ᐳᕙᒡᓗᒃᑐᓂ ᖃᐅᔨᓴᕐᕕᒃᓴᖅ ᒪᑐᐃᖅᐳᖅ ᓇᐅᔮᓂ

For the English version of this story, please see Tuberculosis screening clinic coming to Naujaat.

ᐳᕙᒡᓗᒃᑐᐃᑦ ᐅᓄᕐᓯᕙᓪᓕᐊᑎᓪᓗᒋᑦ ᓇᐅᔮᓂ, ᓄᓇᓕᓕᒫᑦ ᐊᐃᑦᑐᕐᓗᒃᑕᐅᑎᑕᐅᑦᑕᐃᓕᓂᖅ ᐊᒻᒪᓗ ᖃᐅᔨᓴᕐᕕᒃᓴᖅ ᒪᑐᐃᓚᐅᖅᑐᖅ ᑕᒪᑐᒪᓂ ᐱᓇᓱᐊᕈᓯᐅᓚᐅᕐᑐᒥ ᓄᓇᓕᖕᓂ ᐃᓄᖃᓪᓗᐊᖅᑐᒥᒃ ᒫᓂ 1,230.

ᐅᓇ ᖃᐅᔨᓴᕐᕕᒃᓴᖅ ᒪᑐᐃᓚᐅᕐᑐᖅ ᓇᒐᔾᔭᐅᒥ ᐊᒻᒪᓗ ᐱᓕᕆᕝᕕᐅᖏᓐᓇᕐᓂᐊᖅᖢᓂ ᒪᐃ ᓄᙳᐊᓄᑦ. ᖃᐅᔨᓴᖃᑦᑕᕐᓂᐊᖅᑐᑦ ᓇᐅᔮᓂ ᕼᐋᒻᒪᓚᒃᑯᑦ ᑎᑎᕋᕐᕕᖓᓂᒃ. ᓄᓇᖃᖅᑐᑦ ᑕᑯᔭᐅᕝᕕᒃᓴᓕᐅᖅᑕᐅᖃᑦᑕᕐᓂᐊᖅᑐᑦ, ᐅᖃᓚᐅᕐᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑐᓴᒐᒃᓴᖏᓐᓂ.

ᐳᕙᒡᓗᖕᓇᖅ ᐊᐃᑦᑑᑎᐅᓕᖅᐸᒃᑐᖅ ᐊᓂᕐᓵᖅᑐᖅᑕᑦᑎᒍᑦ ᐊᒻᒪᓗ ᐳᕙᒃᑯᑦ ᐋᓐᓂᐊᕈᑎᐅᕙᒃᖢᓂ ᐊᒻᒪᓗ ᐊᐃᑦᑑᑎᐅᔪᓐᓇᖅᖢᓂ ᐳᕙᒡᓗᒃᑐᖅ ᐃᓄᒃ ᑕᒋᐅᕐᓗᓂ ᖁᐃᕐᓱᕐᓗᓂᓘᓐᓃᑦ.

ᐋᓐᓂᐊᕆᔭᐅᔪᖅ ᖁᐃᕐᓱᑲᑕᓕᕐᓇᖅᑐᖅ, ᓴᒡᕕᒃᑯᓪᓗ ᐋᓐᓂᐊᕐᓇᖅᖢᓂ, ᐆᑎᕐᓇᖅᖢᓂ ᐊᒻᒪᓗ ᐅᑭᒡᓕᕙᓪᓕᐊᓐᓇᖅᖢᓂ. ᖃᐅᔨᓴᖅᑕᐅᓂᖅ ᐃᒪᐃᑕᐅᓐᓇᖅᖢᓂ ᐊᐱᖅᓱᖅᑕᐅᑲᑕᒡᓗᓂ, ᐳᕙᒡᓗᒋᐊᒃᓇᖅ ᖃᐅᔨᓴᖅᑕᐅᓐᓇᖅᖢᓂ ᐊᒻᒪᓗ ᐳᕙᒃᑯᑦ ᐊᔾᔨᓕᐅᖅᑕᐅᓗᓂ. ᖃᐅᔨᓴᖅᑕᐅᒃᑲᓐᓂᕈᓐᓇᕐᒥᔪᑦ ᐊᐅᖏᖅᑕᐅᓗᑎᒃ ᐅᕝᕙᓘᓐᓃᑦ ᓄᕙᖏᓐᓂ ᑎᕝᕗᐊᖅᑕᐅᓯᒪᔪᓂᒃ ᖃᐅᔨᓴᒐᒃᓴᒥ ᐱᔪᒪᑲᑕᒡᓗᑎᒃ.

ᓄᓇᕗᑦ ᑐᙵᕕᒃᑯᑦ ᐱᓕᕆᖃᑎᖃᖅᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ ᖃᐅᔨᓴᕐᓂᕐᒥᒃ.

“ᐳᕙᒡᓗᒃᑐᐃᑦ ᓄᓇᕗᒥᑦ ᐅᓄᕐᓂᕐᓴᓪᓚᕆᐅᖕᒪᑕ ᑲᓇᑕᓕᒫᒥ ᐃᒡᓗᖏᑦ ᐃᓄᒋᐊᖃᑦᑕᓗᐊᕐᓂᖏᓐᓄᑦ ᐊᒻᒪᓗ ᐋᓐᓂᐊᕕᖕᒥ ᐊᑐᐃᓐᓇᖃᙱᓗᐊᕐᓂᕐᒧᑦ,” ᐅᖃᕐᑐᖅ ᐹᓪ ᐃᕐᖓᐅᑦ, ᐊᖓᔪᖅᑳᑉ ᑐᒡᓕᖓ ᓄᓇᕗᑦ ᑐᙵᕕᒃᑯᓐᓄ, ᐅᖃᓚᐅᕐᑐᖅ ᑐᓴᒐᒃᓴᓕᐅᖅᖢᑎᒃ.

ᐅᖃᒃᑲᓐᓂᖅᖢᓂ, “ᑕᒪᑦᑕᑦᑎᐊᖅ ᐳᕙᒡᓗᖕᓇᒥ ᓄᖅᑲᖅᑎᑦᑎᖃᑕᐅᓇᓱᒋᐊᖃᖅᑐᒍᑦ ᐅᓇ ᓄᖑᑎᑕᒃᓴᐅᖕᒪᑦ ᐋᓐᓂᐊᕆᔭᐅᕙᒃᑐᖅ ᓄᓇᕗᒥᑦ.”

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ, ᑐᓴᒐᒃᓴᑎᒍᑦ ᐅᖃᓚᐅᕐᑐᖅ “ᖃᐅᔨᓵᓕᖃᑦᑕᕈᑎᒃ ᐳᕙᒡᓗᒃᑐᓂ ᑕᐃᒪᓕ ᓄᖑᑎᑦᑎᓵᓕᓂᕐᓴᐅᓇᔭᖅᑐᖅ ᓄᓇᑦᑎᓐᓂ.”

ᒪᐃ 2023-ᒥ ᐳᕙᒡᓗᖕᓇᖃᓕᕐᓂᖓᓂ ᓇᐅᔮᑦ ᑐᓴᖅᑎᑦᑎᔾᔪᑎᐅᓚᐅᕐᓯᒪᔪᖅ. ᐅᖃᓪᓚᒃᑎᒋᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᐅᖃᕐᕕᐅᔪᓐᓇᓚᐅᙱᒻᒪᑦ ᓱᓕ ᐳᕙᒡᓗᑲᑕᒋᐊᒃᓴᖏᓐᓂ ᖃᐅᔨᕝᕕᐅᓇᓱᒃᑎᓪᓗᒍ ᐅᕝᕙᓘᓐᓃᑦ ᖃᔅᓯᐅᔭᕆᐊᒃᓴᖏᓐᓂ ᐳᕙᒡᓗᒃᑐᐃᑦ ᓄᓇᓕᖕᓂ.

ᓇᐅᔮᑦ ᑕᓪᓕᒪᒋᔭᐅᔪᖅ ᓄᓇᓕᖕᓂ ᐊᕐᕌᒍᑦ ᑕᓪᓕᒪ ᐃᓗᐊᓂ ᖃᐅᔨᓴᕐᕕᐅᑲᑕᒃᑐᓂᒃ ᐅᑯᐊ ᐱᓕᕆᕝᕕᐅᓚᐅᖅᑎᓪᓗᒋᑦ ᐸᖕᓂᕐᑑ, ᑎᑭᕋᕐᔪᐊᖅ, ᕿᑭᖅᑕᖅᔪᐊᖅ ᐊᒻᒪ ᑭᖓᐃᑦ.