ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐃᖅᑲᐅᒪᕗᖅ ᓯᕗᓪᓕᖅᐸᐅᔪᓂ ᐱᓇᓱᐊᕈᓯᕐᓂ ᒪᕐᕉᖕᓂ ᐃᖅᑲᓇᐃᔮᕆᓕᖅᑕᖓᓂ
ᒍᓗᐊᕆᐊ ᐅᓗᖅᓯ ᐱᒋᐊᖅᐳᖅ ᐊᕐᕌᒍᓄᑦ−2.5-ᓂ ᐱᓕᕆᐊᒃᓴᖏᓐᓂ ᓵᓚᖃᓚᐅᖅᑎᓪᓗᒍ ᒪᐃ 27−ᒥ ᓂᕈᐊᕐᕕᒻᒪᕆᒃ ᐊᓂᒍᖅᓯᒪᑎᓪᓗᒍ ᓄᕈᐊᖅᑎᑦᑎᒃᑲᓐᓂᕐᓂᕐᒥ
ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᒍᓗᐊᕆᐊ ᐅᓗᖅᓯ ᐅᖃᖅᐳᖅ “ᐱᓇᔪᐃᓐᓇᐅᔭᕐᓂᖓᓂ” ᐃᓯᖅᑎᓪᓗᒍ ᓄᑖᖑᔪᒥ ᐊᑐᕐᓂᖃᐅᑎᖓᓐᓂ ᒪᓕᒃᑐᒥ ᒪᐃ 27−ᒥ ᓂᕈᐊᕐᕕᒻᒪᕆᒃ ᐊᓂᒍᖅᓯᒪᑎᓪᓗᒍ ᓄᕈᐊᖅᑎᑦᑎᒃᑲᓐᓂᕐᓂᕐᒥ. (ᑲᕙᓐ ᖃᑉᓗᑦᓯᐊᖅ ᐊᔾᔨᖁᑎᖓ/ᓄᓇᕗᒻᒥ ᑐᙵᕕᒃᑯᑦ)
For the English version of this story, please see NTI president reflects on first 2 weeks on job.
ᐊᕐᕌᒍᓄᑦ ᒪᕐᕉᖕᓂ ᓇᑉᐸᖓᓂᓗ ᕿᓚᒻᒥᑯᓘᕗᖅ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᒍᓗᐊᕆᐊ ᐅᓗᖅᓯᒧᑦ ᐱᓕᕆᓂᕐᒥ ᑕᒪᒃᑭᓂ ᐱᓕᕆᔪᒪᔭᖏᓐᓂ.
ᑭᓯᐊᓂ ᓄᑖᖑᔪᒥ ᓂᕈᐊᖅᑕᐅᔪᖅ ᓯᕗᓕᐅᖅᑎ ᐅᖃᖅᐳᖅ ᐊᔪᙱᓐᓂᓕᒫᖓᓐᓂ ᐱᓕᕆᓂᐊᖅᐳᖅ ᐱᑎᓪᓗᒍ ᐊᖓᔪᖅᑳᖑᓂᕐᒧᑦ ᑲᑐᔾᔨᖃᑎᒌᖑᔪᒥ ᑲᒪᒋᔭᖃᖅᑐᒥ ᐋᖅᑭᐅᒪᑎᑦᑎᓂᕐᒥ ᓱᓕᓂᕋᕈᑕᐅᔪᓂ ᐃᓄᖕᓄᑦ ᐋᖅᑭᒃᑕᐅᓯᒪᔪᓂ ᓄᓇᕗᒻᒥ ᐊᖏᕈᑕᐅᔪᒥ.
“ᑐᑭᓯᐅᒪᕗᖓ ᑎᑭᐅᑎᔪᓐᓇᔾᔮᙱᓐᓂᓐᓂ ᑭᓱᓕᒫᓂᑦ ᐱᓕᕆᔪᒪᔭᓐᓂᑦ,” ᐅᓗᖅᓯ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.
“ᐱᓇᔪᐃᓐᓇᐅᔭᐃᓐᓇᓲᖑᕗᖓ. ᐊᒃᓱᕈᖅᖢᖓ ᐱᓕᕆᔨᐅᕗᖓ, ᐊᒻᒪ ᖃᐅᔨᒪᕗᖓ ᐱᓕᕆᓂᐊᕐᓂᓐᓂ ᑕᑯᒃᓴᐅᑎᑦᑎᓂᕐᒥ ᖃᓄᐃᓕᖓᓂᐅᔪᓄᑦ ᐃᓄᖁᑎᑦᑎᓐᓄᑦ.”
ᐅᓗᖅᓯ ᐅᖃᖃᑎᖃᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᐱᓇᓱᐊᕈᓯᕐᓂ ᒪᕐᕉᖕᓂ ᓵᓚᖃᓚᐅᖅᑎᓪᓗᒍ ᒪᐃ 27−ᒥ ᓂᕈᐊᕐᕕᒻᒪᕆᒃ ᐊᓂᒍᖅᓯᒪᑎᓪᓗᒍ ᓄᕈᐊᖅᑎᑦᑎᒃᑲᓐᓂᕐᓂᕐᒥ, ᐱᒋᐊᖅᑎᑕᐅᓚᐅᖅᑐᒥ ᔨᐊᕋᒥ ᑑᙶᓘᑉ ᓄᖅᑲᕐᓂᖓᓂ ᐱᒋᐊᕐᓂᐸᓗᐊᓂ ᑕᒪᑐᒪᓂ ᐊᕐᕌᒎᔪᒥ.
ᐱᓚᐅᖅᐳᖅ 19.6 ᐳᓴᓐᑎᖓᓂ ᓂᕈᐊᕐᓂᐅᔪᒥ ᓵᓚᖃᕋᓱᐊᕐᓂᐅᔪᒥ ᐃᓚᖃᓚᐅᖅᑐᒥ 10−ᓂ ᓂᕈᐊᒐᒃᓴᐅᔪᓂ.
ᖄᖏᖅᓯᒪᔪᓂ ᐱᓇᓱᐊᕈᓯᕐᓂ ᒪᕐᕉᖕᓂ “ᖁᕕᐊᓇᕐᒧᐊᖅᓯᒪᕗᑦ,” ᐅᓗᖅᓯ ᐅᖃᓚᐅᖅᐳᖅ.
ᑐᙵᕕᖃᖅᖢᓂ ᐃᖃᓗᖕᓂ, ᐃᓕᓴᐃᔨᕕᓂᖅ ᐊᐅᓪᓛᖅᓯᒪᕗᖅ ᓄᓇᕗᓕᒫᒧᑦ ᓄᓇᓕᖕᓄᑦ ᐃᓚᖃᖅᑐᒥ ᐸᖕᓂᖅᑑᖅ, ᐃᖃᓗᒃᑑᑦᑎᐊᖅ, ᖁᕐᓗᖅᑐᖅ, ᑲᖏᖅᖠᓂᖅ, ᖃᒪᓂᑦᑐᐊᖅ ᐊᒻᒪ ᐊᕐᕕᐊᓄᑦ ᐱᓇᓱᐊᕐᓂᖓᓂ ᐊᖓᔪᖅᑳᙳᕐᓂᕐᒧᑦ.
ᐅᖃᖃᑎᖃᓚᐅᖅᐳᖅ ᓄᓇᕗᒻᒥᐅᓄᑦ ᐊᖅᑯᒻᒥ, ᓂᕿᑖᕐᕕᓂ ᓂᐅᕕᕐᕕᓂᑦ, ᐃᓕᓐᓂᐊᕐᕕᓂᑦ, ᐃᓄᑐᖃᒃᑯᕕᖕᒥ ᐊᒻᒪ ᓄᓇᓕᖕᓂ ᓈᓚᐅᑎᒃᑯᑦ.
“ᓇᓗᓇᐃᖅᓯᓂᐅᔪᒥ ᑕᒪᒃᑭᑦᑎᐊᕐᒥ ᓂᕈᐊᖅᑕᐅᓇᓱᐊᕐᓂᖓᓂ ᐅᖃᓪᓚᖃᑎᖃᕐᓂᕐᒧᑦ ᐃᓄᖕᓄᑦ ᓯᓚᒥ,” ᐅᓗᖅᓯ ᐅᖃᓚᐅᖅᐳᖅ.
“ᓱᓕ ᐱᓕᕆᓂᖃᕈᒪᕗᖓ ᐊᒻᒪ ᐱᒧᒪᓂᐅᔪᒥ ᐊᒻᒪ, ᐊᓕᐊᓇᐃᒋᔭᖃᕐᔪᐊᖅᖢᖓ ᐃᑲᔪᕐᓂᕐᒥ ᐃᓄᖕᓂ.”
ᑕᐅᑐᒃᑕᑐᐊᖃᑲᐃᓐᓇᓚᐅᖅᐳᖅ ᖃᔅᓯᒐᓚᖕᓄᑦ ᐊᑲᐅᙱᓕᐅᕈᑕᐅᔪᓄᑦ ᐃᓚᖃᖅᑐᒥ ᐃᒡᓗᒃᓴᖃᕐᓂᕐᒥ, ᓂᕿᒃᓴᖃᑦᑎᐊᕐᓂᕐᒥ, ᐃᓄᑐᖃᕐᓂ, ᐃᓕᓐᓂᐊᕐᓂᕐᒥ, ᐱᓕᒻᒪᒃᓴᓂᕐᒥ ᐊᒻᒪ ᐃᖅᑲᓇᐃᔮᖃᕐᓂᕐᒥᑦ, ᓯᕗᓕᐅᖅᑎᐅᓂᕐᒥ ᐊᒻᒪ ᓵᙵᔪᒃᓴᐅᔪᓐᓇᕐᓂᕐᒥᑦ.
ᐅᖓᕙᕆᐊᖅᑎᑦᑎᓂᕐᒥ ᐅᑯᓂᖓ ᓯᕗᓪᓕᐅᑎᑕᐅᖁᔭᐅᔪᓂ, ᐅᓗᖅᓯ ᐱᓕᕆᓂᐊᕐᓂᕋᖅᐳᖅ ᖃᑐᔾᔨᖃᑎᒌᖕᓂᐅᔪᒥ ᐊᒻᒪ “ᒪᑐᐃᖓᔪᒥ ᐋᔩᖃᑎᒌᖕᓂᐅᔪᒥ” ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪ ᐱᖓᓱᓂ ᐃᓄᖕᓄᑦ ᑲᑐᔾᔨᖃᑎᒌᖑᔪᓂ.
“ᓱᓕᓗᖓ ᐱᓕᕆᔪᒪᕗᖓ ᐅᖓᕙᕆᐊᖅᓯᓂᕐᒥ ᐊᔾᔨᐸᓗᖏᓐᓂ ᓯᕗᓪᓕᐅᑎᑕᐅᖁᔭᐅᓂᐅᔪᓂ — ᒪᕐᕈᐃᓕᑲᑎᑦᑎᙳᓪᓗᓂ — ᑭᓯᐊᓂ ᐱᓕᕆᓗᑎᒃ ᑲᑐᔾᔨᖃᑎᒌᒡᓗᑎᒃ, ᖃᓄᖅ ᐃᑲᔪᕈᓐᓇᖅᐱᑕ, ᖃᓄᐃᓕᐅᕐᓗᑕ,” ᐅᖃᓚᐅᖅᐳᖅ.
ᒫᓐᓇᒧᑦ ᑎᑭᖦᖢᒍ, ᐅᓗᖅᓯ ᐃᓂᓪᓚᒃᓴᕐᓂᖓᓂ ᓄᑖᖑᔪᒥ ᐃᖅᑲᓇᐃᔮᖓᓄᑦ ᐊᒻᒪ ᓱᖏᐅᑎᓇᓱᐊᖅᖢᓂ ᐊᔾᔨᒡᒋᙱᑦᑐᓂ ᑎᑎᖅᑲᖁᑕᐅᔪᓂ ᓄᓇᕗᒻᒥ ᑐᙵᕕᒃᑯᑦ ᐱᓕᕆᓂᖏᓐᓂ.
ᑭᓯᐊᓂ ᐊᓯᔾᔨᕐᓂᖃᖅᐳᖅ ᑲᑐᔾᔨᖃᑎᒌᖑᔪᒥ, ᐱᓇᓱᐊᕈᓯᐅᓚᐅᖅᑐᒥ ᐊᐅᓪᓚᕐᓂᖓᓂ ᐊᐅᓚᑦᑎᔨᒻᒪᕆᖕᒥ ᑭᓕᒃᕙᒃ ᖃᑉᓗᓈᒥᒃ.
“ᐅᓇ ᓇᖕᒥᓂᖅ ᐱᓕᕆᐊᖑᓂᐅᕗᖅ ᐊᒻᒪ ᑭᒃᑯᑐᐃᓐᓇᕐᓄᑦ ᑐᓴᖅᑕᐅᔪᒃᓴᙱᓚᖅ, ᐊᒻᒪ ᓄᓇᕗᒻᒥ ᑐᙵᕕᒃᑯᑦ ᑕᐃᑐᒃᑕᑐᐊᖃᑲᐃᓐᓇᖅᐳᑦ ᐱᓕᕆᐊᒃᓴᒥᓂᑦ ᐊᒻᒪ ᑲᒪᒋᔭᕆᐊᖃᖅᑕᖏᓐᓂ,” ᐅᓗᖅᓯ ᐅᖃᓚᐅᖅᐳᖅ ᐊᐱᕆᔭᐅᒐᒥ ᑕᐃᔅᓱᒥᖓ ᐱᕙᓪᓕᐊᑎᑕᐅᓂᐅᔪᒥ.
“ᓇᓗᓇᐃᖅᓯᕗᒍᑦ ᓅᑦᑎᐊᕐᓂᐅᔪᒥ ᐊᒻᒪ ᑲᔪᓯᓂᐅᔪᒥ ᐊᐅᓚᑕᐅᓂᐅᔪᓂ.”
ᓯᕗᒻᒧᐊᕐᓂᕐᒥ, ᐅᓗᖅᓯ ᐅᖃᖅᐳᖅ ᖁᕕᐊᓐᓂᖓᓂ ᐱᓕᕆᖃᑎᖃᕐᓂᕐᒥ ᓄᓇᕗᒻᒥ ᑐᙵᕕᒃᑯᑦ ᑲᑎᒪᔨᖏᓐᓂ ᐊᒻᒪ ᐱᓕᕆᖃᑎᒋᕙᒃᑕᖏᓐᓂ.
ᐅᖃᓚᐅᖅᐳᖅ ᖁᕕᐊᒃᑭᕗᖅ ᓄᓇᕗᑦ ᐅᓪᓗᖓᓂ ᔪᓚᐃ 9−ᒥ, ᐸᕐᓇᒃᖢᓂ ᖁᕕᐊᓱᖃᑎᖃᕐᓂᕐᒥ ᑲᑎᙵᓂᕆᔭᒥᓂᑦ ᐊᒻᒪ ᐃᓅᖃᑎᒥᓂᑦ.
(0) Comments