ᑰᔾᔪᐊᕐᒥ ᐃᓄᑐᖃᕐᓄᑦ ᐊᖏᕐᕋᖓᓂ ᐃᒡᓗᖃᖅᑏᑦ ᓅᑕᐅᕗᑦ ᒪᓐᑐᕆᐋᓪᒧᑦ

ᐃᒡᓗᖃᖅᑎᐅᔪᑦ ᑰᔾᔪᐊᑉ ᑐᓵᔨᐊᐱᒃ ᐃᓄᑐᖃᕐᓄᑦ ᐊᖏᕐᕋᖓᓂ ᓅᑕᐅᕗᑦ ᓇᖕᒥᓂᕆᔭᐅᔪᒥ ᐃᒡᓗᖁᑎᒋᔭᐅᔪᒥ ᒪᓐᑐᕆᐋᓪ ᓯᓚᑎᑦᑎᐊᖓᓂ 1,500 ᑭᓛᒥᑐᓄᑦ ᓂᒋᕐᒧᑦ.

ᓅᑕᐅᓂᖓ, ᑭᐅᓂᕐᒥ ᐱᔭᕆᑐᔪᓄᑦ ᐊᑲᐅᙱᓕᐅᕈᑕᐅᔪᓄᑦ ᐃᒡᓗᕐᔪᐊᒥ, ᐅᖃᐅᓯᐅᓚᐅᖅᐳᖅ ᑲᑐᔾᔭᐅᔪᒥ ᐅᖃᐅᓯᒃᓴᓕᐊᖑᔪᒥ ᓯᑎᐱᕆ 30−ᒥ ᐊᒻᒪ ᐊᑎᓕᐅᖅᑕᐅᓪᓗᓂ ᓕᐊᕆ ᐅᐊᑦᒧᑦ, ᐅᖓᕙ ᑐᓚᑦᑕᕕᒃ ᐋᓐᓂᐊᕕᖓᓂ ᐃᓱᒻᒥᖅᑐᐃᔨᖓᓂ; ᐊᒻᒪᔭᓇᕗ ᒥᐅᓂᒃ−ᐅᐊᑦᑭᓐᔅ, ᓄᓇᕕᖕᒥ ᐊᕕᒃᑐᖅᓯᒪᓂᐅᔪᓂ ᑲᑎᒪᔨᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ ᐃᓱᒻᒥᖅᑐᐃᔨᖓᓐᓂ.

“ᓅᑕᐅᓂᐅᔪᑦ ᐱᒋᐊᖅᓯᒪᕗᑦ ᐊᒻᒪ ᑲᔪᓯᓂᐊᖅᐳᑦ ᑭᓯᐊᓂ ᑕᒪᒃᑭᑦ ᐃᒡᓗᖃᖅᑎᐅᔪᑦ ᐊᑦᑕᓇᙱᑦᑐᒥ ᓅᑕᐅᕌᓂᒃᐸᑕ,” ᑐᓴᒐᒃᓴᓕᐊᖅ ᐅᖃᖅᓯᒪᕗᖅ.

ᓅᑕᐅᓂᖓ ᐃᓚᒋᔭᐅᕗᖅ ᐱᖓᓱᐃᓕᖓᔪᒥ ᐊᖏᕈᑕᐅᔪᒥ ᐃᓚᖃᕐᒥᔪᒥᒃ Argyle Inc.−ᑯᑦ ᐊᑯᓂᐅᔪᒥ ᐃᒡᓗᖃᖅᑎᑦᑎᓂᕐᒥ ᐊᒻᒪ ᐸᖅᑭᕝᕕᐅᔪᒥ, ᓇᖕᒥᓂᕆᔭᐅᔪᒥ ᐃᓄᑐᖃᕐᓄᑦ ᐊᖏᕐᕋᐅᔪᒥ ᒪᓐᑐᕆᐋᓪ ᓯᓚᑎᑦᑎᐊᖓᓂ ᐳᐊᐃᓐᑦ ᑭᓕᐊᕐᒥ.

“ᐊᖏᕈᑎ ᑐᕌᕋᓱᐊᖅᐳᖅ ᑐᓂᓯᓂᕐᒥ ᐊᑦᑕᓇᙱᑦᑐᒥ, ᐸᖅᑭᑦᑎᐊᖅᑐᒥ ᐊᒻᒪ ᐃᓕᖅᑯᓯᒧᑦ ᐊᒃᑐᐃᓂᖃᕐᓂᖓᓂ ᐆᒪᓂᕐᒧᑦ ᐊᕙᑎᐅᔪᒥ, ᐃᓚᖃᖅᑐᒥ ᐃᓛᓐᓂᓚᐅᓱᖓᕐᒥ ᐊᑐᐃᓐᓇᖃᕐᓂᕐᒥ ᐱᖅᑯᓯᑐᖃᖅᑎᒍᑦ ᓂᕿᓂᑦ ᐊᒻᒪ ᐃᑲᔪᖅᓱᐃᓂᕐᒥ ᐱᖓᓱᓂ ᐃᓄᖕᓂ ᐃᖅᑲᓇᐃᔭᖅᑎᐅᔪᓂ,” ᐅᖃᐅᓯᒃᓴᓕᐊᖑᔪᖅ ᑲᔪᓯᕗᖅ.

ᑕᒪᒃᑭᑦ ᐃᒡᓗᖃᖅᑎᐅᔪᑦ ᓅᑕᐅᒍᑎᒃ, ᑐᓵᔨᐊᐱᒃ ᒪᑐᓂᐊᖅᐳᖅ.

ᐅᐊᑦ ᐊᒻᒪ ᒥᐅᓂᒃ-ᐅᐊᑦᑭᓐᔅ ᑕᒪᒃᑭᑦ ᐊᐅᓪᓚᖅᓯᒪᓚᐅᖅᐳᑦ ᓄᓇᓕᖕᓂ ᐅᒃᑐᐱᕆ 1−ᒥ ᐊᒻᒪ ᐅᖃᐅᓯᒃᓴᓕᐅᕈᓐᓇᙱᖦᖢᑎᒃ, ᐃᖅᑲᓇᐃᔭᖅᑎᐅᔪᑦ ᐱᓕᕆᕝᕕᖓᑕ ᑲᑐᔾᔨᖃᑎᒌᖑᔪᓂ ᐅᖃᓚᐅᖅᐳᑦ.

ᑰᔾᔪᐊᕐᒥ, ᓯᕗᓪᓕᐅᔪᒥ ᖃᐅᔨᓴᖅᑕᐅᓂᐅᔪᒥ ᐱᓕᕆᐊᖑᕙᓪᓕᐊᕗᖅ ᖃᐅᔨᓴᕐᓂᕐᒥ ᐱᔪᓐᓇᕋᔭᕐᓂᖓᓂ ᐊᒻᒪ ᐊᖏᓂᖓᓂ ᑎᑭᑎᑦᑎᓂᕐᒥ ᑐᓵᔨᐊᐱᖕᒥ ᒫᓐᓇᐅᔪᒧᑦ ᐊᑐᒐᒃᓴᐃᑦ ᐋᖅᑭᒃᑕᐅᓯᒪᓂᖓᓐᓄᑦ, ᑐᓴᒐᒃᓴᓕᐊᖅ ᐅᖃᓚᐅᖅᐳᖅ. ᐊᑭᖓᓂ ᓇᓚᐅᑦᑖᕆᔭᐅᓂᐅᔪᒥ ᓂᕆᐅᒋᔭᐅᕗᖅ ᖃᖓᒃᑲᓐᓂᖅ ᑕᒪᑐᒪᓂ ᐅᑭᐅᖑᔪᒥ.

ᑐᓵᔨᐊᐱᒃ ᐊᑐᕐᓂᖃᓚᐅᖅᐳᑦ “ᐱᔭᕆᑐᔪᓂ” ᐊᑲᐅᙱᓕᐅᕈᑕᐅᔪᓄᑦ ᐃᒡᓗᕐᔪᐊᑉ ᐅᖅᑰᓴᐅᑎᖏᓐᓄᑦ ᐱᓕᕆᔾᔪᓯᐅᔪᒥ, ᐱᑎᑦᑎᔪᒥ ᐊᐅᓚᑦᑎᔨᐅᔪᓂ ᕿᓂᕐᓂᕐᒧᑦ ᓅᑕᐅᓂᕐᒧᑦ ᓂᕆᐅᒐᒃᓴᐅᔪᓂ ᐊᐃᑉᕆᓕᒥ 13−ᓄᑦ ᐃᓄᑐᖃᕐᓄᑦ, 10−ᖑᔪᑦ ᐅᓂᒃᑳᕆᔭᐅᓚᐅᖅᑐᓂ ᑕᐃᔅᓱᒪᓂ ᑲᐃᓪᓗᐊᕈᑎᓃᑦᑐᓂ ᐅᕝᕙᓘᓐᓃᑦ ᐃᒡᓕᖕᒦᖏᓐᓇᖅᑐᓂ.

ᐅᐱᕐᙶᖑᓚᐅᖅᑐᒥ, ᐃᓄᑐᖃᕐᓄᑦ ᐊᖏᕐᕋᕆᔭᐅᔪᖅ ᐃᖅᑲᓇᐃᔭᖅᑎᖃᓚᐅᖅᐳᑦ 35−ᓂ ᐃᖅᑲᓇᐃᔭᖅᑎᓂ, ᐃᓚᖃᖅᑐᒥ ᐃᓗᐊᖅᓴᐃᔨᓂᑦ, ᐃᓄᓕᕆᔨᓂᑦ ᐊᒻᒪ ᓇᖕᒥᓂᖅ ᐸᖅᑭᔨᐅᔪᓂᑦ.