ᐃᓄᐃᑦ ᑕᐱᕇᑦ ᑲᓇᑕᒥ, ᐸᓖᓯᒃᑯᑦ ᐱᓕᕆᐊᖃᖅᑐᑦ ᐱᐅᓯᕚᓪᓕᖅᑎᑦᑎᓇᓱᖕᓂᕐᒥᒃ ᖃᓄᐃᓕᐅᕈᓯᕐᓂᒃ ᐃᓄᐃᓪᓗ ᐸᓖᓯᓪᓗ ᐃᖕᒥᖕᓄᑦ

For English version, see ITK, RCMP working to improve relationship between Inuit and police

ᓄᑖᑦ ᐸᕐᓇᐅᑎᒋᔭᐅᔪᑦ ᐅᑯᓄᖓ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᐸᓖᓯᒃᑯᓐᓄᑦ ᑐᕌᖓᓇᓱᒃᑐᖅ ᐱᐅᓯᕚᓪᓕᖅᑎᑦᑎᓂᕐᒥᒃ ᖃᓄᐃᓕᐅᕈᓯᐅᕙᒃᑐᓂᒃ ᐃᓄᖕᓂᒃ ᐊᒻᒪ ᐸᓖᓯᑯᓐᓂ.

ᑕᐃᒪᐃᑎᓪᓗᒍ ᑕᒪᕐᒥ ᐅᖃᓚᐅᕐᑐᑦ ᐱᓕᕆᐊᖃᕈᒪᓂᕋᖅᖢᑎᒃ ᐊᑯᑦᑐᔾᔪᑎᓂᒃ ᐊᒻᒪ ᓯᕗᓪᓕᐅᔭᕆᐊᓕᖕᓂ ᐸᓖᓯᓕᕆᓂᒃᑯᑦ ᐃᓄᐃᑦ ᓄᓇᖓᓂ.

ᐅᓇ ᐸᕐᓇᐅᑎ ᐃᓚᖃᕐᑐᖅ ᖃᓄᐃᓕᐅᕈᑎᒃᓴᓂ ᓲᕐᓗ ᒪᑯᓂᖓ ᑎᑎᕋᖅᑕᐅᕙᓪᓕᐊᔪᓂᒃ ᑐᓴᐅᒪᑎᑦᑎᖃᑦᑕᕐᓂᕐᒥᒃ ᒪᑯᓂᖓ ᐃᓅᔪᓐᓃᖅᑐᓂᒃ ᐃᒻᒥᓃᕐᓂᕐᒧᑦ, ᐃᒻᒥᓃᕋᓱᒃᓂᑯᓂᒃ ᐊᒻᒪᓗ ᐃᒻᒥᓃᕐᓂᕐᒥᒡᓘᓐᓃᑦ ᐃᓱᒪᓕᖅᑎᑦᑎᓇᓱᕐᓂᕐᒧᑦ; ᐅᓄᕐᓯᕚᓪᓕᖅᑎᑕᐅᓗᑎ ᐃᓄᐃᑦ ᐸᓖᓯᒃᑯᓐᓂ ᐊᒻᒪᓗ ᐱᐅᓯᕚᓪᓕᖅᑎᑕᐅᓗᑎᒃ ᐱᔨᑦᑎᕋᐅᑎᑦ ᐃᓄᒃᑐᑦ ᐅᖃᓪᓚᖃᑦᑕᖅᑐᓄᑦ.

ᐅᓇ ᐱᓕᕆᐊᒃᓴᖅ ᐃᓚᒋᔭᐅᔪᖅ ᐊᖏᓂᕐᓵᓗᖕᒥᒃ ᐸᕐᓇᐅᑎᒧᑦ ᐋᖅᑭᒃᓱᐃᕙᓪᓕᐊᓇᓱᖕᓂᕐᒥᒃ ᐱᓕᕆᖃᑎᒌᖃᑦᑕᕐᓂᖅ ᐊᒻᒪᓗ ᓴᖅᑭᔮᕐᓂᖅᓴᒃᑯᑦ ᐱᓕᕆᐊᖃᖃᑦᑕᕐᓂᕐᒥᒃ ᐊᒻᒪ ᐅᒃᐱᕈᓱᖃᑦᑕᐅᑎᓕᕈᓐᓇᕐᓂᕐᒥᒃ.

ᐅᓄᕐᑐᑦ ᖃᓄᐃᓕᐅᕈᑎᒃᓴᐅᔪᒪᔪᑦ ᐃᓱᒪᓕᐅᕆᔾᔪᑎᓂᙶᖅᑐᑦ ᑲᓇᑕᒥ ᐃᓄᐃᑦ ᖃᓄᐃᓕᐅᕈᑎᖏᓐᓄᑦ ᐸᕐᓇᐅᑎᓂᒃ, ᑖᓐᓇᓕ ᓇᓗᓇᐃᕐᓯᓯᒪᔪᖅ ᐃᓄᖕᓄᑦ ᓯᕗᓪᓕᐅᑎᖁᔭᐅᔪᓂᒃ ᐅᑯᓂᖓ 231-ᓂ ᐅᖄᓚᒍᑎᐅᓯᒪᔪᓂᒃ ᐅᑯᓇᙵᑦ ᑲᓇᑕᒥ ᖃᐅᔨᓇᓱᖕᓂᖅ ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ.

ᖃᓄᐃᓕᐅᕈᑎᒃᓴᑦ ᐋᖅᑭᒃᓯᒪᖕᒥᔪᑦ ᓇᓗᓇᐃᖅᑕᐅᓯᒪᔪᓂᒃ ᖃᓄᐃᓕᐅᕈᑎᐅᖁᔭᐅᔪᓂᒃ ᐅᕘᓇ ᒐᕙᒪᑐᖃᒃᑯᑦ ᐊᖅᑯᑎᖓᑦ ᐱᓕᕆᐊᖃᕐᓂᕐᒥᒃ ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᐊᒻᒪᓗ 2SLGBTQQIA+ ᐃᓄᖕᓂ, ᒐᕙᒪᑐᖃᒃᑯᑦ ᐸᕐᓇᐅᑎᖓ ᖃᐅᔨᓇᓱᖕᓂᕐᒧᑦ ᐱᓕᕆᐊᕆᔭᐅᔪᑎᓂᒃ.

ᐃᓄᐃᑦ ᑕᐱᕉᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ ᐅᖃᓚᐅᕐᑐᖅ ᑎᑎᕋᖅᑕᐅᕙᓪᓕᐊᔪᓂᒃ ᐃᓅᔪᓐᓃᖅᑐᓂᒃ ᐃᒻᒥᓃᕐᓂᕐᒧᑦ, ᐃᒻᒥᓃᕋᓱᒃᓂᑯᓂᒃ ᐊᒻᒪᓗ ᐃᒻᒥᓃᕐᓂᕐᒥᒡᓘᓐᓃᑦ ᐃᓱᒪᓕᖅᑎᑦᑎᓇᓱᖕᓂᕐᒧᑦ ᐃᑲᔪᕈᑎᐅᓇᔭᕐᓂᖏᓐᓂᒃ ᐃᓱᒪᓕᐅᕆᓂᕐᒧᑦ ᐊᒻᒪ ᐊᑐᐊᒐᓕᐅᕐᓂᕐᒧᑦ ᐸᓖᓯᒃᑯᓐᓂ ᖁᑦᑎᖕᓂᕐᓴᒃᑯᑦ.

“ᐅᑯᐊ ᐸᓖᓯᒃᑯᑦ ᑲᑎᕐᓱᐃᕙᓪᓕᐊᖃᑦᑕᕐᓂᖏᑦ ᑎᑎᕋᖅᑕᐅᕙᓪᓕᐊᔪᓂᒃ ᐃᒻᒥᓃᕋᓱᒃᓯᒪᔪᓂᒃ ᐊᒻᒪ ᐃᒻᒥᓃᖅᑐᕕᓂᕐᓂᒃ ᐃᑲᔪᕈᑎᐅᔪᓐᓇᕐᓂᐊᕐᒪᑕ ᖃᓄᖅ ᐱᐅᓂᕐᓴᓂ ᐱᔨᑦᑎᕋᐅᑎᖃᕆᐊᖃᕐᓂᑦᑎᓐᓂᒃ ᐃᓄᖕᓄᑦ, ᐊᒻᒪᓗ ᖃᓄᖅ ᐸᓖᓯᒃᑯᑦ ᐱᓕᕆᐊᖃᕈᓐᓇᕐᓂᖏᓐᓂᒃ ᐱᐅᓂᕐᓴᒃᑯᑦ ᐃᒻᒥᓃᕈᒪᔪᓂᒃ ᐅᐸᒍᑎᔭᕌᖓᑕ,” ᐅᖃᕐᑐᖅ.

“ᐱᓕᕆᖃᑎᖃᕋᑦᑕ ᑎᑎᕋᐅᓯᐅᕙᓪᓕᐊᔪᓂᒃ ᑲᑎᕐᓱᐃᕙᒃᑐᓂᒃ ᐸᓖᓯᒃᑯᓐᓂᒃ ᖃᐅᔨᓇᓱᒃᖢᑕ ᖃᓄᖅ ᐊᑐᐊᒐᓕᐅᕈᓐᓇᕋᔭᕐᒪᖔᑕ ᐃᓱᒪᓕᐅᕆᔾᔪᑎᐅᔪᓐᓇᕐᓂᕐᓴᓂᒃ ᐸᓖᓯᓄᑑᙱᑦᑐᖅ ᑭᐅᕙᒃᑐᓄᑦ ᑭᓯᐊᓂᓕ ᒪᐅᖓ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᓂ ᐃᓄᐃᑦ ᓄᓇᖓᓂᒃ ᐱᐅᓯᕚᓪᓕᕈᓐᓇᕐᒪᖔᑕ ᑐᓴᐅᒪᑎᑕᐅᓗᑎᒃ.”

ᐸᓖᓯᒃᑯᑦ (ᐳᑭᖅᑕᓖᑦ) ᐸᓖᓯᓕᕆᔨᐅᖕᒪᑕ ᐅᓄᕐᓂᕐᓴᓂᒃ ᓄᓇᓕᖕᓂ ᐃᓄᐃᑦ ᓄᓇᖓᓂ.

ᐊᑯᓂᐊᓗᒃ ᓄᓇᕗᒥᑦ ᐃᓄᐃᑦ ᐊᒻᒪᓗ ᐸᓖᓯᒃᑯᑦ ᐃᖕᒥᖕᓂᒃ ᐅᐱᕆᖃᑦᑕᐅᑎᔪᓐᓇᙱᒻᒪᑕ ᐅᑯᓂᖓ ᐱᔾᔪᑎᖃᖅᖢᑎᒃ ᐃᓄᐃᑦ ᕿᒻᒥᖏᑦ ᑐᖁᕋᖅᑕᐅᓚᐅᕐᓯᒪᖕᒪᑕ ᐸᓖᓯᓄᑦ 1950-ᖏᓐᓂᒃ ᐊᒻᒪ 1960-ᖏᓐᓂᒃ ᐊᒻᒪᓗ ᐃᓚᒌᑦ ᓄᒃᑎᑎᑕᐅᑲᑕᖅᖢᑎᒃ.

ᐅᐱᐊᑦ ᐅᖃᓚᐅᕐᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᐊᖃᕐᒥᖕᒪᑕ ᐸᓖᓯᑯᓪᓗ ᐱᐅᓯᕚᓪᓕᖅᑎᑦᑎᓇᓱᒃᖢᑎᒃ ᐱᔨᑦᑎᕋᐅᑎᓂᒃ ᐃᓄᖕᓄᑦ ᐊᕐᓇᓄᑦ, ᓂᕕᐊᕐᓵᓄᑦ ᐊᒻᒪᓗ ᒪᑯᓄᖓ LGBTQ+ ᐃᓄᖕᓄᑦ ᐱᑦᑎᐊᖅᑕᐅᙱᑐᐃᓐᓇᕆᐊᖃᕐᓂᖏᓐᓄᑦ.

ᐱᓕᕆᔪᒪᖕᒥᖕᒪᑕ ᐱᐅᓯᕚᓪᓕᖅᑎᑦᑎᓗᑎᒃ ᐸᓖᓯᒃᑯᑦ ᖃᐅᔨᒪᓂᖏᓐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪᓗ ᐃᓄᒃᑐᑦ ᐅᖃᐅᓯᕐᒥᒃ ᐊᑐᖅᑕᐅᕙᖕᓂᕐᒥᒃ ᑖᒃᑯᓇᓂ.

“ᐃᓱᒪᒐᑦᑕ ᐃᓄᖕᓅᖓᔪᓂᒃ ᐃᓕᖅᑯᓯᕐᒧᑦ ᐊᔪᕈᓐᓃᕐᓴᐅᑎᐅᓇᔭᕐᑐᓂᒃ ᐊᒻᒪ ᐱᐅᓯᕚᓪᓕᕈᑎᐅᓇᔭᖅᑐᓂ ᐸᓖᓯᒃᑯᑦ ᐱᓕᕆᐊᖃᖃᑦᑕᕐᓂᖏᓐᓂᒃ ᐊᒻᒪᓗ ᓄᓇᓕᖕᓂ ᐃᖅᑲᓇᐃᔭᕐᕕᒋᔭᖏᓐᓂᒃ,” ᐅᐱᐊᑦ ᐅᖃᕐᑐᖅ.

“ᐅᓇ ᐃᓱᒪᒋᔭᐅᔭᕆᐊᖃᒻᒪᕆᒃᑐᖅ ᐸᓖᓯᓕᕆᓂᒃᑯᑦ ᐱᔨᑦᑎᕋᐅᑎᑎᒍᑦ — ᓇᓃᒃᑲᓗᐊᖅᐸᑕ ᑲᓇᑕᒥ, ᖃᓄᐃᓕᐅᕈᑎᑦ ᐱᑦᑎᐊᙱᔾᔪᑎᐅᓗᐊᖃᑦᑕᙱᓪᓗᑎᒃ ᐋᓐᓂᕈᑎᐅᕙᙱᓪᓗᑎᒡᓘᓐᓃᑦ.”

ᐅᖃᒪᐅᕐᑐᖅ ᐱᓕᕆᐊᒧᑦ ᐸᕐᓇᐅᑎᐅᓂᑯ ᐊᒻᒪᓗ ᖃᓄᐃᓕᐅᕈᑎᒃᓴᑦ ᓇᓗᓇᐃᔭᖅᑕᐅᓯᒪᔪᑦ ᐊᕐᕌᒎᖕᓂ ᒪᕐᕉᖕᓂ ᐱᓕᕆᐊᖑᔭᕆᐊᖃᕋᔭᕐᑐᑦ ᐊᑐᓕᖅᑎᑕᐅᓚᐅᙱᓐᓂᖏᓐᓂᒃ. ᐅᖃᓚᐅᕐᑐᖅᑦ ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᖃᑎᖃᕐᓂᐊᕐᓂᖏᓐᓂᒃ ᐸᓖᓯᒃᑯᓐᓄᑦ ᑲᒥᓯᓇᒥᒃ ᐳᕋᓐᑕ ᓚᑭ ᐋᖅᑭᒃᓱᐃᕙᓪᓕᐊᓂᕐᒥ ᖃᓄᐃᓕᐅᕈᑎᒃᓴᓂᒃ ᐊᒻᒪᓗ ᖃᓄᖅ ᐊᑐᕐᓯᒪᓕᕐᒪᖔᑕ.

ᐃᓄᐃᑦ ᑕᐱᕇᑦ ᑲᓇᑕᒥ ᐱᐅᓯᕚᓪᓕᖅᑎᑦᑎᓇᓱᖕᓂᐊᕐᒥᔪᑦ ᐃᓄᐃᑦ ᖃᓪᓗᓈᓃᑦᑐᑦ ᐅᑯᓇᓂ ᓲᕐᓗ ᐋᑐᕚᒥ, ᐅᐃᓂᐱᒡᒥ ᐊᒻᒪᓗ ᒪᓐᑐᕆᐊᒥ ᐸᓖᓯᓄᑦ ᐱᓕᕆᐊᕆᔭᐅᕙᖕᓂᖏᓐᓂᒃ, ᐅᐱᐊᑦ ᐅᖃᓚᐅᕐᑐᖅ.