ᐊᐅᐸᖅᑐᑦ ᐊᒪᐅᑏᑦ ᐃᓱᒪᒋᔭᖃᕈᑎᐅᔪᑦ ᔭᒐᓯᒪᔪᓂᒃ ᐃᓄᐊᖅᑕᐅᓯᒪᔪᓂᒡᓗ ᐃᓄᖕᓂ ᐊᕐᓇᓂᒃ ᓂᕕᐊᕐᓵᓂᒡᓗ

For English version, see Red amautiit honour missing and murdered Inuit women and girls

ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐊᐅᐸᖅᑐᑦ ᐊᒪᐅᑏᑦ ᐱᓕᕆᐊᒃᓴᖅ ᓴᖅᑭᔮᖅᑎᑕᐅᔪᑦ ᓄᓇᕗᑦ ᒪᓕᒐᓕᕆᕕᒡᔪᐊᕐᒥ ᐃᖃᓗᖕᓂ.

ᐅᓇ ᐱᓕᕆᐊᒃᓴᖅ ᑕᓪᓕᒪᓂᒃ ᐃᓕᖅᑯᓯᕆᔭᐅᔪᑎᒍ ᓴᖅᑭᔮᕈᑎᐅᔪᖅ ᐃᓄᐃᑦ ᐊᕐᓇᐃᑦ ᐊᒪᐅᑎᖏᓐᓂᒃ ᐅᔾᔨᕈᓱᓕᖅᑎᑦᑎᓇᓱᒃᖢᑎᒃ ᑕᐃᒃᑯᓂᖓ ᔭᒐᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᐃᓄᖕᓂ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ.

ᐊᑐᓂ ᐊᒪᐅᑏᑦ ᓴᓇᔭᐅᓚᐅᕐᑐᑦ ᐊᔾᔨᒌᙱᑦᑐᓄᑦ ᒥᕐᓱᖅᑎᓄᑦ ᑎᓴᒪᓂᙶᖅᑐᓂᒃ ᐊᕕᒃᑐᖅᓯᒪᓂᒃᑯᑦ ᐃᓄᐃᑦ ᓄᓇᖏᓐᓂᒃ ᑲᓇᑕᒥ: ᓄᓇᕗᒥᑦ, ᔫᓇᐃᓯ ᑑᙶᓗᒃ ᐃᒃᐱᐊᕐᔪᒃᒥ, ᐊᒻᒪ ᓈᓐᓯ ᐳᑭᓐᓇᖅ ᐊᐅᐸᓗᒃᑐᖅ ᖃᒪᓂᑦᑐᐊᖅᒥ; ᓄᓇᕕᒃᒥᓪᓕ, ᓴᐃᕋ ᓴᒥᓴᒃ ᐃᓄᒃᔪᐊᒃᒥ; ᓛᐸᑐᐊᒥ, ᕼᐃᐊᑐ ᐊᕐᓇᑐᒃ ᓇᐃᓐᒥ ᐊᒻᒪᓗ ᓄᓇᑦᓯᐊᖅᒥ ᓲᓕ ᐃᓚᐃᐊᔅ ᐃᓅᕕᒃᒥ.

ᐸᐅᒃᑑᑎᒃᑯᑦ ᑖᔅᓱᒥᖓ ᓴᕿᑎᑦᑎᓚᐅᕐᑐᑦ ᒪᐃ 23ᒥ ᑲᑎᒪᔨᕐᔪᐊᑦ ᑲᑎᒫᓂᒃᑎᓪᓗᒋ ᐊᒻᒪᓗ ᑕᒪᒃᑭᐸᓗᒃᖢᑎᒃ ᒪᓕᒐᓕᕆᔩᑦ ᐅᐸᒃᓯᒪᓪᓗᑎᒃ.

“ᒪᒥᓴᖅᐸᓪᓕᐊᓂᖅ ᐱᒋᐊᕆᐊᖃᓕᕐᑐᖅ ᐅᑯᓄᖓ ᑲᒪᒋᔭᐅᓗᓂ ᐃᓄᖕᓄᑦ ᐊᕐᓇᓄᑦ, ᓂᕕᐊᕐᓵᓄᑦ ᐊᓯᐊᒎᖓᔪᓄᓪᓗ ᖃᐅᔨᒪᓪᓚᕆᖕᒪᑕ ᐅᑯᓂᖓ ᔭᒐᓯᒪᔪᓂᒃ, ᐃᓄᐊᖅᑕᐅᓯᒪᔪᓂᒡᓗ ᐃᓄᖕᓂ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ (MMIWG), ᐊᒻᒪᓗ ᓇᖕᒥᓂᖅ ᐱᓕᕆᔨᖃᕆᐊᖃᖅᖢᑎᒃ ᐋᖅᑭᒋᐊᕈᑎᒃᓴᓂᒃ ᐃᓱᒪᓕᐅᕆᓂᕐᒧᑦ ᑕᒪᑐᒥᖓ,” ᐅᖃᓚᐅᕐᑐᖅ ᓗᐃ ᒪᐃᑦ, ᐸᐅᒃᑑᑎᒃᑯᓐᓄᑦ ᑲᑎᒪᔨᐅᖃᑕᐅᔪᖅ ᕿᑭᖅᑕᓂ ᓂᒋᐊᓄᑦ.

“ᐅᓪᓗᒥ ᓯᕗᓪᓕᖅᐹᖑᔪᖅ ᑖᒃᑯᐊ ᑕᓪᓕᒪᑦ ᐊᒪᐅᑏᑦ ᓴᖅᑭᔮᖅᑎᑕᐅᓪᓗᑎᒃ. ᐃᒃᐱᒍᓱᑦᑎᐊᖅᑐᒍᑦ ᐊᒻᒪ ᖁᕕᐊᓱᒻᒪᕆᒃᑐᒍᑦ ᑖᒃᑯᓂᖓ ᓴᕿᔮᖅᑐᓂᒃ ᑕᑯᖃᑕᐅᔪᓐᓇᕐᓂᐊᕋᔅᓯ ᐅᕙᓂ ᒪᓕᒐᓕᕆᕕᒡᔪᐊᕐᒥ.”

ᐅᓇ ᐊᐅᐸᖅᑐᑦ ᐊᒪᐅᑏᑦ ᐱᓕᕆᐊᒃᓴᖅ ᐃᖃᓗᖕᓃᓐᓂᐊᖅᑐᖅ ᔫᓂ 6 ᑎᑭᓪᓗᒍ ᐊᒻᒪᓗ ᐊᓯᖏᓐᓂ ᓄᓇᓕᖕᓂ ᓴᖅᑭᔮᖅᑎᑕᐅᓛᖅᖢᑎᒃ ᑲᓇᑕᒥ.