ᐃᖃᓗᖕᓂ ᐅᓂᒃᑳᖑᓯᒪᔪᑦ 2020-ᒥᑦ

ᐊᕐᕌᒍ ᓴᓇᐅᒐᓕᕆᓂᕐᒧᑦ, ᐱᙳᐊᖅᑐᓕᕆᓂᕐᒧᑦ ᐊᒻᒪ ᓄᓇᓕᖕᓂ ᐃᓱᒪᒋᔭᖃᕐᓂᕐᒥᒃ

ᐃᓄᒋᐊᒃᖢᑎᒃ ᐃᖃᓗᖕᒥᐅᑦ ᑲᑎᑉᐳᑦ ᐃᒃᓴᕐᕕᒃᒥᑦ ᐅᒃᑑᐱᕆ 28 6-ᒋᓕᕐᑕᖓᓂ ᐊᕐᕌᒍᒥ ᐊᐃᕝᕙᒐᓱᒃᑎᓪᓗᒋ ᐊᒻᒪ ᑕᒪᐅᙵᐅᔾᔭᐅᓪᓗᓂ ᑖᒻ ᕗᐃᑐᒧᑦ ᐊᒻᒪ ᐃᓚᖏᓐᓄᑦ ᐅᕘᓇ ᐸᓛᒃ ᔭᑦ. ᑕᒪᑐᒪᓂ ᐊᕐᕌᒍᒥ, ᐊᖑᓇᓱᓚᐅᕐᑐᑦ ᐅᓪᓗᓂ ᑎᓴᒪᓂᒃ ᐊᒻᒪ ᖁᓕᓂᒃ ᐊᐃᕝᕙᒃᖢᑎᒃ. ᐊᕐᕌᒍᑕᒫᓐ, ᕗᐃᑐᑦ ᐊᒻᒪᓗ ᐊᖑᓇᓱᒃᑎᐅᖃᑎᖏᑦ ᐃᖃᓗᐃᑦ ᓂᒋᐊᓄᙶᐅᕙᒃᑐᑦ ᒫᓂ 150 ᑭᓛᒥᑕᓂ ᒪᐅᖓ 200 ᑭᓛᒥᑕᓄ ᐅᖓᓯᖕᓂᓕᖕᒥᑦ. ᑖᒃᑯᐊ ᐊᖑᓇᓱᒃᑏᑦ ᑖᒃᑯᐊᑦᑕᐃᓐᓇᐅᐸᓗᒃᐸᒃᑐᑦ ᑕᓪᓕᒪᐅᓪᓗᑎᒃ 6-ᖑᓪᓗᑎᓪᓘᓐᓃᑦ ᐊᒻᒪᓗ ᑖᒃᑯᐊ ᑕᓪᓕᒪᓄᑦ ᑎᑭᑦᑐᓂᒃ ᓇᒃᓴᖅᐸᒃᖢᑎᒃ ᐊᔪᕈᓐᓃᕐᓴᖅᑎᑕᐅᓂᐊᕐᑐᓂᒃ ᑕᒪᑐᒥᖓ. ᕗᐃᑐᓪ ᐅᖃᓚᐅᕐᑐᖅ ᖁᕕᐊᓇᕐᓂᖅᐹᖑᓂᕋᖅᖢᓂᐅᒃ ᐃᓅᓱᖕᓂᕐᓴᓂᒃ ᐊᔪᕈᓐᓃᕐᓴᖅᑎᑦᑎᓪᓗᓂ ᐊᒻᒪᓗ ᐃᓄᐃᑦ ᖁᖓᑲᑕᖕᓂᖏᑦ ᓂᕿᑖᕌᖓᑕ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)

By ᒥᓚᓂ ᕆᑦᓵᑦ

For an English version of this story, see Iqaluit’s top stories of 2020

ᓄᓇᕗᑦ ᓄᓇᓕᐸᐅᔭᖓᓄᑦ, 2020 ᐊᕐᕌᒎᓚᐅᕐᑐᖅ ᓴᓇᐅᒐᓕᕆᓂᕐᒧᑦ, ᐱᙳᐊᖅᑐᓕᕆᓂᕐᒧᑦ, ᐊᒻᒪᓗ ᓄᓇᓕᖕᓂ ᐃᓱᒪᒋᔭᖃᕐᓂᕐᒧᑦ.

ᒪᑯᐊᖑᒐᓗᐊᕐᑎᓪᓗᒋᑦ ᐊᓯᔾᔨᕐᓂᐅᔪᑦ ᐊᒻᒪ ᐋᖅᑭᒋᐊᕐᓂᐅᔪᑦ ᓄᓇᕐᔪᐊᕐᒥ ᐋᓐᓂᐊᕕᒡᔪᐊᕐᓇᒨᕐᑎᓪᓗᒋᑦ, ᐃᖃᓗᐃ ᓴᓇᐅᒐᓕᐅᕐᑎᖏ ᖃᔅᓯᓂ ᐅᑭᐅᖃᕋᓗᐊᕈᑎᒃ ᐱᕙᓪᓕᐊᒻᒪᕆᓚᐅᕐᐳᑦ ᐊᒻᒪ ᐃᓄᐃᑦ ᑲᑎᖢᑎᒃ ᐱᓕᕆᑲᑕᓚᐅᕐᐳᑦ ᐃᓅᖃᑎᒌᖕᓂᕐᒨᖓᔪᓄᑦ.

ᐃᓄᒃᓱᑦ ᐃᓕᓐᓂᐊᕐᕕᐊᓗᒃᒧᑦ ᐃᓕᓐᓂᐊᕐᑏᑦ ᑎᑕᒃᑎᐅᖃᑎᒌᖑᔪᑦ ᐊᒻᒪ ᕿᓚᐅᔭᕐᑏᑦ ᖁᙱᐊᖅᑕᐅᓚᐅᕐᑐᑦ ᐅᕙᓂ ᐋᑐᕚᒥ ᑲᓇᑕᒥ ᓴᓇᐊᒐᓕᕆᓂᕐᒧᑦ ᐱᓕᕆᕕᒃᒥᑦ (National Arts Centre), ᐊᔾᔨᒌᙱᑦᑐᓂᒃ ᐃᓕᖅᑯᓯᒃᑯᑦ ᐊᒻᒪ ᒫᓐᓇᓕᓴᓂᒃ ᑎᑕᑲᑕᒃᖢᑎᒃ ᐊᒻᒪ ᒧᒥᑲᑕᒃᖢᑎᒃ. ᐃᖃᓗᐃᑦ ᐱᓕᔪᑦ ᕼᐋᑭᖅᑏᑦ ᐊᒻᒪ ᐱᙳᐊᕆᐊᓚᐅᕐᓯᒪᕗᑦ ᖃᓪᓗᓈᓄᑦ, ᓵᓚᒃᓴᐅᓯᐊᖅᖢᑎ ᒪᓐᑐᕆᐊᒥᑦ, ᐊᒻᒪ ᐅᑯᐊ ᓱᒃᑲᓴᐅᑎᕙᒃᑐᑦ ᓯᐊᕐᕆᔮᖅᖢᑎ ᓵᓚᒃᓴᓚᐅᕆᓪᓗᑎᒃ $10,000-ᒥ, ᑕᒪᑐᒧᖓᓕ ᐃᒻᒥᓂᒃ ᓴᐳᑎᓯᒪᒍᑎᒃᓴᓂᒃ ᓄᑖᙳᕆᐊᖅᑎᑦᑎᔪᓐᓇᕐᓂᐊᓕᕐᖢᑎᒃ.

ᓄᓇᓕᐸᐅᔭᐃᑦ ᐊᓕᐊᓇᐃᑦ ᓴᓇᐅᒐᓕᕆᓂᕐᒧᑦ ᖁᕕᐊᓲᑎᓕᕆᔨᒃᑯᑦ ᑐᙵᓱᒃᑎᑦᑎᓚᐅᕐᑐᑦ ᓯᕗᓪᓕᖅᐹ ᐃᓄᒃ ᑐᑭᒧᐊᖅᑎᑦᑎᔨᒥᒃ, ᐊᓛᓇ ᔮᓐᔅᑕᓐ, ᐊᒻᒪ ᐃᖃᓗᖕᓂ ᖁᙱᐊᖅᑕᐅᕙᒃᑐᖅ ᐋᓇ ᓛᒻ ᓰᐲᓰᒃᑯᑦ ᓴᖅᑭᔮᒐᕐᒥᑦ Trickster ᐃᓚᐅᓕᓚᐅᕐᖢᓂ. ᑎᑎᕋᐅᔭᕐᑎ ᐃᓄᒃ ᔨᕐᒪᐃᓐ ᐊᕐᓇᒃᑕᐅᔪᒃ ᐊᒻᒪ ᓴᖅᑭᔮᖅᑎᑦᑎᓚᐅᕐᒥᔪᖅ ᑎᑎᕋᐅᔭᒐᖏᓐᓂᒃ ᐃᖃᓗᖕᓂᑦ.

ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᓴᕿᑎᑦᑎᕙᓪᓕᐊᒍᑎᐅᓚᐅᕐᐅᖅ ᐊᔾᔨᔾᔨᕈᑎᓂᒃ ᓄᓇᕗᑦ ᐊᖓᔪᖅᑳᖃᕐᕕᐊᓂᒃ ᑕᒪᑐᒪᓂ ᐊᕐᕌᒍᒥ. ᐃᓄᒋᐊᒃᑐᓃᓐᓂᕐᓂᖅ ᐊᓯᙳᖅᑎᑕᐅᓪᓗᓂ, ᓂᕆᔭᖅᑐᕐᕖᑦ ᐊᒻᒪ ᓇᖕᒥᓂᕆᔭᐅᔪᑦ ᐱᓕᕆᐊᑦ ᐊᒻᒪ ᓄᓇᓕᖕᓂ ᖃᓄᐃᓕᐅᕈᑎᒃᓴᑦ ᒪᑐᓪᓗᑎᒃ. ᐃᖃᓗᐃᑦ ᑎᑎᖃᒃᑯᕕᖓ, ᐃᓚᒋᔭᐅᓕᕐᑐᖅ ᑲᓇᑕᒥ ᑎᑎᖃᓕᕆᔨᒃᑯᓐᓂᑦ ᐱᓕᕆᐊᖃᓛᖑᖃᑕᐅᓂᕐᒥᒃ, ᑎᑭᑉᐸᓪᓕᐊᔪᓂᒃ ᑎᑎᖃᓂᒃ ᓇᒡᓯᐅᔾᔭᒐᕐᓂᒡᓗ ᐅᓄᕐᓯᕚᓪᓕᕈᔾᔨᓚᐅᕐᐳᑦ. ᓄᓇᓕᐸᐅᔭᐃᑦ ᐱᐊ ᐊᒻᒪ ᐅᐊᐃᓐᑖᕐᕕᖓ ᐊᒻᒪ ᓂᐅᕕᕐᕕᐅᓂᕐᓴᐅᓚᐅᕐᓯᒪᕗᖅ.

ᐃᖃᓗᖕᓂ ᓄᓇᖃᕐᑐᑦ ᐃᑲᔪᕐᓂᖏᓐᓂ ᐊᔾᔨᒌᙱᑦᑐᓂᒃ ᐃᓅᖃᑎᒌᖕᓂᕐᒧᑦ ᓴᖅᑭᔮᓚᐅᕆᕗᑦ. ᔭᓄᐊᕆᒥᑦ, ᐃᓄᐃᑦ ᑲᑎᖃᑎᒌᓚᐅᕐᓯᒪᔪᑦ ᐃᓱᒪᒋᔭᐅᓪᓗᑎᒃ ᖃᖓᑕᓲᒃᑰᖅᑐᕕᓂᕐᓂᒃ ᐅᕙᓂ Ukraine International Airlines Flight PS752, ᑖᓐᓇ ᖁᑭᖅᑕᐅᓪᓗᓂ ᐊᐃᕇᓂᐊᓐᑯᑦ ᖄᖅᑕᔫᖓᓄᑦ. ᐊᐅᔭᐅᑎᓪᓗᒍ, 200 ᐅᖓᑖᓂᒃ ᐃᓄᖕᓂ ᑲᑎᑦᑐᖃᓚᐅᕆᕗᖅ ᓂᐱᖃᙱᓚᐅᑲᒃᖢᑎ ᐃᓱᒪᒋᓪᓗᒋᑦ ᐃᒻᒥᓃᖅᖢᑎᒃ ᐃᓅᔪᓐᓃᕐᓂᑯᓂᒃ ᐅᕗᙵᐅᓚᐅᙱᓐᓂᖏᓐᓂᒃ ᒪᓕᒐᓕᕆᕕᒡᔪᐊᕐᒧᑦ ᐃᓱᒪᒃᑯᑦ ᐋᓐᓂᐊᖃᖅᐸᒃᑐᓂᒃ ᐃᑲᔪᖅᑐᐃᒃᑲᓐᓂᖁᔨᓪᓗᑎᒃ. ᐅᕆᓐᔾ ᐅᕕᓂᕈᖅ ᐅᓪᓗᕐᒥ (Orange Shirt Day), ᐃᓱᒪᒋᓪᓗᒋᑦ ᓄᓇᖃᖅᑳᖅᑐᑦ ᓱᕈᓯᖏᑦ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᓂᒃ. ᐅᓄᕐᑐᒻᒪᕇᑦᑕᐅᖅ ᐃᑲᔪᖅᑐᐃᓚᐅᕐᒥᔪᑦ ᕿᓂᕐᑕᐃᑦ ᐃᓅᓯᖏᑦ ᐱᒻᒪᕆᐅᔪᑦ ᐱᓕᕆᐊᖓᓂᒃ, ᐅᓄᕐᑐᑦ ᑮᓇᑉᐸᒃᓯᒪᓪᓗᑎᒃ. ᐃᖃᓗᐃᑦ ᐃᓚᐅᓚᐅᕐᒥᔪᑦ ᐅᓪᓗᕐᒥᑦ ᐃᓱᒪᒋᔭᖃᕐᓂᕐᒥᒃ 22 ᐃᓄᐃᑦ ᖁᑭᖅᑕᐅᓪᓗᑎᒃ ᐃᓅᔪᓐᓃᖅᑐᕕᓂᒃ ᓅᕙ ᓯᑰᓯᐊᒥ ᐅᐱᕐᖔᖑᑎᓪᓗᒍ.

ᐊᒻᒪᓗ, ᐅᑭᐅᕐᑕᖅᑐᓕᕆᔨᒃᑯᑦ ᒥᓂᔅᑕᖓ ᑖᓐ ᕚᓐᑐᓪ ᓄᓇᓕᐸᐅᔭᓄᑦ ᐳᓛᓚᐅᕐᒥᔪᖅ, ᐊᒻᒪ ᐃᑭᒃᑐᖃᖅᖢᓂ ᓴᓇᔭᐅᔪᒥᑦ ᕿᑭᖅᑕᓂ ᐃᑲᔪᖅᑕᐅᕝᕕᐅᑉ ᒪᒥᓴᕐᕕᖓᓄᑦ ᐊᑕᔪᒥᑦ, ᓂᐊᖁᙴᒥᐅᑦ ᓯᒡᔭᖓ ᓴᓗᒻᒪᕐᓴᖅᑕᐅᓚᐅᕐᐳᖅ ᐊᒻᒪᓗ ᓄᑖᒥ ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᖕᒥᑦ ᓴᓇᔪᖃᖅᖢᓂ.

ᐅᑯᐊ ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᓂᒃᑳᓕᐊᕕᓂᖏᑦ ᐃᖃᓗᐃᑦ ᒥᒃᓵᓄᑦ ᐃᖅᑲᐅᒪᓇᕐᑐᑦ 2020-ᒥᑦ.

ᔭᓄᐊᕆ

ᔫᓇᐃᑕᑦ ᐃᐅᓚᐃᓐᔅ ᖃᖓᑕᓲᖅ 195, ᓵᓐ ᕗᕌᓐᔅᓯᑰᒧᙵᐅᔪᖅ ᒥᐅᓂᒃᒥ, ᐃᖃᓗᖕᓄᑦ ᓄᖅᑲᕆᐊᖃᓕᓚᐅᕐᓯᒪᕗᖅ ᔭᓄᐊᕆ 31-ᒥᑦ. ᔫᓇᐃᑕᑦ ᐃᐅᓚᐃᓐᔅ ᐅᖃᓚᐅᕐᑐᑦ ᓄᖅᑲᕆᐊᖃᓕᓚᐅᕐᓂᖏᓐᓂᒃ “ᑐᐊᕕᕐᓇᖅᑐᒧᑦ ᐋᓐᓂᐊᓕᕐᑐᖃᕐᓂᖓᓂᒃ ᐃᑭᒪᔪᒥ.” ᐋᓐᓂᐊᖅᑐᓕᕆᔨᒃᑯᑦ ᖃᖓᑕᓲᒥ ᓂᐅᕝᕕᐅᕆᐊᕐᓯᒪᓚᐅᕐᑐᑦ ᑖᓐᓇ ᐋᓐᓂᐊᕐᑐᖅ ᐃᑲᔪᖅᑕᐅᓂᐊᕐᒪᑦ. ᖃᖓᑕᓲᒃᑯᑦ ᐅᖃᓚᐅᕐᑐᑦ. “ᐱᓕᕆᐊᖃᕋᓱᒃᑲᑦᑕ ᑖᒃᑯᐊ ᐱᔨᑦᑎᕋᖅᑕᕗᑦ ᐅᐸᒃᑕᖏᓐᓄᐊᖅᑎᑲᐅᖅᑐᕋᓱᒃᖢᑎᒍᑦ,” (ᐊᔾᔨᓕᐅᕆᔨ ᐃᐊᒪ ᑐᕌᓐᑐ)

ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᐱᖁᔨᓚᐅᕐᑐᑦ ᓱᐴᖅᑐᒐᖅᑖᕐᕕᒃᓴᒥᑦ ᓂᐅᕕᕐᕕᒃᓴᒥᑦ ᒪᑐᐃᖁᔨᓪᓗᑎᒃ ᑕᕝᕙᓂ ᓄᓇᓕᖕᓂ , ᐅᖃᖅᖢᑎᒃ ᑕᐃᒪᓐᓇ ᐱᕋᔭᖕᓂᒃᑯᑦ ᓂᐅᕕᐊᒃᓴᓕᖕᓂ ᐱᑕᖃᙱᓐᓂᕐᓴᐅᓕᕋᔭᕐᓂᖓᓄᑦ.

ᓄᓇᖃᕐᑐᑦ ᐱᕈᖅᑎᑦᑎᓚᐅᕐᑐᑦ $6,000 ᐅᖓᑖᓂ ᐃᖃᓗᖕᒥᐅᑕᐃᑦ ᐃᓚᒌᑦ ᐃᒡᓗᖓ ᐃᑭᑎᓪᓗᒍ ᕼᐋᐱ ᕚᓕᒥᑦ. ᑖᒃᑯᐊ ᑭᓱᓕᒫᐸᓗᖏᓐᓂᒃ ᐃᑭᑦᑐᒧᑦ ᐊᓯᐅᔨᓚᐅᕐᒪᑕ, ᐃᓚᐅᓪᓗᓂ ᕿᒻᒥᖓ.

ᐃᖃᓗᖕᓂ ᓄᓇᖃᖅᑐᑦ, ᐃᓚᒋᔭᐅᓪᓗᑎᒃ ᐅᑯᓄᖓ ᐊᐃᕇᓂᐊᓐ-ᑲᓇᑕᒥᐅᑦᑕᑦ, ᑲᑎᓚᐅᕐᑐᑦ ᐃᓱᒪᒋᔭᐅᓪᓗᑎᒃ ᔪᑭᕇᓐᓂᒃ ᖃᖓᑕᓲᒃᑰᖅᑐᕕᓂᑦ ᐅᕙᓂ Ukraine International Airlines Flight PS752, ᑖᓐᓇ ᖁᑭᖅᑕᐅᓪᓗᓂ ᖄᖅᑕᔫᒧᑦ ᐃᕋᐃᓂᐊᓐᑯᓐᓂᑦ, 176 ᐃᑭᒪᔪᑦ ᓴᓇᔨᒋᔭᐅᔪᓪᓗ ᐃᓅᔪᓐᓃᖅᖢᑎᒃ, 57 ᑲᓇᑕᒥᐅᑕᐅᓪᓗᑎᒃ.

ᕝᕗᐊᕆ

ᐃᖃᓗᖕᓂ ᐊᓐᓂᑭᖅᑐᖅᑏᑦ ᐅᑯᐊ ᐃᖃᓗᐃᑦ ᐱᓕᔪᑦᔅ ᐱᙳᐊᖅᑎᖏᑦ, ᑲᒪᔨᖏᑦ ᐊᒻᒪᓗ ᓄᓇᕗᒥᑦ ᒥᑦᔭᑦ ᐱᙳᐊᖅᑏᑦ ᖁᕕᐊᓲᑎᖃᓚᐅᕐᐳᑦ ᓵᓚᒃᓴᖅᑎᓪᓗᒋᑦ ᒪᓐᑐᕆᐊᒥᑦ ᕕᕝᕗᐊᕆ 16-ᒥᑦ. (ᐊᔾᔨᙳᐊᖅ ᐃᖃᓗᐃᑦ ᐊᓐᓂᑭᑦᑐᖅᑎᑦ ᑲᑐᔾᔨᖃᑎᒌᖏᓐᓂ)

11 ᖃᑦᑎᕆᔨᐅᔪᑦ ᖃᒥᑦᑎᕗᑦ ᐃᑭᑦᑐᒥ ᐃᒡᓗᓕᐅᕐᕕᐅᔪᒥᑦ ᐅᕙᓂ ᕿᑭᖅᑕᓂ ᐃᑲᔪᖅᑕᐅᕕᐅᑉ ᒪᒥᓴᕐᕕᖓᓂᒃ, ᕿᑭᖅᑖᓗᒃᒥᑦ ᐃᑲᔪᖅᑕᐅᕕᐅᑉ ᐊᑭᑦᑎᐊᖓᓂᑦᑐᖅ. ᐋᓐᓂᕐᑐᖃᓚᐅᙱᑦᑐᖅ.

ᐃᓕᓐᓂᐊᕐᑏᑦ ᑎᑕᑦᑎᐅᔪᑦ ᐊᒻᒪ ᕿᓚᐅᔾᔭᕐᑏᑦ ᐃᖃᓗᐃᑦ ᐃᓕᓐᓂᐊᕐᕕᐊᓗᖓᓂᒃ ᖁᙱᐊᖅᑕᐅᓚᐅᕐᓯᒪᔪᑦ ᐋᑐᕚᒥᑦ ᑲᓇᑕᒥ ᓴᓇᐅᒐᓕᕆᓂᕐᒧᑦ ᐅᐸᒡᕕᒃᒥᑦ (National Arts Centre), ᖁᙱᐊᖅᑕᐅᓪᓗᑎᒃ ᐊᔾᔨᒌᙱᑦᑑᑎᓂ ᑎᑕᒍᓯᖃᑲᑕᒃᖢᑎᒃ ᐊᒻᒪ ᐃᓕᖅᑯᓯᒃᑯᑦ ᑎᑕᐅᑎᓂᒃ ᕿᓚᐅᔾᔭᑲᑕᒃᖢᑎᒡᓗ.

ᐃᓄᒃ ᑎᑎᕋᐅᔭᒐᕐᑎ ᔨᕐᒪᐃᓐ ᐊᕐᓇᒃᑕᐅᔪᒃ ᓴᖅᑭᔮᖅᑎᑦᑎᓚᐅᕐᑐᖅ ᐃᓕᖅᑯᓯᕕᓂᕐᓂ ᑐᓂᓕᐅᖃᑦᑕᕐᓂᑯᓂ ᒪᓕᒃᓯᒪᓪᓗᑎ ᑎᑎᕋᐅᔭᒐᕐᓂ ᐅᕙᓂ ᐃᖃᓗᖕᓂᑦ ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᕐᕕᒃᒥᑦ. ᑎᑎᕋᐅᔭᕐᑕᖏᑦ ᓴᖅᑭᔮᖅᑎᑦᑎᓇᓱᒃᑐᑦ ᐃᓄᐃᑦ ᐊᕐᓇᐅᑎᒋᓂᖏᓐᓂᒃ, ᒪᐅᓇ ᑑᒑᓂᒃ ᐃᓪᓚᐃᒍᑎᓕᐊᑎᒍᑦ ᐊᒻᒪ ᐊᔾᔨᙳᐊᓂᒃ ᐃᓕᖅᑯᓯᒃᑯᑦ ᑐᓂᐅᓚᐅᕐᓯᒪᔪᑦ ᐊᔾᔨᙳᐊᖏᓐᓂᒃ.

ᒫᔅᓯ

ᒫᓴ ᕉᑦᔅ, ᓵᓖᓐ ᐹᑐᓴᓐ, ᓃᕕ ᕗᐃᐊᑭᓐᔅ ᐊᒻᒪ ᔭᐃᓴᓐ ᕉᓴᓐ ᑐᓂᐅᖅᑲᐃᔪᑦ ᐅᓪᓛᕈᒻᒥᑕᒃᓴᓂᒃ ᓱᕈᓯᕐᓄᑦ ᑎᔭᐃ ᓂᐅᕕᕐᕕᐅᑉ ᑐᓄᐊᓂ ᐃᖃᓗᖕᓂ. (ᐊᔾᔨᓕᐅᕆᔨ ᒦᒐᓐ ᑎᐅᓕᖕ)

ᐅᑭᐅᕐᑕᖅᑐᓕᕆᔨᒃᑯᑦ ᒥᓂᔅᑕᖓ ᑖᓐ ᕚᓐᑐᓪ ᐳᓛᓚᐅᕐᑐᖅ ᓄᓇᕗᑦ ᐊᖓᔪᖅᑳᖃᕐᕕᖓᓄᑦ ᓯᕗᓪᓕᕐᐹᕆᓪᓗᓂᐅᒃ. ᑲᑎᖃᑎᖃᓚᐅᕐᑐᖅ ᓄᓇᓕᖕᓂ ᓯᕗᓕᐅᕐᑎᓂᒃ ᐅᖃᐅᓯᖃᕋᓱᒃᖢᑎᒃ ᓄᓇᕗᒥᑦ ᐃᓱᒫᓘᑎᒋᕙᒃᑕᖏᓐᓂᒃ ᐊᒻᒪᓗ ᖃᓄᐃᓕᐅᕈᑎᐅᔪᓂᒃ ᑕᒪᒃᑯᓂᖓ ᐋᖅᑭᒍᑎᒋᔭᐅᔪᓂᒃ. “ᐅᕙᓐᓄ ᐱᒻᒪᕆᐅᖕᒪᑦ ᒥᓂᔅᑕᐅᓪᓗᖓ ᐅᑭᐅᕐᑕᖅᑐᓕᕆᓂᕐᒧᑦ ᒪᑯᓂᖓ ᓯᕗᓪᓕᐅᑕᐅᔭᕆᐊᓕᖕᓂ ᑐᓴᕋᓱᒃᖢᖓ ᑕᒫᓂ ᓄᓇᖃᖅᑐᓂᒃ,” ᐅᖃᖅᑐᖅ.

ᑎᓴᒪᑦ ᐃᖃᓗᖕᓂ ᐃᓕᓴᐃᔨᐅᔪᑦ ᐃᓂᓕᐅᓚᐅᕐᐳᑦ ᑏᔭᐃ ᓂᐅᕕᕐᕕᐅᑉ ᑐᓄᖓᓂᒃ, ᐊᒻᒪ ᑐᓂᐅᖃᐃᓪᓗᑎ 200 ᖃᓂᒋᔭᖓᓂᒃ ᐴᕐᓂᒃ ᐃᓗᓕᖃᕐᑐᓂᒃ ᐅᓪᓛᕈᒻᒥᑕᕆᔭᐅᓂᐊᕐᓂᒃ ᓱᕈᓯᕐᓄᑦ, ᓂᕆᔭᒃᓴᖃᑦᑎᐊᕐᑎᑕᐅᓇᓱᒃᖢᑎᒃ ᐃᓕᓐᓂᐊᕐᕕᒃ ᒪᑐᓯᒪᓂᖓᓂᒃ ᐆᒧᖓ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧᑦ.

ᒪᐃᔭ ᑭᐊᓂ ᐱᐊᓪ ᒪᕐᕉᖕᓄᑦ ᑲᑎᒪᔨᐅᓄᑦ ᓄᓇᓕᐸᐅᔭᓄᑦ ᑎᑎᖃᓂᒃ ᑐᓂᓯᓚᐅᕐᐳᖅ, ᐅᖃᐅᑎᓪᓗᓂᒋᑦ ᓄᖅᑲᖁᓪᓗᓂᒋᑦ ᓱᕋᐃᓂᖏᓐᓄᑦ ᓄᓇᕗᒥᑦ ᓄᓇᓕᐸᐅᔭᓄᑦ, ᓄᓇᓕᕐᔪᐊᓄᑦ ᐊᒻᒪ ᕕᓕᔾᔨᓄᑦ ᒪᓕᒐᕐᒥᑦ, ᓄᓇᓕᐸᐅᔭᓄᑦ ᐊᑭᓕᒃᓴᖃᕐᓂᖏᓐᓄᑦ $500 ᐅᖓᑖᓂ.

ᑕᒪᕐᒥ ᐱᙳᐊᕆᐊᕐᑐᕐᕕᐅᕙᒃᑐᑦ ᐊᒻᒪ ᑲᑎᖃᑎᒌᒍᑎᐅᕙᒃᑐᑦ ᐃᖃᓗᖕᓂ ᒪᑐᔭᐅᓚᐅᕐᑐᑦ ᒫᔅᓯ ᕿᑎᐸᓗᐊᓂᒃ ᐱᔾᔪᑎᒋᓪᓗᒍ ᕿᓚᒥᐊᓗᒃ ᓄᓇᕐᔪᐊᒥ ᐋᓐᓂᐊᕕᒡᔪᐊᕆᔭᐅᕙᓪᓕᐊᔪᖅ.

ᐄᐳᕈᓪ

ᐃᖃᓗᐃᑦ ᐸᓖᓯᒃᑯᑦ ᓄᓇᓯᐅᑎᖓ ᐱᐅᓴᕐᓯᒪᓪᓗᓂ ᑎᑎᕋᕐᓯᒪᔪᓂ ᐃᑲᔪᖅᑐᐃᒍᑎᓂ ᓅᕙ ᓯᑰᓯᐊᒥᑦ ᐊᒻᒪᓗ ᐸᓖᓯᓂᒃ ᐃᑭᑦᑕᖅᑐᖏᓐᓂᒃ ᖃᐅᒪᑎᑦᑎᕗᑦ ᐃᖃᓗᐃᑦ ᐸᓖᓯᒃᑯᑦ ᑎᑎᕋᕐᕕᖓᓂᒃ ᐄᐳᕈ 24-ᒥᑦ. ᑲᓇᑕᒥ ᐸᓖᓯᒃᑯᑦ ᑲᑐᔾᔨᖃᑎᒌᖏᑦ ᑲᓇᑕᒥᐅᑕᓂᒃ ᐃᓚᐅᖁᔨᓯᒪᖕᒪᑕ ᕿᒡᓵᖕᓂᕐᒧ ᐅᓪᓗᕐᒥ ᑕᓪᓕᕐᒥᐅᓕᕐᐸᑦ ᐊᒻᒪ ᐊᑐᖁᔨᓪᓗᑎᒃ ᐊᐅᐸᖅᑐᓂᒃ ᐃᓱᒪᒋᓗᒋᑦ ᖁᑭᖅᓴᖅᑕᐅᓪᓗᑎᒃ 22 ᐃᓅᔪᓐᓃᖅᑐᕕᓃᑦ ᓅᕙ ᓯᑰᓯᐊᒥ ᐱᓇᓱᐊᕈᓯᐅᓚᐅᕐᑑᑉ ᓄᙳᐊᓂᒃ. ᑕᒪᑐᒥᖓ ᐃᓱᒪᒋᔭᖃᕐᓂᓚᐅᕐᑐᑦ ᑲᓇᑕᓕᒫᒥᑦ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐ)

ᓂᐊᖁᙴ ᑰᖕᒥ ᐃᒪᐃᔭᐃᕙᓪᓕᐊᓂᕐᒥᒃ ᐱᓕᕆᑎᑦᑎᓂᖅ, ᑖᓐᓇᓗ ᐃᒪᖃᐃᓐᓇᕈᑎᐅᓇᔭᖅᖢᓂ ᐃᖃᓗᖕᓂᑦ, ᑐᓂᔭᐅᓚᐅᕐᑐᖅ ᑕᐅᕙ ᐋᑎᒃᑯᓐᓄᑦ. ᐃᒪᑭᒡᓕᒍᑎᐅᓂᑯᕕᓂᖅ ᑕᓯᕐᒥ ᔨᐅᕈᑏᓐ 2018 ᐊᒻᒪ 2019 ᐊᐅᔭᖓᓂᒃ ᓄᓇᓕᐸᔭᑯᓐᓂᒃ ᐱᓕᕆᒍᑎᐅᓕᓚᐅᕐᑐᖅ ᑐᐊᕕᕐᓇᖅᑐᒃᑯᑦ ᐃᒪᕐᒧᑦ ᐋᖅᑭᒋᐊᕈᑎᒃᓴᓂᒃ, ᐱᔪᓐᓇᕐᓯᓯᒪᓪᓗᓂ ᑰᖕᒥ ᐃᒻᒥᖅᑕᐅᕙᓪᓕᐊᒍᓐᓇᕐᓯᓗᓂ.

ᐃᖃᖅᑐᐃᑎᓪᓗᒋᑦ ᓱᒋᐊᑎᔭᖅᑐᒥᑦ ᑎᒡᓕᒃᑐᕕᓂᕐᒥᒃ ᒪᕐᕉᖕᓂ ᑖᒃᓯᓂ ᐊᖅᑯᑎᓂᒃ 2018-ᖑᑎᓪᓗᒍ, ᐃᖃᖅᑐᐃᔨ ᐃᓱᒪᓕᐅᕆᓕᓚᐅᕐᑐᖅ ᓇᓂᔭᐅᔪᕕᓃᑦ ᐸᓖᓯᒃᑯᑦ ᕿᓂᕐᑎᓪᓗᒋ ᐃᒃᓯᖕᓇᖅᑕᐅᓯᒪᔪᒥ ᐅᒥᐊᕐᒥ ᐃᖃᓗᐃᑦ ᖃᓂᒋᔭᖓᓂᒃ ᐊᑐᖅᑕᐅᔪᓐᓇᕐᓂᕋᖅᖢᒋᑦ ᑕᒪᓐᓇ ᓱᕋᐃᓯᒪᒐᓗᐊᕐᑎᓪᓗᒍ ᐱᔪᓐᓇᐅᑎᓄᑦ ᐊᒻᒪ ᐃᓱᒪᕐᓱᕐᓂᕐᒧᑦ ᒪᓕᒐᕐᔪᐊᒥᑦ.

ᑎᓴᒪᑦ ᐃᖃᓗᖕᓂ ᐃᓕᓴᐃᔨᐅᔪᑦ ᑐᓂᐅᖃᓚᐅᕐᓯᒪᑎᓪᓗᒋᑦ ᐅᓪᓗᕈᒻᒥᑕᒃᓴᓂᒃ ᓱᕈᓯᕐᓄᑦ ᒫᔅᓯᒥᑦ, ᑖᒃᑯᐊ “ᐅᓄᒻᒪᕆᒃᑐᓄᑦ” ᐃᑲᔪᕈᒪᔪᓄᑦ, ᓂᕿᓂᒃ ᐃᑲᔫᑎᖃᕈᒪᔪᓂᒃ ᐊᒻᒪᓗ ᐃᓄᖕᓂ ᓂᕿᑖᕆᐊᓕᖕᓂ ᐅᖃᕐᓯᐅᑲᑕᓕᓚᐅᕐᑐᑦ.

92 ᐳᓴᓐᑎ ᐃᖃᓗᐃᑦ ᐸᓖᓯᒃᑯᓐᓄᑦ ᐅᖄᓚᐅᑎᐅᔪᑦ ᐄᐳᕈᒥ ᐃᒥᐊᓗᖕᒨᖓᓂᕐᒨᖓᓚᐅᕐᑐᑦ, 20 ᐳᓴᓐᑎᒥ ᖁᕝᕙᖅᐹᓪᓕᕐᓯᒪᓪᓗᓂ ᑕᕿᐅᓚᐅᕐᑐᓂᑦ 32 ᓯᕗᓂᐊᓂᓪᓕ. “ᑕᒪᓐᓇᓕ ᑕᐃᒪᐃᓚᐅᕐᓯᒪᙱᑦᑐ ᑕᐃᒪᙵᑦ ᑕᒫᓃᓕᕋᒪ,” ᐅᖃᖅᑐᖅ ᓴᓇᔨᓄ ᐊᖓᔪᖅᑳᖅ ᒑᕕᐅᑦ ᐃᓕᐊᑦ, ᑖᓐᓇᓗ ᑕᐃᔅᓱᒪᓂ ᐊᕐᕌᒎᖕᓂ ᒪᕐᕉᖕᓂ ᑕᐃᑲᓃᓯᒪᓕᖅᖢᓂ.

ᒪᐃ

ᐅᓇ ᐃᓚᒋᔭᐅᔪᖅ ᐆᓚ ᔨᐊᓐᔅ ᐃᐊᕗᑦ ᐳᕌᓐᑦ ᓯᑏᓐᐳᒡ ᓴᓇᓚᐅᕐᓯᒪᔭᖓ ᐃᖃᓗᖕᓂ 1980-ᖏᓐᓂ. ᑕᒪᒃᑯᐊ ᐊᖏᕐᕋᐅᔪᑦ ᓱᓕ ᐱᔭᐅᔪᒪᕙᒃᑐᑦ, ᐊᕐᕌᒍ 20 ᐊᓂᒍᕋᓗᐊᕐᑎᓪᓗᒋᑦ ᓴᓇᓚᐅᕐᓯᒪᓂᖓᓂᒃ. ᓯᑏᓐᐳᒡ ᐃᓅᔪᓐᓃᓚᐅᕐᑐᖅ ᒪᐃ 19-ᒥᑦ ᐱᓐᓱ ᑯᕇᒃ, ᐋᐴᑕᒥ, ᐅᑭᐅᖃᓕᕐᖢᓂ 77-ᓂ. (ᐊᔾᔨᙳᐊᖅ ᑐᓐᓂᖅᑯᑎᐅᓯᒪᔪᖅ)

ᓄᕕᕐᓴᑲᑕᖕᓂᖅ, ᖃᒧᑕᐅᔭᓂᒃ ᓱᕋᒃᓯᒪᔪᓕᕆᓂᖅ ᐊᒻᒪᓗ ᐃᖃᓗᒐᓱᖕᓂ ᐱᓕᕆᐊᖑᓚᐅᕐᑐᑦ ᐃᓕᓐᓂᐊᕐᑎᓄᑦ ᐃᖃᓗᖕᓂᑦ ᐃᓕᓐᓂᐊᕈᑎᖏᓐᓂᒃ ᓇᓗᓇᐃᒃᑯᑎᑖᕈᑎᒋᔭᐅᖔᕐᓗᑎᒃ ᐃᓕᓐᓂᐊᕐᓂᕐᒧᑦ ᒪᐃᑯᑎᓪᓗᖑ. ᐃᓄᒃᓱᒃ ᐃᓕᓐᓂᐊᕐᕕᐊᓗᒃ ᒪᑐᑎᓪᓗᒍ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐱᔾᔪᑎᐅᓪᓗᓂ, ᐃᓕᓐᓂᐊᕐᕕᒃᒥᑦ ᐋᖅᑭᒃᓯᓕᓚᐅᕐᑐᑦ ᐃᓕᓐᓂᐊᕈᑎᒃᓴᓄᑦ ᓇᓗᓇᐃᒃᑯᑎᑖᕈᓐᓇᐅᑎᒃᓴᓂᒃ ᐃᓕᓐᓂᐊᕐᕕᐅᑉ ᓯᓚᑖᓃᓪᓗᑎᒃ.

ᒪᑐᓯᒪᒐᓗᐊᕐᑎᓪᓗᒍ ᐋᓐᓂᐊᕕᒡᔪᐊᕐᓇᒧᑦ, ᑲᓇᑕᒥ ᓴᓇᐅᒐᓕᕆᓂᕐᒧᑦ ᓴᖅᑭᔮᒐᖃᕐᕕᒃ ᐋᑐᕚᒥ (National Arts Gallery) ᓴᖅᑭᔮᖅᑎᑦᑎᓚᐅᕐᑐᑦ ᓄᓇᕗᒥᑦ ᓴᓇᐅᒐᕐᑎᓂᒃ ᑕᕐᕆᔭᒐᓕᐊᒥᙶᖅᑐᓂᒃ ᐃᖃᓗᖕᒥᐅᓂᒃ. ᓴᖅᑭᔮᖅᑐᑦ ᐅᕙᙶᖅᑐᑦ ᑕᕐᕆᔭᒐᓕᐊᒥᒃ ᐅᕙᙵᑦ “ᓯᓚᐅᑉ ᐳᑐᖓ ᐃᓗᐊᓐᓂ,” ᑖᓐᓇᓗ ᐃᓚᒋᔭᐅᓕᖅᖢᓂ ᑲᑎᕐᓱᒐᕆᔭᐅᔪᓂᒃ ᓴᓇᐅᒐᓕᕆᓂᕐᒧᑦ ᑕᑯᔭᒐᖃᕐᕕᒃᒥᑦ ᐋᓐᑎᐅᕆᐅᒧᑦ ᑐᕌᓐᑐᒥᑦ.

ᒪᐃᔭ ᑭᐊᓂ ᐱᐊᓪ ᐃᖃᓗᐃᑦ ᓄᓇᓕᐸᖓᔭᖓ ᓂᕈᐊᕐᑎᓪᓗᒋ ᐊᔾᔨᒌᖕᓂᕐᒥᑦ ᐊᓯᙳᖅᑎᑦᑎᓚᐅᕐᐳᖅ ᐃᑲᔪᖅᑐᐃᓂᕐᒥ ᐱᐊᓂᒃ ᐊᒻᒪ ᕗᐊᐃᓂᒥᒃ ᓂᐅᕕᕐᕕᒃ ᐊᐅᓚᑕᐅᓂᖓ ᑲᔪᓯᖁᔭᐅᓪᓗᓂ. ᐊᕐᕌᒍ ᐱᒋᐊᓕᓵᕐᓯᒪᑎᓪᓗᒍ ᐃᖃᓗᐃᑦ ᖃᐅᔨᓴᓚᐅᕐᒪᑕ ᐊᒻᒪᓗ 800 ᐅᖓᑖᓂᒃ ᑕᒪᑐᒥᖓ ᑭᐅᔪᖃᐅᖅᖢᓂ, ᐃᑲᔪᖅᑐᐃᓪᓗᑎᒃ 75 ᐳᓴᓐᑎᖏᑦ ᐃᓱᒪᓕᐊᕆᔭᐅᔪᒥᒃ ᐃᑲᔪᖅᑐᐃᓯᒪᓚᐅᕐᑐᑦ.

ᔫᓂ

ᕿᕐᓂᕐᑕᐃᑦ ᐃᓅᓯᖏᑦ ᐱᒻᒪᕆᐅᓂᖏᓐᓄᑦ ᑲᑎᖃᑎᒌᖕᓂᖅ ᐃᖃᓗᖕᓂ ᐱᒋᐊᕐᖢᑎᒃ ᓄᓇᓕᐸᐅᔭᐃᑦ ᑎᓴᒪᑦ ᑎᕆᖅᑯᓂᒃ ᐅᕗᖓ ᒪᓕᒐᓕᕆᕕᒡᒧᐊᒧᐊᖅᐳᑦ ᐊᒻᒪ ᐸᓖᓯᒃᑯᓐᓄᑦ ᐊᐅᔭᖅ. (ᐊᔾᔨᓕᐅᕆᔨ ᒦᒐᓐ ᑎᐅᓕᖕ)

200 ᐅᖓᑖᓂ ᐃᓄᐃᑦ ᑲᑎᓚᐅᕐᐳᑦ ᐃᖃᓗᖕᓂ ᐃᓱᒪᓕᕆᓂᕐᒧᑦ ᐋᓐᓂᐊᖅᑐᓕᕆᓂᕐᒥᒃ ᐃᑲᔪᖅᑐᖅᑕᐅᒃᑲᓐᓂᕈᒪᔪᓂᒃ ᓯᕗᓂᐊᒍᑦ ᓂᐱᖃᙱᓚᐅᑲᒃᖢᑎᒃ ᐃᓱᒪᒋᓪᓗᒋᑦ ᐃᒻᒥᓃᕐᓂᕐᒧᑦ ᐃᓅᔪᓐᓃᕐᓂᑯᑦ ᓄᓇᕗᒥᑦ. ᑖᒃᑯᐊ ᐃᓄᐃᑦ ᑎᑎᕋᕐᓯᒪᔪᓂ ᑎᒍᒥᐊᖅᑳᑎᒋᓚᐅᕐᑐᑦ ᐃᓚᖏᑦᑕ ᐊᑎᖏᓐᓂᒃ ᐃᓅᔪᓐᓃᕐᓂᑯᓂᒃ ᐊᒻᒪᓗ ᑖᒃᑯᐊ ᐊᑏᑦ ᑲᑎᑕᐅᓯᒪᓪᓗᑎᒃ ᑐᓐᓂᖅᑯᑎᐅᓪᓗᑎᒃ ᒪᓕᒐᓕᕆᕕᒡᔪᐊᒥᑦ ᓯᕗᓕᐅᕐᑎ ᔫ ᓴᕕᑲᑖᕐᒧᑦ.

ᓄᑖᒥ ᓄᓇᓯᐅᑎᒃᑯᑦ ᒪᓕᒐᕋᓚᒥᑦ ᐊᑐᖅᑐᖃᓕᓚᐅᕐᐳᖅ ᔫᓂ ᐱᒋᐊᓕᓵᕐᑎᓪᓗᒍ, ᓱᒃᑲᓴᓗᐊᖃᑦᑕᖅᑐᑦ ᐊᖅᑯᑎᒃᑯᑦ ᐊᑭᓖᑎᑕᐅᖃᑦᑕᕐᓂᐊᓕᕐᓂᖏᓐᓂᒃ ᒫᙵᑦ $200-ᒥᑦ $1,000-ᒧᑦ 50 ᑭᓛᒥᑕᒥ ᓱᑲᓴᕐᓂᕐᓴᐅᓗᐊᕐᐸᑕ ᓇᓗᓇᐃᖅᑕᐅᓯᒪᓂᕐᒥᒃ. ᐊᓯᙳᖅᑎᑦᑎᓚᐅᕐᖢᑎᒃ, ᐅᓇ ᓄᓇᓯᐅᑎᒥ ᑎᒍᔭᐅᑎᑦᑎᒍᑎᐅᔪᓐᓇᖅᑐᖅ ᐃᑲᕐᕋᓂᒃ 24-ᓂᒃ.

ᐃᖃᓗᖕᓂ ᐱᐊᓂᒃ ᐊᒻᒪ ᕗᐊᐃᓂᒥᑦ ᓂᐅᕕᕐᕕᒃ ᓂᐅᕕᕐᕕᐅᓂᕐᓴᐅᓚᐅᕐᐳᖅ 11 ᐳᓴᓐᑎᒥ ᒫᔅᓯ ᕿᑎᐊᓂᒃ ᔫᓂᒧᑦ. ᐊᖏᓂᖅᐹᖅ ᖁᕝᕙᖅᐹᓪᓕᕐᑎᓪᓗᒍ ᓂᐅᕕᐊᖑᕙᓪᓕᐊᔪᑦ 18 ᐳᓴᓐᑎᒥ.

ᔪᓚᐃ

ᐃᖃᓗᐃᑦ ᓄᓇᓕᐸᐅᔭᖓ ᐱᓕᕆᓯᒋᐊᕐᐳᑦ ᓄᓇᓯᐅᑎᕕᓂᕐᓂᒃ, ᓯᕐᓗᐊᓂᒃ ᐊᒻᒪ ᐊᒃᑕᑯᓂᒃ ᐊᕝᕗᖅᐸᓪᓕᐊᓪᓗᑎ ᓂᐊᖁᙴᑉ ᓯᒡᔭᖓᓃᑦᑐᓂᒃ ᔪᓚᐃᒥ, ᓄᓇᖃᖅᑐᑦ ᑕᒪᒃᑯᓂᖓ ᓈᒻᒪᒃᓴᙱᖢᑎᒃ ᐅᖃᓗᑲᑕᓚᐅᕐᑎᓪᓗᒋᑦ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)

ᐊᐅᔭᖅ ᐃᖏᕐᕋᕙᓪᓕᐊᑎᓪᓗᒍ ᓄᓇᕐᔪᐊᒥ ᐋᓐᓂᐊᕕᒡᔪᐊᕐᓇᖅᑕᖃᕐᑎᓪᓗᒍ, ᓄᓇᕗᑦ ᐊᖓᔪᖅᑳᖃᕐᕕᖓ ᒪᖁᑲᑕᖃᑦᑕᓚᐅᕐᑐᖅ. ᔪᓚᐃ 21-ᒥᑦ 40.9 ᒥᓕᒦᑕᓂᒃ ᒪᖁᖕᓂᖃᖅᖢᓂ, ᑕᐃᒪᐃᓐᓂᖓᓄᑦ ᔪᓚᐃ 21-ᒧᑦ ᓇᓗᓇᐃᕐᑕᐅᓯᒪᕙᕐᑐᓂᕐ ᖃᐅᔨᓵᖑᓂᕋᖅᑕᐅᓯᒪᓪᓗᓂ. ᒪᖁᐃᓐᓇᓚᐅᕐᓯᒪᕗᖅ ᐱᓇᓱᐊᕈᓯᓕᒫᖅ. “ᑕᐃᒪᐃᑉᐸᙱᑦᑑᒐᓗᐊᖅ,” ᐅᖃᖅᑐᖅ ᑕᐃᕕᑦ ᕕᓕᑉᔅ, ᓯᓚᓕᕆᔨᐅᔪᖅ ᑲᓇᑕᒥ ᐊᕙᑎᓕᕆᔨᒃᑯᓐᓄᑦ “ᐊᓄᕌᕐᓇᕐᓂᕐᒨᕐᓂᕋᕋᔭᙱᑕᕋ ᒪᖁᒡᓗᓂ, ᓄᓇᕗᒥᖃᐃ ᐊᓄᕌᕐᓈᓗᒃ ᒪᖁᒃᑎᓪᓗᒍ.”

ᑕᐅᑐᒃᖢᒍᓕ ᔫᓂ 2019, ᖃᐅᑕᒫᑦ ᐃᒪᖅ ᐊᑐᖅᑕᐅᓂᖓ ᐃᖃᓗᖕᓂ ᑲᑕᒃᐹᓪᓕᕐᓯᒪᓚᐅᕐᑐᖅ 28 ᐳᓴᓐᑎᒥᑦ. ᐃᖃᓗᖕᓂᑦ ᐃᒪᕐᒥ ᐊᑐᑲᑕᙱᓐᓂᕐᓴᐅᓂᖅ, ᐃᓚᒋᓪᓗᒍ ᐅᐱᕐᙶᒃᑯ ᐊᐅᒃᐸᓪᓕᐊᓂᖅ ᐊᒻᒪᓗ ᓄᓇᓕᐸᐅᔭᐃᑦ ᐃᒥᖅᑕᖃᑦᑕᕐᓂᖓ ᓂᐊᖁᙴ ᑰᖓᓂᒃ ᐆᒧᖓ ᑕᓯᖅ ᔨᐅᕈᑏᓐ ᐃᒪᖃᕐᓂᖓᓂ ᐱᐅᓯᕚᓪᓕᕈᑎᐅᓚᐅᕐᑐᖅ.

ᐃᖃᓗᖕᓂ ᐊᓕᐊᓇᐃᑦ ᓴᓇᐅᒐᓄᑦ ᖁᕕᐊᓱᖕᓇᖅ ᑐᙵᓱᒃᑎᑦᑎᓚᐅᕐᐳᑦ ᓯᕗᓪᓕᕐᐹᒥ ᐃᓄᒃᒥᒃ ᑐᑭᒧᐊᖅᑎᑦᑎᔨᒥ, ᐊᓛᓇ ᔮᓐᔅᑕᓐ, ᑖᓐᓇᓗ ᑖᒃᑯᓄᖓ ᐱᒋᐊᕈᑎᖃᓚᐅᕐᓯᒪᓪᓗᓂ 2016-ᒥᑦ ᑐᑭᒧᐊᖅᑎᑦᑎᔨᐅᓪᓗᓂ. ᐃᑲᔪᕐᓯᒪᖕᒪᑦ ᐅᓄᕐᓂᕐᓴᓂᒃ ᐃᓄᖕᓂᑦ ᐊᒻᒪ ᓄᓇᖃᖅᑳᖅᑐᓂᒃ ᖁᙱᐊᖅᑕᐅᔪᒃᓴᓂᒃ ᓴᖅᑭᑎᑦᑎᕙᓪᓕᐊᓂᕐᒥᓂ ᐊᕐᕌᒍᒐᓴᐅᓕᕐᑐᓂᒃ ᐊᒻᒪᓗ ᐅᖃᖅᖢᓂ ᑕᒪᓐᓇ ᑲᔪᓯᑎᓐᓂᐊᕐᓂᕋᖅᖢᓂᐅᒃ.

ᓂᕿᖃᑦᑎᐊᖃᑦᑕᙱᓐᓂᕐᒥᒃ ᐃᑲᔪᕈᑎᖃᕋᓱᒃᖢᑎᒃ ᓄᕙᒡᔪᐊᕐᓇᖅ-19 ᐱᑕᖃᕐᓂᖓᓂᒃ, ᐃᖃᓗᐃᑦ ᓄᓇᓕᐸᐅᔭᖓᑦ $80,000 ᒐᕙᒪᑐᖃᒃᑯᓐᓂᑦ ᑐᓐᓂᖅᑯᓯᐊᖓᓂᒃ ᐊᕕᒃᑐᖅᖢᒍ ᑎᓴᒪᓄᑦ ᓄᓇᓕᖕᓂ ᑲᑐᔾᔨᖃᑎᒌᓄᑦ ᑐᓐᓂᖅᑯᑎᐅᓚᐅᕐᑐᑦ, ᐅᑯᐊ ᐃᓚᒋᔭᐅᓚᐅᕐᑐᑦ ᐅᑭᐅᕐᑕᖅᑐᕐᒥᑦ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ ᑐᙵᕕᒃ, ᑖᒃᑯᐊᓕ ᐊᐅᓚᑦᑎᔨᐅᕙᒃᑐᑦ ᓱᕈᓯᕐᓄᑦ ᓂᕿᑖᕐᕕᐅᔪᓐᓇᖅᑐᒥᑦ, ᐊᒻᒪᓗ ᐅᑯᐊ ᐅᖅᑰᑕᖅ ᑲᑐᔾᔨᖃᑎᒌᑦ, ᑖᒃᑯᐊᓕ ᐊᐅᓚᑦᑎᕙᒃᖢᑎᒃ ᐊᖑᑎᓄᑦ ᐊᖏᕐᕋᖃᙱᑦᑐᓄᑦ ᐅᐸᒡᕕᐅᕙᒃᑐᓂᒃ.

ᐋᒐᓯ

ᐃᖃᓗᐃᑦ ᖃᑦᑎᕆᔨᖏᑦ ᕿᓚᒥᕈᓗᒃ ᖃᒥᑦᑎᓚᐅᕐᑐᑦ ᓄᓇᓯᐅᑎᐅᑉ ᐅᓯᖃᕐᕕᖓᓂᒃ ᐊᖅᑯᑎᒦᑦᑐᒥ ᑳᔅᕗᐃ ᐊᒻᒪ ᓄᓇᓕᕆᕝᕕᖕᒧᙶᐅᓯᒪᓂᑯ ᐋᒐᓯ 18-ᒥ 6-ᒥᑦ ᐅᓐᓄᒃᑯᑦ. (ᐊᔾᔨᓕᐅᕆᔨ ᐱᐅᓪ ᕗᐃᓕᐊᒻᔅ)

ᐃᓚᒋᔭᐅᕌᓂᓕᕐᖢᓂ ᑲᓇᑕᒥ ᐱᓕᕆᐊᖃᓛᖑᖃᑕᐅᔪᓂᒃ ᑎᑎᕋᕐᕕᖕᓂ, ᐃᖃᓗᖕᓂ ᑎᑎᖃᒃᑯᕕᑦ 64 ᐳᓴᓐᑎᒥ ᖁᕝᕙᖅᐹᓪᓕᒍᔾᔨᓚᐅᕐᑐᑦ ᑐᔫᓯᐊᓂᒃ ᑎᑭᑉᐸᓪᓕᐊᔪᓂᒃ ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐱᒋᐊᓕᕐᑎᓪᓗᒍ, ᑕᐅᑐᒃᖢᒍᓕ 2019.

ᓱᐴᕐᑐᒐᕐᓂ ᓂᐅᕕᕐᕕᐅᓇᔭᕐᑐᖅ ᐊᖏᖅᑕᐅᓚᐅᕐᑐᖅ ᐃᖃᓗᐃᑦ ᓄᓇᓕᐸᖓᓄᑦ ᑲᑎᒪᔨᓄᑦ ᐋᒐᓯ 14-ᖑᑎᓪᓗᒍ ᑖᒃᑯᐊ ᑲᑎᒪᔩᑦ ᓂᕈᐊᕐᑎᓪᓗᒋᑦ ᐃᑲᔪᖅᑐᐃᓂᕐᒥᒃ ᑐᒃᓯᕋᐅᑎᒋᔭᐅᔪᒥ ᓄᓇ ᑳᓇᐸᔅ ᓂᐅᕕᕐᕕᒃᒥ, ᐃᓂᒃᓴᖃᖅᑎᑕᐅᓯᒪᔪᖅ ᕙᑐᕈ ᐊᑐᕆᐊᕐᒥᑦ. ᑖᓐᓇᓕ ᑕᐃᒪᐃᑦᑐᓂ ᓂᐅᕕᕐᕕᖕᓂ ᓯᕗᓪᓕᖅᐹᖑᓇᔭᕐᑐᖅ ᓄᓇᕗᑦ ᐊᖓᔪᖅᑳᖃᕐᕕᖓᓂᒃ.

ᖃᓄᐃᓕᐅᕈᑎᕕᓂᕐᒧᑦ ᐅᖃᐅᓯᐅᓂᑯ ᐱᔮᖅᑯᒨᙱᓐᓂᕋᖅᑕᐅᔪᒥ, ᐃᖃᓗᖕᒥᐅᑕᖅ ᐊᖑᑎ ᐃᓅᔪᓐᓃᓚᐅᕐᓯᒪᔪᖅ ᖃᐅᔨᒪᔪᓐᓃᕐᓯᒪᓪᓗᓂ ᓯᒡᔭᒥ ᓯᕐᓗᐊᕐᒦᖢᓂ ᐃᓐᓇᑐᖃᐃᑦ ᖃᒻᒪᖓᑕ ᐅᖓᑖᓂ.

ᓯᑎᐱᕆ

ᒪᕐᕈᐃᕐᖢᑎᒃ ᓄᓇᓕᐸᐅᔭᓕᒫᑦ ᖃᒥᓯᒪᔪᑦ ᐃᑲᕐᕌᒃ ᒪᕐᕉᒃ ᐅᖓᑖᓂ ᓯᑎᐱᕆᐅᑉ ᐅᓪᓛᖓᓂᒃ. ᓯᕗᓪᓕᖅ ᖃᒥᓐᓂᖓ, ᒫᓂ 9-ᒥ ᐅᓪᓛᑯᑦ, ᐋᖅᑭᒃᑕᐅᓪᓗᓂ 25 ᒥᓂᑦᔅ ᐱᐊᓂᒃᑎᓪᓗᒍ. ᐊᐃᑉᐸᖓᓕ, 10-ᒧᐊᙱᐊᕐᔪᒃᑎᓪᓗᒍ ᐊᒻᒪ ᖃᒥᙶᖅᖢᑎᒃ 12-ᒧᑦ ᑎᑭᖢᒍ. ᑕᐃᒪᐃᓐᓂᖓᓄᑦ ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓐᓂᐊᕐᕕᖕᓂ ᒪᑐᑎᑦᑎᓚᐅᕐᑐᑦ ᑕᕝᕙᓂ ᐅᓪᓗᕐᒥᑦ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)

ᐃᖃᓗᐃᑦ ᓱᒃᑲᓴᐅᑎᕙᒃᑐᑦ ᓯᐊᕐᕆᔮᖅᑏᑦ ᐱᑖᕈᓐᓇᕐᓯᓚᐅᕐᑐᑦ ᓄᑖᓂᒃ ᐃᖕᒥᖕᓂ ᓴᐳᔾᔨᓯᒪᒍᑎᒃᓴᖏᓐᓂᒃ ᓂᐊᖁᕐᒧᑦ ᐋᓐᓂᖅᑕᐃᓕᒍᑎᓂᒃ ᓵᓚᒃᓴᖅᑎᓪᓗᒋᑦ $10,000-ᓂᒃ ᐅᑯᓇᙵᑦ ᐃᓐᑖᒃ ᐃᓐᓲᕋᓐᔅ (ᓇᐅᑦᑎᐅᒃᑯᒫᓕᕆᔩᑦ). ᐃᑲᔫᑎᒃᓴᖅ ᐱᑖᕈᑎᐅᔪᓐᓇᓚᐅᕐᑐᖅ ᑐᓗᕐᑕᕐᕕᒃᓴᓂᒃ, ᑭᓯᐊᓂᓕ ᓈᒻᒪᙱᓐᓂᕐᑕᖃᓚᐅᕐᒪᑦ: ᑖᒃᑯᐊ ᑐᓗᕐᑕᕐᕕᒃᓴᓂᒃ ᐅᒥᐊᕐᔪᐊᒃᑯᑦ ᑎᑭᑎᑕᐅᓂᐊᓚᐅᕐᓯᒪᔪᑦ ᐊᑭᖃᙱᓪᓗᑎᒃ, ᑭᓯᐊᓂᓕ ᑕᒪᓐᓇ ᑲᔪᓯᔪᓐᓇᓚᐅᙱᑦᑐᖅ ᐋᓐᓂᐊᕕᒡᔪᐊᕐᓇᖅ ᓄᖅᑳᖅᑎᑦᑎᒍᑎᐅᑲᑕᓕᕐᑎᓪᓗᒍ.

ᐊᖑᑎᓄᑦ ᐊᖏᕐᕋᖃᙱᑦᑐᓄᑦ ᐅᐸᒡᕕᒃ ᐃᖃᓗᖕᓂ, ᐅᖅᑰᑕᖅ ᑲᑐᔾᔨᖃᑎᒌᑦ, ᒪᑐᐃᕐᓯᓚᐅᕐᑐᑦ ᓄᑖᒥ ᐃᓂᒃᓴᐅᓂᐊᕐᑐᒥ 30-ᓂ ᐃᓄᖃᕈᓐᓇᖅᑐᒥ ᐅᓐᓄᒥ. ᑖᒃᑯᐊ ᑲᑐᔾᔨᖃᑎᒌᖑᔪᑦ ᐱᓕᕆᐊᖃᕐᓯᒪᖕᒪᑕ ᐱᓕᕆᐊᒃᓴᖏᑦᑕ ᐅᖓᑎᓗᐊᖓᓄᑦ ᐊᕐᕌᒍᒐᓴᐅᓕᕐᑐᓂᒃ, ᐃᓛᓐᓂᓪᓘᓐᓃᑦ 80-ᓂ ᐃᓄᖕᓂ ᐃᓂᖃᖅᑎᑦᑎᕙᒃᖢᑎᒃ 32-ᓂ ᐃᒡᓕᓕᒃᒥᑦ ᐅᐸᒡᕕᐅᖃᑦᑕᖅᑐᒥᑦ.

ᒪᑯᓄᖓ ᕿᐱᖕᓄᑦ ᐅᖅᑰᓯᑲᐅᕐᑐᕐᓇᖅᑐᓄᑦ, ᐃᖃᓗᐃᑦ ᓄᓇᓕᖕᓄᑦ ᐱᕈᕐᓯᐊᖃᕐᕕᑦ ᐱᓕᕆᐊᖏᓐᓂᒃ ᐅᖓᕙᕆᐊᖅᑎᑦᑎᔪᓐᓇᕐᓯᕗᑦ ᑕᖅᑭᓪᓗᐊᒥᑦ, ᓄᕕᐱᕆᐅᑉ ᓄᙳᐊᓄᑦ. ᑖᓐᓇᑦᑕᐅᖅ ᐅᖅᑰᑎᑕᐅᔪᓐᓇᓚᐅᕐᑐᖅ ᓄᑖᓂᒃ ᐅᖅᑰᓴᐅᑎᓄᑦ. ᐱᕈᖅᑎᑦᑎᕙᓪᓕᐊᓕᕐᓂᖅ ᐱᒋᐊᕐᓵᓕᑎᑕᐅᓂᕐᓴᐅᔪᓐᓇᕐᓂᐊᓕᕐᖢᑎᒃ ᐊᒻᒪᓗ ᐊᑯᓂᐊᓂᕐᓴᖅ ᐱᓕᕆᐊᖑᔪᓐᓇᕐᓗᓂ, ᑕᐃᒪᓐᓇᓗ ᐅᕗᖓ ᖃᔪᖅᑐᕐᕕᒃ ᓂᕆᔭᖅᑐᕐᕕᖕᒧᑦ ᑐᓂᓯᓂᕐᓴᐅᔪᓐᓇᕐᓗᑎᒃ.

ᐃᓱᒪᒋᓪᓗᒍ ᐅᕆᓐᔾ ᐅᕕᓂᕈᖅ ᐅᓪᓗᖅ, ᐃᓄᒋᐊᑦ ᒫᓂ 30-ᖏᓐᓃᑦᑐᑦ ᐃᖃᓗᖕᓂ ᓄᓇᖃᖅᑐᑦ ᑲᑎᓚᐅᕐᑐᑦ ᐅᑯᐊ ᓄᓇᖃᖅᑳᖅᑐᑦ ᓱᕈᓰᑦ ᖃᓄᐃᓕᐅᖅᑕᐅᖃᑦᑕᕐᓂᕕᓂᖏᓐᓂᒃ ᐃᓕᓐᓂᐊᕆᐊᕐᕕᒋᔭᖏᓐᓂᒃ ᐃᓱᒪᒋᔭᐅᓂᖏᓐᓄᑦ.

ᐅᒃᑑᐱᕆ 

ᐃᖃᓗᖕᓂ ᖁᙱᐊᖅᑕᐅᔪᒃᓴᓄᑦ ᐱᙳᐊᕐᑎ ᐋᓇ ᓛᒻ ᐃᓚᐅᑎᑕᐅᓕᓚᐅᕐᐳᖅ ᐅᑯᓇᓂ ᓰᐲᓰᑯᑦ ᓴᖅᑭᔮᒐᖓᓂᒃ Trickster, ᑖᓐᓇᓗ ᓯᕗᓪᓕᕐᐹᖓ ᓴᖅᑭᔮᓚᐅᕐᖢᓂ ᐅᒃᑑᐱᕆᒥ. ᑐᕆᒃᓯᑐ ᐅᕙᙶᕐᓯᒪᔪᖅ ᐅᖃᓕᒫᒐᕐᒥᑦ Son of a Trickster ᑎᑎᕋᕐᑕᐅᓯᒪᓪᓗᓂ ᐄᑕᓐ ᐅᕌᐱᓐᓴᓐᒧᑦ. ᐅᓇ ᐃᓕᓐᓂᐊᕐᑎ ᔫᓂᕘᓯᑎ ᐋᑐᕚᒥ ᓂᕈᐊᒐᒃᓴᙳᖅᑎᑕᐅᓚᐅᕐᒥᔪᖅ ᑲᓇᑕᒥ ᑕᕐᕆᔭᒐᕐᓄᑦ ᐃᓕᓴᕆᔭᐅᔾᔪᑎᓄᑦ (Canadian Screen Award) ᐱᙳᐊᕐᑎᓪᓚᕆᖕᒧᑦ ᐃᑲᔪᕐᓯᒪᓂᖓᓄᑦ ᐆᒧᖓ The Grizzlies.

ᐅᖅᑰᑕᖅ ᑲᑐᔾᔨᖃᑎᒌᑦ ᒪᑐᐃᕐᓯᓚᐅᕐᑐᑦ ᓯᕗᓪᓕᕐᐹᒥ ᑎᒍᔭᐅᓯᒪᔪᕕᓂᕐᓄᑦ ᐃᒡᓗᒃᓴᕆᔭᐅᔪᓂᒃ ᐃᖃᓗᖕᓂ ᑖᓐᓇᓗ ᐊᕐᕌᒎᖕᓂ ᒪᕐᕉᖕᓂ ᐸᕐᓇᐅᓯᐅᖅᑕᐅᓂᑰᓪᓗᓂ, ᐃᒡᓕᖃᖅᖢᓂ 60-ᓂᒃ ᐊᒻᒪᓗ ᐊᓯᐊᓅᕐᐸᓪᓕᐊᓂᕐᒧᑦ ᐊᖏᕐᕋᐅᔪᓐᓇᖅᑐᓂᒃ, 11-ᓂ ᐊᑐᖅᑐᐊᒐᒃᓴᓂᒃ ᐃᒡᓗᓂᒃ ᐊᒻᒪ ᑎᑎᕋᕐᕕᖃᖅᖢᓂ ᐊᒻᒪ ᖃᓄᐃᓕᐅᒐᒃᓴᓄᑦ ᐃᓂᒃᓴᖃᖅᖢᓂ.

ᑕᒪᐃᓐᓄᑦ ᐊᖏᖃᑎᒌᖕᓂᕐᒧᑦ, ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔩᑦ ᐆᒥᖓ ᑲᑎᒪᔨ ᒪᓚᐃᔭ ᓘᑲᓯᒥ ᓄᖅᑲᖁᔨᓚᐅᕐᑐᑦ ᐅᕘᓇ ᕙᐃᔅᐳᒃᑯᑦ ᑭᐅᓚᐅᕐᑎᓪᓗᒍ ᐊᑖᑕᖓ, ᓄᓇᕗᒥᑦ ᒥᓂᔅᑕ ᐸᑎᕐ ᓇᑦᓯ, ᑎᑎᕋᕐᓯᒪᔭᖓᓄ ᐅᖃᕐᓯᒪᔪᓂᒃ ᕿᕐᓂᕐᑕᓂᒃ ᐊᕐᓇᓂᒃ ᓇᔾᔨᐊᖏᓐᓂᒃ ᐲᖅᑕᐅᑎᑦᑎᒍᒪᕙᒃᑐᓂᒃ.

ᓄᓇᓕᐸᐅᔭᐃᑦ ᐊᑭᓕᒃᓴᖃᓚᐅᕐᑐᑦ ᑭᖑᕙᕐᓯᒪᓂᕐᒧᑦ ᐊᑭᓕᐅᑎᒃᓴᓂᒃ ᐅᑯᓄᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᒫᓃᑦᑐᓂᒃ $420,000 ᐅᑯᓄᖓᓗ ᓄᓇᕗᒥᑦ ᒐᕙᒪᒃᑯᓐᓄᑦ ᖁᔭᓈᖅᑕᐅᓯᒪᓪᓗᑎᒃ. ᑕᒪᑐᒧᖓᓕ, ᐊᑭᓖᖔᓕᓚᐅᕐᑐᑦ ᒫᓃᐸᓗᒃᑐᓂᒃ $550,000 ᐊᑭᓕᒃᓴᕆᔭᐅᔪᓂᒃ ᑖᒃᑯᓄᖓ ᑯᐊᐳᕇᓴᑯᓐᓄᑦ ᓈᒻᒪᙱᓕᐅᕈᑎᖃᓚᐅᕐᑎᓪᓗᒋᑦ ᐱᖅᑯᑎᒋᔭᐅᔪᒥᑦ ᑖᓐᓇᓗ ᐊᑭᓕᕈᑎᐅᓕᖅᖢᓂ 10 ᐳᓴᓐᑎᖓᓂᒃ ᐆᒻᒪᖅᑯᑎᐅᑉ ᐊᑐᖅᑕᐅᔪᕕᓂᐅᑉ.

ᓄᕕᐱᕆ

ᓯᕗᓪᓕᕐᐹᖅ ᓄᓇᕕᒃᒥᑦ ᐃᓕᓐᓂᐊᕐᑐᑦ ᐆᒥᖓ ᓴᓇᕝᕕᖕᓂᑦ ᐊᒻᒪ ᐊᖏᕐᕋᕆᔭᐅᔪᓂᒃ ᑲᒪᒋᔭᖃᕈᓐᓇᕐᓂᕐᒥ (Institutional and Homecare Assistance program) ᐊᓂᒍᐃᓚᐅᕐᑐᑦ ᓄᕕᐱᕆᒥᑦ. ᐃᓕᓐᓂᐊᒐᒃᓴᖅ ᐱᒋᐊᖅᑎᑕᐅᓚᐅᕐᑐᖅ ᑲᑎᕕᒃ ᐃᓕᓴᕐᓂᓕᕆᓂᖅᑯᓐᓂᒃ ᐊᒻᒪᓗ ᓄᓇᕕᒃᒥᑦ ᓄᓇᓕᓕᒫᑦ ᐋᓐᓂᐊᖃᕐᓇᙱᑦᑐᓕᕆᔨᓂᒃ ᐊᒻᒪᓗ ᐃᓄᓕᕆᔨᒃᑯᓐᓂᑦ ᐊᕐᕌᒍ ᐃᓄᖕᓂ ᐊᔪᕈᓐᓃᕐᓴᖅᑎᑦᑎᓇᓱᒃᖢᑐᒃ ᓄᓇᕕᒻᒥᐅᓂᒃ ᐋᓐᓂᐊᖅᑐᓂᒃ, ᐋᓐᓂᕐᓯᒪᔪᓂᒃ ᐊᒻᒪᓗ ᐃᓚᙵᖅᑕᐅᓯᒪᔪᓂᒃ. ᐊᓂᒍᐃᕐᓂᑯᑦ ᓴᐅᒥᐊᓂᑦ: ᓚᕖᓇ ᐃᑦᑐᓛᒃ (ᑯᔾᔪᐊᖅ), ᓈᓐᓯ ᕗᐊᑦ (ᑯᔾᔪᐊᖅ), ᓲᓯ ᐊᓐᓇᐃᑐᒃ (ᖁᐊᖅᑕᖅ), ᓗᐃᓴ ᐃᑐᒃ (ᑲᖏᖅᓱᐊᓗᔾᔪᐊᖅ), ᓈᑕᓕ ᓯᐸᓗᒃ (ᑰᔾᔪᐊᖅ, ᐊᔾᔨᖃᙱᑦᑐᖅ), ᐄᕙ ᓯᖁᐊᓗᒃ (ᑰᔾᔪᐊᖅ) ᐊᒻᒪ ᒫᒌ ᓵᓐᑐᔅ (ᑰᔾᔪᐊᖅ). (ᐊᔾᔨᙳᐊᖅ ᐅᑯᓇᙵᑦ NRBHSS)

ᐃᖃᓗᖕᓂ ᐆᒪᔪᓄᑦ ᑲᑐᔾᔨᖃᑎᒌᖑᔪᑦ, ᐅᐱᙶᖑᓂᐊᕐᑐᕐᓗ ᐊᐅᔭᕐᓘᓐᓃᑦ ᓱᕋᒃᑎᖅᑕᐅᓕᒑᓪᓗᓂ, ᕿᓂᓕᓚᐅᕐᒪᑕ ᓄᓇᒥ ᐃᒡᓗᓕᐅᕐᕕᒋᓂᐊᕐᑕᖓᓂᒃ ᐊᒻᒪᓗ ᐱᔨᑦᑎᕋᐅᑎᖏᓐᓂᒃ ᐊᖏᒡᓕᕚᓪᓕᕈᑎᒃᓴᐅᓇᔭᕐᑐᒥ ᒪᑯᓄᖓ ᖃᓄᐃᑦᑕᐃᓕᑎᑦᑎᓂᕐᒧᑦ ᐊᒻᒪ ᒪᒥᓴᕐᐸᓪᓕᐊᓂᕐᒧᑦ. ᓄᓇᓕᐸᐅᔭᐃᑦ ᐃᓱᒪᓕᐅᕆᓕᓚᐅᕐᑐᑦ ᖁᕝᕙᕆᐊᖅᑎᑦᑎᔪᒪᓪᓗᑎᒃ ᓇᖕᒥᓂᕆᔭᐅᔪᓄᑦ ᑖᒃᓰᔭᕈᑎᒃᓴᓂᒃ, ᐃᒥᖅᑕᖅᑕᐅᔪᒪᓂᕐᒧᑦ ᐊᑭᓕᐅᑎᒃᓴᓂᒃ ᐊᒻᒪᓗ ᑯᕕᖅᑕᖅᑕᐅᔪᒪᓂᕐᒧᑦ ᐊᑭᓕᐅᑎᐅᕙᒃᑐᓂᒃ.

ᐊᑯᓂᕈᓗᒃ ᐃᓯᖅᑎᑦᑎᑦᑕᐃᓕᔪᖃᓚᐅᕐᑎᓪᓗᒍ ᐃᑲᕐᕋᑦ ᖁᓕᑦ ᐅᖓᑖᓂᒃ, ᐅᑯᐊ ᐃᖃᓗᖕᓂ ᐸᓖᓯᒃᑯᑦ ᖃᓄᐃᑦᑐᖃᕋᓂᒃ ᐋᖅᑭᒃᓯᔪᓐᓇᕐᓯᓚᐅᕐᐳᑦ ᑕᐃᔭᖓᓂᒃ “ᐱᒻᒪᕆᐅᓪᓗᓂ ᖃᓄᐃᓕᐅᕈᑎᒥᑦ.” ᐊᖑᑎ 31-ᓂ ᐊᕐᕌᒍᓕᒃ ᑎᒍᔭᐅᓚᐅᕐᑐᖅ ᐊᒻᒪ ᐸᓯᔭᒃᓴᙳᖅᑎᑕᐅᓪᓗᓂ ᐋᓐᓂᕐᓯᕆᓂᕐᒧᑦ, ᓱᒋᐅᑎᖃᕐᓂᕐᒧᑦ ᐊᒻᒪᓗ ᒪᓕᓚᐅᙱᓐᓂᖓᓂᒃ ᐊᓂᑎᑕᐅᑎᓪᓗᒍ ᒪᓕᒋᐊᓕᖕᓂ. ᑭᖑᓂᐊᒍᓪᓕ ᓄᑖᒥ ᐸᓯᔭᒃᓴᐅᔾᔪᑎᒥ ᐃᓚᒋᐊᖅᑎᑦᑎᓚᐅᕐᑐᑦ ᐆᒥᖓ ᐱᔭᐅᓯᒪᔪᒪᙱᑦᑐᒥᑦ ᐊᓂᑎᑦᑎᑦᑕᐃᓕᓂᕐᒥᒃ.

ᐃᓕᓐᓂᐊᕐᕕᐅᔪᑦ ᐃᖃᓗᖕᓂ ᒪᑐᕗᑦ, ᐆᒧᖓ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᑦ ᐅᓄᕐᓯᕚᓪᓕᕐᑎᓪᓗᒋᑦ ᐊᒻᒪᓗ ᓄᓇᕗᒥᑦ ᒐᕙᒪᒃᑯᑦ ᐊᑐᓕᖅᑎᑦᑎᑎᓪᓗᒋᑦ ᓄᑖᒥᒃ ᓄᕙᒡᔪᐊᕐᓇᖅ-19-ᒧᑦ ᐊᑐᖁᔭᐅᙱᑦᑐᓂᒃ, ᐃᓚᖃᖅᖢᓂ ᓂᕆᔭᖅᑐᕐᕕᐅᔪᑦ ᐃᓄᑭᓐᓂᕐᓴᐅᔭᕆᐊᖃᕐᓂᖏᓐᓂᒃ ᐊᒻᒪᓗ ᑖᒃᓰᑦ, ᐊᒻᒪ ᐳᓛᙱᓐᓂᕐᓴᐅᖁᔨᓪᓗᑎᒃ ᐃᓐᓇᑐᖃᕐᓄᑦ ᐊᒻᒪᓗ ᐊᖏᕐᕋᕆᔭᐅᑎᑕᐅᔪᓄᑦ.

ᑎᓯᐱᕆ

ᑲᓇᑕᒥ ᐅᓇᖃᖅᑐᒃᓴᑦ ᖃᖓᑕᓲᖓ CF-18 ᓱᒃᑲᔪᖅ ᓄᖅᑲᖓᕗᖅ ᖃᖓᑕᓲᒃᑯᕕᖕᒥᑦ ᐃᖃᓗᖕᓂ ᐅᕐᓴᒃᑕᐅᓚᐅᕐᖢᓂ. ᐅᓇ ᓱᒃᑲᔪᖅ ᐃᓚᒋᔭᐅᔪᖅ ᐊᖏᓂᕐᓴᓂᒃ ᓴᐳᓐᓂᐊᕐᓂᕐᒧᑦ ᐊᔪᕈᓐᓃᕐᓴᕈᑎᐅᔪᓂᒃ ᓄᓇᕗᑦ ᓯᓚᖓᓂᒃ ᑎᓯᐱᕆ 10-ᖑᑎᓪᓗᒍ. ᐅᓇ ᐊᔪᕈᓐᓃᕐᓴᕐᓂ ᐅᑯᓂᖓ ᓄᐊᑦ ᐊᒥᐊᓕᑲᒥᑦ ᖃᖓᑕᓲᓄᑦ ᓴᐳᓐᓂᐊᕐᕕᓕᕆᕝᕕᒃᒥᑦ ᐊᔪᕈᓐᓃᕐᓴᖅᐹᓪᓕᕈᑎᐅᔪᖅ ᐅᑭᐅᕐᑕᖅᑐᕐᒥᑦ ᖃᓄᐃᓕᐅᕆᐊᖃᕐᓂᕐᒥᑦ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)

ᐃᓄᐃᑦ ᓴᓇᐅᒐᓕᐅᕐᑎᐅᕙᒃᑐᑦ ᐋᖅᑭᒋᐊᕐᓯᓚᐅᕐᐳᑦ ᖃᓄᐃᓕᐅᕈᑎᒋᕙᒃᑕᖏᓐᓂᒃ ᕿᑲᕐᓇᒥ ᑕᒪᑐᒪᓂ ᐅᑭᐅᕐᒥ, ᐅᓇ ᓄᕙᒡᔪᐊᕐᓇᖅ-19 ᓄᖅᑲᖅᑎᑦᑎᒍᑎᐅᑎᓪᓗᒍ ᓴᓇᐅᒐᓂᒃ ᓂᐅᕕᐊᒃᓴᖃᑲᑕᖕᓂᐅᔪᓂᒃ. ᖃᕋᓴᐅᔭᒃᑯᑦ ᓂᐅᕕᐊᒃᓴᖃᑲᑕᖕᓂᖅ ᓴᖅᑭᓕᓚᐅᕐᐳᖅ ᐃᖃᓗᖕᓂᑦ ᐊᒻᒪᓗ ᐅᓇ ᐋᑎᒃ ᕙᓐᓱᔅ ᓂᐅᕕᕐᕕᒃ ᐃᓂᖃᖅᑎᑦᑎᓪᓕᕐᖢᓂ ᐃᓄᖕᓂ ᓴᓇᐅᒐᖏᓐᓂᒃ ᓂᐅᕕᐊᒃᓴᖃᕐᕕᒋᔪᓐᓇᖅᑕᖏᓐᓂᒃ ᑕᕝᕙᓂ.

ᐃᖃᓗᖕᓂ ᐃᒥᐊᓗᒋᐊᕐᕕᒃ ᓵᑦᕉᒻ ᐊᑭᓖᒋᐊᖃᖅᑎᑕᐅᓕᓚᐅᕐᑐᖅ $8,625 ᐃᓄᒋᐊᒃᑎᑦᑎᓯᒪᓗᐊᕐᓂᖏᓐᓄᑦ ᐱᖓᓱᐃᖅᖢᑎᒃ ᐊᑕᐅᑦᑐᒃᑰᙱᑦᑐᓂᒃ, ᓱᕋᐅᓂᖏᓐᓄᑦ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᖁᔭᖏᓐᓂᒃ.

ᓄᓇᓕᐸᐅᔭᐃᑦ ᐊᖏᓚᐅᕐᑐᑦ ᐆᒥᖓ $64-ᒥᓕᐊᓐ ᑖᓚᑐᕐᑐᒥ ᐸᕐᓇᐅᑎᐅᔪᒪᔪᒥ ᓴᓇᓂᐊᕐᓂᕐᒧᑦ ᓄᑖᒥ ᐃᒥᕐᑕᕐᕕᒃᓴᒥᑦ ᓈᒻᒪᖕᓂᕐᓴᐅᓇᔭᕐᑐᒥ ᓄᓇᕗᒥᑦ ᐊᖓᔪᖅᑳᖃᕐᕕᐅᑉ ᐅᓄᕐᓯᕙᓪᓕᐊᓂᐊᓄᑦ ᐊᒻᒪ ᐃᒪᖃᕈᓐᓃᔭᕈᓐᓃᕐᓗᑎᒃ.

ᐃᖃᓗᖕᓂ ᓄᓇᖃᖅᑐᖅ ᑯᕆᔅᑎᓐ ᑲᐅᓇᒃ ᓴᖅᑭᔮᖅᑐᑦ ᐅᑯᐊ ᑎᒻ ᕼᐅᐊᑕᓐᑯᑦ ᕿᑲᕐᓇᒧᑦ ᒪᓂᓴᐅᑎᖓᒍᑦ ᓴᖅᑭᔮᖅᑎᑦᑎᔪᒥ ᑲᓇᑕᓕᒫᒥᑦ ᐃᓚᒌᓂᒃ ᐊᖏᕐᕋᖏᓐᓂᒃ ᐊᒻᒪᓗ ᐊᐳᑎᒥᒃ ᐃᓄᙳᐊᓕᐊᕆᓯᒪᔭᖏᓐᓂᒃ.

Share This Story

(0) Comments