ᐃᖃᓗᖕᓂᕐᒥᐅᑕᖅ ᐊᖑᑦ ᑭᓱᖃᕈᓐᓃᑦᑎᐊᖅᐳᖅ ᐃᑭᑦᑐᒥ ᓱᔪᐃᓚᐅᖅᑎᓪᓗᒍ ᐊᖏᕐᕋᖓᓂ

ᐃᒡᓗᕐᔪᐊᖅ 157 ᐃᖃᓗᖕᓂ, ᐊᓯᖏᓐᓂ ᐃᒡᓗᖃᖃᑕᐅᔪᓂ ᐃᓚᖃᖅᑐᒥ ᓄᓇᑦᑎᐊᖅ ᑐᓴᒐᒃᓴᓕᕆᔨᒃᑯᓐᓂ, ᐃᑭᓚᐅᖅᐳᖅ ᓄᖑᖦᖢᓂ ᐊᐃᑉᐹᓂ

ᒫᑯᓯ ᐊᓐᓂᕐᒥᐅᖅ ᐅᖃᖅᐳᖅ ᐊᖏᕐᕋᒥᓂ ᔭᒐᐃᓚᐅᖅᐳᖅ ᐊᒻᒪ ᑕᒪᒃᑭᑦᑎᐊᑦ ᐱᖁᑎᖏᓐᓂ ᐃᑭᑦᑐᒥ ᓱᕋᑦᑎᕆᓚᐅᖅᑐᒥ ᐃᒡᓗᕐᔪᐊᖅ 157−ᒥ ᐃᖃᓗᖕᓂ ᒫᔾᔨ 26−ᒥ. (ᑕᐃᕕᑦ ᓛᒃᕼᐄᑦᒧᑦ ᐊᔾᔨᓕᐅᖅᑕᐅᔪᖅ)

By ᓯᑕᐃᕕᑦ ᓛᒃᕼᐄᑦᒧᑦ

ᒫᑯᓯ ᐊᓐᓂᕐᒥᐅᖅ ᐋᓐᓂᐊᕕᖕᒦᓚᐅᖅᐳᖅ ᐅᐸᒃᑕᐅᕕᒃᓴᖓᓂ ᑕᐃᒪᐃᑎᓪᓗᒍ. “ᖃᐅᔨᒪᙱᑎᐊᖅᖢᖓ,” ᐅᖃᓚᐅᖅᐳᖅ, “ᐃᒡᓗᕐᔪᐊᖁᑎᒐ ᐃᑭᑦᑐᐊᓗᒃ.”

ᐊᓐᓂᕐᒥᐅᖅ ᐃᓄᑑᓪᓗᓂ ᐃᒡᓗᖃᓚᐅᖅᐳᖅ ᐃᖃᓗᖕᓂ ᖁᓕᕇᒃᑐᒥ ᐃᒡᓗᕐᔪᐊᒥ ᒪᕐᕈᖓᓂ ᓇᑎᖓᓂ ᒪᕐᕉᖕᓂ−ᖁᑦᑎᖕᓂᓕᖕᓂ ᐃᒡᓗᕐᔪᐊᖅ 157−ᒥ, ᓄᖑᓚᐅᖅᑐᒥ ᒫᔾᔨ 26−ᒥ ᐃᑭᑦᑐᒥ.

ᐊᓯᖏᓐᓂ ᐊᖏᕐᕋᕆᔭᐅᔪᓂ ᐃᒡᓗᖁᑎᖃᓚᐅᖅᐳᑦ ᐃᒡᓗᕐᔪᐊᒥ, ᐃᒡᓗᖃᖅᑎᑦᑎᖕᒥᔪᒥ ᓇᖕᒥᓂᖃᖅᑎᐅᔪᓂ ᐃᓚᖃᖅᑐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ, ᐊᔮᔮ ᓂᐅᕕᐊᒃᓴᖃᕐᓂᕐᒥ ᐊᒻᒪ ᑐᓴᐅᒪᑎᑦᑎᓂᕐᒥ, ᐊᒻᒪᓗᑦᑕᐅᖅ ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂ.

ᐊᓐᓂᕐᒥᐅᖅ ᐊᖏᕐᕋᑕᐃᓐᓇᖅᑎᓪᓗᒍ ᐋᓐᓂᐊᕕᖕᒥ 9 ᐅᓪᓛᐸᓗᒃᑯᑦ, ᐃᑭᑦᑐᖅ ᓱᓕ ᒥᑭᓚᐅᖅᐳᖅ. ᑭᓯᐊᓂ ᑕᐃᔅᓱᒪᓂ, ᐅᖃᓚᐅᖅᐳᖅ, ᖃᑦᑎᕆᔨᐅᔪᑦ ᖃᐅᔨᒪᓚᐅᙱᓚᑦ ᖃᒥᑎᑦᑎᔪᓐᓇᕐᒪᖔᑕ.

ᓄᓇᓕᐸᐅᔭᖅ ᐃᖃᓗᖕᓂ ᐅᓂᒃᑳᕆᓚᐅᖅᐳᖅ ᐃᑭᑦᑐᖅ ᖃᒥᑕᐅᓚᐅᖅᐳᖅ ᑕᐃᑲᓂᒐᓚᒃ 4 ᐅᓐᓄᓴᒃᑯᑦ. ᐅᓐᓄᓕᓵᖅᑎᓪᓗᒍ, ᐃᑭᑦᑐᕕᓂᕐᓂᑐᐃᓐᓇᖅ ᐊᒥᐊᒃᑯᓚᐅᖅᐳᖅ.

ᒫᔾᔨ 28−ᒥ, ᑲᒪᒋᔭᖃᖅᑐᐃᑦ ᐅᖃᓚᐅᙱᓚᑦ ᖃᓄᖅ ᐃᑭᒋᐊᓚᐅᕐᓂᖓᓂ ᐅᕝᕙᓘᓐᓃᑦ ᓴᖅᑭᑎᑦᑎᓇᑎᒃ ᓇᓚᐅᑦᑖᖑᓂᐅᔪᒥ ᑲᑎᓪᓗᒋᑦ ᔭᒐᐃᓂᐅᔪᓂ ᐱᑎᑕᐅᔪᓂ ᐃᑭᑦᑐᒧᑦ.

ᐊᓐᓂᕐᒥᐅᖅ ᐅᖃᓚᐅᖅᐳᖅ ᐃᑭᓐᓂᐊᔪᖅ ᑎᑭᐅᑎᒐᒥ ᐃᒡᓗᒋᔭᖓᓄᑦ ᐃᒡᓗᕐᔪᐊᑉ ᑐᓄᐊᓂ, ᐅᔾᔨᕆᓚᐅᖅᐳᖅ ᐊᓯᐅᔨᓂᐊᕐᓂᖓᓂ ᑕᒪᒃᑭᓂ ᐱᖁᑎᖏᓐᓂ ᐊᒻᒪ ᐊᖏᕐᕋᖃᕈᓐᓃᕐᓂᐊᕐᓂᖓᓂ.

“ᑕᒪᓐᓇ ᐊᒃᓱᕈᕐᓇᕐᔪᐊᓚᐅᖅᐳᖅ,” ᐅᖃᓚᐅᖅᐳᖅ. “ᐊᒻᒪᓗ ᖃᓄᐃᓕᐅᕈᓐᓇᙱᑦᑎᐊᖅᐳᖓ ᐅᕝᕙᓘᓐᓃᑦ [ᑭᓇᑐᐃᓐᓇᕐᓗ] ᐱᓕᕆᔪᓐᓇᙱᓚᑦ.”

ᔭᒐᐃᔭᖏᓐᓂ, ᐃᓱᒪᓚᐅᖅᐳᖅ ᐃᒃᐱᐊᕐᔪᖕᒥᐅᑕᒥ ᓴᕕᖏᓐᓂ ᐊᑖᑕᒃᓴᖓᑕ ᑐᓂᓚᐅᖅᓯᒪᔭᖏᓐᓂ ᐊᕐᕌᒍᑦ 30 ᐊᓂᒍᖅᓯᒪᓕᖅᑐᓂ. ᐊᑐᖅᐸᓚᐅᖅᐸᖏᑦ ᓂᕿᓂᒃ ᐊᒡᒍᐃᓂᕐᒥ ᓂᕿᓪᓚᑦᑖᓂᓗ, ᐊᒻᒪ ᐅᑎᖅᑎᕆᕙᓚᐅᖅᐳᑦ ᐃᖅᑲᐅᒪᓂᐅᔪᒥ.

ᐃᑭᓚᐅᖅᑎᓪᓗᒍ, ᐃᖅᑲᓇᐃᔭᕐᕕᒋᔭᖓ ᑐᓂᓯᓚᐅᖅᐳᑦ ᐱᓇᓱᐊᕈᓯᕐᓂ ᒪᕐᕉᖕᓂ ᑲᒪᒋᔭᖃᕐᓂᕐᒥ ᑭᖑᓂᕆᔭᖓᓂ ᐃᑭᓚᐅᖅᑎᓪᓗᒍ ᐃᒡᓗᒋᔭᖓᓂ.

ᐊᒻᒪᓗᑦᑕᐅᖅ, ᐃᒡᓗᒥ ᓇᖕᒥᓂᖃᖅᑎᐅᔪᖅ ᐃᓕᓚᐅᖅᐸᖓ ᑐᔪᕐᒥᕕᖕᒥ ᐃᒡᓗᕈᓯᐅᔪᒥ ᐱᓇᓱᐊᕈᓯᕐᓄᑦ ᒪᕐᕉᖕᓄᑦ. ᐊᓐᓂᕐᒥᐅᖅ ᐅᖃᓚᐅᖅᐳᖅ ᐃᒡᓗᒥ ᓇᖕᒥᓂᖃᖅᑎᐅᔪᖅ ᐊᒃᓱᕈᕐᓂᐊᖅᐳᖅ ᓇᓂᓯᓇᓱᐊᕐᓂᖓᓂ ᐊᑐᐃᓐᓇᐅᔪᒥ ᐃᒡᓗᕈᓯᕐᒥ ᐊᑐᖅᑐᐊᕐᓂᕐᒧᑦ, ᑭᓯᐊᓂ ᐱᑕᖃᙱᒃᑯᓂ ᐊᑐᐃᓐᓇᐅᔪᒥ ᓇᓂᓯᓇᓱᒋᐊᖃᕐᓂᐊᖅᐳᖅ ᓇᖕᒥᓂᖅ ᐃᓂᒃᓴᖓᓂ ᐊᑐᖅᑐᐊᕐᓂᕐᒧᑦ.

“ᐃᒡᓗᑭᒃᓴᓕᐊᕐᓂᖅᑕᖃᖅᐳᖅ ᐅᑭᐅᖅᑕᖅᑐᓕᒫᒥ,” ᐊᓐᓂᕐᒥᐅᖅ ᐅᖃᓚᐅᖅᐳᖅ, ᐊᒻᒪ ᐃᒡᓗᒃᓴᓂ ᐊᑐᐃᓐᓇᖃᙱᓚᖅ.

ᕿᒪᒃᑕᐅᓪᓗᓂ ᐊᓐᓄᕌᑐᐊᓂ ᐊᑐᖅᑕᒥᓂ, ᕙᐃᔅᐳᒃᓕᐊᓚᐅᖅᐳᖅ ᐊᐱᕆᓪᓗᓂ ᑐᒃᓯᕋᖅᖢᓂ ᐊᓐᓄᕌᓂ. ᑕᐃᒪᙵᓂ, ᐱᓚᐅᖅᐳᖅ ᐊᒥᓱᓂ ᖃᕐᓕᓂᑦ, ᑭᐊᑎᓂᒃ ᐊᒻᒪ ᐊᓯᖏᓐᓂ ᐃᓚᖏᓐᓂ.

“ᖁᔭᓕᕐᔪᐊᖅᐳᖓ, ᐅᐊᑲᓪᓚᓚᐅᖅᐳᖅ,” ᐊᓐᓂᕐᒥᐅᖅ ᐅᖃᓚᐅᖅᐳᖅ ᑐᓐᓂᖅᑯᓯᐊᖑᔪᓂ.

“ᐅᓇ ᐱᒋᐊᕐᓂᐅᕗᖅ,” ᐃᓚᒋᐊᖅᓯᓚᐅᖅᐳᖅ. “ᐊᓐᓄᕌᖅᑖᕐᓂᕐᒥ ᐱᒻᒪᕆᐅᓛᖑᓚᐅᖅᐳᖅ ᐅᕙᓐᓄᑦ.”

ᐊᓐᓂᕐᒥᐅᖅ ᐅᖃᓚᐅᖅᐳᖅ ᓱᓕ ᕿᓂᕆᐊᖃᖅᐳᖅ ᐱᖁᑎᓂᑦ ᐱᔭᕆᐊᖃᖅᑐᓂ ᓇᓗᓇᐃᖅᓯᒪᔪᓂ ᐊᖏᓂᐅᔪᓂ, ᓲᕐᓗ ᐃᓯᒐᐅᔭᓂ ᐊᒻᒪ ᑲᒫᓗᖕᓂ, ᐊᒻᒪᓗ ᔭᐃᑲᖕᒥ. ᐅᖃᓚᐅᖅᐳᖅ ᑭᖑᓂᖃᕆᓂᐊᖅᐸᖓ ᖄᒃᑲᓐᓂᐊᒍᑦ ᐋᓪᓕᐊᕐᒥ ᐃᒡᓕᖓᓂ ᐃᑲᔪᓚᐅᖅᑐᒥ ᑐᓄᕐᓗᖕᓂᖓᓂ.

ᑕᐃᒪᑐᖅ ᓇᓂᓯᔪᓐᓇᕐᓂᐊᖅᐳᖅ ᐃᒡᓗᒃᓴᒥ ᐃᒡᓗᒋᓂᐊᖅᑕᖓᓂ ᒪᓕᒃᑐᓂ ᐱᓇᓱᐊᕈᓯᕐᓂ ᒪᕐᕉᖕᓂ. ᐅᖃᓚᐅᖅᐳᖅ ᐃᓚᖃᙱᓐᓂᖓᓂ ᓄᓇᓕᐸᐅᔭᕐᒥᐅᑕᐅᔪᓂ.

ᐊᓐᓂᕐᒥᐅᖅ ᐊᖏᕐᕋᖅᓯᒪᓚᐅᕈᓂ ᐃᑭᓕᖅᑎᓪᓗᒍ, ᐱᑲᐅᖅᑐᕈᓐᓇᕋᔭᓚᐅᖅᑐᒃᓴᐅᔪᖅ ᐱᖁᑎᓂ ᓲᕐᓗ ᖃᕋᓴᐅᔭᕋᓛᖓᓂ ᐊᒻᒪ ᐊᓐᓄᕌᓂᑦ. ᑭᓯᐊᓂ ᑕᐃᒃᑯᐊ ᐱᖁᑎᑦ ᐃᓇᖏᒐᒃᓴᐅᕗᑦ, ᐅᖃᓚᐅᖅᐳᖅ.

“ᖁᕕᐊᓱᑐᐃᓐᓇᖅᐳᖓ ᐃᒡᓘᑉ ᐃᓗᐊᓃᑦᑐᖃᓚᐅᙱᓐᓂᖓᓂ [ᐃᑭᑦᑐᖃᖅᑎᓪᓗᒍ] ᐊᒻᒪ ᐋᓐᓂᖅᑐᖃᓚᐅᙱᓐᓂᖓᓂ,” ᐅᖃᓚᐅᖅᐳᖅ.

“ᑕᐃᒪᐃᑦᑐᖃᓲᖑᕗᖅ.”

ᐊᓐᓂᕐᒥᐅᖅ ᐅᖃᖃᑎᖃᓚᐅᖅᑎᓪᓗᒍ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ, ᐅᑭᐅᖅᑕᖅᑐᒥ ᑯᐊᐸᒃᑯᑦ ᐊᖓᔪᖅᑳᖓᑕ−ᑐᒡᓕᐊ ᑐᐊᐃᓐ ᐅᐃᓪᓴᓐ ᐅᖃᐅᔾᔨᓚᐅᖅᐳᖅ ᑐᓴᒐᒃᓴᓕᕆᔨᒃᑯᓐᓂ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᑯᐊᐸᒃᑯᑦ ᐊᖏᖅᓯᒪᓂᖃᖅᐳᑦ $1,000−ᒥ ᓂᐅᕕᕈᓐᓇᕐᓂᐅᔪᒥ ᐊᓐᓂᕐᒥᐅᖅ ᐊᑐᕈᓐᓇᕐᓂᐊᖅᑕᖓᓂ ᑕᐃᑲᓂ ᓂᐅᕕᕐᓂᕐᒧᑦ.

Share This Story

(0) Comments