ᐃᖃᓗᐃᑦ ᑲᐱᔭᐅᓯᒪᔭᕆᐊᖃᕐᓂᕐᒥᒃ ᐊᑐᔾᔮᔪᓐᓃᖅᑐᑦ ᑭᓯᐊᓂᓕ ᒪᑐᐊᕐᓯᒪᔭᕆᐊᖃᖅᖢᑎᒃ ᓄᓇᓕᐸᐅᔭᐃᑦ ᐃᒡᓗᖁᑎᖏᓐᓂ

For an English version of this story, please see Iqaluit to drop vaccine mandate, but masks still required in city buildings

ᐃᓄᐃᑦ ᐃᖃᓗᖕᓂ ᑲᐱᔭᐅᓯᒫᓂᒋᐊᖃᔾᔮᔪᓐᓃᖅᑐᑦ ᓄᕙᒡᔪᐊᕐᓇᖅ-19-ᒧ ᓄᓇᓕᐸᐅᔭᐃᑦ ᐃᒡᓗᖏᓐᓄ ᐃᓯᕐᓂᐊᕐᓗᑎᒃ ᐅᑯᐊ ᓄᓇᓕᐸᐅᔭᐃᑦ ᑲᑎᒪᔨᖏᑦ ᒪᓕᒐᕋᓛᒥ ᐋᖅᑭᒃᓯᒋᐊᕌᓂᒃᐸᑕ ᑭᓯᐊᓂᓕ ᓄᓇᖃᖅᑐᑦ ᒪᑐᐊᕐᓯᒪᔭᕆᐊᖃᕐᓂᐊᖅᑐᑦ ᓱᓕ.

ᓄᓇᓕᐸᐅᔭᐃᑦ ᑲᑎᒪᔨᖏ ᐊᖏᓚᐅᕐᑐᑦ ᑖᔅᓱᒥᖓ ᐸᕐᓇᐅᑎᒥ ᑲᑎᒪᑎᓪᓗᒋᑦ ᐄᐳᕈᓪ 12-ᒥ ᐊᒻᒪᓗ ᐃᖅᑲᓇᐃᔭᖅᑎᓂ ᖃᐅᔨᓇᓱᖁᔨᓪᓗᑎᒃ ᑭᒃᑯᓕᒫᓂᒃ ᐊᑦᑕᓇᖅᑐᒦᑦᑕᐃᓕᑎᑦᑎᓂᕐᒥᒃ ᐱᓕᕆᐊᖃᕈᓐᓇᕋᔭᕐᓂᖏᓐᓂᒃ.

ᑲᑎᒪᔩᑦ ᐋᖅᑭᒋᐊᕐᓯᓂᐊᕋᓱᒋᔭᐅᔪᑦ ᑲᐱᔭᐅᓯᒪᓂᕐᒧᑦ ᒪᓕᒐᕋᓛᒥ ᐄᐳᕈᓪ 27-ᒥ ᑲᑎᒪᓕᕐᐸᑕ. ᐅᓇ ᐋᖅᑭᒋᐊᖅᓯᔾᔪᑎ ᓄᓇᓕᐸᐅᔭᓂ ᑲᐱᔭᐅᓯᒪᔭᕆᐊᖃᕐᓂᕐᒧᑦ ᐊᑐᖁᔭᐅᔪᓂ ᓄᖃᖅᑎᑦᑎᔾᔪᑎᐅᓇᔭᕐᑐᖅ. ᑕᐃᒪᙵᑦ ᕕᕝᕗᐊᕆ 7-ᒥᑦ ᐃᓄᐃᑦ ᒪᕐᕈᐃᖅᑕᐅᓪᓗᑎᒃ ᑲᐱᔭᐅᓯᒪᔪᑦ ᓄᕙᒡᔪᐊᕐᓇᖅ-19-ᒧ ᐃᓯᕈᓐᓇᖅᑎᑕᐅᖃᑦᑕᕐᓯᒪᖕᒪᑕ ᓄᓇᓕᐸᐅᔭᐃᑦ ᐃᒡᓗᖏᓐᓄᑦ.

ᑭᓯᐊᒥᓂ ᓄᓇᕗᒥᑦ ᒐᕙᒪᒃᑯᑦ ᐊᑐᕈᓐᓃᖅᑎᑦᑎᓚᐅᕐᒪᑕ ᐃᓚᖏᓐᓂᒃ ᓄᕙᒡᔪᐊᕐᓇᖅ-19-ᒧ ᐋᓐᓂᐊᖃᖅᑕᐃᓕᓂᒃᑯᑦ ᖃᓄᐃᓕᐅᖅᑕᐃᓕᔾᔪᑎᖏᓐᓂᒃ ᐱᒋᐊᖅᖢᓂ ᐄᐳᕈᓪ 11-ᒥ ᐃᓚᒋᔭᐅᓪᓗᓂ ᒪᑐᐊᕐᓯᒪᔭᕆᐊᖃᕈᓐᓃᕐᓂᖅ.

ᐅᓇ ᓄᓇᓕᐸᐅᔭᓂ ᕿᒥᕐᕈᐊᖅᑎᑦᑎᔾᔪᑎᐅᓕᓚᐅᕐᑐᖅ ᓇᖕᒥᓂᖅ ᓄᕙᒡᔪᐊᕐᓇᖅ-19-ᒧᑦ ᒪᓕᒐᖏᓐᓂᒃ, ᐃᓚᖃᖅᖢᓂ ᓇᖕᒥᓂᖅ ᒪᑐᐊᕐᓯᒪᖁᔨᓇᔭᕆᐊᒃᓴᖏᓐᓂᒃ ᐃᓄᒋᐊᒃᑐᓄᑦ ᐅᐸᒡᕕᐅᓯᒪᕙᒃᑐᓂᒃ ᓄᓇᓕᐸᐅᔭᐃᑦ ᐃᒡᓗᖏᓐᓂᒃ ᐊᒻᒪᓗ ᑲᐱᓯᒪᔭᕆᐊᖃᖅᑎᑦᑎᓂᖅ ᐃᒡᓘ ᐃᓗᐊᓄᐊᕐᓂᐊᕐᓗᓂ.

“ᑐᓴᑲᑕᒃᓯᒪᒐᑦᑕ ᐊᖓᔪᖅᑳᒧᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᓘᒃᑖᖅ ᒪᐃᑯᓪ ᐹᑐᓴᓐᒧ ᐊᕐᕌᒎᓕᖅᑑᖕᓂ ᒪᕐᕉᖕᓂ ᐊᒻᒪᓗ ᓈᒻᒪᙱᑦᑐᒃᑰᖅᑎᓚᐅᙱᖢᓂᑎᒍᑦ,” ᐅᖃᖅᑐᖅ ᒪᐃᔭ ᑭᐊᓂ ᐱᐊᓪ.

ᐅᖃᓪᓚᓚᐅᕐᑐᖅ ᐃᑲᔪᖅᑐᐃᓪᓗᓂ ᑲᐱᔭᐅᓯᒪᔭᕆᐊᖃᕈᓐᓃᕐᓂᕐᒥᒃ, ᐅᖃᖅᖢᓂ ᓄᓇᕗᒥᑦ ᒐᕙᒪᒃᑯᑦ ᐱᓕᕆᐊᖃᑦᑎᐊᕐᓯᒪᖕᒪᑕ ᐆᒧᖓ ᓄᕙᒡᔪᐊᕐᓇᖅ-19-ᒧ ᐊᒻᒪᓗ ᒪᑐᐊᕐᓯᒪᑎᑦᑎᑲᑕᖕᓂᕐᒥᒃ ᓄᓇᓕᐸᐅᔭᐃᑦ ᐃᒡᓗᖏᓐᓂᒃ ᑕᐃᒪᓐᓇᓗ ᓄᓇᓕᖕᓄᑦ ᐃᖅᑲᓇᐃᔭᖅᑎᐅᔪᑦ ᑲᒪᒋᔭᐅᔪᓐᓇᖅᖢᑎᒃ.

ᐊᖓᔪᖅᑳᕆᔭᐅᔪᖅ ᐊᐅᓚᑦᑎᔨ ᐊᐃᒥ ᐃᐊᒍᔅᒪ ᑲᑎᒪᔨᓂᒃ ᐱᖓᓱᓂ ᓂᕈᐊᕐᕕᖃᖅᑎᑦᑎᒪᐅᕐᑐᖅ ᒪᑐᒧᖓ ᑲᐱᔭᐅᓯᒪᔭᕆᐊᖃᕐᓇᖅ ᑲᔪᓯᑎᑕᐅᓯᒪᓂᖓᒍᑦ ᐊᒻᒪᓗ ᒪᑐᐊᕐᓯᒪᔭᕆᐊᖃᕐᓇᒥ ᓄᓇᓕᐸᐃᔭᐃᑦ ᐃᒡᓗᖏᓐᓂ.

ᓄᓇᓕᐸᐅᔭᓄᑦ ᑲᑎᒪᔩᑦ ᑲᐱᔭᐅᓯᒪᔭᕆᐊᖃᕐᓂᖅ ᐲᑦᑎᑦᑐᓐᓇᖅᑕᖓ ᐊᒻᒪᓗ ᒪᑐᐊᕐᓯᒪᔭᕆᐊᖃᕈᓐᓃᖅᑎᑦᑎᓂᖅ, ᐅᕝᕙᓘᓐᓃᑦ ᑲᐱᔭᐅᓯᒪᔭᕆᐊᖃᕐᓂᖅ ᐊᑐᕈᓐᓃᖅᑎᑕᐅᓗᓂ ᑭᓯᐊᓂ ᒪᑐᐊᕐᓯᒪᔭᕆᐊᖃᕐᓗᑎᒃ; ᐅᕝᕙᓘᓐᓃᑦ ᑲᐱᔭᐅᓯᒪᔭᕆᐊᖃᕐᓗᑎᒃ ᐊᒻᒪ ᒪᑐᐊᕐᓯᒪᔭᕆᐊᖃᕐᒥᓗᑎᒃ. ᑲᑎᒪᔩᑦ ᓂᕈᐊᓕᓚᐅᕐᑐᑦ ᑐᒡᓕᖓᓂᒃ, ᐊᒻᒪᓗ ᒪᑐᐊᕐᓯᒪᔭᕆᐊᖃᙱᓐᓂᖅ ᖃᓄᐃᓕᐅᖃᑕᐅᓂᐊᕐᓗᑎᒃ ᓄᓇᓕᐸᐅᔭᐃᑦ ᐃᒡᓗᖏᓐᓂᒃ ᓲᕐᓗ ᐳᐃᔾᔪᕋᕐᓂᐊᕐᓗᓂ.

ᐅᓇ ᒪᑐᐊᕐᓯᒪᔭᕆᐊᖃᕐᓇᖅ ᕿᒥᕐᕈᐊᖅᑕᐅᒃᑲᓐᓂᓛᕐᑐᖅ ᑕᓪᓕᒪᑦ ᐱᓇᓱᐊᕈᓯᑦ ᓇᓪᓕᖅᐸᑕ.

ᑲᑎᒪᔨ ᑲᐃᐅᓪ ᓴᐳᑦ ᐅᖃᓪᓚᓚᐅᕐᑐᖅ ᓂᕈᐊᕐᓯᒪᓂᕐᒥᓂᒃ ᑲᐱᔭᐅᓯᒪᔭᕆᐊᖃᕐᓇᒥ ᐊᒻᒪᓗ ᒪᑐᐊᓯᒪᔭᕆᐊᖃᕐᓇᒥᒃ ᓄᓇᓕᐸᐅᔭᐃᑦ ᐃᒡᓗᖁᑎᖏᓐᓂ, ᐅᖃᖅᖢᓂ ᓄᕙᒡᔪᐊᕐᓇᖅ-19 ᒫᓐᓇ ᓱᓕ ᐅᓗᕆᐊᓇᕐᓂᖓᓂ ᑕᖅᑭᐅᓚᐅᑐᑦ ᐱᖓᓱᑦ ᐊᑐᓚᐅᖅᑕᑎᑐᑦ.

ᐅᖃᓚᐅᕐᒥᔪᖅ ᓈᒻᒪᒃᓴᙱᓐᓂᕋᖅᖢᓂ ᓄᓇᕗᒥᑦ ᒐᕙᒪᒃᑯᑦ ᐃᓱᒪᓕᐊᕆᓚᐅᕐᑕᖓᓂᒃ ᐅᓇ ᓄᕙᒡᔪᐊᕐᓇᖅ-19-ᒧᑦ ᐋᓐᓂᐊᖃᖅᑕᐃᓕᓂᕐᒧᑦ ᖃᓄᐃᑦᑕᐃᓕᒪᔾᔪᑏᑦ ᓄᖅᑲᖅᑎᑕᐅᓂᖏᓐᓂᒃ, ᐅᖃᖅᖢᓂ ᓴᐳᔾᔨᓯᒪᓇᓱᖕᓂᖅ ᐋᓐᓂᐊᖃᖅᑕᐃᓕᓂᕐᒥᒃ ᑲᑐᔾᔨᖃᑎᒌᓄᖔᖅ ᐱᓕᕆᐊᖑᑎᑕᐅᖔᓕᕐᓗᓂ.

“ᐃᓱᒪᔪᖓᓕ ᓄᓇᕗᒥᑦ ᒐᕙᒪᒃᑯᑦ ᓈᒻᒪᙱᓕᐅᓗᐊᕐᓂᖏᓐᓂᒃ ᑕᒪᑐᒧᖓ,” ᐅᖃᕐᑐᖅ.

ᑲᑎᒪᔨ ᕈᒥᐊᓐ ᓯᑏᕙᓐᓴᓐ ᐃᑲᔪᖅᑐᐃᓚᐅᕐᑐᖅ ᑲᐱᔭᐅᓯᒪᔭᕆᐊᖃᕐᓂᖅ ᐊᑐᖁᔭᐅᔪᓐᓂᕐᒪᑦ ᑭᓯᐊᓂ ᒪᑐᐊᕐᓯᒪᔭᕆᐊᖃᕐᓂᖅ ᐊᑐᕐᓂᐊᕐᓗᓂ. ᐅᖃᓚᐅᕐᑐᖅ ᖃᓄᐃᓕᐅᖅᑕᐃᓕᓂᕐᒧᑦ ᐱᔾᔪᑎᒋᔭᐅᖃᑕᐅᓚᐅᕐᑐᖅ ᑲᐱᔭᐅᑎᑦᑎᓇᓱᖕᓂᖅ ᑭᓯᐊᓂᓕ ᒫᓐᓇᐅᔪᖅ ᑭᓇᑐᐃᓐᓇᖅ ᑲᐱᔭᐅᓯᒪᙱᑦᑐᖅ ᑲᐱᔭᐅᔪᒪᓇᔭᕆᐊᒃᓴᖓᓂᒃ.

ᒪᑐᐊᕐᓯᒪᑎᑦᑎᑲᑕᖕᓂᐊᕐᓗᑎᒃ ᑕᐃᒪᓕ ᓄᓇᓕᐸᐃᔭᐃᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᓕᕆᐊᖃᕋᓴᒃᑐᑦ ᐊᐃᑑᑎᖃᖅᑎᑦᑎᑦᑕᐃᓕᓂᕐᒥᒃ ᓄᕙᒡᔪᐊᕐᓇᖅ-19-ᒥ.

“ᐃᓱᒪᔪᖓᓕ ᐱᔪᒪᓇᓱᒃᖢᑕ ᐊᑐᕈᒪᓂᑦᑎᓐᓂᒃ ᐊᐃᑉᐸᖓᓂᒃ ᐊᑐᒐᒃᓴᐅᓇᔭᖅᑐᓂᒃ ᓲᖃᐃᒻᒪ ᐃᓱᒫᓘᑎᖃᕋᑦᑕ ᓱᓕ ᓄᓇᓕᐸᐅᔭᓂᒃ ᓴᐳᔾᔨᓯᒪᔪᒪᓂᕐᒥᒃ ᐊᒻᒪ ᐃᖅᑲᓇᐃᔭᖅᑎᓐᓂ,” ᓯᑏᕙᓐᓴᓐ ᐅᖃᕐᑐᖅ.

ᒪᐃᔭᐅᑉ ᑐᒡᓕᖓ ᓵᓚᒪᓐ ᐊᕙ ᐊᒻᒪ ᑲᑎᒪᔨ ᐹᓪ ᖁᐊᓴ ᐊᖏᓚᐅᕐᑑᑦ ᐅᓇ ᑲᐱᔭᐅᓯᒪᔭᕆᐊᖃᕐᓂᖅ ᐊᑐᕈᓐᓃᕐᓗᓂ ᑭᓯᐊᓂᓕ ᑕᓗᐊᕐᓯᒪᔭᕆᐊᖃᕐᓂᖅ ᐊᑐᖅᑕᐅᓗᓂ ᐊᑦᑕᓇᖅᑐᒦᑦᑕᐃᓕᓂᕐᒧᑦ.

ᓴᐳᑦ ᐅᖃᓚᐅᕐᑐᖅ ᑲᑎᒪᔩᑦ ᐃᓱᒪᓕᐊᖓᓂ ᓈᒻᒪᒃᓴᕐᓂᕋᖅᖢᓂ ᐅᓇ ᑲᐱᔭᐅᓯᒪᔭᕆᐊᖃᕐᓂᖅ ᐊᑐᖅᑕᐅᔪᓐᓃᖅᑎᑕᐅᓗᓂ. ᑭᓯᐊᓂᓕ ᐅᖃᒪᐅᕐᑐᖅ ᕿᒥᕐᕈᐊᕆᐊᖃᕐᓂᖏᓐᓂᒃ ᒪᓕᒐᕋᓛᓕᐅᕐᓂᕐᒥᒃ ᓇᖕᒥᓂᖅ ᐱᓕᕆᐊᖓᔪᑦ ᒪᑐᐊᕐᓯᒪᕝᕕᐅᕙᒡᓗᑎᒃ.

“ᐱᓱᓪᓗᐊᖃᑦᑕᙱᓐᓇᑦᑕ ᓂᐅᕕᕐᕕᒃᑯᑦ ᒪᑐᐊᕐᓯᒪᙱᑦᑑᑉ ᓴᓂᑦᑎᐊᖓᓂ ᓄᕙᒡᔪᐊᕐᓇᖅᒥ ᐋᓐᓂᐊᖃᖅᑐᓂᒃ,” ᐅᖃᕐᑐᖅ.

ᐱᐊᓪ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐱᔪᓐᓇᕐᓂᖃᕋᓱᒋᙱᖢᓂᒋ5 ᒪᓕᒐᓕᐅᕋᓱᖕᓂᕐᒥᒃ ᑕᒪᒃᑯᐊ ᓇᖕᒥᓂᖅ ᐱᓕᕆᐊᖑᔪᑦ ᒪᑐᐊᕐᓯᒪᑎᑦᑎᔭᕆᐊᖃᕐᓂᖏᓐᓂᒃ. ᑭᓯᐊᓂᓕ, ᐋᖅᑭᒋᐊᖅᑕᐅᓯᒪᒍᓂ ᑭᖑᓪᓕᕐᒥ ᑲᑎᒪᓕᕐᐸᑕ ᐱᕕᖃᕈᑎᐅᔪᓐᓇᕐᓂᐊᖅᑐᖅ ᓄᓇᓕᐸᐅᔭᓄᑦ ᐃᖅᑲᓇᐃᔭᖅᑎᐅᔪᑦ ᐋᓐᓂᐊᖃᖅᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᓂᒃ ᕿᒥᕐᕈᐊᕆᐊᖃᕐᓂᖏᓐᓂᒃ.

ᓴᐳᑦ ᑖᔅᓱᒥᖓ ᐃᑲᔪᖅᑐᐃᓚᐅᕐᑐᖅ.