ᒥᐊᕆ ᓴᐃᒪᓐ ᐱᕗᑦ $5 ᒥᓕᐊᓐᓂ for ᐃᓱᒪᒧᑦ ᖃᓄᐃᙱᑦᑎᐊᕐᓂᐅᔪᒧᑦ ᐱᒋᐊᕈᑕᐅᔪᒧᑦ
ᑮᓇᐅᔭᓂ ᐃᑲᔪᖅᓱᐃᓂᕐᒧᑦ ᑭᖕᒧᑦ ᑭᒡᒐᖅᑐᖅᑎᖓ ᑲᓇᑕᒥ ᕿᒻᒪᖁᖏᓐᓄᑦ ᐊᑐᐃᓐᓇᖃᖅᑎᑦᑎᓂᕐᒥ ᐃᓕᖅᑯᓯᒧᑦ ᑐᙵᕕᖃᖅᑐᒥ ᐸᖅᑭᓂᐅᔪᒥ ᐅᑭᐅᖅᑕᖅᑐᒥ ᐊᒻᒪ ᐅᖓᓯᒃᑐᓂ ᓄᓇᓕᐅᔪᓄᑦ
ᑭᖕᒧᑦ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐ ᐅᖃᓪᓚᒃᐳᖅ ᖃᓇᑕᒥ ᓄᓇᙳᐊᑎᒍᑦ ᖃᑐᔾᔨᖃᑎᒌᖑᔪᓂ ᐊᖓᔪᖅᑳᖃᕐᕕᖓᓂ ᐋᑐᕚᒥ ᒪᐃ 29−ᒥ, ᑲᓇᑕᒥ ᐊᖓᔪᖅᑳᕐᔪᐊᖅ ᒫᒃ ᑳᓂ ᐅᖃᐅᓯᖃᓚᐅᖅᑎᓪᓗᒍ $5 ᒥᓕᐊᓐᓂ ᑮᓇᐅᔭᖃᖅᑎᑦᑎᓂᕐᒥ ᐊᔪᐃᑦᓇᑕᒧᑦ: ᒥᐊᕆ ᓴᐃᒪᓐ ᐊᓯᔾᔨᖅᑎᑦᑎᔨᐅᔪᖅ ᐃᓱᒪᒧᑦ ᖃᓄᐃᙱᑦᑎᐊᕐᓂᐅᔪᒧᑦ. (ᓂᕼᐋ ᐱᒫᓪ ᐊᔾᔨᖁᑎᖓ)
For the English version of this story, please see Ottawa announces $5M for Mary Simon mental wellness initiative.
ᑭᖕᒧᑦ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐ ᖁᔭᓕᓚᐅᖅᐳᖅ ᑲᓇᑕᒥ ᐊᖓᔪᖅᑳᕐᔪᐊᖅ ᒫᒃ ᑳᓂᒥ ᒪᐃ 29−ᒥ ᑕᐃᔭᖓᓂ “ᑐᓂᓯᕐᔪᐊᕐᓂᐅᔪᒥ,” ᒐᕙᒪᑐᖃᒃᑯᑦ ᐅᖃᐅᓯᖃᓚᐅᖅᑎᓪᓗᒍ ᒥᓕᐊᓐ−ᖏᓐᓂ ᑮᓇᐅᔭᖃᖅᑎᑕᐅᓂᐅᔪᓂ ᓄᑖᖑᔪᒧᑦ ᐃᓱᒪᒧᑦ ᖃᓄᐃᙱᑦᑎᐊᕐᓂᐅᔪᒧᑦ ᐱᒋᐊᕈᑕᐅᔪᒧᑦ ᑲᑎᙵᓂᖃᖅᑐᒥ ᕿᒻᒪᑯᖏᓐᓄᑦ.
ᑭᖕᒧᑦ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐ ᐅᖃᓪᓚᖃᑎᖃᖅᐳᖅ ᓂᕈᐊᖅᑕᐅᓵᖅᑐᒥ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓᓄᑦ ᒍᓗᐊᕆᐊ ᐅᓗᖅᓯᒧᑦ ᒪᐃ 29−ᒥ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐆᐱᑦ, ᐅᖓᓯᒃᑐᒥ ᓴᐅᒥᖕᒥ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓂᑦ ᐱᑦᓯᐅᓛᖅ ᐳᕉᔅᑐᕐ ᐊᒻᒪ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᒥᓂᔅᑕᖓ ᑕᐃᕕᑦ ᐊᕿᐊᕈᖅ ᑕᐅᑐᒃᑎᓪᓗᒋᑦ ᐅᖃᐅᓯᒃᓴᓕᐊᖑᔪᒥ ᕿᒻᒪᑯᖓᓂ ᐱᒋᐊᕈᑕᐅᔪᒥ. (ᓂᕼᐋ ᐱᒫᓪ ᐊᔾᔨᖁᑎᖓ)
ᐊᔪᐃᓐᓇᑕ: ᒥᐊᕆ ᓴᐃᒪᓐ ᐊᓯᔾᔨᖅᑎᑦᑎᔨᐅᔪᖅ ᐃᓱᒪᒧᑦ ᖃᓄᐃᙱᑦᑎᐊᕐᓂᐅᔪᒧᑦ, ᓄᑖᖑᓪᓗᓂ ᐱᒋᐊᕈᑕᐅᔪᒥ ᐊᐅᓚᑕᐅᓪᓗᓂ Rideau Hall ᑐᙵᕕᖓᓂ ᑐᕌᕋᓱᐊᖅᑐᒥ ᐊᖏᒡᓕᒋᐊᖅᓯᓂᕐᒥ ᐃᓕᖅᑯᓯᒧᑦ ᑐᙵᕕᓕᖕᒥ ᐊᒻᒪ ᐱᓕᕆᖃᑎᒌᒃᑐᓂ−ᐊᐅᓚᑕᐅᔪᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᔨᑦᑎᕋᕐᓂᐅᔪᓂ ᐅᑭᐅᖅᑕᖅᑐᒥ, ᓄᓇᓕᒡᔪᐊᖑᙱᑦᑐᑦ ᐊᒻᒪ ᐅᖓᓯᒃᑐᓂ ᓄᓇᓕᐅᔪᓄᑦ.
ᐱᓂᐊᖅᐳᑦ $5 ᒥᓕᐊᓐᓂ. ᖄᒃᑲᓐᓂᐊᒍᑦ, ᐋᑐᕚ ᓱᓕᓂᕋᐃᓚᐅᖅᐳᑦ ᓇᓕᒧᑦᑐᒥ ᑎᑭᐅᑎᔪᒧᑦ $10 ᒥᓕᐊᓐᓂ ᐱᕈᖅᓴᔭᐅᔪᒥ ᐃᑲᔪᕋᓱᒃᐸᒃᑐᓄᑦ ᑐᓂᓯᕙᒃᑐᓂ.
ᑳᓂᐅᑉ ᐅᖃᐅᓯᒃᓴᓕᐊᖓ ᐊᖓᔪᖅᑳᖃᕐᕕᖓᓂ ᖃᓇᑕᒥ ᓄᓇᙳᐊᑎᒍᑦ ᖃᑐᔾᔨᖃᑎᒌᖑᔪᓂ ᐋᑐᕚᒥ ᑕᐅᑐᒃᑕᑐᐊᖃᑲᐃᓐᓇᓚᐅᖅᐳᖅ ᓴᐃᒪᓐ ᐃᖃᔪᖅᓱᐃᓂᖓᓂ ᐃᓱᒪᒧᑦ ᖃᓄᐃᙱᑦᑎᐊᕐᓂᐅᔪᒧᑦ, ᐱᓗᐊᖅᑐᒥ ᐃᓄᖕᓂ ᐊᒻᒪ ᐅᑭᐅᖅᑕᖅᑐᒥ ᓄᓇᓕᐅᔪᓂ, ᑭᖕᒧᑦ ᑭᒡᒐᖅᑐᖅᑎᐅᑎᓪᓗᒍ ᑲᓇᑕᒥ ᐃᓱᒪᒧᑦ ᖃᓄᐃᙱᑦᑎᐊᕐᓂᐅᔪᒧᑦ, ᐱᓗᐊᖅᑐᒥ ᐃᓄᖕᓂ ᐊᒻᒪ ᐅᑭᐅᖅᑕᖅᑐᒥ ᓄᓇᓕᐅᔪᓂᑦ.
“ᐅᓇ ᐱᓕᕆᐊᒃᓴᖅ ᑐᓂᓯᓂᐊᖅᐳᖅ ᓄᓇᓕᐅᔪᓂ ᐳᓚᕋᓚᐅᖅᑕᕐᓂᑦ — ᐊᒻᒪ ᐳᓚᕋᓚᐅᖅᐳᑎᑦ ᐊᒥᓱᓂ — ᐱᕐᔪᐊᖑᔪᒥ ᐃᓱᒪᒧᑦ ᐋᓐᓂᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ ᐱᓪᓗᐊᖅᑕᖏᓐᓂ: ᐃᓅᓯᕐᒥ−ᓴᐳᔾᔨᓂᕐᒥ ᐃᑲᔪᖅᓱᐃᓂᐅᔪᒥ ᓲᕐᓗ ᐃᓅᓯᓕᕆᓂᕐᒥ, ᐃᓕᖅᑯᓯᒧᑦ ᑐᙵᕕᓕᖕᒥ ᐱᔨᑦᑎᕋᕐᓂᐅᔪᒥ, ᐊᒻᒪ ᐱᓕᕆᖃᑎᒌᖑᔪᓄᑦ-ᐊᐅᓚᑕᐅᔪᓄᑦ ᐃᓱᒪᒧᑦ ᐋᓐᓂᖃᕐᓇᙱᑦᑐᓕᕆᓂᕐᒧᑦ,” ᑳᓂ ᐅᖃᓚᐅᖅᐳᖅ.
ᑲᓇᑕᒥ ᐊᖓᔪᖅᑳᕐᔪᐊᖅ ᐅᐱᒍᓱᓚᐅᖅᐳᖅ ᓴᐃᒪᓐ ᐊᕐᕌᒍᒐᓴᓂ ᐃᓄᓕᒫᓄᑦ ᐱᔨᑦᑎᕋᕐᓂᖓᓂ ᐊᒻᒪ ᐃᑲᔪᖅᓱᐃᓂᖓᓂ ᓄᓇᖃᖅᑳᖅᓯᒪᔪᓄᑦ ᐱᔪᓐᓇᕐᓂᕆᔭᖏᓐᓂ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ.
ᓇᓗᓇᐃᖅᓯᓚᐅᖅᐳᖅ ᐊᑐᕐᓂᖃᐅᑎᖓᓂ ᐋᔩᖃᑎᒌᖕᓂᐅᔪᒥ ᓯᕿᓂᕐᒥᐅᑦ ᐊᒻᒪ ᐅᐊᖕᓇᒥ ᑯᐸᐃᖕᒥ ᐊᖏᕈᑕᐅᔪᒥ ᐊᒻᒪ ᐃᑲᔪᕐᓂᕐᒥ ᓴᖅᑭᑎᑦᑎᓂᕐᒥ ᐅᑭᐅᖅᑕᖅᑐᒥ ᑲᑎᒪᔨᐅᔪᓂ ᐱᓕᕆᑎᓪᓗᒍ ᑲᓇᑕᒥ ᓯᕗᓪᓕᖅᐸᐅᓪᓗᓂ ᑭᒡᒐᖅᑐᖅᑎᒻᒪᕆᐅᓪᓗᓂ ᐅᑭᐅᖅᑕᖅᑐᒥ ᐱᓕᕆᐊᖑᔪᓄᑦ.
“ᓱᓕᒃᑲᓐᓂᖅ ᐊᒻᒪ ᓱᓕᒃᑲᓐᓂᖅ, ᒥᐊᕆ ᓴᐃᒪᓐ ᐱᓕᕆᓯᒪᕗᖅ ᐊᖏᔪᕐᔪᐊᓂ ᐊᒃᓱᕈᕐᓇᖅᑐᓂ ᐊᒻᒪ ᐅᐸᒃᖢᓂᐅᒃ ᓯᓚᑐᓂᕐᒥ, ᐃᓱᒪᓕᐅᕆᓂᕐᒥ ᐊᒻᒪ ᓴᖑᔭᙱᑦᑐᒥ ᐊᖏᖅᓯᒪᓂᐅᔪᒥ ᐃᓄᖁᑎᖏᓐᓄᑦ ᐊᒻᒪ ᐃᓄᓕᒫᓄᑦ ᐱᔨᑦᑎᕋᕐᓂᕐᒧᑦ,” ᑳᓂ ᐅᖃᓚᐅᖅᐳᖅ.
ᐱᒋᐊᕈᑕᐅᔪᒧᑦ ᐱᕈᖅᓴᕗᖅ ᓴᐃᒪᓐ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᓕᑦᑎᓂᖓᓂ ᐊᒻᒪ ᓈᓚᖕᓂᖓᓂ ᐳᓚᕋᕐᓂᕐᒥ, ᐱᒋᐊᖅᑎᑕᐅᔪᒥ 2024−ᒥ, ᐊᐅᓪᓛᓚᐅᖅᑎᓪᓗᒍ ᓄᓇᓕᖕᓄᑦ ᓇᖕᒥᓂᖅ ᑐᓵᓂᕐᒧᑦ ᐃᓄᖕᓂ ᓄᓇᒥ.
“ᐊᒥᓱᓗᐊᕌᓗᖕᓂ ᐃᓄᖕᓂ — ᐱᓗᐊᖅᑐᒥ ᒪᒃᑯᒃᑐᓂ ᐊᒻᒪ ᑕᐃᒃᑯᐊ ᐅᖓᓯᒃᑐᒥ ᓄᓇᓕᐅᔪᓂ — ᐊᒥᕋᓗᐊᖅᓱᐃᓐᓇᖅᐳᑦ ᐃᑲᔪᖅᓱᐃᓂᕐᒥ ᐱᔭᕆᐊᓕᖏᓐᓂ,” ᓴᐃᒪᓐ ᐅᖃᓚᐅᖅᐳᖅ. “ᐃᓚᑰᓂᐅᔪᑦ ᐱᔨᑦᑎᕋᕐᓂᕐᒥ ᐊᖏᕐᔪᐊᖅᐳᖅ ᐅᑭᐅᖅᑕᖅᑐᒥ ᓄᓇᓕᐅᔪᓂ.”
ᐅᖃᓪᓚᒃᖢᓂ ᐳᓚᕋᕐᓂᐅᔪᓂ ᐃᖃᓗᖕᓄᑦ ᐊᒻᒪ ᐊᓯᖏᓐᓄᑦ ᐅᑭᐅᖅᑕᖅᑐᒥ ᓄᓇᓕᐅᔪᓄᑦ, ᓴᐃᒪᓐ ᐅᖃᓚᐅᖅᐳᖅ ᑐᓵᖏᓐᓇᖅᐸᓚᐅᖅᐳᖅ ᐱᒻᒪᕆᐅᓂᐅᔪᒥ ᐃᑲᔪᖅᓱᐃᓂᕐᒥ ᑐᓂᔭᐅᓂᐅᔪᒥ ᐃᓄᖕᓂ ᑐᑭᓯᐅᒪᔪᓂ ᐃᓄᐃᑦ ᐅᖃᐅᓯᖓᓐᓂ, ᐃᓕᖅᑯᓯᖓᓂ ᐊᒻᒪ ᖃᐅᑕᒫᒥ ᓱᓕᓂᐅᔪᓂ ᐅᑭᐅᖅᑕᖅᑐᒥ.
ᓴᐃᒪᓐ ᐅᖃᓚᐅᖅᐳᖅ ᐅᑭᐅᖅᑕᖅᑐᒥ ᓄᓇᓕᐅᔪᑦ ᐱᔭᕆᐊᖃᒐᔪᒃᐳᑦ ᑐᕌᒐᕆᔭᐅᔪᓂ ᓲᕐᓗ ᐅᐸᒃᑕᐅᕕᒃᓴᓂ ᐃᓅᓯᓕᕆᓂᕐᒧᑦ ᐊᒻᒪ ᐃᖏᕐᕋᓲᒥᒃ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᑲᑎᙵᓂᐅᔪᓂ ᐱᔾᔪᑎᖃᖅᑐᒥ “ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᑐᐊᕕᕐᓇᕐᓂᐅᔪᒥ ᐅᑕᖅᑭᔪᓐᓇᓲᖑᙱᒻᒪᑕ ᐅᐸᒃᑕᐅᕕᒃᓴᓕᐊᖑᔪᒥ”
ᓴᐃᒪᓐ ᐃᓚᒋᐊᖅᓯᓚᐅᖅᐳᖅ ᐃᑲᔪᖅᓱᐃᓂᖓᓂ ᐱᓕᕆᓂᖓ ᑲᔪᓯᓂᐊᖅᐳᖅ ᐱᓕᕆᓂᖓᓂ ᑭᖕᒧᑦ ᑭᒡᒐᖅᑐᖅᑎᖓ ᑲᓇᑕᒥ ᐃᓱᓕᑉᐸᑦ.
“ᐊᖏᖅᓯᒪᓂᕋ ᐃᓄᖕᓄᑦ ᐅᑭᐅᖅᑕᖅᑐᒥ ᓄᖅᑲᓚᐅᖅᓯᒪᔾᔮᙱᓚᖅ. ᐊᔪᐃᓐᓇᑕ!” ᐅᖃᓚᐅᖅᐳᖅ.
ᐃᓄᒃᑎᑐᑦ ᐅᖃᐅᓯᖅ “ᐊᔪᐃᓐᓇᑕ” ᑐᑭᖃᖅᐳᖅ ᓴᐱᓕᓚᐅᖅᓯᒪᙱᓪᓗᑎᑦ ᐊᒻᒪ ᐅᖃᐅᓯᓪᓚᕆᒋᓚᐅᖅᐸᖓ ᐱᓕᕆᐊᖓᓂ.
ᑲᓇᑕᒥ ᐊᖓᔪᖅᑳᕐᔪᐊᖅ ᒫᒃ ᑳᓂ ᓇᖏᖅᑎᓪᓗᒍ ᓄᓇᕕᖕᒥ ᑲᑕᔾᔭᖅᑎᒥ ᓯᐅᓪᕕᐊ ᑯᓘᑦᑎᐊᐃᒥ, ᓴᐅᒥᖕᒥ, ᐊᒻᒪ ᓄᓇᕕᖕᒥ ᐃᙱᖅᑎ-ᐱᓯᓕᐅᖅᑎ ᐲᑐᕆᔅ ᑎᐊᒥ ᒪᐃ 29−ᒥ ᒪᓕᒃᑐᒥ ᐅᖃᐅᓯᒃᓴᓕᐊᖑᔪᒥ ᐊᔪᐃᓐᓇᑕᒧᑦ: ᒥᐊᕆ ᓴᐃᒪᓐ ᐊᓯᔾᔨᖅᑎᑦᑎᔨᐅᔪᖅ ᐃᓱᒪᒧᑦ ᖃᓄᐃᙱᑦᑎᐊᕐᓂᐅᔪᒧᑦ ᐋᑐᕚᒥ. (ᓂᕼᐋ ᐱᒫᓪ ᐊᔾᔨᖁᑎᖓ)
ᓄᓇᕕᖕᒥ ᑎᑕᒃᑎ ᐲᑐᕆᔅ ᑎᐊ, ᑲᑕᔾᔭᖃᑎᖃᓚᐅᖅᑐᒥ ᓯᐅᓪᕕᐊ ᑯᓘᑦᑎᐊᐃᒥ, ᐅᓂᒃᑳᕆᔭᖃᓚᐅᖅᐳᖅ ᑮᓇᐅᔭᖃᖅᑎᑦᑎᓂᐅᔪᒥ ᐅᖃᐅᓯᒃᓴᓕᐊᖑᔪᒥ “ᐱᓪᓚᕆᐅᔪᒥ ᓴᐃᒻᒪᖃᑎᒌᖕᓂᐅᔪᒥ.” ᐅᖃᓚᐅᖅᐳᖅ ᐱᒋᐊᕈᑕᐅᔪᖅ ᐊᑐᐃᓐᓇᖃᖅᑎᑦᑎᕗᖅ ᓂᕆᐅᖕᓂᐅᔪᒥ ᓄᓇᓕᐅᔪᓄᑦ ᐊᒃᓱᕈᖅᑐᓂ ᓯᕗᓂᑦᑎᓐᓂ ᒫᓐᓇᒧᑦ ᑲᔪᓯᔪᒥ ᑭᖑᕚᕇᓂᒃ ᐊᒃᑐᐃᓯᒪᓂᖓᓂ ᐱᓂᕐᓗᒡᔪᐊᕐᓂᐅᔪᒥ ᐊᒻᒪ ᐃᒻᒥᓃᕐᓂᕐᒧᑦ.
“ᑕᑯᓇᔪᖅᑐᒃᓴᐅᙱᑦᑐᒍᑦ ᐊᔾᔨᒋᔪᓐᓃᕐᓂᖓᓂ ᐃᕐᙲᓐᓇᑲᐅᑎᒋ, ᑭᓯᐊᓂ ᐊᔾᔨᒋᔪᓐᓃᖅᑎᑦᑎᓛᖅᐳᖅ ᓯᕗᓂᒃᓴᒥ ᐅᕙᑦᑎᓐᓄᑦ,” ᑎᐊ ᐅᖃᓚᐅᖅᐳᖅ.
ᑯᓘᑦᑎᐊᐃ ᐅᖃᓚᐅᖅᐳᖅ ᐱᒋᐊᕈᑕᐅᔪᖅ ᐃᓄᖕᓂ ᓄᓇᓕᐅᔪᓂ ᑐᓴᖅᑕᐅᔫᔮᕐᓇᖅᐳᖅ.
“ᓴᓇᓂᕐᒥ ᐃᓂᒃᓴᐅᔪᒥ ᐅᕙᑦᑎᓐᓄᑦ ᐅᖃᓪᓚᖕᓂᕐᒧᑦ ᐱᓂᕐᓗᒃᑕᐅᓯᒪᓂᑦᑎᓐᓂ ᐊᒻᒪ ᖃᓄᖅ ᐸᖅᑭᔭᕆᐊᖃᕐᓂᑦᑎᓐᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᑐᑭᖃᕐᔪᐊᖅᐳᖅ ᑕᒪᒃᑭᓕᒫᑦᑎᓐᓄ,” ᑯᓘᑦᑎᐊᐃ ᐅᖃᓚᐅᖅᐳᖅ.
Rideau Hall ᑐᙵᕕᖓᓂ ᐊᖓᔪᖅᑳᖓ ᐊᒻᒪ ᐊᐅᓚᑦᑎᔨᒻᒪᕆᒃ ᑐᕇᓴ ᒫᒃᔅ ᐅᖃᓚᐅᖅᐳᖅ ᐋᖅᑭᒃᓱᐃᔨᐅᔪᑦ ᓂᕆᐅᒃᐳᑦ ᐱᒋᐊᕈᑕᐅᔪᖅ ᐅᐸᒃᑎᑦᑎᓂᐊᖅᐳᖅ ᖄᒃᑲᓐᓂᐊᒍᑦ ᐃᑲᔪᖅᓱᐃᓂᐅᔪᒥ ᐃᑲᔪᕋᓱᒃᐸᒃᑐᓂ, ᓇᖕᒥᓂᖃᖅᑐᓂ ᐊᒻᒪ ᓄᓇᓕᖕᓂ ᑲᑐᔾᔨᖃᑎᒌᖑᔪᓂ.
ᓴᐃᒪᓐ, ᑲᓇᑕᐅᑉ 30−ᒋᔭᖓᓂ ᑭᖕᒧᑦ ᑭᒡᒐᖅᑐᖅᑎᖓ ᑲᓇᑕᒥ ᐊᒻᒪ ᓯᕗᓪᓕᖅᐸᐅᓪᓗᓂ ᓄᓇᖃᖅᑳᖅᓯᒪᔪᒥ ᐃᓅᓪᓗᓂ ᑎᒍᒥᐊᕐᓂᖓᓂ ᐃᓂᐅᔪᒥ, ᐱᔭᕇᕐᓂᐊᖅᐳᖅ ᐊᕐᕌᖑᓄᑦ-ᑕᓪᓕᒪᓄᑦ ᐱᓕᕆᐊᕆᔭᖓᓂ ᔫᓂ 8−ᒥ, ᓗᐃᔅ ᐋᕐᐳᕐ ᐊᖏᖅᑎᑕᐅᓂᐊᕐᓂᖓᓂ ᒪᓕᒃᑎᒋᓂᐊᖅᑕᖓᓂ.
(0) Comments