ᓄᓇᕗᑦ ᑐᙵᕕᒃᑯᑦ ᓂᕈᐊᖅᑎᑦᑎᓛᕐᑐᑦ ᑎᓯᐱᕆ 9-ᒥ

For English version, see Nunavut Tunngavik Inc. presidential election set for Dec. 9

ᓄᓇᕗᑦ ᑐᙵᕕᒃᑯᑦ ᑐᓴᒐᒃᓴᓕᐅᓚᐅᕐᒪᑕ ᐱᒋᐊᕐᓂᐊᓕᕐᓂᖏᓐᓂ ᐊᖓᔪᖅᑳᒃᓴᖅᒥ ᓂᕈᐊᓛᕐᓂᖏᓐᓄᑦ.

ᓂᕈᐊᒐᒃᓴᓕᐅᕐᓇᕐᓂᐊᖅᑐᖅ ᐅᒃᑑᐱᕆ 28 9:00-ᒥ ᐅᓪᓛᒃᑯᑦ ᐊᒻᒪ ᒪᑐᓗᓂ ᓄᕕᐱᕆ 1 5:00-ᒥ ᐅᓐᓄᓴᒃᑯᑦ. ᓂᕈᐊᕐᓇᓛᖅᖢᓂ ᑎᓯᐱᕆ 9-ᒥ, ᓄᓇᕗᑦ ᑐᙵᕕᒃᑯᑦ ᑐᓴᒐᒃᓴᖏᓐᓂ ᐅᖃᓚᐅᕐᑐᑦ ᐅᒃᑑᐱᕆ        8-ᖑᑎᓪᓗᒍ.

ᓄᓇᕗᑦ ᑐᙵᕕᒃᑯᑦ ᒪᓕᒐᖅᑎᒍᑦ ᑭᒡᒐᖅᑐᐃᔨᐅᔪᑦ ᐃᓄᖕᓂ ᓄᓇᕗᒥᑦ ᐊᒻᒪᓗ ᓄᓇᕗᒧᑦ ᐊᖏᕈᑎᓃᑦᑐᓂᒃ ᐊᑐᖅᑕᐅᓂᐊᕐᓂᕋᕐᓯᒪᔪᓂᒃ ᐊᑐᖅᑕᐅᑎᑦᑎᔨᐅᕙᒃᑐᑦ ᒐᕙᒪᑐᖃᒃᑯᓐᓄᑦ ᐊᒻᒪ ᓄᓇᕗᑦ ᒐᕙᒪᖓᓄᑦ.

ᐊᖓᔪᖅᑳᖅ ᓂᕈᐊᕆᔭᐅᔭᒃᑐᖅ ᐊᕐᕌᒍᓂ ᑎᓴᒪᓂ ᐊᖓᔪᖅᑳᖑᓂᐊᕐᓗᓂ ᐊᒻᒪ ᑲᑎᒪᔨᐅᖃᑕᐅᓪᓗᓂ ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᓐᓂ.

ᒫᓐᓇ ᐊᖓᔪᖅᑳᕆᔭᐅᔪᖅ ᐊᓗᑭ ᑰᑦᑎᖅ ᐊᖓᔪᖅᑳᖑᓯᒪᔪᖅ ᐱᒋᐊᖅᖢᓂ 2016-ᒥ, ᓂᕈᐊᖅᑕᐅᒃᑲᓐᓂᓚᐅᕐᓯᒪᓪᓗᓂ 2021-ᒥ ᓂᕈᐊᕐᑐᑦ ᓲᕐᓗ ᒪᕐᕉᒃ ᐱᖓᓱᓂ. ᓂᕈᐊᕐᓇᐅᑎᓪᓗᒍ 17.5 ᐳᓴᓐᑎ ᓂᕈᐊᕈᓐᓇᖅᑐᑦ ᓂᕈᐊᓚᐅᕐᓯᒪᔪᑦ.

ᑰᑦᑎᖅ ᐅᖃᕐᕕᐅᔪᓐᓇᓚᐅᙱᒻᒪᑦ ᐊᐱᕆᔭᐅᔪᒪᒐᓗᐊᖅᖢᓂ ᓂᕈᐊᒐᒃᓴᐅᒃᑲᓐᓂᓛᕆᐊᒃᓴᖓᓂ. ᒫᓂᖓ ᐃᐊᓪ-ᑲᓇᔪᒃ, ᓂᕈᐊᒐᒃᓴᓕᕆᔨ ᓄᓇᕗᑦ ᑐᙵᕕᒃᑯᓐᓄᑦ, ᐅᖃᓚᐅᕐᑐᖅ ᐅᖃᖃᑎᖃᕐᓂᐊᕐᓂᕋᖅᖢᓂ ᑲᑐᔾᔨᖃᑎᒌᑦ ᑲᑎᒪᔨᖏᓐᓂ ᐱᓇᓱᐊᕈᓯᐅᓂᐊᕐᑐᒥ ᖃᓄᖅ ᓂᕈᐊᕈᓐᓇᖅᑐᓂᒃ ᓂᕈᐊᖅᑎᑦᑎᒃᑲᓐᓂᕐᓂᐊᕆᐊᒃᓴᖏᓐᓂ.

ᐃᓄᐃᑦ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᓄ ᓂᕈᐊᒐᒃᓴᐅᔪᒪᔪᑦ ᓂᕈᐊᒐᒃᓴᓕᐅᕈᑎᓂ ᐱᔪᓐᓇᕐᑐᑦ ᐃᐊᓪ-ᑲᓇᔪᒃᒥ ᖃᕋᓴᐅᔭᒃᑯᑦ ᐅᕗᖓ nticro@ayaya.ca. ᓂᕈᐊᒐᒃᓴᓕᐅᕈᑎᓂᒃᑕᐅᖅ ᓄᓇᖏᓐᓂ ᐱᓕᕆᔭᐅᔪᓂᒃ ᐱᔪᓐᓇᕐᑐᑦ ᐅᕝᕙᓘᓐᓃᑦ ᓄᓇᕗᑦ ᑐᙵᕕᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᓂ ᓂᕈᐊᒐᒃᓴᓕᐅᕐᓇᖅ ᒪᑐᐃᕐᐸᑦ.

ᓂᕈᐊᒐᒃᓴᐅᔪᓐᓇᕐᑐᑦ ᐃᓄᐃᑦ ᐊᑎᖃᖃᑕᐅᔪᑦ ᓄᓇᕗᒧᑦ ᐊᖏᕈᑎᓂ, ᐊᕐᕌᒍᖃᕐᓗᑎᒃ 16-ᓂ ᐅᖓᑖᓄᑦ ᑎᓯᐱᕆ 9 ᑎᑭᑎᓪᓗᒍ ᐊᒻᒪᓗ ᓂᕈᐊᕈᓐᓇᕐᓗᓂ.

ᐊᒻᒪᓗ, ᓂᕈᐊᒐᒃᓴᐃᑦ ᐱᕋᔭᒃᓯᒪᙱᒃᑲᓗᐊᕐᒪᖔᑕ ᖃᐅᔨᓴᖅᑕᐅᔾᔪᑎᓂ ᑐᓂᓯᓯᒪᔭᕆᐊᓖᑦ ᐅᓪᓗᑦ 90 ᑐᖔᓂ ᓂᕈᐊᒐᒃᓴᓕᐅᕐᓇᖅ ᒪᑐᐃᕐᓂᐊᓵᕐᓂᖓᓂ.

ᐊᕐᕌᒍᒧᑦ ᑲᑎᒪᕕᒡᔪᐊᓛᕐᑐᑦ ᓄᓇᕗᑦ ᑐᙵᕕᒃᑯᑦ ᐱᒋᐊᕐᓗᑎᒃ ᐅᒃᑑᐱᕆ 22-ᒥ 24-ᒧ ᐅᓇᑕᕐᑐᒃᓴᙳᐊᑦ ᐃᒡᓗᖓᓂ ᐃᖃᓗᖕᓂ. ᑭᒃᑯᑐᐃᓐᓇᕐᓄᑦ ᒪᑐᐃᖓᓂᐊᕐᑐᖅ ᑲᑎᒪᓂᖅ ᐊᒻᒪᓗ ᓴᖅᑭᔮᖅᑎᑕᐅᓗᓂ ᓄᓇᕗᑦ ᑐᙵᕕᒃᑯᑦ ᕙᐃᔅᐳᒃᑯᑦ ᓴᖅᑭᔮᒐᖓᒍᑦ.