ᐃᖃᓗᖕᓂ ᐃᓄᒃᑎᑑᖅᑐᑐᐊᒥ ᐸᐃᕆᕝᕕᖓ ᐅᓗᕆᐊᓇᖅᑐᒦᑉᐳᖅ ᒪᑐᔭᐅᓂᖓᓂ

For English version, see Iqaluit’s only Inuktitut daycare in danger of closing

ᐃᓄᒃᑎᑑᖅᑐᑐᐊᒥ ᐸᐃᕆᕝᕕᖓ ᐃᖃᓗᖕᓂ ᒪᑐᑐᐃᓐᓇᕆᐊᖃᖅᐳᖅ ᑐᐊᕕᕐᓇᖅᑐᒥ ᑮᓇᐅᔭᖃᖅᑎᑕᐅᔭᕆᐊᖃᕐᒪᑦ, ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᐅᖃᓚᐅᖅᐳᖅ ᒪᐃ 22−ᒥ ᑲᓇᑕᐅᑉ ᒪᓕᒐᓕᐅᕐᕕᖏᑕ ᑲᑎᒪᕕᒡᔪᐊᖓᓂ.

ᑐᒥᑯᓗᐃᑦ ᓴᐃᐹᕿᕕᒃ ᐸᐃᕆᕝᕕᖓ ᒪᑐᐃᓚᐅᖅᓯᒪᕗᖅ ᐊᕐᕌᒍᑦ 18−ᖑᓕᖅᑐᓂ ᐸᐃᕆᕝᕕᑐᐊᖑᓪᓗᓂ ᐃᖃᓗᖕᓂ ᐅᖃᓪᓚᒃᑐᓄᑦ “ᓯᕗᓂᒃᓴᒥ ᒪᒃᑯᒃᑐᓄᑦ ᓯᕗᓕᐅᖅᑎᒃᓴᓄᑦ” ᐃᓄᒃᑎᑐᑦ ᐊᒻᒪ ᐃᓕᓐᓂᐊᖅᑎᑕᐅᓪᓗᑎᒃ ᐃᓄᐃᑦ ᐃᓕᖅᑯᓯᖓᓐᓂ, ᐅᖃᓚᐅᖅᐳᖅ ᐃᓱᒻᒥᖅᑐᐃᔨ ᓯᒥᒐ ᓚᐃᑕ.

ᒪᑐᓚᐅᑲᓚᐅᖅᓯᒪᕗᖅ 2019−ᒥ ᑮᓇᐅᔭᓕᕆᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ ᐊᒻᒪ ᓚᐃᑕ ᐅᖃᓚᐅᖅᐳᖅ ᓇᓗᓇᐃᖅᓯᓇᓱᐊᖅᐳᖅ ᑕᐃᒪᐃᒃᑲᓐᓂᔾᔮᙱᓐᓂᖓᓂ. ᑭᓯᐊᓂ, ᐅᖃᓚᐅᖅᐳᖅ ᐱᓇᓱᐊᕈᓯᐅᓚᐅᖅᑐᒥ ᑮᓇᐅᔭᐃᑦ ᐊᑐᖅᑐᒃᓴᑦ ᐊᐅᓚᑦᑎᔪᐃᓐᓇᓕᓚᐅᖅᐳᑦ ᒪᕐᕉᒃᑲᓐᓂᕐᓂᕐᓄᑦ ᐱᓇᓱᐊᕈᓯᕐᓄᑦ.

“ᐅᓇ ᐊᒃᑐᐃᓂᖃᕐᓂᐊᖅᐳᖅ ᓄᓇᓕᓕᒫᒥᒃ ᐅᓇ ᐱᓕᕆᓂᕆᒐᑦᑎᒍᑦ ᐱᓯᒪᐃᓐᓇᕐᓂᕐᒥ ᐅᖃᐅᓯᑦᑎᓐᓂ ᐊᒻᒪ ᐱᓯᒪᐃᓐᓇᕐᓂᕐᒥ ᐃᓕᖅᑯᓯᑦᑎᓐᓂ,” ᐅᖃᓚᐅᖅᐳᖅ. “ᐅᖃᐅᓯᐅᓕᐅᕈᓐᓇᙱᓚᖓ ᐊᒃᓱᕈᕐᓂᕆᔭᓐᓂ ᒫᓐᓇᓕᓴᐅᔪᒥ.”

ᓚᐃᑕ ᐳᓚᕋᓚᐅᖅᐳᖅ ᐃᓪᓚᐅᑦ ᑎᑎᕋᕐᕕᖓᓄᑦ ᒪᐃ 14−ᒥ ᐅᖃᐅᑎᔭᖅᑐᖅᖢᓂᐅᒃ ᐅᑯᓂᖓ ᐊᒃᓱᕈᕈᑕᐅᔪᓂ.

ᐅᖃᓚᐅᖅᐳᖅ ᖃᐅᔨᒪᓯᒪᓂᖓᓂ ᐃᓪᓚᐅᑦᒥ ᐊᒥᓱᓄᑦ ᐊᕐᕌᒍᓄᑦ. ᐃᖅᑲᓇᐃᔭᖅᓯᒪᓪᓗᓂ ᐸᐃᕆᕝᕕᓂ ᐊᕐᕌᒍᓄᑦ 24-ᓄᑦ, ᓚᐃᑕ ᐸᖅᑭᓯᓯᒪᕗᖅ ᐃᓪᓚᐅᑦ ᒪᕐᕉᔪᓂ ᐸᓂᖏᓐᓂ ᑕᐃᑲᓂᓗᑦᑖᖅ ᐃᖅᑲᓇᐃᔮᕆᓯᒪᔭᖓᓐᓂ.

ᒫᓐᓇᐅᔪᒥ 6−ᓂ ᐃᓕᓯᒪᐃᓐᓇᖅᑐᓂ ᐃᖅᑲᓇᐃᔭᖅᑎᖃᖅᐳᑦ, ᐃᓚᖃᖅᑐᒥ ᓚᐃᑕᒥ, ᐃᖅᑲᓇᐃᔭᖅᐸᒃᑐᓄᑦ ᐸᐃᕆᕝᕕᖕᒧᑦ 20−ᓂ ᓱᕈᓯᕐᓂ ᐸᐃᕆᔭᐅᕙᒃᑐᓂ.

ᑖᒃᑯᓇᓂ 6−ᖑᔪᓂ, ᐱᖓᓱᑦ ᐸᖅᑭᔨᐅᕗᑦ. “ᐱᐅᑦᑎᐊᖅᑐᒥ ᓄᓇᕐᔪᐊᒥ,” ᐸᐃᕆᕝᕕᒃ 6−ᓂ ᐸᖅᑭᔭᖃᕋᔭᖅᐳᖅ ᑕᐃᒪᓐᓇᑎᒋ ᐅᓄᖅᑎᒋᔪᓄᑦ ᓱᕈᓯᐅᔪᓂ, ᐅᖃᓚᐅᖅᐳᖅ ᓚᐃᑕ.

ᐸᐃᕆᕝᕕᒃ ᑕᒪᒃᑭᒐᓚᖕᒥ ᑮᓇᐅᔭᖃᖅᑎᑕᐅᕗᖅ ᓄᓇᕗᒻᒥ ᒐᕙᒪᒃᑯᓐᓂ. ᐊᖓᔪᖅᑳᑦ ᐊᑭᓖᓲᖑᕗᑦ $10 ᐅᓪᓗᑕᒫᒥ, ᓄᓇᕗᒻᒥ ᒐᕙᒪᒃᑯᑦ ᐃᓚᓯᓪᓗᑎᒃ $43−ᒥ ᐊᑐᓂ ᓱᕈᓯᕐᒧᑦ.

ᒪᐃ 15−ᒥ, ᒐᕙᒪᑐᖃᒃᑯᑦ ᐅᖃᐅᓯᖃᓚᐅᖅᐳᑦ $10.9 ᒥᓕᐊᓐᓂ ᑮᓇᐅᔭᖃᖅᑎᑕᐅᒃᑲᓐᓂᕐᓂᐅᔪᒥ ᓄᓇᕗᒻᒥ ᐸᐃᕆᕝᕕᓄᑦ ᖄᒃᑲᓐᓂᐊᒍᑦ $66 ᒥᓕᐊᓐᓂ ᐊᖏᖅᓯᒪᓂᖓᓂ 2022−ᒥ ᐃᓚᒋᔭᐅᓪᓗᓂ ᑲᓇᑕᒥ-ᓄᓇᕗᒻᒥ ᑲᓇᑕᓕᒫᒥ ᐱᒋᐊᓕᓵᖅᑐᓄᑦ ᐃᓕᑦᑎᓂᐅᔪᒧᑦ ᐊᒻᒪ ᓱᕈᓯᕐᓂ ᐸᖅᑭᓂᐅᔪᒥ ᐊᖏᕈᑕᐅᔪᒥ.

ᑭᓯᐊᓂ ᑮᓇᐅᔭᐃᑦ ᑎᑭᓐᓇᓵᓗᐊᖃᑦᑕᖅᐳᑦ, ᐅᖃᓚᐅᖅᐳᖅ ᐃᓪᓚᐅᑦ ᐅᖃᐅᓯᒃᓴᓕᐊᖓᓐᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ.

“ᑮᓇᐅᔭᖃᖅᑎᑕᐅᓂᐅᔪᑦ ᐊᑯᓂᐅᓗᐊᖅᐳᑦ ᑎᑭᓐᓇᓱᐊᕐᓂᖏᓐᓂ ᑐᒥᑯᓗᐃᑦ ᓴᐃᐹᕿᕕᒃ ᐸᐃᕆᕝᕕᖓᓄᑦ. ᓕᐳᕈᒃᑯᑦ ᓇᓗᓇᐃᖅᓯᓂᐊᖅᐸᑦ ᑐᒥᑯᓗᐃᑦ ᐃᒃᓯᓐᓇᖅᑕᐅᑐᐃᓐᓇᔾᔮᙱᓐᓂᖓᓂ ᐊᒻᒪ ᐱᓗᑎᒃ ᑐᐊᕕᕐᓇᖅᑐᓂ ᑮᓇᐅᔭᖃᖅᑎᑕᐅᓂᐅᔪᓂ ᐱᔭᕆᐊᓕᖏᓐᓂ ᒪᑐᐃᖓᐃᓐᓇᕈᓐᓇᕐᓂᕐᒧᑦ?”

ᖃᓇᑕᒥ ᐊᖓᔪᖅᑳᕐᔪᐊᖅ ᔭᔅᑎᓐ ᑐᕉᑑ ᓱᓕᓂᕋᐃᓪᓗᓂ ᑭᐅᓂᖓᓂ “ᖃᐅᔨᒋᐊᕐᓂᐊᕐᓂᖓᓂ ᐆᒧᖓ ᐱᓕᕆᐊᖑᓂᐅᔪᒧᑦ.”

ᐊᐱᖅᓱᖅᑕᐅᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ, ᐃᓪᓚᐅᑦ ᐅᖃᓚᐅᖅᐳᖅ ᓴᖅᑭᑎᑦᑎᓚᐅᕐᓂᖓᓂ ᐊᑲᐅᙱᓕᐅᕈᑕᐅᔪᒥ ᐱᔾᔪᑎᖃᖅᑐᒥ “ᐃᓄᒃᑎᑑᖅᐸᖕᓂᖓᓂ ᐸᐃᕆᕝᕕᐅᓪᓗᓂ, ᐱᔭᕆᐊᖃᓪᓚᕆᒋᖕᒪᒍ.”

ᖃᐅᑎᓪᓗᒍ, ᓚᐃᑕ ᐅᖃᓚᐅᖅᐳᖅ, ᑭᒡᒐᖅᑐᐃᔨᐅᔪᒥ ᑎᑎᕋᕐᕕᐅᔪᒥ ᐃᓚᒌᓄᑦ, ᓱᕈᓯᕐᓄᑦ ᐊᒻᒪ ᐃᓅᖃᑎᒌᖑᔪᓄᑦ ᐱᕙᓪᓕᐊᑎᑦᑎᓂᕐᒧᑦ ᒥᓂᔅᑕᖓ ᔨᐊᓇ ᓴᑦᔅ ᐃᒻᒥᓄᑦ ᖃᐅᔨᒋᐊᓚᐅᖅᐳᖅ.

ᓚᐃᑕ ᑲᑎᒪᖃᑎᖃᕐᓂᐊᓚᐅᖅᐳᖅ ᒥᓂᔅᑕᐅᑉ ᑎᑎᕋᕐᕕᖓᓂ ᑕᒪᑐᒪᓂ ᐱᓇᓱᐊᕈᓯᐅᔪᒥ.

ᐊᒃᓱᕈᖅᓯᒪᓪᓗᓂ ᑭᓯᐊᓂ ᓂᕆᐅᖕᓂᖃᖅᖢᓂ, ᓚᐃᑕ ᐅᖃᓚᐅᖅᐳᖅ ᖃᐅᔨᒪᕗᖅ ᑐᒥᑯᓗᐃᑦ ᓴᐃᐹᕿᕕᒃ ᐸᐃᕆᕝᕕᖓ “ᐊᓂᒎᑎᕈᓘᔭᕐᓂᐊᖅᐳᖅ ᖃᓄᑐᐃᓐᓇᖅ.”

“ᐊᖏᔪᐊᓗᖕᒥ ᐱᔪᒪᓂᖃᖅᐳᖅ ᐸᐃᕆᕝᕕᓄᑦ ᐃᓂᒃᓴᐅᔪᓄᑦ ᐃᖃᓗᖕᓂ,” ᐅᖃᓚᐅᖅᐳᖅ ᓚᐃᑕ.

“ᐃᓄᒃᑎᑑᖅᐸᒃᑐᓂ ᐸᐃᕆᕝᕕᑐᐊᖑᓂᑦᑎᓐᓂ ᐃᖃᓗᖕᓂ, ᐱᒻᒪᕆᐅᕗᖅ ᒪᑐᐃᖓᐃᓐᓇᖅᑎᑦᑎᓂᕐᒥ, ᐃᑲᔪᓲᖑᖕᒪᑦ ᐅᖃᐅᓯᑦᑎᓐᓂ ᐊᒻᒪ ᓯᕗᓂᒃᓴᒥ ᓯᕗᓕᖅᑎᑯᓘᓛᖅᑐᓂ ᐱᓯᒪᐃᓐᓇᕐᓂᕐᒥ ᐅᖃᐅᓯᑦᑎᓐᓂ.”