ᐃᒃᓯᕋᕐᔪᐊᕌᐱᐅᑉ ᐃᖃᓗᖕᓄᑦ ᐳᓚᕋᕐᓂᖓᓂ ᓂᕆᐅᒋᔭᐅᕗᖅ ᓇᒃᓴᕐᓂᐊᕐᓂᖓᓂ ᖁᕕᐊᓱᖕᓂᐅᔪᒥ, ᒪᒥᓴᕐᓂᕐᒥ

ᐃᒃᓯᕋᕐᔪᐊᕌᐱᒃ ᕗᕌᓐᓯᔅ ᐳᓚᕋᖅᑐᒃᓴᐅᑕᐅᕗᖅ ᑲᓇᑕᒧᑦ ᔪᓚᐃ 24−ᒥ 30−ᒧᑦ; ᐃᖃᓗᐃᑦ ᐊᑕᐅᓯᐅᔪᒥ ᐱᖓᓱᓂ ᓄᖅᑲᕐᓂᐅᔪᓄᑦ

ᐃᖃᓗᐃᑦ ᐊᑕᐅᓯᐅᓪᓗᓂ ᐱᖓᓱᓂ ᑲᓇᑕᒥ ᓄᓇᓕᐸᐅᔭᓂ ᐃᒃᓯᕋᕐᔪᐊᕌᐱᒃ ᕗᕌᓐᓯᔅ ᐳᓚᕋᖅᑐᒃᓴᐅᑕᐅᕗᖅ ᔪᓚᐃᒥ, ᐃᒃᓯᕋᕐᔪᐊᒃᑯᑦ ᐊᖓᔪᖅᑳᖃᕐᕕᖓ ᐅᖃᓚᐅᖅᐳᖅ. ᐊᖓᔪᖅᑳᕆᔭᐅᔪᖅ ᐃᒃᓯᕋᕐᔪᐊᒃᑯᓐᓂ ᑐᒃᓯᐊᕐᕕᖓᓂ ᑲᓇᑕᒧᐊᕐᓂᐊᖅᐳᖅ ᒪᒥᐊᑦᑕᖅᑐᕐᓗᓂ ᑐᒃᓯᐊᕐᕕᐅᑉ ᐊᑐᕐᓂᕆᓚᐅᖅᑕᖓᓂ ᑲᓇᑕᐅᑉ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐱᓕᕆᔾᔪᓯᐅᔪᒥ. (File photo)

By ᑕᐃᕕᑦ ᓛᕼᐄᑦ

For English version, see Pope’s Iqaluit visit expected to bring excitement, healing

ᑐᓴᒐᒃᓴᐃᑦ ᓇᓗᓇᐃᖅᓯᔪᒥ ᐃᒃᓯᕋᕐᔪᐊᕌᐱᒃ ᕗᕌᓐᓯᔅ ᐳᓚᕋᕐᓂᐊᕐᓂᖓᓂ ᐃᖃᓗᖕᓄᑦ ᑕᒪᑐᒪᓂ ᐊᐅᔭᐅᔪᒥ ᑐᓴᕐᓂᕆᔭᐅᑦᑎᐊᖅᐳᖅ ᓄᓇᓕᐸᐅᔭᒥ ᐱᓇᓱᐊᕈᓯᐅᓚᐅᖅᑐᒥ.

ᐃᒃᓯᕋᕐᔪᐊᒃᑯᑦ ᐊᖓᔪᖅᑳᖃᕐᕕᖓ ᐅᖃᐅᓯᒃᓴᓕᐅᓚᐅᖅᐳᖅ ᒪᐃ 13−ᒥ ᑲᓇᑕᒦᓐᓂᐊᕐᓂᖓᓂ ᔪᓚᐃ 24−ᒥ 30−ᒧᑦ, ᓄᖅᑲᕐᓂᖃᕐᓗᓂ ᐃᖃᓗᖕᓄᑦ, ᑯᐸᐃᒃ ᓄᓇᓕᐸᐅᔭᖓᓄᑦ ᐊᒻᒪ ᐃᐊᑦᒪᓐᑕᓐᒧᑦ. ᖃᐅᔨᒋᐊᒃᑲᓐᓂᕐᓂᐅᔪᓂ, ᓲᕐᓗ ᖃᓄᑎᒋ ᐃᓐᓇᐅᓕᖅᑐᖅ ᐃᒃᓯᕋᕐᔪᐊᕌᐱᒃ ᓄᓇᕗᒻᒦᓐᓂᐊᕐᓂᖓᓂ ᓴᖅᑭᑕᐅᓚᐅᙱᓚᑦ.

ᐃᒃᓯᕋᕐᔪᐊᕌᐱᒃ ᑲᑎᖃᑎᖃᖅᑎᓪᓗᒍ ᐃᓚᐅᔪᓂ ᐃᓄᖕᓂ, ᐊᓪᓚᙳᐊᓂ ᐊᒻᒪ ᐊᓪᓚᓂ ᐃᒃᓯᕋᕐᔪᐊᒃᑯᑦ ᐊᖓᔪᖅᑳᖃᕐᕕᖓᓂ ᒫᔾᔨᐅᑉ ᓄᙳᐊᓂ, ᐅᖃᓚᐅᖅᐳᖅ ᐳᓚᕋᓛᕈᓐᓇᓛᕈᒪᓪᓗᓂ ᑲᓇᑕᒧᑦ.

ᐃᓱᐸᓗᐊᓂ ᐳᓚᕋᕐᓂᐅᔪᒥ, ᐊᐃᑉᕆᓕ 1−ᒥ, ᐃᒃᓯᕋᕐᔪᐊᕌᐱᒃ ᒪᒥᐊᓚᐅᖅᐳᖅ ᐊᑐᕐᓂᖓᓂ ᐃᓚᖏᓐᓂ ᐃᒃᓯᕋᕐᔪᐊᒃᑯᓐᓂ ᐃᒃᓯᕋᕐᔪᐊᖑᔪᓂ ᐱᓚᐅᕐᓂᖏᓐᓂ ᐋᓐᓂᖅᓯᕆᓂᐅᔪᓂ ᐱᓚᐅᖅᑐᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐱᓕᕆᔾᔪᓯᐅᔪᒥ. ᓂᕆᐅᒋᔭᐅᕗᖅ ᒪᒥᐊᒃᑲᓐᓂᓛᕐᓂᖓᓂ ᑲᓇᑕᒦᑎᓪᓗᒍ.

ᐃᖃᓗᖕᓂ ᓄᖅᑲᕐᓂᐊᕐᓂᐅᔪᒥ ᐃᒃᓯᕋᕐᔪᐊᕌᐱᖕᒧᑦ ᐸᓴᒋᔭᐅᓚᐅᖅᐳᖅ ᐱᓇᓱᐊᕈᓯᒐᓚᖕᓄᑦ. ᐃᒃᓯᕋᕐᔪᐊᒃᑯᑦ ᐊᖓᔪᖅᑳᖃᕐᕕᖓᑕ ᓇᓗᓇᐃᖅᑕᐅᓂᖓ ᑎᑭᓚᐅᖅᐳᖅ ᑐᓴᒐᒃᓴᑦᑎᐊᕙᐅᓪᓗᓂ ᐃᖃᓗᖕᒥᐅᑕᓄᑦ ᓲᕐᓗ ᐃᓐᕕᓂᑎ ᓕᐊᔾᔭᓐᒧᑦ ᐊᑐᕐᓂᖃᕈᓐᓇᕐᓂᐊᖅᑐᒥ ᖃᓄᐃᓐᓂᐅᔪᒥ.

“ᖁᕕᐊᓱᕐᔪᐊᕐᓂᐊᖅᑰᖅᐳᑦ ᑎᑭᒃᑯᓂ,” ᓕᐊᔾᔭᓐ ᐅᖃᓚᐅᖅᐳᖅ ᓄᓇᓕᐸᐅᔭᐅᑉ ᖃᓄᐃᓐᓂᖓᓂ.

“ᐊᓕᐊᓇᐃᒋᕙᕋ ᐃᒃᓯᕋᕐᔪᐊᕌᐱᒃ ᑕᒪᐅᙵ ᑎᑭᓐᓂᐊᕐᓂᖓᓂ,” ᐅᖃᓚᐅᖅᐳᖅ ᓴᑭᖅᑕᖅ ᓕᕙᐃ ᓲ, ᐃᓚᒋᐊᖅᓯᓪᓗᓂ ᐊᖓᔪᖓ ᐃᓚᐅᖃᑕᐅᓚᐅᕐᓂᖓᓂ ᐊᐅᓪᓚᖅᑎᑕᐅᓪᓗᓂ ᐃᓕᓐᓂᐊᕆᐊᖅᑎᑕᐅᓂᕐᒧᑦ

ᓲ ᐅᖃᓚᐅᖅᐳᖅ ᐱᐅᓂᐊᖅᐳᖅ ᐃᒃᓯᕋᕐᔪᐊᕌᐱᒃ ᒪᒥᐊᒃᑯᓂ ᐅᐸᒃᓯᒪᓪᓚᕆᒡᓗᓂ — ᓂᕆᐅᒋᔭᐅᖕᒪᑦ — ᐊᑐᕐᓂᖏᓐᓂ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖓ ᐃᓚᐅᖃᑕᐅᓚᐅᕐᓂᖏᓐᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓂᖏᓐᓂ ᐱᓕᕆᔾᔪᓯᐅᔪᒥ ᐳᓚᕋᓕᕈᓂ ᓄᓇᕗᒻᒧᑦ.

ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᑦ ᐱᓕᕆᔾᔪᓯᖓ ᐱᒋᐊᓚᐅᖅᐳᖅ 1880−ᖏᓐᓂ ᐱᓕᕆᔾᔪᓯᐅᓪᓗᓂ ᐲᖅᓯᓂᕐᒥ ᓄᓇᖃᖅᑳᖅᓯᒪᔪᓂ ᐃᓄᖕᓂ ᑲᓇᑕᒥ ᑭᓇᐅᓂᖏᓐᓂ, ᐃᓕᖅᑯᓯᖓᓐᓂ ᐊᒻᒪ ᐅᖃᐅᓯᖏᓐᓂ. ᐃᓚᖏᑦ ᐃᓕᓐᓂᐊᕐᕖᑦ ᒪᑐᐃᐃᓐᓇᓚᐅᖅᐳᑦ ᑭᓯᐊᓂ 1990−ᖏᓐᓄᑦ, ᐃᓚᖃᖅᖢᓂ ᑭᕙᓪᓕᖅ ᑐᔪᕐᒥᕕᖓ ᑲᖏᖅᖠᓂᕐᒥ.

ᑕᐃᒪᙵᓂ ᐅᐱᕐᙶᖅ 2021−ᒥ, ᐅᓄᕐᓂᖅᓴᓂ 1,800−ᓂ ᓇᓗᓇᐃᒃᑯᓯᖅᓯᒪᙱᑦᑐᓂ ᐃᓗᕕᕐᓂ ᓇᓂᔭᐅᓯᒪᕗᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ. ᖃᐃᖁᔨᓂᐅᔪᓂ ᑕᐃᒪᙵᓂ ᑎᑭᓯᒪᓂᖃᖅᐳᖅ ᐃᒃᓯᕋᕐᔪᐊᑦ ᑐᒃᓯᐊᕐᕕᖓᓐᓂ, ᐊᐅᓚᑦᑎᒐᓚᓚᐅᖅᑐᓂ ᑕᒪᒃᑭᑲᓴᖕᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ, ᐊᒻᒪᓗ ᐊᓯᖏᓐᓂ ᐃᓕᓐᓂᐊᕐᕕᐅᔪᓂ ᐱᓂᖏᓐᓂ ᑲᒪᒋᔭᖃᕐᓂᐅᔪᓂ ᐊᑐᕐᓂᖏᓐᓂ.

ᖃᐅᔨᒋᐊᖅᑕᐅᓪᓗᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐅᖃᐅᓯᒃᓴᓕᐅᓚᐅᖅᑎᓪᓗᒋᑦ, ᐃᖃᓗᖕᓂ ᒪᐃᔭᖓ ᑲᓂ ᐱᐅᓪ ᐅᖃᓚᐅᖅᐳᖅ ᑐᑭᓯᐊᓂᒃᓴᒪᙱᓐᓂᖓᓂ ᐅᓂᒃᑳᖅᓯᒪᓂᐅᔪᓂ ᐳᓚᕋᕐᓂᐅᔪᒧᑦ.

ᓄᓇᕗᒻᒥ ᓯᕗᓕᖅᑎ P.J. ᐊᕿᐊᕈᖅ ᑐᓴᒐᒃᓴᓕᐅᓚᐅᖅᐳᖅ ᐅᖃᖅᓯᒪᔪᒥ ᓄᓇᕗᑦ ᑐᙵᓱᒃᑎᑦᑎᓂᐊᕐᓂᖏᓐᓂ ᐃᒃᓯᕋᕐᔪᐊᕌᐱᐅᑉ ᐳᓚᕋᕐᓂᖓᓂ.

“ᐅᓇ ᐳᓚᕋᕆᐊᕐᓂᖅ ᐱᒻᒪᕆᐅᓪᓗᓂ ᐱᓕᕆᓂᐅᕗᖅ ᓴᐃᒻᒪᖃᑎᒌᖕᓂᐅᔪᒥ ᐃᓄᖕᓄᑦ ᐆᒪᔪᓐᓇᓚᐅᖅᑐᓄᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ,” ᐅᖃᓚᐅᖅᐳᖅ.

ᐃᓄᐃᑦ ᑕᐱᕇᑦ ᑲᓇᑕᒥ, ᐊᖓᔪᖅᑳᖓ ᓇᐃᑕᓐ ᐆᐱᑦ ᐊᑕᐅᓯᐅᓚᐅᖅᑐᒥ ᐃᓄᖕᓂ ᐃᓚᐅᖃᑕᐅᔪᓄᑦ ᐃᒃᓯᕋᕐᔪᐊᒃᑯᑦ ᐊᖓᔪᖅᑳᖃᕐᕕᖓᓄᑦ, ᐅᖃᓚᐅᖅᐳᖅ ᑲᑐᔾᔨᖃᑎᒌᖑᔪᖅ ᑐᙵᓱᒃᑎᑦᑎᕗᖅ ᐃᒃᓯᕋᕐᔪᐊᕌᐱᖕᒥ ᐳᓚᕋᕐᓂᕐᒧᑦ “ᑕᐅᑐᒃᑕᑐᐊᖃᑲᐃᓐᓇᖅᑐᒥ ᓱᓕᓂᐅᔪᒥ, ᒪᓕᒐᓕᕆᓂᕐᒥ, ᒪᒥᓴᕐᓂᕐᒥ, ᓴᐃᒻᒪᖃᑎᒌᖕᓂᕐᒥ ᐊᒻᒪ ᓂᕆᐅᖕᓂᕐᒥ.”

ᑐᑭᓯᒋᐊᕈᑎᒃᓴᒃᑲᓐᓂᕐᓂ ᐃᒃᓯᕋᕐᔪᐊᕌᐱᐅᑉ ᐳᓚᕋᕐᓂᖓᓄᑦ, ᐃᓚᖃᖅᑐᒥ ᐅᓪᓗᖓᓂ ᐃᖃᓗᖕᓂ ᓄᖅᑲᓚᐅᑲᖕᓂᖓᓂ ᐊᒻᒪ ᖃᓄᖅ ᐊᑯᓂᐅᑎᒋᓂᐊᕐᓂᖓᓂ ᓄᓇᕗᒻᒥ, ᓂᕆᐅᒋᔭᐅᕗᑦ ᓴᖅᑭᑕᐅᓛᕐᓂᖏᓐᓂ ᑎᑭᑉᐸᓪᓕᐊᔪᓂ ᐱᓇᓱᐊᕈᓯᐅᔪᓂ, ᐃᒃᓯᕋᕐᔪᐊᒃᑯᑦ ᐊᖓᔪᖅᑳᖃᕐᕕᖓᑕ ᑐᓴᒐᑦᓴᓕᐅᕐᕕᖓᑕ ᑎᑎᕋᕐᕕᖓ ᐅᖃᓚᐅᖅᐳᖅ.

ᑕᒪᓐᓇ ᑎᓴᒪᒋᔭᐅᓗᓂ ᐃᒃᓯᕋᕐᔪᐊᕌᐱᖕᒧᑦ ᐳᓚᕋᕐᓂᐅᓂᐊᖅᐳᖅ ᑲᓇᑕᒧᑦ, ᓯᕗᓪᓕᖅᐹᖓ ᑎᑭᓚᐅᖅᑐᒥ1984−ᒥ ᐃᒃᓯᕋᕐᔪᐊᕌᐱᒃ ᔮᓐ ᐹᓪ II−ᒧᑦ.

Share This Story

(0) Comments

Join the Conversation

Your email address will not be published. Required fields are marked *

*