ᐋᑐᕚᒥ ᐱᓕᕆᔪᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᑲᑎᒪᔾᔪᑕᐅᓪᓗᑎᑦ, ᒥᓂᔅᑕ ᐅᖃᖅᑐᓂ

ᒐᕙᒪᑐᖃᒃᑯᑦ ᐱᓕᕆᔨᖏᑦ ᕿᒥᕐᕈᔪᑦ ᓯᓚᑖᓃᓐᖔᖅᓯᒪᔪᓂᒃ ᕿᒥᕐᕈᔭᐅᔪᓂᒃ ᓂᕿᑦᑎᐊᕙᓕᕆᔨᒃᑯᑦ ᑲᓇᑕᒥ ᐃᑲᔫᑎᐅᕙᑦᑐᓂᒃ ᐋᖅᑭᓱᖅᑕᐅᓚᐅᖅᓯᒪᔪᑦ ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᕆᓚᐅᖅᓯᒪᔭᖓᓐᓄᑦ ᐊᓗᑭ ᑰᑦᑎᕐᒧᑦ ᐊᒻᒪᓗ ᐃᑲᔫᑎᐅᔪᒫᖅᑐᑦ ᐋᖅᑭᒋᐊᖅᑕᐅᓗᑎᑦ ᐱᓕᕆᐊᑦ, ᒐᕙᒪᑐᖃᒃᑯᑦ ᒥᓂᔅᑕᐅᖓ ᐅᖃᖅᑐᓂ.

“ᐊᓯᖏᓐᓂ ᐅᓂᒃᑳᕐᓂᑦ ᐱᓯᒪᔪᒍᑦ, ᓯᓚᑖᓗ ᐊᓪᓚᕕᐅᓪᓗ ᐃᓗᐊᓂ, ᑐᑭᓯᒋᐊᕈᑏᑦ ᐅᖃᓕᒫᖅᑕᐅᔪᑦ, ᓄᐊᑦᑎᐊᖅᑐᑎᒍ, ᐃᓚᒋᓪᓗᒋᑦ ᑰᑦᑎᖅ ᐱᓕᕆᐊᖏᑦ.” ᒐᕙᒪᑐᖁᖃᒃᑯᑦ ᒥᓂᔅᑕ ᕆᐸᑲ ᓵᑦᑐᕌᓐ ᐅᖃᓚᐅᖅᓯᒪᔪᖅ ᔫᓂ 1−ᒥ ᐊᐱᖅᓱᖅᑕᐅᑎᓪᓗᒍ. “ᒫᓐᓇᐅᔪᖅ ᓱᓕ ᐋᖅᑭᓐᖏᑦᑐᑦ.”

ᓵᑦᑐᕌᓐ ᐃᖅᑲᓇᐃᔭᕐᕕᖏᑦ ᑲᒪᔪᑦ ᒐᕙᒪᑐᖃᒃᑯᑦ ᐱᓕᕆᐊᖏᓐᓂ ᐃᑲᔫᑎᔅᓴᐅᓪᓗᑎᑦ ᐊᑭᑐᔫᑎᐊᓗᓐᓂ ᓂᕿᑦᑎᐊᕙᓐᓂᑦ ᐊᓯᖏᓐᓄᓪᓗ ᐱᔭᐅᒋᐊᖃᓪᓚᕆᑦᑐᓂᒃ 124−ᓂᑦ ᐅᑭᐅᖅᑕᖅᑑᑉ ᓄᓇᓕᖏᓐᓂ.

ᓯᓚᑖᓃᓐᖔᖅᑐᓂᒃ ᕿᒥᕐᕈᔭᐅᔪᓂᒃ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐ ᐅᖃᐅᓯᐅᓚᐅᖅᑐᖅ ᒐᕙᒪᑐᖃᒃᑯᓐᓂ ᐊᑦᑑᑉᐱᕆ 2024−ᒥ, ᐅᑭᐅᒐᓴᕐᓄᑦ ᐅᓐᓂᓘᑕᐅᖃᑦᑕᑎᓪᓗᒋᑦ. ᑰᑦᑎᖅ ᓂᕈᐊᖅᑕᐅᓚᐅᖅᓯᒪᔪᖅ ᒥᓂᔅᑕᐅᓗᓂ ᑭᒡᒐᖅᑐᐃᓂᐊᖅᑐᖅ ᑕᒪᒃᑯᓂᖓ ᐱᓕᕆᓗᓂ ᕖᕝᕗᐊᕆᒥ 2025−ᒥ. ᑐᓂᔭᐅᓪᓗᑎᓪᓗ ᑕᖅᑮᑦ ᒪᕐᕉᒃ ᐊᓂᒍᕐᖓᑎᒃ ᒫᔾᔨ 31−ᒥ ᒪᑐᕕᖃᖅᑐᑎᑦ.

ᓵᑦᑐᕌᓐ ᐅᖃᖅᑐᓂ ᐃᖅᑲᓇᐃᔭᕐᕕᖓ ᓄᐊᑦᑎᓯᒪᒻᒪᑕ ᑐᑭᓯᒋᐊᕈᑎᔅᓴᓂᒃ ᓄᓇᓕᓐᓂ ᑲᑎᒪᑎᑦᑎᓚᐅᖅᑎᓪᓗᒋᑦ, ᓇᒻᒥᓂᖅ ᐊᐅᓚᑕᒥᓂᕆᓪᓗᓂᒋᑦ.

ᐅᖃᖅᑐᓂᓗ “ᒪᓕᓐᖏᑦᑎᐊᕐᖓᑕ” ᑲᓇᑕᒥ ᓂᕿᖃᑦᑎᐊᕐᓂᕐᒧᑦ ᑲᑎᒪᓂᐅᓚᐅᖅᓯᒪᔪᒥ ᒫᔾᔨ 26−ᒥ “ᑭᒡᒐᖅᑐᐃᔨᖃᕈᓐᓇᕋᑦᑕ ᓂᕿᑦᑎᐊᕙᓕᕆᔨᒥ ᐅᑭᐅᖅᑕᖅᑐᒥ ᓄᓇᓕᖏᓐᓂ ᑲᑎᓪᓗᑎᑦ ᐅᖃᐅᓯᖃᕐᓂᐊᕐᖓᑕ ᑭᓱᓂᑦ ᐱᔭᕆᐊᖃᕐᒪᖔᑕ.

“ᐱᒻᒪᕆᐅᒻᒪᑦ ᐅᕙᓐᓄᑦ ᑕᒪᒃᑯᓂᖓ ᑲᒪᔨᐅᓗᑕ ᓄᓇᓕᓐᓂ ᐊᑦᑐᖅᑕᐅᓂᖅᐹᖑᔪᓂᒃ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᐃᑲᔫᓯᐊᕐᓂᑦ ᐊᒻᒪᓗ ᓂᕿᔅᓴᖃᑦᑎᐊᓐᖏᓐᓂᐅᔪᖅ ᓇᓗᓇᐃᔭᖅᑕᐅᓗᑎᑦ ᐋᖅᑮᓇᓱᐊᕐᓗᑕ ᖃᐃᓄᑦᑑᒐᔭᕐᒪᖔᑕ.”

NDP−ᑯᑦ ᐅᑭᐅᖅᑕᖅᑐᒥ ᑲᒪᔨᖏᑦ ᓈᒻᒪᓴᖏᓐᓂᕐᒥᓂᑦ ᐅᖃᓚᐅᖅᓯᒪᒻᒪᑕ ᒪᓕᒐᓕᐅᖅᑎᒻᒪᕆᒻᒥ ᓕᐊ ᒐᔮᓐ ᑎᑎᕋᕐᕕᐅᕋᑖᖅᑐᓂ ᓵᑦᕋᓐᒧᑦ ᐊᔾᔨᒌᑎᑦᑎᓐᖏᓗᐊᕐᓂᖓᓐᓄᑦ ᑭᖑᕙᖅᓯᒪᓗᐊᖅᑐᑎᓪᓗ ᓯᓚᑖᓂ ᕿᒥᕐᕈᔭᑦ.

ᒐᔭᓐ ᐅᖃᐅᔾᔨᓪᓗᓂ ᓄᓇᑦᓯᐊᖅ ᐱᕙᓪᓕᐊᔪᓂᑦ ᔫᓂ 2−ᒥ ᓱᓕ ᑭᐅᓚᐅᓚᐅᖅᓯᒪᓐᖏᓐᓂᕋᖅᑐᓂ ᑎᑎᕋᖅᑕᒥᓂᖏᑦ.

“ᓱᓕᑦᑎᐊᕐᓗᓂᓗ ᐅᖃᕐᓗᓂ, ᓈᒻᒪᓐᖏᑦᑎᐊᕐᖓᑕ ᑕᒪᒃᑯᐊ ᐊᑯᓂ ᕿᒥᕐᕈᔭᐅᓯᒪᔪᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ,” ᐅᖃᖅᑐᓂ. “ᓂᕿᑦᑎᐊᕙᖃᕆᐊᖃᕐᓂᖏᓐᓂ ᑐᐊᕕᕐᓇᓕᕐᖓᑦ ᓄᓇᕗᒻᒥ.”

ᒐᔭᓐ ᐅᖃᖅᑐᓂ ᒐᕙᒪᑐᑲᒃᑯᖅᑲᐃ ᑭᓱᑐᐃᓐᓈᓗᓐᓂ ᐊᑐᐃᓐᓇᖃᕐᖓᑕ ᕿᒥᕐᕈᑎᐊᒻᒪᕆᓪᓗᑎᑦ ᓄᓇᓕᕐᔪᐊᒥ ᐊᓯᖏᓐᓂ ᐃᓱᒫᓘᑎᓂᒃ, ᑭᓯᐊᓂᓕ “ᐃᓄᓐᓂᑦ ᐅᑭᐅᖅᑕᖅᑐᒥᐅᑕᕐᓂᑦ ᓂᕿᑦᑎᐊᕙᓕᕆᓂᒨᓕᕋᐃᒻᒪᑕ, ᓄᖅᑲᑐᐃᓐᓇᖅᑑᔮᖅᐸᑦᑐᑦ, ᑕᐃᒪᐃᖏᓐᓇᑦᑎᐊᖅᑐᑎᓪᓗ.”

ᒫᓐᓇᕈᓗᒃ, ᒐᔮᓐ ᐅᖃᓚᐅᖅᑐᖅ ᒐᕙᒪᑐᖃᒃᑯᑦ ᐱᔪᒪᓂᖅᓴᐅᒻᒪᑕ ᐊᐅᓚᑦᑎᔾᔪᑎᔅᓴᓂᑦ ᐊᓯᖏᓐᓂ ᐱᓕᕆᐊᔅᓴᓂᒃ.

ᒐᔮᓐ ᐅᖃᖅᑐᓂ ᖃᐅᔨᔭᐅᔪᑦ ᓯᓚᑖᓂ ᕿᒥᕐᕈᔭᒥᓃᑦ ᓴᖅᑭᖅᑕᐅᓗᑎᑦ ᑭᒃᑯᑐᐃᓐᓇᓄᑦ ᑕᕝᕙᑦᑕᐅᑎᒋ.

ᑰᑦᑎᖅ ᓇᓂᔭᐅᔪᓐᓇᓚᐅᓐᖏᑦᑐᖅ ᔫᓂ 2−ᒥ ᓂᓪᓕᐅᑎᖃᕈᓐᓇᕐᒪᖔᖅ ᐅᓂᒃᑳᑦ ᒥᔅᓵᓄᑦ.