ᐅᓄᕐᓂᕐᓴᐃᑦ ᓄᓇᕕᒃᒥ ᐃᑭᑦᑐᕕᓃᑦ ᐅᕙᑦᑎᒋᔭᐅᔪᓃᓚᐅᕐᑐᑦ ᐊᕐᕌᓂᒃ, ᐅᓂᒃᑳᓕᐊᑦ ᐅᖃᕐᓯᒪᔪᑦ

ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᐱᓕᕆᖃᑎᖃᖅᖢᑎᒃ ᐃᒡᓗᓕᕆᔨᒃᑯᓐᓂᒃ ᓄᓇᓕᖕᓂ ᐱᓕᕆᕝᕕᐅᔪᑦ ᐃᓕᓐᓂᐊᖅᑎᑦᑎᖃᑦᑕᖁᔭᐅᓪᓗᑎᒃ ᐃᑭᑎᑦᑎᑦᑕᐃᓕᒪᓂᕐᒥ

ᐅᑯᑎᒎᓇᖅ 2021-ᒥ ᓇᓗᓇᐃᖅᑕᐅᓯᒪᔪᓂᒃ ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ ᓇᐅᑦᑎᕐᓱᕐᓂᕐᒧᑦ, 68-ᓂ ᐃᑭᑦᑐᓂᒃ 40 ᐃᑭᑦᑐᑦ ᐅᕙᑦᑎᒋᔭᐅᔪᓃᓚᐅᕐᑐᑦ. (ᐊᔾᔨᓕᐅᕆᔨ ᔨᐊ ᐱᐊᑦᓯᐃ)

By ᔨᐊᕝ ᐱᐊᑦᓯᐃ

For English version, see Most Nunavik fires happened at home last year, report shows

ᐅᓄᕐᓂᕐᓴᐃᑦ ᓄᓇᕕᒃᒥ ᐃᑭᑦᑐᕕᓃᑦ ᐊᕐᕌᓂ ᐅᕙᑦᑎᒋᔭᐅᔪᓃᓚᐅᕐᓯᒪᔪᑦ, ᓇᓗᓇᐃᔭᐃᔾᔪᑎᖅ ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᓇᐃᑦᑎᖅᓱᓂᕐᒥᒃ ᐱᓕᕆᕝᕕᐅᑉ ᐅᓂᒃᑳᖏᑦ ᐅᖃᕐᓯᒪᔪᑦ.

ᑲᑎᖢᑎᒃ 68-ᓂ ᐃᑭᑦᑐᖃᓚᐅᕐᓯᒪᖕᒪᓐ ᓄᓇᕕᒃᒥᑦ ᐊᕐᕌᓂ, ᐊᑕᐅᓯᕐᒥ ᐅᓄᕐᓂᕐᓴᓪᓗᓂ ᐊᕐᕌᓂ ᐅᖓᑖᓂᐅᓚᐅᕐᑐᖅ, ᐅᑯᐊ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ ᓇᐅᑦᑎᖅᓱᕐᓂᕐᒧᑦ ᑐᑭᒧᐊᖅᑎᑦᑎᔨ ᒪᒥᐊᓪ ᓚ ᒑᓪ-ᐸᐃᓐ ᐅᖃᓚᐅᕐᑐᖅ ᑲᑎᒪᑎᓪᓗᒋᑦ ᔫᓂ 1-ᒥ.

ᑖᒃᑯᓇᙵᑦ, 40 ᐃᑭᑦᑐᕕᓃᑦ ᐅᕙᑦᑎᒋᔭᐅᔪᓂᐅᓚᐅᕐᑐᖅ. ᐊᔾᔨᒌᙱᑦᑐᓄᑦ ᐱᒋᐊᕈᑎᖃᖃᑦᑕᓚᐅᕐᑐᑦ ᒪᑯᓇᙵᑦ ᐃᖕᓂᕐᓄᑦ, ᐅᖅᑰᓴᐅᑎᓄᑦ ᐊᒻᒪ ᐅᐊᔭᓅᖅᑐᓄᑦ. ᐃᑭᑦᑐᓂᒃ ᐱᓕᕆᐊᖃᓚᐅᕐᒥᔪᑦ ᓴᓇᕝᕕᖕᓂᒃ, ᐃᓕᓐᓂᐊᕐᕕᖕᓂᒃ, ᐋᓐᓂᐊᕕᖕᓂᒃ ᐊᒻᒪ ᐊᓯᖏᓐᓂᒃ ᐃᒡᓗᖁᑎᒋᔭᐅᔪᓂᒃ.

ᓚ ᒑᓪ-ᐸᐃᓐ ᐅᖃᓚᐅᕐᑐᖅ ᐅᕙᑦᑎᒋᔭᐅᔪᓂᒃ ᐃᑭᒃᑐᑦ ᓇᐅᑦᑎᖅᓱᖅᑎᓄᑦ ᐃᑭᑦᑕᐃᓕᓂᕐᒥᒃ ᐱᓕᕆᑎᑦᑎᓂᕐᓴᐅᓂᐊᕐᑐᑦ ᐃᑭᑦᑕᐃᓕᒪᓂᕐᒥᒃ ᐱᓕᕆᖃᑎᖃᕐᓗᑎᒃ ᓄᓇᓕᖕᓂ ᖃᑦᑎᕆᔨᒃᑯᑦ ᐊᖓᔪᖅᑳᖏᓐᓂᒃ ᐊᒻᒪᓗ ᑲᑎᕕᒃ ᓄᓇᓕᖕᓂᒃ ᐃᒡᓗᓕᕆᔨᒃᑯᓐᓂᒃ.

ᐋᖅᑭᒃᓯᓯᒪᔪᑦ ᓄᓇᓕᖕᓂ ᐃᒡᓗᖃᕐᑐᓂᒃ ᐳᓛᑲᑕᒡᓗᑎᒃ ᑖᒃᑯᐊ ᐃᒡᓗᖃᕐᑐᑦ ᐅᓗᕆᐊᓇᙱᑦᑐᒦᒪᖔᑕ ᐊᒻᒪᓗ ᐊᓂᑲᐅᖅᑐᕈᓐᓇᕐᓯᑎᑕᐅᓗᑎᒃ ᐃᑭᑦᑐᖃᕐᓂᖅᐸᑕ.

“ᓄᓇᓕᖕᓂ ᖃᑦᑎᕆᔨᒃᑯᑦ ᐃᒡᓗᖃᖅᑐᓂᒃ ᐳᓛᑲᑕᖕᓂᕐᓴᐅᓗᑎᒃ ᑕᐃᒪᓐᓇ ᐃᒡᓗᖃᕐᑐᑦ ᐃᑭᑎᑦᑎᑦᑕᐃᓕᓂᕐᒥ ᐅᖃᓪᓚᒡᕕᐅᑲᑕᒡᓗᑎᒃ ᐃᒡᓗᖏᓐᓂᒃ ᐊᒻᒪᓗ ᐃᒡᓗᒋᔭᐅᔪᑦ ᖁᐊᕐᓵᕐᓇᙱᒃᑲᓗᐊᕐᒪᖔᑕ,” ᓚ ᒑᓪ-ᐸᐃᓐ ᐅᖃᕐᑐᖅ.

ᑕᐃᒪᙵᓪᓕ 2017-ᒥ ᐊᕐᕌᒍᒧᑦ ᐃᑭᑦᑐᑦ ᓄᓇᕕᒃᒥ ᒫᓃᖃᑦᑕᕐᓯᒪᔪᑦ 59-ᒥ 72-ᒧ, ᑕᐃᒪᓐᓇᓗ 2021-ᒥ ᐃᑭᑦᑐᕕᓃᑦ ᐊᕐᕌᓂᐅᓚᐅᕐᑑᑉ ᖃᓂᒋᖕᒥᔭᖏᑦ. ᐳᕕᕐᓂᕐᑐᖅ ᐅᓄᓛᓂ ᐃᑭᑦᑐᖃᕐᓯᒪᔪᖅ 12-ᓂ ᐊᒻᒪ ᑭᖑᓂᑦᑎᐊᖓᓂ ᓴᓪᓗᐃᑦ 11-ᓂ ᐃᑭᑦᑐᖃᕐᓯᒪᓪᓗᓂ.

ᐃᑭᑦᑐᐃᑦ ᑮᓇᐅᔭᓂᒃ ᒫᓂ $3.8 ᒥᓕᐊᓐ ᑖᓚᐃᑦ ᒥᒃᓵᓂ ᐊᓯᐅᔨᓯᒍᑎᐅᔪᑦ ᐊᕐᕌᓂ, ᐅᑯᑎᒎᓇᕐᓕ ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᑎᑎᕋᕐᓯᒪᔭᖏᓐᓂᒃ.

ᐃᑭᑦᑐᓄᑦ ᐃᓅᔪᓐᓃᖅᑐᖃᕐᓯᒪᙱᒃᑲᓗᐊᖅᖢᓂ 7-ᓂ ᐃᓄᖕᓂ ᐋᓐᓂᖅᑐᖃᓚᐅᕐᓯᒪᔪᖅ, 14-ᓗ ᐃᑲᔪᖅᑕᐅᔭᕆᐊᖃᖅᖢᑎᒃ ᐊᓂᔪᓐᓇᐃᓕᔪᓂᒃ ᐊᒻᒪᓗ 25-ᓂ ᐊᓂᔭᕆᐊᖃᕆᔭᐅᔪᓂᒃ ᐊᕐᕌᒎ ᐃᓗᐊᓂ.

ᑯᐸᐃᒃᒥ ᑭᒃᑯᓕᒫᓂ ᐱᕐᕈᓗᐊᕿᑎᑦᑎᑦᑕᐃᓕᓂᕐᒧᑦ ᒥᓂᔅᑕᖃᕐᕕᒃ ᓇᓗᓇᐃᔭᐃᓯᒪᖕᒪᑐ ᑐᑭᒧᐊᕈᑎᒃᓴᓂᒃ “ᖃᓄᐃᓕᐅᕈᑎᒃᓴᓄᑦ ᐱᓕᕆᔨᓄᑦ,” ᑖᒃᑯᐊᓗ ᓯᕗᓪᓕᐅᕙᓚᐅᖅᖢᑎᒃ ᐃᑭᑦᑐᓂᒃ ᐱᓕᕆᔭᖅᑐᖅᖢᑎᒃ. ᓄᓇᕕᒃᒥ ᑐᑭᒧᐊᕈᑎᐅᔪᑦ ᐋᖅᑭᒃᓯᓯᒪᔪᖅ ᖃᑦᑎᕆᔨᒃᑯᑦ ᐊᒃᓱᓪᓘᓐᓃᑦ ᑎᓴᒪᓂᒃ ᖃᑦᑎᕆᔨᓂᒃ “ᓯᕗᓪᓕᖅᐹᓂᒃ ᐅᐸᒃᑐᖃᖅᐸᓪᓗᓂ” ᐃᑭᑦᑐᓄᑦ ᑭᓯᐊᓂᓕ ᑰᔪᐊᖅ ᑕᐃᒪᐃᙱᑦᑐᖅ ᑖᒃᑯᐊᓕ 8-ᖑᖁᔭᐅᓯᒪᖕᒪᑕ ᐅᐸᒍᑎᔪᑦ.

ᐃᑭᑦᑐᓄᑦ ᑭᐅᓯᔪᖅ 15 ᒥᓂᑦᔅ ᑐᖔᓂᓪᓘᓐᓃᑦ ᐅᐸᒍᑎᓯᒪᔭᕆᐊᖃᖅᑐᑦ.

6-ᖑᔪᑦ ᓄᓇᓖᑦ ᐱᓕᕆᔨᖃᕐᑐᑦ ᐊᑐᖁᔭᐅᓯᒪᓂᒃᑯᑦ ᐅᑯᐊ ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᐅᓂᒃᑳᖏ ᐅᖃᕐᓯᒪᔪᑦ. ᑭᓯᐊᓂᓕ, ᖃᑦᑎᕆᔨᒃᑯᑦ ᓄᓇᕕᒃᒥ ᐅᖃᐅᓯᐅᓯᒪᓚᐅᕐᑐᑦ 15-ᒥᓂᑦᔅ ᑭᐅᓯᒪᖃᑦᑕᕐᓯᒪᓂᖏᓐᓂᒃ ᐃᑭᑦᑐᓂᒃ.

“ᐃᓄᐃᑦ ᐅᐸᒍᑎᑲᐅᑎᒋᕙᒃᑐᑦ, ᑭᓯᐊᓂᓕ, ᐱᓕᕆᐊᖃᕆᐊᖃᕋᑦᑕ ᐱᓕᕆᑎᑦᑎᕙᓪᓕᐊᓂᕐᒥᒃ, ᐱᓕᕆᑎᑦᑎᑦᑏᓐᓇᕋᓱᖕᓂᕐᒥᒃ, ᐊᔪᕈᓐᓃᕐᓴᖅᑎᑦᑎᓂᕐᒥᒃ ᖃᑦᑎᕆᔩᑦ ᓈᒻᒪᖃᑦᑕᕐᓂᐊᕐᒪᑕ ᐃᑭᑦᑐᓄᐊᕆᐊᓖᑦ,“ ᓚᒑᓪ-ᐸᐃᓐ ᐅᖃᓚᐅᕐᑐᖅ.

ᓯᕗᒧᓪᓕ, ᓚ ᒑᓪ-ᐸᐃᓐ ᐅᖃᓚᐅᕐᑐᖅ ᐃᑭᑎᑦᑎᑦᑕᐃᓕᓂᖅ ᐊᒻᒪ ᐱᕐᕈᓗᐊᕿᑦᑕᐃᓕᓂᖅ ᐅᔾᔨᕈᓱᓕᖅᑎᑦᑎᔾᔪᑎᐅᓂᐊᕐᑐᑦ ᓇᐅᒃᑯᑐᐃᓐᓇᖅ, ᐃᓕᓐᓂᐊᕐᕕᖕᓂᒃ ᐊᒻᒪ ᑐᓴᐅᒪᔾᔪᑎᓕᕆᓂᒃᑯᑦ, ᓄᓇᕕᒻᒥᐊ ᐸᕐᓇᒃᓯᒪᔪᓐᓇᖁᓪᓗᒋᑦ ᑐᐊᕕᕐᓇᖅᑐᓄᑦ.

“ᐱᓕᕆᐊᖃᕐᓂᕐᓴᐅᓂᐊᕐᑐᒍ ᐃᑭᑎᑦᑎᑦᑕᐃᕐᓕᓂᕐᒥᒃ ᐊᕐᕌᒍᒥ ᐊᓗᒡᒋᖅᑐᒥᒃ,” ᐅᖃᕐᑐᖅ.

“ᐱᓕᕆᐊᕆᓯᒪᔭᕗᑦ ᐊᑐᖃᑦᑕᐃᓐᓇᕐᓗᑎᒃ ᐱᓕᕆᖃᑎᖃᕐᓗᑕ ᖃᑦᑎᕆᔨᒃᑯᑦ ᐊᖓᔪᖅᑳᖏᓐᓂᒃ ᐊᒻᒪᓗ ᐊᓯᖏᓐᓂᒃ ᖃᑦᑎᕆᓂᕐᒧᑦ ᐱᓕᕆᐊᖃᖅᑐᓂᒃ ᑕᐃᒪᓕ ᐱᓇᓱᒋᐊᖃᕋᑦᑕ ᐃᑭᓐᓇᔭᕐᑐᑦ ᐅᓄᙱᓐᓂᕐᓴᐅᑎᓐᓇᓱᒡᓗᒋᑦ ᐊᕐᕌᒍᓂᒃ ᐊᒡᒋᖅᑐᓂᒃ.”

Share This Story

(0) Comments

Join the Conversation

Your email address will not be published. Required fields are marked *

*