ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓱᒪᓕᐅᕆᓇᓱᒃᑐᑦ ᐃᖃᓗᐃᑦ ᓄᒃᑭᒃᓴᐅᑎᒃᑯᓐᓂ ᐱᒋᐊᖁᔨᕗᑦ ᕿᒥᕐᕈᐊᖅᑕᐅᓚᐅᙱᑎᓪᓗᒍ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᐊᒥ ᐃᑲᔪᖅᑐᐃᓯᒪᔪᑦ; ᐅᖃᕐᑐᑦ ᖃᓄᐃᓕᐅᕈᑎᐅᔪᒪᔪᑦ ᐋᖅᑭᒋᐊᕈᑎᐅᔪᒪᔪᑦ ᓇᓗᓇᕈᔪᖕᓂᖏᓐᓂ
ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ (NIRB) ᐃᓱᒪᓕᐅᕆᓇᓱᒃᑐᑦ ᐅᑯᐊ ᐃᖃᓗᐃᑦ ᓄᒃᑭᒃᓴᐅᑏᑦ (Hydro Project), ᐃᓂᒋᓇᔭᖅᑕᖓ ᐅᕙᓂ ᓴᖅᑭᔮᖅᑐᑦ ᑰᒑᓘᒃ ᓴᓂᐊᓃᓪᓗᓂ, ᐱᒋᐊᖁᔨᓪᓗᑎᒃ ᕿᒥᕐᕈᐊᖅᑕᐅᓚᐅᙱᒃᑲᓗᐊᖅᑎᓪᓗᒍ. (ᐊᔾᔨᙳᐊᖁᑎᒋᔭᐅᔪᖅ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᓐᑯᓐᓄᑦ)
For the English version of this story, please see QIA considers ‘next steps’ after NIRB recommends hydro plant move forward without review.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ “ᐃᓱᒪᒃᓴᖅᓯᐅᕈᑎᖃᖅᑐᑦ ᑭᖑᓪᓕᕐᒥ ᖃᓄᐃᓕᐅᕈᑎᒃᓴᓂᒃ” ᐅᑯᐊ ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓱᒪᓕᐅᕆᓇᓱᓚᐅᖅᑎᓪᓗᒋᑦ ᐅᓇ ᐃᖃᓗᖕᓂ ᓄᒃᑭᒃᓴᐅᑎᒃᓴᒧᑦ ᐱᓕᕆᐊᒃᓴᖅ ᓯᕗᒧᑦ ᐱᒋᐊᖁᓚᐅᓪᓗᓂ ᐃᓄᖕᓄᑦ ᕿᒥᕐᕈᐊᖅᑕᐅᙱᒃᑲᓗᐊᕐᓗᓂ.
“ᓯᕗᓪᓕᐅᑎᓯᒪᓇᓱᒃᑕᕗᑦ ᐅᓇ ᐱᕙᓪᓕᐊᑎᑦᑎᓂᖅᒥᒃ ᓄᑖᒥ ᓄᒃᑭᒃᓴᐅᑎᒃᓴᒧᑦ ᐃᓂᒃᓴᐅᓂᐊᕐᑐᖅ ᓯᕗᒧᑦ ᐱᒋᐊᖁᓪᓗᑎᒍᑦ ᐅᓇ ᐃᓄᐃᑦ ᐱᔪᓐᓇᐅᑎᖃᕐᓂᖏᑦ ᐃᓱᒪᒋᔭᐅᓗᓂ,” ᑎᑎᕋᖅᓯᒪᔪᓃᑦᑐᖅ ᐅᕙᙵᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐅᖃᖅᑎᖓᓂ ᒫᑰᓯ ᖃᐅᕐᓂᖅ, ᑎᑎᕋᖅᑕᕕᓂᖏᓐᓂ ᓄᕕᐱᕆ 10-ᒥ.
ᐅᓇ $500 ᒥᓕᐊᓐᑐᕐᑐᖅ ᐃᖃᓗᖕᓂ ᓄᒃᑭᒃᓴᐅᑎᒧᑦ ᐱᓕᕆᐊᒃᓴᖅ, ᒫᓐᓇᓕ ᖃᓄᐃᓕᖓᓂᐊᕐᓂᖓ ᐋᖅᑭᒃᓱᖅᑕᐅᕙᓪᓕᐊᓪᓗᓂ, ᑐᒃᓯᕋᐅᓯᐅᖅᑕᐅᓯᒪᔪᖅ ᐅᑯᓇᙵᑦ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᓐᑯᓐᓂ, ᐃᓚᒋᔭᐅᔪᖅ ᕿᑭᖅᑖᓗᒃ ᑯᐊᐳᕇᓴᓐᑯᓐᓄ, ᑖᒃᑯᐊᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐱᕙᓪᓕᐊᔪᓕᕆᓪᓗᓂᔾᔪᒃ.
ᐊᖏᖅᑕᐅᒍᓂ ᓴᓇᓯᒋᐊᕐᓂᐊᖅᑐᑦ ᓄᒃᑭᒃᓴᐅᑎᖃᖅᕕᒃᓴᒥ ᑰᖕᒥᙶᖅᑐᒥ ᐃᒪᕐᒧᑦ ᓴᖏᓂᖃᓕᕈᓐᓇᕐᓗᓂ 30 ᒥᒐᕗᐊᑦᔅ ᐅᕙᓂ ᑰᒑᓗᒃ ᑰᖕᒥᑦ, ᑖᓐᓇᓗ 60 ᑭᓛᒥᐊᓂ ᐅᖓᓯᖕᓂᖃᖅᖢᓂ ᐅᐊᖕᓇᖓᑕ ᑲᓇᖕᓇᖅᐸᓯᐊᓂ ᐃᖃᓗᐃᑦ. ᐃᓚᖃᖅᑎᑕᐅᓂᐊᖅᑐᖅ 7,136 ᕼᐊᒃᑎᐊ ᐃᒪᖃᖅᕕᒃᒥ ᐊᒻᒪᓗ 66 ᑭᓛᒥᑕ ᐊᖅᑯᑎᐅᓂᐊᖅᑐᒥᑦ.
ᑖᓐᓇ ᑲᒻᐸᓂᐅᔪᖅ ᐅᖃᕐᓯᒪᔪᖅ ᓄᒃᑭᒃᓴᐅᑎᖃᕐᕕᒃᓴᖅ ᐃᓇᖏᕐᓯᓇᔭᕐᓂᖓᓂ 15 ᒥᓕᐊᓐ ᓖᑕᓂ ᐅᕐᓱᐊᓗᒃ ᑏᓱᒥ ᐊᕐᕌᒍᑕᒫᓐ ᐆᒻᒪᖅᑯᑎᖃᕐᕕᒃᒧᑦ ᐊᑐᖅᑕᐅᕙᒃᑐᒥ.
ᓄᕕᐱᕆ 2025-ᒥ ᑲᓇᑕᒧᑦ ᐊᖓᔪᖅᑳᖅ ᒫᒃ ᑳᓂ “ᐱᓕᕆᖃᑎᒌᓂᕐᒧᑦ ᐃᑲᔫᑎ” ᐱᓕᕆᐊᒃᓴᖅ ᐊᖏᖅᑕᐅᓵᓕᑲᑕᖁᓪᓗᓂᐅᒃ. ᑕᐃᒪᓐᓇᓕ ᓴᓇᔭᐅᕙᓪᓕᐊᓕᕋᔭᖅᑐᖅ 2028-ᒥ – ᐊᕐᕌᒎᖕᓂ ᒪᕐᕉᖕᓂ ᓯᕗᕙᕆᐊᕐᓯᒪᓂᕐᓴᐅᓗᓂ ᐃᓱᒪᒋᔭᐅᖅᑳᓚᐅᖅᑐᒥᓐ.
ᓄᕕᐱᕆ 4-ᒥ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑎᑎᕋᐅᓯᖃᓚᐅᕐᒪᑕ ᕿᒥᕐᕈᐊᖅᐸᓪᓕᐊᓂᕐᒧᑦ ᐃᓱᒪᓕᐊᖏᓐᓂ ᐅᓂᒃᑳᓂ, ᐅᖃᕐᓯᒪᓪᓗᑎᒃ ᑐᒃᓯᕋᐅᑎᒋᔭᐅᔪᖅ ᕿᒥᕐᕈᐊᖅᑕᐅᙱᒃᑲᓗᐊᖅᐸᑦ ᓱᖁᑕᐅᒋᔭᐅᙱᓐᓂᕋᖅᖢᒍ ᐊᒻᒪᓗ ᖃᐅᔨᑎᑕᐅᓪᓗᓂ ᒥᓂᔅᑕᒧᑦ ᐅᑭᐅᕐᑕᖅᑐᕐᒥ ᐊᒻᒪ ᐅᑭᐅᕐᑕᖅᑐᕐᒥ ᐱᓕᕆᐊᒃᓴᓕᕆᓂᕐᒧᑦ ᐅᓖᐱᑲ ᓵᑐᕋᓐ, ᑖᓐᓇᓕ ᑕᒪᑐᒧᖓ ᐋᖅᑭᒃᓯᓪᓚᕆᒐᔭᖅᖢᓂ ᐃᓱᒪᓕᐊᕆᔭᐅᓯᒪᔪᒧᑦ. ᑲᑎᒪᔨᒃᑯᑦ ᖃᐅᔨᓴᖃᑦᑕᕐᒪᑕ ᐃᓅᖃᑎᒌᖕᓂᕐᒧᑦ ᐊᒻᒪ ᐱᕙᓪᓕᐊᔪᓕᕆᓂᕐᒧᑦ ᐊᒃᑐᐃᒍᑎᐅᓇᔭᕐᑐᖅ ᐊᒻᒪ ᑐᓴᖅᑎᑦᑎᓗᓂ ᒐᕙᒪᑐᖃᒃᑯᓐᓂ ᑖᓐᓇ ᒥᓂᔅᑕ ᑲᔪᓯᑎᑦᑎᖁᔨᓂᖓ ᒪᓕᒃᑕᐅᓇᔭᕆᐊᒃᓴᖓᓂ.
ᑲᑎᒪᔩ ᐱᔾᔪᑎᖃᕐᒪᑕᓕ ᖃᓄᐃᓕᒍᑎᐅᓇᔭᕐᑐᑦ ᐋᖅᑭᒃᑕᐅᓯᒪᔪᓐᓇᕐᓂᖏᓐᓄᑦ ᐊᑐᓕᕆᐊᓕᒃᑎᒍᑦ ᐊᒻᒪ ᒪᓕᒋᐊᓕᒃᑎᒎᖓᔪᓂᒃ ᐊᒻᒪᓗ ᐱᓕᕆᐊᒃᓴᖅ ᐃᒪᐃᙱᖢᓂ “ᐃᓚᖃᖅᑎᑦᑎᓂᕐᒥ ᐱᓕᕆᔾᔪᑎᓄᑦ ᖃᓄᐃᓕᐅᕈᑎᐅᓇᔭᖅᑐᓂ ᐊᒻᒪᓗ ᑖᓐᓇ ᖃᓄᒻᒪᕆᒃ ᐊᑐᕐᓂᐊᕆᐊᒃᓴᖓᓂ ᓇᓗᓇᖅᖢᓂ,” ᐅᖃᕐᓯᒪᔪᐃᑦ ᕿᒥᕐᕈᐊᖅᐸᓪᓕᐊᓂᕐᒧᑦ ᐅᓂᒃᑳᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑭᐅᓗᒍᑎᖃᓚᐅᕐᑐᑦ ᐊᒃᑐᐃᔾᔪᑎᒋᓇᔭᖅᑕᖏᑦ ᐱᐅᓯᕚᓪᓕᕈᑎᐅᓇᓱᒃᑐ ᓇᓗᓇᕐᓂᖏᓐᓂ, ᐱᓗᐊᖅᑐᒥ ᐃᖃᓗᖕᓄᑦ (fish), ᐆᒪᔪᓄᑦ ᑕᒪᐅᓈᖅᐸᒃᑐᓄᑦ, ᓄᓇᐅᑉ ᐊᑖᓂ ᓯᑯᑐᖃᕐᒥ ᐊᒻᒪ ᐊᖑᓇᓱᖃᑦᑕᕐᓂᕐᒥᒃ.
ᓵᑐᕋᓐ ᐅᓪᓗᕐᓂ 150 ᐃᓗᐊᓂ ᑭᐅᔭᕆᐊᖃᕐᓂᐊᖅᑐᖅ.
ᑕᐃᒪᐃᓐᓂᖓᓂᓕ ᐃᓄᐃᑦ ᑲᑐᔾᔨᖃᑎᒌᖏᑦ ᐸᕐᓇᐅᓯᐅᖅᐸᓪᓕᐊᖕᒪᑕ ᓄᓇᓖᑦ ᐅᑯᐊ ᐃᖃᓗᐃᑦ ᐊᒻᒪ ᐸᓐᓂᕐᑑᖅ ᐱᓕᕆᖃᑎᒌᖕᓂᒃᓴᖏᓐᓂ, ᑐᓴᒐᒃᓴᕆᔭᐅᔪᖅ ᐅᖃᕐᓯᒪᔪᖅ.
ᖃᐅᕐᓂᖅ ᑭᐅᓚᐅᙱᒻᒪ ᑕᒪᑐᒧᖓ ᑐᓴᕐᕕᐅᒋᐊᒃᑲᓐᓂᕋᓱᒃᖢᓂ ᐅᑯᐊᓗ ᕿᒥᕐᕈᔨᒃᑯᑦ ᑲᑎᒪᔨᖏᑦ.




(0) Comments