ᔭᓇᕗ ᒥᐅᓂᒃ−ᐅᐊᑦᑭᓐᔅ ᐃᓚᐅᖃᑕᐅᓕᖅᐳᖅ ᒪᒋᐅᓪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᓐᓂ

For the English version of this story, please see Jennifer Munick-Watkins joins McGill health centre board.

ᔭᓇᕗ ᒥᐅᓂᒃ−ᐅᐊᑦᑭᓐᔅ ᑎᒃᑯᐊᖅᑕᐅᓯᒪᕗᖅ ᐊᐅᓚᑦᑎᔨᐅᔪᓄᑦ ᑲᑎᒪᔨᓄᑦ ᒥᒋᐊᓪ ᓯᓚᑦᑐᖅᓴᕐᕕᒡᔪᐊᒥ ᐋᓐᓂᐊᕕᖓᓂ ᒪᓕᒃᑐᓄᑦ ᐊᕐᕌᒍᓄᑦ ᑎᓴᒪᓄᑦ, ᑭᒡᒐᖅᑐᐃᓪᓗᓂ ᐱᔪᒪᓂᐅᔪᓂ ᐃᓄᖕᓂ ᓄᓇᓕᐅᔪᓂ ᓄᓇᕕᖕᒥ ᐊᒻᒪ ᒪᓐᑐᕆᐋᓪᒥ.

“ᑕᐃᒪᑐᖅ ᓂᐱᐅᔪᓐᓇᕐᓂᐊᖅᐳᖓ ᑲᑎᒪᔨᐅᔪᓂ ᐊᒻᒪ ᓇᓗᓇᐃᖅᓯᓗᖓ ᐃᓕᖅᑯᓯᒥ ᐊᑦᑕᓇᔾᔭᐃᖅᓯᓯᒪᓂᖓᓂ ᓯᕗᓪᓕᐅᑎᑕᐅᓂᐊᕐᓂᖓᓂ ᐱᓂᕐᒥ ᐱᔨᑦᑎᕋᕐᓂᕐᒥ ᐅᕙᓂ ᒪᓐᑐᕆᐋᓪᒥ,” ᒥᐅᓂᒃ−ᐅᐊᑦᑭᓐᔅ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

ᑎᒃᑯᐊᖅᑕᐅᓂᐅᔪᖅ ᐊᑑᑎᖃᕐᓂᐊᖅᐳᖅ ᐊᕐᕌᒍᓄᑦ ᑎᓴᒪᓄᑦ ᔪᓚᐃ 4−ᒥ ᔪᓚᐃ 3, 2029−ᒧᑦ, ᐅᖃᓚᐅᖅᐳᖅ ᔪᓚᐃ 11−ᒥ ᑐᓴᒐᒃᓴᓕᐊᖑᔪᒥ ᓄᓇᕕᖕᒥ ᐊᕕᒃᑐᖅᓯᒪᓂᐅᔪᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ.

ᒥᒋᐊᓪ ᓯᓚᑦᑐᖅᓴᕐᕕᒡᔪᐊᒥ ᐋᓐᓂᐊᕕᖓᓂ ᑲᑎᒪᔨᐅᔪᑦ ᐱᔨᑦᑎᕋᓲᖑᕗᑦ ᐊᑭᓕᖅᓱᖅᑕᐅᓇᑎᒃ ᐃᑲᔪᕐᓂᐅᔪᒥ ᐊᒻᒪ ᑲᑎᒪᓲᖑᕗᑦ ᒥᑭᓛᖓᓂ 6−ᖏᖅᓱᖅᖢᑎᒃ ᐊᕐᕌᒍᒥ. ᑲᒪᒋᔭᕆᐊᓕᖏᑦ ᐋᖅᑭᒃᓯᓂᕐᒥ ᐊᒻᒪ ᓇᐅᑦᑎᖅᓱᕐᓂᕐᒥ ᑐᕌᒐᒃᓴᐅᔪᓂ ᐊᒻᒪ ᑐᕌᖅᑕᐅᓇᓱᐊᖅᑐᓂ ᐋᓐᓂᐊᕕᖕᒧᑦ ᐊᒻᒪ ᐊᐅᓚᑦᑎᓗᑎᒃ ᐊᓪᓚᕝᕕᓕᕆᓂᕐᒥ ᐋᖅᑭᒃᑕᐅᓯᒪᓂᖓᓐᓂ, ᐅᖃᖅᐳᖅ ᒥᒋᐊᓪ ᓯᓚᑦᑐᖅᓴᕐᕕᒡᔪᐊᒥ ᐋᓐᓂᐊᕕᖓᓂ ᐃᑭᐊᖅᑭᕕᖓ.

ᒥᐅᓂᒃ−ᐅᐊᑦᑭᓐᔅ ᐱᔨᑦᑎᕋᖅᓯᒪᕗᖅ ᐃᓱᒻᒥᖅᑐᐃᔨᐅᓪᓗᓂ ᓄᓇᕕᖕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᓐᓂ ᑕᐃᒪᙵᓂ 2022−ᒥ.

ᒪᕐᕉᖕᓂ ᓯᕗᓪᓕᐅᔪᓂ ᐋᓐᓂᐊᕕᒃᑕᖃᖅᑎᓪᓗᒍ ᐊᕕᒃᑐᖅᓯᒪᓂᐅᔪᒥ, ᐋᓐᓂᐊᕕᓕᐊᖅᑐᑦ ᓅᑕᐅᒐᔪᒃᐳᑦ ᓴᓐᑐᕆᐋᓪᒧᑦ ᐊᓯᐊᒎᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᐅᔪᒧᑦ ᓲᕐᓗ ᐱᓚᒃᑕᐅᓂᕐᒧᑦ ᐊᒻᒪ CT ᐊᔾᔨᓕᐅᖅᑕᐅᓂᐅᔪᓂ.

ᐅᖃᓚᐅᖅᐳᖅ ᑕᐅᑐᙳᐊᖅᑕᖓ ᒥᒋᐅᓪ ᑲᑎᒪᔨᓄᑦ ᑕᐅᑐᒃᑕᑐᐊᖃᑲᐃᓐᓇᕐᓂᐊᖅᐳᖅ ᐃᑲᔪᖅᓱᐃᓂᕐᒥ ᐱᐅᓂᖅᓴᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ-ᐸᖅᑭᔭᐅᓂᕐᒥ ᐱᔨᑦᑎᕋᕐᓂᕐᓂ ᑕᒪᒃᑭᓄᑦ ᓄᓇᕕᖕᒥ ᐃᓄᖕᓄᑦ ᐊᒻᒪ ᐃᓄᐃᑦ ᐃᓄᒋᐊᖕᓂᐅᔪᓂ ᒪᓐᑐᕆᐋᓪᒥ.

“ᑕᐃᒪᑐᖅ ᓯᕗᓂᒃᓴᕗᑦ ᐅᕿᒡᓕᕙᓪᓕᐊᓂᐊᖅᐳᖅ ᐊᒻᒪ ᖃᐅᒻᒪᒃᐸᓪᓕᐊᓂᐊᖅᐳᖅ ᐊᑦᑕᓇᙱᓐᓂᖅᓴᓂ ᓄᓇᓕᐅᔪᓄᑦ, ᐊᑦᑕᓇᙱᓐᓂᖅᓴᓂ ᐱᓕᕆᐊᖑᔪᓂ, ᐊᑦᑕᓇᙱᓐᓂᖅᓴᓂ ᐱᔨᑦᑎᕋᕐᓂᕐᓂ,” ᐅᖃᓚᐅᖅᐳᖅ.