ᐃᓄᒃ ᑲᓇᑕᒥ ᐸᓖᓯᒃᑯᑦ ᐸᓖᓯᐅᔪᖅ ᐅᑎᖅᐳᖅ ᑐᙵᕕᒋᔭᖓᓐᓄᑦ
Cpl. ᓯᑏᕙᓐ ᕿᓚᕝᕙᖅ ᐱᒋᐊᒃᑲᓐᓂᖅᐳᖅ ᐋᑐᕚᒥ ᐃᖃᓗᖕᓄᑦ ᑲᑎᒃᑲᓐᓂᕐᓂᕐᒧᑦ ᐅᖃᐅᓯᕐᒥ ᐊᒻᒪ ᐊᖏᕐᕋᖓᓄᑦ
ᑲᓇᑕᒥ ᐸᓖᓯᒃᑯᑦ Cpl. ᓯᒡᑎᕙᓐ ᕿᓚᕝᕙᖅ ᐅᑎᓚᐅᖅᐳᖅ ᐊᖏᕐᕋᒥᓄᑦ ᐃᖃᓗᖕᓄᑦ ᑎᓯᐱᕆᒥ ᐊᕐᕌᖑᑦ 20 ᐅᖓᑖᓂ ᐸᓖᓯᒃᑯᓐᓃᖦᖢᓂ. ᑐᕌᒐᒃᓴᖓ ᐅᑎᖅᑎᕆᓂᕐᒥ ᐅᑭᐅᖅᑕᖅᑐᒧᑦ, ᐅᖃᓚᐅᖅᐳᖅ. (ᑎᐊᕆᓐ ᓕᐊᑦᔅ ᐊᔾᔨᖁᑎᖓ)
For the English version of this story, please see Inuk RCMP officer returns to his roots.
ᓂᐅᖁᙴᕐᒥᐅᑕᐅᓚᐅᖅᓯᒪᔪᖅ, 48-ᓂ-ᐅᑭᐅᓕᒃ Cpl. ᓯᑏᕙᓐ ᕿᓚᕝᕙᖅ ᐃᓱᓕᑦᑎᓚᐅᖅᓯᒪᕗᖅ ᑲᓇᑕᒥ ᐸᓖᓯᒃᑯᑦ ᐃᓕᓐᓂᐊᕐᕕᖓᓂ ᕆᔭᐃᓇᒥ 2003−ᒥ. ᐱᓕᕆᐊᖃᓚᐅᖅᐳᖅ ᓴᐳᔾᔨᓯᒪᓂᕐᒥ ᑲᓇᑕᒥ ᐊᖓᔪᖅᑳᕐᔪᐊᖑᔪᓂ, ᐃᓚᐅᖃᑕᐅᓂᕐᒥ ᑲᓇᑕᓕᒫᒥ ᐊᖑᒻᒥ ᕿᓂᕐᓂᕐᒥ ᐊᒻᒪ ᐃᑲᔪᖅᖢᓂ ᐱᕙᓪᓕᐊᑎᑦᑎᓂᕐᒥ ᐱᔭᕆᑐᔪᓂ ᐸᓖᓯᒃᑯᓐᓂ — ᐊᒻᒪ ᐃᓄᓕᒫᓂ — ᐊᑦᑕᓇᙱᓐᓂᖅᓴᐅᓂᕐᒥ.
ᐊᐱᕆᓚᐅᖅᐳᖅ ᐱᒋᐊᒃᑲᓐᓂᕈᒪᓪᓗᓂ ᓄᓇᕗᒻᒥ ᑲᓇᑕᒥ ᐸᓖᓯᒃᑯᓐᓄᑦ ᐊᓯᐊᒎᖅᑐᒥ ᑲᑎᙵᓂᐅᔪᒥ ᐊᕐᕌᓂᐅᓚᐅᖅᑐᒥ “ᐃᑲᔪᕐᓂᕐᒧᑦ ᐃᓄᖕᓂ ᓵᙵᓗᒋᑦ,” ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᔪᓚᐃ 3−ᒥ.
ᑎᓯᐱᕆᒥ, ᐅᑎᓚᐅᖅᐳᖅ ᐊᖏᕐᕋᒥᓄᑦ.
“ᐅᖃᐅᓯᒃᓴᖅ ᐊᓂᑎᑦᑐᒪᔭᕋ ᒪᒃᑯᒃᑐᒧᑦ ᐃᓱᒪᒋᔭᖃᖅᑐᒥ ᐃᖅᑲᓇᐃᔮᖃᕐᓂᕐᒥ ᑭᓱᑐᐃᓐᓇᒥᒃ, ᐸᓖᓯᓕᕆᓂᑐᐃᓐᓇᐅᙱᑦᑐᒥ: ᐊᑏ ᐊᒻᒪ ᒪᓕᒡᓗᒍ ᐱᓕᕆᔪᒪᔭᕐᓂᑦ,” ᕿᓚᕝᕙᖅ ᐅᖃᓚᐅᖅᐳᖅ. “ᒪᓕᓚᐅᖅᐸᕋ ᐱᔪᒪᔭᕋ.”
ᐅᖃᐅᔾᔨᓂᖓ ᑕᐃᒃᑯᓄᖓ?
“ᐊᒃᓱᕈᕐᓗᑎᒃ ᐱᓕᕆᓗᑎᒃ, ᐃᓕᓐᓂᐊᕐᓂᕐᒥ, ᐊᒻᒪ ᐱᔪᒪᓂᐅᔪᒥ ᐃᓕᑦᑎᓂᕐᒥ ᓄᖅᑲᓚᐅᖅᓯᒪᙱᑦᑐᒥ,” ᐅᖃᓚᐅᖅᐳᖅ. “ᐊᓯᖏᓐᓂ ᐃᓕᑦᑏᓐᓇᐅᔭᖅᐳᖓ. ᖃᓄᑎᒋ ᐅᑭᐅᖃᕋᓗᐊᖅᑎᓪᓗᒋᑦ, ᑭᓱᑐᐃᓐᓇᒥᒃ ᐱᔪᓐᓇᖅᐳᑎᑦ ᐃᓕᑦᑎᓂᕐᒧᑦ.”
ᕿᓚᕝᕙᖅ ᐱᔨᑦᑎᕋᓚᐅᖅᐳᖅ ᖁᑭᕆᐊᖅᑎᐅᓪᓗᓂ ᐋᑐᕚᒥ ᑲᓇᑕᒥ ᐸᓖᓯᒃᑯᓐᓄᑦ ᑐᐊᕕᕐᓇᖅᑐᒥ ᑭᐅᓂᐅᔪᒥ ᑲᑎᙵᓂᐅᔪᓂ 2016−ᒥ 2025−ᒧᑦ, ᑐᓂᓯᓪᓗᓂ ᐊᑦᑕᓇᖅᑐᒦᑦᑕᐃᓕᓂᕐᒥ ᑲᓇᑕᒥ ᐊᖓᔪᖅᑳᕐᔪᐊᒧᑦ ᒫᒃ ᑳᓂᒧᑦ ᐊᒻᒪ ᑲᓇᑕᒥ ᐊᖓᔪᖅᑳᕐᔪᐊᖑᓚᐅᖅᑐᒥ ᔭᔅᑎᓐ ᑐᕉᑑᒧᑦ.
ᓯᕗᓂᐊᓂ, ᐃᔨᑦᑎᕋᓚᐅᖅᐳᖅ ᑲᖏᖅᖠᓂᕐᒥ, ᓇᐅᔮᑦ, ᑲᖏᖅᖢᒑᐱᒃ, ᑭᙵᐃᑦ, ᐃᒡᓗᓕᒃ, ᐃᖃᓗᐃᑦ ᐊᒻᒪ ᐅᐃᓂᐱᐊᒡᒥ.
“ᐱᓕᕆᕐᔪᐊᖅᓯᒪᕗᖓ ᓴᐳᔾᔨᓯᒪᓂᕐᒥ ᐱᓕᕆᓂᐅᔪᓂ−ᒪᓕᒃᖢᓂ ᐃᖏᕐᕋᔪᓂ ᑲᑎᙵᓂᐅᔪᓂ ᐊᒻᒪ ᐃᒡᓘᑉ ᖄᖓᓃᑉᐸᒃᖢᓂ — ᖃᐅᔨᓴᕐᓂᕐᒥ ᐅᓗᕆᐊᓇᖅᑐᖃᕐᒪᖔᑦ,” ᕿᓚᕝᕙᖅ ᐅᖃᓚᐅᖅᐳᖅ. “ᑭᓯᐊᓂ ᐊᔾᔨᖃᙱᓚᖅ ᐊᖑᒻᒥ ᕿᓂᖅᓴᓪᓚᕆᖕᓂᐅᔪᒥ.”
ᐊᐅᔭᐅᔪᒥ 2019−ᒥ, ᑳᒻ ᒪᑲᓚᐅᑦ ᐊᒻᒪ ᐳᕋᐃᔪᕐ ᓯᒥᒋᐊᓪᔅᑭ ᑐᖂᑦᑎᓚᐅᖅᐳᑦ ᐱᖓᓱᓂ ᐃᓄᖕᓂ ᑕᐅᕘᓇ ᐃᓄᖃᙱᑦᑐᓂ ᐊᖅᑯᑎᑯᑖᖕᒥ ᐅᐊᖕᓇᒥ ᐳᐱᑎᔅ ᑲᓚᒻᐱᐊᒥ, ᐊᓱᐃᓛᒃ ᓇᓂᔭᐅᓚᐅᖅᐳᑦ ᑐᖁᖓᓪᓗᑎᒃ ᐋᒍᔅᑎ 7−ᒥ ᐅᐊᖕᓇᒥ ᒫᓂᑑᐸᒥ. ᕿᓚᕝᕙᖅ ᐃᓚᐅᖃᑕᐅᓚᐅᖅᐳᖅ ᖁᑦᑎᒃᑐᒥ-ᑕᑯᒃᓴᐅᓂᐅᔪᒥ ᕿᓂᖅᓴᖃᑕᐅᓂᕐᒥ, ᐃᓚᖃᓚᐅᖅᑐᒥ ᑎᓴᒪᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ.
“ᑭᓱᑐᐃᓐᓇᖅ ᖃᐅᔨᓴᓲᖑᕗᖅ ᐊᔪᙱᓐᓂᐅᔪᓂ ᐊᒃᓱᕈᕐᔪᐊᖅᖢᑎᑦ ᐱᓕᕆᓪᓗᑎᑦ ᐊᒻᒪ ᐱᓕᒻᒪᒃᓴᕐᔪᐊᖅᖢᑎᑦ ᐱᐅᓯᒋᐊᖅᑎᑦᑎᑦᑎᐊᕐᓂᕐᒥ ᑕᐃᒃᑯᓂᖓ ᖃᓄᐃᓐᓂᐅᔪᓂ,” ᐅᖃᓚᐅᖅᐳᖅ.
ᕿᓚᕝᕙᖅ ᐃᑲᔪᓚᐅᕆᕗᖅ ᑲᓇᑕᒥ ᐸᓖᓯᒃᑯᓐᓂᑦ ᐱᒋᐊᖅᑎᑦᑎᓂᖏᓐᓂ ᐱᔭᕆᑐᔪᓂ ᐸᓖᓯᓄᑦ ᐊᑦᑕᓇᔾᔭᐃᖅᓯᓯᒪᓂᕐᒧᑦ ᑲᑉᐱᐊᓇᓛᖑᔪᒥ ᐊᒥᓱᓂ ᖁᑭᖅᓴᕐᓂᐅᔪᓂ ᑲᓇᑕᐅᑉ ᐊᑐᖅᐸᓚᐅᖅᓯᒪᔭᖏᓐᓂ.
ᐊᐃᑉᕆᓕ 18 ᐊᒻᒪ 19, 2020−ᒥ, ᐊᖑᒻᒥ ᐊᔾᔨᖓᓂ ᑲᓇᑕᒥ ᐸᓖᓯᒃᑯᑦ ᓄᓇᓯᐅᒻᒥ ᑐᖂᑦᑎᓚᐅᖅᐳᖅ 22−ᓂ ᐃᓄᖕᓂ ᖃᔅᓯᒐᓚᖕᓂ ᓅᕙ ᓯᑰᓯᐊᒥ ᓄᓇᓕᐅᔪᓂ, ᓅᕙ ᓯᑰᓯᐊᒥ ᑲᓇᑕᒥ ᐸᓖᓯᒃᑯᑦ ᐊᑭᕋᖅᑐᖅᑕᐅᓚᐅᖅᐳᑦ ᑭᐅᓂᖏᓐᓄᑦ, ᐃᓚᖃᖅᑐᒥ ᖃᓄᐃᓐᓂᐅᔪᒥ ᐸᓖᓰᑦ ᖁᑭᕆᐊᓚᐅᕐᓂᖏᓐᓂ ᐸᓖᓯᐅᖃᑎᒥᓂᑦ, ᑕᒻᒪᖅᖢᑎᒃ ᐸᓴᒋᔭᐅᔪᒧᑦ, ᖃᑦᑎᕆᕝᕕᖕᒥ ᐊᑦᑎᖕᓂᖅᓴᒥ ᐋᓐᓱᓘᒥ.
2023−ᒥ, ᕿᓚᕝᕙᖅ ᖁᕝᕙᕆᐊᖅᑎᑕᐅᓚᐅᖅᐳᖅ ᐊᐅᓚᑕᐅᓂᐅᔪᒥ ᐱᓕᕆᔾᔪᓯᓂ ᐱᔨᑦᑎᕋᕐᓂᐅᔪᒥ ᐱᓕᕆᕝᕕᖓᓄᑦ ᐋᑐᕚᒥ. ᐃᑲᔪᓚᐅᖅᐳᖅ ᖃᐅᔨᓴᕐᓂᕐᒥ, ᐆᒃᑐᕐᓂᕐᒥ ᐊᒻᒪ ᐱᓕᒻᒪᒃᓴᓂᕐᒥ ᑲᑎᙵᓂᐅᔪᓂ Blue Force ᖃᐅᔨᓴᕐᓂᐅᔪᒥ, ᑕᑯᒃᓴᐅᑎᑦᑎᔪᒥ ᑕᒪᒃᑭᑦ ᐸᓖᓯᐅᔪᒥ ᐃᓂᖓᓂ ᐅᕘᓇ ᐅᖃᓘᑎᕋᓛᖏᑎᒍᑦ ᑐᓂᓯᓂᕐᒥ ᖃᓄᐃᑦᑐᖃᕐᓂᕈᓂ ᐅᔾᔨᕈᓱᖕᓂᐅᔪᒥ ᐱᓕᕆᓂᐅᔪᒥ.
ᒫᓐᓇ ᑐᙵᕕᖃᓕᖅᖢᓂ ᐃᖃᓗᖕᓂ, ᕿᓚᕝᕙᖅ ᐊᐅᓪᓛᖅᓯᒪᕗᖅ ᓄᓇᕗᓕᒫᒥ, ᐃᓚᖃᖅᑐᒥ ᓄᖅᑲᓚᐅᑲᖕᓂᐅᔪᓂ ᑲᖏᖅᖠᓂᕐᒥ, ᓇᐅᔮᑦ, ᖃᖏᖅᖢᒑᐱᒃ, ᑭᙵᐃᑦ ᐊᒻᒪ ᐃᒡᓗᓕᖕᒧᑦ.
“ᐊᖏᔪᒥ ᑐᕌᒐᒃᓴᕋ ᐅᑎᕐᓂᕐᒧᑦ ᑐᙵᕕᒋᔭᓐᓄᑦ, ᓴᙱᒃᑎᒋᐊᖅᓯᓂᕐᒥ ᐅᖃᐅᓯᓐᓂᑦ, ᐊᒻᒪ ᐃᒃᐱᒍᓱᓕᕐᓗᖓ ᖃᓄᖅ ᑭᓱᑐᐃᓐᓇᐃᑦ ᐃᖏᕐᕋᓂᖏᓐᓂ ᓄᓇᓕᖕᓂ, ᑐᑭᓯᐅᒪᓂᖅᓴᐅᔪᓐᓇᕐᓂᐊᕋᒪ,” ᐅᖃᓚᐅᖅᐳᖅ. “ᑐᑭᓯᐅᒪᓂᖅᓴᐅᒍᒪ, ᖃᐅᔨᔪᓐᓇᖅᐳᖓ ᖃᓄᖅ ᐱᐅᓛᒥᒃ ᐊᑐᖅᑎᑦᑎᓂᕐᒥ ᐊᔪᙱᓐᓂᐅᔪᓂ ᐃᓕᓯᒪᔭᓐᓂᑦ ᐸᓖᓯᐅᓂᓐᓂ.”
ᕿᓚᕝᕙᖅ ᖁᕝᕙᖅᓴᐃᕗᖅ ᐊᑐᕐᓂᕐᒥ ᓄᓇᕗᒻᒥ-ᑐᙵᕕᓕᖕᒥ ᐱᓕᕆᔾᔪᑕᐅᔪᒥ ᑕᐃᔭᐅᔪᒥ Miinga−ᒥ, ᐅᕝᕙᓘᓐᓃᑦ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᕈᑎᒃᓴᖅ ᐅᖃᓘᑎᕋᓛᒃᑯᑦ ᐱᓕᕆᔾᔪᑕᐅᔪᒥ.
“ᑭᓱᓂᒃ ᑐᓂᓯᕙᖕᓂᖓᓂ ᑎᑎᕋᖅᓯᒪᓂᐅᔪᒥ ᐱᔨᑦᑎᕋᕐᓂᐅᔪᒥ ᑭᓱᑐᐃᓐᓇᓄᑦ ᐱᔾᔪᑎᖃᖅᑐᒥ ᐅᑭᐅᖅᑕᖅᑐᒧᑦ, ᐅᓇᐅᒍᓂ ᐃᓚᒌᓄᑦ ᐱᔨᑦᑎᕋᕐᓂᕐᒥ, ᓱᕈᓯᕐᓄᑦ ᐸᖅᑭᔭᐅᓂᖏᓐᓂ, ᐸᖅᓴᐃᓂᕐᒥ ᐊᒻᒪ ᓴᐳᔾᔨᓂᕐᒥ, ᐅᕝᕙᓘᓐᓃᑦ ᓄᓇᓕᖕᓂ ᕼᐋᒻᓚᒃᑯᑦ ᐱᔨᑦᑎᕋᕐᓂᐅᔪᓂ — ᑕᐃᑲᓃᑦᑐᐃᓐᓇᐅᕗᑦ, ᐅᖃᓚᐅᖅᐳᖅ.
(0) Comments