ᐃᓕᖅᑯᓯᕐᓂᒃ ᖃᐅᔨᓴᖅᑎ ᐱᕐᓈᑦ ᓴᓛᑎᓐ ᑎ’ᐋᖑᓗᐊᕐ ᐃᓅᔪᓐᓃᖅᐳᖅ 88−ᖑᓕᖅᖢᓂ

For the English version of this story, please see Anthropologist Bernard Saladin d’Anglure dies at 88.

ᐅᐃᕖᖅ ᐃᓕᖅᑯᓯᕐᓂᒃ ᖃᐅᔨᓴᖅᑎ ᐅᖃᐅᓯᕐᓂ ᖃᐅᔨᓴᕐᓂᕐᒥ ᐃᓕᖅᑯᓯᒥᓪᓗ ᐃᓕᖅᑯᓯᖓᓐᓂ ᐱᕐᓈᑦ ᓴᓛᑎᓐ ᑎ’ᐋᖑᓗᐊᕐ, ᖃᐅᔨᒪᔭᐅᔪᖅ ᐱᓕᕆᕐᔪᐊᕐᓂᑯᖏᓐᓄᑦ ᖃᐅᔨᓴᖅᖢᓂ ᐃᓄᐃᑦ ᐃᓕᖅᑯᓯᖓᓐᓂ ᐊᒻᒪ ᐅᒃᐱᕐᓂᖏᓐᓂ ᓄᓇᕕᖕᒥ ᐊᒻᒪ ᓄᓇᕗᒻᒥ, ᐃᓅᔪᓐᓃᓚᐅᖅᐳᖅ ᕕᕗᐊᕆ 12−ᒥ ᑐᓘᔅ, ᕗᕌᓐᔅᒥ.

88−ᖑᓚᐅᖅᐳᖅ.

ᑎ’ᐋᖑᓗᐊᕐ ᑲᓇᑕᒧᐊᓚᐅᖅᓯᒪᕗᖅ ᓯᕗᓪᓕᖅᐹᒥ ᐅᑭᐅᖃᖅᖢᓂ 19−ᓂ ᐃᑲᔪᖅᑕᐅᓪᓗᓂ ᐃᓕᓐᓂᐊᕈᑎᒧᑦ ᐊᑎᑭᓕᐅᑎᒃᓴᖅ ᑮᓇᐅᔭᓂ ᐊᒻᒪ ᐱᔪᒪᓂᕐᔪᐊᕆᔭᖏᓐᓂ ᓇᓂᓯᓂᕐᒧᑦ ᐃᓄᐃᑦ ᐃᓕᖅᑯᓯᖓᓐᓂ, ᐅᖃᐅᓯᐅᓪᓗᓂ ᐅᓂᒃᑳᕆᓯᒪᔪᒥ ᐃᓅᓯᖓᓐᓂ ᓯᓚᑦᑐᖅᓴᕐᕕᒡᔪᐊᒥ ᑯᐸᐃᖕᒥ ᒪᓐᑐᕆᐋᓪᒥ, ᐱᓚᐅᖅᑎᓪᓗᒍ ᖁᕝᕙᓯᒃᑐᒥ ᐃᓕᓴᕆᔭᐅᔪᖕᒥ ᐃᓕᖅᑯᓯᕐᓂᒃ ᖃᐅᔨᓴᕐᓂᕐᒥ 1964−ᓯᒥ.

ᑎᑭᓚᐅᖅᑎᓪᓗᒍ ᓴᕗᕕᐅᕐ, ᑯᐸᐃᖕᒧᑦ, ᓄᓇᓯᐅᑎᑯᑖᒃᑯᑦ, ᐃᑭᓚᐅᖅᐳᖅ ᖃᖓᑕᓲᒧᑦ ᐊᒻᒪ ᐳᓚᕋᓚᐅᖅᐳᖅ ᐊᒥᓱᓄᑦ ᓄᓇᕕᖕᒥ ᓄᓇᓕᐅᔪᓄᑦ, ᐱᒋᐊᖅᖢᓂ ᖁᐊᖅᑕᕐᒧᑦ.

ᓖᓴ ᖁᐱᖅᑯᐊᓗᒃ, ᒫᓐᓇ ᐊᖓᔪᖅᑳᖑᔪᖅ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᓄᑦ, ᐃᓕᓐᓂᐊᖅᑎᐅᓚᐅᖅᓯᒪᕗᖅ ᓯᓚᑦᑐᖅᓴᕐᕕᒡᔪᐊᖅ ᓚᕚᓪᒥ ᐃᓕᖅᑯᓯᕐᓂᒃ ᖃᐅᔨᓴᕐᓂᕐᒥ ᐱᓕᕆᕝᕕᖓᓂ. ᑎ’ᐋᖑᓗᐊᕐ ᐊᐱᖅᓱᓚᐅᖅᓯᒪᕙᖓ ᐊᑖᑕᑦᑎᐊᖓᓂ ᐊᖏᕐᕋᖓᓂ ᓄᓇᓕᖓᓐᓂ ᐳᕕᕐᓂᖅᑑᒥ, ᐅᖃᓚᐅᖅᐳᖅ, ᐊᒻᒪ ᖁᕕᐊᓚᐅᖅᐳᖅ ᐃᓕᓐᓂᐊᕐᓂᐊᕐᓂᖓᓂ ᐃᓕᖅᑯᓯᕐᓂᒃ ᖃᐅᔨᓴᕐᓂᕐᒥ.

“ᑲᒪᓇᕐᔪᐊᓚᐅᖅᐳᖅ ᖃᓄᖅ ᐃᓯᕋᒥ ᐃᓄᐃᑦ ᓄᓇᕐᔪᐊᖓᓄᑦ ᐊᒻᒪ ᖃᓄᑎᒋ ᐃᒃᐱᒍᓱᕐᔪᐊᕐᓂᖃᕐᓂᖓᓂ ᑕᑯᒃᓴᐅᑎᑦᑎᓂᖓᓂ,” ᖁᐱᖅᑯᐊᓗᒃ ᐅᖃᓚᐅᖅᐳᖅ.

“ᑕᑯᒃᓴᐅᓂᖃᓚᐅᖅᐳᖅ ᐱᓕᕆᓂᐅᔪᒥ ᐅᕙᑦᑎᓐᓂ ᐱᓕᕆᖃᑎᖃᕐᓂᖓᓂ ᐃᒻᒥᒃᑯᑦ ᐃᓅᓪᓗᑕ, ᐊᐱᖅᓱᐃᓐᓇᐅᔭᖅᖢᓂ ᑭᒃᑯᓐᓂ ᐊᖓᔪᖅᑳᖃᕐᒪᖔᑦᑕ, ᑭᓇᒥᒃ ᐊᑎᖃᕐᓂᑦᑎᓐᓂ, ᐊᒻᒪ ᐅᕙᑦᑎᓐᓂ ᑕᑯᒃᓴᐅᑎᑦᑏᓐᓇᐅᔭᖅᖢᓂ ᓴᙱᓂᖅ ᐊᒻᒪ ᐱᐅᔪᒥ ᐃᓱᒪᒋᔭᐅᓂᐅᔪᒥ ᐃᓅᓂᕐᒥ.”

ᐅᖃᓚᐅᖅᐳᖅ ᐃᖅᑲᐅᒪᕗᖅ ᕿᒪᐃᒐᔪᖕᓂᖓᓂ ᑎᑎᕋᕐᕕᒃᓴᓂ ᐃᓄᐃᑦ ᖃᐅᔨᒪᓂᕐᒥ ᑎᒍᒥᐊᖅᑎᐅᔪᓄᑦ ᑎᑎᕋᕐᕕᒋᓂᐊᖅᑕᖓᓐᓂ ᖃᐅᔨᒪᔭᖏᓐᓂ ᐊᒻᒪ ᐃᒻᒥᓄᑦ ᓇᒃᓯᐅᔾᔭᐅᓗᑎᒃ. ᕿᓚᒥᐊᓗᒃ ᐃᓕᑦᑎᓚᐅᖅᐳᖅ ᐅᖃᓪᓚᒍᓐᓇᑦᑎᐊᕐᓂᕐᒥ ᑖᒃᑯᓄᖓ ᑲᑎᙵᓂᖃᕐᓂᐅᔪᓄᑦ,” ᐅᖃᓚᐅᖅᐳᖅ.

“ᐱᓕᕆᓯᒪᕗᖅ ᑲᒪᓇᖅᑐᒥ ᖃᐅᔨᒪᓂᐅᔪᒥ ᑲᑎᖅᓱᐃᓂᕐᒥ ᓄᓇᕕᖕᒥ, ᐊᒻᒪᓗ ᐃᒡᓗᓕᖕᒥᑦᑕᐅᖅ” ᖃᐅᔨᓴᓚᐅᕐᓂᖓᓂ ᐅᖃᓕᒫᒐᓕᐊᖓᓐᓂ, ᖁᐱᖅᑯᐊᓗᒃ ᐅᖃᓚᐅᖅᐳᖅ.

ᑕᒪᒃᑭᒐᓚᐃᑦ ᐅᑯᓇᓂ ᓂᐱᓕᐅᖅᑕᐅᓂᑯᓂ ᐊᒻᒪ ᑎᑎᕋᖅᑕᐅᓯᒪᔪᑦ ᐅᖃᓕᒫᒐᓂ ᐊᕐᕌᒍᒐᓴᓄᑦ ᐸᐸᑕᐅᕗᑦ ᐊᕙᑕᖅ ᐃᓕᖅᑯᓯᓕᕆᕝᕕᖕᒥ ᒪᓐᑐᕆᐋᓪᒥ.

“ᑲᒪᓇᖅᑐᒥ ᐃᖅᑲᐅᒪᓂᖃᓚᐅᖅᐳᖅ, ᐃᖅᑲᐅᒪᔪᓐᓇᓚᐅᖅᐳᖅ ᐊᑐᓂ ᐅᓂᒃᑳᖅᑐᐊᒥ ᐃᓄᖕᓂ ᐅᖃᐅᔾᔪᖅᑕᖏᓐᓂ,” ᖁᐱᖅᑯᐊᓗᒃ ᐅᖃᓚᐅᖅᐳᖅ ᑎ’ᐋᖑᓗᐊᕐᒥ, ᐃᓚᒋᐊᖅᓯᓪᓗᓂ ᐃᖅᑲᐅᒪᔪᓐᓇᓚᐅᖅᐳᖅ ᐊᑐᓂ ᐃᓅᑉ ᐊᑎᖓᓂ.

ᓇᖕᒥᓂᖅ ᐃᓕᓐᓂᐊᕐᓂᖓᓂ ᐃᓕᖅᑯᓯᕐᓂᒃ ᖃᐅᔨᓴᕐᓂᕐᒥ, ᐃᒻᒥᓂᒃ ᖃᐅᔨᓚᐅᖅᐳᖅ ᐅᖃᓕᒫᕐᓂᖓᓂ ᑎ’ᐋᖑᓗᐊᕐ ᐊᒥᓱᐊᖅᓱᖅᖢᒍ, ᐃᓄᐃᑦ ᐅᒃᐱᕐᓂᕆᔭᖏᓐᓂ, ᐊᖓᒃᑰᓂᕐᒥ, ᐊᖑᑕᐅᓂᖓᓂ ᐊᕐᓇᐅᓂᖓᓂ ᐊᑐᖅᑕᐅᕙᓚᐅᖅᑐᓂ ᐊᒻᒪ ᓱᓕᓂᐅᔪᒥ ᐊᒥᓱᑦ ᐃᓄᐃᑦ ᐃᖅᑲᐅᒪᓂᖏᓐᓂ ᓇᔾᔨᐊᕆᔭᐅᑎᓪᓗᒋᑦ ᐃᓅᓚᐅᙱᑎᓪᓗᒋᑦ.

ᓖᓴ ᖁᐱᖅᑯᐊᓗᒃ, ᓴᐅᒥᖕᒥ, ᐅᖃᓪᓚᖃᑎᖃᖅᐳᖅ ᐱᕐᓈᑦ ᓴᓛᑎᓐ ᑎ’ᐋᖑᓗᐊᕐᒥ ᑭᖑᓪᓕᖅᐹᒥ ᑕᑯᒐᒥᐅᒃ ᐱᐊᕆᔅᒥ ᐊᖏᕐᕋᖓᓂ 2023−ᒥ. (ᓖᓴ ᖁᐱᖅᑯᐊᓗᒃ ᐊᔾᔨᓕᐅᖅᑕᖓ)

“ᑲᒪᓇᖅᑐᒥ ᑕᑯᓂᐅᓚᐅᖅᐳᖅ ᐅᒃᐱᕐᓂᕐᒥ ᓄᓇᕐᔪᐊᒥ, ᐊᒻᒪ ᑐᑭᓯᐅᒪᓂᑦᑎᓐᓂ,” ᐅᖃᓚᐅᖅᐳᖅ.

ᑎ’ᐋᖑᓗᐊᕐ ᐅᖃᓕᒫᒐᖓ, ᐃᓄᐃᑦ ᐅᓂᒃᑳᖅᑐᐊᖏᑦ ᐃᓅᓂᕐᒥ ᐊᒻᒪ ᐃᓅᒃᑲᓐᓂᕐᓂᖓᓂ: ᐊᖑᑕᐅᓂᕐᒥ ᐊᕐᓇᐅᓂᕐᒥ, ᐊᖓᒃᑰᓂᕐᒥ ᐊᒻᒪ ᐱᖓᔪᖓᑦ ᑭᓲᓂᖓᓂ, “ᐊᔭᐅᕆᓂᕐᔪᐊᖑᓚᐅᖅᐳᖅ ᐅᕙᑦᑎᓐᓄᑐᐊᖑᙱᑦᑐᒥ ᐃᓅᓪᓗᑕ, ᑭᓯᐊᓂ ᓯᓚᑖᓄᑦ ᓄᓇᕐᔪᐊᒧᑦ ᐅᖃᐅᓯᖃᕐᓂᖓᓂ ᑐᑭᓯᐅᒪᓂᑦᑎᓐᓂ,” ᐅᖃᓚᐅᖅᐳᖅ.

ᖁᐱᖅᑯᐊᓗᒃ ᐊᒻᒪ ᑎ’ᐋᖑᓗᐊᕐ ᐃᓛᓐᓂᒃᑯᑦ ᑲᑎᖃᑎᒌᒃᐸᓚᐅᖅᐳᑦ ᐅᖃᓪᓚᖕᓂᕐᒧᑦ ᓴᖑᒐᔪᒃᑐᒥ ᐃᒻᒥᓂᒃ ᐅᖃᐅᓯᖃᖅᖢᓂ ᐅᓂᒃᑳᕐᓂᕐᒥ ᓇᒧᙵᐅᕈᓘᔭᖃᑦᑕᓚᐅᕐᓂᖓᓂ.

“ᐅᖃᐅᓯᒃᓴᖃᕐᔪᐊᓚᐅᖅᑐᖅ, ᑕᐅᕗᖓ ᑕᐅᕗᖓ ᓈᓚᒍᓐᓇᖅᖢᑕ ᑭᐱᙳᓕᓚᐅᕐᓇᑕ ᑲᒪᓇᖅᑐᓂ ᐅᓂᒃᑳᕆᓂᐅᔪᓂ ᐃᖅᑲᐅᒪᔪᓐᓇᕐᓂᖓᓂ,” ᐅᖃᓚᐅᖅᐳᖅ.

1974−ᒥ, ᑎ’ᐋᖑᓗᐊᕐ ᐱᒋᐊᖅᑎᑦᑎᓚᐅᖅᐳᖅ ᐃᓄᒃᓯᐅᑏᑦ ᑲᑎᒪᔩᑦ ᑲᑐᔾᔨᖃᑎᒌᖑᔪᒥ, ᑮᓇᐅᔾᔭᒃᓴᕈᑕᐅᙱᖦᖢᑎᒃ ᑲᑐᔾᔨᖃᑎᒌᖑᔪᒥ ᑐᕌᒐᒃᓴᖃᖅᖢᓂ ᐅᑎᖅᑎᕆᓂᕐᒥ ᑎᑎᕋᖅᑕᐅᓯᒪᓂᐅᔪᓂ, ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᐊᒻᒪ ᖃᐅᔨᓴᕐᓂᐅᔪᒥ ᐃᓄᖕᓂ, ᐃᓄᖕᓄᑦ.

1977−ᒥ, ᐱᒋᐊᖅᑎᑦᑎᓚᐅᖅᐳᖅ ᖃᐅᔨᓴᖅᑕᐅᓂᕐᒥ ᐅᖃᓕᒫᒐᓕᐊᖑᔪᒥ ᑕᐃᔭᐅᔪᒥ Études ᐃᓄᖕᓂ ᖃᐅᔨᓴᕐᓂᐅᔪᓂ, ᓱᓕ ᑎᑎᕋᖅᑕᐅᕙᒃᑐᒥ ᒪᕐᕈᐃᖅᓱᖅᑐᕐᒥ ᐊᕐᕌᒍᒥ.

ᑎ’ᐋᖑᓗᐊᕐ ᐃᑲᔪᓚᐅᕆᕗᖅ ᒥᑎᐊᕐᔪᒃ ᓇᑉᐹᓗᒃ ᑐᑭᓕᐅᕆᓂᕐᒥ ᓯᕗᓪᓕᖅᐸᐅᔪᒥ ᐃᓄᒃᑎᑐᑦ−ᐅᖃᐅᓯᕐᒥ ᐅᖃᓕᒫᒐᓕᐊᖑᔪᒥ ᑎᑎᕋᖅᑕᐅᓚᐅᖅᓯᒪᔪᒥ, ᑕᐃᔭᐅᔪᒥ ᓴᓈᕐᒥ.