ᓵᓚᒃᓴᕋᓱᒃᑐᓂ ᓵᓚᒃᓴᖅᑐᖅ ᒥᕐᓱᕐᑐᖅ ᓯᓚᐹᖕᓂ ᐳᕋᐃᒻ ᒥᓂᔅᑕᒧᑦ

ᔭᓂᕗ ᖁᐸᓄᐊᖅ ᒪᐃ ᐅᖃᕐᑐᖅ ᓯᕘᕋᓚᐅᕐᓂᖓᓂ ᓯᓚᐹᓕᐅᕆᐊᖃᓕᕋᒥ ᐳᕋᐃᒻ ᒥᓂᔅᑕᒧᑦ ᐱᓇᓱᐊᕈᓯᐅᑉ ᐃᓗᐊᒍᑦ ᐊᒻᒪᓗ ᐆᒃᑐᕋᖅᓯᒪᓗᐊᙱᖢᓂᐅᒃ. (ᐊᔾᔨᙳᐊᖅ ᐅᕙᙵᑦ ᔭᓂᕗ ᖁᐸᓄᐊᖅ ᒪᐃ)

ᔭᓂᕗ ᖁᐸᓄᐊᖅ ᒪᐃ ᑐᓂᔭᐅᓚᐅᙱᑦᑐᖅ ᒫᒃ ᑳᓂᐅᑉ ᑎᒥᖓᓄᑦ ᐆᒃᑐᕋᖅᑕᐅᓯᒪᔪᓂᒃ ᐅᑯᐊ ᒪᑭᕕᒃ ᑯᐊᐳᕇᓴᓐᑯᑦ ᓴᓇᖁᔨᓕᕐᑎᓪᓗᒋᑦ ᓯᓚᐹᖕᓂ ᐳᕋᐃᒻ ᒥᓂᔅᑕᒧᑦ.

“ᐅᖃᐅᔾᔭᐅᑐᐃᓐᓇᓚᐅᕐᑐᖓ ᕿᑎᐊᓃᖢᓂ ᐊᖏᓂᕋᖅᑕᐅᓪᓗᓂ,” ᒪᐃ, ᑰᔾᔪᐊᖅᒥ ᒥᕐᓱᕐᑎ ᓄᓇᖃᖅᖢᓂ ᒪᓐᑐᕆᐊᒥ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ. “ᐊᒃᓱᐊᓗ ᓯᕗᕋᕈᔪᓚᐅᕐᑐᖓ. ᒥᕐᓲᑎᒪ ᓵᑦᑎᐊᖓᓃᖢᖓ ᐃᓱᒪᓚᐅᕐᑐᖓ, ‘ᑎᓕᔭᐅᒃᑲᓐᓂᓚᐅᕐᓯᒪᔾᔮᕈᓐᓃᖅᑐᖓ.’”

ᑭᓯᐊᓂᓕ ᑳᓂ ᓴᖅᑭᒻᒪᖅ ᑐᖑᔪᖅᑐᓂ ᓯᓚᐹᓂ ᐊᑐᖅᖢᓂ ᐅᑯᓄᖓ ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᕋᓛᓄ ᑲᑎᒪᑎᓪᓗᒋᑦ ᔫᓂ 30-ᒥ ᑰᔾᔪᐊᖅᒥ, ᓈᒻᒪᒃᓴᑦᑎᐊᓚᐅᕐᑐᖅ.

“ᑕᑯᒐᒃᑯᑦ ᓈᒻᒪᒃᓴᑦᑎᐊᖅᖢᓂ ᐊᒻᒪᓗ ᐅᐱᒍᓱᒻᒪᕆᒃᖢᓂ ᐊᑐᕐᑕᒥᓂᒃ,” ᒪᐃ ᐅᖃᕐᑐᖅ.

ᒪᑯᕝᕕᒃᑯᑦ ᐱᒋᐊᖅᑎᑦᑎᓚᐅᕐᓯᒪᖕᒪᑕ ᓵᓚᒃᓴᕋᓱᒃᑎᑦᑎᓂᕐᒥᒃ ᕕᕝᕗᐊᕆᐅᑎᓪᓗᒍ ᓯᓚᐹᓕᐅᕐᓂᐊᖅᑐᒥ ᑲᑐᔾᔨᖃᑎᒌᑦ ᐊᐅᓚᑦᑎᔨᖏᓐᓄᑦ ᐊᒻᒪ ᑲᑎᒪᔨᖏᓐᓄᑦ. ᐊᑐᓂ ᓴᓚᒃᓴᐅᓯᐊᕋᓱᒃᑐᖅ ᑐᓂᓯᓚᐅᕐᑐᖅ ᐊᑕᐅᓯᕐᒥ ᐊᖑᑎᓯᐅᑎᒥ ᐊᒻᒪ ᐊᕐᓇᕐᓯᐅᑎᒥ ᓴᓇᓯᒪᔪᓂᒃ.

ᒪᑭᕝᕕᒃᑯᑦ ᑐᓴᖅᑎᑦᑎᓚᐅᕐᓯᒪᔪᑦ ᓵᓚᒃᓴᐅᓯᐊᖅᑐᒥ ᐊᐃᕆᓕ 30-ᒥ ᕙᐃᔅᐳᒃᑯᑦ, ᒪᐃ ᓯᕗᓪᓕᖅᐹᖑᓪᓗᓂ ᐊᒻᒪ ᓵᓚᒃᓴᐅᓯᐊᖅᖢᓂᒃ $15,000-ᓂ ᑮᓇᐅᔭᓂ.

ᓵᓚᒃᓴᕐᓂᕐᑕᐅᖅ ᐅᑯᓄᖓ ᑎᑭᒍᑎᒋᓚᐅᕐᑕᖓ ᐳᕋᐃᒻ ᒥᓂᔅᑕᒧᑦ ᑲᒥᓴᓐᑯᓐᓄᑦ, ᐊᒻᒪᓗ ᓯᓚᐹᓕᐅᖅᖢᓂ ᐆᒃᑑᑎᒥ ᓵᓚᒃᓴᐅᓯᐊᕐᒥᓂ ᐊᑐᕐᖢᓂ.

“ᓴᓇᔭᕆᐊᖃᓚᐅᕐᑐᖓ ᐱᓇᓱᐊᕈᓯᐅᑉ ᑐᖔᓂ,” ᒪᐃ ᐅᖃᕐᑐᖅ. “ᑎᑭᓴᖅᑕᐅᔪᓂ ᓴᓇᓗᐊᖅᐸᙱᓐᓇᒪ. ᐊᒃᓱᕈᕐᓇᓗᐊᕐᒪᓐ.”

ᑕᕐᓴᕆᔭᐅᔪᖅ ᓯᓚᐹᓂ ᑲᑭᕙᙳᐊᖑᔪᖅ, ᐃᖃᓗᒐᓲᑎᐅᓪᓗᓂ ᐃᒃᑲᑦᑐᓂ.

“ᓴᓇᔪᒪᓚᐅᕐᑐᖓ ᓄᑖᒥ ᐊᖑᑎᓯᐅᑎᒥ ᓲᖃᐃᒻᒪ ᑕᑯᕙᒃᑲᑦᑕ ᐊᕐᓇᕐᓯᐅᑎᓂ ᐱᐅᔪᐊᓗᖕᓂ ᑭᓯᐊᓂᓕ ᐊᖑᑎᓯᐅᑎᓂ ᐱᑕᖃᓗᐊᙱᖢᓂ,” ᒪᐃ ᐅᖃᕐᑐᖅ.

ᒥᕐᓱᖅᑎᐅᓕᖅᖢᓂ ᒫᓂ 30 ᐊᕐᕌᒍᓂ, ᐅᓇ ᐅᐱᒍᓱᖕᓇᑦᑎᐊᓚᐅᕐᑐᖅ, ᐅᖃᕐᑐᖅ.

“ᖁᕕᐊᓇᖅ ᒪᑭᕝᕕᒃᑯᑦ ᐃᓱᒪᓕᐅᕆᓚᐅᕐᒪᑕ ᐳᕋᐃᒻ ᒥᓂᔅᑕ ᓯᕗᓪᓕᖅᐹᖑᓗᓂ ᐆᒃᑐᕐᓯᒪᔭᓐᓂ ᐊᑐᕐᓂᐊᕐᓂᖓᓂᒃ.”