ᓄᓇᕘᑉ 50-ᒦᑕ ‘ᖃᕐᓖᑦ’ ᐅᔭᖅᑲᖅ ᐅᐱᒋᔭᐅᕗᖅ ᓂᐱᙵᑕᕐᒧᑦ

For English version, see Nunavut’s 50-metre tall ‘pants’ rock formation honoured with stamp

ᐊᑕᐅᓯᖅ ᐊᔾᔨᓕᐅᕆᔨᐅᔪᖅ ᐊᔾᔨᓕᐅᕆᓚᐅᖅᐳᖅ ᓄᓇᕋᕐᓂ sunflowers−ᓂ. ᐊᓯᐊ ᐊᔾᔨᓕᐅᕆᓚᐅᖅᐳᖅ lighthouse−ᒥ.

ᑭᓕᐊᕐ ᑲᐃᓐᔅ ᐊᔾᔨᓕᐅᕆᓚᐅᖅᐳᖅ ᖃᕐᓕᓂᑦ.

ᓄᓇᕗᒻᒥ ᐊᔾᔨᓕᐅᕆᔨᐅᑉ ᐊᔾᔨᓕᐅᖅᑕᖓ ᐊᖏᔪᒻᒪᕆᐊᓗᖕᓂ ᐅᔭᖅᑲᒥ ᐋᖅᑭᒃᓯᒪᓂᐅᔪᒥ ᐃᓂᖃᖅᑐᒥ 60 ᑭᓛᒥᑐᓂ ᐃᒃᐱᐊᕐᔫᑉ ᓂᒋᖓᓂ ᑕᑯᒃᓴᐅᑎᑕᐅᕗᖅ ᐊᑕᐅᓯᐅᔪᒥ 9−ᓂ ᓂᐱᙵᑕᕐᓂᑦ ᓴᖅᑭᑎᑕᐅᔪᓂ ᑲᓇᑕᒥ ᑎᑎᖅᑲᕐᓂᐊᕐᕕᖓᓐᓂ “ᐅᖓᓯᒃᑐᒥ ᐊᒻᒪ ᓯᓕᒃᑐᒥ” ᑲᑎᙵᓂᐅᔪᓂ, ᓇᓗᓇᐃᖅᓯᔪᒥ ᐊᔾᔨᐅᙱᑦᑐᓂ ᐊᒻᒪ ᑕᑯᒥᓇᖅᑐᓂ ᐃᓂᐅᔪᓂ ᑲᓇᑕᓕᒫᒥ.

ᓄᓇᓕᖕᓂ ᖃᐅᔨᒪᔭᐅᕗᖅ ᖃᕐᓕᙳᐊ ᑕᕆᐅᕐᒥ ᑲᑕᖕᒥ ᐋᖅᑭᒃᓯᒪᓂᐅᔪᒥ, ᑐᑭᖃᖅᑐᒥ “like pants” ᐃᓄᒃᑎᑐᑦ.

ᐊᔾᔨᓕᐊᖑᔪᒥ ᐋᖅᑭᒃᓯᒪᓂᐅᔪᒥ ᐊᔾᔨᓕᐅᖅᑕᐅᔪᒥ ᓄᓇᓕᖕᓂ ᐊᖑᓇᓱᒃᑎᐅᔪᒥ 2018−ᒥ CBC North ᓴᖅᑭᑎᑦᑎᓚᐅᖅᐳᖅ ᐊᔾᔨᙳᐊᒥ ᕙᐃᔅᐳᒃᑯᑦ ᒪᒃᐱᒐᖓᓂ.

50-ᒦᑕ ᐅᔭᖅᑲᖅ ᐃᒻᒥᓂᒃ ᓇᖏᖅᑑᔮᖅᐳᖅ, ᐃᓱᒪᓂᖃᙱᖦᖢᓂ ᐊᖏᓂᖅᓴᐅᔪᒥ ᐅᔭᖅᑲᒥ ᐋᖅᑭᒃᓯᒪᓂᐅᔪᒥ ᑐᓄᐊᓃᑦᑐᒥ.

ᖃᕋᓴᐅᔭᑎᒍᑦ ᐅᖃᐅᓯᒃᓴᓕᐅᖅᑎᐅᔪᑦ ᐃᓱᒪᓚᐅᖅᐳᑦ ᐊᔾᔨᙳᐊᖅ ᐱᙳᐊᖑᓂᖓᓂ ᐅᕝᕙᓘᓐᓃᑦ ᐊᔾᙳᐊᖅ ᐊᓯᔾᔨᖅᑕᐅᓯᒪᓂᖓᓂ, ᑕᐃᒫᒃ CBC North ᑎᑎᕋᐃᓚᐅᖅᐳᖅ ᐅᓂᒃᑳᓕᐊᒥ ᑲᑕᖕᒥ, ᐃᓂᖃᕐᓂᖓᓂ, ᐊᒻᒪ ᖃᓄᖅ ᑕᐃᒪᐃᓕᓚᐅᕐᓂᖓᓂ.

ᑭᓕᐊᕐ ᑲᐃᓐᔅ ᐅᖃᖅᐳᖅ ᐊᓕᐊᓇᐃᒋᔭᖃᑦᑎᐊᕐᓂᖓᓂ ᐊᔾᔨᓕᐅᕆᓂᕐᒥ ᐊᖏᕐᕋᖓᑕ ᖃᓂᒋᔭᖓᓂ ᐃᒃᐱᐊᕐᔪᖕᒥ ᑕᑯᒃᓴᐅᑎᑦᑎᔪᓐᓇᕐᓂᐊᕐᒪᑦ ᑲᔾᔮᕐᓇᕐᓂᖓᓂ ᑲᓇᑕᓕᒫᒧᑦ ᐊᒻᒪ ᓄᓇᕐᔪᐊᒧᑦ. (ᑭᓕᐊᕐ ᑲᐃᓐᔅ ᐊᔾᔨᖁᑎᖓ)

ᑭᖑᓂᑦᑎᐊᖓᓂ, ᐊᐃᑉᕆᓕ 2018−ᒥ, ᑲᐃᓐᔅ ᓯᑭᑑᒃᑯᑦ ᐃᖏᕐᕋᓚᐅᖅᐳᖅ ᐊᔾᔨᓕᐅᑦᑎᐊᕆᒃᑲᓐᓂᕐᓂᕐᒧᑦ ᐋᖅᑭᒃᓯᒪᓂᐅᔪᒥ. ᐊᔾᔨᓕᐅᓚᐅᖅᑕᖓ ᑕᐃᓐᓇᐅᕗᖅ ᐊᑐᖅᑕᐅᓂᐊᖅᑐᒥ ᓂᐱᙵᑕᕐᒥ.

“ᐃᓄᐃᑦ ᑕᒫᓂ ᓄᓇᖃᖅᓯᒪᕗᑦ ᕼᐊᓐᓇᓚᖏᓐᓂ ᐊᕐᕌᒍᓄᑦ” ᐊᒻᒪ ᖃᐅᔨᒪᓂᖃᖅᐳᑦ ᐊᑯᓂᒻᒪᕆᐊᓗᒃ, ᑲᐃᓐᔅ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᒫᓐᓇᓕᓴᐅᙱᑦᑐᒥ ᖃᐅᔨᒪᔭᐅᕐᔪᐊᖅᓯᒪᓂᖓᓂ.

“ᐅᓇ ᐊᖏᕐᕋᕆᕙᕋ ᐊᒻᒪ ᐅᐱᒋᕐᔪᐊᖅᐸᕋ ᐊᖏᕐᕋᕋ; ᑲᒪᓇᖅᑐᐊᓘᓪᓗᓂ ᐃᓂᐅᕗᖅ ᐊᒻᒪ ᖃᓄᐃᒋᙱᑕᕋ ᐊᓯᖏᓐᓂ ᐊᑐᖅᑕᐅᓂᖓᓂ ᓄᓇᕐᔪᐊᒥ. ᓄᓇᓕᐅᕗᖅ ᐃᓄᑦᑎᐊᕙᖃᕐᔪᐊᖅᑐᒥ,” ᑲᐃᓐᔅ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᒪᐃ 7−ᒥ.

“ᖃᕐᓖᑦ” ᑕᑯᔭᐅᓂᖅᓴᐅᕙᒃᑎᓪᓗᒍ, ᑲᐃᓐᔅ ᐅᖃᓚᐅᖅᐳᖅ, “ᑕᒪᒃᑭᓗᒃᑖᖅ ᓯᒡᔭᖅᐸᓯᖓ ᑲᒪᓇᖅᑐᐊᓘᕗᖅ.”

ᐊᔾᔨᓯᓚᐅᖅᐸᖓ Antelope Canyon−ᒥ ᔫᑖᒥ, ᖃᐅᔨᒪᔭᐅᔪᒥ ᒪᓪᓕᐅᔮᖅᑐᒥ ᐋᖅᑭᒃᓯᒪᓂᐅᔪᒥ ᐅᔭᖅᑲᖏᓐᓂ ᐊᒻᒪ ᖃᐅᒪᔪᒥ ᓯᕿᓂᕐᒥ ᖃᐅᒪᕙᒃᑐᒥ ᐃᓂᐅᔪᓂ.

ᐊᓯᖏᓐᓂ ᐊᔾᔨᙳᐊᓂ ᓂᕈᐊᖅᑕᐅᔪᓂ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ ᑲᑎᙵᓂᐅᔪᒥ ᐃᓚᖃᖅᐳᖅ ᓄᓇᕋᕐᓂ sunflowers, ᐊᔾᔨᓕᐅᖅᑕᐅᔪᓂ ᒫᓂᑑᐸᒥ; ᐋᓐᑎᐊᕆᐆᒥ ᑕᐅᓴᓐᓂ ᕿᑭᖅᑕᓂ; ᐊᒻᒪ Point Prim lighthouse ᐳᕆᓐᔅ ᐃᐊᑦᕗᑦ ᐊᐃᓚᓐᒥ.

ᑲᐃᓐᔅ ᐅᖃᓚᐅᖅᐳᖅ ᐊᔾᔨᓕᐅᕆᓂᖓ ᑕᑯᒃᓴᐅᑎᑕᐅᓂᖓᓂ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ ᓂᐱᙵᑕᕐᒥ ᐃᒻᒥᓄᑦ ᐱᕐᔪᐊᖑᕗᖅ.

“ᐊᑖᑕᑦᑎᐊᕋ, ᐊᑖᑕᒐ ᐊᒻᒪ ᓄᑲᖓ ᑕᒪᒃᑭᑦ ᑎᑎᖅᑲᕐᓂᐊᖅᑎᐅᓚᐅᖅᐳᑦ,” ᐅᖃᓚᐅᖅᐳᖅ, ᐊᒻᒪ ᐃᓚᒌᑦ ᐃᖅᑲᓇᐃᔭᖅᓯᒪᕗᖅ ᑎᑎᖅᑲᕐᓂᐊᕐᕕᖕᒥ ᐊᕐᕌᒍᓄᑦ 101−ᓄᑦ.

2017−ᒥ ᐊᓯᐊᓂ ᐊᔾᔨᓕᐊᖑᔪᒥ ᑲᐃᓐᔅᒧᑦ, ᐅᓇ ᑕᑯᒃᓴᐅᑎᑦᑎᔪᒥ ᑮᓇᖓᓂ ᓄᓕᐊᖓᓂ ᓕᐊ ᐃᔾᔭᖏᐊᕐ ᑲᐃᓐᔅᒥ ᑮᓇᖓ ᐊᕙᓗᓯᒪᓪᓗᓂ ᖁᓕᑦᑕᐅᔭᕐᒥ ᐊᒻᒪ ᐊᕙᓗᓯᒪᓪᓗᓂ maple leaf−ᒥ, ᓂᕈᐊᖅᑕᐅᓚᐅᖅᐳᖅ 10−ᓂ ᓂᐱᙵᑕᕐᓂ ᓇᓗᓇᐃᖅᓯᓂᕐᒥ ᑲᓇᑕᐅᑉ 150−ᖓᓂ ᓇᓪᓕᐅᓐᓂᖅᓯᐅᕐᓂᖓᓂ.

“ᒥᑕᓗᒐᔪᓚᐅᖅᐳᖓ, ᐆᒪᑎᓪᓗᒍ, ᐳᐱᓐᔅ ᕕᓕᑉ [ᐃᓅᔪᓐᓃᖅᓯᒪᔪᖅ ᐅᐃᒋᔭᐅᔪᖅ ᑯᐃᓐ ᐃᓕᓴᐱ II−ᖑᓚᐅᖅᑐᒥ] ᐊᒻᒪ ᐅᕙᖓ ᒪᕐᕈᑐᐊᖑᓪᓗᑕ ᐃᓅᓂᑦᑎᓐᓂ ᑯᐃᑉ ᓄᓇᕐᔪᐊᖁᑎᖏᓐᓂ ᑎᑎᖅᑲᖅᑖᖅᐸᒃᑐᑎᒍᑦ ᐊᔾᔨᙳᐊᖃᖅᑐᓂ ᓄᓕᐊᑦᑎᓐᓂ ᐃᓕᓯᒪᔪᒥ,” ᑲᐃᓐᔅ ᐅᖃᓚᐅᖅᐳᖅ.

2018−ᒥ, ᐊᓯᐊᓂ ᐊᑕᐅᓯᐅᔪᒥ ᐊᔾᔨᓕᐊᖏᓐᓂ ᑕᑯᒃᓴᐅᑎᑕᐅᓚᐅᖅᐳᖅ ᓯᕗᓪᓕᐅᔪᒥ ᑕᐃᒪᐃᒃᑲᓐᓂᕐᓂᐅᓂᐊᖅᑐᒥ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ “ᐅᖓᓯᒃᑐᒥ ᐊᒻᒪ ᓯᓕᒃᑐᒥ” ᑲᑎᙵᓂᐅᔪᒥ. ᖃᕐᓕᙳᐊ ᐊᔾᔨᙳᐊᖅ ᐱᖓᔪᐃᖅᑐᖅᖢᓂ ᐊᑕᐅᓯᐅᔪᒥ ᐊᔾᔨᓕᐊᖓᓂ ᓴᖅᑭᓯᒪᓂᖓᓂ ᑲᓇᑕᒥ ᓂᐱᙵᑕᕐᓂ.

ᖃᕐᓕᙳᐊ ᐊᔾᔨᙳᐊᖑᔪᒥ, ᒥᑭᑦᑐᑯᓗᖕᒥ ᐃᓄᖕᒥ ᑕᑯᒃᓴᐅᔪᖃᖅᐳᖅ ᓇᖏᖅᑐᒥ ᑕᓕᖅᐱᒃᓯᓂᐊᓂ ᑎᕆᖅᑯᐊᓂ. ᐃᕐᓂᖓ ᑐᕌᕕᔅ−ᖑᕗᖅ.

“ᑕᐃᒫᒃ ᐱᔭᕆᐊᖃᖅᐳᖓ ᐊᓯᐊᓂ ᓂᐱᙵᑕᕐᒥ ᐸᓂᓐᓂ ᐱᔭᕇᖅᓯᓂᕐᒥ ᑲᑎᙵᓂᐅᔪᒥ,” ᑲᐃᓐᔅ ᐅᖃᓚᐅᖅᐳᖅ.