ᓱᓪᓗᓕ ᐃᓕᔭᐅᓯᒪᓚᐅᑲᒃᑐᖅ ᐳᕕᕐᓂᑐᕐᒥ ᓄᓇᓕᖕᓂ “ᐅᔾᔨᕈᓱᑦᑎᐊᕆᐊᖃᕐᓇᖅᑐᒦᑎᑦᑎᔪᖅ” ᑭᓯᐊᓂ ᐋᖅᑭᒃᓯᒪᐃᓐᓇᕐᓂᐊᖅᑐᒥ ᐱᓕᕆᐊᖃᕈᑎᒃ, ᐅᖃᕐᑐᖅ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ ᐃᒃᓯᕙᐅᑕᖅ ᕼᐃᐊᑕ ᓯᓅᐹᓪ. ᒪᐃᖑᓚᐅᕐᑐᒥ ᐅᓇ ᓱᓪᓗᓕᒃ ᓱᕋᒃᑕᐅᓚᐅᕐᓯᒪᖕᒪᑦ ᖃᒧᑕᐅᔭᒃᑰᖅᑐᒧᑦ. (ᐊᔾᔨᙳᐊᖅ ᐅᑯᓇᙵᑦ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓂ/ᐹᑐᕆᒃ ᑕᔅᑐᕆᔭᓐ)
ᐳᕕᕐᓂᕐᑐᕐᒥ ᐃᒪᕐᒧᑦ ᐊᖅᑯᑎ ᓴᓇᔭᐅᓂᐊᕐᓂᖓ ᐊᑭᖃᑐᐃᓐᓇᕆᐊᓕᒃ ᒥᓕᐊᑲᓪᓚᖕᓂ
ᐅᖂᓴᐅᑎᒋᔭᐅᔪᖅ ᑲᐃᐳᒧᑦ ᓇᓂᔭᐅᔪᓐᓇᙱᑉᐸᑦ ᑕᒪᓐᓇ ᐱᓕᕆᔾᔪᓯᐅᔪᖅ ᐋᖅᑭᒋᐊᖅᑕᐅᒃᑲᓐᓂᑐᐃᓐᓇᕆᐊᓕᒃ, ᐅᖃᕐᑐᖅ ᐃᖅᑲᓇᐃᔮᓄᑦ ᑐᑭᒧᐊᖅᑎᑦᑎᔨ
For the English version of this story, please see Puvirnituq repairs could cost millions, take another year to fix.
ᐳᕕᕐᓂᕐᑐᕐᒥ ᐃᒪᕐᒧᑦ ᓱᓪᓗᓕᒃ ᓴᓇᔭᐅᔭᕆᐊᓕᒃ ᐊᑭᑐᓂᕐᓴᐅᑐᐃᓐᓇᕆᐊᓕᒃ ᐊᒻᒪ ᐊᑯᓂᐅᓂᕐᓴᖅ ᐱᓕᕆᐊᖑᓗᓂ ᐃᓱᒪᒋᔭᐅᓚᐅᕐᑐᒥ, ᐅᖃᕐᑐᖅ ᑲᑎᕕᒃ ᓄᓇᓕᓕᒫᑦ ᒐᕙᖓᓄᑦ ᐃᖅᑲᓇᐃᔮᓄᑦ ᑐᑭᒧᐊᖅᑎᑦᑎᔨ.
ᑐᐊᕕᕐᓇᖅᑐᓕᕆᓂᖅ ᐅᖃᐅᓯᐅᓂᑯ ᓄᓇᕕᒃᒥ ᓄᓇᓕᖕᓂ ᐃᒪᕐᒧᑦ ᐊᓂᒍᓚᐅᕐᑐᖅ ᔫᓂ 6-ᒥ, ᐅᓪᓗᐃᑦ ᐊᕙᑎᑦ (20) ᐊᓂᒍᕐᑎᓪᓗᒋᑦ. ᐅᓇ ᑕᐃᒪᐃᓕᓚᐅᕐᓯᒪᔪᖅ ᐃᒪᕐᒧᑦ ᐊᖅᑯᑎ ᑰᖕᒥᙶᖅᑐᒥ ᓄᓇᓖᑦ ᐃᒥᕐᑕᕐᕕᐊᓄᑦ.
ᑲᒪᔨᓪᓗᐊᑕᐅᔪᑦ ᐅᖅᑰᓴᐅᑎᒃᓴᐅᓂᐊᖅᑐᒥ ᐱᓇᓱᒃᖢᑎᒃ ᐊᔪᕐᓴᕈᑎᖃᕐᒪᑖ ᐋᖅᑭᒍᑎᐅᓇᔭᖅᑐᒥ ᓱᓪᓗᓕᒃᒥ, ᕼᐅᓰᓐ ᓴᕙᒐᑎ, ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ ᐃᖅᑲᓇᐃᔮᓄᑦ ᑐᑭᒧᐊᖅᑎᑦᑎᔨ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ ᔫᓂ 11-ᐅᑎᓪᓗᒍ.
“ᐅᓇ ᐊᔪᕐᓇᕈᔪᒻᒪ ᖃᓄᐃᓐᓂᐊᕆᐊᒃᓴᖅ; ᐅᓇ ᐋᖅᑭᒃᑕᐅᓯᒪᒻᒪᑦ ᐊᕐᕌᒍᑦ ᐊᕙᑎᑦ (20) ᐅᖓᑖᓂᓴᐅᓪᓗᓂ ᐊᒻᒪᓗ ᐊᑕᐅᓯᑐᐊᕐᒥ ᓴᓇᕙᒃᑐᓂ ᓇᓂᓯᓯᒪᓪᓗᑕ ᓄᓇᕐᔪᐊᓕᒫᒥᑦ,” ᐅᖃᕐᑐᖅ.
ᐅᓇ ᑲᐃᐳᓪ ᖄᖃᕐᒪᑦ ᐊᓯᖏᓐᓄᑦ ᓴᓇᕙᒃᑐᓄᑦ ᓴᓇᔭᐅᓯᒪᔪᒥᒃ. ᖄᖓ ᐋᖅᑭᒃᓯᒪᔾᔪᑎᐅᓪᓗᓂ ᓯᓚ ᖃᓄᐃᒃᑲᓗᐊᖅᐸᑦ ᓱᕋᔭᙱᓪᓗᓂ, ᕿᕋᑕᓗᐊᙱᓪᓗᓂ ᐊᒻᒪᓗ ᐃᒪᕐᒥ ᐱᐅᔪᓐᓃᖅᑎᑦᑎᕙᙱᓪᓗᓂ.
ᑭᓯᐊᓂᓕ ᑲᐃᐳᒥ ᓴᓇᔨᐅᔪᑦ ᐃᖕᓚᓐᒥ ᐱᔪᓐᓇᐃᓪᓕᓯᒪᖕᒪᑕ ᖄᒃᓴᕆᔭᐅᕙᒃᑐᒥ, ᐱᔾᔪᑎᖃᖅᖢᑎᒃ ᐱᓕᕆᐊᖃᖅᐸᒃᑐᑦ ᐱᓕᕆᐊᖃᖃᑦᑕᕈᓐᓃᕐᒪᑕ ᓴᓇᔭᐅᕙᒃᑐᒥᑦ.
ᑲᐃᐳᓪ ᐊᑐᖅᑕᐅᔪᓐᓇᙱᑉᐸᑦ, ᓴᕙᒐᑎ ᐅᖃᕐᑐᖅ, ᑕᒪᕐᒥᓕᒫᖅ ᐃᒪᕐᒧᑦ ᐊᑐᖅᑕᐅᔪᖅ ᐋᖅᑭᒋᐊᖅᑕᐅᒃᑲᓐᓂᕆᐊᖃᕐᒪᑦ.
ᑐᑭᖃᕐᑐᕐᓕ ᐅᓇ ᓴᓇᔭᐅᓂᖓ ᐊᑭᖃᓪᓗᐊᓚᐅᕋᓗᐊᖅᖢᓂ ᒫᓂ $300,000-ᓂ ᐱᐊᓂᒃᑕᐅᓇᔭᖅᑐᒃᓴᐅᔪᖅ ᐊᐅᔭᐅᑉ ᐃᓱᐊᓂ ᐊᑭᖃᓕᑐᐃᓐᓇᕆᐊᓕᒃ ᒪᐅᖓ $5 ᒥᓕᐊᓐᓂ $10 ᒥᓕᐊᓐᓄᑦ ᐊᒻᒪᓗ ᐊᕐᕌᒎᓂᐊᖅᑐᒥ ᐱᐊᓂᒃᑕᐅᓇᔭᖅᖢᓂ.
ᐃᒪᕐᒧᑦ ᓈᒻᒪᙱᓕᐅᕈᑎ ᓄᓇᓕᖕᓄᑦ 2,100-ᖏᓐᓂ ᐃᓄᖃᖅᑐᒥ ᐱᒋᐊᓚᐅᕐᓯᒪᔪᖅ ᒫᔅᓯᒥ. ᐅᓇ ᓱᓪᓗᓕᐅᑉ ᖄᖓᓃᑦᑐᒃᓴᖅ ᐃᒪᐅᑉ ᐊᖅᑯᑎᓕᒫᖓᒎᕐᒪᑦ ᑰᖕᒥᙶᖅᑐᒥᑦ ᐃᒥᕐᑕᕐᕕᒃᒧᑦ ᐊᔪᓕᓚᐅᕐᓯᒪᖕᒪᑦ ᑖᓐᓇᓗ ᓱᓪᓗᓕᒃᒥ ᖁᐊᕈᑎᐅᓪᓗᓂ.
ᑭᖑᓂᐊᒍᓪᓕ ᑕᐃᒪᐃᓚᐅᕐᑎᓪᓗᒍ ᓄᓇᓯᐅᑎᒧᑦ ᐊᐳᑕᐃᔭᐃᔾᔪᑎᒧᑦ ᖄᖓᒎᖅᑐᖃᓚᐅᕐᒥᒻᒪ ᐱᐅᔪᓐᓃᒃᑲᓐᓂᕈᑎᐅᓪᓗᓂ.
ᑕᐃᒪᐃᓚᐅᖅᑎᓪᓗᒍ, ᐃᒥᕐᑕᐅᑎᒧᑦ ᓄᓇᓖᑦ ᐃᒥᕐᑕᖅᑕᐅᖃᑦᑕᓕᓚᐅᕐᑐᑦ. ᑖᓐᓇᑦᑕᐅᖅ ᓈᒻᒪᙱᓕᐅᕈᑎᖃᕈᑎᐅᓚᐅᕐᒥᔪᖅ ᓯᓚᒧᑦ ᐊᒻᒪᓗ ᐃᓚᖏᑦ ᐃᒥᕐᑕᐅᑎᑦ ᐊᔪᖅᖢᑎᒃ.
ᐃᒪᕐᒥ ᖃᓛᖅᑎᑦᑎᖃᑦᑕᖁᔨᓚᐅᕐᑐᑦ ᒫᔅᓯ 18-ᒥ ᐊᒻᒪᓗ ᐳᕕᕐᓂᕐᑐᕐᒧᑦ ᒪᐃᔭ ᓘᓯ ᖃᓕᖑ ᑕᒪᑐᒥᖓ ᑐᐊᕕᕐᓇᖅᑑᓂᕋᐃᓪᓗᓂ ᒪᐃ 17-ᒥ.
ᑲᓃᑎᐊᓐ ᐅᕇᓐᔫᔅ ᓄᓇᓕᖕᓂ ᐃᑲᔪᕆᐊᖅᑎᑕᐅᓚᐅᕐᓯᒪᔪᑦ ᐊᒻᒪᓗ ᐃᒪᕐᒧᑦ ᐊᖅᑯᑎᐅᓂᐊᖅᑐᒥ ᐋᖅᑭᒃᓯᓪᓗᑎᒃ ᒪᐃ 21-ᒥ, ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ ᐃᒃᓯᕙᐅᑕᖅ ᕼᐃᐊᑕ ᓯᓅᐹᓪ ᐅᓂᒃᑳᖏᑦ ᐅᖃᕐᓯᒪᓚᐅᕐᑐᑦ ᑲᑎᒪᔨᓄᑦ ᒪᐃ 29-ᖑᑎᓪᓗᒍ.
ᐃᒪᖃᑦᑎᐊᑲᑕᙱᓐᓂᖏᓐᓂᒃ ᐅᑯᐊ ᐃᓅᓕᑦᓯᕕᒃ ᐋᓐᓂᐊᕕᒃ ᐋᓐᓂᐊᖅᑐᓂᒃ ᐊᓯᐊᓄᑦ ᓅᑎᑦᑎᓕᓚᐅᕐᓯᒪᔪᑦ ᐊᒻᒪ ᓴᐃᓕᕕᒃᒥ ᐃᓐᓇᑐᖃᕐᕕᒃᒦᑦᑐᓂᒃ ᒪᓐᑐᕆᐊᒧᑦ ᐱᖃᑎᒋᔭᐅᓪᓗᑎᒃ ᐋᓐᓂᐊᓯᐅᖅᑎᓄᑦ.
“ᒫᓐᓇ ᓱᓕ ᐸᕐᓇᐅᓯᐅᖅᐸᓪᓕᐊᒐᑦᑕ ᐊᒻᒪᓗ ᐊᐅᓪᓚᖅᑎᑕᐅᓂᑯᑦ ᐋᓐᓂᐊᖅᑐᑦ ᐅᑎᖅᑎᑕᐅᓂᐊᕐᓂᖏᓐᓂᒃ ᖃᓂᑦᑐᒃᑯᑦ,” ᕙᓖᓴ ᐹᑦᕚᓐ, ᑐᓴᐅᒪᔾᔪᑎᓕᕆᔨ ᐃᓅᓕᑦᓯᕕᒃ ᐋᓐᓂᐊᕕᒃᒥ ᐅᖃᓚᐅᕐᑐᖅ ᑎᑎᕋᖅᖢᓂ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᔫᓂ 12-ᒥ.
ᑲᑎᖢᑎᒃ ᒫᓐᓇ ᐋᖅᑭᒃᑕᐅᓚᐅᑲᖕᓂᖓ ᐊᑭᖃᖅᑐᖅ $453,000 ᐅᖓᑎᑦᑎᐊᖓᓂ, ᓯᓅᐹᓪ ᐅᓂᒃᑳᖏᑦ ᐅᖃᕐᓯᒪᓚᐅᕐᑐᑦ. ᑭᓯᐊᓂᓕ, ᐅᖃᕐᑐᖅ, ᐋᖅᑭᒃᑕᐅᓯᒪᓚᐅᑲᖕᓂᖓ “ᐅᔾᔨᕈᓱᑦᑎᐊᕆᐊᖃᕐᓇᖅᑐᒦᑦᑐᖅ.”
“ᐅᔾᔨᕈᓱᑦᑎᐊᕆᐊᖃᕐᓇᖅᑐᒦᑦᑐᖅ ᓲᖃᐃᒻᒪ ᓱᓪᓗᓕᐅᑉ ᐊᖅᑯᑎᓄᑦ, ᑖᓐᓇᓗ ᓄᓇᐅᑉ ᖄᖓᒎᕐᓯᒪᓪᓗᓂ. ᑕᐃᒪᓕ ᓱᕋᒃᑕᐅᒃᑲᓐᓂᑐᐃᓐᓇᕆᐊᖃᕐᑐᖅ, ᓴᕙᒐᑎ ᐅᖃᕐᑐᖅ.
ᐅᓇ ᐋᖅᑭᒃᑕᐅᓯᒪᓚᐅᑲᒃᑐᖅ ᓯᓚᒧᑦ ᐋᖅᑭᒃᓯᒪᙱᒻᒪᑦ. ᑕᐃᒪᓕ ᑖᓐᓇ ᓱᓪᓗᓕᒃ ᓴᓇᔭᐅᒃᑲᓐᓂᕆᐊᖃᖅᐸᑦ ᐊᓯᐊᒍᑦ ᐊᒻᒪᓗ ᐱᐊᓂᒃᑕᐅᔪᓐᓇᙱᓪᓗᓂ ᑭᓯᐊᓂ ᐊᕐᕌᒍᙳᕈᓂ, ᐊᓯᐊᒍ ᖃᐅᔨᓇᓱᒋᐊᖃᕐᓂᐊᖅᑐᑦ ᓯᓚᒧᑦ ᖃᓄᐃᓕᖓᒐᓗᐊᖅᐸᑦ ᖃᓄᐃᓕᔭᙱᑦᑐᒥᑦ.





(0) Comments