ᐃᓄᐃᑦ ᕿᓚᐅᔾᔭᖅᑏᑦ ᓯᕗᓪᓕᖅᐸᐅᔪᑦ ᒪᓐᑐᕆᐊᒥ ᐳᕋᐃᑦᒧᑦ ᐊᖅᑯᑎᒃᑯᑦ ᐱᓱᒃᑐᓂ

ᐹᐱ ᒫᓂᖕ-ᓚᑐᒃ, ᐃᓚᒋᔭᐅᔪᖅ ᑯᐸᐃᑦ ᓂᒋᐊᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪ ᑐᙵᓱᒃᑎᑦᑎᔨᐅᓪᓗᓂ ᐃᓕᓐᓂᐊᓯᓐᓈᑦ ᑲᑎᒪᑎᑕᐅᔪᓂᒃ, ᐅᖃᓚᐅᕐᑐᖅ ᖁᕕᐊᒋᓂᕋᖅᖢᓂᐅᒃ ᐊᓯᖏᓐᓂ ᐃᓄᖕᓂ ᐳᕋᐃᑦᒧᑦ ᖃᓄᐃᓕᐅᖃᑕᐅᔪᓂᒃ. (ᓯᑐᕆᒃ ᒑᓚᓐᑦ, ᑐᓂᔭᖓ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ)

ᖁᙱᐊᕆᐊᖅᓯᒪᔪᑦ ᓴᓂᓕᕇᒃᑑᑎᐅᓚᐅᕐᑐᑦ ᒫᓂ ᕆᓂ-ᓚᕕᐊᒃ ᐊᖅᑯᑎᒥ ᐋᒐᓯ 9-ᖑᑎᓪᓗᒍ ᑕᐅᑐᒃᖢᑎᒃ ᑕᕐᓴᖃᐅᕈᓘᔭᖅᑐᓂ ᐱᓯᒪᔪᓂ ᒪᓐᑐᕆᐊᒥ ᐳᕋᐃᑦᒧᑦ ᐱᓱᖃᑕᐅᔪᓂᒃ.

ᑖᒃᑯᐊ ᐊᖅᑯᑎᒃᑯᑦ ᐱᓱᒃᑐᐃᑦ ᐃᓄᖕᓂ ᕿᓚᐅᔾᔭᖅᑐᓂ ᓯᕗᓂᑦᑎᐊᖓᒎᓚᐅᕐᑐᑦ, ᐃᑲᔪᖅᑕᐅᓯᒪᓪᓗᑎᒃ ᑯᐸᐃᒃ ᓂᒋᐊᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᕈᓘᔭᓚᐅᕐᑐᑦ ᐅᓪᓛᖓᓂ, ᑭᐳ ᓂᕆᔭᒃᓴᐅᓂᐊᖅᑐᓂ ᐃᓕᐅᖃᐃᕝᕕᐅᓯᒪᓪᓗᓂ ᐅᕙᓂ Place du Canada ᒥᕐᖑᐃᖅᓯᕕᒃᒥᑦ ᖃᓂᒋᔭᖓᓂ ᑮᓇᐅᔭᓕᐅᕋᓱᒐᑎᒃ ᓄᓇᖃᖅᑳᖅᑐᓂᒃ ᑲᑐᔾᔨᖃᑎᒌᓂᒃ. ᓂᕆᔭᒃᓴᐅᑎᑕᐅᔪᑦ ᒪᑯᐊ ᐅᓪᓛᕈᒥᑕᒃᓴᖅ ᐳᕇᑐᔅ, ᐹᓐᑲᐃᒃᓗ ᐊᒻᒪ ᒪᓂᖕᓂ ᐊᒻᒪᓗ ᐅᒥᖕᒪᖕᓂ ᐊᒻᒪ ᐳᑕᐃᑐᓂ.

ᑖᔅᓱᒪ ᓂᕿᖃᐅᖅᑑᑉ ᖃᓂᒋᔮᓃᑦᑐᖅ ᐹᐱ ᒫᓂᖕ-ᓚᑐᒃ, ᐃᓚᒋᔭᐅᔪᖅ ᑯᐸᐃᒃ ᓂᒋᐊᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪᓗ ᒪᕐᑐᕆᐊᒦᑯᑖᓕᖅᖢᓂ, ᓯᕗᕚᖏᓪᓕ ᑭᙵᓂ ᓄᓇᖃᕐᓂᑯᐃᑦ.

“ᐃᓅᓱᒃᑑᓂᕐᓴᐅᑎᓪᓗᖓ ᑕᑯᖃᑦᑕᓗᐊᓚᐅᙱᑦᑐᖓ ᐃᓄᖕᓂ ᐳᕋᐃᑦᒥ ᐃᓚᐅᔪᓂ,” ᐅᖃᕐᑐᖅ. “ᖁᕕᐊᓇᕐᑐᖅ ᒪᒃᑯᖕᓂᕐᓴᐃᑦ ᐃᓚᐅᔪᑦ ᐳᕋᐃᑦᒥ ᑕᑯᓪᓗᒋᑦ.”

ᐅᖃᖅᖢᓂ ᑖᓐᓇ ᐃᑲᔫᑎᐅᔪᓐᓇᕋᔭᕐᒪᑦ ᐅᑭᐅᕐᑕᖅᑐᕐᒥᐅᑕᓂ ᑕᑯᖃᑦᑕᕐᓂᕐᓴᐅᔪᒪᓪᓗᓂ ᓄᓇᓕᕐᔪᐊᓃᑦᑐᓂ ᑲᙳᓱᖏᓐᓂᕐᓴᐅᓗᑎᒃ.

“ᐃᓚᖃᓚᐅᕐᑐᖓ ᐅᑭᐅᕐᑕᖅᑐᕐᒥ ᐊᖑᑎᒥ ᐊᖑᑕᐅᖃᑎᖏᓐᓅᖃᑦᑕᖅᑐᒥ, ᑖᓐᓇᓗ ᐊᑯᓂᐊᓗᒃ ᖃᐅᔨᔭᐅᑦᑕᐃᓕᓪᓗᓂ,” ᒪᓂᖕ-ᓚᑐᒃ ᐅᖃᕐᑐᖅ. “ᖃᐅᔨᒪᓕᓚᐅᕐᓯᒪᖕᒪᒡᒎᖅ ᐊᕐᕌᒍᖃᓕᖅᖢᓂ 14-ᓂ, ᐃᔨᕐᓯᒪᑐᐃᓐᓇᖅᖢᓂᐅᒃ.”

ᑕᑯᓪᓗᒋᑦ ᑯᐸᐃᒃ ᓂᒋᐊᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓚᒋᔭᐅᓚᐅᕐᑐᑦ ᐊᓯᖏᓐᓂ ᓄᓇᖃᖅᑳᖅᑐᓂᒃ ᑮᓇᐅᔭᓕᐅᕋᓱᒐᑎᒃ ᑲᑐᔾᔨᖃᑎᒌᓂ ᐳᕋᐃᑦ ᖁᕕᐊᓲᑎᐅᑎᓪᓗᒍ ᐊᒻᒪᓗ ᑐᙵᓱᒃᑎᑦᑎᔾᓂᕐᓴᐅᓪᓗᑎᒃ ᐊᒻᒪᓗ ᐃᓄᖕᓂ ᐃᓄᑑᓗᐊᖅᑰᔨᙱᖢᓂ ᓄᓇᓕᒡᔪᐊᓃᑦᑐᓂᒃ, ᐅᖃᕐᑐᖅ.

ᐱᓱᒃᑐᓂ ᐃᓄᐃᑦ ᕿᓚᐅᔾᔭᖅᑏᑦ ᓯᕗᓂᐸᓗᐊᓃᓚᐅᕐᑐᑦ ᐊᓯᖏᓐᓄᑦ ᕿᓚᐅᑎᖃᕐᒥᔪᓄᑦ ᐊᒻᒪ ᐃᙱᕐᑎᓄᑦ, ᐃᓚᖏᑦ ᒧᒥᓗᑲᑕᒃᖢᑎᒃ. ᐅᑯᐊ ᐱᓱᒃᑐᐃᑦ ᑐᙵᓱᒃᑎᑦᑎᔨᖃᓚᐅᕐᑐᑦ ᓄᓇᖃᖅᑳᖅᑐᓂᒃ ᑮᓇᐅᔭᓕᐅᕋᓱᒐᑎᒃ ᑲᑐᔾᔨᖃᑎᒌᓄᑦ ᐅᑯᓄᖓ Projet Autochtones.

ᑖᒃᑯᐊ ᐃᓄᐃᑦ ᕿᓚᐅᔾᔭᖅᑏᑦ ᒧᒥᕈᔪᑲᑕᓕᕐᒪᑕ ᖁᙱᐊᖅᑐᐃᑦ ᖁᕕᐊᒋᔭᖃᒻᒪᕆᓚᐅᕐᑐᑦ.

ᐳᕋᐃᑦ ᒪᓐᑐᕆᐊᓪ, ᑖᓐᓇᓗ ᖁᕕᐊᓲᑎᐅᑲᑕᒃᖢᓂ ᔪᓚᐃᑦ 31-ᒥ ᐋᒐᓯ 9-ᒧ, ᐅᖃᓚᐅᕐᑐᑦ ᐊᖏᓂᖅᐹᖑᓂᕋᖅᖢᒋᑦ ᐅᐃᕖᑐᑦ ᐅᖃᓪᓚᒃᑐᐃᑦ ᓄᓇᖓᓂ. ᒫᓂ 750,000 ᐅᐸᒍᑎᓯᒪᓚᐅᕐᑐᑦ ᐊᔾᔨᒌᙱᑦᑐᓄᑦ ᖃᓄᐃᓕᐅᕈᓘᔭᕐᓇᖅᑐᓄᑦ, ᐃᓚᖃᖅᖢᓂ ᑎᑕᑲᑕᒃᑐᓂᒃ, ᐊᔾᔨᓕᐅᕆᑲᑕᒃᑐᓂᒃ, ᑲᑎᒪᓯᓐᓈᖅ ᐊᔪᕈᓐᓃᖅᓴᖅᑐᓂᒃ ᐊᒻᒪ ᐅᖃᓪᓚᒃᑎᐅᑲᑕᒃᑐᓄᑦ.

ᐊᐅᔭᖅ ᐊᕐᕌᒍᓂ ᐊᕙᑎᓂ (20-ᓂ) ᐊᕐᕌᒍᓂ ᐱᓕᕆᐊᖑᓯᒪᓕᕐᑐᖅ ᒪᓐᑐᕆᐊᓪᒥᓐ.