖅ ᔪᐊᓇᓯᐅᑉ ᑭᐅᔾᔪᑎᖓᓂ.

“ᓂᕆᐅᓚᐅᕋᓗᐊᖅᐳᖓ ᑐᓴᖅᑎᑕᐅᒃᑲᓐᓂᕐᓂᐅᔪᒥ ᖃᓄᐃᑦᑐᓂ ᐱᕕᒃᓴᖃᕐᓂᐅᔪᓂ ᐱᓕᕆᕝᕕᒃ ᐱᖃᕐᓂᖓᓂ ᑲᒪᒋᔭᖃᕐᓂᕐᒥ ᑳᓐᑐᕌᒃᑎᒧᑦ−ᐊᐅᓚᑕᐅᔪᒥ ᑭᖑᕙᕆᐊᕐᓂᐅᔪᓂ ᐃᓚᖏᓐᓂ ᐱᒻᒪᕆᐅᔪᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᕙᓪᓕᐊᑎᒻᓇᓱᐊᖅᑕᑦᑎᓐᓂ ᓄᓇᕗᒻᒥ,” ᕼᐃᒃᔅ ᐅᖃᓚᐅᖅᐳᖅ.

ᓯᕗᓂᐊᓂ ᕕᕗᐊᕆ 27−ᒥ ᐃᒃᓯᕚᕐᓂᐅᔪᒥ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᐅᖃᓚᐅᖅᐳᖅ ᑐᕌᒐᕆᔭᐅᔪᒥ ᐅᓪᓗᖓᓂ ᐃᒡᓗᕐᔪᐊᒧᑦ ᒪᑐᐃᕐᕕᒃᓴᖓᓂ ᐊᐃᑉᕆᓕᒥᐅᓚᐅᖅᐳᖅ, ᓯᕗᓪᓕᖅᐸᐅᔪᓂ ᐃᓄᑐᖃᕐᓂ ᑐᙵᓱᒃᑎᑕᐅᓗᑎᒃ ᐊᐅᔭᒃᑯᑦ.

ᑭᖑᕙᕆᐊᕐᓂᖃᖅᓯᒪᕗᖅ ᓇᓂᓯᓂᕐᒥ ᑳᓐᑐᕌᒃᑎᐅᔪᒥ ᐊᐅᓚᑦᑎᓂᕐᒥ ᐃᒡᓗᕐᔪᐊᒥᒃ.

ᒪᐃᓐ ᓇᓗᓇᐃᖅᓯᓚᐅᖅᐳᖅ ᕕᕗᐊᕆ 27−ᒥ ᑳᓐᑐᕌᒃᑎᒥ ᓂᕈᐊᖅᑕᐅᓯᒪᓕᕐᓂᖓᓂ, ᐊᒻᒪ ᐊᖏᕈᒻᒥ ᐊᑎᓕᐅᕆᐊᓂᒃᐸᑕ ᐅᖃᐅᓯᐅᓂᐊᖅᐳᖅ ᐃᓄᓕᒫᓄᑦ.