ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔩᑦ ᓂᕈᐊᖅᐳᑦ ᐅᓇ $500,000 ᐊᕕᒃᑐᖅᑕᐅᓗᓂ ᑐᓂᐅᖃᖅᑕᐅᖁᔭᐅᓪᓗᓂ ᓄᕙᒡᔪᐊᕐᓇᖅ-19-ᒧᑦ ᐊᒃᑐᖅᑕᐅᓂᖅᒧᑦ

ᑲᑎᒪᔨᒃᑯᑦ ᓂᕈᐊᓚᐅᕐᒥᔪᑦ ᑯᕕᖅᑕᕐᕕᖕᓄᑦ ᓱᓪᓗᓖᑦ ᓄᑖᙳᕆᐊᖅᑕᐅᓂᐊᓚᐅᖅᑑᒐᓗᐊᑦ ᐅᖓᕙᕆᐊᖅᑕᐅᔪᒪᓪᓗᑎᒃ ᑭᓱᓕᒫᑦ ᐊᑭᑐᓗᐊᓕᕐᓂᖏᓐᓄᑦ ᐋᓐᓂᐊᕕᒡᔪᐊᕐᓇᒧᑦ

ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔩᑦ ᐊᖏᓚᐅᖅᑐᑦ ᐊᕕᑦᑐᐃᓂᐊᕐᓗᑎᒃ $503,196 ᓄᕙᒡᔪᐊᕐᓇᖅ-19-ᒧᑦ ᐃᑲᔪᕈᑎᐅᑎᑕᐅᔪᖅ ᐅᑯᓄᖓ ᐅᖂᑕᖅ ᑲᑐᔾᔨᖃᑎᒌᓄᑦ, ᑐᑭᓯᒋᐊᕐᕕᒃ, ᖃᔪᖅᑐᕐᕕᒃ ᓄᓇᓕᖕᓄᑦ ᓂᕿᑖᕐᕕᒃ ᐊᒻᒪᓗ YWCA ᐊᒡᕕᒃᒧᑦ. ᐅᕙᓂ ᓴᖅᑭᔮᖅᑐᖅ ᐃᖃᓗᖕᓂᑦ ᓄᓇᓕᐸᐅᔭᐃᑦ ᑎᑎᕋᕐᕕᖓᓂᒃ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Iqaluit city council distributes $500K for COVID-19 relief

ᑎᓴᒪᓐ ᐃᖃᓗᖕᓂ ᑲᑐᔾᔨᖃᑎᒌᑦ ᐊᕕᒃᓯᓂᐊᖅᑐᑦ ᒥᓕᐊᓐ ᓇᑉᐸᖓᓂᒃ ᐋᓐᓂᐊᕕᒡᔪᐊᕐᓇᒧᑦ ᐃᑲᔪᕈᑎᒃᓴᓂᒃ, ᓄᓇᓕᐸᐅᔭᐃᑦ ᑲᑎᒪᔨᖏᑦ ᐃᓱᒪᓕᐅᕆᓚᐅᕐᑐᑦ ᒪᐃ 11-ᒥ.

ᐅᖅᑰᑕᖅ ᑲᑐᔾᔨᖃᑎᒌᑦ ᑐᓂᔭᐅᓂᐊᖅᑐᑦ $155,000 ᒪᑯᓄᖓ ᐃᒡᓗᒋᔭᐅᓚᐅᑲᖃᑦᑕᕐᓂᐊᖅᑐᓄᑦ ᐊᒻᒪ ᐃᒡᓗᖃᙱᑦᑐᓄᑦ ᐅᐸᒡᕕᐅᕙᒃᑐᓄᑦ, ᑐᑭᓯᒋᐊᕐᕕᒃ ᑐᓂᔭᐅᓂᐊᖅᖢᓂ $65,000 ᓴᓗᒪᓇᓱᖕᓂᖅᒧᑦ ᐊᒻᒪ ᓂᕿᓕᕆᓂᖅᒧᑦ ᐱᓕᕆᐊᓄᑦ, ᖃᔪᖅᑐᕐᕕᒃ ᑐᓂᔭᐅᓂᐊᖅᖢᓂ $65,000 ᓂᕿᓕᐊᒐᒃᓴᓄᑦ, ᐊᒻᒪᓗ ᐅᑯᐊ YWCA ᐊᒡᕕᒃ ᑐᓂᔭᐅᓂᐊᖅᖢᓂ $55,000.

ᓄᓇᓕᐸᐅᔭᐃᑦ ᑮᓇᐅᔭᓂᒃ ᑐᓂᔭᐅᓚᐅᖅᓯᒪᔪᑦ 2020-ᒥᑦ ᓄᓇᕗᑦ ᒐᕙᒪᒃᑯᓐᓂᑦ ᐊᒻᒪ ᒐᕙᒪᑐᖃᒃᑯᓐᓂᒃ ᒪᐅᓇ ᑲᓇᑕᒥ ᐊᖏᕐᕋᖃᙱᑦᑐᓕᕆᓂᒃᑯᑦ ᑕᐃᔭᐅᔪᖅ Reaching Home. ᐅᑯᓇᙶᖅᓂᑯᓂᒃ $1.3 ᒥᓕᐊᓐᑖᓚᓂᒃ ᓄᓇᓕᐸᐅᔭᐃᑦ ᑐᓐᓂᖅᑯᓯᐊᖏᓐᓂᒃ, ᐅᓇ ᐊᒥᐊᒃᑯᑐᐊᖑᓕᖅᑐᖅ $163,196, ᐅᖃᓚᐅᖅᑐᖅ ᐋᓕᓴᓐ ᑐᕋᒪᓐ, ᓄᓇᓕᐸᐅᔭᓄᑦ ᑐᑭᒧᐊᖅᑎᑦᑎᔨ ᐱᓕᕆᕝᕕᓕᕆᓂᖅᒧᑦ ᐱᔨᑦᑎᕋᐅᑎᓄᑦ.

ᑲᑐᔾᔨᖃᑎᒌᖑᔪᑦ ᐊᕐᕌᒍ ᓄᙳᐊᓂ ᐃᓱᓕᕝᕕᖃᖅᑐᑦ ᐊᑐᕆᐊᖃᕐᓂᖏᓐᓂᒃ ᑮᓇᐅᔭᓂᒃ, ᑐᕋᒪᓐ ᐅᖃᖅᑐᖅ.

ᑲᑎᒪᔨᒃᑯᑦ ᐊᖏᓚᐅᕐᒥᔪᑦ ᐅᓄᕈᓘᔭᖅᑐᓂᒃ ᐊᒃᑐᐊᔪᓂᒃ ᓄᕙᒡᔪᐊᕐᓇᖅ-19-ᒧᑦ ᐸᕐᓇᐅᑎᓂᒃ.

ᓄᑖᙳᕆᐊᖅᑎᑦᑎᓂᖅ ᓄᓇᓕᐸᐅᔭᐃᑦ ᓱᓪᓗᓕᖏᓐᓂᒃ ᓄᖅᑲᖓᑎᑕᐅᓂᐊᓕᖅᑐᖅ 2022 ᐱᓕᕆᐊᓕᓵᓕᕐᓂᖓᓄᑦ, ᑖᒃᑯᐊ ᑲᑎᒪᔩᑦ ᑕᒪᑐᒥᖓ ᐱᓕᕆᐊᖃᙱᓚᐅᑲᒍᒪᓪᓗᑎᒃ ᐊᑭᑦᑐᕋᐅᑎᒍᑎᒋᔭᐅᔪᑦ ᖁᕝᕙᓯᖅᑳᑎᒋᓗᐊᕐᓂᖏᓐᓄᑦ ᐋᓐᓂᐊᕕᒡᔪᐊᕐᓇᒧᑦ.

ᓄᓇᓕᐸᐅᔭᐃᑦ ᒫᓐᓇ ᐱᓕᕆᓂᖅ 2ᒦᑦᑐᑦ ᐅᕙᓂ ᑎᓴᒪᐅᓕᖓᔪᒥᒃ ᐸᕐᓇᐅᑎᒥᒃ ᓱᓪᓗᓕᖕᓂ ᓄᑖᙳᕆᐊᖅᑎᑦᑎᓂᖅᒧᑦ.

ᐃᓱᒪᖕᒪᑕ ᓄᑖᙳᕆᐊᖅᑎᑦᑎᔪᒪᓪᓗᑎᒃ ᓱᓪᓗᓕᖕᓂᒃ ᐅᕙᓂ ᑎᓴᒪᓂᒃ ᑎᕆᖅᑯᕐᒦᑦᑐᓂᒃ ᐊᒻᒪᓗ ᐃᓕᐅᖃᐃᓗᑎᒃ ᑰᒐᓚᖕᓄᑦ ᐃᓂᐅᓇᔭᖅᑐᓂᒃ ᐅᕙᙵᑦ RBC ᐃᒡᓗᖁᑎᖓᓂᒃ ᒥᕝᕕᒃ ᐊᑐᕆᐊᕐᒥᒃ, ᐅᓇᓕ ᐅᖃᓚᐅᕐᑐᖅ ᐱᓕᕆᐊᒧᑦ ᐊᐅᓚᑦᑎᔨ ᑳᒧᕋᓐ ᒪᒃᑖᓄᑦ, ᑖᓐᓇᓗ ᓴᖅᑭᑎᑦᑎᓚᐅᖅᓯᒪᓪᓗᓂ ᑐᓴᒐᒃᓴᓂᒃ ᐄᐳᕈᓪᒥ ᑲᑎᒪᑎᓪᓗᒋᑦ.

ᐅᑯᐊ ᑭᖑᕙᕆᐊᕈᑎᐅᔪᑦ ᑐᑭᖃᖅᑐᖅ ᓄᑖᑦ ᐃᒡᓗᐃᑦ ᐊᑐᕆᐊᒧᑦ ᐊᖅᑯᓵᖅᕕᖕᒦᑦᑐᑦ ᐊᒻᒪ ᐹᕕᓐ ᒑᓯᑖᕐᕕᒃ ᑯᕕᖅᑕᕐᕕᖃᕆᐊᖃᕐᓂᐊᖅᑐᑦ ᐊᒻᒪᓗ ᐃᒡᓗᐃᑦ ᑯᕕᖅᑕᕐᕕᖃᖅᑐᑦ ᓱᓕ ᑖᒃᑯᓂᖓ ᐊᑐᒃᑲᓐᓂᕆᐊᖃᕐᓂᐊᖅᖢᑎᒃ, ᐅᖃᓚᐅᖅᑐᖅ ᐊᖓᔪᖅᑳᖅ ᐊᐅ<ᑦᑎᒡ ᐊᐃᓂ ᐃᐊᒍᔅᒪ ᑲᑎᒪᑎᓪᓗᒋᑦ ᒪᐃ 11-ᒥᑦ.

ᓄᓇᓕᐸᐅᔭᐃᑦ ᐋᖅᑭᒃᓯᒪᐅᕐᒪᑕᒃ $4.4 ᒥᓕᐊᓐ ᑖᓚᓂ ᐱᓕᕆᐊᒃᓴᒧᑦ, ᐊᒻᒪᓗ ᐊᑦᑎᖕᓂᖅᐹᖅ ᐊᑭᑦᑐᕋᐅᑎᒍᑎᔪᓂᒃ ᓱᓕ ᐊᐅᓚᔾᔪᑎᒃᓴᓄᑦ ᐋᒻᑭᒃᑕᐅᓯᒪᔪᓂᒃ $2.8 ᒥᓕᐊᓐ ᑖᓚᓂ ᖁᕝᕙᓯᖕᓂᖅᓴᐅᓗᐊᖅᖢᓂ, ᐅᖃᓚᐅᖅᑐᖅ.

“ᐊᑭᒋᔭᐅᓇᔭᖅᑐᖅ ᐱᓕᕆᐊᒧᑦ ᐊᑭᑦᑐᖅᐹᓪᓕᓗᐊᖅᑐᓂᒃ ᓈᒻᒪᓈᖅᓯᒪᖕᒪᑦ ᐱᖁᑎᓂᒃ ᐊᒥᒐᖅᓯᑲᑕᖕᓂᖏᓐᓄᑦ ᐱᖁᑎᑖᖅᕕᐅᕙᒃᑐᑦ, ᐊᒻᒪᓗ ᐃᖅᑲᓇᐃᔭᕆᐊᖅᑐᓄᑦ ᐊᑭᓕᐅᑎᐅᔭᕆᐊᓕᖕᓄᑦ,” ᑎᑎᕋᖅᑐᖅ ᒪᒃᑖᓄᑦ ᖃᕋᓴᐅᔭᒃᑯᑦ ᑎᑎᕋᖅᑕᖏᓐᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

“ᐱᔾᔪᑎᒋᓪᓗᒍ ᐅᓗᕆᐊᓇᓗᐊᖅᑐᑦ ᐊᒃᑐᐊᔪᓂᒃ ᐃᖅᑲᓇᐃᔭᖅᑎᒃᓴᓂᒃ ᓄᓇᓕᖕᓄᑦ ᑎᑭᑎᑦᑎᑲᑕᖕᓂᖅ ᐋᓐᓂᐊᕕᒡᔪᐊᕐᓇᐅᑎᓪᓗᒍ ᐃᓱᒪᒋᔭᐅᔭᕆᐊᖃᓚᐅᕐᒥᖕᒪᑦ.

Share This Story

(0) Comments

Join the Conversation

Your email address will not be published. Required fields are marked *

*