ᐅᖃᓪᓚᖃᑎᒌᖕᓂᖅ ᑐᕌᒐᖃᖅᑎᑕᐅᔪᖅ ᐅᕌᒡᓚᓐ ᐅᔭᕋᒃᓯᐅᖅᕕᒃᒥ ᐃᖅᑲᓇᐃᔭᖅᑎᖏᓐᓂᒃ ᐃᖅᑲᓇᐃᔭᓕᖅᑎᑦᑎᓇᓱᖕᓂᕐᒥᒃ

For English version, see Raglan Mine makes new offer to striking employees

ᐅᖃᓪᓚᖃᑎᒌᖕᓂᐅᔪᑦ ᐋᖅᑭᒃᓯᓇᓱᖕᓂᕐᒥ ᐱᓇᓱᐊᕈᓯᕆᓕᖅᑕᖓᓂ 7-ᓂ ᓄᖃᖓᔪᓂ ᓈᒻᒪᙱᓕᐅᕈᑎᖃᓕᓚᐅᕐᑐᑦ, ᐅᓇ ᐅᔭᕋᒃᓯᐅᖅᕕᒃᒥ ᓇᖕᒥᓂᖃᖅᑐᑦ ᒐᓚᓐᑯᐊᑯ ᐅᖃᖅᖢᑎᒃ ᔪᓚᐃ 8-ᒥ ᐅᑯᐊ ᔫᓇᐃᑕᑦ ᓴᕕᕋᔭᖕᓂᒃ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᑦ “ᐃᓚᐅᔪᓐᓃᖅᖢᑎᒃ” ᐋᔩᖃᑎᒌᖕᓂᕐᒥᒃ.

ᐅᓄᕐᓂᕐᓴᐃᑦ ᐃᖅᑲᓇᐃᔮᕆᔭᐅᔪᑦ ᐅᔭᕋᒃᓯᐅᖅᕕᒃᒥ ᓄᖅᑲᖅᑕᐅᓚᐅᕐᓯᒪᖕᒪᑕ ᒪᐃ 27-ᒥ ᒫᓂ 630-ᖏᓐᓂ ᐃᖅᑲᓇᐃᔭᖅᑎᒋᔭᐅᔪᑦ, ᐃᓚᒋᔭᐅᓪᓗᑎᒡᓗ ᓴᕕᕋᔭᖕᓂᒃ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᓂ ᓇᐃᓴᐅᑎᓕᒃ 9449 ᓈᒻᒪᒃᓴᙱᓐᓂᕐᒧᑦ ᓄᖅᑲᕈᒪᑎᓪᓗᒋᑦ. ᑲᒻᐸᓂᐅᔪᖅ ᐊᒻᒪ ᑲᑐᔾᔨᖃᑎᒌᑦ ᐋᔩᖃᑎᒌᖃᑦᑕᕐᓯᒪᖕᒪᑕ ᓄᑖᓂ ᑳᓐᑐᕌᕈᑎᒃᓴᓂ ᐱᓕᕆᐊᖃᖅᖢᑎᒃ ᒫᔅᓯ ᓄᙳᐊᕐᓂ ᐱᒋᐊᖅᑕᕕᓂᖏᓐᓂᒃ.

ᐅᕌᒡᓚᓐ ᐅᔭᕋᒃᓯᐅᖅᕕᒃ, ᒫᓃᑦᑐᖅ ᐅᖓᕙᐅᑉ ᑲᖏᖅᖢᐊᑕ ᐅᐊᖕᓇᖅᐸᓯᐊᑕ ᑲᓇᖕᓇᖓᓂ, ᑯᐸᐃᒃᒥ ᐊᖏᓂᖅᐹᖑᔪᖅ ᓂᑯᓪᒥ (nickel) ᐋᖅᑭᒃᓱᐃᕙᒃᑐᓂᒃ, ᐅᔭᕋᒃᓯᐅᖅᐸᒃᖢᑎᒃ 1.5 ᒥᓕᐊᓐ ᑕᓐᔅ ᓴᕕᕋᔭᒃᓴᓂᒃ ᐊᕐᕌᒍᒥ. ᐅᔭᕋᒃᓯᐅᖅᕕᒃ 40,000 ᑕᓐᔅᓂ ᓂᑯᓪᓴᓕᐅᖃᑦᑕᖅᑐᑦ ᐊᕐᕌᒍᒥ ᐊᒻᒪᓗ ᒥᑭᓐᓂᕐᓴᓂᒃ ᑳᐳ (copper) ᐊᒻᒪ ᑯᐹᑦᓂᒃ (cobalt). ᐅᓇ ᐅᔭᕋᒃᓯᐅᖅᕕᒃ ᓄᓇᕕᒻᒥ ᐃᖅᑲᓇᐃᔭᖅᑎᑦᑎᔨᖃᐅᓛᖑᔪᖅ ᒫᓂ 1,200-ᖏᓐᓂᒃ ᐃᖅᑲᓇᐃᔭᖅᑎᑦᑎᕙᒃᖢᑎᒃ.

ᑐᓴᒐᒃᓴᑎᒍ ᔪᓚᐃ 8-ᒥ, ᑲᒻᐸᓂᐅᔪᖅ ᐅᖃᓚᐅᕐᓯᒪᔪᖅ ᐊᖏᖃᑎᒌᒍᑎᓂᒃ ᐋᖅᑭᒃᓯᔪᒪᓪᓗᑎᒃ ᔪᓚᐃ 10 ᑎᑭᑎᓪᓗᒍ. ᑐᓴᒐᒃᓴᓕᐊᕆᔭᐅᓯᒪᔪᖅ ᐅᖃᕐᓯᒪᓚᐅᙱᑦᑐᖅ ᖃᓄᐃᒻᒪ ᑕᕝᕙᓂ ᐅᓪᓗᕐᒦᑎᑕᐅᖕᒪᖔᑦ.

“ᐊᐃᑦᑖᕈᓱᒃᑐᒍᑦ ᑲᑐᔾᔨᖃᑎᒌᑦ ᐋᔩᖃᑎᒌᖕᓂᕐᒥ ᓄᖃᑐᐃᓐᓇᕐᓂᖏᓐᓂᒃ, ᐅᖃᐅᓯᖃᕈᓐᓇᖅᓯᑎᓪᓗᑕ ᐋᖅᑭᒍᑎᐅᓇᓱᒃᑐᓂᒃ,” ᐅᖃᕐᑐᖅ ᐅᕌᒡᓚᓐ ᐅᔭᕋᒃᓯᐅᖅᕕᒃᒧᑦ ᐊᖓᔪᖅᑳᖓᑕ ᑐᒡᓕᖓ ᐱᐊᕆ ᐳᕋᑦ ᑐᓴᒐᒃᓴᑎᒍᑦ.

ᐅᖃᕐᑎᒋᔭᐅᔪᖅ ᓴᕕᕋᔭᖕᓂᒃ ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᓄᑦ ᐅᖃᓪᓚᒡᕕᐅᔪᓐᓇᓚᐅᙱᒻᒪᑦ ᔪᓚᐃ 8-ᒥ. ᓯᕗᓂᐊᒍᓪᓕ ᑲᑐᔾᔨᖃᑎᒌᑦ ᐋᔩᖃᑎᖃᕈᒪᓚᐅᕐᑐᑦ ᐃᖅᑲᓇᐃᔭᕐᕕᐅᑉ ᖃᓄᐃᓕᖓᓂᖓᓂᒃ ᐊᒻᒪᓗ ᐃᖅᑲᓇᐃᔭᖅᑏᑦ ᑮᓇᐅᔭᓕᐊᕆᔭᖏᓐᓂᒃ ᐅᓄᕐᓯᒋᐊᖅᑎᑦᑎᔪᒪᓂᕐᒥᒃ.