ᐃᖃᓗᖕᒥᐅᑦ ᐃᑲᔪᕐᓂᐊᖅᐳᑦ ᑕᐃᑯᖓ ᐊᖅᑯᒻᒥ ᐊᑎᖃᙱᑦᑐᒧᑦ

For English version, see Iqalummiut to help where the street has no name

ᕿᓂᖅᐸᓪᓕᐊᓂᖃᖅᐳᑦ ᓈᒻᒪᒃᑐᒥ ᐊᑦᑎᖅᑕᐅᓂᖓᓂ ᐃᖃᓗᖕᓂ ᓄᑖᖑᓛᖑᔪᒥ ᐊᖅᑯᑎᖓᓂ ᐊᒻᒪ ᓄᓇᓕᐸᐅᔭᕐᒥ ᑲᑎᒪᔨᐅᔪᓂ ᐸᕐᓇᒃᐳᑦ ᐃᓱᒪᒃᓴᖅᓯᐅᕆᓂᕐᒥ ᓄᓇᖃᖅᑎᐅᔪᓂ ᐊᑦᑎᖅᓯᓂᕐᒥ ᐊᖅᑯᒻᒥ ᓄᓇᕘᑉ ᓄᑖᖑᔪᒥ ᒪᒥᓴᕐᕕᖓᓂ ᓴᓇᔭᐅᕙᓪᓕᐊᓂᖓᓂ.

“ᐊᖅᑯᑎ ᐊᑎᖃᕆᐊᖃᖅᐳᖅ,” ᐸᕐᓇᐃᓂᕐᒧᑦ ᑐᑭᒧᐊᒃᑎᑦᑎᔨ ᒫᑎᐅ ᑖᑦᔅ ᐅᖃᐅᔾᔨᓚᐅᖅᐳᖅ ᐃᓚᒋᔭᐅᔪᓂ ᓄᓇᓕᐸᐅᔭᐅᑉ ᐸᕐᓇᐃᓂᕐᒥ ᑲᑎᒪᔨᕋᓛᖏᓐᓄᑦ ᐊᐃᑉᕆᓕ 16−ᒥ ᑲᑎᒪᓂᐅᔪᒥ.

“ᑕᐃᔭᐅᙳᐊᓲᖑᕗᖅ Bonfire ᐊᖅᑯᒻᒥ ᒎᒍᒃᑯᑦ,” ᐃᓚᒋᐊᖅᓯᓚᐅᖅᐳᖅ.

ᑕᑭᓂᐅᔪᖅ ᐊᖅᑯᑎᒥᒃ ᐊᐱᖅᑯᑕᐅᔪᒥ ᐊᐅᓚᕗᖅ ᐅᐊᖕᓇᒥ ᐊᖅᑯᒻᒥ ᓂᐊᖁᙴᒧᑦ, ᑲᓇᖕᓇᐸᓗᖕᒥ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᒥ ᐊᓐᓂᑭᑕᕐᕕᖓᓂ, ᐊᒻᒪ 300 ᒦᑕᐸᓗᖕᓂ ᑕᑭᓂᖃᕐᓂᐊᖅᐳᖅ.

ᑖᑦᔅ ᐅᔾᔨᕆᒪᐅᖅᐳᖅ ᐱᒻᒪᕆᐅᓂᖓᓂ ᐊᑦᑎᕐᓂᕐᒧᑦ ᐋᖅᑭᒃᓯᑦᑎᐊᕐᓂᕐᒥ ᓈᒻᒪᒃᑐᒥ ᐊᑎᒃᓴᖓᓄᑦ ᒪᒥᓴᕐᕕᖕᒧᑦ, ᐊᒻᒪ ᐅᖓᕙᕆᐊᖅᑕᐅᑐᐃᓐᓇᕆᐊᖃᕐᒪᑦ ᐅᐊᖕᓇᒧᑦ ᐹᖅᓯᓂᖃᕐᓂᖓᓂ ᑕᓯᓗᓕᐊᕆᐊᕐᒧᑦ ᐊᑐᕆᐊᕐᒧᑦ ᐃᓚᒋᔭᐅᓗᓂ ᓯᕗᓂᒃᓴᒥ ᐊᖏᕐᕋᕆᔭᐅᔪᓂ ᐊᕕᒃᑐᖅᓯᒪᒃᑲᓐᓂᕐᓂᐅᔪᒥ.

ᒐᕙᒪᒃᑯᓐᓂ ᑲᑎᒪᔨᕐᔪᐊᖑᔪᓂ ᐃᓚᐅᖃᑕᐅᓚᐅᖅᐳᑦ ᐋᒍᔅᑎᐅᓚᐅᖅᑐᒥ “ᓄᓇᒥ-ᓴᖑᑎᑦᑎᓂᐅᔪᒥ” ᐃᓂᐅᔪᒥ ᓯᕗᓂᒃᓴᒥ ᐊᖅᑯᓴᕆᐊᕐᒥ, $83.7-ᒥᓕᐊᓐᑐᖅᑐᒥ ᐸᓂᖅᓯᕐᓂᕐᒧᑦ ᐊᒻᒪ ᒪᒥᓴᕐᕕᐅᔪᒥ ᓄᓇᕗᒻᒥᐅᓄᑦ ᐊᑐᖅᑐᓂ ᐋᖓᔮᕐᓇᖅᑐᓄᑦ ᐊᑐᓗᐊᖃᑦᑕᕐᓂᐅᔪᓂ ᐊᑲᐅᙱᓕᐅᕈᑕᐅᔪᓄᑦ. ᓇᑉᐸᖅᑎᕆᓂᖅ ᓂᕆᐅᒋᔭᐅᕗᖅ ᐱᔭᕇᖅᑕᐅᓂᐊᕐᓂᖓᓂ ᑎᓯᐱᕆ 2025−ᒥ.

ᐃᖅᑲᓇᐃᔭᖅᑎᒥ ᐅᓂᒃᑳᓕᐊᖑᔪᒥ ᐃᒪᐃᖁᔨᓚᐅᖅᐳᖅ ᐃᓚᒋᔭᐅᔪᓂ ᐸᕐᓇᐃᓂᕐᒧᑦ ᑲᑎᒪᔨᕋᓛᑦ ᓂᕈᐊᖅᓯᓂᖏᓐᓂ ᐊᑎᒃᓴᒥ ᑲᑎᒪᔨᕋᓛᑦ ᑲᑎᒪᓂᖓᓂ. ᑐᓂᓯᓚᐅᖅᐳᑦ ᑎᑎᕋᖅᓯᒪᓂᐅᔪᓂ 24−ᓗᐊᓂ ᐊᑎᒃᓴᐅᔪᓐᓇᖅᑐᓂ, ᐃᓚᖃᖅᑐᒥ ᐃᓕᓴᕆᔭᐅᓂᐅᔪᓂ ᐃᓂᐅᔪᓂ, ᐱᕐᔪᐊᖑᔪᓂ ᐃᓚᒌᓄᑦ ᐊᑎᕆᔭᐅᔪᓂ ᓄᓇᓕᖕᓂ ᐊᒻᒪ ᐃᓄᓕᒫᓂ ᑭᓇᐅᓂᐅᔪᓂ ᓲᕐᓗ ᑕᒑᖅ ᑰᓕ, ᐹᓪ ᐅᑲᓕᖅ ᐊᒻᒪ ᐹᓪ ᖁᐊᓴ.

ᑭᓯᐊᓂ ᐃᓄᐃᑦ ᐃᓄᑐᖃᐃᑦ ᑲᑎᒪᔨᕋᓛᖑᔪᓂ, ᐃᓚᖃᖅᑐᒥ ᑲᑎᒪᔨᐅᔪᑦ ᕼᐃᐊᕆ ᕙᓛᕈᑎ, ᒥᑐᓴᓕ ᑯᓄᒃ ᐊᒻᒪ ᓴᐃᒪᓐ ᓇᑖᖅ, ᐅᖃᓚᐅᖅᐳᑦ ᓄᓇᖃᖅᑎᐅᔪᓂ — ᐱᓗᐊᖅᑐᒥ ᐃᓄᑐᖃᕐᓂ — ᐅᖃᖃᑎᒋᔭᐅᓂᖏᓐᓂ ᐊᑎᕐᒥ ᓂᕈᐊᖅᓯᓂᕐᒥ.

“ᐅᕙᖓᓕ, ᐊᑦᑎᖅᓯᔾᔮᙱᓚᖓ ᐊᑎᕐᓂ,” ᓇᑖᖅ ᐅᖃᓚᐅᖅᐳᖅ ᐃᓄᒃᑎᑐᑦ ᑐᓵᔨᑎᒍᑦ.

ᐃᓱᐊᓂ, ᑕᒪᒃᑭᑦ ᑲᑎᒪᔨᕋᓛᓂ ᐃᓚᒋᔭᐅᔪᑦ ᓂᕈᐊᓚᐅᖅᐳᑦ ᐱᐅᒃᓴᕐᓂᖅᓴᐅᓂᕐᒥ ᐃᓄᓕᒫᑦ ᓂᕈᐊᖅᑎᑦᑎᓂᖏᓐᓂ, ᐃᒻᒪᖄ ᓂᕈᐊᖅᑕᐅᓂᐅᔪᒥ ᓄᓇᓕᐸᐅᔭᐅᑉ ᕙᐃᔅᐳᒃᑯᑦ ᒪᒃᐱᒐᖓᓄᑦ.

ᑲᑎᒪᔨᕋᓛᑦ ᐃᒃᓯᕙᐅᑕᖓ ᑲᑎᒪᔨ ᑭᒻ ᓯᒥᑦ ᐅᖃᓚᐅᖅᐳᖅ ᐊᑦᑎᖅᑕᐅᖁᔭᐅᓂᐅᔪᑦ ᑲᑎᒪᔨᕋᓛᓂ ᐃᓚᒋᔭᐅᔪᓂ ᐅᖃᐅᓯᕆᓚᐅᖅᑕᖏᓐᓂ ᐃᓚᒋᔭᐅᖃᑕᐅᔪᓐᓇᖅᐳᑦ ᓇᐃᑦᑐᒥ ᑎᑎᕋᖅᑕᐅᓯᒪᓂᐅᔪᒥ ᐃᓱᒪᒃᓴᖅᓯᐅᕆᓂᕐᒥ, ᑭᓯᐊᓂ ᐃᓄᓕᒫᓂ ᐅᖃᖃᑎᖃᕐᓂᐅᔪᒥ ᐱᓕᕆᓂᐅᔪᒥ ᒪᑐᐃᖓᓪᓗᐊᖅᐳᖅ ᓂᕈᐊᒐᒃᓴᖃᕐᓗᓂ ᐃᖃᓗᖕᒥᐅᓄᑦ ᑐᓂᓯᓂᖏᓐᓂ ᓇᖕᒥᓂᖅ ᐊᑎᕆᖁᔭᐅᓂᐅᔪᓂ.

ᐃᓚᖏᑦ ᐃᓚᒋᔭᐅᔪᑦ ᐃᓱᒫᓗᓚᐅᖅᐳᑦ ᓴᖑᔭᕆᐊᖃᕋᔭᕐᓂᖏᓐᓂ ᐃᓄᓕᒫᓄᑦ ᓄᑖᒥ ᐊᖅᑯᒻᒥ ᐊᑎᖅᑖᕆᐊᖃᓕᕌᖓᑦ.

“ᑕᐃᒪᐃᓕᐅᒃᑲᓐᓂᕆᐊᖃᕐᓂᐊᖅᐳᒍᑦ 30−ᖏᖅᓱᒃᑲᓐᓂᖅᑐᒥ ᑎᑭᑉᐸᓪᓕᐊᔪᓂ ᐊᕐᕌᒍᓄᑦ 7−ᓄᑦ,” ᑲᑎᒪᔨ ᑲᐃᔪ ᓴᐳᑦ ᐅᖃᓚᐅᖅᐳᖅ. “ᐊᑲᐅᓈᕐᓂᐅᔾᔮᙱᓚᖅ ᐱᓕᕆᓂᐅᔪᒥ ᐊᑐᓂ ᐊᖅᑯᒻᒧᑦ ᐊᑎᒃᓴᖓᓄᑦ ᐱᓕᕆᐊᖑᓂᐊᖅᑐᒥ.”

ᓴᐳᑦ ᐃᒪᐃᖁᔨᓇᔭᖅᐳᖅ ᓄᓇᓕᐸᐅᔭᖅ ᐅᖃᖃᑎᖃᕐᓂᖏᓐᓂ ᑲᑎᙵᓂᐅᔪᒥ ᐱᕙᓪᓕᐊᑎᑦᑎᔪᒥ ᐊᖅᑯᓴᕆᐊᕐᒥ ᐊᖅᑯᑎᓪᓗᐊᑕᐅᓇᔭᕐᒪᑦ ᓴᓂᓕᕇᖑᔪᓄᑦ. ᑲᑎᙵᓂᐅᔪᑦ ᑐᓂᓯᓚᐅᕋᓗᐊᖅᐳᑦ 6−ᐸᓗᖕᓂ ᐊᑎᒃᓴᓂ ᐃᒻᒥᓄᑦ, ᐃᓚᖃᖅᑐᒥ ᓵᒋᐊᖅᑐᖅ ᐊᖅᑯᒻᒥ, ᓈᔅ ᓵᒋᐊᖅᑐᕐᒧᑦ, ᐃᓄᑐᖃᕐᒥ ᑐᒃᓯᕋᓚᐅᖅᓯᒪᔪᒥ ᒪᒥᓴᕐᕕᐅᑉ ᐊᑎᒃᓴᖓᓂ.

ᑲᑎᒪᔨ ᐋᒻᐳᕐ ᐊᒡᓘᒃᑲᖅ ᐊᖅᑯᒻᒥ ᐊᑦᑎᖅᑕᐅᖁᓚᐅᖅᐸᖓ ᐃᓅᔪᓐᓃᖅᓯᒪᓕᖅᑐᒥ ᓯᒡᓗᒃ ᐊᕿᐊᕈᕐᒥ, ᐃᒃᐱᒋᔭᐅᑦᑎᐊᖅᑐᒥ ᐃᓄᑐᖃᕐᒥ ᐃᓕᓐᓂᐊᖅᑎᑦᑎᕙᓚᐅᖅᑐᒥ ᐃᓄᐃᑦ ᐱᖅᑯᓯᑐᖃᖏᓐᓂ ᐊᔪᙱᓐᓂᐅᔪᓂ ᐊᒻᒪ ᖃᓄᖅ ᐊᐅᓪᓛᕈᓐᓇᕐᓂᕐᒥ ᓄᓇᒥ.

ᑲᑎᒪᔨ ᕉᒪᐃᓐ ᓯᑏᕙᓐᓴᓐ ᐃᔾᔪᐊᖅᓯᓚᐅᕆᕗᖅ ᓴᐳᑦᒥ, ᐅᖃᖅᖢᓂ ᓄᓇᓕᐸᐅᔭᖅ “ᐊᐅᓚᑦᑎᔭᕆᐊᖃᕐᓂᖏᓐᓂ ᖃᓄᑎᒋ ᐊᖏᓂᐅᓂᖓᓂ ᐱᓕᕆᓂᐅᔪᒥ ᐊᑦᑎᖅᓯᓂᕐᒥ ᐊᑕᐅᓯᑐᐊᕐᒥ ᐊᖅᑯᒻᒥ.”

“ᐊᑦᑎᖅᓰᓐᓇᐅᔭᕐᓂᐊᖅᐳᒍᑦ ᐊᖅᑯᒻᒥ,” ᓯᑏᕙᓐᓴᓐ ᐅᖃᓚᐅᖅᐳᖅ.

ᓂᕈᐊᓚᐅᖅᐳᖅ ᐊᐱᕆᓂᕐᒥ ᐃᓄᓕᒫᓂ ᑭᓯᐊᓂ ᐅᖃᓚᐅᖅᐳᖅ ᐊᑯᓂᐅᓗᐊᖅᑕᐃᓕᒪᖁᔨᓪᓗᓂ.

“ᐱᓕᕆᐊᕆᓗᒍ ᕿᓚᒻᒥᐅᔪᒥ ᐱᐅᓂᖅᐹᖑᓇᔭᖅᐳᖅ,” ᐅᖃᓚᐅᖅᐳᖅ.

ᐅᖃᓪᓚᖕᓂᖃᓚᐅᙱᓚᖅ ᖃᓄᑎᒋ ᓱᒃᑲᓂᖓᓂ ᖃᕋᓴᐅᔭᑎᒍᑦ ᓂᕈᐊᕐᓂᖃᕐᓂᖓᓂ ᐋᖅᑭᒃᑕᐅᓇᔭᕐᓂᖓᓂ, ᖃᓄᑎᒋ ᐃᓄᐃᑦ ᓂᕈᐊᕐᓂᖃᕋᔭᕐᓂᖏᓐᓂ, ᐅᕝᕙᓘᓐᓃᑦ ᖃᓄᖅ ᓵᓚᒃᓴᖅᑐᖅ ᐊᑎᖅ ᓂᕈᐊᖅᑕᐅᓂᐊᕐᓂᖓᓂ.