ᓘᒃᑖᖅ ᐋᓇ ᐹᓄᔨ, ᐃᑲᔪᖅᑐᐃᓯᒪᔪᖅ ᐆᒧᖓ RSV ᑲᐴᑎᒥ ᐃᓄᐃᑦ ᓄᑕᕋᓛᖏᓐᓄᑦ, ᐊᔾᔨᖃᖅᑐᖅ ᐅᕙᓂ 2012-ᒥ ᐃᕐᓂᖓᓗ ᓇᐃᑕᓐ ᐹᓄᔨ-ᑭᐅᓂ ᐃᓕᓴᕆᔭᐅᔾᔪᑎᑖᖅᑎᓪᓗᒍ ᐆᒥᖓ ᐋᓐᑎᐅᕆᐅᒥ ᐱᖁᔭᐅᔪᒥ (Order of Ontario) ᐱᓕᕆᐊᖏᓐᓄᑦ ᐅᑭᐅᕐᑕᖅᑐᕐᒥ. (ᐊᔾᔨᙳᐊᖅ ᐅᕙᙵᑦ ᐋᓇ ᐹᓄᔨ)
ᓄᓇᕗᑦ ᐊᑐᐃᓐᓇᖃᖅᑎᑦᑎᓕᕐᑐᖅ RSV ᑲᐴᑎᒥ ᑕᒪᐃᓐᓄᑦ ᓄᑕᕋᓛᓄᑦ
ᓄᓇᑕᐃᑦ ᑕᖅᑭᖃᖅᑐᑦ 12 ᑐᖔᓂ ᑲᐱᔭᐅᖃᑦᑕᓕᕐᓂᐊᖅᑐᑦ Nirseyimab ᑲᐴᑎᒥ ᑕᒪᑐᒪ ᑕᖅᑭᐅᑉ ᐃᓚᖓᓂ
For the English version of this story, please see Access to RSV immunization to be made available to all Inuit babies.
ᓄᑖᖅ ᑲᐱᓯᑲᑕᒍᑎᐅᓂᐊᕐᑐᖅ ᐳᕙᒃᑯᑦ ᐋᓐᓂᐊᕆᔭᐅᔭᑦᑐᒥ — ᐊᑎᖃᖅᑎᑕᐅᔪᖅ RSV — ᐊᑐᐃᓐᓇᐅᓕᕐᓂᐊᕐᑐᖅ ᑕᒪᐃᓐᓄ ᓄᑕᕋᓛᓄᑦ ᓄᓇᕗᒥ ᐱᒋᐊᕐᓗᓂ ᐅᒃᑑᐱᕆ ᓄᖑᑉᐸᓪᓕᐊᓕᕐᐸᑦ.
ᐅᓇ ᐊᑎᖃᕐᑐᖅ Nirsevimab ᑲᐴᑎ, ᐋᓐᓂᐊᖃᕐᓇᙱᑦᑐᓕᕆᔨᓄᑦ ᐅᖃᐅᓯᐅᓯᒪᔪᖅ “ᐊᑑᑎᖃᒻᒪᕆᒃᑐᖅ” ᐋᓐᓂᐊᖅᑖᖅᑕᐃᓕᔾᔪᑎ ᓴᐳᔾᔨᓯᒪᔾᔪᑎᐅᓪᓗᓂ ᓄᑕᕋᓛᓂ ᐳᕙᖏᑦᑎᒍᑦ ᐋᓐᓂᐊᖅᑖᖅᑎᑦᑎᑕᐃᓕᓂᕐᒧᑦ, ᑖᓐᓇᓗ ᐃᓅᓵᓄᑦ ᑲᐱᔭᐅᔾᔪᑎᐅᖃᑦᑕᕐᓂᐊᖅᖢᓂ.
“ᐊᒻᒪᓗ ᓄᑕᕋᓛᑦ ᑕᕿᖃᕐᑐᑦ 12 ᑐᖔᓂ ᐃᓅᓵᕐᓂᑯᕕᓃᑦ ᐊᒻᒪᑦᑕᐅᖅ ᑲᐱᔭᐅᓂᐊᕐᒥᔪᑦ,” ᐅᖃᕐᑐᖅ ᓯᐊᓯ ᕼᐋᕗᓴᓐ, ᐅᖃᕐᑎᒋᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
ᓯᕗᓪᓕᐅᓚᐅᕐᑐᖅ RSV-ᒧᑦ ᐱᓕᕆᐊᖑᓂ ᐃᒪᐃᑦᑐᒥ Palivizumab-ᒥ ᓄᑕᕋᓛᓄᑦ ᐋᓐᓂᐊᓕᕈᒥᒋᔭᐅᔪᓄᑦ ᐋᓐᓂᐊᖑᕙᒃᑐᒧᑦ, ᓲᕐᓗ ᐅᑯᐊ ᐃᓅᓂᖏ ᐆᒻᒪᑎᖏᑦᑎᒍᑦ ᐋᓐᓂᐊᖃᕐᑐᑦ ᐅᕝᕙᓘᓐᓃᑦ ᐳᕙᖏᑦᑎᒍᑦ ᐋᓐᓂᐊᓖᑦ.
ᐊᑐᐃᓐᓇᐅᓛᓕᕐᖢᓂ ᑕᒪᐃᓐᓄᑦ ᐋᓐᓂᐊᕕᖕᓄᑦ ᓄᓇᕗᒥ, ᐅᓇ Nirsevimab ᐃᓱᒪᒋᔭᐅᔪᖅ ᓄᓇᕗᒥᑦ ᒐᕙᒪᒃᑯᓐᓄᑦ ᐊᒃᑐᐃᓂᖃᕐᓂᕐᓴᐅᔪᓐᓇᕐᓂᖓᓂᒃ ᓄᑕᐅᙱᓐᓂᕐᓴᒥ RSV ᑲᐴᑎᒥ Palivizumab, ᑖᓐᓇᓗ ᑕᖅᑭᑕᒫᑦ ᑲᐱᔭᐅᔾᔪᑎᐅᔭᕆᐊᖃᖅᖢᓂ.
“Nirsevimab ᐊᑯᓂᐅᓂᕐᓴᖅ ᓴᐳᔾᔨᓯᒪᔪᓐᓇᖅᑐᖅ ᐊᑕᐅᓯᖅ ᑲᐴᑎ ᓄᑕᕋᓛᓂ. ᒪᑯᐊᓕ ᐅᓗᕆᐊᓇᖅᑐᒦᑦᑐᓄᑦ ᓄᑕᕋᓛᓄᑦ, ᒪᕐᕈᐃᖅᑕᐅᓇᔭᕐᑐᖅ ᓴᐳᔾᔭᐅᓯᒪᒃᑲᓐᓂᕐᓂᐊᕐᒪᑕ RSV ᐋᓐᓂᐊᕆᔭᐅᔭᕐᓂᖓᓂ,” ᕼᐋᕗᓴᓐ ᐅᖃᕐᑐᖅ.
ᑲᐱᔭᐅᔪᑦ ᐆᒥᖓ Nirsevimab ᐆᑎᕐᓇᕈᑎᐅᓗᐊᖅᐸᙱᖢᓂ, ᑭᓯᐊᓂᓕ ᐊᐅᐸᕐᓯᐊᕐᔪᖕᓇᖅᖢᓂ ᐳᕕᓕᐊᕐᔪᖕᓇᖅᖢᓂᓗ ᐆᑎᕐᓇᕈᔪᓐᓇᖅᖢᓂ, ᐋᓐᓂᐊᖃᕐᓇᙱᑦᑐᓕᕆᔨᑦ ᐅᖃᓚᐅᕐᑐᑦ. ᐊᖓᔪᖅᑳᑦ ᑕᒪᑐᒧᖓ ᐃᓱᒫᓘᑎᖃᕐᑐᑦ ᐋᓐᓂᐊᓯᐅᖅᑎᒧᑦ ᖃᐅᔨᒋᐊᒃᑲᓐᓂᕈᓐᓇᕐᑐᑦ.
ᐆᒧᖓᓕ ᓘᒃᑖᖅ ᐋᓇ ᐸᓄᔨᒧᑦ, ᓱᕈᓯᕐᓂ ᐊᐃᑦᑑᑎᐅᔭᑦᑐᑦ ᐋᓐᓂᐊᕆᔭᐅᕙᒃᑐᓄᑦ ᐱᓕᕆᔨᒻᒪᕆ ᔫᓂᕘᓯᑎ ᑐᕌᓐᑐᒥ ᖃᐅᔨᓴᖃᑦᑕᕐᓯᒪᔪᖅ ᐊᕐᕌᒍᓂ 30-ᓂ ᐋᓐᓂᐊᒥᒃ RSV ᐃᓄᐃᑦ ᓄᑕᕋᓛᖏᓐᓂᑦ, ᐃᓱᒪᒋᔭᖓ ᑖᓐᓇ ᐋᖅᑭᒃᐹᓪᓕᕈᑎᐅᓂᐊᕆᐊᒃᓴᖓᓂ.
“ᐊᓕᐊᓇᐃᒻᒪᕆ ᑕᒪᕐᒥ ᓱᕈᓰᑦ ᓄᓇᕗᒥᑦ ᐊᑐᐃᓐᓇᖃᕐᓂᐊᓕᕐᒪᑕ ᑖᔅᓱᒥᖓ ᑲᐱᔭᐅᔾᔪᑎᒃᓴᒥ,” ᐅᖃᕐᑐᖅ.
ᐃᑲᔪᕋᓱᖕᓂᕐᒧᑦ ᐊᑐᐃᓐᓇᖃᕈᓐᓇᖁᓪᓗᒋᑦ RSV ᐃᓅᓕᓴᐅᑎᒥ ᐃᓄᐃᑦ ᓄᑕᕋᓛᖏᓐᓄᑦ, ᐸᓄᔨ ᐱᒋᐊᖅᑎᑦᑎᓚᐅᕐᓯᒪᔪᖅ #FairMedicine (ᐊᔾᔨᒌᒃᑎᑦᑎᓂᖅ ᐃᓅᓕᓴᐅᑎᒃᑯᑦ) ᖃᕋᓴᐅᔭᒃᑰᖓᔪᒥ 2019-ᖑᑎᓪᓗᒍ ᐊᒻᒪᓗ ᐊᑎᓕᐅᕐᕕᐅᓚᐅᕐᓯᒪᓪᓗᓂ ᒫᓂ 250,000-ᓄ ᑲᓇᑕᒥᐅᑕᓄᑦ.
ᐅᓇ ᐱᓕᕆᔾᔪᑎᐅᓂᑯ ᐃᒪᐃᓕᖓᓚᐅᕐᓯᒪᔪᖅ ᑲᐱᔭᐅᖃᑦᑕᖁᔨᓪᓗᑎᒃ ᑕᒪᐃᓐᓂ ᐃᓄᐃᑦ ᓄᑕᕋᓛᖏᓐᓂ ᑕᕿᖃᖅᑐᓂ 6 ᑐᖔᓂ, ᐱᓗᐊᕐᑐᒥ ᐅᑭᐅᕐᑕᖅᑐᕐᒥ ᓄᓇᓕᖕᓂ ᑕᒫᓃᑦᑐᑦ ᐅᓄᓛᖑᕙᖕᒪᑕ ᐳᕙᖏᑦᑎᒍᑦ ᐋᓐᓂᐊᖅᑖᖅᑐᑦ RSV-ᒥ ᐊᒻᒪᓗ ᐃᓐᓇᖓᔭᕆᐊᖃᓕᖅᐸᒃᖢᑎᒃ ᐋᓐᓂᐊᕕᖕᓂ.
“RSV-ᒧᑦ ᐋᓐᓂᐊᕐᕕᖕᒧᐊᖅᑕᐅᓂᖅ ᐊᑭᑐᔪᐊᓘᖕᒪᑦ ᐊᒻᒪᓗ ᖃᐅᔨᓚᐅᕋᑦᑕ ᐊᑭᑭᓐᓂᕐᓴᐅᓂᖓᓂ ᑲᒪᒋᔭᖃᕐᓂᕐᒥ ᖃᓄᐃᑎᑦᑎᑦᑕᐃᓕᓂᒃᑯᑦ ᐊᑐᙱᓐᓂᕐᓴᐅᔪᓐᓇᕈᑎᓂ ᐋᓐᓂᐊᕐᕕᓕᐊᕆᐊᖃᓕᕐᓂᕐᒥᒃ ᐊᑭᑐᔪᐊᓘᓪᓗᓂᓗ,” ᐅᖃᕐᑐᖅ.
ᐹᓄᔨ ᐊᕐᕌᒍᒐᓴᖕᓂ ᐱᓕᕆᐊᕆᓇᓱᒃᑕᖓ ᐃᒃᐱᒋᑦᑎᐊᓚᐅᕐᑕᖓ, ᓲᖃᐃᒻᒪ ᐃᕐᓂᖓ ᓴᐃᑕᓐ ᐹᓄᔨ-ᑭᐅᓂ, ᐃᓅᔪᓐᓃᕐᓂᑯ 2018-ᒥ, ᑲᖏᖅᑐᒑᐱᖕᒥᐅᑕᐅᓚᐅᕐᓯᒪᖕᒪᑦ.
“ᐅᓪᓗᒥ ᐊᕐᕌᒍᓂ 6-ᓂ ᐃᓅᔪᓐᓃᕐᓯᒪᓕᕐᑐᖅ,” ᐹᓄᔨ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ ᓯᑎᐱᕆ 25-ᒥ.
“ᖃᐅᔨᒪᓚᐅᕐᑐᖅ ᐃᑲᔪᕋᓱᓚᐅᕐᓂᓐᓂ ᑕᐃᔭᖏᓐᓂ ‘ᐃᓅᖃᑎᒃᑲ,’ ᐊᒻᒪ ᐊᓯᖏᓐᓂ ᐃᓄᐃᑦ ᓱᕈᓯᖏᓐᓂᒃ. ᑕᐃᒪᑐ ᐅᓪᓗᒥ ᖁᕕᐊᓱᒡᓕ ᐊᒻᒪ ᐅᕙᓐᓂ ᐅᐱᒋᔭᖃᕐᓕ.”
ᐅᓇ RSV ᐋᓐᓂᐊᕐᓇᐅᔪᓐᓃᕐᒥᒃᐸᑦ ᐅᑯᐊ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓱᒪᔪᑦ ᐱᒋᐊᖅᑎᑦᑎᔪᒪᓪᓗᑎᒃ “ᓯᕗᓂᒃᓴᒥ ᐊᓈᓇᐅᔪᓄᑦ ᑲᐱᔭᐅᔾᔪᑎᒃᓴᓕᕆᓂᕐᒥ” ᐃᓚᒌᓂ ᓴᐳᔾᔨᓯᒪᒃᑲᓐᓂᕋᓱᖕᓂᕐᒧᑦ.
ᐃᓐᓇᐅᓂᕐᓴᐃᑦ ᓄᓇᕗᒥᑦ—ᐱᓗᐊᖅᑐᒥ ᐊᕐᕌᒍᓖᑦ 75 ᐅᖓᑖᓄᑦ, ᐊᒻᒪᓗ ᐊᕐᕌᒍᓖᑦ 65 ᐅᖓᑖᓄᑦ ᑲᒪᒋᔭᐅᖏᓐᓇᕐᕕᖕᒦᑦᑐᓄᑦ—ᐊᒻᒪ ᑖᔅᓱᒥᖓ RSV-ᒧᑦ ᑲᐱᔭᐅᖃᑦᑕᓕᕐᓂᐊᖅᑐᑦ.
(0) Comments