ᐃᑭᑦᑐᖅ, ᐅᒃᐱᕆᔭᐅᔪᒥ ᐱᕋᔭᖕᓂᕐᒧᑦ, ᓱᔪᐃᕗᖅ ᑲᖏᖅᓱᐊᓗᔾᔪᐊᑉ ᐊᓐᓂᑭᑕᕐᕕᖓᓂ

For an English version of this article, please see Fire, believed to be criminal, damages Kangiqsualujjuaq arena

ᓄᓇᕕᖕᒥ ᐸᓖᓯᒃᑯᑦ ᑎᒍᓯᓯᒪᕗᑦ ᐸᓴᒋᔭᐅᔪᒥ ᑲᖏᖅᓱᐊᓗᔾᔪᐊᒥ ᐊᓐᓂᑭᑕᕐᕕᖓ ᓱᔪᐃᕐᔪᐊᖅᑕᐅᓚᐅᖅᑎᓪᓗᒍ ᐃᑭᑦᑐᒧᑦ ᐅᓐᓄᖓᓂ ᔫᓂ 8−ᒥ.

ᐋᓐᓂᖅᑐᖃᓚᐅᙱᑦᑐᖅ, ᑭᓯᐊᓂ ᐅᖓᕙ ᖃᖏᖅᑐᖓᓂ ᓄᓇᐅᔪᒥ ᒪᐃᔭᖓ ᐅᖃᖅᐳᖅ ᓄᓇᓕᐅᑉ ᒪᒃᑯᒃᑐᖁᑎᖏᑦ ᐊᐃᑦᑳᕈᓱᒡᔪᐊᓚᐅᖅᐳᑦ ᐊᓯᐅᔨᓂᐅᔪᒥ ᐱᒻᒪᕆᐅᔪᒥ ᐱᙳᐊᕐᕕᖕᒥ ᐃᒡᓗᖁᑎᖓᓐᓂ.

“ᓱᕈᓯᓪᓗᐊᑕᑦ ᐊᒃᑐᖅᑕᐅᓂᖃᕐᓂᐊᖅᑐᑦ,” ᐅᖃᓚᐅᖅᐳᖅ ᒪᐃᔭᖓ ᒫᒋ ᐊᒧᓪᓗᒃ ᐊᐱᖅᓱᖅᑕᐅᓂᐅᔪᒥ.

“ᓄᓇᓕᐅᔪᖅ ᑭᐅᔭᕆᐊᖃᕐᓂᐊᖅᐳᑦ ᓇᓂᓯᓇᓱᐊᕐᓂᐅᔪᒥ ᐃᒻᒪᖄ ᓯᓚᒥ ᓯᐊᕐᕆᔮᕐᕕᐅᔪᒥ.”

ᐊᒧᓪᓗᒃ ᐅᖃᓚᐅᖅᐳᖅ ᐃᑭᑦᑐᖅ ᐱᒋᐊᓚᐅᖅᐳᖅ ᑕᐃᑲᓂᒐᓚᒃ ᐅᓐᓄᕈᒻᒥ ᓂᕆᐊᓂᓕᖅᑎᓪᓗᒍ, ᐊᒻᒪ ᑕᐃᑯᖓ ᐅᐸᓚᐅᖅᐳᖅ ᖃᑦᑎᕆᔨᐅᔪᑦ ᐅᓇᑕᖅᑎᓪᓗᒋᑦ ᐃᑭᑦᑐᐊᓗᖕᒥ.

ᐅᖃᐅᓯᐅᓪᓗᓂ ᐊᒧᓪᓗᖕᒧᑦ, ᐃᓚᖏᓐᓂ ᐃᓄᖕᓂ ᓄᓇᓕᖕᓂ ᑕᑯᓚᐅᖅᐳᑦ ᐃᓄᖕᒥ ᐊᓐᓂᑭᑕᕐᕕᓕᐊᖅᑐᒥ ᓯᕗᓂᐊᑦᑎᐊᖓᓂ ᐃᑭᓐᓂᐊᕐᓂᖓᓂ ᐊᒻᒪ ᐊᓂᓪᓗᓂ ᑭᖑᓂᑦᑎᐊᖓᒍᑦ.

ᔮᓐ−ᕗᕌᓐᓱᐊ ᒧᐊᕆᓐ, ᓄᓇᕕᖕᒥ ᐸᓖᓯᒃᑯᑦ ᐊᖓᔪᖅᑳᖓᑕ ᑐᒡᓕᖓ, ᑐᓂᓯᔪᓐᓇᑦᑎᐊᓚᐅᙱᓚᖅ ᑐᓴᒐᒃᓴᓂ ᐊᓯᐊᒍᑦ ᓇᓗᓇᐃᖅᓯᓂᖓᓂ ᑎᒍᔭᐅᔪᖃᓚᐅᕐᓂᖓᓂ ᑲᑎᙵᓂᖃᖅᑐᒥ ᐃᑭᑦᑐᒥ.

“ᐅᒃᐱᕆᔭᐅᕗᖅ ᐱᕋᔭᖕᓂᐅᓂᖓᓂ ᐊᒻᒪ ᒫᓐᓇᐅᔪᒥ ᑎᒍᔭᐅᓯᒪᔪᖃᖅᐳᖅ ᐱᔮᖅᑯᒧᑦ ᐃᑭᑎᑦᑎᓂᐅᔪᒧᑦ,” ᒧᐊᕆᓐ ᑎᑎᕋᓚᐅᖅᐳᖅ ᖃᕋᓴᐅᔭᒃᑯᑦ ᑎᑎᕋᕐᓂᐅᔪᒥ.

“ᐃᓄᒃ ᓱᓕ ᐃᖅᑲᖅᑐᒐᒃᓴᙳᓚᐅᙱᒻᒪᑦ, ᐅᖃᐅᓯᖃᕈᓐᓇᙱᓚᒍᑦ ᑐᓴᒐᒃᓴᒃᑲᓐᓂᕐᓂ.”

ᐊᒧᓪᓗᒃ ᐅᖃᓚᐅᖅᐳᖅ ᓄᓇᓕᖕᓂ ᑲᑎᒪᔨᐅᔪᑦ ᐃᓱᒪᓕᐅᕆᓚᐅᙱᓚᑦ ᓱᓕ ᓯᕗᓂᒃᓴᖓᓄᑦ ᐊᓐᓂᑭᑕᕐᕕᖕᒧᑦ.

ᐸᓖᓯᒃᑯᑦ ᐊᒻᒪ ᖃᑦᑎᕆᔨᒃᑯᑦ ᖃᐅᔨᓴᖅᐳᑦ ᐊᒻᒪ ᕼᐋᒻᓚᒃᑯᑦ ᖃᐅᔨᓴᐃᔭᕆᐊᖃᕐᓂᐊᖅᐳᑦ ᓱᔪᐃᓂᐅᔪᒥ ᓇᓪᓕᐅᒃᑯᒫᓕᕆᔨᖏᓐᓄᑦ.

ᓂᔾᔮᑎᑦᑎᓂᐅᔪᒥ ᖁᕕᐊᓱᒍᑕᐅᔪᒥ ᐱᓕᕆᐊᖑᔪᒃᓴᐅᑕᐅᕗᖅ ᓴᓂᓕᖓᓂ ᐊᓐᓂᑭᑕᕐᕕᖕᒧᑦ ᑕᒪᑐᒪᓂ ᐱᓇᓱᐊᕈᓯᐅᔪᒥ. ᐊᒧᓪᓗᒃ ᐅᖃᓚᐅᖅᐳᖅ ᓄᖅᑲᖅᑎᑕᐅᓪᓗᐊᙱᓚᖅ, ᑭᓯᐊᓂ ᕼᐋᒻᓚᒃᑯᓪᓐᓂ ᐱᓕᕆᔨᕐᔪᐊᖑᔪᑦ ᐱᓕᕆᕗᑦ ᐲᔭᐃᓂᖏᓐᓂ ᐃᓂᐅᔪᒥ ᐃᓄᒋᐊᑦ ᐅᐸᒍᓐᓇᕐᓂᐊᕐᓂᖏᓐᓄᑦ.

ᐊᓯᐊᒍᑦ ᑖᔅᓱᒥᖓ, ᑐᓴᒐᒃᓴᐅᔪᓂ ᐃᑭᑦᑐᒥ ᓄᑖᖑᕗᖅ ᓄᓇᓕᖕᓄᑦ ᐊᒻᒪ ᐊᒧᓪᓗᒃ ᐅᖃᓚᐅᖅᐳᖅ ᖃᐅᔨᓇᓱᐊᕐᓂᐊᖅᐳᑦ ᖃᓄᐃᓕᐅᕐᓂᐊᕐᓂᖓᓂ ᑭᖑᓂᐊᒍᑦ.

“ᖃᐅᔨᒪᕗᖓ [ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᖓᑦ] ᐱᔭᕆᑐᔪᒥ ᐃᑲᔪᖅᓱᐃᓂᐅᔪᒥ, ᐅᕙᑦᑎᓐᓄᑦ ᐅᖃᖅᐳᑦ ᓇᒃᓯᐅᔾᔨᖁᔨᓪᓗᑎᒃ ᐊᔾᔨᙳᐊᓂ ᐊᒻᒪ ᐱᔭᕆᐊᖃᕐᓂᐊᖅᑐᒃᓴᐅᕗᒍᑦ ᐸᓖᓯᒃᑯᓐᓂ ᐅᓂᒃᑳᓕᐊᖑᔪᒥ, ᖃᑦᑎᕆᔨᒃᑯᓐᓂ ᐅᓂᒃᑳᓕᐊᒥ, ᑕᒪᒃᑯᐊᓕᒫᑦ ᐅᕙᙵᑦ ᓇᒃᓯᐅᔾᔭᐅᓗᑎᒃ,” ᐅᖃᓚᐅᖅᐳᖅ.

“ᓄᒫᓇᕐᔪᐊᖅᖢᓂ ᐅᓪᓘᕗᖅ ᐊᒥᓱᓄᑦ ᓱᕈᓯᕐᓄᑦ.”