ᐃᖃᓗᖕᓂᕐᒥᐅᑕᖅ ᐊᕐᓇᖅ ᐃᑲᔫᑎᒃᓴᓂ ᐱᓇᓱᓕᕐᐳᖅ ᔮᓐ ᐊᒪᕈᐊᓕᒃᒥᑦ ᑲᒪᒋᔭᐅᔾᔪᑎᒃᓴᓂᒃ
ᐅᑯᐊ GoFundMe ᐃᑲᔫᑎᓂ ᐱᔪᒪᔾᔪᑎ ᕿᓂᕐᒪᑕ $50,000-ᓂ ᑖᓐᓇᓗ ᐃᑲᔫᑎᒃᓴᖅ ᐊᑐᕐᑕᐅᓇᔭᖅᖢᓂ ᑕᖅᑭᓪᓗᐊᓂ ᐱᖓᓱᓂ ᑲᒪᒋᔭᖃᕐᓂᕐᒧᑦ
ᔮᓐ ᐊᒪᕈᐊᓕᒃ, ᐊᔾᔨᖃᕐᑐᖅ ᐅᕙᓂ ᐊᔾᔨᖁᑎᒋᔭᐅᔪᓂ ᐋᑐᕚᒥ, ᐃᓅᓂᖓᓂ ᓄᓇᕗᒦᑦᑐᒪᓂᕋᖅᖢᓂ ᐱᖃᓐᓇᖏᓐᓂ ᐊᒻᒪ ᐃᓚᖏᓐᓂ. ᐃᓚᒋᔭᐅᔪᑦ ᐃᑲᔪᖁᔨᖕᒪᑕ ᓄᓇᕗᒥᑦ ᒐᕙᒪᒃᑯᓐᓂ ᐋᓐᓂᐊᕐᓂᕐᒧᑦ ᑲᒪᒋᔭᐅᔾᔪᑎᒋᔭᕆᐊᖃᖅᑕᖏᓐᓄ ᐊᒻᒪ ᐃᒡᓗᖃᖅᑎᑕᐅᓂᖓᓂ. (ᐊᔾᔨᙳᐊᖁᑎᖓ ᔪᐊᔾ ᐋᓐᑑᓐᔅ)
For the English version of this story, please see Iqaluit resident starts fundraiser to support John Amagoalik’s care in Nunavut.
ᖃᕋᓴᐅᔭᒃᑯᑦ ᑮᓇᐅᔭᓂ ᐃᑲᔫᑎᒃᓴᓂ ᐱᔪᒪᕝᕕᒃ ᑮᓇᐅᔭᓂ ᑲᑎᕐᓱᐃᓇᓱᖕᒪᑕ ᐋᓐᓂᐊᕕᖕᒥ ᑲᒪᒋᔭᐅᔾᔪᑎᒃᓴᖏᓐᓂ ᔮᓐ ᐊᒪᕈᐊᓕᒃ, ᐊᒥᓱᓄᑦ ᓄᓇᕗᒥᑦ ᑕᐃᔭᐅᕙᒃᑐᖅ “ᐊᑖᑕᒋᔭᐅᔪᖅ ᓄᓇᕗᒥᑦ.”
ᐊᒪᕈᐊᓕᒃ, 78, ᑲᒪᒋᔭᐅᑲᑕᓚᐅᕐᓯᒪᔪᖅ ᐊᒻᐸᓯ ᕕᐊᑦᒥ ᐊᑯᓂᕈᓗ ᑲᒪᒋᔭᖃᕐᕕᒃᒥ ᐋᑐᕚᒥ ᐱᓚᒃᑕᐅᓚᐅᕐᓯᒪᑎᓪᓗᒍ ᓂᐅᖓᑕ ᐱᖃᑖᑕ ᐃᓚᖓᒍᑦ. ᑕᐃᑲᓂᓕ ᑭᐱᙳᖃᑦᑕᓚᐅᕐᑐᖅ, ᐅᖃᓚᐅᕐᓯᒪᔪᖅ, ᐊᒻᒪ ᐅᑎᕈᒪᓕᕐᓂᖓᓂ ᓄᓇᕗᒧᑦ ᐊᕐᕌᒍᒐᓴᖕᓂ ᓴᖅᑭᑎᓐᓇᓱᒃᓯᒪᔭᖓᓂ ᓄᓇᑖᕋᓱᖕᓂᕐᒧᑦ ᐋᔩᖃᑎᖃᑲᑕᖅᖢᓂ.
ᔫᓂᒥ ᐅᑎᓚᐅᕐᓯᒪᔪᖅ ᐃᑲᔪᖅᑕᐅᓪᓗᓂ ᑮᓇᐅᔭᑎᒍ ᐱᖃᓐᓇᕆᔭᖏᓐᓂᒃ ᐊᒻᒪ ᐃᓚᖏᓐᓂ ᐃᑲᔫᑎᑖᕋᓱᖕᓯᒪᓂᖏᓐᓄᑦ. ᑭᓯᐊᓂᓕ ᑖᓐᓇ ᑮᓇᐅᔭᖅ ᓄᖑᓕᕐᒪᑦ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᖏᓐᓂ ᐃᑲᔫᕈᒪᙱᑎᓪᓗᒋᑦ ᒫᓂ $16,000-ᑖᓚᖏᓐᓂ ᐃᑲᔫᑎᒃᓴᐅᖁᔭᐅᔪᓂᒃ ᑕᖅᑭᕐᒧᑦ ᑲᒪᒋᔭᐅᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᐊᒻᒪ ᐃᒡᓗᖓᓄᑦ ᐱᔭᕆᐊᖃᖅᑕᖏᓐᓂ ᐃᓅᓂᖓᓂ ᐊᑐᕈᒪᔭᖓᓄ ᐊᖏᕐᕋᖓᓂ.
ᐃᖃᓗᖕᓂ ᓄᓇᖃᕐᑐᖅ ᔭᓯᑲ ᕼᐃᐊᓪ, ᐃᒻᒥᓂ ᓇᓗᓇᐃᕐᓯᒪᔪᖅ ᐅᕘᓇ GoFundMe ᐃᑲᔫᑎᓂ ᐱᔪᒪᔾᔪᑎᒃᑯ ᖃᓪᓗᓈᖑᒐᓗᐊᖅᖢᓂ ᐃᓱᒪᒋᔭᖃᒻᒪᕆᖕᓂᕋᖅᖢᓂ ᐃᓅᓯᕐᒧᑦ ᐊᑐᕆᐊᖃᖅᑐᓂᒃ, ᐱᒋᐊᖅᑎᑦᑎᓚᐅᕐᑐᖅ ᑮᓇᐅᔭᓂ ᐃᑲᔫᑎᒃᓴᓂ ᐱᔪᒪᓂᕐᒥ ᐊᒻᒪ ᐋᖅᑭᒃᓯᓯᒪᓪᓗᓂ ᑎᑭᑎᑦᑎᓇᓱᖕᓂᖓᓂ ᒪᐅᖓ $50,000-ᓂ. ᑎᑭᑉᐸᓪᓕ ᑖᓐᓇ ᐃᑲᔫᑎ ᑕᖅᑭᓂ ᐱᖓᓱᓪᓗᐊᓂ ᐊᑐᖅᑕᐅᔪᓐᓇᕋᔭᖅᑐᖅ ᑲᒪᒋᔭᐅᓂᖓᓄᑦ.
“ᔮᓐ ᐊᒪᕈᐊᓕᒃ ᐊᕐᕌᒍᑦ 25 ᐅᖓᑖ ᐃᓅᓯᖓᓂ ᓄᓇᕗᒥᑦ ᓴᖅᑭᑎᑦᑎᓇᓱᓚᐅᕐᑐᖅ,” ᕼᐃᐊᓪ ᑎᑎᕋᕐᓯᒪᓚᐅᕐᑐᖅ ᐅᕘᓇ GoFundMe ᒪᒃᐱᒐᖓᒍᑦ.
ᐅᓇ ᐃᑲᔫᑎᒃᓴᓂ ᐱᔪᒪᔾᔪᑎ ᑮᓇᐅᔭᓂ ᑐᓂᔭᐅᓯᒪᓕᕐᑐᖅ $5,400 ᓇᒡᒐᔾᔭᐅᓚᐅᕐᑑᑉ ᐅᓪᓛᖓᓂ ᐊᒻᒪ ᓴᖅᑭᑎᑕᐅᓯᒪᓕᖅᖢᓂ ᓯᑎᐱᕆ 18-ᖑᑎᓪᓗᒍ.
ᐊᒪᕈᐊᓕᒃ ᐋᓐᓂᐊᖃᕐᓇᙱᑦᑐᓕᕆᔨᓂ ᐃᖅᑲᖅᑐᐃᕕᒃᑯᑦ ᐱᓕᕆᐊᕆᔭᐅᑎᑦᑎᓇᓱᓕᓚᐅᕐᑐᖅ, ᒪᓕᒐᕐᓂ ᕿᒥᕐᕈᐊᖁᔨᓯᒪᓂᕐᒥ ᖃᓄᐃᒻᒪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᑲᔪᕈᒪᙱᓐᓂᖏᓐᓂ ᑲᒪᒋᔭᐅᓂᖓᓄᑦ.
ᓯᑏᕝ ᑲᓕᕼᐅ, ᐊᒪᕈᐊᓕᐅᑉ ᐅᖃᕐᑎᒋᔭᖓ ᐱᖃᓐᓇᕆᓪᓗᓂᐅᒡᓗ ᐊᒻᒪ ᓗᐊᐃᔭᐅᓪᓗᓂ ᐅᖃᓚᐅᕐᑐᖅ ᕼᐃᐊᓪ ᐱᖃᓐᓇᕆᔭᐅᓂᖓᓂ ᐋᓐ ᑯᕌᕗᑦᒧᑦ, ᐃᑲᔪᖃᑕᐅᖕᒥᔪᖅ ᐃᖃᓗᖕᓂ ᑮᓇᐅᔭᓂ ᐱᕈᖅᑎᑦᑎᓇᓱᒃᑐᓂ ᐊᒪᕈᐊᓕᒃᒧᑦ.
“ᐅᖄᓚᕝᕕᐅᑲᑕᒃᑲᒪ ᑭᒃᑯᓕᒫᓂ ᑲᓇᑕᒥ ᐃᑲᔪᕈᒪᔪᓂᒃ,” ᐅᖃᕐᑐᖅ ᒫᒃ ᓯᑕᐃᐅᔅ, ᐱᖃᓐᓇᕆᔭᐅᖕᒥᔪᖅ ᔮᓐ ᐊᒪᕈᐊᓕᒃᒧᑦ. ᐅᖃᖅᖢᓂ ᖁᔭᓕᔪᕉ ᐃᓄᖕᓄᑦ ᐃᑲᔫᑎᓂ ᑐᓂᓯᑲᑕᒃᑐᓄᑦ ᐅᕗᖓ GoFundMe.
“ᐅᓇ ᐱᓕᕆᐊᖑᓂᐊᕐᑐᖅ ᑭᓯᐊᓂ ᓄᓇᕗᒥ ᒐᕙᒪᒃᑯᑦ ᑕᒪᑐᒥᖓ ᐃᓱᒪᑦᑎᐊᕐᓂᕐᓴᐅᓕᕐᐸᑕ.”
ᐊᒪᕈᐊᓕᒃ ᓗᐊᐃᔭᕆᔭᖓ ᑕᒪᑐᒥᖓ ᐱᓕᕆᐊᕆᔭᐅᓵᓕᖁᔨᔪᖅ ᐊᓯᐊᒍᑦ ᐃᖅᑲᖅᑐᐃᕕᒃᑰᖓᔪᓂᒃ ᑖᓐᓇ ᐊᒪᕈᐊᓕ ᐃᑲᔪᖅᑕᐅᓵᓕᓂᕐᓴᐅᔪᓐᓇᕐᓂᐊᕐᒪᑦ ᐋᓐᓂᐊᖅᑐᓕᕆᓂᒃᑯᑦ ᐊᒻᒪ ᐃᒡᓗᖃᖅᑎᑕᐅᓂᖓᒍᑦ.
(0) Comments