‘ᓂᐱᖃᙱᑦᑐᓐᓇᙱᓐᓇᒪ ᐅᕝᕙᓘᓐᓃᑦ ᐅᐸᓗᒃᑕᐃᓕᔪᓐᓇᙱᖢᖓ’: ᒪᓃᑦᑐᒃ ᑖᒻᓴᓐ ᓄᖅᑲᖅᐳᖅ ᐃᓐᓇᐅᓕᕐᓂᕐᒧᑦ – ᒫᓐᓇᐅᓚᐅᑲᒃᑐᖅ

For English version, see ‘I cannot keep quiet or hold back’: Manitok Thompson retires – for now

ᐊᕐᕌᒍᓂ ᖁᓕ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓃᖢᓂ, ᐊᒻᒪ ᐊᕐᕌᒍᓂ ᐊᕙᑎᑲᓴᖕᓂ ᑎᐅᕆᑑᕆᓄᑦ ᐊᒻᒪ ᒐᕙᒪᑐᖃᒃᑯᓐᓄᑦ ᒪᓕᒐᓕᕆᔨᐅᓯᒪᓪᓗᓂ ᐊᒻᒪᓗ ᐊᕐᕌᒍᒐᓴᖕᓂ ᐃᓕᓴᐃᔨᐅᓯᒪᓪᓗᓂ, ᐊᔪᕆᕐᓱᐃᔨᐅᓯᒪᓪᓗᓂ ᐊᒻᒪᓗ ᐃᓄᖕᓂ ᐃᑲᔪᖅᑐᐃᔨᐅᓯᒪᓪᓗᓂ, ᒪᓃᑦᑐᒃ ᑖᒻᓴᓐ ᐱᓕᕆᐊᖏᓐᓂ ᓄᖅᑲᕈᓐᓇᕐᓯᔪᖅ.

ᒫᓐᓇᐅᔪᕐᓕ, ᐊᒃᓱᓪᓘᓐᓃᑦ.

“ᐊᓂᕐᓵᕈᓐᓇᓚᐅᑲᒍᒪᒐᒪ. ᑕᖅᑮᖕᓂ ᒪᕐᕉᖕᓂᓪᓘᓐᓃᑦ, ᑭᖑᓂᐊᒍᑦ ᓴᖅᑭᓐᓂᐊᖅᑐᒃᓴᐅᒋᕗᖓ,” ᑖᒻᓴᓐ ᐅᖃᕐᑐᖅ ᔫᓂ 26-ᒥ ᐊᐱᕐᓱᖅᑕᐅᑎᓪᓗᒍ ᐃᓄᐃᑦ ᑕᑯᓐᓇᒐᒃᓴᒃᑯᓐᓂ ᑎᑎᕋᕐᕕᖓᓂ ᐋᑐᕚᒥ.

ᖃᐅᒃᐸᑦ ᐅᖓᑖᒍᑦ ᓄᖅᑲᕐᓂᐊᓕᖅᖢᓂ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᐅᓂᖓᓂ ᑕᑯᓐᓇᒐᒃᓴᓕᕆᔨᓂ ᑖᒃᑯᓇᓂᓗ ᑕᐃᒪᙵᑦ 2020-ᒥ ᐱᓕᕆᐊᖃᖅᖢᓂ ᐊᕐᕌᒍᐸᓗᖕᓂ ᑕᓪᓕᒪᓂ ᑲᑎᑕᐅᕙᓪᓕᐊᔪᓂᒃ ᐋᖅᑭᒃᓱᐃᔨᐅᓯᒪᓪᓗᓂ.

ᑖᒻᓴᓐ, 69, ᐃᓅᓂᑯ 5 ᑭᓛᒥᑕᓂ ᐅᖓᓯᖕᓂᓕᖕᒥᑦ ᓴᓪᓕᓄᑦ, ᓄᓇᒋᔭᐅᔪᑯᓗᖕᒥᑦ ᐊᑎᖃᖅᑎᑕᐅᔪᒥᒃ ᓯᓇᕗ. ᐅᖃᖅᖢᓂ ᑖᓐᓇ ᐊᑎᖅ ᐅᕙᙶᕐᓂᕋᖅᖢᓂᐅᒃ ᒥᑭᑦᑐᒥ ᐅᒥᐊᕐᔪᐊᕕᓂᕐᒥ ᐊᔪᕐᓯᓯᒪᓂᑯᒥ ᓯᒡᔭᒥ ᐊᒻᒪᓗ ᑎᑎᕋᕐᕕᐅᓂᑰᓪᓗᓂ “ᓯᓇᕗ”-ᒥᑦ.

ᐃᓕᓴᐃᔨᐅᓯᒪᔪᖅ ᓴᓪᓕᓂᑦ, ᑲᖏᖅᖠᓂᖅᒥᑦ ᐊᒻᒪ ᓇᐅᔮᓂᑦ.

1995-ᒥ ᓂᕈᐊᕆᔭᐅᓚᐅᕐᓯᒪᔪᖅ ᓄᓇᑦᓯᐊᕐᒥ ᒪᓕᒐᓕᕆᔨᐅᓂᕐᒧᑦ ᓄᓇᑦᓯᐊᕐᒥ ᑭᒡᒐᖅᑐᐃᓪᓗᓂ ᑭᓯᐊᓂ ᓄᓇᕗᑦᙳᕐᑎᓪᓗᒍ 1999-ᒥ, ᓂᕈᐊᖅᑕᐅᓪᓗᓂᓗ ᓯᕗᓪᓕᖅᐹᖑᓪᓗᓂ ᒪᓕᒐᓕᐅᖅᑎᐅᓪᓗᓂ ᐅᕗᖓ ᑲᖏᖅᖠᓂᖅ/ᑎᑭᕋᕐᔪᐊᖅᒧᑦ.

ᑖᒻᓴᓐ ᓯᕗᓪᓕᖅᐹᖑᓚᐅᕐᑐᖅ ᐊᒻᒪ ᐊᕐᓇᑐᐊᖑᓪᓗᓂ ᓯᕗᓪᓕᖅᐹᓂ ᓄᓇᕗᒧᑦ ᒪᓕᒐᓕᐅᖅᑎᓂᒃ, ᐊᒻᒪ ᐅᖃᖅᖢᓂ ᐃᒻᒥᓂ ᑭᓯᐊᓂ ᐱᓇᓱᒻᒪᕆᒋᐊᖃᓚᐅᕐᑐᖅ ᐊᖑᑏᓐᓇᕐᓂ ᐱᓕᕆᖃᑎᖃᓗᐊᒧᑦ ᐊᒻᒪᓗ ᐊᔪᕋᓱᒋᔭᐅᕙᒃᖢᓂ ᐱᓇᓱᒍᓐᓇᕆᐊᒃᓴᖓᓂᒃ.

“ᐅᖃᕐᑏ, ᐅᓇ ᐊᓂᖃᑎᒋᓚᐅᑲᒍᒪᒐᒃᑯ ᒫᓐᓇ,” ᐃᖅᑲᐅᒪᔪᖅ ᑕᐃᒪᐃᓕᔪᖅ ᐃᓚᖓᑦ ᒪᓕᒐᓕᕆᔨ ᐅᖃᖅᑎᓪᓗᒍ ᐊᕐᓇᐅᓂᖓᓄᑦ ᒥᓂᔅᑕᐅᑎᑕᐅᓪᓗᐊᕐᓂᙱᑦᑐᖅ ᐅᒃᐱᕐᓇᙱᓗᐊᕐᓂᖓᓄᑦ.

ᐅᖃᕐᑎ, ᓕᕙᐃ ᐹᓇᐸᔅ, ᐋᓐᓂᐊᓕᕐᓂᕐᒧᑦ ᓄᖃᖓᑲᐃᓐᓇᕆᐊᖃᓕᓚᐅᕐᑐᖅ, ᑖᒻᓴᓐ ᐅᖃᕐᑐᖅ ᑎᔅᓯᒍᓱᒃᖢᓂ.

2004-ᒥ ᓄᖅᑲᓚᐅᕐᓯᒪᔪᖅ ᓄᓇᕗᒧᑦ ᒪᓕᒐᓕᕆᔨᐅᓂᕐᒥ ᐊᒻᒪᓗ ᒐᕙᒪᑐᖃᒃᑯᓐᓄᑦ ᓂᕈᐊᒐᒃᓴᐅᓕᕐᖢᓂ, ᑐᒡᓕᕆᔭᐅᓪᓗᓂ ᓂᕈᐊᕐᑕᐅᔪᓂᒃ ᐆᒧᖓ ᒪᓕᒐᓕᐅᖅᑎᐅᒃᑲᓐᓂᕋᓱᒃᑐᒥ ᓕᐳᕈᒃᑯᓐᓄᑦ ᓈᓐᓯ ᖃᕆᑕᖅ-ᓕᓐᑎᐅᓪᒧᑦ (ᒫᓐᓇ ᓄᓇᕗᒧᑦ ᓴᓂᑑᓕᕐᑐᖅ), ᐊᒻᒪᓗ ᓄᖅᑲᓪᓚᕆᓕᖅᖢᓂ ᒪᓕᒐᓕᕆᓂᕐᒥᒃ.

ᑭᖑᓂᑦᑎᐊᖓᒍᓪᓕ ᓄᒃᑎᓚᐅᕐᓯᒪᔪᖅ ᑳᓐᒧᐊ, ᐋᐴᑕᒧᑦ ᐃᕐᖑᑕᑯᓗᖓ ᐊᐅᒡᓗᖕᓂᕐᒧᑦ ᐋᓐᓂᐊᖃᕐᓂᕋᖅᑕᐅᑎᓪᓗᒍ. ᐅᖃᓚᐅᕐᑐᖅ “ᓄᖅᑲᖅᖢᖓ ᑭᓱᓕᒫᓂᒃ ᑖᔅᓱᒥᖓ ᑲᒪᒋᔭᖃᑐᐃᓐᓇᓕᖅᖢᖓ.”

ᑖᒻᓴᓐ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓄ ᐃᓚᐅᓕᓚᐅᕐᓯᒪᔪᖅ 2015-ᒥ ᓄᒃᑎᖅᖢᓂᓗ ᐋᑐᕚᒧᑦ ᐱᓕᕆᐊᖃᕐᓂᐊᕐᒪ ᐱᓕᕆᐊᕆᔭᐅᕙᓪᓕᐊᔪᓂᒃ ᐋᖅᑭᒃᓱᐃᔨᐅᓪᓗᓂ, ᕿᒥᕐᕈᐊᖅᐸᒃᖢᓂ ᐊᒻᒪ ᓇᓗᓇᐃᔭᐃᓯᒪᓪᓗᓂ ᐃᑲᕐᕋᒐᓴᒻᒪᕆᐊᓗᖕᓂ ᐊᔾᔨᓕᐅᖅᑕᐅᓯᒪᔪᓂᒃ “ᐃᓕᓐᓂᐊᖅᑎᑐᑦ ᑮᓇᐅᔭᓕᐅᖅᖢᓂ,” ᐅᖃᕐᑐᖅ.

ᐊᕐᕌᒍ ᑕᓪᓕᒪᑦ ᐊᓂᒍᖅᑎᓪᓗᒋᑦ, ᑕᑯᓐᓇᒐᒃᓴᓕᕆᔨᓄᑦ ᓯᕗᓪᓕᖅᐹᖑᓪᓗᓂ ᐃᓅᓪᓗᓂ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᙳᓚᐅᕐᓯᒪᔪᖅ. ᐱᓕᕆᐊᖏᑦᑎᒍ ᐊᓯᙳᖅᑎᑦᑎᓕᓚᐅᕐᓯᒪᔪᖅ ᓴᖅᑭᔮᖅᑎᑕᐅᕙᒃᑐᓂᒃ, ᐃᓛᓐᓂᓪᓗ ᒪᓕᒐᓕᕆᓂᕐᒨᖓᓂᕐᓴᐅᓚᐅᖅᐸᒃᖢᑎᒃ, ᐊᒻᒪᓗ ᐊᒃᓱᕈᕐᓇᖅᑐᓂ ᐃᓄᖕᓄᑦ ᒪᑯᑎᑐᓇᖅ ᓂᕿᖃᙱᓗᐊᖃᑦᑕᕐᓂᕐᒥᒃ, ᐃᒡᓗᐃᑦ ᒥᒃᓵᓄᑦ ᐊᒻᒪ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒥᒃ.

ᐱᓕᕆᐊᖃᖅᑎᓪᓗᒍ, ᑕᑯᓐᓇᒐᒃᓴᓕᕆᔨᒃᑯᑦ ᓄᑖᓂ ᑕᑯᓐᓇᒐᒃᓴᓂ ᐱᒋᐊᖅᑎᑦᑎᓕᓚᐅᕐᓯᒪᔪᑦ, ᐊᒻᒪᓗ ᐊᕐᕌᒎᕋᑖᖅᑐᒥ ᐃᑲᔪᓚᐅ6ᓗᓂ ᑕᑯᓐᓇᒐᒃᓴᓕᕆᔨᒃᑯᑦ ᓄᑖᓂ ᐊᔪᕈᓐᓃᖅᓴᕈᑎᒃᓴᓕᐅᖅᑎᓪᓗᒋᑦ ᐃᓄᖕᓄᑦ ᑖᓐᓇᓗ ᐊᐅᔭᐅᓛᕐᑐᖅ ᐱᒋᐊᖅᑕᐅᓛᖅᑐᒃᓴᐅᓪᓗᓂ, ᐅᖃᕐᑐᖅ.

ᑭᓯᐊᓂᓕ ᔫᓂ 27-ᒥ ᑭᖑᓪᓕᖅᐹᒥ ᑖᒻᓴᓐ ᓴᓇᓚᐅᕐᓯᒪᔪᖅ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓄᑦ (IBC), ᐅᓇ ᑕᑯᓐᓇᒐᒃᓴᓕᕆᔨᒃᑯᑦ ᑐᓴᐅᒪᔾᔪᑎᓕᕆᓂᕐᒧᑦ ᐊᒻᒪ ᐱᓕᕆᐊᒃᓴᓄᑦ ᑐᑭᒧᐊᖅᑎᑦᑎᔨ, ᑭᐅᕋᓐ ᐳᕋᓐᑎᔅ, ᐃᓇᖏᖅᑎᒋᓂᐊᓕᖅᖢᓂᐅᒃ.

ᑖᒻᓴᓐ ᒪᓕᒐᓕᕆᓂᕐᒥ ᐊᒃᓱᕈᕈᑎᖃᓗᐊᕈᓐᓃᕋᓗᐊᖅᖢᓂ, ᐅᖃᓚᐅᕐᑐᖅ ᓱᓕ “ᓈᒻᒪᙱᓂᖃᓗᐊᕐᓂᕐᒥᒃ” ᓂᐱᖃᕈᓐᓇᑐᐊᕈᓂ ᓄᓇᕗᒥᑦ ᒪᓕᒐᓕᕆᓂᐅᔪᑦ ᒥᒃᓵᓄᑦ.

“ᐃᑲᔪᖅᑎᑐᐃᓐᓇᐅᒐᒪ ᒪᓕᒐᓕᕆᓂᒃᑯᑦ — ᓂᕈᐊᖅᑕᐅᓯᒪᙱᖢᖓ, ᑭᓯᐊᓂᓕ ᓄᓇᕗᒥᑦ ᖃᓄᐃᓕᐅᕈᑎᐅᕙᓪᓕᐊᔪᓂᒃ ᐱᓕᕆᖃᑕᐅᔪᓐᓇᒻᒪᕆᒃᖢᖓ,” ᐅᖃᕐᑐᖅ.

ᑖᓐᓇ ᐱᓕᕆᐊᖑᓂᑯᖓ ᓄᖅᑲᓚᐅᕐᓯᒪᔾᔮᙱᖢᓂᐅᒃ.

“ᓂᐱᖃᙱᑐᓐᓇᙱᓐᓇᒪ ᐅᕝᕙᓘᓐᓃᑦ ᐅᐸᓗᒃᑕᐃᓕᔪᓐᓇᙱᖢᖓ. ᐅᖃᕐᓴᕋᐃᓐᓇᒪ ᐊᒻᒪᓗ ᐃᓱᒫᓗᙱᖢᖓ ᐊᓯᒃᑲ ᖃᓄᖅ ᐃᓱᒪᒐᓗᐊᕐᒪᖔᑕ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓈᒻᒪᒋᔭᐅᙱᔾᔪᑎᓂ ᑐᓴᕈᓐᓇᔾᔮᙱᒃᑯᕕᑦ, “ᑕᐃᒪᓕ ᓯᕗᓕᐅᖅᑎᐅᙱᓚᑎᑦ.”

“ᑕᐃᒪᓕ ᐃᒃᓯᕚᓕᑐᐃᓐᓇᔾᔮᙱᓐᓇᒪ ᐊᒻᒪ ᓄᕕᕐᓴᑐᐃᓐᓇᓕᕐᓗᖓ. ᐱᓕᕆᐊᒃᓴᖅᑕᖃᕈᓘᔭᕐᒪᑦ ᓱᓕ.”