ᑲᑎᒪᔨᕋᓛᑦ ᓱᖁᑎᒃᓴᙱᑦᑐᑦ ᓄᓇᒥ ᐋᖅᑭᒋᐊᖅᑕᐅᖁᔭᐅᔪᓂᒃ ᐃᓂᒋᔭᐅᓂᐊᕐᓗᓂ 116-ᓂ ᐃᒡᓗᒃᓴᓂᒃ

For English version, see Iqaluit council gives 116-unit public housing proposal second life

ᓄᓇᒥ ᐋᖅᑭᒃᓱᐃᔪᒪᓂᕐᒧᑦ ᑐᒃᓯᕋᐅᑎ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓂ ᓴᓇᔪᒪᓂᕐᒧᑦ 116-ᓂ ᐃᒡᓗᒋᔭᐅᓂᐊᖅᑐᓂᒃ ᐃᒡᓗᖃᕐᕕᐅᙱᑦᑐᒥ ᓱᖁᑎᒋᔭᐅᓚᐅᙱᑦᑐᖅ ᐃᖃᓗᐃᑦ ᐸᕐᓇᐃᓂᕐᒧᑦ ᐊᒻᒪ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᕋᓛᓄᑦ ᐊᐃᕆᓕ 21-ᖑᑎᓪᓗᒍ.

ᓄᓇᓕᐸᐅᔭᓄᑦ ᑲᑎᒪᔩᑦ ᐅᖃᐅᓯᖃᑲᑕᓚᐅᕐᑐᑦ ᐊᒃᑐᐃᔾᔪᑎᐅᓇᔭᖅᑐᓂᒃ 116-ᓂ ᐃᒡᓗᓕᐅᖅᑕᐅᔪᒪᔪᓄᑦ ᑕᒫᓂ, ᐊᒻᒪᓗ ᓄᓇᓯᐅᑎᓄᑦ ᐃᓂᓕᐅᕆᐊᖃᕋᔭᕐᓂᖏᓐᓂ ᐊᒻᒪᓗ ᓄᓇᓕᐸᐅᔭᐃᑦ ᐸᕐᓇᐅᑎᖏᓐᓂᒃ ᐱᕈᖅᐸᓪᓕᐊᑎᑦᑎᓂᕐᒧᑦ 40 ᒥᓂᑦᔅᓗᐊᓂ ᓂᕈᐊᓚᐅᙱᓐᓂᖏᓐᓂᒃ.

ᓂᕈᐊᖅᖢᑎᒃ ᑎᓴᒪ ᑖᔅᓱᒥᖓ ᐊᖏᙱᖢᑎᒃ ᐊᒻᒪ ᒪᕐᕉᒃ ᐊᖏᖅᖢᑎᒃ ᓯᕗᓪᓕᖅᐹᒥ ᒪᓕᒐᕋᓛᖅ ᐅᖃᓕᒫᖅᑕᐅᑎᓪᓗᒍ ᐅᓄᕐᓯᕚᓪᓕᕈᑎᐅᓇᔭᖅᑐᒥ ᓄᓇᓂ ᐊᑐᖅᑕᐅᔪᓐᓇᖅᑐᓂᒃ ᓂᐊᖁᙴᓯᐊᕆᐊᖅ ᐊᑐᕆᐊᒥ.

ᑲᑎᒪᔩᑦ ᐊᖏᙱᔾᔪᑎᖓ ᓈᒻᒪᒋᔭᐅᓚᐅᙱᑦᑐᖅ ᑭᒃᑯᓕᒫᓂ ᑲᑎᒪᑎᑦᑎᓇᔭᕐᓂᖏᓐᓂ ᑖᓐᓇ ᒪᓕᒐᕋᓛᖅ ᒪᕐᕈᐃᖅᑕᐅᓗᓂ ᐅᖃᓕᒫᖅᑕᐅᓚᐅᖅᑎᓐᓇᒍ.

“ᑲᑎᒪᔨᐅᓗᑕ ᐋᒃᑳᕐᓂᐊᕐᓗᑕ 116-ᓂ ᐃᒡᓗᒃᓴᕆᔭᐅᓇᔭᖅᑐᓂᒃ — ᐅᑕᖅᑭᔪᓂᒃ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓂ ᐊᕐᕌᒍᒐᓴᕐᓂ ᐅᑕᖅᑭᑎᑕᐅᔪᓄᑦ — ᑲᒪᑦᑎᐊᒻᒪᕆᒃᑲᔭᖅᑐᖓ,” ᐅᖃᕐᑐᖅ ᒪᐃᔭᐅᑉ ᑐᒡᓕᖓ ᑭᒻᐳᓕ ᓯᒥᑦ, ᑖᒃᑯᓄᖓ ᑲᑎᒪᔨᕋᓛᓄᑦ ᐃᒃᓯᕙᐅᑕᕆᔭᐅᔪᖅ.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᑐᒃᓯᕋᐅᑎᖓ ᓴᓇᔪᒪᓂᕐᒥ ᒪᕐᕈᐃᓂ ᐃᒡᓗᕐᔪᐊᓂ ᐊᑐᓂ 58-ᓂ ᐃᒡᓗᒋᔭᐅᔪᒃᓴᓂ ᐊᒻᒪᓗ ᑕᓪᓕᒪᓂ ᓇᑎᕋᖃᕐᓗᓂ ᒫᓂ ᐋᓐᓂᐊᕕᐊᓘᑉ ᑐᖏᑦᑎᐊᖓᓃᑦᑐᒥ.

ᐱᖓᓱᑦ ᐃᒡᓗᒋᔭᐅᓂᑯᐃᑦ ᑕᒫᓂ ᓱᕋᒃᑎᖅᑕᐅᓚᐅᕐᓯᒪᖕᒪᑕ 2023-ᖑᑎᓪᓗᒍ.

ᑕᒪᓐᓇ ᓄᓇ ᐋᖅᑭᒃᑕᐅᓯᒫᓂᒃᑯᑦ ᐅᓄᓗᐊᕋᔭᙱᑦᑐᓄᑦ ᐃᒡᓗᒃᓴᓄᑦ, ᑕᐃᒪᐃᓐᓂᖓᓄ ᐅᓄᓛᓂ ᐃᒡᓗᓕᐅᕐᕕᐅᓇᔭᖅᖢᓂ ᒫᓂ 43-ᓂ, ᐅᖃᓚᐅᕐᑐᖅ ᓄᓇᓕᖕᓄᑦ ᐸᕐᓇᐅᓯᐅᖅᑎ ᒫᑎᐅ ᑖᑦᔅ.

ᑲᑎᒪᔩ ᓄᓇᒥ ᖃᓄᐃᓕᖓᓂᐊᕐᓂᖓᓂ ᐋᖅᑭᒃᓱᐃᒃᑲᓐᓂᕆᐊᖃᕋᔭᕐᑐᑦ ᐅᑯᐊ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᓴᓇᓂᐊᕈᑎ ᐅᓄᕐᓂᕐᓴᓂ.

ᑲᑎᒪᔨ ᕼᐃᐅᕆ ᕕᓕᐅᕋᑎ ᐊᐱᕆᓚᐅᕐᑐᖅ ᑖᓐᓇ ᑐᒃᓯᕋᐅᑎᒋᔭᐅᔪᖅ ᐃᓚᖃᕆᐊᒃᓴᖓᓂ ᓄᓇᓯᐅᑎᓄᑦ ᐃᓂᒃᓴᐅᓇᔭᖅᑐᓂᒃ 116-ᓄᑦ ᐃᒡᓗᖃᕋᔭᖅᑐᓄᑦ.

ᐊᑕᐅᓯᕐᒥ ᓄᓇᓯᐅᑎᓄᑦ ᐃᓂᓴᐅᓇᔭᖅᑐᓂᒃ ᐱᖓᓱᓄᑦ ᐃᒡᓗᒋᔭᐅᔪᓄᑦ, ᑖᑦᔅ ᐅᖃᕐᑐᖅ, ᐅᓇ ᐊᔾᔨᓪᓗᐊᖓ ᐃᓂᒃᓴᖅ ᐃᒡᓗᓄᑦ ᑲᑎᒪᔩᑦ ᐊᖏᕐᓯᒪᓂᑯᖏᓐᓂ ᐊᓯᖏᓐᓄᑦ ᐃᒡᓗᕐᔪᐊᓄᑦ ᓄᓇᓕᐸᐅᔭᐃᑦ ᕿᑎᐸᓗᐊᓃᑦᑐᓄᑦ.

ᐅᓇ ᐱᕙᓪᓕᐊᓂᖅ, ᑖᑦᔅ ᐅᖃᕐᑐᖅ, 5 ᒥᓂᑦᔅ ᐅᖓᓯᖕᓂᖃᕋᔭᖅᑐᖅ ᐱᓱᒃᓗᓂ ᑕᒪᒃᑯᓄᖓ “ᓄᓇᐅᑉ ᐃᓗᐊᓂ ᐱᖁᑎᖃᕐᕕᖕᓄᑦ,” ᓲᕐᓗ ᐅᑯᓄᖓ ᕿᑭᖅᑕᓂ ᐋᓐᓂᐊᕕᐊᓗᒃᒧᑦ ᐊᒻᒪ ᖃᖅᑲᖅᒥ ᐃᒡᓗᐊᓗᒃᒧᑦ.

ᕕᓕᐅᕋᑎ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐱᑕᖃᙱᓗᐊᕐᓂᖏᓐᓂ ᐸᕐᓇᐅᑎᓄᑦ ᓇᓗᓇᐃᒃᑯᑎᐅᓇᔭᖅᑐᓂ ᓇᓂ ᐃᒡᓗᓂ ᓴᓇᕝᕕᐅᔪᓐᓇᕋᔭᖅᑐᓂ ᐊᒻᒪ ᓇᓂ ᖃᓄᐃᓕᖓᓂᖏᑦᑎᒍᑦ ᐃᒡᓗᐃᑦ ᓴᓇᔭᐅᓇᔭᕐᒪᖔᑕ.

“ᑕᒫᓃᓐᓂᐊᕋᑦᑕ ᐊᑯᓂᕈᓗᒃ. ᐊᑯᓂᕈᓗᒃ ᐊᑐᖅᑕᐅᓇᔭᖅᑐᓂᒃ ᑕᒪᓐᓇᓗ ᐋᖅᑭᓯᑲᐅᖅᑐᕈᑎᐅᙱᓪᓗᓂ,” ᐅᖃᕐᑐᖅ ᕕᓕᐅᕋᑎ.

“ᐃᒡᓗᑭᒃᓴᕐᓂᑦᑎᓐᓄᑦ ᐃᒪᐃᓕᐅᕆᐊᖃᙱᓐᓇᑦᑕ ᐃᒡᓗᓕᐅᕈᓐᓇᕐᓗᑕ ᓈᒻᒪᒋᔭᐅᔪᑐᐃᓐᓇᕐᓄᑦ.”

ᓯᒥᑦ — ᑲᑎᒪᔨᕋᓛᓄᑦ ᐃᒃᓯᕙᐅᑕᐅᓂᖓᓄᑦ ᓂᕈᐊᕈᓐᓇᙱᒻᒪᑦ — ᐃᓱᒪᓕᐅᕆᓇᓱᓚᐅᕐᑐᑦ ᑲᑎᒪᔩᑦ ᒪᓕᒐᕋᓛᒥ ᓯᕗᓪᓕᖅᐹᒥ ᐅᖃᓕᒫᖅᑕᐅᓂᖓ ᐊᖏᖅᑕᐅᓇᔭᖁᓪᓗᓂᐅᒃ. ᑭᖑᓂᐊᒍᓪᓕ, ᐅᖃᕐᑐᖅ, ᓄᓇᖃᖅᑐᑦ ᐃᓄᐃᑦ ᐅᖃᓪᓚᖃᑦᑕᕈᓐᓇᕋᔭᕐᓂᖏᓐᓂ ᑲᑎᒪᕕᒡᔪᐊᖅᑎᑕᐅᓕᕈᑎ ᑖᒃᑯᐊ ᑲᑎᒪᔨᕋᓛᑦ ᐃᒡᓗᐃᑦ ᐃᓂᒃᓴᖓᓂ ᐃᓱᒪᒃᓴᖅᓯᐅᓚᐅᖅᑎᓐᓇᒋᑦ ᐊᐃᑉᐸᖓᓂ ᐅᖃᓕᒫᖅᑕᐅᓂᐊᓵᖅᑎᓪᓗᒐ.

“ᐅᓇ ᐃᓄᖕᓂ ᑐᓴᕐᕕᒋᔪᓐᓇᕋᔭᖅᑕᕗᑦ ᖃᓄᖅ ᓄᓇᖓ ᐋᖅᑭᒃᓯᒪᖁᔭᐅᖕᒪᖔᑦ, ᖃᓄᐃᑦᑐᓂᒡᓗ ᐱᔪᒪᖕᒪᖔᑕ,” ᐅᖃᕐᑐᖅ.

ᑲᑎᒪᔨᕋᓛᑦ ᐊᖏᙱᓐᓂᖏᓐᓄᓪᓕ ᑕᐃᒪᓐᓇ ᑐᓴᑲᑕᔾᔮᔪᓐᓃᖅᑐᑦ.

ᐅᑯᐊ ᑲᑎᒪᔩᑦ ᕈᒦᓐ ᓯᑏᕙᓐᓴᓐ ᐊᒻᒪ ᐋᒻᐳ ᐊᒡᓘᒃᑲᖅ ᐊᖏᓚᐅᕐᓯᒫᔫᒃ ᑐᒃᓯᕋᐅᑎᒋᔭᐅᔪᒥᒃ.

ᕕᓕᐅᕋᑎ ᐊᖏᖃᑎᖃᓚᐅᙱᑦᑐᖅ ᐅᑯᐊᓗ ᒪᐃᔭ ᓵᓚᒪᓐ ᐊᕙ ᐊᒻᒪ ᑲᑎᒪᔩᑦ ᓴᐃᒪᓐ ᓇᑖᖅ ᐊᒻᒪ ᒥᑐᓴᓕ ᑯᓄᒃ ᑖᔅᓱᒥᖓ ᑐᒃᓯᕋᐅᑎᒋᔭᐅᔪᒥᒃ.