ᐃᓄᐃᑦ ᐃᓕᖅᑯᓯᖏᑦ ᓴᖅᑭᑎᑕᐅᓯᒪᔪᖅ ᒥᐊᓕ ᓴᐃᒪᓐ ᒐᕙᓇ ᔭᓄᕈᙳᖅᑎᑕᐅᑎᓪᓗᒍ

‘ᐃᓄᒃᑎᑐᑦ ᐊᑎᕋ ᓂᖏᐅᑲᓪᓚᒃ, ᐊᒻᒪᓗ ᐳᕋᐃᒻ ᒥᓂᔅᑖ, ᑐᑭᖃᖅᑐᖅ ᓂᖏᐅᑯᓗᒃ ᐃᓱᒪᑕᐅᔪᒻᒪᖅ,’ ᓴᐃᒪᓐ ᐅᖃᖅᑐᖅ ᑎᔅᓯᒃᑕᖅᖢᓂ

ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ ᐅᐃᖓᓗ ᕗᐃᑦ ᕗᕇᓱ ᓴᓇᑦ ᐃᒡᓗᐊᓗᐊᓂ ᐋᑐᕚᒥ ᓇᒡᒐᔾᔭᐅᑎᓪᓗᒍ. ᒍᕆᒃ ᐲᑕᔅ, ᐃᓯᖅᑎᑦᑎᔨ ᐸᓛᒃ ᐅᕌᑦᒥ, ᑕᓕᖅᐱᐊᓃᑦᑐᖅ. (ᐊᔾᔨᓕᐅᕆᔨ ᒪᐃᒃ ᑲᕈᓯᑐ, ᑐᓂᔭᖓ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ)

By ᓴᐃᕋ ᕌᔾᔪᔅ

For an English version of this story, see Inuit culture highlighted as Mary Simon takes office as Governor General

ᒥᐊᓕ ᓴᐃᒪᓐ ᐱᓕᕆᐊᖃᓯᒋᐊᓚᐅᕐᑐᖅ ᑲᓇᑕᒧᑦ ᒐᕙᓇ ᔭᓄᕉᓂᕐᒥᒃ ᓇᒡᒐᔾᔭᒥ ᐅᓪᓛᖓᓂᒃ ᐱᓕᕆᐊᖄᓪᓚᓚᐅᖅᖢᑎᒃ ᒥᒃᖠᕚᓪᓕᖅᓯᒪᔪᒥᒃ ᖁᕕᐊᓲᑎᖃᕐᓂᕐᒥᒃ ᓴᓇᑦᑯᑦ ᐃᒡᓗᐊᓗᖓᓂᒃ ᐋᑐᕚᒥ.

ᓄᓇᕕᒃᒥᐅᑕᖅ ᐃᓕᓴᐱ ᐃᙱᕐᑐᖅ ᐃᙱᐅᑎᒥᓂᒃ ᐊᕐᓇᖅ ᖁᕕᐊᓲᑎᖃᑲᑕᒃᑎᓪᓗᒋᑦ. (ᐊᔾᔨᙳᐊᖅ ᐅᑯᓇᙵᑦ ᐅᕙᒍᑦ ᑏᕖ)

ᐅᓇ ᓄᓇᕕᒻᒥᐅᑕᓪᓚᕆᒃ ᐃᓄᒃ ᓯᕗᓕᐅᕐᑎᐅᕙᒃᑐᖅ ᐊᒻᒪᓗ ᒪᓕᒐᓕᕆᓂᕐᒥᒃ ᐱᓕᕆᐊᖃᖅᖢᓂ ᑕᐃᔭᐅᓚᐅᕐᒪᓐ ᑕᖅᑭᖅ ᐱᒋᐊᓕᓵᖅᑎᓪᓗᒍ ᑖᔅᓱᒥᖓ ᐱᓕᕆᐊᖃᖁᔭᐅᓪᓗᓂ, ᑕᐃᒪᐃᓐᓂᖓᓄᓪᓗ ᑲᓇᑕᒥ ᓯᕗᓪᓕᖅᐹᖑᔪᖅ ᓄᓇᖃᖅᑳᖅᑐᖅ ᒐᕙᓇ ᔭᓄᕈᙳᖅᑎᑕᐅᔪᖅ.

“ᑐᓴᖅᓯᒪᒐᒪ ᑲᓇᑕᒥᐅᑕᓂᒃ ᓄᓇᕗᑦ ᐱᕕᖃᒃᑲᓐᓂᕈᓐᓇᕐᓂᐊᓕᕐᓂᖓᓂᒃ ᐊᒻᒪᓗ ᐃᓅᖃᑎᒌᒍᓐᓇᖅᑎᑦᑎᔪᒪᕗᖓ ᑭᒃᑯᓕᒫᓂᒃ,” ᓴᐃᒪᓐ ᐅᖃᓚᐅᖅᑐᖅ ᐅᖃᓪᓚᒃᑎᓪᓗᒍ ᐱᖓᓱᓂ ᐅᖃᐅᓯᕐᓂ ᐊᑐᖅᖢᓂ, ᖃᓪᓗᓈᑎᑦ, ᐅᐃᕖᑐᑦ ᐊᒻᒪ ᐃᓄᒃᑐᑦ.

“ᑐᓴᖅᓯᒪᒐᒪ ᑲᓇᑕᒥᐅᑕᓂᒃ ᐅᕙᓐᓂ ᐱᓇᓱᖁᔨᓯᒪᔪᓂᒃ ᓄᑖᓂᒃ ᐊᒻᒪ ᐋᖅᑭᒋᐊᒃᓴᓐᓂᕈᑎᒃᓴᓂᒃ ᒐᕙᓇ ᔭᓄᕈᒧᑦ ᐱᓕᕆᐊᖑᔭᕆᐊᓕᒃᑯᑦ ᑲᓇᑕᒥᐅᑕᑦ ᐃᑲᔪᕈᓐᓇᖁᓪᓗᒋᑦ ᖃᓄᐃᓕᐅᕈᓘᔭᕈᑎᓂᒃ ᓵᙵᕙᒃᑕᖏᓐᓂᒃ.”

ᓴᐃᒪᓐ ᐅᖃᓚᐅᕐᑐᖅ ᐊᑐᕐᓂᐊᕐᓂᕋᖅᖢᓂᐅᒃ ᐃᓂᒋᓕᖅᑕᓂ ᐋᖅᑭᒋᐊᒃᑲᓐᓂᕈᑎᓕᕆᓂᕐᒧᑦ, ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᖃᓄᐃᓕᐅᕈᑎᒃᓴᓕᕆᓂᕐᒧᑦ ᐊᒻᒪᓗ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᖅᒥᒃ, ᑖᒃᑯᐊᓗ ᐅᖃᐅᓯᕆᓪᓗᓂᒋ ᐊᒃᑐᐊᖃᑦᑕᐅᑎᖃᑎᒌᖕᓂᖏᓐᓂᒃ.

ᐅᖃᐅᓯᐅᔪᓂᒃ ᐅᕙᙵᑦ ᓱᓕᓂᖅ ᐊᒻᒪ ᐋᖅᑭᒋᐊᕈᑎᓄᑦ ᑲᒥᓴᓐᑯᑦ ᐅᓂᒃᑳᓕᐊᖏᓐᓂᒃ: “ᐋᖅᑭᒋᐊᑲᓐᓂᕐᓂᖅ ᐃᑲᔪᖅᑐᐃᔭᕆᐊᖃᖅᑐᖅ ᓄᓇᖃᖅᑳᖅᑐᓂᒃ ᒪᒥᓴᕋᓱᖕᓂᖏᓐᓂᒃ ᓱᕋᐃᒍᑎᕕᓂᐊᓗᖕᓂᒃ ᓄᓇᖃᖅᑎᒌᒃᑎᑕᐅᒐᓱᖕᓂᖅᒧᑦ ᑕᒪᓐᓇᓗ ᐊᒃᓱᐊᓗᒃ ᐃᓅᓯᖏᓐᓂᒃ ᓈᒻᒪᙱᑦᑐᓕᐅᕈᑎᒋᓯᒪᓪᓗᓂᔾᔪᑦ.”

“ᑕᐅᑐᒃᑕᕋᓕ ᐋᖅᑭᒋᐊᕈᑎᓕᕆᓂᖅ ᐃᓅᓯᕐᒧᑦ ᐃᓚᒋᔭᐅᓂᖓᓂᒃ ᐊᒻᒪᓗ ᖃᐅᑕᒫᓐ ᐱᓕᕆᐊᖑᔭᕆᐊᖃᖅᐸᒃᖢᓂ,” ᐅᖃᖅᑐᖅ. “ᐋᖅᑭᒋᐊᕈᑎᓕᕆᓂᖅ ᖃᐅᔨᖃᑦᑕᐅᑎᔾᔪᑎᐅᕗᖅ ᐃᓅᖃᑎᑦᑎᓐᓂᒃ.

“ᒐᕙᓇ ᔭᓄᕉᓂᐊᕐᓗᖓ, ᓴᖅᑭᑎᑦᑎᓂᐊᕋᒪ ᒪᑯᓂᖓ ᓄᓇᓕᖕᓂ ᐊᒻᒪ ᓄᓇᖃᖅᑳᖅᑐᓄᑦ ᓴᐳᔾᔨᓯᒪᓂᕐᒧᑦ ᐊᕙᑎᒋᔭᒥ ᖃᓄᐃᓕᐅᕈᑎᖏᓐᓂᒃ ᐊᒻᒪᓗ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᖃᓄᐃᓕᐅᕈᑎᐅᓂᐊᖅᑐᒥᒃ ᑕᒪᒃᑯᓄᖓ ᐃᑲᔪᕈᑎᐅᓪᓚᕆᖕᓂᐊᖅᑐᓂᒃ ᐊᒻᒪᓗ ᑲᓇᑕᒥᐅᑕᓂᒃ ᐊᑐᖅᑕᐅᔪᒪᓕᕈᓐᓇᕐᓗᑎᒃ.”

ᓴᐃᒪᓐ ᐅᖃᓪᓚᓚᐅᖅᑐᖅ ᒫᓂ 40-ᓄᑦ ᐅᕙᓂ ᓴᓇᑦ ᐃᒡᓗᐊᓗᖓᓂᒃ – ᐅᓅᕈᓐᓃᖅᐹᓪᓕᖅᓯᒪᔪᓄᑦ ᐃᓄᖕᓄᑦ ᓄᕙᒡᔪᐊᕐᓇᖅ-19 ᐱᔾᔪᑎᒋᔭᐅᓪᓗᓂ.

ᐊᑐᓚᐅᖅᑐᖅ ᕿᕐᓂᖅᑕᕐᓂ ᐊᕐᓇᙴᔾᔪᑎᒥ ᐊᒻᒪ ᔭᐃᑲᒃᓯᒪᓪᓗᓂ ᓴᓇᔭᐅᔪᒥ ᕕᒃᑑᕆᐊ ᐅᒃᐱᒃᒧᑦ ᖁᐊᖅᑕᖅᒥᑦ, ᐊᒻᒪᓗ ᓄᕕᕐᓴᖅᓯᒪᔪᒥ ᖁᖓᓯᕐᒥᐅᑕᖃᖅᖢᓂ ᔫᓕ ᒍᕆᓂᐃ ᑰᔾᔪᐊᕐᒥᐅᑕᐅᑉ ᓴᓇᓂᑯᖓᓂ.

ᓴᐃᒪᓐ ᐅᖃᐅᓯᖃᓚᐅᕐᑐᖅ ᓱᕈᓯᐅᓪᓗᓂ ᐃᖅᑲᐅᒪᔭᖏᓐᓂᒃ ᐱᕈᖅᐸᓪᓕᐊᑎᓪᓗᒍ, ᐊᐅᓪᓛᖅᐸᖕᓂᕐᒥᒃ ᐊᒻᒪᓗ ᐊᖑᓇᓱᖃᑦᑕᕐᓂᖅᒥᒃ ᑲᖏᖅᓱᐊᓗᔾᔪᐊᖅ ᖃᓂᒋᔭᖓᓂ ᔪᐊᔾ ᑰᖕᒥᑦ, ᐊᒻᒪ ᑭᖑᓂᐊᓂ ᑰᔾᔪᐊᖅᒥᑦ – ᐊᑐᖅᓯᒪᔭᖏᑦ ᐋᖅᑭᒍᑎᒋᓯᒪᓂᖏᓐᓂᒃ ᐱᒻᒪᕆᐅᒋᔭᖏᓐᓂᒃ.

“ᐃᓄᒃᑎᑐᑦ ᐊᑎᕋ ᓂᖏᐅᑲᓪᓚᒃ, ᐳᕋᐃᒻ ᒥᓂᔅᑖ, ᑐᑭᖃᕐᑐᖅ ᓂᖏᐅᑯᓗᒃ ᐃᓱᒪᑕᐅᔪᒻᒪᖅ,” ᓴᐃᒪᓐ ᐅᖃᓚᐅᕐᑐᖅ ᑎᔅᓯᑦᑕᒃᖢᓂ.

ᖁᕕᐊᓲᑎᖃᕐᓂᖅ ᐋᖅᑭᒃᓱᖅᓯᒪᐅᓚᐅᕐᑐᖅ ᐃᓚᖃᖅᖢᓂ ᐃᓄᐃᑦ ᐃᓕᖅᑯᓯᖓᓂᒃ: ᐱᒋᐊᕈᑎᖃᖅᖢᓂ ᖁᓪᓕᖅᒥᓐ ᐃᑯᒻᒪᒃᓴᐃᓂᕐᒥᒃ ᐊᒻᒪᓗ ᐱᐊᓂᒃᑕᐅᓪᓗᓂ ᕿᓚᐅᔾᔭᖅᑐᖃᖅᖢᓂ. ᐃᙱᖅᑎ ᐃᓕᓴᐱ ᐃᙱᓚᐅᕐᒥᔪᖅ ᐊᕐᓇᖅ ᐃᙱᐅᓯᖓᓂ ᑕᕝᕙᓂ.

ᓴᐃᒪᓐ ᐱᓕᕆᓕᒪᑦᑎᐊᕐᑐᖅ ᐊᒻᒪ ᓯᕗᓕᐅᖅᑎᐅᓕᒪᓪᓗᓂ ᒐᕙᓇ ᔭᓄᕉᓂᐊᓕᖅᑎᓪᓗᒍ. ᐊᖓᔪᖅᑳᕆᔭᐅᓚᐅᖅᑐᖅ ᒪᑭᕕᒃᒧᓐᓄᑦ, ᐃᓄᐃᑦ ᑕᐱᕇᑦ ᑲᓇᑕᒥ, ᐃᓄᐃᑦ ᐅᑭᐅᕐᑕᖅᑐᕐᒥᐅᑕᑦ ᑲᑎᒪᔨᕐᔪᐊᖏᓐᓄᑦ ᐊᒻᒪᓗ ᐋᒻᐹᓴᑑᓂᑰᓪᓗᓂ ᐅᑭᐅᕐᑕᖅᑐᕐᒥᐅᑕᓕᕆᓂᕐᒧᑦ.

ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ, ᐅᐃᖓ ᕗᐃᑦ ᕗᕉᓱ, ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ ᓄᓕᐊᖓᓗ ᓲᕕ ᒍᕆᒍᐊ-ᑐᕉᑑ, ᑐᓵᑎᓪᓗᒋᑦ ᐋᑐᕚᒥ ᕆᕗ ᐃᙱᕐᑎᓂᒃ ᓴᓇᑦ ᐃᒡᓗᐊᓘᑉ ᓵᖓᓂ ᐋᑐᕚᒥ. ᒍᕆᒃ ᐲᑕᔅ, ᐃᓯᖅᑎᑦᑎᔨ ᐸᓛᒃ ᐅᕌᑦᒥ, ᑕᓕᖅᐱᐊᓃᑦᑐᖅ. (ᐊᔾᔨᓕᐅᕆᔨ ᒪᐃᒃ ᑲᕈᓯᑐ)

ᐃᓚᐅᓚᐅᖅᓯᒪᖕᒥᔪᖅ ᐋᔩᖃᑎᒌᒃᑎᓪᓗᒋᑦ 1982-ᒥᑦ ᐆᒧᖓ ᑲᓇᑕᒥ ᒪᓕᒐᕐᔪᕐᐊᓃᑦᑐᓂᒃ.

“ᐊᕐᕌᒍᑦ 39 ᓯᕗᓂᐊᓂ ᐅᓇ ᒐᕙᒪᒃᑯᓐᓄᑦ ᑲᑎᒪᕕᒡᔪᐊᕐᕕᐅᑎᓪᓗᒍ, ᐱᓕᕆᐊᖃᓚᐅᕐᓯᒪᒐᑦᑕ ᐱᔪᓐᓇᐅᑎᕗᑦ ᓇᓗᓇᐃᖅᑕᐅᑦᑎᐊᕋᓱᒃᖢᑎᒍᑦ ᑲᓇᑕᒥ ᒪᓕᒐᕐᔪᐊᓂᒃ,” ᐃᖅᑲᐅᒪᔪᖅ. “ᑕᐃᔅᓱᒪᓂ ᐊᑐᓚᐅᖅᓯᒪᔭᕗᑦ ᒫᓐᓇᒥᒃ ᐊᔪᕐᓇᙱᔾᔪᑎᐅᕗᑦ.”

ᓴᐃᒪᓐ ᐅᖃᐅᓯᖃᓚᐅᕐᒥᔪᖅ ᑐᓴᑲᑕᖕᓂᖓᓂᒃ ᐅᐃᕖᑐᑦ ᐅᖃᕈᓐᓇᙱᓐᓂᖓᓂᒃ, ᐅᖃᓕᒫᖅᖢᓂ ᑖᔅᓱᒥᖓ ᐅᖃᐅᓯᕐᒥᒃ ᐊᑐᖅᖢᓂ.

“ᑐᓴᖅᓯᒪᒐᒪ ᑲᓇᑕᒥᐅᑕᓂᒃ ᐃᑲᔪᖅᑐᐃᔪᓂᒃ ᐱᓇᓱᐊᖅᑕᓐᓂᒃ ᐊᔪᕈᓐᓃᕋᓱᖕᓂᓐᓂ ᐅᐃᕖᑐᑦ, ᐊᒻᒪᓗ ᐃᑲᔪᕈᒪᔪᓂᒃ ᐊᔪᕈᓐᓃᕐᓴᕐᓂᓐᓂ,” ᐅᖃᖅᑐᖅ.

ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ ᖁᕕᐊᒋᔭᖃᒪᐅᕐᑐᖅ ᓴᐃᒪᓐ ᑕᐅᑐᙳᐊᖅᑕᖓᓂ ᐃᓕᖁᓯᕐᓂᒃ ᖃᐅᔨᒪᔭᐅᔭᕆᐊᓕᖕᓂ ᐊᒻᒪᓗ ᐅᖃᓪᓚᐅᓯᓕᕆᔨᐅᔪᓂᒃ.

“ᖃᐅᔨᒪᔪᖓ ᐱᓕᕆᓕᒪᓂᖓᒍᑦ ᐃᑲᔪᒻᒪᕆᖕᓂᐊᖅᑐᖅ ᐊᒻᒪᓗ ᑲᓇᑕᒥᐅᑕᓕᒫᓂᒃ ᑭᒡᒐᖅᑐᐃᔪᓐᓇᑦᑎᐊᕐᓗᓂ ᐊᔾᔨᒌᙱᑦᑑᑎᐅᒐᓗᐊᖅᐸᑕ, ᑕᒪᐃᓐᓂ ᑕᒫᓂ ᐊᒻᒪ ᐊᑭᐊᓂᒃ, ᓈᒻᒪᒃᑐᒃᑯᑦ ᐊᒻᒪ ᐱᒻᓚᕆᒃᑎᒍᑦ ᐊᒻᒪᓗ ᐊᑐᕐᓗᓂ ᑲᓇᑕᒥ ᒪᕐᕈᐃᓂ ᐅᖃᐅᓯᐅᕙᒃᑐᓂᒃ,” ᑐᕉᑑ ᐅᖃᓚᐅᖅᑐᖅ ᓇᒐᔾᔭᒥ ᖁᕕᐊᓲᑎᖃᕐᓇᒥᒃ.

“ᑲᓇᑕ ᓴᙱᓂᕐᓴᐅᖁᓪᓗᒍ ᐃᓱᒪᒋᔭᑎᑦ ᐊᑐᕆᐊᖃᕋᑦᑎᒍᑦ.”

ᖁᕕᐊᓲᑎᑳᓂᒃᑎᓪᓗᒋᑦ ᓴᐃᒪᓐ ᕇᑑ ᕼᐋᒻᒧᙵᐅᓚᐅᖅᑐᖅ, ᐊᖏᕐᕋᕆᓂᐊᕐᑕᖓᓂ ᐅᐃᒌᒃ, ᓈᓚᐅᑎᓕᕆᔨᕕᓂᒃ ᓄᖅᑲᖓᓕᕐᑐᖅ ᕗᐃᑦ ᕗᕇᓱ, ᐊᒻᒪ ᕿᒻᒥᖓᑦ ᓂᕙ. ᑖᒃᑯᐊᒃᑕᐅᖅ ᐊᐃᑉᐸᕇᒃ ᓯᑕᑎᐅᓪᒥ ᐊᖏᕐᕋᖃᖃᑦᑕᕐᓂᐊᖅᑑᒃ ᐃᖅᑲᓇᐃᔭᕐᓗᑎᒡᓗ ᐅᕙᓂ ᑯᐸᐃᒃ ᓯᑎᒥᑦ.

ᒐᕙᓇ ᔭᓄᕈᓪ ᑯᐃᓐᒧᑦ ᑭᒡᒐᖅᑐᐃᔨᐅᔪᖅ ᑲᓇᑕᒥ. ᒪᓕᒐᓕᕆᔨᕐᔪᐊᒃᑯᑦ ᐊᒻᒪᓗ ᒪᓕᒐᖅᑎᒍᑦ ᐊᖓᔪᖅᑳᖑᓂᕐᒧᑦ, ᑯᐃᓐ ᐃᓕᓴᐱ II ᑲᓇᑕᒧ ᐊᖓᔪᖅᑳᒻᒪᕆᐅᑎᑕᐅᔪᖅ.

ᒐᕙᓇ ᔭᓄᕈᓪ ᑲᒪᒋᔭᖃᖅᑐᖅ ᖁᕕᐊᓲᑎᖃᖃᑦᑕᕐᓂᕐᒥᒃ ᐊᒻᒪᓗ ᒪᓕᒐᖅᑎᒍᑦ ᐱᓕᕆᐊᒃᓴᓂᒃ, ᐊᖓᔪᖅᑳᒻᒪᕆᐅᓪᓗᓂ ᐅᓇᑕᖅᑐᒃᓴᓄᑦ ᐊᒻᒪᓗ ᑭᒡᒐᖅᑐᐃᓪᓗᓂ ᑲᓇᑕᒥ ᐊᒻᒪ ᐊᑭᐊᓂᑦ.

Share This Story

(0) Comments