ᐃᒡᓗᓕᖕᒥ ᑯᐊᐸᒃᑯᖓ ᒪᑐᐃᒃᑲᓐᓂᖅᐳᖅ ᐊᕐᕌᒍᑦ ᐱᖓᓱᑲᓴᖕᓂ ᐃᑭᑦᑐᒥ ᓄᖑᑎᑦᑎᓚᐅᖅᑎᓪᓗᒍ ᓄᑕᐅᙱᑦᑐᒥ ᓂᐅᕕᕐᕕᖕᒥ

For an English version of this story, please see Igloolik Co-op reopens two years after fire gutted old store.

ᐃᑭᑦᑐᖃᓚᐅᖅᑎᓪᓗᒍ ᔭᓄᐊᕆ 2021−ᒥ ᒥᒃᖠᑎᑦᑎᓚᐅᖅᐳᖅ ᐃᒡᓗᓕᐅᑉ ᑯᐊᐸᒃᑯᖓᓐᓂ ᓂᐅᕕᕐᕕᖓᓂ ᓄᖑᑦᑎᐊᖅᖢᓂ, ᓄᑖᖑᔪᒥ, ᐊᖏᓂᖅᓴᒻᒪᕆᖕᒥ ᓂᐅᕕᕐᕕᖕᒥ ᐊᕿᑦᑐᒥ ᒪᑐᐃᕐᓂᖃᓚᐅᖅᐳᖅ ᑎᓯᐱᕆ 11−ᒥ.

“ᐊᖏᓂᖅᓴᐅᕗᖅ ᐊᒻᒪ ᖃᐅᒪᓂᖅᓴᐅᓪᓗᓂ ᓄᑕᐅᙱᑦᑐᒥ ᑯᐊᐸᐅᓚᐅᖅᑐᒥ,” ᐅᖃᓚᐅᖅᐳᖅ ᑐᐊᐃᓐ ᐅᐃᓪᓯᓐ, ᐅᑭᐅᖅᑕᖅᑐᒥ ᑯᐊᐸᒃᑯᓐᓂ ᓕᒥᑎᑦ ᐊᖓᔪᖅᑳᖓᑕ−ᑐᒡᓕᐊᓂ.

ᓄᑖᖅ, ᒪᕐᕉᖕᓂ-ᖁᓕᕇᒃᑐᒥ ᐃᒡᓗᖁᑎᖓ ᐊᖏᓂᖅᓴᐅᕗᖅ ᐊᒻᒪ ᐃᓂᒃᓴᖃᖅᐳᖅ ᐃᒡᓘᑉ−ᐃᓗᐊᓂ ᐃᖅᑲᓇᐃᔭᖅᑎᓄᑦ ᐱᓕᒻᒪᒃᓴᓂᐅᔪᒥ, ᐊᒻᒪᓗ ᓯᕐᓗᐊᖓᓂ, ᑎᑎᕋᕐᕕᓂᑦ ᐊᒻᒪ ᑮᓇᐅᔭᒃᑯᕕᖓᓂ.

“ᑯᐊᐸᐅᔪᑦ ᓈᒻᒪᒃᓴᖅᑎᑦᑎᓇᓱᐊᖅᐳᑦ [ᑭᒃᑯᓕᒫᑦ] ᐱᔭᕆᐊᖃᕐᓂᖏᓐᓂ ᓂᕿᓄᑦ, ᑭᓯᐊᓂ ᓴᓇᕐᕈᑎᖃᖅᐳᑦ, ᐊᒻᒪ ᐊᓐᓄᕌᖃᖅᖢᑎᒃ, ᐃᓯᒐᐅᔭᖃᖅᖢᑎᒡᓗ ᑲᒫᓗᖕᓂᓪᓗ, ᐊᒻᒪ ᐅᐊᔭᓅᖅᑐᓂ, ᐃᒡᓗᒥᐅᑕᓂᓪᓗ, ᓇᓚᕈᕐᕕᖕᓂᓪᓗ ᑭᐳᓂᓪᓗ ᐃᒡᓕᓂᓪᓗ, ᐊᒻᒪ ᑎᑕᒍᑎᖃᕆᕗᑦᑕᐅᖅ,” ᐅᐃᓪᓯᓐ ᐅᖃᓚᐅᖅᐳᖅ.

ᐊᑕᐅᓯᖅ ᐊᔾᔨᓕᐅᖅᑕᐅᔪᖅ ᐃᒡᓗᓕᖕᒥ ᑯᐊᐸᒃᑯᓐᓂ ᑐᓂᓯᓚᐅᕐᓂᖓᓂ ᓄᑖᖑᔪᒥ ᓂᐅᕕᕐᕕᖕᒥ ᑕᑯᒃᓴᐅᑎᑦᑎᕗᖅ ᖃᔅᓯᒐᓚᖕᓂ ᑯᑭᑦᑕᐹᓂ ᑕᑯᒃᓴᐅᑎᑕᐅᔪᓂ ᖁᑦᑎᒃᑐᒥ ᖁᓕᕈᐊᕐᒥ.

ᐅᐃᓪᓯᓐ ᐅᖃᑲᐅᖅᑐᓚᐅᖅᐳᖅ ᑯᐊᐸᐅᔪᒥ ᐊᖏᓂᖅᓴᐅᕗᖅ ᐃᒡᓗᕐᔪᐊᑐᐃᓐᓇᐅᔪᒥ.

“ᑯᐊᐸᐅᔪᒥ ᑲᑐᔾᔨᖃᑎᒌᖑᕗᖅ ᐃᓄᖕᓂ; ᓄᑖᖑᔪᒥ ᑯᐊᐸᖃᙱᓚᖅ” ᐃᓘᓕᖕᒥ. “ᑕᐃᒃᑯᐊᑦᑕᐃᓐᓇᖅ ᑲᑐᔾᔨᖃᑎᒌᖑᕗᖅ ᐃᓄᖕᓂ ᑕᐃᒪᐃᓯᒪᓂᖓᓂ ᐊᕐᕌᒍᑦ 50 ᐅᖓᑖᓄᑦ,” ᐅᖃᓚᐅᖅᐳᖅ.

ᐃᑭᕐᔪᐊᖅᑐᖃᖅᐳᖅ ᐃᒡᓗᓕᖕᒥ ᑯᐊᐸᒃᑯᓐᓂ ᔭᓄᐊᕆ 2021−ᒥ. (ᑐᓴᒐᒃᓴᓕᕆᔨᒃᑯᓐᓂ ᐊᔾᔨᖁᑎᖓ)

ᒪᑐᐃᖅᓯᓪᓚᕆᖕᓂᐅᔪᒥ ᓂᕆᐅᒋᔭᐅᕗᖅ ᐱᓕᕆᐊᖑᓂᐊᕐᓂᖓᓂ ᓄᑖᒥ ᐊᕐᕌᒍᒥ ᐱᒋᐊᕐᓂᐸᓗᐊᓂ, ᑭᓯᐊᓂ ᓇᖕᒥᓂᖃᖃᑕᐅᔪᑦ ᒪᑐᐃᖅᓯᔪᒪᓚᐅᖅᐳᑦ ᐆᒥᖓ “ᐱᐅᔪᒻᒪᕆᐊᓗᖕᒥ ᓄᓇᓕᖕᓂ ᐱᖁᑎᒋᔭᐅᔪᒥ ᐊᑐᙱᓗᐊᖅᑕᐅᔾᔮᙱᑦᑐᒥ,” ᐅᐃᓪᓯᓐ ᐅᖃᓚᐅᖅᐳᖅ.

ᒪᑐᐃᖅᓵᓕᓂᐅᔪᒥ ᐱᔪᓐᓇᖅᑎᑦᑎᓂᐊᕆᕗᖅ ᐱᓕᕆᓂᖏᓐᓂ ᐊᑲᐅᙱᓕᐅᕈᑕᐅᔪᓂ ᐱᓕᕆᔾᔪᓯᐅᔪᓂ ᑭᓱᓕᒫᑦ ᓂᐅᕕᖅᑕᐅᑎᓪᓗᒋᑦ ᖃᕋᓴᐅᔭᑎᒍᑦ.

ᐅᐃᓪᓯᓐ ᐅᖃᕈᓐᓇᓚᐅᙱᓚᖅ ᑭᖑᓪᓕᖅᐹᒥ ᐊᑭᒋᔭᖓᓂ ᓄᑖᖑᔪᒧᑦ ᓂᐅᕕᕐᕕᐅᔪᒧᑦ, ᑭᓯᐊᓂ ᖃᔅᓯᒐᓚᖕᓂ ᒥᓕᐊᓐᑐᖅᑐᒥ ᐱᓕᕆᐊᒃᓴᐅᓚᐅᖅᐳᖅ ᐅᕙᙶᖅᑐᓂ ᓇᓪᓕᐅᒃᑯᒫᓂ, ᐊᒥᐊᒃᑯᖓᓂ ᐋᖅᑭᒃᓱᖅᓯᒪᓪᓗᓂ ᐱᑕᖃᖅᐸᒌᖅᑐᒥ “ᑲᑎᑉᐸᓪᓕᐊᔪᒥ ᑕᐃᒪᐃᓪᓗᐊᖅᑎᑕᐅᓂᕐᒥ ᐊᒻᒪ ᐊᑭᓕᒃᓴᓄᑦ ᑮᓇᐅᔭᖃᖅᑎᑕᐅᓂᐅᔪᒥ,” ᐅᖃᓚᐅᖅᐳᖅ.

ᐅᐃᓪᓯᓐ ᐅᖃᓚᐅᖅᐳᖅ ᓄᑖᖑᔪᖅ ᑮᓇᐅᔭᒃᑯᕕᒃ ᐱᓗᐊᖅᑐᒥ ᐱᒻᒪᕆᐅᕗᖅ ᐃᓚᔭᐅᓂᖓᓂ. ᐊᐅᓚᑕᐅᓪᓗᓂ ᐊᓪᓚᓄᑦ ᑮᓇᐅᔭᒃᑯᕕᖓᓂ ᑲᓇᑕᒥ, ᐊᑐᐃᓐᓇᖃᖅᑎᑦᑎᓂᐊᖅᐳᖅ ᐱᔨᑦᑎᕋᕐᓂᕐᒥ ᐃᓄᒃᑎᑐᑦ, ᐅᖃᓚᐅᖅᐳᖅ.

ᐃᑭᓚᐅᖅᑎᓪᓗᒍ, ᑯᐊᐸᒃᑯᑦ ᐋᖅᑭᒋᐊᖅᓯᔭᕆᐊᖃᓚᐅᖅᐳᑦ. ᓴᖑᑎᑦᑎᓚᐅᖅᐳᑦ ᐱᑕᖃᖅᐸᒌᖅᑐᒥ ᓂᐅᕕᕐᕕᕋᓛᒥ ᒥᑭᑦᑐᒥ−ᓂᕿᓄᑦ ᓂᐅᕕᕐᕕᐅᔪᒧᑦ, ᓅᑎᕆᓪᓗᑎᒃ ᑕᒪᐃᑎᒍᑦ ᓂᐅᕕᐊᒃᓴᓂ ᐊᑐᖅᑕᐅᙱᓗᐊᖅᑐᒥ ᑐᒃᓯᐊᕐᕕᖕᒥ ᐃᓂᐅᔪᒥ ᐊᒻᒪ ᑐᓂᓯᓪᓗᑎᒃ ᐊᓪᓚᕝᕕᓕᕆᓂᕐᒥ ᐃᖅᑲᓇᐃᔭᖅᑎᐅᔪᓂ ᑐᔪᕐᒥᕕᐅᔪᒧᑦ ᐊᐅᓚᑕᖓᓐᓂ.

“[ᐅᓇ ᑭᓲᕗᖅ] ᑲᑐᔾᔨᖃᑎᒌᖕᓂᐅᔪᒥ ᐃᓄᖕᓂ, ᓂᐅᕕᕐᕕᑐᐃᓐᓇᐅᙱᑦᑐᖅ, ᐃᒡᓗᕐᔪᐊᖑᑐᐃᓐᓇᐅᙱᑦᑐᖅ” ᑐᑭᖃᕐᓂᖓᓂ, ᐅᖃᓚᐅᖅᐳᖅ. “ᑯᐊᐸᒃᑯᑦ ᐊᑭᓖᔪᓐᓇᓚᐅᖅᐳᑦ ᑐᑭᖃᑦᑎᐊᖅᑐᒥ ᐊᖏᓂᐅᔪᒥ ᐃᓚᒋᔭᐅᔪᓂ [ᐊᕕᒃᑐᖅᑕᐅᓂᖏᓐᓂ ᕿᑐᕐᙱᐅᕈᑎᓂ] ᐃᓚᒋᔭᐅᔪᓄᑦ ᐃᓱᒪᒋᓇᒍ ᐊᐅᓚᑦᑎᓂᕐᒥ ᒥᑭᑦᑐᒥ−ᓂᕿᑖᕐᕕᖕᒥ ᓂᐅᕕᕐᕕᐅᔪᒥ.”

ᑯᐊᐸᒃᑯᑦ ᐊᑭᓖᓚᐅᖅᐳᑦ $1,434,866−ᓂ ᐃᓚᒋᔭᐅᔪᓂ ᐊᕕᒃᑐᖅᑕᐅᓂᖏᓐᓂ ᕿᑐᕐᙱᐅᕈᑎᓂ ᑭᖑᓪᓕᖅᐹᒥ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ, ᐅᖃᐅᓯᐅᓪᓗᓂ ᐊᕕᒃᑐᖅᓯᒪᓂᐅᔪᒥ ᑲᒪᔨᐅᔪᒥ ᑖᑦ ᒪᒃᓈᑎᓐ.

ᐃᑭᑦᑐᖅ, ᓯᕗᓪᓕᕐᒥ ᐃᓱᒪᒋᔭᐅᓚᐅᖅᑐᒥ “ᐸᓴᒍᓱᖕᓇᙱᓐᓂᖓᓂ,” ᑭᖑᓂᐊᒍᑦ ᐅᖃᐅᓯᐅᓚᐅᖅᐳᖅ ᐱᔮᖅᑯᒧᑦ ᐃᑭᑎᑕᐅᓂᖓᓂ ᐊᒻᒪ ᒪᕐᕉᖕᓂ ᒪᒃᑯᒃᑐᓂ ᐃᖅᑲᖅᑐᒐᒃᓴᙳᓚᐅᖅᐳᑦ ᑲᑎᙵᓂᖃᖅᑐᒥ ᐃᑭᑦᑐᒥ.

ᓂᕿᓄᑦ ᓂᐅᕕᕐᕕᖓ ᒪᑐᐃᖓᓕᖅᐳᖅ ᒫᓐᓇ 9 ᐅᓪᓛᒃᑯᑦ 6 ᐅᓐᓄᒃᑯᑦ ᓇᒡᒐᔾᔭᐅᒥ ᓯᕙᑖᕐᕕᖕᒧᑦ ᐊᒻᒪ 1 ᐅᓐᓄᓴᒃᑯᑦ 6 ᐅᓐᓄᒃᑯᑦ ᓈᑦᑎᖑᔭᒥ.