ᖁᐊᖅᑕᖅ ᓄᑖᒥ ᐃᓕᓐᓂᐊᕐᕕᒃᑖᕐᓂᐊᓕᕐᑐᖅ

For English version, see Quaqtaq to get new school

ᓄᓇᕕᒃᒥ ᐃᓕᓐᓂᐊᕐᕕᓕᕆᔨᑦ ᑲᑎᒪᔨᖏᑦ ᐊᖏᓚᐅᕐᒪᑕ $122 ᒥᓕᐊᓐ ᑖᓚᑐᕐᑐᒥ ᓴᓇᓂᐊᖅᑐᓂ ᓄᑖᒥ ᐃᓕᓐᓂᐊᕐᕕᒃᓴᕐᒥᑦ ᖁᐊᖅᑕᕐᒥᑦ, ᑖᓐᓇᓗ ᐊᐅᔭᖅ ᓴᓇᔭᐅᕙᓪᓕᐊᓕᕐᓂᐊᖅᖢᓂ.

ᒫᓐᓇ ᐃᓱᒪᓴᖅᕕᒃ ᐃᓕᓐᓂᐊᕐᕕᒃ, ᐃᓕᓐᓂᐊᕐᕕᒋᔭᐅᓪᓗᓂ ᐃᓕᓐᓂᐊᓕᓵᖅᑐᓂᑦ ᒍᕇᑦ 10-ᒧ, ᓄᑕᐅᙱᑦᑐᕈᓘᓕᕐᒪᑦ ᐊᒻᒪᓗ ᐅᖅᑰᓴᐅᑎᖓ ᓈᒻᒪᙱᓕᐅᕈᑎᐅᕙᒃᖢᓂ. ᐊᒻᒪᓗ ᓱᓪᓗᓕᖏᑦ ᓱᕋᒃᓯᒪᓪᓗᑎᒃ ᐊᒻᒪ ᑯᑐᑲᑕᖕᓂᖏᑦ ᒪᑐᔾᔪᑎᐅᓚᐅᖅᐸᒃᖢᓂ ᐊᐃᕆᓕ 2021-ᒥ, ᐅᖃᕐᑐᖅ ᓴᐃᕋ ᐊᓗᐸ, ᐊᖓᔪᖅᑳᕆᔭᐅᔪᖅ ᑲᑎᕕᒃ ᐃᓕᓴᕐᓂᓕᕆᓂᖅ ᐃᓕᓐᓂᐊᕐᑐᓕᕆᔨᒃᑯᑦ ᑲᑎᒪᔨᖏᓐᓄᑦ.

ᐅᓇ ᐱᓕᕆᐊᒃᓴᖅ ᐊᑭᖃᕐᓂᐊᕋᓱᒋᔭᐅᔪᖅ ᒫᓂ $178 ᒥᓕᐊᓐ ᑖᓚᓂ, ᐃᑲᔫᑎᑖᖅᑎᑕᐅᓯᒪᓪᓗᓂ ᑯᐸᐃᒃ ᒐᕙᒪᒃᑯᓐᓂᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐅᕘᓇ ᑯᐸᐃᒃᒥ ᐃᓕᓐᓂᐊᖅᑐᓕᕆᔨᒃᑯᓐᓂᑦ.

“ᖁᕕᐊᓱᑦᑎᐊᖅᑐᖓ ᐅᓇ ᐱᓕᕆᐊᒃᓴᖅ ᐊᖏᖅᑕᐅᑕᐃᓐᓇᓚᐅᕐᒪᑦ ᒐᕙᒪᒃᑯᓐᓄᑦ ᓲᖃᐃᒻᒪ ᐊᕐᕌᒍᒐᓴᒻᒪᕆᖕᓂ ᒐᕙᒪᒃᑯᓐᓂ ᐋᔩᖃᑎᒌᒍᑎᒋᒐᑦᑎᒍᑦ ᐱᓇᓱᒃᖢᑎᒍᑦ,” ᐊᓗᐸ ᐅᖃᕐᑐᖅ.

ᐃᒡᓗᓕᐅᕐᓂᕐᒧᑦ ᐊᑭᓕᐅᑎᒃᓴᖅ ᐅᓇ $122 ᒥᓕᐊᓐ ᑖᓚ ᐅᑯᓇᙵ ᓴᓇᔭᐅᓂᐊᕐᑐᖅ ᐸᐱᓐ ᐊᒻᒪ ᕗᐊᑎᓐ ᐃᒡᓗᓕᐅᕐᑎᓄᑦ (Les Constructions Pépin et Fortin Inc.).

ᐅᓇ ᐸᕐᓇᐅᓯᐅᖅᑕᐅᕙᓪᓕᐊᒻᒪᕆᓚᐅᕐᑐᖅ ᐊᒻᒪ ᑎᑎᕋᐅᓯᐅᑲᑕᒃᖢᓂ, ᐅᖃᕐᑐᖅ ᔨᕉᒻ ᑎᐋᓐ, ᑐᑭᒧᐊᖅᑎᑦᑎᔨ ᐱᖁᑎᓄᑦ ᐊᑐᕈᓐᓇᖅᑐᓕᕆᔨᓄᑦ ᐃᓕᓐᓂᐊᕐᕕᓕᕆᔨᒃᑯᑦ ᑲᑎᒪᔨᖏᓐᓄᑦ.

ᐅᖃᓚᐅᕐᑐᖅ ᐃᓂᒃᓴᐅᓂᐊᖅᑐᓂ ᖃᐅᔨᓇᓱᓚᐅᕐᓂᖏᓐᓂ ᐃᓕᓐᓂᐊᕐᕕᒃᒧᑦ ᑭᓯᐊᓂᓕ ᓈᒻᒪᒋᔭᐅᖃᑦᑕᓚᐅᙱᑦᑐᑦ ᐅᖓᓯᖕᓂᖏᓐᓄᑦ ᐊᒻᒪ ᐊᖅᑯᑎᒧᑦ ᐅᓗᕆᐊᓇᔭᓐᓂᖏᓐᓄᑦ.

ᐅᓇ ᓂᕈᐊᕆᔭᐅᔪᖅ ᐃᓂᒃᓴᕆᓂᐊᖅᑕᖓ ᒫᓐᓇ ᐃᓕᓐᓂᐊᕐᕕᒋᔭᐅᔫᑉ ᖃᓂᒋᔭᖓᓃᑦᑐᖅ ᒪᓂᕋᕐᒥ, ᑎᐋᓐ ᐅᖃᕐᑐᖅ.

“ᓇᓃᓐᓂᐊᕐᓂᖓᓂ ᓄᓇᖃᖅᑐᓄᑦ ᓂᕈᐊᕆᔭᐅᑎᑕᐅᓚᐅᕐᑐᖅ,” ᐅᖃᕐᑐᖅ.

“ᐃᓚᒋᔭᐅᔪᑦ ᓄᓇᓕᕆᔨᓄᑦ, ᓄᓇᓕᓕᕆᔨᓄᑦ ᐊᒻᒪ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᑲᑎᒪᔩᑦ ᐱᓕᕆᖃᑎᒋᔭᐅᓚᐅᕐᑐᑦ ᐃᓱᒪᓕᐅᕆᓇᓱᒃᑎᓪᓗᒋᑦ.”

ᐅᓇ ᓄᑖᖅ ᐃᓕᓐᓂᐊᕐᕕᒃᓴᖅ ᐃᓄᖃᕈᓐᓇᕐᓂᐊᖅᑐᖅ 250 ᐃᓕᓐᓂᐊᕐᑎᓂ, ᒫᓐᓇᓕ ᐃᓕᓐᓂᐊᕐᕕᒋᔭᐅᔪᖅ 125-ᓂ ᐃᓕᓐᓂᐊᖅᑎᓂ ᐃᓄᖃᕈᓐᓇᕐᒪᑦ, ᐊᒻᒪᓗ ᐃᓂᒃᓴᖃᖅᖢᓂ ᐃᓕᖅᑯᓯᓕᕆᓂᕐᒥ ᐃᓕᓐᓂᐊᕐᕕᒃᓴᓂ ᒪᑯᓂᖓ ᒥᕐᓱᕆᐅᕐᓴᕐᓂᕐᒥᒃ ᐊᒻᒪ ᕿᔪᓕᕆᓂᕐᒥ.

ᐃᓚᖃᕐᓂᐊᕐᒥᔪᖅ 680 ᑭᑉᐹᕆᒃᑎᓯᒪᔪᓂ ᒦᑕᓂ ᐃᖃᐃᓕᓴᕐᕕᒃᒥᑦ ᑖᓐᓇᓗ ᓄᓇᕕᒃᒥ ᐊᖏᓛᖑᓂᐊᖅᖢᓂ, ᑎᐋᓐ ᐅᖃᕐᑐᖅ.

ᐅᓇ ᓄᑖᖅ ᐃᓕᓐᓂᐊᕐᕕᒃ ᓯᓚᒥ ᐱᙳᐊᕐᕕᖃᕐᓂᐊᕐᒥᔪᖅ ᐃᓕᓐᓂᐊᖅᑎᓄᑦ. ᐱᙳᐊᕐᕕᒃ ᒫᓐᓇ ᐃᓕᓐᓂᐊᕐᕕᐅᑉ ᖃᓂᒋᔮᓃᑦᑐᖅ ᐊᖅᑯᑎᐅᑉ ᓴᓂᑦᑎᐊᖓᓃᒻᒪᑦ, ᐊᓗᐸ ᐅᖃᕐᑐᖅ.

“ᐊᑦᑕᓇᖅᑐᒦᑦᑕᐃᓕᓂᖅ ᐊᒃᓱᐊᓗᒃ ᐃᓱᒫᓗᖕᓇᕐᒪᑦ,” ᐅᖃᕐᑐᖅ.

“ᖁᕕᐊᒋᔭᕗᑦ ᐃᓕᓴᐃᔨᕗᑦ ᑲᒪᒋᔭᖃᕈᓐᓇᑦᑎᐊᕐᓂᖏᓐᓂ ᐊᓃᕋᔭᖕᓇᐅᑎᓪᓗᒍ ᐅᕝᕙᓘᓐᓃᑦ ᓯᓚᒥ ᐱᙳᐊᖅᑎᓪᓗᒋᑦ ᑖᒃᑯᐊ ᐃᓕᓐᓂᐊᖅᑏᑦ ᐊᑦᑕᓇᖅᑐᒦᑎᑦᑕᐃᓕᓪᓗᒋᑦ.”

ᐅᓇ ᓄᑖᖅ ᐃᓕᓐᓂᐊᕐᕕᒃ ᐱᐊᓂᒃᑕᐅᓂᐊᕋᓱᒋᔭᐅᔪᖅ 2030-ᒥ.

ᐋᖅᑭᒃᓯᓯᒪᔪᑦ ᒫᓐᓇ ᐃᒡᓗᖁᑎᒋᔭᐅᔪᖅ ᑐᓂᔭᐅᓂᐊᕐᓗᓂ ᐃᓐᓇᕐᓄᑦ ᐃᓕᓐᓂᐊᖅᑐᓕᕆᔨᓄᑦ ᐊᒻᒪ ᐃᓕᓐᓂᐊᒃᑲᓐᓂᕈᑎᒃᓴᓕᕆᔨᓄᑦ, ᑖᒃᑯᐊᓗ ᒫᓐᓇ 6-ᓂ ᓄᓇᕕᒃᒥ ᐃᓂᖃᖅᖢᑎᒃ, ᐅᖃᓚᐅᕐᑐᖅ ᔭᐃᑦ ᑐᓯᓅ ᐴᓂᐄ, ᑐᓴᐅᒪᔾᔪᑎᓕᕆᓂᕐᒧᑦ ᑐᑭᒧᐊᖅᑎᑦᑎᔨ ᐅᑯᓄᖓ ᑲᑎᕕᒃ ᐃᓕᓴᕐᓂᓕᕆᓂᖅᑯᓐᓄᑦ, ᑎᑎᕋᓚᐅᕐᑐᖅ ᖃᕋᓴᐅᔭᒃᑯᑦ.