ᓱᕈᓯᕐᓄᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᕝᕕᒃ ᐊᖏᒡᓕᒋᐊᖅᑎᑦᑎᕗᑦ ᐱᓕᕆᐊᖏᓐᓂ ᐃᓄᒃᑑᓕᖅᖢᑎᒃ
ᑕᕐᕆᔭᒐᒃᓴᐃᑦ ᐊᒻᒪ ᖃᕋᓴᐅᔭᒃᑯᑦ ᐅᖃᓕᒫᒐᒃᓴᑦ ᐃᑲᔫᑎᑦ ᑲᑐᔾᔨᖃᑎᒌᑦ ᐃᓅᓯᓕᕆᓂᕐᒧᑦ ᐱᔨᑦᑎᕋᖅᑐᓂᒃ
ᐸᓕ ᐹᓐᔅ, ᓴᐅᒥᐊᓂ, ᐊᒻᒪ ᐅᕇᕙᓐ ᒐᓄ, ᐅᑯᓇᙶᕐᓯᒪᔪᖅ ᓱᕈᓯᕐᓄᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᕝᕕᒃᒥᑦ (Kids Help Phone), ᑐᓂᐅᖃᐃᔪᑦ ᐅᖃᓕᒫᒐᕋᓛᓂ ᐊᒻᒪ ᐱᖁᑎᓂᒃ ᑭᐳᒥ ᐋᖅᑭᒃᑕᐅᓯᒪᔪᒦᑦᑐᓂᒃ ᔪᓚᐃ 9-ᖑᑎᓪᓗᒍ ᓇᑲᓱᒃ ᐃᓕᓐᓂᐊᕐᕕᐅᑉ ᓴᓂᑦᑎᐊᖓᓂ ᑐᓴᖅᑎᑦᑎᒃᑲᓐᓂᕋᓱᒃᖢᑎᒃ ᐅᖄᓚᕝᕕᐅᔪᓐᓇᖅᑐᒥ ᐃᓄᒃᑎᑐᑦ ᐅᖃᐅᓯᕐᒥ ᐊᑐᖃᑦᑕᖅᑐᓂᒃ. (ᐊᔾᔨᓕᐅᕆᔨ ᒨᓴ ᕘᔾᔪ)
For the English version of this story, please see Kids Help Phone expands outreach in Inuktitut.
ᐅᖄᓚᐅᑎᑎᒍᑦ ᐊᒻᒪ ᖃᕋᓴᐅᔭᒃᑯᑦ ᐱᔨᑦᑎᕋᐅᑎᑦ ᑲᓇᑕᒥ ᓱᕈᓯᕐᓄᑦ ᓈᒻᒪᙱᓕᐅᕈᑎᖃᕐᑐᓂᒃ ᐊᖏᒡᓕᕚᓪᓕᖅᑎᑦᑎᕗᖅ ᐃᓄᒃᑐᑦ ᐱᓕᕆᐊᖏᓐᓂ ᐊᒻᒪ ᖃᓄᐃᓕᐅᕈᑎᒃᓴᖏᓐᓂᒃ.
ᐸᓕ ᐹᓐᔅ, ᐃᖃᓗᖕᓂ ᓄᓇᖃᕐᓂᑯ ᐊᒻᒪ ᒫᓐᓇ ᓄᓇᖃᓕᖅᖢᓂ ᐋᓐᑎᐅᕆᐅ ᑲᓇᖕᓇᖓᓂ ᐅᑯᓄᖓ ᓱᕈᓯᕐᓄᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᕝᕕᒃᒥ ᐃᓄᖕᓄᑦ ᐅᖃᕐᕕᐅᔪᓐᓇᖅᑐᓄᑦ ᑐᑭᒧᐊᖅᑎᑦᑎᔨ. ᐃᖃᓗᖕᓃᓚᐅᕐᑐᖅ ᔪᓚᐃ 9-ᖑᑎᓪᓗᒍ ᓄᓇᕗᑦ ᐅᓪᓗᖓᓂ ᑐᓴᖅᑎᑦᑎᖏᐊᖅᑐᖅᖢᓂ ᑲᑐᔾᔨᖃᑎᒌᑦ ᐱᓕᕆᐊᕆᓕᕐᑕᖓᓂ ᐅᑯᑎᒎᓇᖅ ᖁᕕᐊᓇᕐᓂᕐᓴᓄᑦ ᐅᓪᓗᕐᓄᑦ ᓄᓇᖃᖅᑳᖅᑐᓄᑦ ᖃᓄᐃᑦᑕᐃᓕᓂᕐᒧᑦ ᐱᓕᕆᐊᒃᓴᓂ.
“ᐅᓇ ᓯᕗᓪᓕᕐᐹᖅ ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᓐ ᐊᑐᐃᓐᓇᐅᓕᕐᑐᖅ ᐅᕘᓇ ᖁᕕᐊᓇᕐᓂᕐᓴᓄᑦ ᐅᓪᓗᕐᓄᑦ ᐱᓕᕆᐊᑦᑎᓐᒍᑦ,” ᐹᓐᔅ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ.
ᖁᕕᐊᓇᕐᓂᕐᓴᐃᑦ ᐅᓪᓗᐃᑦ ᐊᐅᓚᑕᐅᔪᖅ ᐅᕇᕙᓐ ᒐᓄᒧᑦ, ᐊᓪᓚ ᑯᕇ ᐅᕙᙶᕐᓂᑯ ᒨᔅ ᕚᒃᑐᕆ, ᐋᓐᑎᐅᕆᐅᒥ, ᒪᓕᓚᐅᖅᖢᓂᓗ ᐹᓐᔅᒥ ᐃᖃᓗᖕᓄᑦ ᐱᓇᓱᐊᕈᓯᐅᓚᐅᕐᑐᒥᓐ. ᑭᐸᒥ ᐋᖅᑭᒃᓯᓯᒪᓚᐅᕐᑐᑦ ᓇᑲᓱᒃ ᐃᓕᓐᓂᐊᕐᕕᐅᑉ ᖃᓂᒋᔭᖓᓂ ᐊᒻᒪ ᐅᖃᖃᑎᖃᑕᒃᖢᑎᒃ ᐅᐸᒍᑎᔪᓄᑦ ᐱᔨᑦᑎᕋᐅᑎᖏᓐᓂᒃ, ᑐᓂᐅᖃᐃᓪᓗᑎᒡᓗ ᐃᓄᒃᑐᑦ ᐅᖃᓕᒫᒐᒃᓴᓂ ᐊᒻᒪᓗ ᓱᕈᓯᕐᓂ ᑕᕐᓴᙳᐊᓕᕐᓯᑲᑕᒃᖢᑎᒃ ᐊᒻᒪᓗ ᐃᓯᒐᐅᔭᕐᓄᑦ ᐱᐅᓴᐅᑎᓂ.
“ᓄᓇᓕᖕᓃᖢᓂ ᑐᑭᓯᕚᓪᓕᕐᓇᖅᑐᖅ ᐸᓕᐅᑉ ᐱᓇᓱᐊᖅᑕᖓᓂ ᐊᒻᒪᓗ ᖃᓄᐃᓕᐅᕈᓯᕆᖃᑦᑕᖅᑕᑦᑎᓐᓂ ᐱᓕᕆᐊᑦᑎᒍᑦ,” ᒐᓄ ᐅᖃᕐᑐᖅ. “ᑕᑯᑲᑕᒃᖢᒋᑦ ᐱᖃᓐᓇᕆᔭᐅᓕᕐᑐᑦ, ᐃᓚᒌᑦ, ᓄᓇᖃᖃᑕᐅᔪᑦ ᑕᑯᓐᓇᖅᑐᖅ ᖃᓂᒌᒃᑑᑎᐅᓂᖏᓐᓂ, ᐊᒻᒪᓗ ᐱᓕᕆᐊᕗᑦ ᑕᒫᓂ ᐱᓕᕆᔭᐅᔭᕆᐊᖃᕐᓂᖓᓂᑦᑕᐅᖅ.”
ᐹᓐᔅ ᑰᔾᔪᐊᖅᒦᓚᐅᕐᑐᖅ ᔭᓄᐊᕆᒥ ᑕᕐᕆᔭᒐᒃᓴᓂ ᐋᖅᑭᒃᓱᐃᔭᖅᑐᕐᓯᒪᓪᓗᓂ ᓄᓇᕕᒻᒥᐅᑎᑑᖓᔪᓂᒃ, ᓄᓇᕕᒃᒥ ᐅᖃᐅᓯᐅᕙᒃᑐᓂᒃ ᐃᓄᒃᑐᑦ, ᐃᑲᔪᖅᑕᐅᓪᓗᓂ ᑐᒦᑦ ᑐᓴᒐᒃᓴᓕᐅᕐᑎᓂᒃ ᐊᒻᒪ ᓄᓇᓕᖕᓂ ᐃᓅᓱᒃᑐᓂᒃ. ᐅᖃᓚᐅᕐᑐᖅ ᐅᖃᖃᑎᒋᔭᐅᓚᐅᕐᓂᖓᓂ ᐃᓄᐃᑦ ᑕᐱᕇᑦ ᑲᓇᑕᒥ ᐃᒻᒥᓃᖅᑕᐃᓕᓂᕐᒧᑦ ᐱᓕᕆᐊᖃᖅᑐᓂᒃ ᐊᒻᒪ ᐃᓄᖕᓂ ᐅᑭᐅᕐᑕᖅᑐᕐᒥᐅᑕᓂᒃ.
“ᐃᑲᔪᖅᑕᐅᓚᐅᕐᑐᖓ ᖃᓄᖅ ᐃᓄᐃᑦ ᐱᔪᒪᖕᒪᖔᑕ, ᑕᐅᑐᒃᑕᖏᑦᑎᒍᑦ,” ᐹᓐᔅ ᐅᖃᕐᑐᖅ. “ᐃᓱᒪᒋᔭᐅᔪᓄᑦ ᐋᖅᑭᒃᓱᐃᔪᓐᓇᕐᓯᓚᐅᕐᑐᒍᑦ, ᐊᒻᒪᓗ ᐅᖃᖅᖢᑎᒃ ᐃᓄᐃᑦ ᐊᑐᐃᓐᓇᖃᕐᓂᐊᕈᑎ ᐃᑲᔫᑎᒥ ᑕᐃᒪᓕ ᐅᖃᐅᓯᖏᑦᑎᒎᒋᐊᖃᕐᓂᕋᖅᖢᒍ.”
ᑕᕐᕆᔭᒐᒃᓴᐃᑦ ᐊᒻᒪ ᖃᕋᓴᐅᔭᒃᑯᑦ ᐃᑲᔫᑎᒋᔭᐅᔪᑦ ᐃᑲᔪᖅᐹᓪᓕᕈᑎᐅᔪᖅ ᐃᑲᔪᖅᑐᐃᓂᒃᑯᑦ ᓱᕈᓯᕐᓄᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᕝᕕᒃ ᐊᑐᐃᓐᓇᐅᓚᐅᕐᓯᒪᔪᖅ ᐊᑐᕐᖢᑎᒃ ᐃᓄᒃᑎᑐᑦ ᐅᖃᕈᓐᓇᖅᑐᓂ ᐃᑲᔪᖅᑐᓂᒃ ᐊᒻᒪ ᐊᑐᐃᓐᓇᐅᔪᓐᓇᖅᖢᑎᒃ ᖃᕋᓴᐅᔭᒃᑯᑦ ᐅᖃᖃᑎᒋᔭᐅᔭᕆᐊᒃᓴᖅ ᐅᖄᓚᐅᑎᑎᒍᑦ, ᖃᓇᓕᒫᖅ ᐃᑲᕐᕋᑦ 24-ᓂ ᐅᓪᓗᕐᒥ ᖃᐅᑕᒪᓐ.
“ᐱᓕᕆᔨᒻᒪᕆᒃᑕ ᐃᓚᖓ ᐃᓅᓱᒃᑐᓂ ᐅᖃᖃᑎᖃᖃᑦᑕᕐᑐᖅ,” ᒐᓄ ᐅᖃᕐᑐᖅ. “ᐅᖃᓕᒫᒐᒃᓴᐃᑦ ᓴᖅᑭᑕᐅᕙᒃᑐᑦ ᐃᓅᓱᒃᑐᓄᑦ ᓄᓇᖃᖅᑳᖅᑐᓂ ᐃᑲᔪᖅᑕᐅᓪᓗᑎᒃ ᒪᑯᑎᑐᓇᖅ ᕼᐋᑭᕐᑎᕕᓂᖅ ᔪᐊᑎᓐ ᑐᑐᑎᑐᑦ, ᐊᒻᒪ ᐅᖃᐅᓯᖃᖅᐸᒃᖢᑎᒃ ᐊᑐᕐᓂᑯᕕᓂᖏᓐᓂᒃ ᐊᒻᒪᓗ ᐅᖃᐅᔾᔪᐃᕙᒃᖢᑎᒃ ᐃᓅᓱᒃᑐᓂ ᐃᑲᔪᖅᑕᐅᔪᒪᓗᑎ ᑐᓴᖅᑎᑦᑎᔪᓐᓇᕐᓂᖏᓐᓂ.”
ᑖᒃᑯᐊ ᑲᑐᔾᔨᖃᑎᒌᑦ ᐃᑲᔪᖃᑦᑕᕐᒥᔪᑦ ᐃᓄᖕᓂ ᐃᓄᓕᕆᔨᓂ ᐃᑲᔪᖅᐸᒃᖢᑎᒃ ᐱᓕᕆᐊᑎᒍ ᐃᓕᓐᓂᐊᖅᑕᖏᓐᓂ ᐱᐊᓂᒃᓯᓇᓱᖕᓂᖏᓐᓂ.
“ᐋᖅᑭᒃᓱᐃᕙᓪᓕᐊᓇᓱᒃᑲᑦᑕ ᐃᑲᔪᕈᑎᒋᖃᑦᑕᕐᓂᐊᖅᑕᑦᑎᓐᓂ ᓄᓇᖃᖅᑳᖅᑐᑦ ᐃᓄᓕᕆᓂᕐᒧᑦ ᐃᓕᓐᓂᐊᖅᑐᑦ ᐃᑲᕐᕋᓕᐅᕐᕕᒋᔪᓐᓇᖅᑕᖏᓐᓂᒃ ᐅᖁᑎᒎᓇᖅ ᓱᕈᓯᕐᓄᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᕝᕕᒃᑎᒍᑦ ᐊᒻᒪ ᑐᐊᕕᕐᓇᖅᑐᓕᕆᓂᕐᒥ ᑭᐅᔨᐅᕙᖕᓂᒃᑯᑦ,” ᒐᓄ ᐅᖃᕐᑐᖅ. “ᑕᐃᒪᓐᓇ ᓄᓇᖏᓐᓂ ᕿᒪᐃᔭᕆᐊᖃᙱᖢᑎᒃ ᓄᓇᓕᖕᓃᖏᓐᓇᕈᒪᒍᑎᒃ ᐊᒻᒪ ᐃᓕᓐᓂᐊᖅᑕᖏᓐᓄᑦ ᐊᔪᕈᓐᓃᕐᓴᕈᒪᒍᑎᒃ.”
ᐅᓇ ᓱᕈᓯᕐᓄᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᕝᕕᒃ ᐊᑐᐃᓐᓇᐅᔪᖅ ᖃᕋᓴᐅᔭᒃᑯᑦ ᐅᕘᓇ www.kidshelphone.ca ᐃᓕᓗᒍ ᐊᑭᖃᙱᑦᑐᖅ ᓱᕈᓯᕐᓄᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᕝᕕᒃ ᖃᕋᓴᐅᔭᒃᑯᑦ ᐃᓚᒃᓴᖅ ᐊᒻᒪᓗ ᐅᖄᓚᒍᓐᓇᖅᖢᓯ ᐊᑭᖃᙱᑦᑐᒧ ᐅᖄᓚᐅᑎᒧᑦ ᐅᕗᖓ 1-800-668-6868. ᐅᖄᓚᔪᐃᑦ ᓇᕿᑦᑎᓗᑎᒃ 3 ᓄᓇᖃᖅᑳᖅᑐᒧᑦ ᐃᑲᔪᖅᑕᐅᔪᒪᓂᕐᒧᑦ.
(0) Comments