ᐊᕐᕕᐊᒥᑦ ᐃᓕᓴᐃᔨ ᐱᕗᖅ ᑲᓇᑕᓕᒫᒥ ᐃᓕᓐᓂᐊᖅᑎᑦᑎᓂᕐᒧᑦ ᓵᓚᖃᐅᓯᐊᖑᔪᒥ
ᓯ-ᓯ ᐊᕆᓐᓯ ᐅᖃᓪᓚᒃᐳᖅ ᓴᓇᓂᕐᒥ ᐱᓕᕆᖃᑎᒌᖕᓂᐅᔪᒥ ᐃᓕᓐᓂᐊᖅᑎᓂᑦ ᐊᒻᒪ ᐃᓄᑐᖃᕐᓂ ᓄᓇᓕᖕᓂ
ᓯ-ᓯ ᐊᕆᓐᓯ ᐃᓕᓴᐃᔨᓄᑦ ᐊᖓᔪᖅᑳᖑᖃᑕᐅᕗᖅ ᐊᒻᒪ ᐃᓕᓴᐃᔨᐅᕗᖅ ᔮᓐ ᐊᕐᓇᓗᒃᔪᐊᖅ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐊᕐᕕᐊᓂᑦ. ᑕᒪᑐᒪᓂ ᐊᕐᕌᒎᔪᒥ ᐱᕗᖅ ᑲᓇᑕᒥ ᐊᖓᔪᖅᑳᕐᔪᐊᖓᓂ ᓵᓚᖃᐅᓯᐊᖑᔪᒥ ᐃᓕᓐᓂᐊᖅᑎᑦᑎᓂᕐᒧᑦ ᐱᐅᓂᖅᐹᖑᔪᒥ. (ᓯ-ᓯ ᐊᕆᓐᓯᐅᑉ ᐊᔾᔨᖁᑎᖓ)
For the English version of this story, please see ‘We do real work here’: Arviat educator receives national teaching award.
ᐊᕐᕌᒍᑦ 20 ᐅᖓᑖᓂ ᐊᕐᕕᐊᓂᑦ, ᔮᓐ ᐊᕐᓇᓗᒃᔪᐊᖅ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓴᐃᔨᓄᑦ ᐊᖓᔪᖅᑳᖑᖃᑕᐅᔪᖅ ᐊᒻᒪ ᐃᓕᓴᐃᔨ ᓯ-ᓯ ᐊᕆᓐᓯ ᐃᓕᓴᕆᔭᐅᕗᖅ ᑲᓇᑕᓕᒫᒥ ᓵᓚᖃᐅᓯᐊᖑᔪᒥ ᑐᕌᒐᖃᕐᓂᖓᓂ ᐃᓕᓐᓂᐊᖅᑐᓕᕆᓂᕐᒧᑦ.
ᐃᓱᒪᑐᓂᕐᒥ, ᖃᐅᔨᓴᕐᓂᕐᒥ ᐊᒻᒪ ᐱᕙᓪᓕᐊᔪᓕᕆᓂᕐᒥ ᑲᓇᑕᒥ ᐅᖃᐅᓯᖃᓚᐅᖅᐳᖅ 2026−ᒥ ᑲᓇᑕᒥ ᐊᖓᔪᖅᑳᕐᔪᐊᖓᓂ ᓵᓚᖃᐅᓯᐊᖑᔪᒥ ᑐᓂᔭᐅᔪᓂ ᐅᒃᑐᐱᕆ 5−ᒥ ᑐᓴᒐᒃᓴᓕᐊᖑᔪᒥ, ᐊᑦᑎᖅᓯᔪᒥ ᐊᕆᓐᓯᒥ ᐱᓂᖓᓂ ᓵᓚᖃᐅᓯᐊᒥᒃ ᐃᓕᓐᓂᐊᖅᑎᑦᑎᓂᕐᒧᑦ ᐱᐅᓂᖅᐹᖑᔪᒥ.
“ᐃᒃᐱᒍᓱᑦᑎᐊᕐᓂᐅᕗᖅ ᐅᕙᓐᓄᑐᐊᖑᙱᑦᑐᖅ, ᑭᓯᐊᓂ ᐃᒃᐱᒍᓱᑦᑎᐊᕐᓂᐅᒋᕗᖅ ᐃᓕᓐᓂᐊᖅᑎᓐᓄᑦ ᐊᒻᒪ ᐊᒥᓱᓄᑦ ᐃᓄᖕᓄᑦ ᐱᓕᕆᖃᑎᒋᔭᓐᓂ ᔮᓐ ᐊᕐᓇᓗᒃᔪᐊᖅ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ,” ᐅᖃᓚᐅᖅᐳᖅ. “ᐃᒃᐱᒍᓱᖕᓂᐅᕗᖅ, ‘ᐃᓕᓐᓂᐊᕐᕕᓪᓚᕆᐅᔪᒍᑦ. ᐱᓕᕆᓂᖃᓪᓚᕆᒃᐸᒃᐳᒍᑦ ᐅᕙᓂ.’”
ᐃᓕᓐᓂᐊᖅᑎᑦᑎᓚᐅᖅᑳᕋᓂ ᐊᕐᕕᐊᓂᑦ, ᐊᕆᓐᓯ ᐃᓕᓐᓂᐊᖅᑎᑦᑎᕙᓚᐅᖅᐳᖅ ᓴᔅᑳᑦᓱᐊᓐᒥ. ᓅᕋᑖᖅᑎᓪᓗᒍ ᐅᑭᐅᖅᑕᖅᑐᒧᑦ, ᐅᖃᓚᐅᖅᐳᖅ ᐅᔾᔨᕈᓱᓚᐅᖅᐳᖅ ᑐᕌᒐᕆᔭᖓ ᐃᓕᓐᓂᐊᖅᑐᓕᕆᓂᕐᒧᑦ ᐊᓯᔾᔨᕆᐊᖃᕐᓂᖓᓂ ᐱᐅᓂᖅᓴᐅᔪᒥ ᐱᔨᑦᑎᕋᕐᓂᕐᒧᑦ ᓄᓇᕗᒻᒥᐅᓂ. ᑕᐃᒫᒃ ᑕᐅᑐᒃᑕᑐᐊᖃᑲᐃᓐᓇᓕᓚᐅᖅᐳᖅ ᐱᕈᖅᓴᐃᓂᕐᒥ ᐱᓕᕆᖃᑎᒌᖕᓂᐅᔪᒥ ᐃᓕᓐᓂᐊᖅᑎᓂᑦ ᐊᒻᒪ ᓄᓇᓕᖕᒥᑦ.
“ᐱᕈᖅᓴᐃᑎᓪᓗᖓ ᐅᑯᓇᓂ ᐱᓕᕆᖃᑎᒌᖕᓂᐅᔪᓂ ᑖᒃᑯᓂᖓ, ᐅᒃᐱᕈᓱᖕᓂᖅᓴᐅᓕᖅᐳᑦ ᐅᕙᓐᓂᑦ ᐊᒻᒪ ᐊᒥᓱᓂ ᑐᓂᓯᕗᑦ ᐃᑲᔪᕈᑎᒃᓴᓂ ᖃᓄᖅ ᐊᑐᕐᓂᕐᒥ ᐃᓄᐃᑦ ᐃᓕᖅᑯᓯᖓᓐᓂ ᐱᓕᕆᓂᐅᔪᓂ ᐃᓕᓴᐃᓂᓐᓂᑦ,” ᐊᕆᓐᓯ ᐅᖃᓚᐅᖅᐳᖅ.
ᐱᓕᕆᖃᑎᖓ ᐊᒻᒪ ᐱᖃᓐᓇᕆᔭᖓ ᐹᑎ ᔮᓐᔅᑕᓐ, ᐃᓕᓴᐃᔨᒻᒪᕆᖕᓄᑦ ᐃᑲᔪᖅᑎ ᐊᒻᒪ ᖃᐅᔨᓴᕐᓂᕐᒧᑦ ᐱᐅᓂᖅᐹᖑᔪᒥ ᐃᒃᓯᕙᐅᑕᖓ ᓯᓚᑦᑐᖅᓴᕐᕕᒡᔪᐊᒥ ᑭᐊᔾᒍᕆᒥ, ᓂᕈᐊᓚᐅᖅᐳᖅ ᐊᕆᓐᓯᒥ ᓵᓚᖃᐅᓯᐊᒃᓴᒧᑦ.
ᔮᓐᔅᑕᓐ ᐃᒻᒥᓂᒃ ᐅᖃᐅᓯᖃᓚᐅᖅᐳᖅ ᐊᕆᓐᓯᒧᑦ 2023−ᒥ ᐊᕐᕕᐊᓃᑎᓪᓗᒍ ᖃᐅᔨᓴᕐᓂᕐᒧᑦ ᐱᓕᕆᐊᒃᓴᐅᔪᒧᑦ. ᐅᐸᒃᑐᓚᐅᖅᐳᖅ ᐊᕆᓐᓯᒧᑦ ᐃᑲᔪᕐᓂᕐᒧᑦ ᑲᑎᖃᑎᖃᕐᓂᕐᒥ ᒪᒃᑯᒃᑐᓂ ᓄᓇᓕᖕᓂ.
“ᒪᑐᐃᖓᕐᔪᐊᖅᐳᖅ ᐊᒻᒪ ᐱᒧᒪᓂᖃᑦᑎᐊᖅᖢᓂ ᐃᓕᓐᓂᐊᖅᑐᓕᕆᓂᕐᒥ, ᐊᒻᒪ ᐊᑕᐅᓯᐅᓪᓗᓂ ᐃᓅᕗᖅ ᐃᓱᒪᐃᓐᓇᐅᔭᖅᑐᒥ: ᖃᓄᐃᓕᐅᕈᓐᓇᖅᐳᖓ ᒪᒃᑯᒃᑐᓄᑦ? ᐱᔨᑦᑎᕋᑦᑎᐊᒃᑲᓐᓂᕈᓐᓇᖅᐳᖓ ᑕᐃᒃᑯᓄᖓ? ᖃᓄᐃᓕᐅᒃᑲᓐᓂᕈᓐᓇᖅᐳᖓ?” ᔮᓐᔅᑕᓐ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.
ᐊᕆᓐᓯ ᐃᓕᓐᓂᐊᖅᑎᑦᑎᕙᒃᐳᖅ ᐃᓕᓐᓂᐊᕈᑎᓕᐅᖅᑕᐅᓯᒪᔪᓂ ᑭᓯᐊᓂ ᐃᑲᔪᓲᖑᒋᕗᖅ ᒪᒃᑯᒃᑐᓂ ᐱᕈᖅᓴᐃᓂᖏᓐᓂ ᐃᓅᓯᕐᒥ ᐊᔪᙱᓐᓂᐅᔪᓂ, ᐃᒻᒥᓂᒃ ᐅᒃᐱᕈᓱᓕᕐᓂᕐᒥ ᐊᒻᒪ ᓴᙱᔪᒥ ᐃᒃᐱᒍᓱᖕᓂᐅᔪᒥ ᐅᐱᒋᔭᖃᕐᓂᕐᒥ. ᓇᒃᓴᓲᖑᕗᖅ ᐃᓄᑐᖃᕐᓂ ᐳᓚᕋᕐᓂᕐᒧᑦ ᐃᓕᓐᓂᐊᕐᕕᐊᕈᓯᕐᓄᑦ, ᐊᔭᐅᕆᓪᓗᓂ ᐊᑐᕐᓂᕐᒥ ᐃᓄᒃᑎᑐᒻᒥ ᐃᓕᓐᓂᐊᕐᕕᐊᕈᓯᕐᒥ ᐊᒻᒪ ᐊᐅᓚᑦᑎᓪᓗᓂ ᐃᓕᖅᑯᓯᒧᑦ ᑕᐅᖅᓰᓂᐅᔪᒥ ᐃᓚᒋᔭᐅᔪᓂ Splatsin ᐊᓪᓚᓄᑦ ᐃᑦᑐᐱ, B.C−ᒥ.
ᔮᓐᔅᑕᓐ ᐅᖃᐅᓯᖃᓚᐅᖅᐳᖅ ᐊᕆᓐᓯ ᓴᐳᔾᔨᔨᐅᓂᕐᒥ ᐋᖅᑭᒃᓱᐃᔨᐅᓂᖃᙱᓚᖅ.
“ᐃᖅᑲᓇᐃᔮᖓᓂ ᐱᕐᔪᐊᖑᒋᕙᖓ, ᐊᒻᒪ ᐱᓕᕆᓲᖑᕗᖅ [ᐃᓕᓐᓂᐊᖅᑎᓂᑦ] ᐃᒃᐱᒍᓱᕐᔪᐊᕐᓂᖃᖅᑐᒥ, ᐊᒻᒪ ᑕᐃᒪᓐᓇᑦᑕᐅᖅ ᐱᓕᕆᐊᖑᓲᖑᒋᕗᖅ. ᐱᐅᕐᔪᐊᖅᖢᓂ ᐱᓕᕆᖃᑎᒌᖕᓂᑦᑎᐊᕙᐅᕗᖅ,” ᔮᓐᔅᑕ ᐅᖃᓚᐅᖅᐳᖅ.
ᐊᕆᓐᓯ ᑐᕌᖓᓂᖃᕆᕗᖅ ᐱᓕᕆᐊᖓᓂ ᐃᓕᓐᓂᐊᕌᓂᒃᑳᖓᑕ. ᑲᒪᒋᔭᖃᓲᖑᕗᖅ ᐅᖁᒪᐃᓐᓂᕐᒧᑦ ᐃᓕᓐᓂᐊᕐᕕᐊᕈᓯᕐᓂ ᐊᕐᓇᓄᑦ ᐃᓕᓐᓂᐊᖅᑎᓄᑦ ᐃᑲᔪᖅᑕᐅᓪᓗᓂ ᐃᓄᖕᓂ ᐃᖅᑲᓇᐃᔭᖅᑎᐅᔪᓂ.
“ᑕᑯᖅᑯᔾᔨᔪᒪᕗᖓ ᐃᓕᓐᓂᐊᖅᑎᓐᓂᑦ, ᐅᐱᒍᓱᖁᕙᒃᑲ ᑎᑭᐅᑎᓯᒪᔪᓐᓇᖅᑕᖏᓐᓂ, ᐅᐱᒍᓱᖁᕙᒃᑲ ᖃᓄᐃᓕᐅᕐᓂᖏᓐᓂ,” ᐊᕆᓐᓯ ᐅᖃᓚᐅᖅᐳᖅ.
ᑕᐃᒪᙵᓂ ᓴᖅᑭᑎᑕᐅᓂᖓᓂ 1994−ᒥ, ᑲᓇᑕᒥ ᐊᖓᔪᖅᑳᕐᔪᐊᖓᓂ ᓵᓚᖃᐅᓯᐊᖑᔪᓂ ᐅᐱᒍᓱᒃᓯᒪᕗᑦ ᐅᓄᕐᓂᖅᓴᐅᔪᓂ 2,300−ᓂ ᑲᓇᑕᒥ ᐃᓕᓴᐃᔨᐅᔪᓄᑦ, ᐅᖃᐅᓯᐅᓪᓗᓂ ᐃᓱᒪᑐᓂᕐᒥ, ᖃᐅᔨᓴᕐᓂᕐᒥ ᐊᒻᒪ ᐱᕙᓪᓕᐊᔪᓕᕆᓂᕐᒥ ᑲᓇᑕᒥ ᐅᖃᐅᓯᒃᓴᓕᐊᖑᔪᒥ.
ᑕᒪᑐᒪᓂ ᐊᕐᕌᒎᔪᒥ 60−ᓂ ᐱᔪᖃᓚᐅᖅᐳᖅ 221−ᓂ ᓂᕈᐊᖅᑕᐅᓂᐅᔪᓂ.
(0) Comments