ᖃᐅᔨᔭᐅᔭᕆᐊᖃᙱᑦᑐᓄᓪᓗ ᑭᒡᒐᖅᑐᐃᔨᖓ ᐊᐱᖅᓱᖅᐳᖅ ᓄᓇᕗᒻᒥ ᒐᕙᒪᒃᑯᓐᓄᑦ ᐃᖅᑲᓇᐃᔮᖅᑖᖅᑎᙱᓪᓗᒍ ᑎᑎᕋᖅᓯᒪᓂᐅᔪᓂ

For English version, see Privacy commissioner questions GN’s handling of Do Not Hire lists

ᐃᖅᑲᓇᐃᔮᒧᑦ ᑐᒃᓯᕋᖅᑐᓂ ᖃᐅᔨᒪᔭᐅᑎᑕᐅᔭᕆᐊᖃᖅᐳᑦ ᑎᑎᕋᖅᓯᒪᖕᒪᖔᑕ ᓈᒻᒪᒋᔭᐅᙱᑦᑐᓂ ᐊᒻᒪ ᐅᒃᐱᕆᔭᒃᓴᐅᙱᑦᑐᓂ ᐃᖅᑲᓇᐃᔮᖃᖅᑎᑕᐅᓂᕐᒥ ᓄᓇᕗᒻᒥ ᒐᕙᒪᒃᑯᓐᓄᑦ, ᐅᖃᖅᐳᖅ ᓄᓇᕗᒻᒥ ᑐᑭᓯᒋᐊᕐᓂᕐᒥᒃ ᖃᐅᔨᔭᐅᔭᕆᐊᖃᙱᑦᑐᓄᓪᓗ ᑭᒡᒐᖅᑐᐃᔨᖓ.

“ᐊᑲᐅᙱᓕᐅᕈᑕᐅᔪᒥ ᐃᖅᑲᓇᐃᔮᖅᑖᖅᑎᙱᓪᓗᒍ/ᐃᖅᑲᓇᐃᔮᖅᑖᖅᑎᓪᓗᒍ ᐅᔾᔨᖅᓱᑦᑎᐊᕐᓗᒍ ᑎᑎᕋᖅᓯᒪᓂᖓ ᓴᖅᑭᓯᒪᕗᖅ ᑎᓴᒪᓂ ᒫᓐᓇᓕᓴᐅᔪᒥ ᕿᒥᕐᕈᔭᐅᓂᐅᔪᒥ ᐅᓂᒃᑳᓕᐊᓂ,” ᒍᕋᐃᐊᒻ ᓯᑏᐅᓪ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

“ᑕᒪᒃᑭᑦ ᑎᓴᒪᓂ ᐱᓕᕆᓂᐅᔪᑦ ᐃᓚᖃᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ.”

ᓯᑏᐅᓪ ᑎᓴᒪᓂ ᐅᓂᒃᑳᓕᐊᓂ ᐅᕙᙶᖅᐳᑦ ᐱᖓᓱᓂ ᐅᖃᐱᓗᖕᓂᐅᔪᓂ ᐱᖓᓱᓂ ᐊᔾᔨᒌᙱᑦᑐᓂ ᐃᖅᑲᓇᐃᔭᖅᑎᓂ, ᒪᕐᕉᒃ ᑳᓐᑐᕌᒃᑎᐅᓪᓗᑎᒃ ᓴᓇᔨᐅᓪᓗᑎᒃ. ᐊᑕᐅᓯᕐᒥ ᐃᓱᒪᓕᐊᖑᔪᖅ ᑎᑎᕋᖅᑕᐅᓚᐅᖅᐳᖅ ᒪᐃ 27−ᒥ, ᒪᕐᕉᒃ ᑎᑎᕋᖅᑕᐅᓪᓗᑎᒃ ᐋᒍᔅᑎ 27−ᒥ ᐊᒻᒪ ᒫᓐᓇᓕᓴᐅᓛᖑᔪᒥ ᑎᑎᕋᖅᑕᐅᓚᐅᖅᐳᖅ ᓯᑎᐱᕆ 7−ᒥ.

ᓯᑏᐅᓪ, ᐊᑐᐃᓐᓇᖃᖅᓯᒪᔪᒥ ᑐᑭᓯᒋᐊᕐᓂᕐᒥᒃ ᖃᐅᔨᔭᐅᔭᕆᐊᖃᙱᑦᑐᓄᓪᓗ ᑭᒡᒐᖅᑐᐃᔨᓄᑦ ᑕᐃᒪᙵᓂ ᔭᓄᐊᕆ 2021−ᒥ, ᐅᖃᓚᐅᖅᐳᖅ ᐅᑯᐊ ᐅᓂᒃᑳᓕᐊᖑᔪᑦ ᓯᕗᓪᓕᖅᐹᑦᑎᐊᒥ ᑲᒪᒋᔭᖃᕐᓂᖓᓂ ᐊᑲᐅᙱᓕᐅᕈᑕᐅᔪᒥ ᐃᖅᑲᓇᐃᔮᖅᑖᖅᑎᙱᓪᓗᒍ ᑎᑎᕋᖅᓯᒪᓂᐅᔪᓂ ᐃᓂᒋᔭᖓᓃᓕᕐᓂᖓᓂ.

ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᕿᒥᕐᕈᓚᐅᕐᓂᖓᓂ ᑕᐃᔅᓱᒪᓂᒃᑲᓐᓂᖅ ᐃᓱᒪᓕᐊᖑᔪᓂ ᐊᒻᒪ ᐅᒃᐱᕈᓱᒃᐳᖅ ᐅᑯᐊ ᐅᖃᐱᓘᑕᐅᔪᑦ “ᓯᕗᓪᓕᖅᐸᐅᓪᓗᑎᒃ ᖃᓄᐃᓐᓂᐅᔪᓂ” ᓄᓇᕘᑉ ᐊᑐᐃᓐᓇᖃᕐᓂᖓᓂ ᑐᓴᒐᒃᓴᓄᑦ ᑎᑎᕋᕐᕕᖕ ᑕᑯᓯᒪᓂᖏᓂ ᐃᖅᑲᓇᐃᔭᖅᑎᐅᓚᐅᖅᓯᒪᔪᓂ ᐊᐱᕆᓪᓗᑎᒃ ᕿᒥᕐᕈᔭᐅᓂᖓᓂ ᑕᑯᒃᓴᐅᑎᑦᑎᑦᑎᐊᕐᓂᕐᒥ ᓈᒻᒪᒋᔭᐅᙱᑦᑐᓂ ᐊᒻᒪ ᐅᒃᐱᕆᔭᒃᓴᐅᙱᑦᑐᓂ.

ᒫᓐᓇᓕᓴᐅᓛᖑᔪᒥ ᐅᖃᐱᓘᑕᐅᔪᒥ, ᓯᑏᐅᓪ ᕿᒥᕐᕈᓚᐅᖅᐳᖅ ᖃᓄᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑑᑎᖃᕐᓂᖓᓂ ᐊᑐᐃᓐᓇᖃᕐᓂᕐᒥ ᑐᓴᒐᒃᓴᓄᑦ ᒪᓕᒐᖓᓂ ᑳᓐᑐᕌᒃᑎᑦᑎᓂᕐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ-ᐸᖅᑭᔨᐅᔪᒧᑦ ᐃᓱᒪᓕᐅᕋᓱᐊᓚᐅᖅᑐᒥ ᖃᓄᐃᒻᒪᑦ ᐃᖅᑲᓇᐃᔭᖅᑎᑕᐅᒃᑲᓐᓂᙱᓐᓂᖓᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓᓂ.

ᐅᖃᐱᓗᒃᑎᐅᔪᖅ — ᓇᓗᓇᐃᖅᑕᐅᓯᒪᙱᑦᑐᒥ — ᓯᕗᓂᐊᓂ ᐃᖅᑲᓇᐃᔭᖅᑎᑕᐅᕙᓚᐅᖅᐳᖅ ᕿᓚᒻᒥᐅᔪᒥ ᑳᓐᑐᕌᖑᔪᓂ ᓄᓇᕗᒻᒥ ᓄᓇᓕᐅᔪᓂ.

ᑎᑎᖅᑲᖁᑎᓕᐅᓚᐅᖅᐳᑦ ᐊᑐᐃᓐᓇᖃᕐᓂᕐᒥ ᑐᓴᒐᒃᓴᓄᑦ ᑐᒃᓯᕋᐅᑎᒥ ᐃᓕᑦᑎᓇᓱᐊᕐᓂᕐᒧᑦ ᖃᓄᐃᒻᒪᑦ ᐱᔪᓐᓇᕈᓐᓂᑳᓪᓚᖕᓂᖏᓐᓂ ᐃᖅᑲᓇᐃᔭᕐᓂᕐᒧᑦ ᓄᓇᕗᒻᒥ ᒐᕙᒪᒃᑯᓐᓄᑦ, ᓯᑏᐅᓪ ᐅᓂᒃᑳᓕᐊᖓ ᐅᖃᓚᐅᖅᐳᖅ.

ᑎᑎᖅᑲᖁᑕᐅᔪᑦ ᑕᑯᒃᓴᐅᑎᑦᑎᓚᐅᖅᐳᑦ ᐸᓯᔭᐅᓂᐅᔪᒥ ᓈᒻᒪᙱᑦᑐᒥ ᐃᓕᖅᑯᓯᖃᕐᓂᖃᕐᓂᕐᒥ ᓴᓇᔨᐅᔪᒧᑦ ᑭᓯᐊᓂ “ᐸᓯᔭᐅᓂᐅᔪᖅ ᑭᓲᓂᖓᓂ ᐅᕝᕙᓘᓐᓃᑦ ᐸᓯᒃᖠᕆᓚᐅᖅᑐᒥ” ᑲᙳᓇᖅᑎᑕᐅᓚᐅᖅᐳᖅ, ᓯᑏᐅᓪ ᐅᓂᒃᑳᓕᐊᖓ ᐅᖃᓚᐅᖅᐳᖅ.

“ᑐᒃᓯᕋᖅᑐᖅ (Kafkaesque) ᐊᒃᓱᕈᖅᑎᑦᑎᓂᐅᔪᒥ ᖃᓄᐃᓕᖓᓂᖃᖅᐳᖅ. ᐸᓯᔭᐅᓯᒪᖕᒪᑕ ᑭᓱᒥᒃᑭᐊᖅ, ᑭᓯᐊᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᐅᔾᔨᔾᔮᙱᓚᑦ ᑭᓲᓂᖓᓂ ᐸᓯᔭᐅᓂᐅᔪᒥ.”

ᓯᑏᐅᓪ ᐅᓂᒃᑳᓕᐊᖓ ᑕᑯᒃᓴᐅᑎᑦᑎᓂᖃᓚᐅᙱᓚᖅ ᐃᖅᑲᓇᐃᔭᕐᕕᖕᒥ ᖃᐅᔨᓴᖅᑕᐅᓂᐅᔪᒥ ᐸᓯᔭᐅᓂᐅᔪᒧᑦ ᐊᒻᒪ ᐅᖃᐱᓗᓪᓚᕆᖕᓂᐅᔪᒥ ᓴᓇᔪᖃᓚᐅᙱᓚᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓴᓇᔨᐅᔪᓄᑦ ᐱᒡᒍᔾᔨᔨᖏᓐᓄᑦ.

ᐅᔾᔨᕆᓚᐅᖅᐳᖅ ᐅᕙᓂ ᖃᓄᐃᓐᓂᐅᔪᒥ, ᐃᖅᑲᓇᐃᔮᖅᑖᖅᑎᙱᓪᓗᒍ ᐃᓱᒪᓕᐅᕐᓂᖃᓚᐅᕐᓂᖓᓂ ᐃᓚᐅᑎᑦᑎᓂᖃᕐᓇᓂ ᐃᖅᑲᓇᐃᔭᖅᑎᒧᑦ ᐱᓕᕆᔨᐅᔪᓄᑦ ᐊᕕᒃᓯᒪᔪᓄᑦ ᐃᓗᐊᓂ ᐃᖅᑲᓇᐃᔭᖅᑐᓕᕆᔨᓄᑦ ᐱᓕᕆᕝᕕᖓᓄᑦ.

“ᐱᓪᓚᕆᐅᓂᖓᓂ ᑎᑎᕋᖅᓯᒪᓂᖓᑎᒎᕈᓂ ᐋᒃᑲᓘᓐᓃᑦ … ᐃᓱᒪᓕᐊᖑᔪᒥ ᓄᓇᕗᒻᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᑦᑎᒃᑲᓐᓂᙱᓐᓂᕐᒥ ᑭᓇᑐᐃᓐᓇᒥᒃ ᐱᓪᓚᕆᐅᕗᖅ ᐃᖅᑲᓇᐃᔮᕆᔭᐅᔪᒥ-ᑭᒡᓕᖃᖅᑎᑦᑎᔪᒥ ᐅᕝᕙᓘᓐᓃᑦ ᐃᖅᑲᓇᐃᔮᕆᔭᐅᔪᒥ-ᐃᓱᓕᑦᑎᓂᖓᓂ ᖃᓄᐃᓐᓂᐅᔪᓄᑦ ᐃᓄᖕᒧᑦ ᐃᓱᒪᒋᔭᐅᓂᐅᔪᒧᑦ,” ᓯᑏᐅᓪ ᐅᖃᓚᐅᖅᐳᖅ ᓯᑎᐱᕆ 7−ᒥ ᐃᓱᒪᓕᐊᖓᓐᓂ.

ᓄᓇᕗᒻᒥ ᒐᕙᒪᒃᑯᑦ ᐱᔪᓐᓇᕐᓂᖃᖅᐳᑦ ᐱᓯᒪᓂᕐᒥ ᐃᖅᑲᓇᐃᔮᖅᑖᖅᑎᙱᓪᓗᒍ ᐊᒻᒪ ᐃᖅᑲᓇᐃᔮᖅᑖᖅᑎᓪᓗᒍ ᐅᔾᔨᖅᓱᑦᑎᐊᕐᓗᒍ ᑎᑎᕋᖅᓯᒪᓂᐅᔪᓂ, ᓯᑏᐅᓪ ᐅᖃᓚᐅᖅᐳᖅ ᐋᒍᔅᑎ 27−ᒥ ᐅᓂᒃᑳᓕᐊᖓᓐᓂ.

ᑭᓯᐊᓂ, ᐅᖃᓚᐅᖅᐳᖅ, ᐅᑯᐊ ᑎᑎᕋᖅᓯᒪᓂᐅᔪᑦ ᓴᖅᑭᑎᑦᑎᕗᑦ “ᖃᔅᓯᒐᓚᖕᓂ ᑕᑯᔭᐅᔭᕆᐊᖃᙱᓐᓂᐅᔪᓂ ᐊᒻᒪ ᐊᑐᐃᓐᓇᖃᕐᓂᕐᒥ ᐊᑲᐅᙱᓕᐅᕈᑕᐅᔪᓂ” ᐊᒻᒪ ᐊᐱᖅᑯᑕᐅᔪᓂ, ᐃᓚᖃᖅᑐᒥ ᖃᓄᖅ ᑭᓇᑐᐃᓐᓇᖅ ᐃᓕᔭᐅᕙᖕᓂᖓᓂ ᐅᕝᕙᓘᓐᓃᑦ ᐲᖅᑕᐅᕙᖕᓂᖓᓂ ᑎᑎᕋᖅᓯᒪᓂᐅᔪᒥ, ᐅᔾᔨᕈᓱᒃᑎᑕᐅᕙᖕᒪᖔᑕ, ᐊᒻᒪ ᑭᒃᑯᑦ ᑕᑯᓲᖑᓂᖏᓐᓂ ᑎᑎᕋᖅᓯᒪᓂᐅᔪᒥ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᖃᐅᔨᒋᐊᓚᐅᖅᐳᑦ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᐅᑯᓂᖓ ᐊᐱᖅᑯᑎᖃᖅᖢᑎᒃ ᑭᓯᐊᓂ ᓱᓕ ᑭᐅᔭᐅᓚᐅᙱᓚᑦ.

ᓯᑏᐅᓪ ᐋᒍᔅᑎ 27−ᒥ ᐅᓂᒃᑳᓕᐊᖓ ᐃᒪᐃᖁᔨᓇᔭᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐃᖅᑲᓇᐃᔭᖅᑐᓕᕆᔨᒃᑯᓐᓂ ᐱᓕᕆᕝᕕᖏᓐᓂ ᐅᖃᐅᓯᖃᕐᓂᖏᓐᓂ ᐃᖅᑲᓇᐃᔮᖅᑖᖅᑎᙱᓪᓗᒍ ᐊᒻᒪ ᐃᖅᑲᓇᐃᔮᖅᑖᖅᑎᓪᓗᒍ ᐅᔾᔨᖅᓱᑦᑎᐊᕐᓗᒍ ᑎᑎᕋᖅᓯᒪᓂᖃᕐᓂᖏᓐᓂ, ᓇᒥ ᐸᐸᑕᐅᓲᖑᓂᖏᓐᓂ ᑎᑎᕋᖅᓯᒪᓂᐅᔪᑦ, ᐊᒻᒪ ᐅᖃᐱᓗᒃᑎᐅᔫᑉ ᐊᑎᖓ ᑕᐃᑲᓂ ᑎᑎᕋᖅᑕᐅᓯᒪᓂᖃᕈᓂ.

ᐄᓛᒃ ᐃᖅᑲᓇᐃᔭᖅᑐᓕᕆᔨᒃᑯᑦ ᐋᖅᑭᐅᒪᑎᑦᑎᓲᖑᕗᑦ ᐃᖅᑲᓇᐃᔮᖅᑖᖅᑎᙱᓪᓗᒍ ᐊᒻᒪ ᕿᒥᕐᕈᓂᕐᒧᑦ ᐅᔾᔨᖅᓱᕐᓗᑎᒃ ᑎᑎᕋᖅᓯᒪᓂᐅᔪᓂ, ᐅᖃᓚᐅᖅᐳᖅ ᐃᖅᑲᓇᐃᔭᖅᑐᓕᕆᔨᒃᑯᑦ ᒥᓂᔅᑕᖓ ᐹᒥᓚ ᒍᕉᔅ ᑭᐅᓂᖓᓄᑦ ᓯᑏᐅᓪ ᐋᒍᔅᑎ 27−ᒥ ᐅᓂᒃᑳᓕᐊᖓᓄᑦ.

ᐃᖅᑲᓇᐃᔭᖅᑎᐅᔪᑦ ᐅᕙᓂ ᑎᑎᕋᖅᓯᒪᓂᐅᔪᒦᑦᑐᓂ ᐱᕙᒃᐳᑦ “ᐃᖅᑲᓇᐃᔮᒥᓂ ᓄᖅᑲᖅᑎᑕᐅᓂᖓᓂ ᑎᑎᖅᑲᒥᒃ” ᐅᖃᐅᔾᔨᓪᓗᑎᒃ ᐃᖅᑲᓇᐃᔭᕈᓐᓇᙱᓐᓂᖏᓐᓂ ᓄᓇᕗᒻᒥ ᒐᕙᒪᒃᑯᓐᓄᑦ “ᐊᑯᓂᐅᓂᐅᔪᒥ ᐊᕐᕌᒍᓄᑦ ᒪᕐᕉᖕᓄᑦ,” ᒍᕉᔅ ᐅᖃᓚᐅᖅᐳᖅ ᑭᐅᓂᖓᓂ, ᐅᓪᓗᖃᖅᑐᒥ ᓯᑎᐱᕆ 23−ᒥ.

ᕿᒥᕐᕈᓂᕐᒧᑦ ᐅᔾᔨᖅᓱᕐᓗᑎᒃ ᑎᑎᕋᖅᓯᒪᓂᐅᔪᒥ ᐃᓚᖃᖅᐳᖅ ᐃᖅᑲᓇᐃᔭᖅᑎᐅᔪᓂ ᐲᖅᑕᐅᓯᒪᔪᓂ ᐃᖅᑲᓇᐃᔮᖅᑖᖅᑎᙱᓪᓗᒍ ᑎᑎᕋᖅᓯᒪᓂᐅᔪᒥ ᑭᓯᐊᓂ ᓴᖅᑭᑎᑦᑎᕗᖅ “ᐱᓪᓚᕆᐅᔪᒥ ᐅᓗᕆᐊᓇᕐᓂᖓᓂ ᐃᖅᑲᓇᐃᔭᖅᑎᖁᑎᓕᖕᒧᑦ,” ᐅᖃᓚᐅᖅᐳᖅ ᒍᕉᔅ.

ᑐᒃᓯᕋᕈᓐᓇᖅᐳᑦ ᐃᓂᒃᓴᐅᔪᒧᑦ ᒐᕙᒪᐅᑉ ᐃᓗᐊᓂ, ᑭᓯᐊᓂ ᑐᓂᓯᔭᕆᐊᖃᖅᐳᑦ ᑐᑭᓯᒋᐊᖅᑎᑦᑎᔾᔪᑎᒥᒃ ᑎᑎᖅᑲᒥ ᑭᖑᓪᓕᖅᐹᖑᔪᒥ ᓄᓇᕗᒻᒥ ᒐᕙᒪᒃᑯᓐᓂᑦ ᐱᓕᕆᕝᕕᐅᔪᒥ ᐃᖅᑲᓇᐃᔭᕐᕕᒋᓚᐅᖅᑕᖓᓐᓂ.